ᱡᱷᱮᱸᱴ ᱵᱚᱸᱜᱟ ᱨᱮ ᱪᱚᱯᱚᱡ ᱥᱤᱴᱷᱟᱹ ᱠᱟᱛᱮ
ᱪᱟᱯᱟᱫ ᱜᱤᱰᱤ ᱩᱞ ᱨᱮᱱᱟᱜ ᱴᱚᱴᱮ
ᱦᱟᱥᱟᱼᱫᱷᱩᱲᱤ ᱠᱷᱚᱱ ᱨᱩᱣᱟᱹᱲ ᱠᱟᱛᱮ
ᱞᱟᱫᱟᱼ ᱵᱟᱫᱟ ᱡᱚ ᱛᱮ ᱯᱮᱨᱮᱡ ᱟᱠᱟᱱ
ᱵᱮᱱᱟᱣ ᱮᱱᱟᱭ ᱩᱞ ᱴᱚᱴᱮ ᱫᱟᱨᱮ
ᱥᱟᱭ ᱥᱮᱨᱢᱟ ᱦᱟᱹᱵᱤᱡ ᱡᱚᱛᱚᱱ ᱠᱮᱫᱼᱟᱭ ᱢᱚᱱᱮ
ᱦᱮᱲᱮᱢᱼᱥᱤᱵᱤᱞ ᱟᱹᱭᱠᱟᱹᱣ ᱛᱮ ᱯᱟᱨᱚᱢ ᱮᱱ
ᱜᱚᱲᱦᱚᱱ ᱠᱮᱫᱼᱟᱭ ᱟᱡᱟᱜ ᱠᱚᱨᱚᱢ ᱠᱚᱯᱟᱲ
ᱯᱚᱨᱚᱠᱷ ᱠᱮᱫᱮᱭᱟᱭ ᱦᱚᱭᱼᱵᱟᱹᱨᱰᱩ, ᱥᱤᱛᱩᱝᱼᱡᱟᱹᱯᱩᱫ
ᱟᱨ ᱩᱱᱤ ᱵᱩᱡᱷᱟᱹᱣ ᱠᱮᱫᱮᱭᱟᱭ ᱱᱟᱯᱟᱭ ᱥᱚᱨᱮᱥ
ᱮᱱ ᱦᱚᱸ ᱡᱚᱠᱷᱚᱱ ᱛᱟᱦᱮᱸ ᱠᱟᱱᱟᱭ ᱩᱱᱤ ᱩᱞ ᱴᱚᱴᱮ
ᱟᱹᱭᱴᱷᱟᱹ ᱥᱟᱶ ᱚᱱᱟ ᱚᱡᱽᱨᱟ ᱵᱩᱫᱟᱹ ᱨᱮ
ᱛᱤᱥ ᱚᱱᱟ ᱚᱢᱚᱱ ᱯᱚᱴᱠᱚᱡ ᱮᱱᱛᱮ ᱦᱟᱨᱟᱭᱮᱱᱟ
ᱛᱤᱥ ᱚᱱᱟ ᱜᱚᱢᱦᱮᱲ ᱩᱢᱩᱞ ᱫᱟᱨᱮ ᱦᱩᱭ ᱮᱱᱟ
ᱛᱤᱥ ᱩᱱᱤ ᱦᱮᱲᱮᱢᱼᱥᱤᱵᱤᱞ ᱜᱟᱵᱮ ᱩᱞ ᱟᱱᱟ
ᱵᱟᱯᱞᱟ ᱨᱮᱱᱟᱜ ᱪᱷᱟᱢᱰᱟ ᱥᱟᱜᱼᱡᱟᱣ
ᱛᱤᱥ ᱯᱩᱭᱞᱩᱢ ᱥᱮᱴᱮᱨ ᱮᱱᱟ ᱩᱞ ᱥᱟᱠᱟᱢ
ᱛᱤᱥ ᱚᱱᱟ ᱫᱷᱚᱨᱚᱢ ᱞᱚᱴᱟ ᱫᱟᱜ ᱨᱮᱢ ᱥᱟᱹᱜᱩᱱ ᱮᱱ
ᱥᱩᱞᱩᱠ ᱡᱤᱭᱚᱱ ᱨᱮᱱᱟᱜ ᱥᱟᱸᱫᱮᱥ ᱤᱫᱤ ᱠᱟᱛᱮ
ᱴᱚᱴᱮ ᱵᱟᱝ ᱫᱚ ᱪᱮᱫ ᱦᱚᱸ ᱵᱟᱭ ᱵᱟᱰᱟᱭᱟ
ᱟᱹᱰᱤ ᱟᱭᱢᱟ ᱠᱚᱥᱴᱚ ᱛᱮ ᱯᱟᱨᱚᱢ ᱦᱩᱭ ᱮᱱᱟ
ᱩᱞ ᱴᱚᱴᱮ ᱨᱤᱱ ᱵᱚᱝᱥᱚ ᱠᱚ
ᱡᱚᱠᱷᱚᱱ ᱵᱮᱱᱟᱣ ᱮᱱᱟ ᱵᱤᱫᱷᱟᱹᱱ
ᱵᱚᱸᱜᱟ ᱵᱳᱨᱳ ᱥᱟᱢᱟᱱᱚᱢ ᱨᱮᱱᱟᱜ
ᱦᱟᱲᱟᱢ ᱮᱱᱟᱭ ᱩᱞ ᱫᱟᱨᱮ
ᱱᱤᱛᱚᱜ ᱩᱱᱤ ᱡᱚ ᱵᱟᱭ ᱮᱢ ᱮᱫ
ᱢᱮᱱᱠᱷᱟᱱ ᱩᱱᱤᱭᱟᱜ ᱩᱢᱩᱞ
ᱱᱤᱛ ᱦᱚᱸ ᱡᱟᱣ ᱞᱮᱠᱟ ᱜᱮ ᱢᱮᱱᱟᱜᱼᱟ
ᱱᱤᱛ ᱦᱚᱸ ᱩᱞ ᱫᱟᱨᱮᱭᱟᱜ ᱰᱟᱹᱨ ᱨᱮ
ᱠᱩᱭᱞᱤ ᱪᱮᱬᱮᱭᱟᱜ ᱛᱩᱠᱟᱹ ᱢᱮᱱᱟᱜᱼᱟ
ᱥᱟᱹᱨᱫᱤᱼ ᱥᱤᱛᱩᱝ ᱜᱩᱜᱼᱯᱤ ᱠᱚ
ᱱᱤᱛ ᱦᱚᱸ ᱩᱱᱤᱭᱟᱜ ᱠᱚᱞᱮ ᱨᱮ
ᱢᱚᱱᱮᱼ ᱢᱚᱱᱮ ᱛᱮ ᱡᱤᱣᱤ ᱨᱟᱲᱮᱡ ᱠᱚ ᱩᱭᱦᱟᱹᱨ ᱡᱚᱝ ᱠᱟᱱ
ᱩᱞ ᱨᱮᱱᱟᱜ ᱴᱚᱴᱮ ᱪᱮᱫ ᱱᱚᱣᱟ ᱠᱚ ᱵᱟᱭ ᱵᱟᱰᱟᱭᱟ
ᱵᱟᱝ ᱜᱮᱹᱹᱹᱹᱹᱹ ᱩᱱᱤ ᱡᱚᱛᱚᱣᱟᱜ ᱮ ᱵᱟᱰᱟᱭᱟ ᱾
***
