ᱯᱳᱥ ᱥᱚᱝᱠᱨᱟᱱᱛᱤ ᱨᱮᱱᱟᱜ ᱞᱟᱦᱟᱫᱤᱱ ᱢᱟᱱᱮ ᱛᱮᱦᱮᱧ ᱫᱚ ᱦᱚᱞᱚᱝ ᱦᱩᱲᱩᱝ ᱥᱮ ᱪᱟᱶᱰᱤ ᱵᱚᱱ ᱢᱮᱛᱟᱜ ᱠᱟᱱᱟ ᱾ ᱛᱮᱦᱮᱧ ᱫᱚ ᱵᱷᱳᱨ ᱠᱷᱚᱱ ᱜᱮ ᱥᱩᱠᱨᱤ ᱠᱚᱠᱚ ᱠᱩᱴᱟᱹᱢ ᱠᱮᱫ ᱠᱚᱣᱟ ᱟᱭᱳ ᱦᱚᱲ ᱫᱚ ᱜᱮᱡ ᱜᱩᱨᱤᱡ ᱛᱤᱠᱤ ᱥᱚᱵᱚᱫ ᱠᱟᱛᱮ ᱥᱩᱠᱨᱤ ᱡᱤᱞ, ᱥᱤᱢ ᱡᱤᱞ ᱥᱟᱨᱡᱚᱢ ᱯᱟᱛᱲᱟ ᱨᱮᱠᱚ ᱯᱤᱴᱷᱟᱹᱭᱟ ᱟᱨ ᱠᱟᱹᱴᱤᱡ ᱠᱚ ᱵᱚᱸᱜᱟ ᱵᱟᱲᱟ ᱠᱟᱜᱼᱟ ᱟᱨ ᱜᱤᱫᱟᱹᱨ ᱯᱤᱫᱟᱹᱨ ᱮᱨᱟᱼᱩᱨᱩ ᱥᱟᱱᱟᱢ ᱦᱚᱲ ᱜᱮᱠᱚ ᱥᱟᱠᱨᱟᱛᱚᱜᱼᱟ ᱾ ᱨᱮᱸᱜᱮᱡ ᱚᱨᱮᱡ ᱠᱩᱲᱟᱹᱣ ᱟᱱᱴᱟᱣ ᱥᱟᱱᱟᱢ ᱦᱚᱲ ᱜᱮ ᱞᱟᱦᱟ ᱠᱷᱚᱱ ᱜᱮ ᱥᱟᱠᱨᱟᱛ ᱧᱩᱛᱩᱢ ᱛᱮᱠᱚ ᱛᱮᱭᱟᱨ ᱠᱚᱜᱼᱟ ᱾ ᱛᱮᱦᱮᱧ ᱫᱚ ᱡᱤᱞ ᱦᱟᱹᱠᱩ ᱠᱚ ᱡᱚᱢᱟ ᱯᱟᱛᱲᱟᱨᱮ ᱟᱨ ᱚᱱᱟ ᱯᱟᱛᱲᱟ ᱫᱚ ᱨᱟᱪᱟ ᱥᱮᱫ ᱨᱮᱠᱚ ᱫᱚᱦᱚ ᱠᱟᱜᱼᱟ, ᱞᱟᱹᱭᱟᱠᱚ ᱥᱟᱠᱨᱟᱛ ᱵᱩᱰᱷᱤᱭ ᱦᱤᱡᱩᱜᱼᱟ ᱦᱚᱲᱮ ᱞᱮᱠᱷᱟ ᱤᱫᱤ ᱠᱚᱣᱟ ᱟᱨ ᱧᱤᱫᱟᱹᱫᱚ ᱛᱤᱞᱢᱤᱧ ᱦᱚ’ ᱠᱟᱹᱴᱤᱡ ᱠᱚ ᱡᱚᱢᱟᱜᱼᱟ ᱵᱟᱝ ᱢᱟ ᱢᱤᱫ ᱛᱤᱞᱢᱤᱧ ᱡᱤᱣᱤ ᱵᱟᱲᱦᱟᱣᱜᱼᱟ ᱞᱟᱡ ᱠᱚᱨᱮ ᱛᱩᱲᱤ ᱥᱩᱱᱩᱢ ᱠᱚᱠᱚ ᱚᱡᱚᱜ ᱡᱚᱝᱟ ᱥᱟᱱᱟᱢ ᱦᱚᱲ ᱜᱮ ᱟᱨ ᱠᱩᱲᱤ ᱠᱚ ᱠᱚᱲᱟ ᱠᱚᱫᱚ ᱢᱤᱫ ᱧᱤᱫᱟᱹᱠᱚ ᱥᱮᱨᱮᱧ ᱟᱸᱜᱟᱭᱟ ᱚᱱᱠᱟ ᱛᱮᱜᱮ ᱧᱤᱫᱟᱹ ᱟᱸᱜᱟᱜᱼᱟ ᱾
ᱫᱚᱥᱟᱨ ᱦᱤᱞᱚᱜ ᱫᱚ ᱵᱟᱹᱶᱰᱤ ᱥᱮ ᱥᱤᱧ ᱥᱟᱠᱨᱟᱛ
ᱯᱩᱥ ᱵᱚᱸᱜᱟ ᱨᱮᱱᱟᱜ ᱢᱩᱪᱟᱹᱫ ᱢᱟᱦᱟ
ᱵᱷᱳᱨ ᱵᱷᱳᱨᱛᱮ ᱛᱩᱯᱩᱱ ᱠᱚ ᱪᱟᱞᱟᱜᱼᱟ ᱜᱤᱫᱽᱨᱟᱹᱠᱚᱫᱚ ᱟᱨ ᱵᱩᱰᱷᱤ ᱠᱩᱸᱵᱟᱹᱠᱚ ᱟᱛᱟᱨᱟ ᱟᱨ ᱟᱭᱳ ᱦᱚᱲ ᱠᱚᱫᱚ ᱩᱢ ᱯᱷᱟᱨᱪᱟ ᱠᱟᱛᱮ ᱱᱟᱶᱟ ᱞᱩᱜᱽᱲᱤ ᱵᱟᱸᱫᱮ ᱠᱟᱛᱮ ᱵᱚᱸᱜᱟ ᱞᱟᱹᱜᱤᱫ ᱯᱤᱴᱷᱟᱹᱠᱚ ᱛᱮᱭᱟᱨᱟ ᱱᱟᱶᱟ ᱥᱚᱨᱟ ᱯᱟᱛᱞᱳᱭᱨᱮ ᱪᱮᱰᱮ ᱯᱤᱴᱷᱟᱹ ᱥᱟᱶᱛᱮ ᱜᱩᱲ, ᱛᱟᱵᱮᱱ ᱡᱷᱚᱛᱚ ᱠᱚ ᱵᱚᱸᱜᱟᱭᱟ ᱱᱟᱶᱟ ᱴᱷᱤᱞᱤ ᱛᱮ ᱫᱟᱜ ᱠᱚ ᱞᱩ ᱟᱹᱜᱩᱭᱟ ᱟᱨ ᱱᱟᱶᱟ ᱴᱩᱠᱩᱡ, ᱱᱟᱶᱟ ᱪᱮᱞᱟᱝ ᱨᱮᱠᱚ ᱫᱟᱠᱟ ᱩᱛᱩᱭᱟ ᱟᱨ ᱱᱟᱶᱟ ᱵᱤᱸᱰᱤ ᱨᱮᱠᱚ ᱫᱚᱦᱚᱭᱟ ᱾ ᱫᱟᱠᱟ ᱩᱛᱩ ᱡᱚᱢ ᱠᱟᱛᱮ ᱛᱟᱨᱟᱥᱤᱧ ᱵᱮᱲᱟ ᱫᱚ ᱵᱮᱡᱷᱟ ᱠᱚ ᱵᱤᱫᱟ ᱟᱨᱠᱚ ᱛᱩᱧᱟ ᱟᱨ ᱠᱩᱲᱤ ᱠᱚᱲᱟ ᱠᱚ ᱨᱟᱹᱥᱠᱟᱹ ᱨᱚᱢᱚᱡᱟ ᱾
ᱵᱮᱡᱷᱟ ᱛᱩᱧ ᱨᱮᱱᱟᱜ ᱢᱤᱫᱴᱟᱹᱝ ᱥᱮᱨᱮᱧ
ᱵᱩᱨᱩ ᱪᱮᱛᱟᱱ ᱥᱟᱹᱞ ᱫᱚ ᱥᱟᱹᱞ ᱫᱚ
ᱥᱟᱹᱞ ᱫᱚ ᱥᱟᱹᱞ ᱫᱚ ᱠᱟᱴᱟᱵᱮ ᱠᱟᱴᱟᱵ
ᱥᱟᱹᱞ ᱫᱚ ᱥᱟᱹᱞ ᱫᱚ ᱠᱟᱴᱟᱵᱮ ᱠᱟᱴᱟᱵ ᱾
ᱥᱟᱨ ᱫᱩᱧ ᱟᱲᱟᱜ ᱠᱮᱫ ᱥᱟᱹᱞ ᱫᱚᱭ ᱵᱟᱡᱟᱣᱮᱱ
ᱥᱟᱨ ᱫᱚ ᱧᱩᱨᱩᱭᱮᱱ ᱫᱟᱫᱟᱧ ᱠᱚᱲᱟᱢ ᱨᱮ
ᱥᱟᱨ ᱫᱚ ᱧᱩᱨᱩᱭᱮᱱ ᱫᱟᱫᱟᱧ ᱠᱚᱲᱟᱢ ᱨᱮ ᱾
ᱥᱟᱹᱞ ᱫᱚ ᱜᱚᱜᱮ ᱯᱮ ᱜᱮᱞᱵᱟᱨ ᱴᱟᱰᱟ ᱛᱮ
ᱫᱟᱫᱟᱧ ᱜᱚᱜᱮ ᱯᱮ ᱥᱩᱛᱟᱹᱢ ᱯᱟᱨᱠᱚᱢ ᱛᱮ
ᱫᱟᱫᱟᱧ ᱜᱚᱜᱮ ᱯᱮ ᱥᱩᱛᱟᱹᱢ ᱯᱟᱨᱠᱚᱢ ᱛᱮ ᱾
ᱥᱟᱹᱞ ᱫᱚ ᱫᱚᱦᱚᱭᱮᱯᱮ ᱛᱟᱞᱟ ᱠᱩᱞᱦᱤ ᱨᱮ
ᱫᱟᱫᱟᱧ ᱫᱚᱦᱚᱭᱮᱯᱮ ᱛᱟᱞᱟ ᱨᱟᱪᱟᱨᱮ
ᱫᱟᱫᱟᱧ ᱫᱚᱦᱚᱭᱮᱯᱮ ᱛᱟᱞᱟ ᱨᱟᱪᱟᱨᱮ ᱾
ᱥᱟᱹᱞ ᱫᱚ ᱜᱮᱫᱮ ᱯᱮ ᱥᱟᱦᱟᱨ ᱥᱟᱠᱟᱢ ᱨᱮ
ᱫᱟᱫᱟᱧ ᱫᱚᱦᱚᱱ ᱮᱯᱮ ᱪᱚᱱᱫᱚᱱ ᱥᱟᱨᱟ ᱨᱮ
ᱫᱟᱫᱟᱧ ᱫᱚᱦᱚᱱ ᱮᱯᱮ ᱪᱚᱱᱫᱚᱱ ᱥᱟᱨᱟ ᱨᱮ ᱾
ᱥᱟᱹᱞ ᱫᱚ ᱜᱮᱫᱮ ᱯᱮ ᱫᱩᱨᱩᱢᱮ ᱫᱩᱨᱩᱢ
ᱫᱟᱫᱟᱧ ᱥᱮᱜᱮᱞ ᱟᱭ ᱯᱮ ᱦᱩᱨᱩᱢᱮ ᱦᱩᱨᱩᱢ
ᱫᱟᱫᱟᱧ ᱥᱮᱜᱮᱞ ᱟᱭ ᱯᱮ ᱦᱩᱨᱩᱢᱮ ᱦᱩᱨᱩᱢ ᱾
***
