ᱡᱟᱣ ᱞᱮᱠᱟ ᱜᱮ ᱩᱱᱠᱩ ᱫᱟᱨᱮ ᱠᱚ ᱢᱟᱜᱮᱜᱼᱟ
ᱢᱮᱱᱠᱷᱟᱱ ᱡᱟᱣ ᱞᱮᱠᱟ ᱜᱮ ᱱᱤᱡᱚᱨ ᱢᱮᱫ ᱥᱟᱢᱟᱝ ᱨᱮ
ᱨᱟᱹᱯᱩᱫᱚᱜ ᱠᱟᱱ ᱟᱡᱟᱜ ᱛᱩᱠᱟᱹ ᱧᱮᱞ ᱛᱮ
ᱥᱮᱨᱢᱟ ᱨᱮ ᱩᱰᱟᱹᱣᱚᱜ ᱪᱮᱬᱮ
ᱱᱤᱭᱟᱹ ᱫᱷᱟᱣ ᱫᱚ ᱵᱟᱭ ᱩᱰᱟᱹᱣ ᱞᱮᱱᱟ
ᱩᱱᱤ ᱢᱮᱫ ᱫᱟᱜ ᱨᱮᱱᱟᱜ ᱫᱟᱜ ᱮ ᱡᱟᱹᱲᱤᱭᱮᱫ ᱛᱟᱦᱮᱸᱫ
ᱟᱡᱟᱜ ᱨᱟᱹᱯᱩᱫ ᱟᱠᱟᱱ ᱜᱷᱟᱨᱚᱸᱡᱽ ᱧᱮᱞ ᱛᱮ
ᱟᱨ ᱟᱡᱟᱜ ᱦᱩᱰᱤᱧᱼᱦᱩᱰᱤᱧ ᱴᱷᱚᱱᱴᱟ ᱛᱮ
ᱦᱟᱞᱟᱝ ᱨᱟᱠᱟᱵᱽ ᱮᱫ ᱛᱟᱦᱮᱸᱫ ᱮ ᱥᱟᱠᱟᱢ ᱪᱟᱨᱮᱡ
ᱱᱚᱣᱟ ᱟᱥᱟ ᱛᱮ ᱪᱮ ᱫᱚᱦᱲᱟᱧ ᱵᱮᱱᱟᱣ ᱟᱹᱨᱩᱭᱟ
ᱤᱧᱟᱜ ᱥᱚᱱᱮᱨ ᱜᱷᱟᱨᱚᱸᱡᱽ ᱛᱩᱠᱟᱹ ᱫᱚ
ᱪᱮᱬᱮᱭᱟᱜ ᱨᱟᱜᱼᱦᱚᱢᱚᱨ ᱟᱸᱡᱚᱢ, ᱧᱮᱞᱛᱮ
ᱟᱭᱢᱟ ᱪᱮᱬᱮᱼᱪᱤᱯᱨᱩᱫ ᱠᱚ ᱦᱮᱡ ᱮᱱᱟ
ᱡᱮᱛᱮ ᱟᱠᱚᱼ ᱟᱠᱚᱣᱜ ᱚᱱᱛᱚᱨ ᱢᱚᱱᱮ ᱛᱮ
ᱠᱩᱠᱞᱤ ᱠᱚ ᱠᱩᱞᱤ ᱡᱚᱝ ᱠᱟᱱᱟ ᱱᱤᱡᱮ ᱛᱮ
ᱟᱨ ᱛᱮᱞᱟ ᱨᱩᱣᱟᱹᱲ ᱦᱚᱸ ᱱᱤᱡᱮ ᱛᱮᱠᱚ
ᱦᱟᱛᱟᱣ ᱡᱚᱝ ᱠᱟᱱ ᱛᱟᱦᱮᱸᱫ ᱥᱟᱱᱟᱢ ᱪᱮᱬᱮᱼᱪᱤᱯᱨᱩᱫ
ᱡᱚᱠᱷᱚᱱ ᱜᱷᱟᱨᱚᱸᱡᱽ ᱨᱮ ᱡᱩᱞᱩᱜᱼᱟ ᱥᱮᱸᱜᱮᱞ
ᱛᱚᱵᱮ ᱧᱤᱨ ᱫᱚ ᱛᱮᱞᱟ ᱨᱩᱣᱟᱹᱲ ᱫᱚ ᱵᱟᱝ ᱠᱟᱱᱟ
ᱥᱮᱸᱜᱮᱞ ᱤᱬᱤᱡ ᱞᱟᱹᱜᱤᱫ ᱟᱭᱢᱟ ᱴᱷᱚᱱᱴᱟ ᱠᱚ
ᱡᱩᱢᱤᱫ ᱢᱤᱫ ᱠᱟᱛᱮ ᱫᱟᱜ ᱠᱚ ᱦᱮᱞᱠᱟᱣ ᱟᱹᱜᱩᱭᱟ ᱟᱨ ᱠᱚ ᱤᱬᱤᱡᱟ
ᱱᱚᱣᱟ ᱜᱮ ᱠᱩᱠᱞᱤ ᱨᱮᱱᱟᱜ ᱞᱟᱹᱱᱟᱹᱭ ᱫᱚ ᱠᱟᱱᱟ
ᱡᱤᱭᱚᱱ ᱨᱮ ᱟᱱᱟᱴᱼᱮᱴᱠᱚᱬᱮ, ᱡᱟᱸᱜᱮ ᱦᱤᱡᱩᱜ
ᱧᱤᱨᱼᱦᱟᱹᱯᱤᱛ ᱫᱚ ᱥᱚᱞᱦᱮ ᱫᱚ ᱵᱟᱝ ᱠᱟᱱᱟ
ᱚᱱᱟ ᱫᱚ ᱵᱩᱫᱷᱤᱼᱫᱤᱥᱟᱹ ᱛᱮ ᱥᱟᱶᱟᱨ ᱥᱟᱢᱴᱟᱣ ᱞᱟᱹᱠᱛᱤ ᱠᱟᱱᱟ
ᱛᱚᱵᱮ ᱮᱱᱟᱝ ᱟᱢᱟᱜ ᱛᱩᱠᱟᱹ ᱫᱚ ᱵᱟᱧᱪᱟᱣ ᱛᱟᱦᱮᱱᱟ᱾
***
