ᱢᱟᱨᱟᱝ ᱥᱟᱠᱨᱟᱛ ᱟᱵᱚ ᱥᱟᱱᱛᱟᱲ ᱦᱚᱸ ᱵᱚ ᱢᱟᱱᱟᱣ ᱜᱮᱭᱟ ᱾ ᱜᱚᱲᱚᱢ ᱦᱟᱲᱟᱢ ᱞᱟᱹᱭ ᱠᱟᱛᱷᱟ ᱛᱮ ᱥᱟᱱᱟᱢ ᱵᱟᱹᱫᱽ
ᱠᱟᱹᱢᱤ, ᱦᱳᱲᱳ ᱠᱚ ᱵᱚᱱ ᱵᱟᱭ ᱪᱟᱵᱟᱭᱟ ᱚᱱᱟ ᱛᱟᱭᱚᱢ ᱜᱮ ᱯᱩᱥ ᱵᱚᱸᱜᱟ ᱠᱷᱟᱱ ᱢᱟᱨᱟᱝ ᱥᱟᱠᱨᱟᱛ ᱦᱤᱡᱩᱜᱼᱟ ᱚᱱᱟ
ᱨᱮᱫᱚ ᱡᱟᱦᱟᱸ ᱛᱤᱱᱟᱹᱜ ᱦᱳᱲᱳ ᱦᱩᱭᱩᱜ ᱵᱟᱝ ᱦᱩᱭᱩᱜ ᱡᱚᱛᱚ ᱚᱲᱟᱜ ᱡᱟᱠ ᱦᱚᱲ ᱵᱚᱱ ᱞᱩᱜᱽᱲᱤᱜᱼᱟ ᱾ ᱚᱱᱟ ᱚᱠᱛᱚ ᱫᱚ ᱜᱩᱛᱤ ᱟᱨ ᱠᱟᱹᱲᱢᱤ ᱦᱚᱸ ᱱᱟᱣᱟ ᱞᱩᱜᱽᱲᱤ ᱮᱢ ᱞᱟᱜᱟᱣᱜ ᱜᱮᱭᱟ ᱾ ᱥᱟᱠᱨᱟᱛ ᱨᱮᱫᱚ ᱡᱚᱛᱚ ᱚᱲᱟᱜ ᱨᱮᱜᱮ ᱦᱚᱞᱚᱝ, ᱡᱤᱞ, ᱠᱷᱟᱹᱡᱟᱹᱲᱤ, ᱛᱟᱵᱮᱱ ᱟᱨ ᱜᱩᱲ ᱫᱚᱠᱚ ᱠᱩᱲᱟᱣ ᱜᱮᱭᱟ ᱾ ᱡᱟᱦᱟᱸᱭ ᱫᱟᱲᱮᱭᱟᱜ ᱠᱷᱟᱱ ᱟᱨᱦᱚᱸ ᱱᱟᱱᱟ ᱨᱚᱠᱚᱢ ᱟᱜ ᱠᱚ ᱵᱮᱱᱟᱣ ᱛᱮ ᱡᱚᱛᱚ ᱦᱚᱲ ᱠᱚ ᱡᱚᱢ ᱧᱩ ᱠᱟᱛᱮ ᱠᱚ ᱨᱟᱹᱥᱠᱟᱹᱭᱟ ᱾ ᱵᱟᱹᱶᱰᱤ ᱥᱮᱴᱮᱨ ᱮᱱᱟ ᱾ ᱟᱹᱛᱩ ᱠᱚᱲᱟ ᱡᱚᱛᱚ ᱜᱟᱹᱲᱤ ᱟᱥᱮᱱ ᱠᱚ ᱥᱟᱯᱲᱟᱣᱜ ᱠᱟᱱᱟ ᱚᱠᱚᱭ ᱫᱚ ᱠᱩᱲᱤ, ᱚᱠᱚᱭ ᱫᱚ ᱜᱟᱹᱲᱤ, ᱚᱠᱚᱭ ᱫᱚ ᱠᱚᱠᱚᱭ ᱡᱩᱜᱤ ᱟᱨ ᱚᱠᱚᱭ ᱠᱚᱫᱚ ᱦᱟᱲᱟᱢᱼᱵᱩᱰᱷᱤ ᱞᱮᱠᱟ ᱥᱟᱡᱟᱣ ᱠᱟᱛᱮ ᱚᱲᱟᱜ ᱚᱲᱟᱜ ᱢᱟᱲᱟᱝ ᱦᱤᱞᱚᱜ ᱫᱚ ᱫᱤᱥᱚᱢ ᱜᱟᱹᱲᱤ ᱢᱮᱱᱮᱫ ᱮᱴᱟᱜ ᱟᱹᱛᱩ ᱜᱟᱹᱲᱤ ᱟᱥᱮᱱ ᱠᱚ ᱪᱟᱞᱟᱣᱼᱟ ᱾ ᱫᱚᱥᱟᱨ ᱦᱤᱞᱚᱜ ᱫᱚ ᱟᱹᱛᱩ ᱨᱮᱜᱮ ᱠᱚ ᱜᱟᱹᱲᱤᱭᱟ ᱾ ᱜᱟᱹᱲᱤ ᱟᱥᱮᱱ ᱚᱠᱛᱚ ᱱᱟᱱᱟ ᱨᱚᱠᱚᱢ ᱠᱟᱛᱷᱟ ᱠᱚ ᱞᱟᱹᱭᱟ ᱾ ᱮᱱᱮᱡ ᱠᱚᱫᱚ ᱠᱚ ᱮᱱᱮᱡᱼᱟ, ᱱᱚᱝᱠᱟ ᱠᱟᱛᱮ ᱚᱲᱟᱜ ᱚᱲᱟᱜ ᱠᱚ ᱠᱚᱭᱟ ᱾ ᱠᱚᱭ ᱨᱮᱫᱚ ᱠᱷᱟᱹᱡᱟᱹᱲᱤ, ᱯᱤᱴᱷᱟ ᱟᱨ ᱪᱟᱣᱞᱮ ᱠᱚ ᱮᱢᱟ ᱠᱚᱣᱟ ᱾ ᱨᱩᱣᱟᱹᱲ ᱠᱟᱛᱮ ᱯᱤᱴᱷᱟᱹ ᱠᱷᱟᱹᱡᱟᱹᱲᱤ ᱫᱚᱠᱚ ᱡᱚᱢ ᱢᱤᱫᱟ ᱟᱨ ᱪᱟᱣᱞᱮ ᱫᱚ ᱡᱟᱦᱟᱸ ᱛᱤᱱᱟᱹᱜ ᱜᱮ ᱜᱚᱴᱟ ᱟᱹᱛᱩ ᱨᱤᱱ ᱜᱟᱹᱲᱤ ᱟᱥᱮᱱ ᱠᱚ ᱥᱮᱱ ᱞᱮᱱᱟ ᱥᱟᱱᱟᱢ ᱢᱤᱫ ᱴᱷᱮᱱ ᱠᱚ ᱡᱟᱣᱨᱟᱭᱟ ᱾ ᱢᱤᱫ ᱫᱤᱱ ᱱᱮᱰᱟ ᱡᱩᱛ ᱠᱟᱛᱮ, ᱚᱱᱟ ᱪᱟᱣᱞᱮ ᱠᱚ ᱛᱟᱨᱟ ᱫᱚ ᱠᱚ ᱦᱟᱺᱰᱤᱭᱟ ᱟᱨ ᱛᱟᱨᱟ ᱫᱚᱠᱚ ᱥᱚᱲᱮᱭᱟ ᱾ ᱜᱤᱫᱽᱨᱟᱹ ᱠᱚ ᱟᱨ ᱡᱟᱦᱟᱸᱭ ᱦᱟᱺᱰᱤ ᱵᱟᱝ ᱠᱚ ᱧᱩᱭᱟ ᱩᱱᱠᱩ ᱞᱟᱹᱜᱤᱫ ᱾ ᱦᱟᱺᱰᱤ ᱦᱚᱸ ᱦᱟᱹᱱᱤ ᱱᱷᱟᱹᱭ ᱚᱲᱟᱜ ᱨᱮ ᱪᱟᱣᱞᱮ ᱦᱟᱹᱴᱤᱧ ᱠᱟᱛᱮ ᱠᱚ ᱫᱚᱦᱚ ᱚᱪᱚ ᱠᱚᱣᱟ ᱾ ᱚᱱᱟ ᱱᱮᱰᱟ ᱫᱤᱱ ᱨᱮᱫᱚ ᱥᱩᱨ ᱥᱟᱰᱜᱮ ᱟᱹᱛᱩ ᱦᱚᱲ ᱦᱚᱸᱠᱚ
ᱞᱟᱹᱭ ᱟᱠᱚᱣᱟ ᱡᱮ ᱢᱟ ᱤᱱᱟᱹ ᱦᱤᱞᱚᱜ ᱫᱚ ᱜᱟᱹᱲᱤ ᱦᱟᱺᱰᱤ ᱞᱮ ᱧᱩᱭ ᱞᱟᱹᱜᱤᱫ ᱢᱟ ᱟᱯᱮ ᱠᱚᱦᱚᱸ ᱦᱟᱺᱰᱤ ᱧᱩ ᱥᱮᱴᱮᱨᱚᱜ ᱯᱮ ᱾
ᱤᱱᱟᱹ ᱦᱤᱞᱚᱜ ᱫᱚ ᱞᱟᱜᱽᱬᱮ ᱠᱚ ᱮᱱᱮᱡ ᱛᱮ ᱜᱚᱴᱟ ᱧᱤᱸᱫᱟᱹ ᱠᱚ ᱟᱸᱜᱟᱭᱟ ᱾ ᱛᱟᱨᱟᱥᱤᱧ ᱠᱟᱛᱮ ᱧᱩᱛ ᱯᱟᱭᱟᱝᱼᱯᱩᱭᱩᱝ ᱜᱚᱫ ᱮᱱᱟ᱾ ᱟᱠᱷᱲᱟ ᱨᱮ ᱠᱚᱲᱟ ᱠᱚ ᱛᱩᱢᱫᱟᱜ ᱴᱟᱢᱟᱠ ᱜᱩᱰ ᱜᱩᱰ ᱨᱩ ᱠᱚ ᱮᱦᱚᱵ ᱠᱮᱫᱼᱟ ᱾ ᱟᱠᱷᱲᱟ ᱥᱩᱨ ᱨᱮᱜᱮ ᱰᱩᱢᱱᱤ ᱛᱮᱠᱚ ᱚᱲᱟᱜ ᱫᱚ ᱢᱮᱱᱟᱜᱼᱟ ᱾ ᱰᱩᱢᱱᱤ ᱟᱨ ᱠᱟᱹᱯᱨᱟᱹ ᱫᱚ ᱟᱹᱰᱤ ᱟᱸᱴ ᱠᱤᱱ ᱡᱚᱴᱟᱣᱜᱼᱟ ᱾ ᱥᱟᱢᱟᱝ ᱫᱟᱯᱨᱟᱢ ᱚᱲᱟᱜ ᱨᱤᱱ ᱠᱟᱱᱟ ᱠᱤᱱ, ᱚᱱᱟ ᱪᱮᱠᱟ ᱡᱚᱛᱚ ᱵᱮᱲᱟ ᱡᱚᱛᱚ ᱠᱟᱹᱢᱤ ᱨᱮᱠᱤᱱ ᱰᱚᱯᱚᱰᱮᱜᱼᱟ ᱾ ᱵᱟᱱᱟ ᱦᱚᱲ ᱜᱮ ᱢᱚᱬᱮ ᱪᱟᱱᱟᱪ ᱫᱷᱟᱹᱵᱤᱡ ᱚᱞᱚᱜ ᱫᱚᱠᱤᱱ ᱥᱮᱬᱟ ᱟᱠᱟᱫᱼᱟ᱾ ᱵᱟᱹᱫᱽ ᱠᱟᱹᱢᱤ ᱪᱮ ᱮᱱᱮᱡ ᱥᱮᱨᱮᱧ ᱨᱮ ᱟᱠᱚ ᱟᱹᱛᱩ ᱨᱤᱱ ᱫᱚ ᱱᱩᱠᱤᱱᱟᱜ ᱥᱟᱢᱟᱝ ᱨᱮᱫᱚ ᱚᱠᱚᱭ ᱦᱚᱸ ᱵᱟᱝ ᱠᱚ ᱴᱮᱠᱼᱟ᱾ᱩᱥᱟᱹᱨᱟ ᱥᱟᱹᱦᱤᱸᱧ ᱠᱤᱫᱩᱜ ᱫᱟᱠᱟ ᱡᱚᱢ ᱠᱟᱛᱮ ᱰᱩᱢᱱᱤ ᱠᱟᱹᱯᱨᱟᱹ ᱛᱮᱠᱚ ᱚᱲᱟᱜ ᱛᱮ ᱪᱟᱞᱟᱣ ᱮᱱᱟᱭ ᱾
ᱟᱠᱷᱲᱟ ᱨᱮ ᱛᱩᱢᱫᱟᱜ ᱴᱟᱢᱟᱠ ᱱᱩᱱᱟᱹᱜ ᱱᱟᱯᱟᱭ ᱠᱚ ᱨᱩ ᱮᱼᱫᱟ, ᱥᱩᱨ ᱟᱹᱛᱩ ᱠᱷᱚᱱ ᱢᱤᱫ ᱥᱮᱬᱟ
ᱴᱟᱢᱟᱠ ᱟᱨ ᱰᱚᱢ ᱰᱷᱟᱠ ᱠᱚ ᱵᱚᱨᱚ ᱟᱹᱜᱩ ᱟᱠᱟᱫᱼᱟ ᱾ ᱡᱚᱛᱚ ᱢᱤᱫ ᱛᱮ ᱠᱚ ᱨᱩ ᱮᱫ ᱠᱷᱟᱱ ᱢᱚᱱᱮ ᱡᱤᱣᱤ ᱨᱮ ᱵᱟᱝ ᱮᱱᱮᱡ ᱦᱚᱲ ᱦᱚᱸ ᱞᱩᱦᱩᱠ ᱥᱟᱱᱟ ᱜᱚᱫ ᱢᱮᱭᱟ ᱱᱩᱱᱟᱹᱜ ᱱᱚᱝᱠᱟ ᱢᱚᱡᱽ ᱥᱟᱰᱮ ᱠᱟᱱᱟ ᱾
ᱰᱩᱢᱱᱤ – ᱮ ᱠᱟᱹᱯᱨᱟᱹ ᱮᱱᱟ ᱞᱚᱜᱚᱱᱚᱜ ᱢᱮᱥᱮ , ᱢᱟᱥᱮ ᱛᱤᱱᱟᱹᱜ ᱱᱟᱯᱟᱭ ᱠᱚ ᱨᱩ ᱮᱼᱫᱟ ᱾ ᱚᱠᱟ ᱟᱹᱛᱩ ᱨᱤᱱ ᱠᱚᱲᱟ
ᱪᱚ ᱦᱮᱡ ᱠᱟᱛᱮ ᱠᱚ ᱨᱩ ᱮᱼᱫᱟ , ᱟᱵᱚ ᱟᱹᱛᱩ ᱨᱤᱱ ᱫᱚ ᱱᱚᱝᱠᱟ ᱛᱤᱥ ᱦᱚᱝ ᱵᱟᱝ ᱠᱚ ᱨᱩᱭᱟ ᱾
ᱠᱟᱹᱯᱨᱟᱹ – ᱥᱟᱹᱨᱤ ᱜᱮ ᱛᱤᱼ ᱡᱟᱸᱜᱟ ᱠᱚ ᱦᱤᱞᱟᱹᱣ ᱜᱚᱫᱚᱜ ᱠᱟᱱᱟ ᱾ ᱦᱚᱲᱢᱚ ᱵᱟᱝ ᱟᱯᱱᱟᱨᱚᱜ ᱠᱟᱱᱟ ᱾ ᱠᱟᱹᱯᱨᱟᱹ ᱛᱮᱠᱚᱣᱟᱜ ᱠᱩᱞᱦᱤ ᱯᱤᱸᱰᱟᱹ ᱨᱮ ᱫᱩᱲᱩᱵ ᱠᱟᱛᱮ ᱨᱩ ᱠᱤᱱ ᱟᱛᱮᱱ ᱟᱠᱟᱫᱼᱟ ᱾ ᱨᱩᱼᱨᱟᱦᱟ ᱟᱸᱡᱚᱢ ᱠᱟᱛᱮ ᱨᱟᱹᱥᱠᱟᱹ ᱛᱮ ᱰᱩᱢᱱᱤ ᱟᱨ ᱠᱟᱹᱯᱨᱟᱹ ᱫᱚ ᱠᱤᱱ ᱵᱩᱞ ᱡᱩᱛ ᱮᱱᱟ ᱾
ᱰᱩᱢᱱᱤ ᱼ ᱮᱱᱟ ᱫᱩ ᱥᱮ ᱟᱢ ᱦᱤᱞᱤ ᱞᱚᱜᱚᱱᱚᱜ ᱢᱮᱛᱟᱭ ᱢᱮ, ᱤᱧ ᱫᱚ ᱤᱧᱟᱜ ᱢᱚᱱᱮ ᱡᱤᱣᱤ ᱵᱟᱹᱧ ᱟᱯᱱᱟᱨ ᱫᱟᱲᱮᱭᱟᱜ ᱠᱟᱱᱟ ᱾ ᱵᱟᱝ ᱠᱷᱟᱱ ᱞᱟᱝ ᱥᱮᱱ ᱦᱟᱱᱛᱟᱲᱚᱜᱼᱟ ᱾ ᱛᱤᱱᱟᱹᱜ ᱢᱚᱡᱽ ᱟᱸᱡᱚᱢᱚᱜ ᱠᱟᱱᱟ ᱱᱚᱰᱮ ᱜᱮ ᱞᱩᱦᱩᱠ ᱟᱛᱮ ᱮᱱᱮᱡ ᱥᱟᱱᱟ ᱠᱟᱱᱟ ᱾
ᱠᱟᱹᱯᱨᱟᱹ – ᱤᱧ ᱦᱚᱸ ᱞᱩᱦᱩᱠ ᱜᱚᱫ ᱥᱟᱱᱟᱹᱧ ᱠᱟᱱ ᱜᱮᱭᱟ, ᱢᱤᱫ ᱜᱷᱟᱹᱲᱤᱠ ᱥᱩᱵᱩᱨ ᱢᱮ ᱱᱩᱱᱟᱹᱜ ᱟᱞᱚᱢ ᱞᱚᱜᱚᱱᱚᱜᱼᱟ ᱾ ᱦᱤᱞᱤ
ᱞᱟᱝ ᱵᱟᱹᱜᱤ ᱟᱭ ᱠᱷᱟᱱ ᱫᱟᱫᱟ ᱱᱟᱦᱟᱜ ᱮ ᱮᱜᱮᱨᱟ ᱾ ᱩᱱᱤ ᱜᱮᱛᱚ ᱡᱚᱛᱚ ᱵᱮᱲᱟᱭ ᱵᱟᱧᱪᱟᱣ ᱟᱠᱟᱫ ᱞᱟᱝᱟ ᱾ ᱡᱮᱢᱚᱱ ᱜᱮ
ᱠᱟᱹᱯᱨᱟᱹ ᱟᱡ ᱦᱤᱞᱤ ᱚᱲᱟᱜ ᱫᱩᱣᱟᱹᱨ ᱠᱷᱚᱱ ᱮ ᱚᱰᱚᱠᱚᱜᱼᱟ ᱾ ᱰᱩᱢᱱᱤ ᱫᱚ ᱠᱟᱹᱯᱨᱟᱹ ᱛᱤ ᱨᱮ ᱥᱟᱵ ᱠᱟᱛᱮᱭ ᱢᱮᱛᱟᱭᱟ,
ᱼ ᱪᱚᱞᱚ ᱛᱚ ᱾ ᱩᱱᱟᱹᱜ ᱠᱟᱛᱷᱟ ᱫᱚ ᱵᱟᱝ ᱢᱮᱱ ᱦᱩᱭᱩᱜ ᱛᱟᱢᱟ ᱾ ᱤᱱᱟᱹ ᱢᱮᱱ ᱠᱟᱛᱮ ᱰᱩᱢᱱᱤ ᱫᱚ ᱠᱟᱹᱯᱨᱟᱹ ᱛᱤᱨᱮ ᱥᱟᱵ
ᱠᱟᱛᱮ ᱛᱤᱭᱟᱹᱜ ᱤᱫᱤ ᱠᱮᱫᱮᱭᱟᱭ ᱾ ᱠᱟᱹᱯᱨᱟᱹ ᱟᱡ ᱦᱤᱞᱤ ᱫᱚ ᱟᱹᱠᱤᱱ ᱛᱟᱭᱚᱢ ᱛᱟᱭᱚᱢ ᱛᱮ ᱯᱟᱸᱡᱟ ᱠᱮᱫ ᱠᱤᱱᱟᱭ ᱾
ᱟᱠᱷᱲᱟ ᱠᱤᱱ ᱥᱮᱴᱮᱨ ᱮᱱᱟ ᱾ ᱥᱮᱴᱮᱨ ᱠᱟᱛᱮ ᱠᱤᱱ ᱧᱮᱞ ᱠᱚᱣᱟ, ᱯᱩᱱ ᱟᱴᱟᱞ ᱛᱮᱠᱚ ᱮᱱᱮᱡ ᱠᱟᱱᱟ ᱾ ᱛᱟᱭᱚᱢ ᱛᱟᱞᱟ
ᱠᱩᱞᱦᱤ ᱨᱤᱱᱤᱡ ᱜᱟᱛᱮ ᱠᱩᱲᱤ ᱠᱤᱱ ᱢᱮᱛᱟᱭ ᱠᱟᱱᱟ, ᱼ ᱮ ᱡᱤᱨᱟᱹᱰᱟᱹᱨ ᱢᱟᱥᱮ ᱟᱲᱟᱜ ᱟᱞᱤᱧ ᱢᱮ ᱾ ᱩᱱᱤ ᱠᱩᱲᱤ ᱦᱚᱸᱭ ᱟᱲᱟᱜ ᱠᱮᱫᱼᱟ
ᱰᱩᱢᱱᱤ ᱟᱨ ᱠᱟᱹᱯᱨᱟᱹ ᱮᱱᱮᱡ ᱠᱤᱱ ᱥᱟᱵ ᱮᱱᱛᱮ ᱦᱚᱴᱚᱜ ᱦᱤᱞᱟᱹᱣ ᱟᱛᱮ ᱞᱮᱣᱮᱨᱼᱠᱚᱫᱚᱨ ᱞᱩᱦᱩᱠ ᱠᱤᱱ ᱮᱦᱚᱵ ᱠᱮᱫᱼᱟ ᱾ ᱛᱟᱞᱟ
ᱛᱟᱞᱟ ᱨᱮ ᱠᱤᱱ ᱠᱚᱯᱚᱭᱚᱜ ᱟᱨ ᱠᱤᱱ ᱞᱟᱸᱫᱟᱭᱟ ᱾ ᱯᱩᱱᱼᱢᱚᱬᱮ ᱫᱷᱟᱣ ᱟᱹᱪᱩᱨ ᱮᱱ ᱛᱟᱭᱚᱢ ᱠᱷᱟᱱ ᱜᱮ ᱨᱩ ᱛᱟᱲ
ᱛᱚᱲᱟᱣ ᱠᱟᱛᱮ ᱠᱚ ᱛᱷᱤᱨᱟ ᱾ ᱢᱟᱹᱫᱟᱹᱲᱤᱭᱟᱹ ᱠᱚ ᱥᱮᱨᱮᱧ ᱜᱚᱫ ᱠᱮᱫᱼᱟ –
ᱢᱟᱱ ᱥᱟᱠᱟᱢ ᱞᱮᱠᱟ ᱡᱟᱹᱛᱤ ᱵᱤᱭᱚᱞᱼᱵᱚᱭᱚᱞ,
ᱥᱟᱨᱡᱚᱢ ᱵᱤᱨ ᱞᱮᱠᱟ ᱥᱟᱱᱛᱟᱲ ᱠᱩᱲᱤ ᱾
ᱞᱟᱛᱟᱨ ᱴᱚᱞᱟ ᱨᱤᱱ ᱠᱩᱲᱤ ᱠᱚ ᱛᱮᱞᱟ ᱠᱮᱫᱼᱟ ᱾ ᱚᱱᱟ ᱥᱟᱶᱛᱮ ᱜᱮ ᱛᱚᱲᱟᱣ ᱠᱚ ᱨᱩ ᱠᱮᱫᱼᱟ ᱾ ᱟᱨ ᱦᱚᱸ ᱢᱟᱹᱫᱟᱹᱲᱤᱭᱟᱹ ᱠᱚ ᱥᱮᱨᱮᱧ
ᱟ,ᱼᱼ
ᱪᱟᱹᱭ ᱱᱟᱜᱟᱨ ᱨᱤᱱ ᱴᱩᱰᱩ ᱨᱩᱥᱤᱠᱟᱹ ᱠᱚᱲᱟ,
ᱪᱟᱢᱯᱟ ᱱᱟᱜᱟᱨ ᱛᱤᱠᱤᱱ ᱪᱟᱞᱟᱣ ᱮᱱ ᱫᱚ,
ᱵᱟᱱ ᱜᱟᱰᱟ ᱨᱮ ᱵᱟᱸᱫᱚ ᱱᱟᱹᱲᱤ ᱛᱮᱠᱤᱱ ᱴᱩᱰᱟᱹᱝᱮᱱ ᱫᱚ,
ᱵᱟᱸᱫᱚ ᱱᱟᱹᱲᱤ ᱛᱮᱠᱤᱱ ᱯᱟᱨᱚᱢ ᱮᱱ ᱫᱚ,
ᱯᱮᱭᱟ ᱟᱠᱷᱲᱟ ᱨᱮ ᱮᱱᱮᱡ ᱥᱮᱨᱮᱧ ᱠᱟᱛᱮ,
ᱧᱤᱫᱟᱹ ᱵᱷᱤᱛᱟᱹᱨ ᱛᱮᱠᱤᱱ ᱨᱩᱣᱟᱹᱲ ᱥᱮᱱᱚᱜ
ᱵᱟᱸᱫᱚ ᱱᱟᱲᱤ ᱛᱮᱠᱤᱱ ᱦᱤᱡᱩᱜ ᱥᱮᱱᱚᱜ , ᱵᱟᱝ ᱫᱚ ᱮᱱᱮᱡ ᱠᱷᱟᱹᱛᱤᱨ
ᱵᱟᱝ ᱫᱚ ᱥᱮᱨᱮᱧ ᱠᱷᱟᱹᱛᱤᱨ
ᱵᱟᱸᱫᱚ ᱱᱟᱹᱲᱤ ᱫᱚᱠᱚ ᱢᱟᱜ ᱛᱚᱯᱟᱜ ᱠᱮᱫ,
ᱟᱹᱵᱤᱱ ᱵᱮᱥᱨᱟ ᱠᱩᱲᱤ ᱥᱟᱹᱠᱷᱤ ᱛᱟᱦᱮᱸᱱ ᱵᱤᱱ,
ᱡᱟᱦᱟᱸ ᱞᱮᱠᱟ ᱠᱷᱟᱱ ᱫᱚ ᱟᱹᱵᱤᱱ ᱨᱚᱲ ᱵᱤᱱ,
ᱡᱟᱦᱟᱸ ᱞᱮᱠᱟ ᱠᱷᱟᱱ ᱫᱚ ᱟᱹᱵᱤᱱ ᱨᱚᱲ ᱵᱤᱱ ᱾
ᱮᱱᱮᱡ ᱠᱩᱲᱤ ᱠᱚ ᱥᱮᱨᱮᱧ ᱠᱚ ᱛᱮᱞᱟ ᱠᱮᱫᱼᱟ ᱾ ᱚᱱᱟ ᱥᱮᱨᱮᱧ ᱟᱸᱡᱚᱢ ᱠᱟᱛᱮ ᱰᱩᱢᱱᱤ ᱠᱟᱹᱯᱨᱟᱹᱭ ᱢᱮᱛᱟᱭ ᱠᱟᱱᱟ,ᱼ
ᱢᱟᱥᱮ ᱛᱤᱱᱟᱹᱜ ᱱᱟᱯᱟᱭ ᱠᱚ ᱥᱮᱨᱮᱧ ᱠᱮᱫᱼᱟ ᱾ ᱚᱠᱟ ᱨᱤᱱ ᱠᱚᱲᱟ ᱠᱟᱱᱟ ᱠᱚ ᱵᱟᱹᱧ ᱧᱮᱞ ᱩᱨᱩᱢᱮᱫ ᱠᱚᱣᱟ ᱾ᱼ ᱦᱚᱭ
ᱠᱟᱨᱟᱢᱰᱟᱹᱨ ᱟᱹᱰᱤ ᱡᱚᱛᱷᱟᱛ ᱥᱮᱨᱮᱧ ᱠᱚ ᱥᱮᱨᱮᱧ ᱠᱮᱫᱼᱟ ᱾ ᱱᱩᱠᱩ ᱫᱚ ᱯᱟᱞᱮ ᱵᱩᱨᱩ ᱯᱟᱨᱚᱢ ᱥᱮᱫ ᱨᱤᱱ ᱠᱟᱱ ᱪᱚᱠᱚ ᱾
ᱟᱞᱮᱭᱤᱡ ᱜᱩᱛᱤ ᱞᱟᱹᱭ ᱮᱫ ᱛᱟᱦᱮᱸ ᱠᱟᱱᱟ ᱵᱟᱝ ᱢᱟ ᱟᱠᱚ ᱥᱮᱫ ᱨᱤᱱ ᱠᱚᱲᱟ ᱦᱚᱸᱭ ᱫᱮᱞᱟ ᱟᱠᱟᱣᱟᱫ ᱠᱚᱣᱟ ᱾ ᱰᱩᱢᱱᱤ ᱫᱚ
ᱩᱱᱤ ᱛᱩᱢᱫᱟᱜ ᱨᱩᱨᱩ ᱠᱚᱲᱟ ᱨᱮ ᱱᱚᱡᱚᱨ ᱫᱚ ᱢᱮᱱᱟᱜ ᱛᱟᱭᱟ ᱾ ᱩᱱᱤ ᱠᱚᱲᱟ ᱫᱚ ᱨᱩ ᱟᱛᱮ ᱦᱚᱸᱭ ᱥᱮᱨᱮᱧ ᱮᱫ ᱛᱟᱦᱮᱸ
ᱠᱟᱱᱟ ᱾ ᱟᱠᱚ ᱟᱹᱛᱩ ᱥᱩᱨ ᱠᱚᱨᱤᱱ ᱠᱚᱲᱟ ᱫᱚ ᱛᱩᱢᱫᱟᱜ ᱨᱩ ᱟᱛᱮ ᱥᱮᱨᱮᱧ ᱫᱚ ᱮᱠᱟᱞ ᱵᱟᱝ ᱠᱚ ᱜᱟᱱᱟ ᱾ ᱚᱱᱟ ᱛᱟᱞᱟ ᱨᱮ
ᱢᱤᱫ ᱟᱫᱷᱚᱲ ᱫᱷᱟᱨᱟᱭᱤᱡ ᱠᱩᱲᱤ ᱢᱮᱱ ᱠᱮᱫᱟᱭ, ᱮ ᱵᱟᱹᱵᱩ ᱫᱚᱦᱲᱟ ᱥᱮᱨᱮᱧ ᱯᱮᱥᱮ ᱟᱹᱰᱤ ᱱᱟᱯᱟᱭ ᱯᱮ ᱥᱮᱨᱮᱧ ᱠᱮᱫᱼᱟ ᱾
ᱢᱟᱹᱫᱟᱹᱲᱤᱭᱟᱹ ᱛᱟᱞᱟ ᱥᱮᱫ ᱠᱷᱚᱱ ᱦᱚᱸ ᱢᱤᱫᱴᱟᱹᱝ ᱮ ᱢᱮᱱ ᱜᱚᱫᱟ,ᱼ ᱱᱚᱣᱟ ᱟᱹᱛᱩ ᱠᱩᱲᱤ ᱦᱚᱸ ᱟᱹᱰᱤ ᱜᱮᱯᱮ ᱞᱟᱥᱮᱨᱟ ᱾
ᱠᱷᱟᱹᱞᱤ ᱟᱞᱮ ᱥᱮᱨᱮᱧ ᱢᱩᱪᱟᱹᱫ ᱥᱟᱶᱛᱮ ᱜᱮ ᱟᱯᱮ ᱦᱚᱸ ᱯᱮ ᱛᱮᱞᱟ ᱨᱩᱣᱟᱹᱲ ᱠᱮᱫᱼᱟ ᱾
ᱡᱟᱦᱟᱸᱭ ᱛᱩᱢᱟᱫᱟᱜ ᱨᱩᱨᱩ ᱠᱚᱲᱟ ᱤᱫᱤ ᱠᱟᱛᱮ ᱰᱩᱢᱱᱤ ᱟᱡᱤᱡ ᱜᱟᱛᱮ ᱠᱟᱹᱯᱨᱟᱹ ᱥᱟᱶ ᱮ ᱠᱟᱛᱷᱟᱜ ᱠᱟᱱ ᱛᱟᱦᱮᱱ, ᱩᱱᱤ
ᱠᱚᱲᱟ ᱰᱩᱢᱱᱤ ᱥᱩᱨ ᱦᱮᱡ ᱠᱟᱛᱮ ᱰᱩᱢᱱᱤᱭ ᱠᱩᱞᱤ ᱠᱮᱫᱮᱭᱟ,
ᱼ ᱦᱮᱸ ᱯᱮᱲᱟ, ᱟᱯᱮ ᱫᱚ ᱱᱚᱰᱮᱱ ᱠᱚᱜᱮ ? ᱰᱩᱢᱱᱤ – ᱦᱚᱭ ᱱᱚᱰᱮᱱ ᱠᱚᱜᱮ ᱾
ᱩᱱᱤ ᱠᱚᱲᱟ ᱫᱚ ᱢᱚᱫᱚᱱ ᱧᱩᱛᱩᱢ ᱟᱭᱟ ᱾ ᱢᱚᱫᱚᱱ ᱮ ᱢᱮᱱ ᱜᱚᱫᱟ – ᱮ ᱯᱮᱲᱟ ᱫᱟᱜ ᱟᱹᱰᱤ ᱡᱩᱨ ᱛᱮᱛᱟᱝ ᱟᱠᱟᱫ
ᱫᱤᱧᱟ, ᱦᱩᱱᱟᱹᱝ ᱫᱟᱜ ᱯᱮ ᱮᱢᱚᱜ ᱠᱷᱟᱱ ᱟᱹᱰᱤ ᱯᱮ ᱫᱷᱚᱨᱢᱚᱭᱟ ᱾ ᱠᱟᱹᱯᱨᱟᱹ – ᱚᱸᱰᱮ ᱦᱟᱺᱰᱤ ᱢᱮᱱᱟᱜᱼᱟ, ᱚᱱᱟ ᱧᱩ
ᱠᱟᱛᱮ ᱛᱮᱛᱟᱝ ᱢᱮᱴᱟᱣ ᱛᱟᱢ, ᱠᱷᱟᱹᱞᱤ ᱫᱟᱜ ᱛᱮᱛᱟᱝ ᱮ ᱰᱷᱮᱥ ᱮᱫᱼᱟ ᱾ ᱼ ᱯᱮᱲᱟ ᱢᱟᱹᱭ
ᱟᱞᱚ ᱵᱤᱱ ᱟᱹᱲᱤᱥᱚᱜᱼᱟ, ᱪᱮᱫ, ᱠᱩᱞᱤ ᱠᱟᱛᱤᱧ ᱵᱟᱹᱲᱤᱡ ᱜᱚᱫ ᱠᱮᱫᱼᱟ, ᱮᱱ ᱠᱷᱟᱱ ᱤᱠᱟᱹ ᱠᱟᱹᱧ ᱵᱤᱱ ᱾
ᱰᱩᱢᱱᱤ – ᱵᱟᱝᱟ ᱵᱟᱢ ᱵᱟᱹᱲᱤᱡ ᱟᱠᱟᱫᱼᱟ ᱾ ᱢᱚᱫᱚᱱ – ᱟᱥᱚᱞ ᱤᱧ ᱫᱚ ᱦᱟᱺᱰᱤ ᱠᱚ ᱮᱠᱟᱞ ᱵᱟᱹᱧ ᱧᱩᱭᱟ ᱾ ᱛᱮᱦᱮᱧ ᱠᱚᱲᱟ ᱠᱚ ᱡᱚᱵᱚᱨ ᱠᱤᱫᱤᱧ ᱛᱮ ᱱᱚᱰᱮ ᱮᱱᱮᱡ ᱦᱩᱧ ᱦᱮᱡ ᱮᱱᱟ ᱾
ᱠᱟᱹᱯᱨᱟᱹ – ᱫᱩ ᱠᱟᱨᱟᱢᱰᱟᱹᱨ ᱟᱢ ᱜᱮ ᱟᱯᱮ ᱚᱲᱟᱜ ᱥᱮᱫ ᱤᱫᱤ ᱠᱟᱛᱮ ᱫᱟᱜ ᱮᱢᱟᱭ ᱢᱮ ᱾ ᱤᱧ ᱫᱟᱫᱟ ᱡᱩᱫᱤ ᱤᱧᱮ ᱧᱮᱞ
ᱟᱠᱟᱫ ᱫᱤᱧ ᱠᱷᱟᱱ ᱟᱨ ᱛᱤᱥ ᱦᱚᱸ ᱮᱱᱮᱡ ᱵᱟᱝ ᱮ ᱚᱰᱚᱠ ᱚᱪᱚᱣᱟᱧᱟ ᱾
ᱢᱚᱫᱚᱱ – ᱮᱱᱮᱡ ᱮᱦᱚᱵ ᱨᱮᱜᱮ ᱞᱟᱝ ᱨᱩᱣᱟᱹᱲ ᱦᱤᱡᱩᱜᱼᱟ, ᱵᱟᱹᱧ ᱵᱤᱞᱚᱢ ᱢᱮᱭᱟ ᱾
ᱟᱹᱰᱤ ᱩᱥᱟᱹᱨᱟ ᱚᱸᱰᱮ ᱠᱷᱚᱱ ᱠᱤᱱ ᱥᱮᱱ ᱮᱱᱟ ᱰᱩᱢᱱᱤ ᱛᱮᱠᱚ ᱚᱲᱟᱜ ᱾ ᱰᱩᱢᱱᱤ ᱠᱩᱞᱦᱤ ᱫᱩᱣᱟᱹᱨ ᱨᱮᱜᱮ ᱢᱚᱫᱚᱱ ᱮ
ᱢᱮᱛᱟᱫ ᱫᱮᱭᱟ, ᱼ ᱮ ᱯᱮᱲᱟ ᱟᱢ ᱫᱚ ᱱᱚᱛᱮ ᱨᱮᱜᱮ ᱛᱟᱦᱮᱸᱱ ᱢᱮ ᱾ ᱤᱧᱤᱧ ᱦᱤᱡᱩᱜ ᱠᱟᱱᱟ ᱾ ᱢᱚᱫᱚᱱ ᱰᱩᱢᱱᱤ ᱛᱮᱠᱚᱣᱟᱜ ᱚᱱᱟ ᱪᱮᱞᱯᱮᱧ ᱯᱟᱱᱰᱟ ᱨᱮ ᱫᱩᱲᱩᱵ ᱮᱱᱟᱭ ᱾ ᱰᱩᱢᱱᱤ ᱵᱟᱹᱲᱛᱤ ᱵᱟᱝ ᱵᱤᱞᱚᱢ ᱠᱟᱛᱮ ᱩᱥᱟᱹᱨᱟ ᱜᱮ ᱞᱚᱴᱟ ᱨᱮ ᱫᱟᱜ ᱟᱹᱜᱩ ᱠᱟᱛᱮᱭ ᱦᱮᱡ ᱮᱱᱟ ᱾ ᱞᱚᱴᱟ ᱫᱟᱜ ᱢᱚᱫᱚᱱ ᱮ ᱮᱢᱟᱫ ᱫᱮᱭᱟ ᱾ ᱢᱚᱫᱚᱱ ᱞᱚᱴᱟ ᱛᱮᱜᱮ ᱧᱩ ᱠᱮᱫᱟᱭ ᱠᱷᱟᱲᱼᱠᱷᱟᱲ ᱾ ᱵᱟᱨ ᱥᱟᱦᱮᱫ ᱨᱮᱜᱮ ᱢᱤᱫ ᱞᱚᱴᱟ ᱫᱟᱜ ᱮ ᱧᱩ ᱥᱟᱭ ᱠᱮᱫᱼᱟ ᱾
ᱼ ᱦᱮᱸ ᱯᱮᱲᱟ ᱱᱩᱱᱟᱹᱜ ᱫᱟᱜ ᱛᱮᱛᱟᱝ ᱞᱮᱫ ᱢᱮ ᱨᱮᱦᱚᱸ ᱞᱟᱦᱟ ᱛᱮ ᱪᱮᱫᱟᱜ ᱵᱟᱢ ᱢᱮᱛᱟᱫ ᱠᱚᱣᱟ ᱚᱠᱚᱭ ᱦᱚᱸ ᱾
ᱼ ᱟᱞᱮ ᱟᱹᱛᱩ ᱠᱚᱲᱟᱧ ᱢᱮᱛᱟ ᱠᱚ ᱠᱟᱱ ᱜᱮᱭᱟ ᱦᱟᱯᱮ ᱥᱮ ᱱᱚᱣᱟ ᱟᱠᱷᱲᱟ ᱮᱱᱮᱡ ᱢᱩᱪᱟᱹᱫ ᱠᱟᱛᱮ ᱢᱮᱱ ᱢᱮᱱ ᱛᱮᱠᱚ
ᱵᱤᱞᱚᱢ ᱠᱤᱫᱤᱧᱟ ᱾ ᱮᱱᱮᱡ ᱜᱮ ᱵᱟᱝ ᱵᱷᱟᱺᱜᱩᱲ ᱥᱟᱱᱟᱭᱮᱫ ᱠᱚᱣᱟ ᱾
ᱼ ᱦᱟᱯᱮ ᱱᱚᱣᱟ ᱞᱚᱴᱟᱧ ᱫᱚᱦᱚ ᱚᱴᱚ ᱜᱚᱫ ᱠᱟᱜ ᱨᱮᱜᱮ ᱾ ᱰᱩᱢᱱᱤ ᱞᱚᱴᱟ ᱫᱚᱦᱚᱭ ᱵᱚᱞᱚ ᱮᱱᱟ ᱟᱨ ᱪᱟᱸᱰᱮ ᱜᱮ ᱦᱮᱡ ᱮᱱᱟᱭ ᱾
ᱼ ᱫᱮᱞᱟ ᱮᱱᱮᱡ ᱟᱠᱷᱲᱟ ᱥᱮᱫ ᱜᱮ ᱵᱟᱝ ᱠᱷᱟᱱ ᱟᱢᱤᱡ ᱡᱚᱴᱟᱣ ᱱᱟᱦᱟᱜ ᱪᱮᱫ ᱠᱚᱭ ᱵᱷᱟᱹᱵᱤᱭᱟ ᱾
ᱟᱹᱠᱤᱱ ᱨᱩᱣᱟᱹᱲ ᱛᱮᱜᱮ ᱮᱱᱮᱡ ᱠᱚ ᱡᱩᱲᱟᱹᱣ ᱜᱚᱫ ᱟᱠᱟᱫᱼᱟ ᱾ ᱨᱩᱣᱟᱹᱲ ᱨᱩᱣᱟᱹᱲ ᱛᱮᱜᱮ ᱟᱹᱰᱤ ᱜᱟᱱ ᱠᱤᱱ ᱠᱟᱛᱷᱟ ᱵᱟᱲᱟ ᱜᱚᱫ
ᱠᱮᱫᱼᱟ ᱾ ᱚᱲᱟᱜ ᱠᱚᱨᱮ ᱚᱠᱚᱭ ᱠᱚ ᱢᱮᱱᱟᱜ ᱠᱚᱣᱟ ᱮᱢᱟᱱ ᱮᱢᱟᱱᱟᱜ ᱠᱚ ᱾ ᱰᱩᱢᱱᱤ ᱮᱱᱮᱡ ᱮ ᱥᱟᱵ ᱮᱱᱟ ᱠᱟᱹᱯᱨᱟᱹ ᱴᱷᱮᱱ ᱾
ᱢᱤᱫ ᱟᱛᱨᱮ ᱮᱱᱮᱡ ᱛᱟᱭᱚᱢ ᱢᱚᱫᱚᱱ ᱦᱚᱸ ᱟᱹᱠᱤᱱ ᱴᱷᱮᱱ ᱮᱱᱮᱡ ᱮ ᱥᱟᱵ ᱮᱱᱟ ᱾ ᱢᱚᱫᱚᱱ ᱟᱨ ᱰᱩᱢᱱᱤ ᱮᱱᱮᱡ ᱚᱠᱛᱚ
ᱨᱮᱜᱮ ᱟᱜᱟᱢ ᱤᱫᱤ ᱠᱟᱛᱮ ᱦᱚᱸ ᱠᱤᱱ ᱠᱟᱛᱷᱟ ᱡᱩᱛ ᱠᱮᱫᱼᱟ ᱾ ᱰᱩᱢᱱᱤ ᱢᱟ ᱢᱟᱬᱟᱝ ᱧᱮᱯᱮᱞ ᱨᱮᱜᱮ ᱢᱚᱫᱚᱱ ᱥᱮᱫ ᱢᱚᱱᱮ
ᱛᱟᱭ ᱞᱟᱰᱮ ᱞᱮᱱᱟ ᱾ ᱥᱤᱵᱤᱞ ᱵᱮᱵᱷᱟᱨ ᱟᱨ ᱨᱚᱲ ᱛᱮ ᱢᱚᱫᱚᱱ ᱦᱚᱸ ᱰᱩᱢᱱᱤ ᱟᱜ ᱟᱧᱪᱟᱨ ᱛᱚᱞᱚᱝ ᱨᱮ ᱡᱷᱟᱹᱞᱤ ᱡᱩᱛ ᱮᱱᱟᱭ ᱾
ᱯᱮ ᱟᱠᱷᱲᱟ ᱮᱱᱮᱡ ᱠᱟᱛᱮ ᱰᱩᱢᱱᱤ ᱟᱨ ᱠᱟᱹᱯᱨᱟᱹ ᱫᱚ ᱮᱱᱮᱡ ᱠᱤᱱ ᱵᱷᱟᱜᱟᱣ ᱮᱱᱟ ᱾ ᱚᱲᱟᱜ ᱦᱤᱡᱩᱜ ᱞᱟᱦᱟ ᱨᱮ ᱰᱩᱢᱱᱤ ᱟᱨ
ᱢᱚᱰᱚᱱ ᱫᱚᱦᱲᱟ ᱥᱟᱶ ᱧᱟᱯᱟᱢ ᱞᱟᱹᱜᱤᱫ ᱠᱤᱱ ᱱᱮᱰᱟ ᱠᱮᱫᱼᱟ ᱫᱟᱨᱟᱭ ᱠᱟᱱ ᱥᱟᱹᱨᱫᱤ ᱢᱟᱦᱟᱸ ᱦᱟᱴ ᱨᱮᱸ᱾
ᱫᱚᱥᱟᱨ ᱦᱤᱞᱚᱜ ᱠᱟᱹᱯᱨᱟᱹ ᱥᱚᱠᱛᱚ ᱛᱮᱸᱬᱮᱫᱼᱜᱚᱸᱬᱮᱫ ᱰᱩᱢᱱᱤᱭ ᱠᱩᱞᱤ ᱠᱮᱫᱮᱭᱟ ᱾ ᱰᱩᱢᱱᱤ ᱥᱟᱱᱟᱢ
ᱠᱟᱛᱷᱟ ᱫᱚ ᱵᱟᱭ ᱞᱟᱹᱭ ᱞᱮᱫᱼᱟ ᱾ ᱦᱤᱡᱩᱜ ᱠᱟᱱ ᱦᱟᱴ ᱫᱤᱱ ᱨᱮ ᱧᱟᱯᱟᱢ ᱱᱮᱰᱟ ᱠᱟᱛᱷᱟ ᱫᱚᱭ ᱩᱠᱩ ᱠᱮᱫᱼᱟ ᱾
ᱦᱟᱴ ᱫᱤᱱ ᱨᱮ ᱰᱩᱢᱱᱤ ᱟᱨ ᱢᱚᱫᱚᱱ ᱠᱤᱱ ᱧᱟᱯᱟᱢ ᱮᱱᱟ ᱾ ᱞᱟᱦᱟ ᱨᱮᱜᱮ ᱢᱚᱫᱚᱱ ᱰᱩᱢᱱᱤᱭ ᱞᱟᱹᱭ ᱟᱫᱮ ᱛᱟᱦᱮᱸ
ᱠᱟᱱᱟ ᱡᱮ ᱟᱭᱚ ᱮᱠᱞᱟ ᱛᱮ ᱥᱟᱱᱟᱢᱟᱜ ᱵᱟᱝ ᱮ ᱠᱟᱹᱢᱤ ᱫᱟᱲᱮᱭᱟᱜ ᱠᱟᱱᱟ᱾ᱚᱲᱟᱜ ᱠᱚᱨᱮ ᱠᱟᱹᱢᱤ ᱟᱹᱰᱤ ᱞᱮ ᱟᱸᱴᱚᱜ
ᱠᱟᱱᱟ ᱾ ᱰᱩᱢᱱᱤ ᱪᱮᱫ ᱦᱚᱸ ᱵᱟᱝ ᱮ ᱢᱮᱱ ᱞᱮᱫᱼᱟ, ᱠᱷᱟᱹᱞᱤ ᱢᱩᱞᱩᱡ ᱢᱟᱪᱷᱟᱭ ᱞᱟᱸᱫᱟ ᱠᱮᱫᱼᱟ ᱾ ᱢᱚᱫᱚᱱ ᱛᱟᱭᱚᱢ
ᱨᱮᱱᱟᱜ ᱠᱮᱨᱤᱭᱟᱨ ᱨᱮ ᱨᱮᱛᱟᱢ ᱞᱮᱫ ᱡᱷᱩᱞᱟᱹ ᱛᱟᱭ ᱦᱮᱱᱰᱮᱞ ᱨᱮ ᱟᱠᱟ ᱠᱮᱫᱼᱟᱭ ᱾ ᱛᱟᱭᱚᱢ ᱰᱩᱢᱱᱤᱭ ᱢᱮᱛᱟᱫ ᱫᱮᱭᱟ
ᱢᱟ ᱛᱟᱭᱚᱢ ᱨᱮ ᱫᱩᱲᱩᱵ ᱢᱮ ᱾ ᱰᱩᱢᱱᱤ ᱫᱩᱲᱩᱵ ᱮᱱ ᱥᱟᱶᱛᱮ ᱥᱚᱡᱷᱮ ᱢᱚᱫᱚᱱ ᱫᱚ ᱟᱠᱚ ᱚᱲᱟᱜ ᱛᱮᱭ ᱟᱹᱜᱩ
ᱠᱮᱫᱮᱭᱟ ᱾
ᱢᱚᱫᱚᱱ ᱚᱲᱟᱜ ᱥᱮᱴᱮᱨ ᱥᱟᱶᱛᱮ ᱜᱮ ᱟᱹᱰᱤ ᱠᱚ ᱨᱟᱹᱜᱤ ᱮᱱᱟ ᱾ ᱚᱲᱟᱜ ᱛᱮ ᱵᱟᱝ ᱠᱚ ᱵᱚᱞᱚ ᱚᱪᱚᱼᱣᱟᱠᱤᱱ ᱠᱟᱱᱟ ᱾ ᱢᱚᱫᱚᱱ
ᱟᱡ ᱵᱟᱵᱟ ᱩᱛᱤ ᱥᱩᱛᱤ ᱜᱮ ᱨᱟᱹᱜᱤᱜ ᱠᱟᱱᱟᱭ, ᱵᱟᱝ ᱠᱷᱚᱱ ᱵᱟᱝ ᱜᱮ ᱵᱚᱞᱚ ᱦᱚᱪᱚᱣᱟᱫ ᱠᱤᱱᱟ ᱾ ᱚᱲᱟᱜ ᱨᱮᱱᱟᱜ ᱫᱩᱣᱟᱹᱨ
ᱨᱮ ᱫᱷᱤᱨᱤ ᱠᱟᱯᱟᱴ ᱞᱮᱠᱟ ᱛᱤᱸᱜᱩ ᱮᱱᱟᱭ ᱵᱟᱝ ᱛᱮ ᱵᱟᱭ ᱵᱚᱞᱚ ᱦᱚᱪᱚᱣᱟᱫ ᱠᱤᱱᱟ ᱾
ᱟᱡ ᱵᱟᱵᱟ ᱥᱚᱠᱛᱚᱭ ᱮᱜᱮᱨᱟ ᱾ ᱟᱢ ᱫᱚ ᱤᱧ ᱨᱤᱱ ᱜᱤᱫᱽᱨᱟᱹ ᱫᱚᱢ ᱵᱟᱝ ᱠᱟᱱᱟ ᱾ ᱟᱢ ᱡᱩᱫᱤ ᱤᱧ ᱨᱤᱱ ᱜᱤᱫᱽᱨᱟᱹ ᱦᱩᱱᱟᱹᱝᱮᱢ
ᱦᱩᱭ ᱠᱚᱜᱼᱟ ᱮᱱ ᱠᱷᱟᱱ ᱫᱚ ᱱᱚᱝᱠᱟ ᱫᱚ ᱵᱟᱝᱮᱢ ᱠᱟᱹᱢᱤ ᱠᱮᱭᱟ ᱾ ᱟᱵᱚ ᱚᱲᱟᱜ ᱨᱮᱫᱚ ᱡᱚᱛᱚ ᱜᱮ ᱵᱟᱯᱞᱟ ᱵᱟᱹᱦᱩ ᱾ ᱟᱢ
ᱫᱚᱢ ᱰᱟᱺᱜᱽᱨᱤ ᱪᱤᱞᱤ ᱠᱟᱱᱟᱢ ᱩᱱᱟᱹᱜ ᱫᱤᱥᱚᱢ ᱨᱮ ᱠᱩᱲᱤ ᱢᱮᱱᱟᱜ ᱠᱚᱣᱟ ᱟᱢ ᱵᱟᱹᱦᱩ ᱜᱮ ᱫᱚᱨᱠᱟᱨ ᱛᱟᱦᱮᱸ ᱠᱟᱱ ᱠᱷᱟᱱ
ᱪᱮᱫᱟᱜ ᱵᱟᱢ ᱞᱟᱹᱭ ᱟᱹᱫᱤᱧᱟ ᱵᱟᱝ ᱦᱩᱱᱟᱹᱝ ᱤᱧ ᱵᱟᱯᱞᱟ ᱠᱮᱢᱟ ᱾ ᱟᱢ ᱛᱮ ᱡᱟᱦᱟᱸ ᱢᱟᱱ ᱛᱟᱦᱟ ᱠᱷᱚᱱ ᱮᱢ ᱦᱟᱹᱨ ᱟᱹᱜᱩ
ᱟᱠᱟ ᱫᱮᱭᱟ ᱾ ᱤᱧᱟᱜ ᱚᱲᱟᱜ ᱨᱮᱫᱚ ᱟᱢ ᱞᱟᱹᱜᱤᱫ ᱡᱟᱭᱜᱟ ᱵᱟᱹᱱᱩᱜᱼᱟ ᱾ ᱱᱤᱭᱟᱹ ᱜᱮ ᱤᱧᱟᱜ ᱢᱩᱪᱟᱹᱫ ᱠᱟᱛᱷᱟ ᱠᱟᱱᱟ ᱾ ᱟᱡ ᱟᱭᱳ
ᱢᱮᱱᱟᱭ ᱟᱹᱜᱩ ᱚᱪᱚ ᱟᱭ ᱢᱮᱥᱮ ᱪᱮᱫᱟᱜ ᱩᱱᱟᱹᱜ ᱮᱢ ᱨᱟᱹᱜᱤᱜ ᱠᱟᱱᱟ ᱾ ᱟᱡ ᱠᱩᱥᱤ ᱛᱮ ᱟᱹᱜᱩ ᱟᱠᱟ ᱫᱮᱭᱟᱭ ᱫᱚᱦᱚ
ᱦᱚᱪᱚ ᱟᱭ ᱢᱮ ᱾ ᱟᱡ ᱵᱟᱵᱟ ᱵᱟᱝ ᱠᱷᱚᱱ ᱵᱟᱝ ᱮ ᱨᱮᱵᱮᱱ ᱞᱮᱱᱟ ᱾ ᱟᱡ ᱟᱭᱳᱣᱟᱜ ᱠᱟᱛᱷᱟ ᱦᱚᱸ ᱟᱡ ᱵᱟᱵᱟ ᱵᱟᱭ ᱵᱟᱛᱟᱣ ᱞᱮᱫᱼᱟ ᱾ ᱟᱹᱵᱤᱱ ᱫᱚ ᱱᱤᱛᱚᱜ ᱜᱮ ᱱᱚᱸᱰᱮ ᱠᱷᱚᱱ ᱩᱴᱷᱟᱹᱣ ᱜᱚᱫᱚᱜ ᱵᱤᱱ ᱾ ᱢᱚᱫᱚᱱ ᱟᱡ ᱵᱟᱵᱟ ᱟᱜ ᱠᱟᱛᱷᱟ ᱠᱚ ᱟᱸᱡᱚᱢ
ᱠᱟᱛᱮ ᱰᱩᱢᱱᱤ ᱫᱚ ᱟᱹᱰᱤ ᱜᱮ ᱫᱩᱠ ᱮ ᱟᱹᱭᱠᱟᱹᱣ ᱠᱮᱫᱼᱟ ᱾ ᱪᱮᱫ ᱦᱚᱸ ᱵᱟᱭ ᱨᱚᱲᱟ ᱾ ᱛᱷᱤᱨ ᱠᱚᱜ ᱟᱭ ᱢᱚᱫᱚᱱ ᱦᱚᱸ ᱪᱮᱫ
ᱦᱚᱸ ᱵᱟᱭ ᱞᱟᱹᱭᱟ ᱾ ᱛᱷᱤᱨ ᱠᱚ ᱜᱮᱭᱟᱭ ᱟᱡ ᱵᱟᱵᱟ ᱟᱜ ᱠᱟᱛᱷᱟ ᱠᱚ ᱟᱸᱡᱚᱢ ᱠᱟᱛᱮ ᱠᱤᱱ ᱨᱩᱣᱟᱹᱲᱟ ᱾ ᱛᱟᱭᱚᱢ ᱫᱚ ᱟᱹᱛᱩ
ᱨᱤᱱᱤᱡ ᱢᱤᱫ ᱜᱟᱛᱮ ᱚᱲᱟᱜ ᱠᱤᱱ ᱥᱮᱱᱚᱜᱼᱟ ᱾ ᱚᱸᱰᱮ ᱜᱮ ᱠᱤᱱ ᱛᱟᱦᱮᱸᱱᱟ᱾ ᱵᱟᱨ ᱦᱟᱴ ᱚᱸᱰᱮ ᱜᱮ ᱠᱤᱱ ᱛᱟᱦᱮᱸ ᱮᱱᱟ ᱾ ᱟᱡ
ᱵᱟᱵᱟ ᱮᱠᱟᱞ ᱚᱲᱟᱜ ᱛᱮ ᱤᱫᱤ ᱵᱟᱝ ᱮ ᱨᱮᱵᱮᱱ ᱞᱮᱱ ᱜᱮᱭᱟ ᱾ ᱛᱟᱭᱚᱢ ᱢᱚᱫᱚᱱ ᱟᱡ ᱠᱟᱠᱟ ᱛᱮᱠᱚ ᱚᱲᱟᱜ ᱪᱮᱛᱟᱱ ᱴᱚᱞᱟ ᱠᱤᱱ
ᱥᱮᱱ ᱮᱱᱟ ᱾ ᱚᱸᱰᱮ ᱜᱮ ᱥᱮᱱ ᱠᱟᱛᱮ ᱢᱚᱲᱮ ᱦᱚᱲ ᱠᱚ ᱡᱟᱣᱨᱟ ᱮᱱ ᱛᱮᱠᱚ ᱛᱤᱨᱤᱞ ᱛᱟᱨᱚᱵ ᱠᱮᱫ ᱠᱤᱱᱟ ᱾
ᱠᱤᱪᱷᱩ ᱫᱤᱱ ᱛᱟᱭᱚᱢ ᱚᱸᱰᱮ ᱦᱚᱸ ᱵᱷᱤᱱᱟᱹ ᱨᱮ ᱠᱤᱱ ᱛᱟᱦᱮᱸᱱᱟ ᱾ ᱢᱚᱫᱚᱱ ᱫᱚ ᱠᱟᱹᱢᱤ ᱪᱟᱞᱟᱜ ᱟᱭ ᱟᱨ ᱰᱩᱢᱱᱤ ᱫᱚ ᱟᱹᱛᱩ ᱚᱲᱟᱜ
ᱠᱚᱨᱮ ᱜᱮᱭ ᱠᱟᱹᱢᱤ ᱵᱟᱲᱟᱭᱟ ᱾ ᱚᱲᱟᱜ ᱨᱮᱫᱚ ᱵᱟᱱᱟ ᱦᱚᱲ ᱵᱟᱝ ᱠᱤᱱ ᱛᱟᱦᱮᱸᱱᱟ ᱾ ᱚᱱᱠᱟ ᱠᱟᱛᱮ ᱡᱤᱭᱚᱱ ᱠᱤᱱ ᱠᱷᱟᱸᱰᱟᱣ
ᱠᱮᱫᱼᱟ ᱾ ᱰᱩᱢᱱᱤ ᱪᱮᱫ ᱦᱚᱸ ᱵᱟᱝ ᱮ ᱵᱮᱡᱟᱨ ᱞᱮᱱᱟ ᱾ ᱚᱞᱚᱝ ᱞᱤᱠᱷᱚᱱ ᱢᱚᱱᱮ ᱠᱟᱛᱮ ᱢᱚᱫᱚᱱ ᱥᱟᱶ ᱮ ᱛᱟᱦᱮᱸ ᱮᱱᱟ ᱾
ᱢᱤᱫ ᱥᱮᱨᱢᱟ ᱯᱟᱨᱚᱢ ᱮᱱᱟ ᱥᱚᱦᱨᱟᱭ ᱵᱚᱸᱜᱟ ᱦᱮᱡ ᱮᱱᱟ ᱾ ᱰᱩᱢᱱᱤ ᱛᱤᱠᱤᱱ ᱫᱚ ᱵᱟᱨ ᱵᱚᱭᱦᱟ ᱠᱩᱲᱤ ᱜᱮ ᱠᱚᱲᱟ ᱵᱚᱭᱦᱟ ᱫᱚ ᱵᱟᱹᱱᱩᱜ ᱠᱚᱣᱟ ᱾ ᱟᱭᱳ ᱵᱟᱵᱟ ᱟᱨ ᱟᱹᱠᱤᱱ ᱵᱟᱨ ᱵᱩᱦᱤᱱ ᱰᱩᱢᱱᱤ ᱟᱨ ᱵᱟᱥᱚ ᱾ ᱥᱚᱦᱨᱟᱭ ᱵᱚᱸᱜᱟ ᱥᱮᱴᱮᱨ ᱮᱱᱟ ᱾ ᱰᱩᱢᱱᱤ ᱟᱡ ᱵᱟᱵᱟ ᱥᱚᱦᱨᱟᱭ ᱯᱟᱨᱟᱵᱽ ᱱᱮᱶᱛᱟᱭ ᱦᱮᱡ ᱮᱱᱟ ᱾ ᱟᱡ ᱵᱟᱵᱟ ᱠᱤᱱ ᱢᱮᱛᱟᱫ ᱫᱮᱭᱟ ᱵᱟᱝ ᱢᱟ ᱥᱚᱦᱨᱟᱭ ᱨᱮᱫᱚ ᱞᱤᱧ ᱦᱤᱡᱩᱜ ᱜᱮᱭᱟ ᱯᱮᱲᱟᱜ ᱡᱤᱞ ᱫᱟᱠᱟ ᱡᱚᱢ ᱞᱟᱹᱜᱤᱫ ᱛᱮ ᱾ ᱜᱚᱴ ᱵᱚᱸᱜᱟ ᱫᱚᱥᱟᱨ ᱦᱤᱞᱚᱜ ᱜᱚᱲᱟ ᱵᱚᱸᱜᱟ ᱦᱤᱞᱚᱜ ᱰᱩᱢᱱᱤ ᱛᱮᱠᱚ ᱟᱹᱛᱩ ᱥᱮᱱᱚᱜ ᱞᱟᱹᱜᱤᱫ ᱠᱤᱱ ᱚᱰᱚᱠ ᱮᱱᱟ ᱾ ᱢᱚᱫᱚᱱ ᱛᱮᱠᱚ ᱟᱹᱛᱩ ᱠᱷᱚᱱ ᱰᱩᱢᱱᱤ ᱛᱮᱠᱚ ᱟᱹᱛᱩ ᱪᱟᱞᱟᱣᱜ ᱦᱚᱨ ᱫᱚ ᱵᱟᱨᱭᱟ ᱢᱮᱱᱟᱜᱼᱟ ᱾ ᱢᱤᱫ ᱫᱚ ᱰᱟᱦᱟᱨ ᱦᱚᱨ ᱟᱨ ᱫᱚᱥᱟᱨ ᱫᱚ ᱵᱩᱨᱩ ᱦᱚᱨ ᱾ ᱰᱟᱦᱟᱨ ᱦᱚᱨ ᱛᱮ ᱪᱟᱞᱟᱣ ᱞᱮᱱᱠᱷᱟᱱ ᱵᱟᱨ ᱴᱟᱲᱟᱝ ᱛᱟᱞᱟ ᱠᱷᱚᱱ ᱱᱟᱥᱮ ᱵᱟᱹᱲᱛᱤ ᱞᱟᱜᱟᱛᱚᱜᱼᱟ ᱾ ᱵᱩᱨᱩ ᱦᱚᱨ ᱥᱮᱱ ᱞᱮᱱ ᱠᱷᱟᱱ ᱢᱤᱫ ᱴᱟᱝ ᱛᱟᱞᱟ ᱜᱟᱱ ᱜᱮ ᱚᱠᱛᱚ ᱞᱟᱜᱟᱛᱚᱜᱼᱟ ᱾ ᱵᱩᱨᱩ ᱦᱚᱨ ᱜᱮ ᱠᱤᱱ ᱢᱚᱦᱰᱟ ᱮᱱᱟ ᱾ ᱵᱩᱨᱩ ᱦᱚᱨ ᱛᱮ ᱪᱟᱞᱟᱣ ᱞᱮᱱᱠᱷᱟᱱ ᱢᱤᱫ ᱠᱤᱞᱚᱢᱤᱴᱟᱨ ᱜᱟᱱ ᱰᱩᱞᱩᱝ ᱜᱟᱹᱰᱤ ᱫᱚ ᱴᱷᱮᱞᱟᱣ ᱦᱩᱭᱩᱜᱼᱟ ᱾ᱫᱷᱤᱨᱤ ᱫᱟᱥᱱᱟ (ᱡᱟᱭᱟᱜᱟ) ᱠᱟᱱᱟ ᱛᱚ ᱚᱱᱟ ᱪᱮᱠᱟ ᱚᱸᱰᱮ ᱫᱚ ᱫᱮᱡ ᱠᱟᱛᱮ ᱯᱟᱨᱚᱢ ᱫᱚ ᱮᱠᱟᱞ ᱵᱟᱝ ᱜᱟᱱᱚᱜᱼᱟ ᱾
ᱫᱩᱞᱩᱝ ᱜᱟᱹᱰᱤ ᱛᱮᱠᱤᱱ ᱥᱮᱱᱚᱜ ᱠᱟᱱᱟ ᱾ ᱡᱷᱚᱞᱟ ᱨᱮ ᱞᱩᱜᱽᱲᱤ ᱠᱚ ᱠᱤᱱ ᱥᱟᱸᱵᱟᱣ ᱟᱠᱟᱫᱼᱟ ᱾ ᱵᱤᱨ ᱦᱚᱨ ᱛᱮᱜᱮ
ᱠᱤᱱ ᱥᱮᱱᱚᱜ ᱠᱟᱱᱟ ᱾ ᱠᱤᱪᱷᱩ ᱡᱷᱟᱹᱞ ᱫᱚ ᱫᱮᱡ ᱠᱟᱛᱮ ᱠᱤᱱ ᱥᱮᱱᱚᱜᱼᱟ ᱾ ᱫᱷᱤᱨᱤ ᱫᱟᱥᱱᱟ ᱥᱮᱴᱮᱨᱮᱱ ᱠᱷᱟᱱ ᱛᱟᱭᱚᱢ ᱫᱚ
ᱰᱩᱞᱩᱝ ᱜᱟᱹᱰᱤ ᱠᱤᱱ ᱴᱷᱮᱞᱟᱣ ᱤᱫᱤᱭᱟ ᱾ ᱚᱱᱟ ᱫᱟᱥᱱᱟ ᱫᱚ ᱟᱹᱱᱟᱹᱪᱩᱨ ᱜᱮᱭᱟ ᱟᱨ ᱱᱤᱪᱚᱞ ᱜᱮ ᱟᱹᱭᱠᱟᱹᱣᱜᱼᱟ ᱾ ᱚᱱᱟ ᱟᱹᱱᱟᱹᱪᱩᱨ ᱴᱷᱮᱱ ᱜᱮ ᱢᱤᱫ ᱵᱟᱱᱟ ᱥᱟᱶ ᱠᱤᱱ ᱥᱟᱢᱟᱝ ᱫᱟᱯᱨᱟᱢ ᱜᱚᱫ ᱮᱱᱟ ᱾ ᱴᱟᱴᱠᱟ ᱰᱩᱢᱱᱤ ᱵᱟᱱᱟᱭ ᱧᱮᱞ ᱠᱮᱫᱮ ᱠᱷᱟᱱ ᱥᱚᱠᱛᱚᱭ
ᱠᱤᱠᱭᱟᱹᱣ ᱮᱱᱟ ᱾ ᱠᱤᱠᱭᱟᱹᱣ ᱮᱱᱛᱮ ᱢᱚᱫᱚᱱ ᱰᱩᱞᱩᱝ ᱜᱟᱹᱰᱤ ᱫᱚᱭ ᱟᱲᱟᱜ ᱜᱤᱰᱤ ᱠᱟᱫᱼᱟ ᱾ ᱰᱩᱞᱩᱝ ᱜᱟᱹᱰᱤ ᱟᱲᱟᱜ ᱜᱤᱰᱤ ᱠᱮᱫ
ᱠᱷᱟᱱ ᱚᱱᱟ ᱜᱟᱹᱰᱤ ᱫᱷᱤᱨᱤ ᱠᱚᱨᱮ ᱵᱟᱡᱟᱣ ᱮᱱᱛᱮ ᱥᱚᱠᱛᱚ ᱴᱷᱟᱝᱼᱴᱷᱤᱝ ᱥᱟᱰᱮ ᱮᱱᱟ ᱾ ᱵᱟᱱᱟ ᱦᱚᱸᱭ ᱵᱚᱨᱚᱭᱮᱱᱟ ᱩᱱᱤ
ᱵᱩᱡᱷᱟᱹᱣ ᱠᱮᱫ ᱟᱭ ᱥᱮ ᱱᱩᱭ ᱦᱚᱲ ᱫᱚ ᱰᱩᱞᱩᱝ ᱜᱟᱹᱰᱤ ᱛᱮ ᱤᱧ ᱮ ᱪᱟᱯᱟᱫ ᱠᱤᱫᱤᱧᱟ ᱾ ᱱᱚᱛᱮ ᱰᱩᱢᱱᱤ ᱫᱚ ᱵᱚᱨᱚ ᱛᱮᱭ ᱫᱟᱹᱲ
ᱠᱮᱫᱼᱟ ᱾ ᱩᱱᱤ ᱧᱮᱞᱛᱮ ᱥᱚᱠᱛᱚ ᱡᱩᱨ ᱛᱮ ᱢᱮᱱᱟᱭ, ᱼ ᱟᱹᱛᱷᱟᱹᱣᱲᱤ ᱫᱚ ᱟᱞᱚᱢ
ᱫᱟᱹᱲᱟ ᱾ ᱤᱧ ᱢᱤᱱᱟᱹᱧᱟ ᱾ ᱪᱮᱫ ᱜᱮ ᱵᱟᱹᱧ ᱪᱤᱠᱟᱹ ᱚᱪᱚᱣᱟᱢᱟ ᱾ ᱢᱚᱫᱚᱱ ᱟᱜ ᱨᱚᱲ ᱮ ᱟᱸᱡᱚᱢ ᱠᱮᱫ ᱠᱷᱟᱱ ᱢᱤᱫ ᱫᱟᱨᱮ
ᱫᱟᱱᱟᱝ ᱨᱮ ᱩᱠᱩᱱᱟᱭ ᱾ ᱱᱚᱛᱮ ᱵᱟᱱᱟ ᱢᱚᱫᱚᱱ ᱪᱮᱛᱟᱱ ᱨᱮ ᱫᱚᱱ ᱠᱟᱛᱮ ᱨᱟᱹᱵᱩᱲ ᱥᱟᱱᱟᱭᱟ ᱾ ᱢᱚᱫᱚᱱ ᱵᱩᱨᱩ ᱥᱩᱨ ᱟᱹᱛᱩ
ᱨᱤᱱᱤᱡ ᱠᱚᱲᱟ ᱠᱟᱱᱟᱭ, ᱚᱱᱟ ᱪᱮᱠᱟ ᱵᱟᱹᱲᱛᱤ ᱵᱟᱝ ᱵᱚᱛᱚᱨ ᱠᱟᱛᱮ ᱩᱱᱤ ᱥᱟᱶ ᱛᱟᱯᱟᱢ ᱮ ᱥᱟᱯᱲᱟᱣ ᱡᱩᱛ ᱜᱚᱫ ᱮᱱᱟ ᱾
ᱵᱟᱱᱟ ᱥᱟᱶ ᱛᱟᱭᱚᱢ ᱠᱤᱱ ᱦᱟᱯᱟᱲᱩᱵ ᱮᱱᱟ ᱾ ᱢᱚᱫᱚᱱ ᱵᱟᱱᱟ ᱟᱜ ᱵᱟᱱᱟᱨ ᱥᱟᱢᱟᱜ ᱡᱟᱸᱜᱟᱭ ᱥᱟᱵ ᱠᱮᱫᱮᱭᱟ ᱾ ᱵᱟᱱᱟᱭ
ᱰᱤᱰᱤ ᱟᱠᱟᱱᱟ ᱾ ᱦᱟᱱᱛᱮ ᱱᱷᱟᱛᱮ ᱠᱤᱱ ᱴᱷᱮᱯᱮᱞᱟᱣᱜ ᱠᱟᱱᱟ ᱾ ᱢᱤᱫ ᱵᱟᱨ ᱫᱷᱟᱣ ᱢᱚᱫᱚᱱ ᱡᱟᱸᱜᱟ ᱛᱟᱭ ᱮ ᱯᱩᱪᱩᱡ ᱠᱮᱫᱼᱟ
᱾ ᱩᱱᱨᱮ ᱡᱟᱸᱜᱟ ᱨᱮᱱᱟᱜ ᱨᱟᱢᱟ ᱛᱮ ᱢᱚᱫᱚᱱ ᱟᱜ ᱡᱟᱢᱟ ᱫᱚᱭ ᱨᱟᱹᱵᱩᱲ ᱚᱲᱮᱡ ᱠᱮᱫᱼᱟ ᱾ ᱮᱱ ᱦᱚᱸ ᱢᱤᱫᱴᱟᱹᱝ ᱡᱟᱸᱜᱟ ᱫᱚ
ᱵᱟᱭ ᱟᱲᱟᱜ ᱮ ᱠᱟᱱᱟ ᱾ ᱵᱟᱱᱟ ᱫᱚ ᱰᱤᱰᱤ ᱠᱷᱚᱱ ᱚᱛ ᱨᱮ ᱡᱟᱸᱜᱟ ᱫᱚᱦᱚ ᱨᱟᱱᱟᱜ ᱫᱟᱶ ᱜᱮ ᱵᱟᱭ ᱮᱢᱟᱭ ᱠᱟᱱᱟ ᱾ ᱵᱟᱹᱭ ᱵᱟᱹᱭ ᱛᱮ ᱢᱤᱫ ᱦᱟᱹᱲᱩᱵ ᱥᱚᱥᱚ ᱫᱟᱨᱮ ᱴᱷᱮᱱ ᱮ ᱤᱫᱤ ᱠᱮᱫᱮᱭᱟ ᱟᱨ ᱴᱟᱴᱠᱟ ᱚᱱᱟ ᱫᱟᱨᱮ ᱨᱮ ᱩᱠᱩ ᱜᱚᱫᱚᱜ ᱠᱟᱱ ᱞᱮᱠᱟ
ᱞᱮᱸᱜᱟ ᱛᱤ ᱨᱮᱱᱟᱜ ᱵᱟᱱᱟ ᱟᱜ ᱡᱟᱸᱜᱟ ᱫᱚᱭ ᱟᱲᱟᱜ ᱜᱚᱫ ᱠᱟᱫᱮᱭᱟ ᱾ ᱵᱟᱱᱟ ᱱᱟᱥᱮ ᱡᱚᱡᱚᱢ ᱡᱟᱸᱜᱟ ᱞᱟᱛᱟᱨ ᱨᱮ ᱫᱚᱦᱚ
ᱥᱟᱱᱟᱭ ᱠᱟᱱ ᱛᱟᱦᱮᱸᱫ ᱩᱱᱨᱮ ᱢᱚᱫᱚᱱ ᱡᱚᱡᱚᱢ ᱡᱟᱸᱜᱟ ᱛᱟᱭ ᱮ ᱥᱟᱵ ᱠᱮᱫᱼᱟ ᱾ ᱫᱟᱨᱮ ᱦᱟᱱᱟ ᱥᱟᱦᱟ ᱵᱟᱱᱟ ᱟᱨ ᱫᱟᱨᱮ
ᱱᱚᱣᱟ ᱥᱟᱦᱟ ᱨᱮ ᱢᱚᱫᱚᱱ ᱾ ᱢᱤᱫ ᱜᱷᱟᱹᱲᱤᱠ ᱱᱟᱥᱮ ᱡᱤᱨᱟᱹᱣ ᱧᱚᱜ ᱠᱟᱛᱮ ᱵᱟᱱᱟ ᱫᱚ ᱚᱱᱟ ᱥᱚᱥᱚ ᱫᱟᱨᱮ ᱨᱮ ᱨᱟᱫᱽᱲᱟᱣ ᱮ
ᱮᱦᱚᱵ ᱠᱮᱫᱮᱭᱟ ᱾ ᱵᱟᱱᱟ ᱦᱚᱸᱭ ᱞᱟᱸᱜᱟ ᱤᱫᱤᱜ ᱠᱟᱱᱟ, ᱥᱚᱠᱛᱚᱭ ᱯᱷᱩᱨᱼᱯᱷᱩᱨ ᱮᱫᱼᱟ ᱾ ᱢᱚᱫᱚᱱ ᱩᱱᱤᱭᱟᱜ ᱯᱷᱩᱨ
ᱠᱷᱚᱱ ᱮ ᱵᱟᱧᱪᱟᱣ ᱤᱫᱤᱜ ᱠᱟᱱᱟ ᱾ ᱢᱚᱫᱚᱱ ᱮ ᱵᱟᱰᱟᱭ ᱛᱟᱦᱮᱸᱫ ᱡᱮ ᱵᱟᱱᱟ ᱯᱷᱩᱨ ᱵᱟᱡᱟᱣ ᱞᱮᱱ ᱠᱷᱟᱱ ᱥᱚᱠᱛᱚ ᱵᱟᱵᱟᱛ
ᱟ ᱾ ᱵᱟᱱᱟᱭ ᱞᱟᱸᱜᱟ ᱧᱚᱜ ᱮᱱ ᱠᱷᱟᱱ ᱢᱚᱫᱚᱱ ᱞᱮᱸᱜᱟ ᱛᱤᱛᱮ ᱟᱡᱟᱜ ᱰᱚᱨᱟᱭ ᱚᱨ ᱛᱚᱯᱟᱜ ᱜᱚᱫ ᱠᱮᱫᱼᱟ, ᱟᱨ ᱦᱚᱸ ᱟᱲᱟᱜ
ᱞᱮᱫ ᱡᱟᱸᱜᱟ ᱛᱟᱭ ᱮ ᱥᱟᱵ ᱨᱩᱣᱟᱹᱲ ᱠᱮᱫ ᱛᱮ ᱵᱟᱱᱟ ᱟᱜ ᱵᱟᱱᱟᱨ ᱢᱟᱬᱟᱝ ᱡᱟᱸᱜᱟᱭ ᱛᱚᱞ ᱠᱮᱫᱮᱭᱟ ᱚᱱᱟ ᱰᱚᱨᱟ ᱛᱮ,
ᱵᱩᱨᱩ ᱨᱤᱱ ᱵᱚᱸᱜᱟ ᱠᱚ ᱧᱩᱢ ᱠᱟᱛᱮ ᱾ ᱵᱟᱱᱟ ᱰᱤᱰᱤ ᱜᱮ ᱢᱮᱱᱟᱭᱟ, ᱚᱱᱟ ᱫᱤᱛᱮ ᱵᱟᱹᱲᱛᱤ ᱫᱟᱲᱮ ᱛᱟᱭ ᱵᱟᱝ ᱦᱤᱡᱩᱜ
ᱠᱟᱱᱟ ᱾ ᱵᱟᱱᱟ ᱯᱷᱮᱸᱼᱯᱷᱮᱸ ᱥᱟᱦᱮᱫ ᱠᱮᱫᱟᱭ ᱾ ᱢᱚᱫᱚᱱ ᱟᱨᱦᱚᱸ ᱟᱡᱟᱜ ᱚᱲᱮᱡ ᱡᱟᱢᱟ ᱯᱟᱱᱛᱮ ᱟᱹᱜᱩ ᱠᱮᱫᱛᱮ ᱚᱨ
ᱪᱤᱨᱟᱹ ᱠᱮᱫᱛᱮ ᱚᱱᱟ ᱛᱮᱦᱚᱸᱭ ᱛᱚᱞ ᱠᱟᱫ ᱫᱮᱭᱟ ᱾ ᱰᱩᱢᱱᱤ ᱫᱚ ᱫᱟᱨᱮ ᱫᱟᱱᱟᱝ ᱠᱷᱚᱱ ᱮ ᱚᱰᱚᱠᱚᱜᱼᱟ ᱾ ᱟᱹᱰᱤ ᱡᱩᱨ ᱜᱮ
ᱰᱩᱢᱱᱤ ᱫᱚᱭ ᱵᱚᱛᱚᱨ ᱛᱮ ᱩᱫᱽᱜᱟᱹᱨ ᱟᱠᱟᱱᱟ ᱾ ᱢᱮᱫᱟᱦᱟ ᱠᱚᱛᱟᱭ ᱵᱚᱛᱚᱨ ᱛᱮ ᱟᱨᱟᱜ ᱩᱛᱟᱹᱨ ᱜᱮᱭ ᱧᱮᱞᱚᱜ ᱠᱟᱱᱟ ᱾
ᱢᱚᱫᱚᱱ ᱫᱚ ᱰᱩᱢᱱᱤ ᱵᱟᱭ ᱧᱮᱞ ᱧᱟᱢ ᱮ ᱠᱟᱱ ᱠᱷᱟᱱ ᱥᱚᱠᱛᱚ ᱡᱩᱨ ᱛᱮ ᱦᱚᱦᱚᱭᱟᱭ,
ᱼ ᱮ ᱜᱚ ᱚᱠᱟ ᱮᱱᱟᱢ ᱜᱚ, ᱫᱮᱞᱟ ᱚᱰᱚᱠ ᱦᱤᱡᱩᱜ ᱢᱮ ᱱᱤᱛᱚᱜ ᱫᱚ ᱵᱟᱭ ᱡᱟᱸᱦᱟ ᱪᱮᱠᱟᱹ ᱫᱟᱲᱮᱭᱟ ᱞᱟᱝᱼᱟ ᱾ ᱰᱩᱢᱱᱤ
ᱫᱟᱨᱮ ᱫᱟᱱᱟᱝ ᱠᱷᱚᱱ ᱮ ᱚᱰᱚᱠᱚᱜᱼᱟ ᱾ ᱰᱩᱢᱱᱤ ᱛᱟᱭᱚᱢ ᱮ ᱦᱮᱡ ᱥᱩᱨ ᱮᱱᱛᱮ ᱢᱤᱫ ᱨᱟᱹᱯᱩᱫ ᱨᱚᱦᱚᱲ ᱰᱟᱹᱨ ᱛᱮ
ᱵᱟᱱᱟ ᱵᱟᱨ ᱯᱮ ᱫᱷᱟᱣ ᱮ ᱯᱟᱦᱟᱨ ᱠᱮᱫᱮᱭᱟ ᱾ ᱢᱚᱫᱚᱱ ᱫᱚ ᱰᱩᱞᱩᱝ ᱜᱟᱹᱰᱤ ᱵᱮᱨᱮᱫ ᱨᱟᱠᱟᱵ ᱠᱟᱛᱮ ᱟᱫᱚ ᱩᱱᱤ
ᱵᱟᱱᱟ ᱫᱚ ᱚᱱᱠᱟ ᱜᱮᱠᱤᱱ ᱵᱟᱹᱜᱤᱭᱟᱫ ᱫᱮᱭᱟ ᱾
ᱚᱲᱟᱜ ᱥᱮᱴᱮᱨᱚᱜ ᱛᱮᱜᱮ ᱧᱩᱛ ᱜᱚᱫᱚᱜᱼᱟ ᱾ ᱰᱩᱢᱱᱤ ᱫᱚ ᱚᱲᱟᱜ ᱥᱮᱴᱮᱨ ᱠᱟᱛᱮ ᱦᱚᱨᱚ ᱵᱚᱨᱚ ᱯᱟᱨᱠᱚᱢ ᱨᱮ ᱰᱩᱲᱩᱵ ᱜᱚᱫ
ᱮᱱᱟᱭ, ᱢᱚᱫᱚᱱ ᱫᱚ ᱰᱩᱞᱩᱝ ᱜᱟᱹᱰᱤ ᱪᱟᱹᱲᱤ ᱥᱮᱫ ᱨᱮ ᱴᱮᱸᱰᱟᱨ ᱠᱟᱛᱮ ᱟᱡ ᱦᱚᱸ ᱰᱩᱢᱱᱤ ᱯᱟᱱᱛᱮ ᱨᱮ ᱫᱩᱲᱩᱵ
ᱮᱱᱟᱭ ᱾ ᱵᱟᱥᱚ ᱞᱚᱴᱟ ᱫᱟᱜ ᱠᱚᱭ ᱚᱰᱚᱠ ᱟᱹᱠᱤᱱᱟ ᱾ ᱰᱩᱢᱱᱤ ᱟᱭᱳᱭ ᱠᱩᱜᱞᱤᱭᱟ,
ᱼ ᱦᱮᱸ ᱡᱟᱶᱟᱭ ᱱᱟᱯᱟᱭ ᱛᱮᱜᱮ ᱵᱤᱱ ᱦᱮᱡ ᱥᱮᱴᱮᱨ ᱟᱱᱟ ᱛᱚ? ᱢᱚᱫᱚᱱ ᱮ ᱢᱮᱱᱟ, ᱼ ᱦᱚᱭ ᱭᱳ ᱱᱟᱯᱟᱭ
ᱛᱮᱜᱮ ᱞᱤᱧ ᱦᱮᱡ ᱮᱱᱟ ᱾ ᱰᱩᱢᱱᱤ ᱫᱚ ᱞᱟᱹᱭ ᱟᱭ, ᱼ ᱵᱟᱝ ᱜᱮ ᱭᱳ ᱵᱟᱱᱟ ᱞᱤᱧ ᱧᱟᱢ
ᱞᱮᱫᱮᱭᱟ ᱵᱩᱨᱩ ᱨᱮ ᱾ ᱟᱫᱚ ᱥᱟᱱᱟᱢ ᱚᱲᱟᱜ ᱦᱚᱲ ᱠᱚ ᱵᱚᱛᱚᱨ ᱜᱚᱫᱚᱜᱼᱟ ᱚᱱᱟ ᱟᱸᱡᱚᱢ ᱠᱟᱛᱮ ᱾
ᱡᱚᱛᱚ ᱚᱲᱟᱜ ᱦᱚᱲ ᱠᱚ ᱚᱰᱚᱠᱚᱜᱼᱟ ᱾ ᱛᱟᱭᱚᱢ ᱢᱚᱫᱚᱱ ᱥᱟᱱᱟᱢ ᱠᱟᱛᱷᱟᱭ ᱞᱟᱹᱭ ᱥᱚᱫᱚᱨ ᱟᱠᱚᱣᱟ ᱾ ᱫᱚᱥᱟᱨ ᱦᱤᱞᱚᱜ
ᱟᱹᱛᱩ ᱠᱚᱲᱟ ᱠᱚ ᱡᱚᱴᱟᱣ ᱠᱟᱛᱮ ᱩᱱᱤ ᱵᱟᱱᱟ ᱫᱚᱠᱚ ᱫᱟᱞ ᱜᱚᱡ ᱠᱟᱛᱮ ᱠᱚ ᱟᱹᱜᱩ ᱮᱭᱟ ᱾ ᱥᱟᱱᱟᱢ ᱟᱹᱛᱩ ᱡᱟᱠ ᱦᱚᱲ ᱵᱟᱱᱟ
ᱡᱤᱞ ᱠᱚ ᱦᱟᱹᱴᱤᱧ ᱛᱮ ᱠᱚ ᱦᱟᱺᱰᱤ ᱪᱟᱠᱷᱱᱟᱭᱟ ᱾
ᱰᱩᱢᱱᱤ ᱦᱟᱛᱚᱢ ᱠᱩᱢᱟᱹᱝ ᱡᱚᱛᱚ ᱠᱚ ᱦᱮᱡ ᱥᱮᱴᱮᱨ ᱠᱚᱜᱼᱟ ᱾ ᱡᱚᱛᱚ ᱦᱚᱲ ᱥᱟᱶ ᱵᱩᱜᱤ ᱵᱟᱹᱲᱤᱡ ᱠᱚ ᱜᱟᱯᱟᱞ ᱢᱟᱨᱟᱣᱟ ᱾ ᱡᱚᱢ
ᱟᱠᱚ ᱧᱩᱭ ᱟᱠᱚ ᱨᱟᱪᱟ ᱨᱮ ᱫᱩᱲᱩᱵ ᱠᱟᱛᱮ ᱾ ᱩᱱ ᱚᱠᱛᱚ ᱨᱮ ᱰᱩᱢᱱᱤ ᱟᱡ ᱡᱷᱤ ᱠᱩᱢᱟᱹᱝ , ᱟᱡ ᱵᱟᱵᱟ ,ᱟᱡ ᱟᱭᱳ ᱟᱨ
ᱢᱚᱫᱚᱱ ᱠᱚ ᱫᱩᱲᱩᱵ ᱠᱚᱜ ᱛᱮ ᱛᱟᱝ ᱦᱟᱺᱰᱤ ᱞᱮᱴᱚ ᱠᱚ ᱥᱩᱨ ᱟᱠᱚᱣᱟ ᱞᱟᱸᱫᱽ ᱟᱠᱚ ᱨᱚᱯᱚᱲ ᱟᱠᱚ, ᱢᱤᱰ ᱥᱟᱶᱛᱮ ᱡᱚᱢ ᱟᱠᱚ
ᱟᱨ ᱠᱚ ᱧᱩᱭᱟ ᱾ ᱰᱩᱢᱱᱤ ᱟᱡ ᱡᱷᱤ ᱩᱱ ᱚᱠᱛᱚ
ᱢᱤᱫ ᱠᱷᱚᱫᱽ ᱮ ᱥᱮᱨᱮᱧ ᱜᱚᱫᱟ, ᱼ
ᱫᱟᱫᱟ ᱨᱮ ᱢᱤᱫ ᱠᱩᱴᱤ ᱡᱤᱞ ᱞᱟᱹᱜᱤᱫ,
ᱫᱟᱫᱟ ᱨᱮ ᱢᱤᱫ ᱯᱷᱩᱲᱩᱜ ᱞᱮᱴᱚ ᱞᱟᱹᱜᱤᱫ,
ᱫᱟᱫᱟ ᱨᱮᱢ ᱱᱮᱶᱴᱟ ᱞᱤᱫᱤᱧ ᱫᱚ ᱾
ᱥᱮᱨᱮᱧ ᱢᱩᱪᱟᱹᱫ ᱥᱟᱶᱛᱮ ᱜᱮ ᱰᱩᱢᱱᱤ ᱟᱡ ᱵᱟᱵᱟ ᱫᱚᱭ ᱯᱟᱦᱲᱟ ᱜᱚᱫᱟ ᱥᱟᱹᱨᱤ ᱜᱮ ᱢᱟᱹᱭ, ᱱᱚᱣᱟ ᱚᱲᱟᱜ ᱨᱮ ᱞᱟᱝ
ᱡᱟᱱᱟᱢ ᱞᱮᱱᱟ, ᱢᱤᱫ ᱚᱲᱟᱜ ᱨᱮ, ᱢᱤᱫ ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱚ ᱮᱴᱟᱜ ᱚᱲᱟᱜ ᱜᱮ ᱥᱮᱱᱚᱜ ᱦᱩᱭᱩᱜᱼᱟ ᱾ ᱵᱟᱦᱟ
ᱥᱚᱦᱨᱟᱭ ᱨᱮᱜᱮ ᱯᱩᱨᱥᱚᱛ ᱛᱮᱫᱚ ᱵᱚᱱ ᱧᱟᱯᱟᱢ ᱠᱟᱱᱟ ᱟᱨ ᱵᱚᱱ ᱡᱚᱢ ᱧᱩᱭ ᱮᱫᱼᱟ ᱾ ᱚᱱᱟ ᱛᱮ ᱯᱟᱞᱮ ᱥᱮᱫᱟᱭ
ᱦᱟᱯᱲᱟᱢ ᱠᱚᱫᱚ ᱢᱚᱲᱮ ᱢᱟᱦᱟ ᱥᱚᱦᱨᱟᱭ ᱠᱚ ᱵᱮᱱᱟᱣ ᱞᱮᱫᱼᱟ ᱾ ᱼ ᱦᱚᱭ
ᱵᱟᱞᱮ ᱫᱟᱫᱟ ᱾ ᱟᱡ ᱡᱷᱤ ᱫᱚᱭ ᱞᱟᱹᱭ ᱜᱚᱫᱟ ᱾ ᱫᱚᱥᱟᱨ ᱛᱮᱥᱟᱨ ᱫᱤᱱ ᱯᱟᱨᱚᱢ ᱮᱱᱟ ᱡᱮᱛᱮ ᱦᱚᱲ ᱠᱚ ᱵᱤᱫᱟᱹᱭ ᱮᱱᱟ ᱾
ᱰᱩᱢᱱᱤ ᱟᱨ ᱢᱚᱫᱚᱱ ᱫᱚ ᱢᱮᱱᱟᱜ ᱠᱤᱱ ᱜᱮᱭᱟ, ᱵᱟᱝ ᱠᱤᱱ ᱥᱮᱱᱚᱜ ᱠᱟᱱᱟ ᱾ ᱪᱮᱫ ᱠᱟᱛᱷᱟ ᱠᱟᱱᱟ ᱚᱱᱟ ᱦᱚᱸ ᱵᱟᱝ ᱠᱤᱱ
ᱞᱟᱹᱭᱮᱜᱼᱟ᱾ ᱰᱩᱢᱱᱤ ᱜᱮ ᱟᱡ ᱟᱭᱳ ᱴᱷᱮᱱ ᱮ ᱨᱟᱜ ᱠᱮᱫᱼᱟ,
ᱼ ᱮᱭᱳ ᱡᱟᱣ ᱢᱟ ᱰᱟᱺᱜᱽᱣᱟᱹ ᱨᱮ ᱦᱮᱥᱮᱡ ᱥᱮᱠᱮᱡ ᱛᱤᱱᱟᱹᱜ ᱥᱩᱠ ᱨᱤᱧ ᱛᱟᱦᱮᱸ ᱠᱟᱱᱟ ᱜᱟᱛᱮ ᱠᱩᱲᱤ ᱥᱟᱶ, ᱢᱮᱱ ᱠᱷᱟᱱ
ᱤᱧᱟᱜ ᱪᱮᱫ ᱩᱱᱟᱹᱜ ᱢᱟᱨᱟᱝ ᱵᱷᱩᱞ ᱦᱩᱭ ᱮᱱᱟ ᱡᱮ ᱤᱧ ᱡᱟᱶᱟᱭ ᱚᱲᱟᱜ ᱦᱚᱲ ᱜᱮ ᱵᱟᱝ ᱠᱚ ᱠᱩᱥᱤ ᱟᱹᱞᱤᱧ ᱠᱟᱱᱟ ᱾ ᱪᱮᱫ ᱞᱤᱧ
ᱪᱤᱠᱟᱭᱟ? ᱠᱟᱠᱟ ᱛᱮᱠᱚ ᱚᱲᱟᱜ ᱨᱮ ᱛᱤᱱᱟᱹᱜ ᱫᱤᱱ ᱞᱤᱧ ᱛᱟᱦᱮᱸᱱᱟ ᱚᱱᱟ ᱠᱚ ᱢᱮᱱ ᱚᱠᱛᱮ ᱟᱹᱰᱤ ᱡᱩᱨ ᱢᱮᱫ ᱫᱟᱜ ᱛᱟᱭ ᱡᱚᱨᱚᱜᱼᱟ ᱾ ᱡᱟᱶᱟᱭ ᱠᱟᱛᱮ ᱜᱮ ᱯᱟᱞᱮ ᱤᱧ ᱵᱷᱩᱞ ᱠᱮᱫᱼᱟ ᱾ ᱤᱱᱟᱹ ᱦᱤᱞᱚᱜ ᱜᱮ ᱞᱟᱜᱽᱬᱮ ᱮᱱᱮᱡ ᱵᱟᱝ ᱤᱧ ᱥᱮᱱ ᱠᱚᱜ ᱠᱷᱟᱱ ᱜᱮ ᱯᱟᱞᱮ
ᱱᱟᱯᱟᱭ ᱠᱚᱜᱼᱟ ᱾ ᱼ ᱵᱟᱝᱟ, ᱵᱤᱴᱤ ᱟᱞᱚᱢ ᱨᱟᱜᱟ ᱤᱧ ᱢᱤᱱᱟᱧᱟ ᱾ ᱟᱢ ᱡᱟᱱᱟᱢ ᱟᱭᱳ, ᱟᱢ
ᱵᱟᱵᱟ ᱥᱟᱶ ᱞᱤᱧ ᱠᱟᱛᱷᱟ ᱞᱮᱱ ᱜᱮ, ᱵᱟᱝ ᱭᱳ ᱤᱧᱟᱜ ᱜᱮ ᱯᱟᱞᱮ ᱜᱟᱹᱞᱛᱤ ᱠᱟᱱᱟ ᱾ ᱦᱟᱸᱰᱮ ᱨᱤᱱ ᱵᱟᱵᱟ ᱦᱚᱸ ᱚᱱᱟ ᱠᱟᱛᱷᱟ
ᱜᱮ ᱞᱟᱹᱭᱮᱫ ᱫᱚ ᱡᱮ ᱪᱮᱫᱟᱜ ᱮᱢ ᱟᱹᱜᱩ ᱠᱮᱫᱮᱭᱟ ᱞᱟᱜᱽᱬᱮ ᱮᱱᱮᱡ ᱠᱷᱚᱱ ᱫᱚ ᱫᱤᱥᱚᱢ ᱨᱮ ᱵᱟᱹᱦᱩ ᱵᱟᱢ ᱧᱟᱢ ᱞᱮᱫ
ᱠᱚᱣᱟ ᱾ ᱵᱟᱯᱞᱟ ᱨᱮᱭᱟᱜ ᱛᱟᱦᱮᱸ ᱠᱟᱱ ᱠᱷᱟᱱ ᱪᱮᱫᱟᱜ ᱵᱟᱢ ᱞᱟᱹᱭ ᱟᱹᱫᱤᱧᱟ ᱤᱧ ᱵᱟᱹᱦᱩᱧ ᱧᱟᱢ ᱟᱫ ᱢᱮᱭᱟ ᱦᱩᱱᱟᱹᱝ ᱾
ᱚᱱᱟ ᱢᱮᱱ ᱠᱟᱛᱮ ᱜᱮ ᱰᱩᱢᱱᱤ ᱫᱚ ᱵᱟᱦᱨᱮ ᱥᱮᱫ ᱮ ᱚᱰᱚᱠ ᱮᱱᱟ ᱾ ᱟᱡ ᱟᱭᱳ ᱫᱚ ᱟᱡ ᱵᱟᱵᱟᱭ ᱞᱟᱹᱭ ᱟᱭᱟ
ᱥᱟᱱᱟᱢ ᱠᱟᱛᱷᱟ ᱾ ᱚᱱᱟ ᱯᱚᱨᱮ ᱚᱲᱟᱜ ᱦᱚᱲ ᱠᱚ ᱜᱟᱯᱟᱞ ᱢᱟᱨᱟᱣ ᱢᱤᱫᱟ ᱾ ᱢᱚᱫᱚᱱ ᱟᱨ ᱰᱩᱢᱱᱤ ᱠᱚ ᱫᱩᱲᱩᱵ ᱠᱤᱱᱟ
ᱛᱟᱞᱟ ᱨᱟᱪᱟ ᱨᱮ, ᱟᱨᱠᱚ ᱢᱮᱛᱟ ᱠᱤᱱᱟ, ᱼ ᱟᱹᱵᱤᱱ ᱛᱮᱦᱮᱧ ᱠᱷᱚᱱ ᱱᱚᱣᱟ ᱵᱟᱲᱜᱮ ᱞᱮ ᱞᱮᱵᱮᱫ ᱟᱫ ᱵᱤᱱᱟ ᱱᱚᱰᱮ ᱜᱮ ᱛᱟᱦᱮᱸᱱ ᱵᱤᱱ ,ᱱᱚᱰᱮ ᱜᱮ ᱛᱟᱭᱚᱢ ᱛᱮ ᱠᱩᱲᱟᱹᱣ ᱠᱟᱛᱮ ᱚᱲᱟᱜ ᱫᱩᱣᱟᱹᱨ ᱵᱮᱱᱟᱣ ᱠᱟᱛᱮ ᱵᱮᱥᱛᱮ ᱛᱟᱦᱮᱸᱱ ᱵᱤᱱ ᱾ ᱱᱚᱣᱟ ᱠᱟᱛᱷᱟ ᱠᱚ ᱟᱸᱡᱚᱢ ᱠᱟᱛᱮ ᱢᱚᱫᱚᱱ ᱮ ᱢᱮᱱᱟ, ᱼ ᱵᱟᱝᱟ ᱵᱟ, ᱟᱹᱞᱤᱧ ᱫᱚ ᱵᱟᱹᱞᱤᱧ ᱛᱟᱦᱮᱸᱱᱟ ᱨᱩᱣᱟᱹᱲ ᱟᱹᱞᱤᱧ ᱾ ᱡᱟᱦᱟᱸ ᱨᱮᱜᱮ
ᱞᱤᱧ ᱛᱟᱦᱮᱸᱱᱟ ᱦᱚᱲ ᱪᱮᱫ ᱠᱚ ᱢᱮᱛᱟ ᱞᱤᱧᱟ ᱟᱡ ᱵᱟᱵᱟ ᱵᱟᱹᱦᱩ ᱵᱟᱭ ᱟᱯᱱᱟᱨ ᱞᱮᱫᱮ ᱠᱷᱟᱱ ᱱᱤᱛᱚᱜ ᱫᱚ, ᱵᱟᱹᱦᱩ ᱚᱲᱟᱜ
ᱨᱮᱜᱮ ᱥᱮᱱ ᱢᱮᱥᱟ ᱮᱱᱟᱭ ᱾ ᱟᱹᱞᱤᱧ ᱫᱚ ᱵᱟᱝ ᱞᱤᱧ ᱛᱟᱦᱮᱸ ᱠᱮᱭᱟ ᱾
ᱟᱹᱰᱤ ᱠᱚ ᱵᱩᱡᱷᱟᱹᱣ ᱵᱟᱲᱟ ᱠᱮᱫᱮᱭᱟ, ᱢᱮᱛᱟᱭ ᱠᱟᱱᱟ ᱠᱚ, ᱼ ᱧᱮᱞ ᱢᱮᱜᱚ ᱡᱟᱸᱣᱟᱭ, ᱟᱢ ᱟᱞᱮ
ᱨᱤᱱ ᱵᱮᱴᱟ ᱥᱚᱢᱟᱱ ᱠᱟᱱ ᱜᱮᱭᱟᱢ ᱟᱨ ᱟᱞᱮ ᱨᱤᱱ ᱢᱟ ᱵᱮᱴᱟ ᱦᱚᱸ ᱛᱟᱞᱮ ᱵᱟᱹᱱᱩᱜ ᱠᱚᱣᱟ ᱚᱱᱟᱛᱮ ᱟᱞᱮ ᱥᱟᱶ ᱵᱟᱝ ᱛᱟᱦᱮᱸ ᱠᱟᱛᱮ ᱡᱟᱦᱟᱸ ᱵᱟᱲᱜᱮ ᱞᱮ ᱞᱮᱵᱮᱫ ᱦᱟᱠᱟᱣᱟᱫ ᱵᱤᱱᱟ ᱚᱱᱟ ᱵᱟᱲᱜᱮ ᱨᱮ ᱟᱹᱵᱤᱱ ᱠᱟᱹᱢᱤ ᱠᱟᱛᱮ ᱚᱲᱟᱜ ᱫᱩᱣᱟᱹᱨ
ᱵᱮᱱᱟᱣ ᱡᱚᱝ ᱵᱤᱱ ᱟᱨ ᱟᱹᱵᱤᱱ ᱱᱟᱯᱟᱭ ᱛᱮ ᱛᱟᱦᱮᱸᱱ ᱵᱤᱱ ᱾ ᱟᱞᱮ ᱫᱚ ᱤᱱᱟᱹ ᱜᱮᱞᱮ ᱠᱷᱚᱡᱚᱜ ᱠᱟᱱᱟ ᱾
ᱟᱜᱟᱢ ᱨᱮᱱᱟᱜ ᱠᱟᱛᱷᱟ ᱠᱚ ᱩᱭᱦᱟᱹᱨ ᱵᱩᱡᱷᱟᱹᱣ ᱠᱟᱛᱮᱫ ᱮ ᱢᱮᱱᱟ , ᱼ ᱦᱚᱭ
ᱛᱚᱵᱮ ᱞᱤᱧ ᱛᱟᱦᱮᱸᱱᱟ ᱾ ᱰᱩᱢᱱᱤ ᱟᱡ ᱟᱭᱳ ᱱᱚᱣᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱟᱹᱰᱤ ᱫᱚᱲ ᱮ ᱨᱟᱹᱥᱠᱟᱹ ᱮᱱᱟ ᱾
ᱱᱚᱛᱮ ᱢᱚᱫᱚᱱ ᱛᱮᱠᱚ ᱚᱲᱟᱜ ᱦᱚᱲ ᱡᱚᱠᱷᱚᱱ ᱢᱚᱫᱚᱱ ᱟᱜ ᱵᱟᱱᱟ ᱥᱟᱶ ᱛᱟᱯᱟᱢ ᱟᱨ ᱱᱟᱹᱭᱦᱟᱹᱨ ᱛᱟᱦᱮᱸᱱ ᱠᱟᱛᱷᱟ
ᱠᱚ ᱵᱟᱰᱟᱭ ᱠᱮᱫ ᱠᱷᱟᱱ, ᱢᱚᱫᱚᱱ ᱟᱡ ᱵᱟᱵᱟ ᱫᱚ ᱥᱚᱠᱛᱚ ᱡᱚᱛᱚ ᱦᱚᱲ ᱛᱮᱠᱚ ᱨᱚᱲ ᱟᱭᱟ ᱾ ᱢᱤᱫᱴᱟᱹᱝ ᱥᱟᱫᱮᱨ ᱦᱚᱯᱚᱱ,
ᱦᱚᱸ ᱟᱢ ᱫᱚᱢ ᱟᱫ ᱠᱮᱫᱮᱭᱟ ᱾ ᱦᱚᱯᱚᱱ ᱛᱟᱦᱮᱸᱱ ᱛᱩᱞᱩᱡ ᱟᱢ ᱫᱚᱢ ᱟᱴᱠᱩᱲᱟᱹᱭᱮᱱᱟ ᱾ ᱱᱤᱛ ᱚᱠᱟ ᱞᱟᱡᱟᱣ ᱛᱮ ᱦᱚᱯᱚᱱ
ᱟᱨ ᱠᱤᱢᱤᱱ ᱛᱤᱠᱤᱱ ᱮ ᱟᱹᱜᱩ ᱨᱩᱣᱟᱹᱲ ᱠᱤᱱᱟ, ᱮᱱᱦᱚᱸ ᱠᱷᱚᱵᱚᱨ ᱮ ᱵᱷᱮᱡᱟ ᱞᱮᱫᱼᱟ ᱵᱟᱝ ᱠᱤᱱ ᱦᱮᱡ ᱨᱩᱣᱟᱹᱲ ᱞᱮᱱᱟ ᱾
ᱢᱚᱫᱚᱱ ᱛᱤᱠᱤᱱ ᱱᱟᱹᱭᱦᱟᱹᱨ ᱨᱮ ᱛᱩᱨᱩᱭ ᱪᱟᱸᱫᱚ ᱦᱩᱭ ᱮᱱᱟ ᱾ ᱢᱤᱫ ᱠᱚᱲᱟ ᱜᱤᱫᱽᱨᱟᱹᱭ ᱦᱩᱭᱩᱜ ᱛᱟᱹᱠᱤᱱᱟ ᱾
ᱢᱚᱫᱚᱱ ᱟᱡ ᱵᱟᱵᱟ ᱱᱚᱛᱮ ᱥᱚᱠᱛᱚᱭ ᱨᱩᱣᱟᱹᱜᱼᱟ ᱾ ᱢᱚᱫᱚᱱ ᱟᱡ ᱠᱟᱠᱟ ᱦᱮᱡ ᱠᱟᱛᱮ ᱱᱚᱣᱟ ᱠᱷᱚᱵᱚᱨ ᱮ ᱞᱟᱹᱭ
ᱟᱹᱠᱤᱱᱟ ᱾ ᱵᱟᱱᱟ ᱦᱚᱲ ᱧᱮᱧᱮᱞ ᱠᱤᱱ ᱥᱮᱱᱚᱜᱼᱟ, ᱢᱮᱱᱠᱷᱟᱱ ᱵᱟᱹᱨᱥᱤᱧ ᱛᱟᱦᱮᱸ ᱠᱟᱛᱮ ᱟᱨ ᱦᱚᱸ ᱠᱤᱱ ᱨᱩᱣᱟᱹᱲ ᱦᱤᱡᱩᱜᱼᱟ᱾
ᱢᱚᱫᱚᱱ ᱥᱤᱧ ᱧᱤᱫᱟᱹ ᱠᱟᱹᱢᱤᱭᱟᱭ ᱢᱤᱫ ᱱᱟᱯᱟᱭ ᱚᱲᱟᱜ ᱠᱤᱱ ᱵᱮᱱᱟᱣ ᱠᱮᱫᱼᱟ ᱾ ᱜᱤᱫᱽᱨᱟᱹ ᱚᱞ ᱯᱟᱲᱦᱟᱣ ᱱᱟᱯᱟᱭ ᱛᱮ
ᱥᱮᱬᱟ ᱚᱪᱚᱭᱮ ᱞᱟᱹᱜᱤᱫ ᱛᱮ ᱵᱟᱱᱟ ᱦᱚᱲ ᱛᱮ ᱫᱷᱚᱱ ᱟᱨᱡᱟᱣ ᱠᱤᱱ ᱪᱷᱩᱴᱟᱹᱣ ᱮᱱᱟ ᱾
ᱢᱚᱫᱚᱱ ᱟᱡ ᱵᱟᱵᱟ ᱛᱟᱭᱚᱢ ᱵᱤᱫᱟᱹᱞ ᱮ ᱩᱭᱦᱟᱹᱨᱟ᱾ ᱥᱚᱱᱟ ᱞᱮᱠᱟᱱ ᱱᱩᱱᱟᱹᱜ ᱱᱟᱯᱟᱭ ᱜᱤᱫᱽᱨᱟᱹ ᱛᱟᱹᱧ ᱤᱧ ᱨᱟᱹᱜᱤ ᱟᱹᱲᱤᱥ
ᱟᱫᱮᱭᱟ ᱾ ᱵᱟᱹᱧ ᱩᱨᱩᱢ ᱞᱮᱫᱮᱭᱟ ᱢᱟᱥᱮ ᱛᱤᱱᱟᱹᱜ ᱱᱟᱯᱟᱭ ᱞᱮ ᱛᱟᱦᱮᱸ ᱠᱚᱜᱼᱟ ᱦᱩᱱᱟᱹᱝ , ᱚᱱᱟ ᱪᱮᱠᱟ ᱴᱷᱤᱠ ᱜᱮᱠᱚ
ᱞᱟᱹᱭ ᱟᱠᱟᱫᱼᱟ ᱼᱼ
ᱨᱟᱹᱜᱤ ᱫᱚ ᱢᱤᱫ ᱜᱩᱨᱞᱟᱹᱣ ᱥᱮᱸᱜᱮᱞ ᱠᱟᱱᱟ, ᱡᱟᱸᱦᱟᱭ ᱱᱚᱣᱟ ᱵᱟᱭ ᱵᱚᱨᱚᱣᱟᱜᱼᱟ, ᱢᱚᱱᱮ
ᱢᱩᱠᱨᱩᱲ ᱠᱟᱛᱮ ᱤᱬᱤᱧ ᱮ ᱜᱟᱱ ᱠᱮᱫᱼᱟ, ᱩᱱᱤ ᱫᱚᱭ ᱞᱟᱦᱟᱜᱼᱟ ᱾ ᱡᱟᱸᱦᱟᱭ ᱢᱟᱹᱱᱢᱤ ᱨᱟᱹᱜᱤ ᱥᱮᱸᱜᱮᱞ
ᱟᱯᱱᱟᱨ ᱵᱟᱭ ᱜᱟᱱᱟ, ᱩᱱᱤ ᱫᱚᱭ ᱟᱛᱟᱨ ᱛᱚᱨᱚᱡᱚᱜᱼᱟ ᱾
