ᱦᱚᱯᱚᱱ ᱢᱟᱹᱭ ᱥᱮᱛᱟᱜ ᱥᱮᱛᱟᱜ
ᱵᱮᱨᱮᱫ ᱠᱟᱛᱮ ᱠᱟᱹᱢᱤᱭ ᱪᱷᱩᱴᱟᱹᱜ ᱞᱟᱦᱟ,
ᱫᱩᱣᱟᱹᱨᱨᱮ ᱫᱟᱜ ᱢᱳᱰᱳᱞᱤ
ᱵᱟᱹᱴᱤ ᱞᱚᱴᱟ ᱜᱷᱟᱥᱟᱣ ᱜᱤᱛᱤᱞ
ᱜᱮᱡ ᱜᱩᱨᱤᱡ ᱪᱚᱸᱫᱟ ᱵᱟᱥᱟᱝ
ᱪᱷᱚᱸᱪ ᱯᱚᱛᱚᱣ ᱛᱮᱠᱮ ᱥᱚᱵᱚᱫ
ᱞᱮᱜ ᱱᱮᱢᱟᱪᱟᱨ ᱫᱷᱚᱨᱚᱢ ᱠᱚᱨᱚᱢ
ᱥᱟᱶᱛᱟ ᱱᱤᱨᱚᱲ ᱠᱟᱹᱨᱫᱷᱟᱹᱱᱤ᱾
ᱞᱟᱦᱟ ᱢᱮᱱᱟᱜ ᱥᱚᱥᱚᱱᱚᱜ ᱥᱟᱶᱛᱟ
ᱡᱟᱦᱟᱸ ᱥᱟᱶᱛᱟᱨᱮ ᱵᱟᱹᱵᱩ ᱫᱚ ᱥᱮᱵᱟᱭ ᱥᱟᱹᱲᱤᱢ᱿
ᱦᱚᱯᱚᱱ ᱢᱟᱹᱭ ᱯᱩᱛᱞᱤ ᱵᱟᱸᱫᱮ
ᱫᱤᱱᱟᱹᱢ ᱛᱮᱦᱮᱧ ᱫᱚ ᱵᱟᱝ ᱜᱟᱯᱟ
ᱯᱮᱲᱟ ᱧᱩᱛᱩᱢ ᱞᱚᱴᱟ ᱫᱟᱜ ᱞᱮᱛᱟᱲ,
ᱵᱟᱝ ᱱᱮᱰᱟ ᱞᱮᱱᱟ ᱥᱟᱹᱜᱩᱱ ᱢᱟᱦᱟ
ᱟᱛᱳ ᱫᱤᱥᱚᱢ ᱯᱮᱲᱟ ᱯᱟᱹᱦᱲᱟᱹ ᱢᱚᱪᱟ
ᱠᱷᱟᱯᱟᱭ ᱠᱷᱚᱯᱚᱭ ᱨᱚᱲ ᱢᱟᱜᱟᱞ᱾
ᱞᱟᱦᱟ ᱢᱮᱱᱟᱜ ᱥᱚᱥᱚᱱᱚᱜ ᱥᱟᱶᱛᱟ
ᱡᱟᱦᱟᱸ ᱥᱟᱶᱛᱟᱨᱮ ᱵᱟᱹᱵᱩ ᱫᱚ ᱫᱷᱚᱨᱚᱢ ᱰᱟᱺᱜᱩᱣᱟᱹ᱿
ᱦᱚᱯᱚᱱ ᱢᱟᱹᱭ ᱡᱟᱸᱣᱟᱭ ᱚᱲᱟᱜ
ᱥᱚᱱᱮᱨ ᱜᱷᱟᱨᱚᱧᱡ ᱵᱤᱛᱟᱹᱣ ᱵᱤᱫᱟᱹᱞ
ᱠᱚᱞᱮ ᱵᱟᱞᱮ ᱵᱟᱝᱛᱮ,
ᱟᱛᱳ ᱦᱚᱲᱟᱜ ᱠᱚᱭᱚᱜ ᱢᱮᱫᱨᱮ ᱵᱮᱥᱟᱹᱜᱩᱱ
ᱠᱟᱹᱭᱡᱷᱟᱹ ᱠᱟᱹᱯᱷᱟᱹᱨᱤ ᱱᱟᱦᱟᱪᱟᱨ ᱞᱤᱛᱟᱹᱲ
ᱥᱟᱶᱛᱟ ᱨᱮ ᱱᱤᱨᱤᱜᱷᱤᱱ ᱠᱚ ᱢᱚᱱᱮᱭᱮ᱾
ᱞᱟᱦᱟ ᱢᱮᱱᱟᱜ ᱥᱚᱥᱚᱱᱚᱜ ᱥᱟᱶᱛᱟ
ᱡᱟᱦᱟᱸ ᱥᱟᱶᱛᱟᱨᱮ ᱵᱟᱹᱵᱩ ᱫᱚ ᱫᱚᱲᱦᱟᱭ ᱵᱟᱯᱞᱟᱜ᱿
ᱵᱟᱦᱟ ᱥᱚᱦᱚᱨᱟᱭ ᱵᱚᱸᱜᱟ ᱵᱩᱨᱩ
ᱛᱩᱯᱩ ᱯᱷᱟᱨᱪᱟ ᱱᱮᱭᱚᱱ ᱫᱷᱚᱨᱚᱢ
ᱛᱮᱜᱮ ᱥᱚᱵᱚᱫ, ᱜᱮᱡ ᱜᱩᱨᱤᱡ
ᱨᱟᱹᱱᱩ ᱪᱟᱯᱟᱫ ᱦᱟᱺᱰᱤ ᱫᱚᱦᱚ
ᱵᱚᱸᱜᱟ ᱯᱷᱩᱲᱩᱜ ᱯᱟᱛᱲᱟ ᱯᱟᱹᱴᱤ,
ᱵᱚᱸᱜᱟ ᱥᱟᱯᱟᱵ ᱥᱟᱡᱟᱣᱨᱮᱭ ᱵᱟᱹᱭ ᱠᱚᱜ᱾
ᱞᱟᱦᱟ ᱢᱮᱱᱟᱜ ᱥᱚᱥᱚᱱᱚᱜ ᱥᱟᱶᱛᱟ
ᱡᱟᱸᱦᱟ ᱥᱟᱶᱛᱟᱨᱮ ᱵᱟᱹᱵᱩᱜᱮᱭ ᱡᱚᱢ ᱵᱚᱦᱚᱜ ᱥᱚᱬᱮ᱿
***
