ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱯᱮᱬᱮ ᱞᱩᱜᱽᱲᱤ ᱟᱨ ᱵᱟᱝ ᱛᱤ ᱛᱮᱧ ᱞᱩᱜᱽᱲᱤ ᱨᱮᱱᱟᱜ ᱟᱹᱰᱤ ᱜᱟᱱ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱥᱟᱶᱛᱟ ᱨᱮ ᱪᱷᱩᱛᱼᱪᱷᱟᱹᱴᱭᱟᱹᱨ, ᱵᱟᱯᱞᱟᱼᱵᱷᱟᱸᱰᱟᱱ ᱡᱚᱛᱚ ᱞᱮᱠᱟᱱ ᱠᱟᱹᱢᱤᱦᱚᱨᱟ ᱨᱮ ᱞᱟᱹᱠᱛᱤᱭᱟᱱ ᱯᱮᱬᱮ ᱛᱮᱧ ᱞᱩᱜᱽᱲᱤ ᱵᱟᱝ ᱥᱮᱴᱮᱨ ᱞᱮᱱ ᱠᱷᱟᱱ ᱠᱟᱹᱢᱤ ᱜᱮ ᱵᱟᱝ ᱥᱩᱥᱟᱹᱨᱚᱜᱼᱟ ᱾ ᱱᱚᱝᱠᱟ ᱦᱚᱸ ᱧᱮᱞ ᱟᱠᱟᱱᱟ ᱵᱟᱯᱞᱟ ᱵᱮᱦᱟ ᱠᱚᱨᱮ ᱜᱚᱱᱚᱝ ᱞᱩᱜᱽᱲᱤ ᱦᱤᱥᱟᱹᱵᱽ ᱠᱷᱚᱱ ᱠᱚᱢ ᱞᱮᱠᱷᱟ ᱨᱮᱱᱟᱜ ᱮᱢ ᱟᱠᱟᱱ ᱠᱷᱟᱱ ᱟᱨ ᱵᱟᱝ ᱨᱟᱭ ᱨᱮ ᱢᱮᱱᱟᱜ ᱡᱤᱞᱤᱧ ᱠᱷᱚᱱ ᱵᱟᱨ ᱵᱤᱛᱟᱹ ᱜᱟᱱ ᱞᱩᱜᱽᱲᱤ ᱠᱷᱟᱴᱚ ᱟᱠᱟᱱ ᱠᱷᱟᱱ ᱵᱟᱯᱞᱟ ᱦᱚᱸ ᱵᱷᱟᱺᱜᱩᱲ ᱩᱛᱟᱹᱨᱚᱜᱼᱟ ᱾
ᱚᱱᱟ ᱛᱮ ᱯᱟᱹᱦᱤᱞ ᱫᱚ ᱥᱮᱬᱟ ᱵᱟᱯᱞᱟ ᱠᱚᱨᱮ ᱫᱚ ᱵᱟᱯᱞᱟ ᱱᱮᱸᱰᱟᱭ ᱢᱟᱬᱟᱝ ᱨᱮ ᱞᱩᱜᱽᱲᱤ ᱞᱟᱯᱚ ᱠᱚ ᱛᱮᱧ ᱴᱷᱤᱠ ᱡᱩᱜᱟᱹᱲ ᱴᱷᱤᱠ ᱠᱟᱜ ᱠᱟᱱ ᱛᱟᱦᱮᱸᱫ ᱾ ᱪᱮᱫᱟᱜ ᱥᱮ ᱯᱟᱹᱦᱤᱞ ᱫᱤᱱ ᱫᱚ ᱦᱟᱴ ᱵᱟᱡᱟᱨ ᱠᱚᱨᱮ ᱟᱵᱚ ᱥᱟᱶᱛᱟ ᱨᱮ ᱢᱮᱱᱟᱜ ᱞᱟᱹᱠᱛᱤᱭᱟᱱ ᱞᱩᱜᱽᱲᱤ ᱞᱟᱯᱚ ᱠᱚ ᱵᱟᱭ ᱧᱟᱢᱚᱜ ᱠᱟᱱ ᱛᱟᱦᱮᱸᱫ ᱾ ᱟᱵᱚ ᱦᱚᱲ ᱠᱚ ᱫᱚ ᱱᱤᱡᱚᱨᱟᱜ ᱞᱩᱜᱽᱲᱤ ᱞᱟᱹᱜᱤᱫ ᱛᱩᱞᱟᱹᱢ ᱠᱚ ᱪᱟᱥ ᱛᱟᱦᱮᱸᱫ, ᱱᱤᱡᱮ ᱛᱮ ᱥᱩᱛᱟᱹᱢ ᱠᱚ ᱩᱧ ᱛᱟᱦᱮᱸᱫ ᱟᱨ ᱵᱤᱨ ᱨᱮᱱᱟᱜ ᱟᱭᱢᱟ ᱨᱮᱦᱮᱫ ᱵᱟᱠᱞᱟᱜ ᱠᱚ ᱦᱮᱰᱮᱡ ᱢᱮᱥᱟ ᱠᱟᱛᱮ ᱨᱚᱝ ᱠᱟᱛᱮ ᱞᱩᱜᱽᱲᱤ ᱛᱮᱧ ᱞᱟᱹᱜᱤᱫ ᱯᱮᱬᱮ ᱠᱚ ᱮᱢᱟ ᱠᱚ ᱛᱟᱦᱮᱸᱫ ᱾
ᱥᱮᱫᱟᱭ ᱫᱚ ᱥᱩᱛᱟᱹᱢ ᱨᱚᱝ ᱞᱟᱹᱜᱤᱫ ᱪᱟᱹᱭᱞᱤ ᱫᱟᱨᱮ ᱪᱷᱟᱞ ᱟᱨ ᱨᱮᱦᱮᱫ, ᱰᱟᱺᱜᱩᱣᱟᱹ ᱯᱟᱱ, ᱪᱟᱹᱴᱤᱡ ᱡᱟᱰᱟ ᱡᱟᱝ ᱟᱨ ᱨᱚᱞ ᱡᱟᱝ ᱢᱩᱬ ᱥᱟᱢᱟᱜᱤᱨᱤ ᱛᱟᱦᱮᱸ ᱠᱟᱱᱟ ᱾ ᱱᱚᱣᱟ ᱨᱚᱝ ᱫᱚ ᱯᱮ ᱛᱷᱚᱠ ᱨᱮ ᱦᱩᱭᱩᱜᱼᱟ ᱾ ᱚᱱᱟ ᱠᱚ ᱫᱚ ᱞᱟᱛᱟᱨ ᱨᱮ ᱮᱢ ᱮᱱᱟ ᱼ
ᱥᱴᱮᱯᱼ᱑ ᱼ ᱥᱩᱛᱟᱹᱢ ᱦᱮᱰᱮᱡ ᱠᱟᱛᱮ ᱟᱹᱨᱩᱵ ᱥᱟᱯᱷᱟ
ᱥᱴᱮᱯᱼ᱒ ᱼ ᱨᱚᱝ ᱯᱷᱤᱠᱥᱚᱨ ᱨᱮ ᱡᱚᱵᱮ ᱟᱨ ᱛᱟᱥᱮ
ᱥᱴᱮᱯᱼ᱓ ᱼ ᱨᱚᱝ ᱨᱮ ᱦᱮᱰᱮᱡ ᱟᱨ ᱛᱟᱥ
ᱥᱴᱮᱯᱼ᱑ᱼ ᱥᱩᱛᱟᱹᱢ ᱦᱮᱰᱮᱡ ᱠᱟᱛᱮ ᱟᱹᱨᱩᱵ ᱥᱟᱯᱷᱟ
ᱨᱚᱝ ᱞᱟᱹᱜᱤᱫ ᱥᱩᱛᱟᱹᱢ ᱫᱚ ᱢᱟᱬᱟᱝ ᱞᱟᱹᱪᱷᱤ ᱵᱮᱱᱟᱣ ᱠᱟᱛᱮ ᱛᱚᱨᱚᱡ ᱟᱨ ᱪᱟᱹᱴᱤᱡ ᱡᱟᱰᱟ ᱥᱟᱞᱟᱜ ᱫᱟᱜ ᱨᱮ ᱡᱚᱵᱮ ᱠᱟᱛᱮ ᱢᱤᱫ ᱧᱤᱫᱟᱹ ᱫᱚᱦᱚᱜᱼᱟ ᱟᱨ ᱚᱱᱟ ᱛᱟᱭᱚᱢ ᱦᱮᱰᱮᱡᱚᱜᱼᱟ ᱾
ᱪᱟᱹᱴᱤᱡ ᱡᱟᱰᱟ ᱫᱚ ᱥᱩᱛᱟᱹᱢ ᱨᱮ ᱛᱟᱦᱮᱸᱱ ᱢᱟᱹᱭᱞᱟᱹ ᱟᱨ ᱱᱮᱪᱩᱨᱟᱞ ᱜᱨᱤᱡᱽ ᱥᱟᱯᱷᱟᱭ ᱞᱟᱹᱜᱤᱫ ᱵᱮᱵᱷᱟᱨᱚᱜᱼᱟ ᱾ ᱪᱟᱹᱴᱤᱡ ᱡᱟᱰᱟ ᱫᱚ ᱥᱤᱛᱩᱝ ᱨᱮ ᱞᱚᱞᱚ ᱠᱟᱛᱮ ᱢᱟᱬᱟᱝ ᱦᱩᱲᱩᱝ ᱜᱩᱸᱰᱟᱹᱜᱼᱟ ᱾
ᱚᱱᱟ ᱛᱟᱭᱚᱢ ᱥᱩᱛᱟᱹᱢ ᱫᱚ ᱛᱚᱨᱚᱡ ᱟᱨ ᱡᱟᱰᱟ ᱥᱟᱞᱟᱜ ᱢᱮᱥᱟ ᱠᱟᱛᱮ ᱦᱮᱰᱮᱡ ᱦᱩᱭᱩᱜᱼᱟ ᱾ ᱥᱩᱛᱟᱹᱢ ᱨᱮᱱᱟᱜ ᱨᱚᱝ ᱯᱷᱩᱨᱪᱟᱹ ᱫᱷᱟᱨᱟ ᱧᱮᱞ ᱞᱮᱱ ᱠᱷᱟᱱ ᱛᱚᱨᱚᱡ ᱫᱟᱜ ᱠᱷᱚᱱ ᱚᱰᱚᱠ ᱠᱟᱛᱮ ᱟᱹᱨᱩᱵ ᱥᱟᱯᱷᱟᱜᱼᱟ ᱟᱨ ᱛᱟᱥᱮ ᱨᱚᱦᱚᱲ ᱦᱩᱭᱩᱜᱼᱟ ᱾
ᱥᱴᱮᱯᱼ᱒ ᱼ ᱨᱚᱝ ᱯᱷᱤᱠᱥᱚᱨ ᱨᱮ ᱡᱚᱵᱮ ᱟᱨ ᱛᱟᱥᱮ
ᱨᱚᱞ ᱫᱚ ᱢᱤᱫ ᱱᱮᱪᱩᱨᱟᱞ ᱯᱷᱤᱠᱥᱚᱨ ᱠᱟᱱᱟ ᱡᱟᱦᱟᱸ ᱞᱩᱜᱽᱲᱤ ᱨᱮ ᱨᱚᱝ ᱥᱟᱵ ᱠᱟᱛᱮ ᱫᱚᱦᱚᱭᱟᱭ ᱾ᱛᱤᱠᱤ ᱥᱟᱯᱷᱟ ᱟᱠᱟᱱ ᱥᱩᱛᱟᱹᱢ ᱞᱟᱹᱪᱷᱤ ᱫᱚ ᱨᱚᱞ ᱜᱩᱸᱰᱟᱹ ᱥᱟᱞᱟᱜ ᱫᱟᱜ ᱨᱮ ᱛᱤᱠᱤ ᱢᱮᱥᱟᱜᱼᱟ ᱾ ᱥᱩᱛᱟᱹᱢ ᱨᱮ ᱱᱟᱥᱮ ᱦᱟᱹᱨᱤᱭᱟᱹᱲ ᱨᱚᱝ ᱦᱮᱡ ᱞᱮᱱ ᱠᱷᱟᱱ ᱥᱩᱛᱟᱹᱢ ᱚᱣᱟᱨ ᱚᱰᱚᱠ ᱠᱟᱛᱮ ᱛᱟᱥᱮ ᱨᱚᱦᱚᱲᱚᱜᱼᱟ ᱾
ᱥᱴᱮᱯᱼ᱓ ᱼ ᱨᱚᱝ ᱨᱮ ᱦᱮᱰᱮᱡ ᱟᱨ ᱛᱟᱥᱮ
ᱪᱟᱹᱭᱞᱤ ᱟᱨ ᱰᱟᱺᱜᱩᱣᱟᱹ ᱯᱟᱱ ᱫᱚ ᱨᱚᱝ ᱞᱟᱹᱜᱤᱫ ᱵᱮᱵᱷᱟᱨᱚᱜᱼᱟ ᱾ ᱨᱚᱞ ᱨᱮ ᱡᱚᱵᱮ ᱠᱟᱛᱮ ᱛᱟᱥᱮ ᱨᱚᱦᱚᱲ ᱛᱟᱭᱚᱢ ᱥᱩᱛᱟᱹᱢ ᱫᱚ ᱪᱟᱹᱭᱞᱤ ᱟᱨ ᱰᱟᱺᱜᱩᱣᱟᱹ ᱯᱟᱱ ᱥᱟᱞᱟᱜ ᱦᱮᱰᱮᱡ ᱢᱮᱥᱟᱜᱼᱟ ᱾ ᱢᱟᱬᱟᱝ ᱫᱚ ᱪᱟᱹᱭᱞᱤ ᱨᱮᱦᱮᱫ ᱟᱨ ᱪᱷᱟᱞ ᱟᱨ ᱰᱟᱺᱜᱩᱣᱟᱹ ᱯᱟᱱ ᱪᱷᱟᱞ ᱠᱚᱴᱮᱡ ᱜᱩᱸᱰᱟᱹ ᱠᱟᱛᱮ ᱠᱷᱟᱫᱟᱲ ᱠᱷᱟᱫᱟᱲ ᱦᱮᱰᱮᱡ ᱦᱩᱭᱩᱜᱼᱟ ᱾ ᱦᱮᱰᱮᱡ ᱫᱟᱜ ᱨᱮ ᱨᱚᱝ ᱨᱟᱠᱟᱵ ᱞᱮᱱ ᱠᱷᱟᱱ ᱚᱸᱰᱮ ᱥᱩᱛᱟᱹᱢ ᱠᱷᱟᱸᱡᱚ ᱦᱩᱭᱩᱜᱼᱟ ᱾
ᱦᱮᱰᱮᱡ ᱚᱠᱛᱚ ᱛᱟᱞᱟ ᱨᱮ ᱛᱟᱞᱟ ᱨᱮ ᱫᱟᱜ ᱫᱚ ᱜᱷᱟᱱᱴᱟ ᱦᱩᱭᱩᱜᱼᱟ ᱟᱨ ᱥᱩᱛᱟᱹᱢ ᱨᱮᱱᱟᱜ ᱨᱚᱝ ᱦᱚᱸ ᱧᱮᱞ ᱦᱩᱭᱩᱜᱼᱟ ᱾ ᱵᱮᱥ ᱞᱮᱠᱟ ᱜᱟᱵᱽ ᱞᱮᱱ ᱠᱷᱟᱱ ᱥᱩᱛᱟᱹᱢ ᱫᱚ ᱚᱣᱟᱨ ᱚᱰᱚᱠ ᱠᱟᱛᱮ ᱟᱹᱨᱩᱵ ᱦᱩᱭᱩᱜᱼᱟ ᱾ ᱟᱹᱨᱩᱵ ᱠᱟᱛᱮ ᱛᱟᱥᱮ ᱨᱚᱦᱚᱲᱚᱜᱼᱟ ᱟᱨ ᱛᱮᱧ ᱞᱟᱹᱜᱤᱫ ᱮᱢᱚᱜᱚᱜᱼᱟ ᱾
ᱪᱟᱹᱭᱞᱤ ᱨᱮᱱᱟᱜ ᱨᱚᱝ ᱫᱚ ᱛᱚᱲᱮ ᱥᱩᱛᱟᱹᱢ ᱨᱮ ᱟᱨᱟᱜ ᱦᱮᱸᱫᱮ (ᱢᱮᱨᱩᱱ) ᱜᱮ ᱨᱟᱠᱟᱵᱚᱜᱼᱟ ᱾ ᱚᱱᱟ ᱛᱮ ᱥᱮᱫᱟᱭ ᱥᱟᱱᱛᱟᱲ ᱠᱚᱣᱟᱜ ᱡᱷᱟᱹᱞᱟᱜ, ᱯᱷᱩᱴᱟᱹ ᱠᱟᱪᱟ, ᱜᱚᱜᱲᱚ, ᱦᱮᱲᱮ ᱮᱢᱟᱱ ᱞᱩᱜᱽᱲᱤ ᱨᱮᱱᱟᱜ ᱨᱚᱝ ᱫᱚ ᱯᱩᱸᱰ ᱪᱮᱛᱟᱱ ᱨᱮ ᱟᱨᱟᱜ ᱯᱷᱩᱴᱟᱹ ᱜᱮ ᱛᱟᱦᱮᱸᱱ ᱛᱟᱦᱮᱸᱫ ᱾
***
