ᱧᱚᱞᱦᱟᱫ

ᱛᱷᱟᱹᱨᱤ ᱫᱟᱠᱟ ᱨᱮ ᱪᱟᱯᱳ ᱠᱟᱛᱮ ᱡᱚᱵᱟ ᱢᱟᱹᱭ ᱫᱚ ᱦᱤᱰᱤᱨᱼᱦᱤᱰᱤᱨ ᱢᱮᱫ ᱫᱟᱜ ᱡᱚᱨᱚᱜ ᱠᱟᱱ ᱛᱟᱭᱟ ᱾ ᱪᱮᱫᱟᱜ ᱮᱱᱛᱮᱫ ᱵᱟᱝ ᱡᱚᱨᱚᱜ ᱛᱟᱭᱟ ᱛᱮᱦᱮᱧ ᱜᱟᱯᱟ ᱩᱱᱤᱭᱟᱜ ᱡᱤᱭᱚᱱ ᱨᱮ ᱢᱟᱨᱟᱝ ᱫᱚᱨᱞᱚᱭ ᱡᱟᱱᱟᱢ ᱟᱠᱟᱵ ᱟᱠᱟᱱᱟ ᱾ ᱦᱮᱸ ᱡᱳᱵᱟ ᱢᱟᱹᱭ, ᱠᱟᱫᱟᱢᱴᱚᱞᱟ ᱥᱟᱠᱟᱞ ᱯᱟᱨᱟᱱᱤᱠ ᱨᱮᱱ ᱥᱟᱰᱰᱮᱨ ᱦᱚᱯᱚᱱ ᱮᱨᱟ ᱾ ᱡᱟᱦᱟᱸᱭ ᱟᱱᱟᱰᱤ ᱦᱚᱲ ᱡᱩᱫᱤ ᱥᱟᱠᱟᱞ ᱯᱟᱨᱟᱱᱤᱠ ᱮᱢ ᱥᱮᱸᱫᱽᱨᱟ ᱮᱭᱟ, ᱠᱷᱟᱱ ᱟᱞᱜᱟ ᱛᱮᱜᱮ ᱩᱱᱤᱭᱟᱜ ᱚᱲᱟᱜ ᱫᱚᱢ ᱧᱟᱢ ᱠᱮ ᱞᱮᱠᱟ ᱾ ᱡᱟᱦᱟᱸ ᱚᱲᱟᱜ ᱵᱷᱤᱛ ᱨᱮᱜᱮ ᱱᱟᱱᱟ ᱦᱩᱱᱟᱹᱨ ᱱᱟᱹᱬᱤ, ᱵᱟᱦᱟ, ᱥᱤᱢ ᱥᱟᱺᱰᱤ,ᱢᱟᱨᱟᱜ ᱯᱷᱤᱧᱪᱟᱹᱨ ᱟᱨ ᱠᱤᱫᱤᱧ ᱠᱟᱴᱠᱚᱢ ᱪᱤᱛᱟᱹᱨᱮᱢ ᱧᱮᱞ ᱞᱮᱠᱷᱟᱱ ᱵᱩᱡᱷᱟᱹᱣ ᱢᱮ ᱱᱚᱶᱟ ᱜᱮ ᱥᱟᱠᱟᱞ ᱯᱟᱨᱟᱱᱤᱠᱟᱜ ᱚᱲᱟᱜ ᱫᱚ ᱾ ᱠᱟᱫᱟᱢ ᱴᱚᱞᱟ ᱢᱟᱹᱫᱽᱨᱮ ᱡᱚᱛᱚ ᱠᱷᱚᱱ ᱢᱚᱡᱽ ᱟᱨ ᱥᱟᱯᱷᱟ ᱥᱟᱹᱯᱷᱤ ᱚᱲᱟᱜ ᱫᱩᱣᱟᱹᱨ ᱫᱚ ᱥᱟᱠᱟᱞ ᱯᱟᱨᱟᱱᱤᱠᱟᱜ ᱚᱲᱟᱜ ᱜᱮ ᱾ ᱱᱚᱝᱠᱟᱱ ᱠᱟᱹᱨᱤᱠᱚᱞ ᱧᱮᱞ ᱛᱮᱜᱮ ᱛᱦᱚᱨ ᱠᱚᱛᱮ ᱵᱩᱰᱷᱤ ᱜᱚᱲᱚᱢ ᱟᱭᱳ ᱫᱚᱭ ᱨᱟᱭᱵᱟᱨ ᱞᱮᱱᱟ ᱥᱚᱥᱚᱴᱚᱴᱟ ᱢᱟᱹᱨᱰᱤ ᱠᱤᱯᱤᱥᱟᱹᱬ ᱨᱮᱱ ᱥᱟᱫᱮᱨ ᱦᱚᱯᱚᱱ ᱨᱮ ᱾

ᱜᱮᱞ ᱥᱮᱨᱢᱟ ᱞᱟᱦᱟᱨᱮ ᱡᱳᱵᱟ ᱢᱟᱹᱭ ᱫᱚ ᱟᱹᱰᱤ ᱨᱟᱡᱟᱱᱼᱵᱟᱡᱟᱱ ᱥᱟᱞᱟᱜ ᱥᱚᱥᱚ ᱴᱚᱞᱟ ᱨᱮᱱ ᱵᱟᱹᱡᱩᱱ ᱮ ᱠᱤᱢᱤᱱ ᱞᱮᱫᱮᱭᱟ ᱾ ᱡᱟᱶᱟᱭ ᱚᱲᱟᱜ ᱥᱮᱴᱮᱨ ᱠᱟᱛᱮ ᱡᱳᱵᱟ ᱢᱟᱭ ᱧᱮᱞᱮᱫ ᱠᱟᱱ ᱢᱟ ᱱᱟᱢᱮᱨ ᱢᱟᱹᱨᱰᱤ ᱠᱤᱥᱟᱹᱬ, ᱥᱟᱹᱲᱤᱢ ᱦᱚᱸ ᱥᱟᱹᱣᱲᱤ ᱛᱟᱵ, ᱫᱩᱣᱟᱹᱨ ᱨᱮᱦᱚᱸ ᱢᱟᱫ ᱨᱮᱭᱟᱜ ᱴᱟᱹᱴᱤ ᱥᱤᱞᱯᱤᱧ, ᱢᱟᱨᱟᱝ ᱩᱛᱟᱹᱨ ᱰᱤᱸᱰᱟᱹᱨᱮ ᱦᱩᱰᱤᱧ ᱦᱩᱰᱤᱧ ᱚᱲᱟᱜ ᱾ ᱦᱩᱫᱤᱥ ᱮᱱᱟᱭ ᱪᱤᱠᱟᱹᱛᱮ ᱮᱱᱛᱮ ᱤᱧ ᱟᱭᱳ ᱵᱟᱵᱟ ᱫᱚ ᱱᱚᱝᱠᱟᱱ ᱚᱲᱟᱜ ᱨᱮᱠᱚ ᱠᱩᱥᱤ ᱮᱱᱟ ᱾ ᱟᱨᱠ ᱚ ᱜᱚᱝ ᱠᱟᱹᱫᱤᱧᱟ ᱾
ᱥᱟᱹᱨᱤ ᱨᱮ ᱡᱳᱵᱟ ᱢᱟᱹᱭ ᱮᱸᱜᱟᱛ ᱟᱯᱟᱛ ᱫᱚ ᱮᱥᱠᱟᱨ ᱠᱚᱲᱟ ᱟᱨ ᱠᱷᱮᱛ ᱵᱟᱲᱜᱮ ᱢᱮᱱᱟᱜ ᱛᱟᱠᱚ ᱛᱮ ᱚᱲᱟᱜ ᱫᱩᱣᱟᱹᱨ ᱫᱚ ᱵᱟᱹᱠᱤᱱ ᱵᱟᱪᱷᱟᱣ ᱞᱮᱫᱼᱟ ᱾ ᱮᱱᱛᱮᱫ ᱦᱩᱫᱤᱥ ᱟᱱᱟ ᱠᱤᱱ ᱵᱩᱫᱷᱤ ᱞᱮᱠᱷᱟᱱ ᱫᱚ ᱡᱟᱦᱟᱸ ᱛᱤᱥ ᱟᱯᱱᱟᱨ ᱠᱩᱥᱤ ᱞᱮᱠᱟᱢ ᱚᱲᱟᱜ ᱫᱩᱣᱟᱹᱨᱟ ᱾
ᱡᱳᱵᱟ ᱢᱟᱹᱭ ᱫᱚ ᱦᱚᱢᱚᱧᱼᱜᱚᱨᱚᱧ ᱜᱷᱟᱱᱮ ᱛᱟᱦᱮᱸᱱ ᱜᱷᱟᱱᱮ ᱵᱟᱝ ᱾ ᱢᱮᱱᱠᱷᱟᱱ ᱟᱡ ᱨᱮᱱ ᱡᱩᱨᱤ ᱥᱤᱵᱽᱡᱚᱛᱚᱱ ᱟᱨ ᱦᱟᱱᱦᱟᱨ ᱦᱚᱧᱦᱟᱨ ᱡᱚᱛᱚ ᱦᱚᱲ ᱜᱮ ᱟᱹᱰᱤ ᱠᱚ ᱫᱩᱞᱟᱹᱲ ᱮᱛᱮ ᱚᱱᱟ ᱚᱲᱟᱜ ᱨᱮ ᱦᱤᱥᱤ ᱪᱮᱬᱮ ᱞᱮᱠᱟ ᱚᱰᱚᱠ ᱵᱚᱞᱚᱜ ᱮ ᱮᱦᱚᱵ ᱮᱱᱟ ᱾

ᱱᱟᱶᱟ ᱱᱟᱶᱟ ᱡᱩᱨᱤ ᱯᱟᱹᱨᱤ ᱠᱟᱛᱷᱟ ᱡᱩᱨᱤ ᱮᱱ ᱛᱟᱹᱠᱤᱱ ᱛᱮ ᱡᱳᱵᱟ ᱢᱟᱹᱭ ᱟᱨ ᱥᱤᱵᱽᱡᱚᱛᱚᱱ ᱫᱚ ᱜᱩᱭᱩᱨ ᱜᱩᱭᱩᱨ ᱢᱤᱫ ᱛᱮᱜᱮ ᱠᱤᱢ ᱠᱟᱹᱢᱤ ᱵᱟᱲᱟᱭᱟ ᱾ ᱮᱸᱜᱟᱛ ᱟᱯᱟᱛ ᱦᱚᱸ ᱩᱱᱠᱤᱱ ᱧᱮᱞ ᱛᱮ ᱟᱹᱰᱤ ᱨᱟᱹᱥᱠᱟᱹ ᱠᱤᱱ ᱟᱹᱭᱠᱟᱹᱣᱟ ᱾ ᱮᱱᱛᱮᱫ ᱦᱚᱰᱜᱚᱨ ᱨᱮ ᱩᱱᱟᱹᱜ ᱜᱮ ᱜᱩᱱ ᱢᱮᱱᱟᱜᱼᱟ ᱡᱮ ᱟᱫ ᱰᱟᱸᱜᱽᱨᱟ ᱞᱮᱠᱟ ᱫᱟᱬᱟᱱ ᱦᱚᱲ ᱮ ᱠᱚᱵᱚᱡᱽ ᱩᱛᱟᱹᱨᱮᱱᱟ ᱾ᱚᱱᱟᱛᱮ ᱚᱲᱟᱜ ᱫᱩᱣᱟᱹᱨ ᱨᱮᱱᱟᱜ ᱠᱟᱹᱢᱤ ᱠᱚᱦᱚᱸ ᱵᱮᱥᱛᱮ ᱪᱟᱞᱟᱜ ᱮᱦᱚᱵ ᱮᱱᱟ ᱾ ᱯᱩᱱ ᱦᱚᱲᱟᱜ ᱜᱷᱟᱨᱚᱸᱡᱽ ᱦᱮᱥᱮᱡ ᱥᱮᱠᱨᱮᱡ ᱠᱚ ᱛᱟᱦᱮᱸᱱᱟ ᱾
ᱧᱮᱞ ᱧᱮᱞ ᱛᱮᱜᱮ ᱟᱨᱮ ᱥᱮᱨᱢᱟ ᱯᱟᱨᱚᱢᱮᱱᱟ ᱾ ᱥᱤᱵᱽᱡᱚᱛᱚᱱ ᱛᱟᱠᱚ ᱚᱲᱟᱜ ᱨᱮᱱᱟᱜ ᱱᱟᱠᱥᱟ ᱟᱨ ᱵᱚᱨᱚᱱ ᱦᱚᱸ ᱯᱷᱮᱨᱟᱣ ᱮᱱᱟ ᱾ ᱵᱮᱲᱦᱟᱭ ᱛᱮ ᱠᱷᱟᱯᱟᱨ ᱜᱷᱟᱨᱟ, ᱡᱳᱵᱟ ᱢᱟᱹᱭ ᱫᱚ ᱵᱮᱲᱦᱟᱭ ᱵᱷᱤᱛ ᱪᱩᱱ ᱛᱮᱭ ᱯᱚᱛᱟᱣ ᱟᱠᱟᱫᱼᱟ ᱾ ᱟᱴᱟᱞ ᱜᱚᱸᱰᱟᱞ ᱟᱛᱟᱝ ᱯᱤᱸᱰᱟᱹ, ᱫᱷᱟᱨᱮ ᱦᱚᱸ ᱟᱡᱟᱜ ᱩᱥᱩᱞ ᱢᱩ ᱞᱮᱠᱟ ᱜᱮ ᱥᱚᱡᱷᱮ ᱟᱨ ᱱᱟᱱᱦᱟᱭ ᱫᱷᱟᱨᱤ ᱟᱠᱟᱫᱼᱟ ᱟᱨ ᱟᱭᱱᱚᱢ ᱠᱟᱡᱟᱨ ᱛᱮᱭ ᱠᱟᱡᱟᱨ ᱟᱠᱟᱫ ᱞᱮᱟᱠᱭ ᱜᱩᱨᱤᱡ ᱟᱠᱟᱫᱼᱟ ᱞᱮᱸᱡᱮᱨ ᱜᱮ ᱾ ᱵᱷᱤᱛ ᱨᱮᱦᱚᱸ ᱪᱮᱫ ᱞᱮᱠᱟᱱ ᱱᱟᱹᱬᱤ ᱵᱟᱦᱟᱢ ᱧᱮᱞᱟ ᱾ ᱟᱯᱟᱛ ᱚᱲᱟᱜ ᱨᱮ ᱞᱮᱠᱟ ᱱᱚᱰᱮ ᱦᱚᱸ ᱠᱩᱞᱦᱤ ᱵᱷᱤᱛᱨᱮ ᱢᱟᱨᱟᱜ ᱯᱷᱤᱧᱪᱟᱹᱨ ᱟᱨ ᱥᱤᱢ ᱥᱟᱺᱰᱤ ᱠᱚᱭ ᱵᱮᱱᱟᱣ ᱟᱠᱟᱫ ᱠᱚᱣᱟ ᱾
ᱪᱟᱥ ᱵᱟᱥ ᱠᱚ ᱦᱚᱸ ᱵᱮᱥ ᱜᱮ ᱦᱩᱭᱩᱜ ᱛᱮᱰ ᱷᱩᱞᱟᱹ ᱨᱮᱦᱚᱸ ᱦᱳᱲᱳ ᱵᱟᱺᱫᱤ, ᱪᱟᱣᱞᱮ ᱵᱟᱺᱫᱤ ᱠᱚ ᱨᱟᱠᱟᱵ ᱯᱮᱨᱮᱡ ᱠᱮᱫᱼᱟ ᱾ ᱥᱤᱢ ᱥᱩᱠᱨᱤ ᱟᱨ ᱯᱟᱨᱣᱟ ᱦᱚᱸ ᱥᱟᱜᱟᱞ ᱥᱟᱜᱟᱞ ᱠᱚ ᱥᱟᱸᱜᱮ ᱮᱱ ᱛᱟᱠᱚᱣᱟ ᱾

ᱢᱤᱫ ᱫᱤᱱᱟᱜ ᱠᱟᱛᱷᱟ, ᱥᱩᱠᱨᱤ ᱜᱩᱯᱤ ᱡᱚᱠᱷᱮᱡ ᱥᱤᱵᱽ ᱮᱸᱜᱟᱛ ᱫᱚ ᱟᱹᱛᱩ ᱨᱤᱱ ᱢᱤᱫᱴᱟᱹᱝ ᱤᱨᱤᱞ ᱛᱮᱫ ᱠᱩᱲᱤᱭ ᱧᱟᱯᱟᱢ ᱠᱮᱫᱮᱭᱟ ᱾ ᱟᱫᱚ ᱵᱩᱜᱤ ᱡᱩᱫᱟᱹ ᱠᱤᱱ ᱠᱩᱯᱩᱞᱤᱜ ᱠᱟᱱᱟ ᱾ ᱦᱮᱸᱫᱟ ᱢᱟᱨᱟᱝ ᱦᱤᱞᱤ ᱟᱢ ᱜᱮ ᱥᱩᱠᱨᱤ ᱫᱚᱠᱚ ᱜᱩᱯᱤ ᱚᱪᱚᱭᱮᱫ ᱢᱮᱭᱟ ?
ᱦᱮᱸ ! ᱤᱧ ᱜᱮᱧ ᱜᱩᱯᱤ ᱵᱟᱲᱟ ᱠᱚᱣᱟ ᱾
ᱟᱨ ᱵᱟᱹᱦᱩ ᱫᱚ ?
ᱩᱱᱤ ᱫᱚ ᱚᱲᱟᱜ ᱠᱚᱨᱮ ᱜᱮ ᱾
ᱦᱚᱸ, ᱥᱟᱸᱜᱮ ᱵᱟᱲᱟᱜ ᱠᱟᱱᱟ ᱯᱮ ᱥᱮ ᱪᱮᱛᱟ ?
ᱪᱤᱞᱤ ᱦᱚᱸ ᱵᱟᱝ ᱦᱚᱯᱚᱱ ᱢᱟᱹᱭ, ᱟᱞᱮ ᱢᱟ ᱥᱤᱢ ᱥᱩᱠᱨᱤ ᱜᱮ ᱥᱟᱜᱟᱞ ᱥᱟᱜᱟᱞ ᱠᱚ ᱥᱟᱸᱜᱮᱜ ᱠᱟᱱ ᱛᱟᱞᱮ, ᱦᱚᱲ ᱫᱚ ᱛᱤᱥ ᱟᱹᱱᱤᱡ ᱪᱚ ᱞᱮ ᱥᱟᱸᱜᱮᱜ ᱾ ᱱᱚᱜᱼᱚᱭ ᱛᱟᱭᱚᱢ ᱟᱹᱜᱩ ᱵᱟᱹᱦᱩ ᱠᱩᱲᱤ ᱠᱚ ᱵᱟᱨ ᱯᱮ ᱜᱮᱞᱮ ᱠᱟᱛᱮ ᱠᱚ ᱦᱮᱸᱭᱚ ᱦᱚᱵᱚᱨ ᱟᱱᱟ ᱾ ᱱᱮ ᱦᱚᱲ ᱢᱟ ᱜᱚᱲᱚᱢ ᱜᱤᱫᱽᱨᱟᱹ ᱨᱮᱭᱟᱜ ᱥᱟᱫᱽ ᱾
ᱱᱚᱝᱠᱟ ᱜᱮ ᱥᱤᱵᱽᱡᱚᱛᱚᱱ ᱦᱚᱸ ᱚᱲᱟᱜ ᱨᱤᱱ ᱜᱚᱲᱚᱢ ᱛᱮᱫ ᱦᱟᱲᱟᱢ ᱛᱮᱠᱚ ᱠᱚ ᱞᱟᱸᱫᱟ ᱟᱭᱟ, ᱪᱮᱞᱮ ᱭᱟ ! ᱟᱫᱚ ᱛᱤᱥ ᱟᱹᱱᱤᱡ ᱜᱚᱲᱚᱢ ᱜᱤᱫᱽᱨᱟᱹᱣᱟᱜ ᱢᱮᱫᱦᱟ ᱫᱚᱢ ᱧᱮᱞ ᱚᱪᱚ ᱞᱮᱭᱟ ? ᱢᱮᱱᱠᱷᱟᱱ ᱥᱤᱵᱽᱡᱚᱛᱚᱱ ᱦᱚᱸ ᱪᱮᱫ ᱮ ᱢᱮᱱᱟ, ᱪᱟᱸᱫᱚ ᱜᱮ ᱛᱚ ᱵᱟᱭ ᱵᱮᱸᱜᱮᱫᱮᱫ ᱫᱚ ᱾
ᱢᱤᱫ ᱫᱤᱱ ᱡᱳᱵᱟ ᱢᱟᱹᱭ ᱟᱨ ᱦᱟᱱᱦᱟᱨ ᱛᱮᱫ ᱫᱚ ᱪᱮᱫ ᱪᱚ ᱠᱟᱛᱷᱟ ᱠᱟᱛᱷᱟ ᱛᱮ ᱠᱤᱱ ᱨᱚᱲ ᱧᱟᱯᱟᱢ ᱮᱱᱟ ᱾ ᱛᱤᱞᱢᱤᱧ ᱞᱮᱠᱟᱱ ᱠᱟᱛᱷᱟ ᱦᱟᱱᱦᱟᱨ ᱛᱮᱫ ᱫᱚᱭ ᱰᱤᱲᱢᱤᱧ ᱞᱮᱠᱟ ᱠᱮᱫᱼᱟ ᱾ ᱢᱤᱫ ᱜᱷᱟᱹᱲᱤ ᱠᱷᱟᱱ ᱜᱮ ᱥᱤᱵᱽ ᱮ ᱦᱮᱡ ᱮᱱᱟ ᱠᱷᱟᱱ ᱮᱸᱜᱟᱛ ᱛᱮᱫ ᱫᱚ ᱵᱤᱠᱟᱛᱼᱵᱚᱠᱚᱛ ᱨᱚᱨᱚᱲ ᱮ ᱫᱷᱩᱨᱟᱹᱣ ᱮᱱᱟ ᱾ ᱥᱤᱵᱽ ᱮ ᱢᱮᱛᱟᱭ ᱠᱟᱱᱟ, ᱱᱩᱭ ᱵᱟᱹᱦᱩ ᱵᱟᱹᱜᱤᱭᱮᱢ ᱛᱚᱵᱮ ᱱᱚᱶᱟ ᱚᱲᱟᱜ ᱨᱮᱧ ᱛᱟᱦᱮᱸᱱᱟ ᱟᱨ ᱵᱟᱢ ᱵᱟᱹᱜᱤᱭᱮ ᱠᱷᱟᱱ ᱟᱢ ᱵᱟᱵᱟ ᱛᱤᱞᱤᱧ ᱜᱮ ᱡᱟᱦᱟᱸ ᱛᱮ ᱞᱤᱧ ᱚᱰᱚᱠ ᱪᱟᱞᱟᱜᱼᱟ ᱾
ᱥᱤᱵᱽ ᱫᱚ ᱮᱸᱜᱟᱛ ᱛᱮᱫ ᱮ ᱠᱩᱞᱤ ᱨᱩᱣᱟᱹᱲ ᱠᱮᱫᱮᱭᱟ, “ᱪᱮᱫᱟᱜ ᱜᱳ ?ᱪᱮᱫᱟᱜ ᱱᱚᱝᱠᱟᱱ ᱠᱟᱛᱷᱟ ᱫᱚᱢ ᱨᱚᱲᱮᱫᱼᱟ ? ᱚᱠᱚᱭ ᱪᱮᱫ ᱢᱮᱛᱟᱫ ᱢᱮᱭᱟ ?”

ᱮᱸᱜᱟᱛ ᱛᱮᱫ – “ᱚᱠᱚᱭ ᱪᱮᱫ ᱮ ᱢᱮᱱ ᱫᱟᱲᱮᱭᱟᱹᱧᱟ ᱮᱱᱛᱮᱫ ᱱᱚᱶᱟ ᱚᱲᱟᱜ ᱨᱮᱫᱚ ᱨᱟᱹᱱᱤ ᱪᱷᱟᱰᱟ ᱫᱚ ᱾ ᱱᱮᱛᱟᱨ ᱫᱚ ᱤᱧ ᱫᱚ ᱪᱤᱞᱤ ᱦᱚᱸ ᱵᱟᱹᱧ ᱦᱩᱭᱩᱜ ᱠᱟᱱᱟ ᱾ ᱤᱧ ᱫᱚ ᱱᱚᱶᱟ ᱚᱲᱟᱜ ᱨᱤᱱᱠ ᱟᱹᱲᱢᱤ ᱠᱟᱹᱱᱟᱹᱧ ᱠᱟᱹᱲᱢᱤ ᱾ ᱤᱧ ᱥᱟᱶᱛᱮ ᱪᱟᱲᱟᱵ ᱪᱟᱲᱟᱵ ᱮ ᱨᱚᱲ ᱨᱩᱣᱟᱹᱲᱟ ᱾ ᱢᱮᱛᱟᱢ ᱠᱟᱹᱱᱟᱹᱧ ᱱᱤᱛ ᱜᱮ ᱵᱟᱹᱜᱤᱭᱮᱢ ᱾ ᱱᱩᱭ ᱵᱟᱺᱡᱷᱤ ᱫᱚᱦᱚ ᱠᱟᱛᱮ ᱫᱚ ᱪᱮᱫ ᱦᱩᱭᱩᱜᱼᱟ ᱾ ᱜᱟᱹᱭ ᱛᱟᱱᱟᱜ ᱮ ᱛᱟᱦᱮᱸᱱ ᱠᱷᱟᱱ ᱱᱤᱛ ᱜᱮ ᱟᱹᱠᱷᱨᱤᱧ ᱟᱹᱠᱷᱨᱤᱧ ᱛᱮ ᱜᱟᱲᱜᱟ ᱠᱚ ᱯᱟᱨᱚᱢ ᱠᱮᱭᱟ ᱾”
ᱡᱳᱵᱟ ᱢᱟᱹᱭ ᱫᱚ ᱦᱟᱱᱦᱟᱨ ᱛᱮᱫᱟᱜ ᱱᱚᱝᱠᱟᱱ ᱨᱚᱲ ᱟᱸᱡᱚᱢ ᱠᱟᱛᱮ ᱢᱚᱱᱮᱨᱮ ᱟᱹᱰᱤ ᱵᱟᱝ ᱡᱩᱛ ᱮ ᱟᱹᱭᱠᱟᱹᱣ ᱠᱮᱫᱼᱟ ᱾ ᱮᱱᱛᱮᱫ ᱡᱳᱵᱟ ᱢᱟᱹᱭ ᱛᱤᱠᱤᱱ ᱦᱚᱸ ᱛᱷᱤᱨ ᱫᱚ ᱵᱟᱹᱱᱩᱜ ᱠᱤᱱᱟ ᱥᱟᱱᱟᱢ ᱞᱮᱠᱟᱱᱟᱜ ᱟᱭᱼᱩᱯᱟᱹᱭ ᱠᱟᱛᱮ ᱨᱮᱦᱚᱸ ᱵᱟᱭ ᱦᱮᱭᱳᱸ ᱡᱚᱝ ᱠᱟᱱ ᱛᱮᱟ ᱡᱟᱜ ᱠᱚᱯᱟᱲ ᱨᱮᱭ ᱠᱟᱥᱛᱟᱵ ᱠᱟᱱᱟ ᱾
ᱥᱟᱹᱨᱤ ᱜᱮ, ᱜᱤᱫᱟᱹᱨᱼᱯᱤᱫᱟᱹᱨ ᱵᱟᱝ ᱠᱷᱟᱱ ᱛᱟᱭᱚᱢ ᱛᱮᱫᱚ ᱡᱩᱨᱤ ᱯᱟᱹᱨᱤ ᱫᱩᱞᱟᱹᱲ ᱦᱚᱸ ᱱᱤᱨᱟᱥᱚᱜᱼᱟ ᱾ ᱱᱮᱛᱟᱨ ᱫᱚ ᱥᱤᱵᱽ ᱯᱟᱹᱦᱤᱞ ᱞᱮᱟᱠᱭ ᱠᱚᱲᱟ ᱨᱩᱣᱟᱹᱲ ᱟᱠᱟᱱᱟ ᱾ ᱪᱷᱟᱛᱟᱼᱯᱟᱛᱟ, ᱥᱩᱬᱤ ᱥᱟᱭ ᱡᱟᱦᱟᱸ ᱢᱟᱱᱛᱟᱦᱟᱭ ᱟᱸᱜᱟ ᱩᱨᱤᱡᱚᱜᱼᱟ ᱾ ᱦᱮᱡ ᱠᱟᱛᱮ ᱡᱳᱵᱟ ᱢᱟᱹᱭ ᱡᱟᱦᱟᱸᱱᱟᱜ ᱮ ᱠᱩᱞᱤ ᱤᱸᱜᱩᱞ ᱞᱮᱠᱷᱟᱱ ᱮ ᱛᱟᱨᱫᱷᱟᱢ ᱜᱚᱫᱮᱭᱟ ᱾ ᱱᱮᱛᱟᱨ ᱫᱚ ᱠᱟᱹᱲᱢᱤ ᱠᱩᱲᱤ ᱞᱮᱠᱟ ᱫᱤᱱ ᱫᱚ ᱠᱷᱮᱢᱟᱣᱜ ᱠᱟᱱ ᱛᱟᱭᱟ ᱾
ᱢᱤᱫ ᱫᱤᱱ ᱟᱪᱠᱟ ᱜᱮ ᱡᱳᱵᱟ ᱢᱟᱹᱭ ᱮᱸᱜᱟᱛ ᱛᱮᱫ ᱨᱩᱣᱟᱹᱜ ᱠᱟᱱ ᱨᱮᱭᱟᱜ ᱠᱷᱚᱵᱚᱨ ᱥᱮᱴᱮᱨ ᱟᱫᱮᱭᱟ ᱾ ᱚᱱᱟᱛᱮ ᱩᱱᱤ ᱫᱚ ᱦᱟᱠᱚ ᱯᱟᱠᱚᱭ ᱥᱟᱯᱲᱟᱣ ᱮᱱᱟ ᱟᱨ ᱦᱚᱧᱦᱟᱨ ᱛᱮᱫ ᱮ ᱞᱟᱹᱭ ᱚᱴᱚᱣᱟᱭ ᱠᱟᱱᱟ ᱾ ᱮᱱᱛᱮᱫ ᱩᱱ ᱚᱠᱛᱮ ᱚᱲᱟᱜ ᱨᱮᱫᱚ ᱩᱱᱤ ᱢᱚᱛᱚ ᱜᱮᱭ ᱛᱟᱦᱮᱸ ᱠᱟᱱᱟ ᱾ ᱦᱟᱱᱦᱟᱨ ᱛᱮᱫ ᱦᱚᱸ ᱵᱟᱭ ᱠᱚᱭᱚᱜ ᱦᱚᱨ ᱞᱮᱫᱮᱭᱟ ᱟᱨ ᱥᱤᱵᱽᱡᱚᱛᱚᱱ ᱦᱚᱸ ᱵᱟᱨ ᱯᱮ ᱫᱤᱱ ᱠᱷᱚᱱ ᱢᱟ ᱚᱲᱟᱜ ᱨᱮᱜᱮ ᱵᱟᱹᱱᱩᱜ ᱮ ᱾

ᱫᱚᱥᱟᱨ ᱦᱤᱞᱚᱜ ᱧᱩᱦᱩᱢ ᱚᱠᱛᱮ ᱥᱤᱵᱽ ᱫᱚ ᱚᱲᱟᱜ ᱮ ᱥᱮᱴᱮᱨ ᱮᱱᱟ ᱾ ᱢᱮᱱᱠᱷᱟᱱ ᱡᱟᱣ ᱞᱮᱠᱟ ᱮᱥᱠᱟᱨ ᱫᱚ ᱵᱟᱝ, ᱱᱤᱭᱟᱹ ᱫᱚᱢ ᱫᱚ ᱥᱚᱸᱜᱮ ᱥᱟᱞᱟᱜ ᱾ ᱨᱚᱞᱰᱤ ᱟᱹᱛᱩ ᱨᱮ ᱵᱟᱨ ᱪᱷᱟᱹᱰᱣᱤ ᱯᱟᱱᱢᱩᱱᱤᱭ ᱥᱚᱸᱜᱮ ᱛᱟᱨᱟ ᱠᱮᱫᱮᱭᱟ ᱾ ᱯᱟᱱᱢᱩᱱᱤ ᱫᱚ ᱟᱰᱮᱼᱯᱟᱰᱮ ᱦᱟᱹᱴᱤᱭᱟᱹ, ᱯᱟᱛᱟ ᱪᱷᱟᱛᱟ ᱥᱮ ᱵᱚᱞ ᱮᱱᱮᱡ ᱴᱟᱺᱰᱤ ᱠᱚᱨᱮ ᱯᱟᱹᱣᱨᱟᱹ ᱟᱹᱠᱷᱨᱤᱧ ᱠᱩᱲᱤ ᱾ ᱟᱨᱠ ᱚ ᱦᱚᱲᱟᱜ ᱯᱟᱹᱣᱨᱟᱹ ᱫᱚ ᱟᱹᱠᱷᱨᱤᱧᱚᱜᱼᱟ ᱥᱮ ᱵᱟᱝ ᱢᱮᱱᱠᱷᱟᱱ ᱯᱟᱱᱢᱩᱱᱤᱭᱟᱜ ᱯᱟᱹᱣᱨᱟᱹ ᱫᱚ ᱦᱟᱴ ᱠᱷᱚᱱ ᱛᱤᱥ ᱦᱚᱸ ᱵᱟᱝ ᱨᱩᱣᱟᱹᱲᱟ ᱾ ᱥᱤᱵᱤᱞ ᱨᱮᱢᱟ ᱦᱮᱸ ᱜᱮ ᱥᱟᱵᱟᱜ ᱨᱮᱦᱚᱸ ᱥᱟᱱᱟᱢ ᱟᱹᱠᱷᱨᱤᱧ ᱪᱟᱵᱟᱜᱼᱟ ᱾ ᱠᱩᱲᱤ ᱦᱚᱸ ᱛᱦᱚᱨ ᱵᱟᱭ ᱠᱚᱢᱟ ᱾ ᱮᱥᱮᱞ ᱢᱮᱫᱦᱟ ᱨᱮ ᱟᱭᱱᱚᱢ ᱠᱟᱡᱟᱨ ᱟᱨ ᱚᱱᱟᱨᱮ ᱛᱮᱨᱟᱝ ᱵᱮᱸᱜᱮᱫ ᱾ ᱮᱛᱟᱝ ᱟᱨᱟᱜ ᱞᱩᱴᱤ ᱯᱚᱦᱨᱮᱠ ᱯᱚᱦᱨᱮᱠ ᱨᱮ ᱰᱩᱞᱩᱰᱩᱝ ᱵᱤᱧ ᱞᱮᱟᱠᱭ ᱢᱮᱞᱚᱫ ᱵᱟᱲᱟᱭᱟ ᱾ ᱩᱱᱤ ᱧᱮᱞ ᱛᱮ ᱰᱟᱺᱜᱽᱣᱟᱹ ᱠᱚᱲᱟ ᱪᱮᱫ ᱥᱮ ᱵᱟᱹᱦᱩᱣᱟᱱ ᱠᱚᱲᱟ ᱦᱚᱸᱠᱚ ᱢᱟᱹᱞᱩᱝ ᱩᱛᱟᱹᱨᱚᱜᱼᱟ ᱾ ᱚᱱᱟ ᱛᱮᱜᱮ ᱛᱦᱚᱨ ᱥᱤᱵᱽᱡᱚᱛᱚᱱ ᱫᱚᱭ ᱟᱹᱜᱩ ᱛᱟᱵ ᱩᱛᱟᱹᱨ ᱠᱮᱫᱮᱭᱟ ᱾ ᱥᱤᱵᱽ ᱮᱸᱜᱟᱛ ᱦᱚᱸ ᱯᱟᱱᱢᱩᱱᱤ ᱫᱚ ᱟᱹᱰᱤ ᱞᱚᱞᱚ ᱢᱚᱱᱮ ᱛᱮᱭ ᱟᱛᱟᱝ ᱫᱟᱨᱟᱢ ᱠᱮᱫᱮᱭᱟ ᱾

ᱫᱚᱥᱟᱨ ᱦᱤᱞᱚᱜ ᱠᱷᱟᱱ ᱜᱮ ᱱᱚᱶᱟ ᱠᱟᱛᱷᱟ ᱫᱚ ᱠᱟᱫᱟᱢ ᱴᱚᱞᱟ ᱛᱮ ᱥᱮᱴᱮᱨ ᱮᱱᱟ ᱾ ᱛᱤᱱ ᱨᱮ ᱡᱳᱵᱟ ᱢᱟᱹᱭ ᱱᱚᱶᱟ ᱠᱟᱛᱷᱟ ᱞᱩᱛᱩᱨ ᱨᱮ ᱵᱟᱡᱟᱣ ᱛᱤᱭᱩᱜ ᱟᱫᱮᱭᱟ, ᱠᱷᱟᱱ ᱡᱳᱵᱟ ᱢᱟᱹᱭᱟᱜ ᱡᱟᱸᱜᱟ ᱞᱟᱛᱟᱨ ᱠᱷᱚᱱ ᱫᱷᱟᱹᱨᱛᱤ ᱦᱚᱸᱥᱚᱨ ᱚᱪᱚᱜ ᱮᱱ ᱞᱮᱟᱠᱭ ᱟᱴᱠᱟᱨ ᱠᱮᱫᱼᱟ, ᱢᱮᱱᱠᱷᱟᱱ ᱪᱮᱫ ᱮ ᱪᱤᱠᱟᱹᱭᱟ ᱾ ᱦᱤᱫᱤᱥ ᱨᱮᱭᱟᱜ ᱵᱷᱟᱨᱰᱚ ᱛᱮ ᱱᱚᱝᱠᱟᱭ ᱵᱷᱟᱨᱰᱚ ᱮᱥᱮᱫ ᱮᱱᱟ ᱡᱮ ᱜᱚᱴᱟ ᱫᱤᱥᱚᱢ ᱧᱩᱛ ᱪᱟᱵᱟᱭᱮᱱᱟ ᱾ ᱫᱩᱲᱩᱵ ᱦᱟᱹᱯᱤ ᱮᱱᱟᱭ, ᱦᱚᱭ ᱫᱟᱜ ᱦᱤᱡᱩᱜ ᱢᱟᱬᱟᱝ ᱨᱮ ᱫᱤᱥᱚᱢ ᱜᱚᱴᱟ ᱦᱟᱹᱯᱤᱜ ᱞᱮᱠᱟ ᱾ ᱢᱮᱱᱠᱷᱟᱱ ᱚᱱᱛᱚᱨ ᱡᱚᱞᱟ ᱫᱚ ᱛᱟᱹᱯᱤᱥ ᱛᱮ ᱥᱚᱠᱚᱡᱚᱜ ᱠᱟᱱᱟ, ᱛᱟᱣᱟᱜ ᱛᱟᱨᱠᱚ ᱠᱚᱲᱟᱢ ᱱᱟᱞᱟ ᱥᱮᱫ ᱛᱮ ᱵᱟᱱᱵᱟᱹᱥᱤ ᱫᱟᱜ ᱞᱮᱠᱟ ᱦᱟᱰᱟᱜ ᱰᱟᱵᱟᱜ ᱥᱚᱲᱚ ᱚᱰᱚᱠᱚᱜ ᱠᱟᱱᱟ ᱢᱮᱫ ᱫᱟᱜ ᱠᱷᱚᱱ ᱾ ᱟᱹᱛᱩᱜ ᱫᱟᱜ ᱪᱮᱛᱟᱱ ᱨᱮ ᱴᱤᱯᱤᱨ ᱫᱟᱜ ᱜᱮ ᱨᱟᱠᱟᱵᱚᱜ ᱫᱟᱜ ᱰᱩᱞᱰᱩᱞᱤ ᱞᱮᱠᱟ ᱡᱳᱵᱟ ᱢᱟᱹᱭ ᱫᱚ ᱟᱭᱢᱟ ᱦᱩᱫᱤᱥ ᱡᱟᱱᱟᱢ ᱟᱫᱮᱭᱟ ᱾ ᱢᱮᱱᱮᱛ ᱚᱠᱟᱴᱟᱜ ᱜᱮ ᱵᱟᱭ ᱦᱤᱫᱤᱥ ᱢᱩᱪᱟᱹᱫ ᱫᱟᱲᱮᱭᱟᱜ ᱠᱟᱱᱟ , ᱚᱱᱟ ᱫᱟᱜ ᱰᱩᱞᱰᱩᱞᱤ ᱞᱮᱠᱟ ᱜᱮ ᱱᱟᱥᱮ ᱥᱟᱺᱜᱤᱧ ᱟᱹᱛᱩ ᱪᱟᱞᱟᱜ ᱠᱟᱱᱟ ᱟᱨ ᱪᱷᱟᱱᱚᱜ ᱠᱟᱱᱟ ᱾ ᱟᱨ ᱦᱚᱸ ᱮᱴᱟᱜᱟᱜ ᱨᱟᱠᱟᱵ ᱮᱱ ᱜ ᱮᱟᱨ ᱦᱚᱸ ᱚᱱᱠᱟ ᱜᱮ ᱪᱷᱟᱱ ᱜᱚᱛᱚᱭᱮᱱ ᱜᱮ ᱾
ᱟᱪᱠᱟ ᱜᱮ ᱫᱤᱥᱟᱹ ᱷᱮᱡ ᱟᱫᱮᱭᱟ ᱩᱱ ᱨᱮ ᱥᱤᱵᱽᱡᱚᱛᱚᱱ ᱪᱷᱩᱴᱠᱤ ᱡᱚᱝ ᱮ ᱢᱮᱱ ᱞᱮᱫ ᱨᱮ ᱡᱳᱵᱟ ᱢᱟᱹᱭ ᱮ ᱢᱮᱛᱟ ᱫᱮ ᱛᱟᱦᱮᱸ ᱠᱟᱱᱟ ᱡᱮ ᱤᱧ ᱪᱮᱛᱟᱱ ᱨᱮᱫᱚ ᱟᱞᱚᱢ ᱟᱹᱜᱩ ᱠᱚᱣᱟ, ᱤᱧ ᱵᱟᱹᱜᱤ ᱞᱟᱦᱟᱭᱤᱧ ᱢᱮ ᱟᱫᱚ ᱟᱹᱜᱩ ᱠᱚᱢ ᱾ ᱱᱚᱶᱟ ᱫᱤᱥᱟᱹ ᱠᱟᱛᱮ ᱡᱳᱵᱟ ᱢᱟᱹᱭ ᱫᱚ ᱟᱨ ᱦᱚᱸ ᱯᱤᱬᱦᱟᱹ ᱵᱚᱜᱚᱡ ᱮᱱ ᱞᱮᱠᱟ ᱢᱮᱫ ᱫᱟᱜ ᱡᱚᱨᱚᱜ ᱮᱛᱚᱦᱚᱵ ᱮᱱ ᱛᱟᱭᱟ ᱾ ᱵᱟᱝ ᱥᱟᱸᱵᱽᱲᱟᱣᱜ ᱠᱟᱱᱟ, ᱢᱮᱫ ᱫᱟᱜ ᱡᱚᱫ ᱡᱚᱫ ᱛᱮ ᱟᱧᱪᱟᱨ ᱥᱟᱱᱟᱢ ᱞᱚᱦᱚᱫ ᱪᱟᱵᱟᱭᱮᱱ ᱛᱟᱭᱟ ᱾ ᱩᱭᱦᱟᱹᱨ ᱠᱮᱫ ᱟᱭ ᱱᱟᱶᱟ ᱱᱟᱶᱟ ᱵᱟᱯᱞᱟ ᱛᱟᱭᱚᱢ ᱟᱹᱠᱤᱱᱟ ᱫᱩᱞᱟᱹᱲ ᱯᱮᱨᱮᱡ ᱨᱚᱲ ᱞᱟᱸᱫᱟ, ᱛᱤᱱᱟᱹᱜ ᱫᱟᱱᱟ ᱯᱮᱨᱮᱡ ᱚᱲᱟᱜ ᱫᱩᱣᱟᱹᱨ, ᱡᱚᱛᱚᱣᱟᱜ ᱨᱮ ᱟᱡᱟᱜ ᱦᱚᱠ ᱛᱟᱦᱮᱸᱱ ᱛᱮ ᱱᱤᱛ ᱫᱟᱹᱵᱤ ᱫᱟᱲᱮ ᱵᱟᱹᱱᱩᱜ ᱛᱟᱭᱟ ᱾ ᱟᱯᱱᱟᱨᱟᱜ ᱠᱚᱯᱟᱲ ᱜᱮ ᱯᱮᱲᱛᱟ ᱜᱮ ᱠᱷᱟᱱ, ᱮᱸᱜᱟᱛ ᱟᱯᱟᱛ ᱦᱚᱸ ᱵᱷᱟᱵᱽᱱᱟ ᱠᱟᱛᱮ ᱪᱮᱫ ᱠᱤᱱ ᱪᱮᱠᱟᱭᱟ ᱾

ᱡᱳᱵᱟ ᱢᱟᱹᱭ ᱫᱚ ᱵᱚᱨᱢᱮ ᱵᱚᱨᱢᱮ ᱛᱮᱭ ᱩᱥᱩᱜ ᱪᱟᱵᱟᱭᱮᱱᱟ ᱾ ᱢᱤᱫ ᱪᱟᱸᱫᱚ ᱛᱟᱭᱚᱢ ᱥᱟᱠᱟᱢ ᱚᱲᱮᱡ ᱨᱮᱱᱟᱜ ᱠᱚ ᱱᱮᱰᱟ ᱠᱮᱫᱼᱟ ᱾ ᱛᱮᱦᱮᱧ ᱡᱳᱵᱟ ᱢᱟᱹᱭᱟᱜ ᱥᱟᱠᱟᱢ ᱚᱲᱮᱡ ᱠᱚ ᱪᱟᱞᱟᱜ ᱠᱟᱱᱟ ᱾ ᱡᱳᱵᱟ ᱢᱟᱹᱭ ᱫᱚ ᱞᱟᱯᱮᱫ ᱫᱟᱠᱟ ᱦᱚᱸ ᱵᱟᱝ ᱩᱫᱩᱜ ᱠᱟᱱ ᱛᱟᱭᱟ ᱾ ᱮᱠᱷᱮᱱ ᱢᱮᱫ ᱫᱟᱜ ᱜᱮ ᱡᱚᱨᱚᱜ ᱠᱟᱱ ᱛᱟᱭᱟ ᱦᱤᱰᱤᱨ ᱦᱤᱰᱤᱨ ᱾
ᱟᱮᱴᱮᱨ ᱮᱱᱟ ᱠᱚ ᱥᱚᱥᱚ ᱴᱚᱞᱟ ᱾ ᱜᱟᱞᱢᱟᱨᱟᱣ ᱪᱷᱤᱸᱰᱟᱹᱣ ᱠᱮᱫᱼᱟ ᱠᱚ ᱾ ᱡᱳᱵᱟ ᱢᱟᱹᱭᱟᱜ ᱞᱮᱜᱽᱼᱵᱷᱟᱜᱽ ᱡᱚᱛᱚ ᱠᱚ ᱮᱢ ᱠᱟᱫ ᱛᱟᱭᱟ ᱾ ᱡᱳᱵᱟ ᱢᱟᱹᱭ ᱫᱚ ᱛᱮᱦᱮᱧ ᱚᱱᱟ ᱚᱲᱟᱜ ᱠᱷᱚᱱ ᱡᱟᱭᱡᱩᱜᱽ ᱞᱟᱹᱜᱤᱫ ᱮ ᱚᱰᱚᱠ ᱪᱟᱞᱟᱜ ᱠᱟᱱᱟ ᱾ ᱢᱩᱪᱟᱹᱫ ᱫᱚᱢ ᱥᱤᱵᱽᱡᱚᱛᱚᱱ ᱮ ᱠᱚᱭᱚᱜ ᱨᱟᱠᱟᱵ ᱟᱫᱮᱭᱟ ᱾ ᱢᱮᱱᱠᱷᱟᱱ ᱥᱤᱵᱽᱡᱚᱛᱚᱱ ᱫᱚᱭ ᱛᱩᱸᱵᱩᱫ ᱮᱱᱟ, ᱵᱟᱭ ᱠᱚᱭᱚᱜ ᱧᱟᱯᱟᱢ ᱞᱮᱫᱮᱭᱟ ᱾ ᱚᱲᱟᱜ ᱠᱚᱭ ᱵᱮᱸᱜᱮᱫ ᱨᱟᱠᱟᱵᱟᱜ ᱠᱟᱱᱟ, ᱵᱷᱤᱛ ᱨᱮ ᱟᱡᱟᱜ ᱵᱮᱱᱟᱣᱟᱜ ᱵᱟᱦᱟ ᱪᱤᱛᱟᱹᱨ ᱦᱚᱸ ᱪᱮᱫᱟᱜ ᱪᱚ ᱛᱮᱦᱮᱧ ᱫᱚ ᱟᱹᱰᱤ ᱩᱫᱟᱹᱥ ᱧᱮᱞᱚᱜ ᱠᱟᱱᱟ ᱾ ᱥᱤᱢ ᱥᱟᱺᱰᱤ ᱟᱨ ᱢᱟᱨᱟᱜ ᱠᱚᱦᱚᱸ ᱢᱩᱞᱤᱱ ᱜᱮᱠᱚ ᱧᱮᱞᱚᱜ ᱠᱟᱱᱟ ᱾ ᱡᱳᱵᱟ ᱢᱟᱹᱭ ᱠᱚ ᱨᱟᱜ ᱜᱚᱫ ᱟᱭ ᱠᱟᱱ ᱞᱮᱠᱟ ᱾ ᱪᱮᱫᱟᱜ ᱮᱱᱛᱮᱫ ᱵᱟᱝ, ᱚᱱᱟ ᱚᱲᱟᱜ ᱨᱮᱭᱟᱜ ᱢᱤᱢᱤᱫ ᱡᱤᱱᱤᱥ ᱥᱟᱶ ᱡᱳᱵᱟ ᱢᱟᱹᱭᱟᱜ ᱫᱩᱞᱟᱹᱲ ᱛᱚᱞ ᱛᱟᱦᱮᱸ ᱠᱟᱱᱟ ᱾ ᱟᱨ ᱛᱮᱦᱮᱧ ᱫᱚ ᱡᱚᱛᱚᱣᱟᱜ ᱨᱟᱪᱟᱜ ᱪᱷᱟᱰᱟᱣ ᱠᱟᱛᱮ ᱠᱚ ᱠᱚᱭ ᱫᱚᱦᱚ ᱠᱮᱫᱮᱭᱟ ᱾
ᱜᱤᱫᱽᱨᱟᱹ ᱯᱤᱫᱽᱨᱟᱹ ᱵᱟᱝ ᱛᱮ ᱡᱳᱵᱟ ᱢᱟᱹᱭ ᱠᱚ ᱵᱟᱹᱜᱤ ᱠᱮᱫᱮ ᱨᱮᱱᱟᱜ ᱠᱟᱛᱷᱟ ᱫᱚ ᱡᱚᱡᱚᱴᱚᱞᱟ ᱨᱤᱱᱤᱡ ᱥᱤᱵᱽᱡᱚᱛᱚᱱ ᱟᱡ ᱠᱟᱹᱠᱤᱭᱤᱡ ᱦᱤᱰᱤᱧᱤᱡ ᱦᱚᱯᱚᱱ ᱢᱟᱹᱱᱤᱡᱚᱨ ᱦᱚᱸᱭ ᱵᱟᱰᱟᱭ ᱧᱟᱢ ᱠᱮᱫᱼᱟ ᱾ ᱱᱚᱶᱟ ᱠᱟᱛᱷᱟ ᱵᱟᱰᱟᱭ ᱠᱟᱛᱮ ᱩᱱᱤ ᱫᱚ ᱟᱹᱰᱤ ᱵᱷᱟᱵᱽᱱᱟᱭ ᱟᱹᱭᱠᱟᱹᱭ ᱠᱮᱫᱼᱟ ᱾ ᱢᱟᱹᱱᱤᱡᱚᱨ ᱫᱚ ᱵᱟᱨ ᱜᱮᱞᱮ ᱜᱤᱫᱽᱨᱟᱹ ᱟᱯᱟᱛ ᱠᱚᱲᱟ ᱾ ᱢᱟᱨᱟᱝᱤᱧ ᱫᱚ ᱠᱩᱲᱤ ᱟᱨ ᱦᱩᱰᱤᱧᱤᱧ ᱫᱚ ᱠᱚᱲᱟ ᱜᱤᱫᱽᱨᱟᱹ ᱠᱟᱱ ᱛᱟᱭᱟ ᱠᱤᱱ ᱾ ᱮᱸᱜᱟᱛ ᱛᱮᱫ ᱫᱚ ᱵᱚᱪᱷᱚᱨ ᱫᱤᱱ ᱞᱟᱦᱟ ᱨᱮᱭ ᱵᱮᱸᱰᱟᱣᱮᱱᱟ ᱾ ᱜᱤᱫᱽᱨᱟᱹ ᱫᱚ ᱠᱤᱱ ᱴᱩᱣᱟᱹᱨ ᱮᱱᱟ ᱾ ᱢᱟᱹᱱᱤᱡᱚᱨ ᱮᱸᱜᱟᱛ ᱛᱟᱦᱮᱸ ᱠᱟᱱ ᱵᱷᱳᱨ ᱢᱟ ᱜᱤᱫᱽᱨᱟᱹᱭ ᱥᱟᱶᱦᱟ ᱠᱮᱫ ᱠᱤᱱ ᱾ ᱢᱮᱱᱠᱷᱟᱱ ᱱᱤᱛ ᱮᱸᱜᱟᱛ ᱛᱮᱫ ᱮ ᱦᱟᱱᱟᱯᱩᱨᱤ ᱮᱱ ᱠᱷᱟᱱ ᱢᱟᱹᱱᱤᱡᱚᱴ ᱦᱚᱸ ᱪᱤᱱᱛᱟᱹ ᱯᱟᱲᱟᱣ ᱟᱫᱮᱭᱟ ᱾

ᱡᱳᱵᱟ ᱢᱟᱹᱭᱟᱜ ᱵᱟᱯᱞᱟ ᱟᱹᱣᱨᱤ ᱦᱩᱭᱩᱜ ᱨᱮ ᱢᱟᱹᱱᱤᱡᱚᱨ ᱫᱚ ᱢᱤᱫ ᱫᱚᱢ ᱠᱟᱫᱟᱢᱴᱚᱞᱟ ᱛᱮ ᱜᱟᱴᱮ ᱠᱚᱲᱟ ᱟᱜ ᱵᱟᱹᱨᱤᱭᱟᱹᱛᱚᱜ ᱮ ᱥᱮᱱ ᱞᱮᱱᱟ ᱾ ᱩᱱᱨᱮ ᱩᱱᱤ ᱫᱚ ᱡᱳᱵᱟ ᱢᱟᱹᱭᱨᱮ ᱢᱮᱫ ᱰᱷᱟᱝ ᱞᱮᱱ ᱛᱟᱭᱟ ᱾ ᱢᱮᱱᱠᱷᱟᱱ ᱟᱡᱟᱜ ᱠᱟᱛᱷᱟ ᱡᱳᱵᱟ ᱢᱟᱹᱭ ᱴᱷᱮᱱ ᱥᱚᱫᱚᱨ ᱢᱟᱬᱟᱝ ᱨᱮ ᱜᱮ ᱥᱚᱥᱚᱴᱚᱞᱟ ᱨᱤᱱᱤᱡ ᱟᱡ ᱫᱟᱫᱟ ᱥᱟᱶ ᱩᱱᱤᱭᱟᱜ ᱵᱟᱯᱞᱟ ᱡᱩᱛ ᱟᱠᱟᱱ ᱵᱟᱰᱟᱭ ᱠᱟᱛᱮ ᱢᱟᱹᱱᱤᱡᱚᱨ ᱟᱜ ᱚᱱᱛᱚᱨ ᱚᱲᱟᱜ ᱨᱮ ᱥᱟᱜᱮᱱ ᱨᱟᱠᱟᱵ ᱞᱮᱱ ᱫᱩᱞᱟᱹᱲ ᱰᱚᱜᱽ ᱫᱚ ᱦᱩᱪᱟᱹᱜ ᱧᱩᱨᱮᱱ ᱛᱟᱭᱟ ᱾ ᱢᱮᱱᱠᱷᱟᱱ ᱱᱤᱛ ᱵᱤᱱ ᱧᱮᱯᱮᱞ ᱧᱟᱯᱟᱢ ᱛᱮ ᱥᱤᱧ ᱧᱤᱫᱟᱹ ᱡᱳᱵᱟ ᱢᱟᱹᱭᱟᱭ ᱠᱟᱛᱷᱟ ᱜᱮᱭ ᱜᱩᱱᱤ ᱵᱷᱟᱹᱵᱤᱭᱮᱫᱼᱟ ᱾ ᱩᱱᱤ ᱫᱚ ᱟᱨ ᱵᱟᱭ ᱡᱤᱣᱤ ᱞᱮᱫᱼᱟ ᱾ ᱪᱮᱛᱟᱛ ᱠᱚᱪᱚ ᱟᱭᱢᱟ ᱵᱷᱟᱵᱽᱱᱟ ᱠᱟᱛᱮ ᱠᱟᱫᱟᱢ ᱴᱚᱞᱟ ᱪᱟᱞᱟᱜ ᱮ ᱮᱭᱦᱚᱵ ᱮᱱᱟ ᱾ ᱛᱟᱠ ᱛᱟᱠ ᱨᱮ ᱠᱟᱹᱢᱤ ᱠᱚ ᱦᱚᱸᱭ ᱜᱚᱲᱚ ᱵᱟᱲᱟ ᱚᱴᱚ ᱟᱠᱚᱣᱟ ᱾ ᱱᱟᱥᱮ ᱫᱤᱱ ᱠᱷᱟᱱ ᱜᱮ ᱡᱳᱵᱟ ᱢᱟᱹᱭᱟᱜ ᱚᱱᱛᱚᱨ ᱵᱟᱜᱟᱱ ᱨᱮᱭᱟᱜ ᱧᱩᱨ ᱪᱟᱵᱟᱞ ᱮᱱ ᱫᱟᱨᱮ ᱥᱟᱠᱟᱢ ᱫᱚ ᱥᱟᱜᱮᱱᱚᱜ ᱮᱭᱦᱚᱵ ᱮᱱᱟ ᱾ ᱯᱷᱩᱲᱩᱜ ᱯᱟᱛᱲᱟᱭ ᱞᱮᱠᱟ ᱥᱟᱠᱟᱢ ᱠᱚ ᱠᱮᱴᱮᱡ ᱧᱚᱜ ᱮᱱᱠᱷᱟᱱ ᱢᱟᱹᱱᱤᱡᱚᱨ ᱟᱜ ᱚᱱᱛᱚᱨ ᱨᱮ ᱱᱤᱨᱲᱟᱹ ᱫᱩᱞᱟᱹᱲ ᱛᱟᱦᱮᱸ ᱠᱟᱱᱛᱮ ᱜᱮ ᱡᱟᱹᱱᱤᱡ ᱪᱟᱸᱫᱚ ᱵᱚᱸᱜᱟ ᱫᱚ ᱛᱮᱦᱮᱧ ᱫᱚᱭ ᱢᱤᱫ ᱴᱷᱮᱫ ᱠᱟᱫ ᱠᱤᱱᱟ ᱾ ᱡᱳᱵᱟ ᱢᱟᱹᱭ ᱫᱚ ᱡᱚᱱᱚᱢ ᱮᱸᱜᱟᱛ ᱞᱮᱠᱟ ᱜᱮ ᱜᱤᱫᱽᱨᱟᱹᱭ ᱫᱩᱞᱟᱹᱲ ᱠᱤᱱᱟ ᱾ ᱟᱨ ᱜᱤᱫᱽᱨᱟᱹ ᱦᱚᱸ ᱱᱚᱝᱠᱟ ᱠᱤᱱ ᱦᱮᱣᱟᱭᱮᱱᱟ ᱡᱮ ᱮᱸᱜᱟᱛ ᱵᱮᱜᱚᱨ ᱚᱠᱟ ᱨᱮᱦᱚᱸ ᱵᱟᱹᱠᱤᱱ ᱛᱟᱦᱮᱸᱱᱟ ᱾

ᱢᱤᱫ ᱵᱚᱪᱷᱚᱨ ᱫᱤᱱ ᱟᱹᱪᱩᱨᱚᱜ ᱟᱹᱪᱩᱨᱚᱜ ᱡᱳᱵᱟ ᱢᱟᱹᱭᱟᱜ ᱫᱚ ᱢᱟᱨᱮ ᱪᱟᱹᱧᱪᱩᱨ ᱠᱷᱚᱱ ᱩᱵ ᱚᱰᱚᱠᱮᱱ ᱞᱮᱠᱟ ᱦᱚᱲᱢᱚ ᱨᱮᱭᱟᱜ ᱵᱚᱨᱚᱱ ᱯᱷᱮᱨᱟᱣᱮᱱ ᱛᱟᱭᱟ ᱾ ᱨᱟᱹᱥᱠᱟᱹ ᱨᱮᱭᱟᱜ ᱠᱟᱛᱦᱟ ᱜᱮ ᱮᱱᱛᱮᱫ ᱟᱡ ᱞᱟᱹᱜᱤᱫ ᱟᱡᱟᱜ ᱥᱮ ᱦᱚᱲᱟᱜ ᱚᱠᱟ ᱦᱩᱫᱤᱥ ᱛᱟᱦᱮᱸ ᱠᱟᱱᱟ ᱚᱱᱟ ᱫᱚ ᱟᱹᱣᱰᱤᱭᱟᱜ ᱮᱱᱟ ᱾ ᱡᱳᱵᱟ ᱢᱟᱹᱭ ᱫᱚ ᱟᱡᱟᱜ ᱯᱟᱨᱚᱢ ᱟᱠᱟᱱ ᱡᱤᱭᱚᱱ ᱨᱮᱱᱟᱜ ᱥᱟᱱᱟᱢ ᱜᱷᱚᱴᱚᱱ ᱠᱚ ᱦᱤᱲᱤᱧ ᱠᱟᱛᱮ ᱱᱟᱶᱟ ᱫᱩᱱᱤᱭᱟᱹ ᱨᱮᱭ ᱵᱚᱞᱚ ᱮᱱᱟ ᱾ ᱱᱟᱥᱮ ᱫᱤᱱ ᱠᱷᱟᱱ ᱜᱮ ᱠᱚᱞᱮᱨ ᱥᱚᱱᱟᱭ ᱦᱮᱣᱮ ᱟᱱᱟ ᱾ ᱵᱤᱱ ᱢᱩᱪᱟᱹᱫ ᱨᱟᱹᱥᱠᱟᱹᱭ ᱨᱟᱹᱥᱠᱟᱹ ᱮᱱᱟ ᱡᱳᱵᱟ ᱢᱟᱹᱭ ᱾ ᱪᱮᱫᱟᱹᱜ ᱮᱱᱛᱮᱫ ᱵᱟᱝ, ᱟᱭᱳ ᱦᱚᱲ ᱦᱩᱭᱩᱜ ᱨᱮᱱᱟᱜ ᱜᱚᱨᱚᱵᱽ ᱟᱨ ᱮᱸᱜᱟᱛᱚᱜ ᱨᱮᱭᱟᱜ ᱥᱟᱫᱽ ᱛᱮᱦᱮᱧ ᱯᱩᱨᱟᱹᱣᱮᱱ ᱛᱟᱭᱟ ᱾

ᱡᱳᱵᱟ ᱢᱟᱹᱭ ᱮ ᱦᱮᱣᱟᱱ ᱨᱮᱭᱟᱜ ᱠᱟᱛᱷᱟ ᱛᱤᱱ ᱨᱮ ᱥᱚᱥᱚᱴᱚᱞᱟ ᱨᱤᱱᱤᱡ ᱥᱤᱵᱽᱡᱚᱛᱚᱱ ᱮ ᱵᱟᱰᱟᱭ ᱧᱟᱢ ᱠᱮᱫᱼᱟ, ᱠᱷᱟᱱ ᱟᱹᱰᱤᱭ ᱵᱷᱟᱵᱽᱱᱟ ᱮᱱᱟ ᱟᱨ ᱡᱳᱵᱟ ᱢᱟᱹᱭ ᱮ ᱵᱟᱹᱜᱤ ᱠᱮᱫᱮ ᱛᱮ ᱠᱟᱥᱛᱟᱣ ᱦᱚᱸ ᱟᱹᱰᱤᱭ ᱠᱟᱥᱛᱟᱣ ᱮᱱᱟ ᱾ ᱪᱮᱫᱟᱜ ᱮᱱᱛᱮᱫ ᱧᱚᱞᱦᱟᱫ ᱫᱚ ᱡᱳᱵᱟ ᱢᱟᱹᱭ ᱴᱷᱮᱱ ᱫᱚ ᱵᱟᱝ ᱯᱟᱥᱮᱫ ᱟᱡ ᱴᱷᱮᱱ ᱜᱮ ᱛᱟᱦᱮᱸ ᱠᱟᱱᱟ ᱾ ᱪᱮᱫᱟᱜ ᱮᱱᱛᱮᱫ ᱱᱤᱛ ᱦᱟᱹᱵᱤᱡ ᱥᱤᱵᱽᱡᱚᱛᱚᱱ ᱨᱟᱪᱟ ᱫᱚ ᱱᱤᱥᱚᱱ ᱜᱮ ᱢᱮᱱᱟᱜ ᱛᱟᱭᱟ ᱾