ᱮᱴᱟᱜ ᱦᱚᱲᱟᱜ ᱦᱤᱥᱟᱹ ᱥᱩᱭᱟᱹ ᱫᱚᱥ ᱵᱟᱝ ᱯᱟᱸᱡᱟ ᱠᱟᱛᱮᱱ ᱟᱯᱱᱟᱨᱟᱜ ᱦᱚᱥ ᱥᱟᱞᱟᱜ ᱛᱮ ᱡᱚᱥ ᱯᱟᱸᱡᱟ ᱨᱮ ᱪᱷᱩᱴᱟᱹᱣ ᱞᱮᱱ ᱠᱷᱟᱱ ᱚᱠᱛᱚ ᱡᱟᱹᱱᱤ ᱟᱥᱟ ᱫᱚ ᱡᱚ ᱵᱤᱞᱤᱜ ᱜᱮᱭᱟ ᱾ ᱢᱮᱱᱠᱷᱟᱱ ᱡᱩᱢᱤᱫᱽ ᱫᱟᱲᱮ ᱜᱮ ᱥᱟᱶᱛᱟ ᱨᱮᱭᱟᱜ ᱢᱟᱨᱟᱝ ᱫᱟᱲᱮ ᱾ ᱥᱟᱶ ᱥᱟᱶ ᱛᱟᱦᱮᱱ ᱜᱮ ᱥᱟᱶᱛᱟ ᱵᱚ ᱢᱮᱛᱟᱜ ᱠᱟᱱᱟ ᱾ ᱥᱟᱶᱛᱟ ᱵᱮᱜᱚᱨ ᱥᱚᱢᱟᱡᱽ ᱛᱟᱞᱟ ᱨᱮ ᱵᱟᱧᱟᱣ ᱫᱚ ᱟᱹᱰᱤ ᱮᱴᱠᱮᱴᱚᱬᱮ ᱜᱮᱭᱟ ᱾ᱢᱮᱱᱠᱷᱟᱱ ᱡᱩᱢᱤᱫᱽ ᱨᱟᱹᱯᱩᱫ ᱫᱚ ᱟᱞᱜᱟ ᱜᱮᱭᱟ, ᱛᱚᱵᱮ ᱟᱜᱟᱢ ᱫᱤᱱ ᱨᱮᱫᱚ ᱡᱩᱢᱤᱫᱽ ᱵᱮᱜᱚᱨ ᱧᱩᱛᱟᱹᱛ ᱜᱮᱭᱟ ᱱᱚᱶᱟ ᱥᱟᱱᱛᱟᱲ ᱥᱟᱶᱛᱟ ᱟᱨ ᱵᱟᱝ ᱥᱟᱱᱟᱢ ᱠᱷᱮᱨᱣᱟᱲ ᱵᱚᱝᱥᱚ ᱠᱚ ᱾ ᱜᱚᱴ ᱠᱷᱚᱱ ᱵᱷᱮᱜᱟᱨ ᱠᱟᱛᱮᱱ ᱮᱴᱟᱜ ᱜᱚᱴ ᱨᱮ ᱩᱪᱟᱹᱲᱚᱜ ᱫᱚ ᱡᱩᱢᱤᱫᱽ ᱥᱟᱱᱛᱟᱲ ᱥᱟᱶᱛᱟ ᱨᱮᱭᱟᱜ ᱟᱹᱰᱤ ᱢᱟᱨᱟᱝ ᱦᱟᱹᱱ ᱠᱟᱱᱟ ᱾ ᱟᱵᱚᱨᱤᱱ ᱦᱟᱯᱟᱲᱟᱢ ᱠᱚᱣᱟᱜ ᱞᱟᱹᱭ ᱞᱮᱠᱟᱛᱮ ᱥᱮᱫᱟᱭ ᱠᱷᱚᱱ ᱵᱟᱰᱟᱭ ᱜᱮᱭᱟ ᱵᱚᱱ ᱫᱤᱠᱩ ᱯᱮᱲᱟ ᱡᱟᱹᱱᱩᱢ ᱡᱷᱟᱹᱱᱴᱤ ᱾ ᱡᱟᱹᱱᱩᱢ ᱨᱮ ᱵᱟᱡᱟᱣ ᱞᱮᱱ ᱠᱷᱟᱱ ᱫᱚ ᱯᱟᱹᱜᱽᱴᱤ ᱜᱮᱭᱟ ᱟᱨ ᱡᱚᱜᱽᱠᱷᱚᱢ ᱜᱮᱭᱟ᱾ᱚᱱᱠᱟ ᱜᱮ ᱫᱤᱠᱩᱣᱟᱜ ᱠᱟᱛᱷᱟ ᱛᱮ ᱥᱮᱱ ᱞᱮᱱ ᱠᱷᱟᱱ ᱮᱜᱼᱲᱮ ᱜᱮᱭᱟ᱾ᱚᱱᱟ ᱪᱮᱠᱟ ᱟᱯᱱᱟᱨᱟᱜ ᱜᱟᱹᱦᱤᱨ ᱩᱭᱦᱟᱹᱨ ᱵᱤᱪᱟᱹᱨ ᱟᱹᱪᱩᱨ ᱠᱟᱛᱮᱱ ᱴᱷᱤᱠ ᱟᱨ ᱵᱷᱩᱞ ᱥᱟᱞᱟ ᱜᱚᱴᱟ ᱠᱟᱛᱮᱱ ᱥᱟᱹᱨᱤᱭᱟᱜ ᱟᱯᱱᱟᱨ ᱞᱟᱹᱠᱛᱤ ᱠᱟᱱᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮ ᱥᱚᱲᱚ ᱵᱚᱞᱚᱱ ᱠᱟᱱ ᱵᱮᱵᱟᱹᱲᱤᱡ ᱚᱨᱥᱚᱝ ᱟᱨ ᱵᱟᱹᱲᱤᱡᱟᱜ ᱠᱚ ᱥᱩᱫᱷᱟᱹᱨ ᱞᱟᱹᱜᱤᱫ ᱛᱮᱠᱷᱟᱱ ᱟᱯᱱᱟᱨᱟᱜ ᱯᱟᱹᱨᱥᱤ ᱛᱮ ᱚᱞ ᱨᱚᱲ ᱫᱷᱚᱨᱚᱢ ᱪᱮᱛᱟᱱ ᱨᱮ ᱜᱮᱭᱟᱱ ᱟᱨᱡᱟᱣ ᱟᱨ ᱥᱮᱪᱮᱫ ᱦᱟᱛᱟᱣ ᱫᱚ ᱟᱹᱰᱤ ᱜᱮ ᱞᱟᱹᱠᱛᱤ ᱠᱟᱱᱟ ᱾ ᱮᱴᱟᱜ ᱯᱟᱹᱨᱥᱤ ᱥᱩᱢᱩᱝ ᱛᱮ ᱥᱮᱪᱮᱫ ᱠᱚᱜᱽ ᱠᱷᱟᱱ ᱫᱤᱠᱩ ᱠᱩᱢᱵᱽᱲᱩ ᱠᱚᱣᱟᱜ ᱡᱟᱞᱟᱢ ᱨᱮ ᱡᱷᱟᱹᱞᱤ ᱠᱟᱛᱮᱱ ᱫᱷᱚᱨᱚᱢ ᱫᱷᱟᱸᱫᱟ ᱛᱮ ᱟᱸᱫᱷᱟ ᱠᱟᱛᱮᱱ ᱡᱟᱭᱡᱩᱜᱽ ᱢᱚᱱᱮ ᱫᱚ ᱜᱩᱞᱟᱢ ᱪᱟᱠᱚᱨ ᱩᱛᱟᱹᱨᱚᱜᱼᱟ ᱾ ᱫᱟᱹᱭᱠᱟᱹ ᱞᱮᱠᱟᱛᱮ ᱮᱢ ᱜᱟᱱᱚᱜᱼᱟ, ᱢᱤᱫᱴᱟᱝ ᱡᱩᱫᱤ ᱦᱟᱥᱟ ᱛᱮ ᱵᱮᱱᱟᱶ ᱤᱡ ᱜᱩᱰᱩ ᱯᱩᱥᱤ ᱠᱮᱢ ᱮᱢᱟᱭᱟ, ᱮᱱᱠᱷᱟᱱ ᱯᱩᱥᱤ ᱫᱚ ᱵᱟᱭ ᱡᱚᱡᱚᱢᱟ ᱪᱮ ᱵᱟᱭ ᱮᱲᱮᱜᱼᱟ ᱾ ᱤᱠᱷᱟᱹᱱ ᱫᱤᱠᱩ ᱫᱚ ᱦᱟᱥᱟ ᱛᱮ ᱵᱮᱱᱟᱶ ᱴᱷᱮᱥᱟ ᱢᱩᱨᱛᱤ ᱠᱟᱜᱚᱡ ᱛᱮ ᱵᱮᱱᱟᱶ ᱪᱷᱟᱯᱟ ᱯᱷᱚᱴᱚ ᱟᱨ ᱥᱟᱹᱜᱤᱧ ᱧᱮᱱᱮᱞᱚᱢ ᱥᱤᱨᱤᱭᱮᱞ (ᱥᱮᱨᱤᱟᱞ) ᱨᱮ ᱫᱤᱠᱩ ᱟᱹᱨᱤᱪᱟᱹᱞᱤ ᱠᱟᱹᱦᱱᱤ ᱛᱮ ᱵᱷᱮᱶᱱᱟ ᱠᱟᱛᱮᱱ ᱡᱟᱭᱡᱩᱜᱽ ᱢᱟᱹᱱᱥᱤᱠ ᱜᱩᱞᱟᱹᱢ ᱨᱮ ᱧᱩᱨ ᱦᱚᱪᱚ ᱠᱟᱛᱮᱱ ᱯᱩᱭᱥᱟᱹ ᱮᱲᱮ ᱵᱮᱯᱟᱨ ᱦᱚᱸ ᱪᱟᱹᱞᱩ ᱮᱫᱟᱭ ᱟᱨ ᱨᱟᱡᱽᱯᱟᱴ ᱞᱩᱴᱯᱟᱴ ᱠᱟᱛᱮᱱ ᱯᱚᱱᱚᱛ ᱫᱚᱨᱵᱟᱨ ᱫᱤᱥᱚᱢ ᱫᱚᱨᱵᱟᱨ ᱨᱮ ᱨᱟᱡᱟ ᱵᱮᱱᱟᱶ ᱠᱟᱛᱮᱱ ᱦᱚᱲ ᱠᱚᱦᱚᱸ ᱥᱟᱥᱚᱱ ᱮᱫ ᱠᱚᱣᱟᱭ ᱟᱨ ᱢᱟᱨᱟᱝ ᱫᱤᱠᱩ ᱡᱟᱹᱛᱤ ᱨᱮᱦᱚᱸ ᱞᱮᱠᱷᱟᱜ ᱠᱟᱱᱟᱭ ᱾ ᱫᱚᱲᱤᱛ ᱥᱚᱥᱤᱛ ᱨᱮᱸᱜᱮᱡ ᱚᱨᱮᱡ ᱵᱚᱧᱪᱤᱛ ᱟᱹᱫᱤᱵᱟᱥᱤ ᱠᱚ ᱪᱮᱛᱟᱱ ᱨᱮ ᱫᱤᱱ ᱜᱮ ᱟᱹᱰᱤ ᱨᱚᱠᱚᱢ ᱱᱟᱦᱟᱪᱟᱨ ᱦᱩᱭᱩᱜ ᱠᱟᱱᱟ ᱾
ᱡᱟᱹᱛᱤ ᱫᱷᱚᱨᱚᱢ ᱧᱩᱛᱩᱢ ᱛᱮ ᱦᱤᱥᱟᱹ ᱥᱩᱭᱟᱹ ᱦᱤᱨᱠᱷᱟᱹ ᱛᱟᱯᱟᱢ ᱜᱚᱯᱚᱡ ᱫᱤᱱ ᱜᱮ ᱪᱟᱹᱞᱩ ᱟᱹᱜᱩᱜ ᱠᱟᱱᱟ ᱾ ᱰᱟᱹᱱ ᱱᱟᱡᱚᱢ ᱡᱩᱜᱽᱱᱤ ᱫᱚᱥ ᱫᱚᱯᱚᱥ ᱠᱟᱛᱮᱱ ᱚᱡᱷᱟ ᱪᱮᱞᱟ ᱯᱟᱴ ᱪᱮᱞᱟ ᱠᱚᱣᱟᱜ ᱛᱤᱨᱞᱟᱹ ᱦᱚᱯᱚᱱ ᱠᱚ ᱪᱮᱛᱟᱱ ᱨᱮ ᱟᱹᱰᱤ ᱨᱚᱠᱚᱢ ᱱᱟᱦᱟᱪᱟᱨ ᱵᱮᱵᱟᱹᱲᱤᱡ ᱦᱩᱭᱩᱜ ᱠᱟᱱᱟ ᱾ ᱡᱟᱦᱟᱸ ᱡᱟᱭᱜᱟ ᱨᱮ ᱨᱮᱸᱜᱮᱡ ᱚᱨᱮᱡ, ᱠᱩᱯᱚᱥᱚᱬ ᱵᱷᱩᱠᱷᱢᱟᱨᱤ ᱥᱮᱪᱮᱫ ᱨᱮᱭᱟᱜ ᱚᱵᱷᱟᱵᱽ ᱚᱱᱟ ᱡᱟᱭᱜᱟ ᱠᱚᱨᱮᱜᱮ ᱟᱸᱫᱷᱟ ᱯᱟᱹᱛᱤᱭᱟᱣ ᱠᱩᱥᱚᱝᱥᱠᱟᱨ ᱨᱮᱭᱟᱜ ᱵᱟᱹᱲᱛᱤ ᱦᱚᱲ ᱪᱮᱛᱟᱱ ᱨᱮ ᱱᱟᱦᱟᱪᱟᱨᱚᱜ ᱠᱟᱱᱟ ᱾ ᱟᱸᱫᱷᱟᱯᱟᱹᱛᱤᱭᱟᱹᱣ ᱫᱚ ᱟᱹᱰᱤ ᱵᱚᱛᱚᱨ ᱟᱱ ᱜᱮᱭᱟ, ᱦᱚᱲ ᱟᱜ ᱢᱚᱱ ᱨᱮᱭᱟᱜ ᱩᱭᱦᱟᱹᱨ ᱵᱷᱟᱵᱽᱱᱟ ᱵᱤᱪᱟᱹᱨ ᱨᱮᱭᱟᱜ ᱫᱟᱲᱮ ᱴᱚᱞᱚ ᱢᱚᱞᱚ ᱠᱟᱛᱮᱱ ᱜᱟᱹᱱᱤ ᱥᱟᱹᱱᱤ ᱜᱚᱫ ᱠᱟᱜᱼᱟᱭ ᱾ ᱥᱮᱪᱮᱫ ᱜᱮ ᱟᱛᱨᱟ ᱨᱮ ᱠᱮᱪᱮᱫᱚᱜ ᱠᱟᱱᱟ ᱾ ᱢᱮᱱ ᱜᱟᱱᱚᱜᱼᱟ ᱥᱮᱪᱮᱫ ᱫᱚ ᱵᱚᱸᱜᱟ ᱫᱟᱲᱮ ᱠᱟᱱᱟ᱾ᱥᱟᱹᱨᱤ ᱥᱮᱪᱮᱫ ᱵᱮᱜᱚᱨ ᱥᱟᱶᱛᱟ ᱨᱮ ᱞᱟᱦᱟᱱᱛᱤ ᱫᱚ ᱚᱦᱚ ᱟᱱ ᱜᱮᱭᱟ ᱾ ᱛᱟᱲᱟᱢ ᱰᱟᱦᱟᱨ ᱨᱮᱭᱟᱜ ᱥᱮᱪᱮᱫ ᱛᱤᱥ ᱦᱚᱸ ᱟᱞᱚᱢ ᱠᱮᱪᱮᱫ᱾ᱡᱩᱢᱤᱫᱽ ᱨᱮᱭᱟᱜ ᱦᱩᱞ, ᱫᱟᱹᱲ ᱵᱟᱹᱜᱤ ᱫᱚ ᱟᱹᱰᱤ ᱢᱟᱨᱟᱝ ᱠᱟᱱᱟ ᱵᱷᱩᱞ ᱾ ᱦᱟᱺᱰᱤ ᱯᱟᱹᱨᱩᱣᱟᱹ ᱨᱮᱭᱟᱜ ᱱᱤᱥᱟᱹ ᱛᱮ ᱟᱫᱚᱜ ᱠᱟᱱᱟ ᱥᱩᱞᱩᱠ ᱥᱟᱹᱜᱟᱹᱭ ᱨᱮᱭᱟᱜ ᱫᱤᱥᱟᱹ, ᱟᱹᱱ (ᱟᱠᱴ) ᱵᱟᱝ ᱵᱟᱰᱟᱭ ᱠᱟᱛᱮᱱ ᱥᱟᱹᱨᱤᱭᱟᱜ (Fact) ᱵᱟᱝ ᱵᱩᱡᱷᱟᱹᱣ ᱠᱟᱛᱮᱱ ᱵᱤᱜᱽᱭᱟᱱ ᱥᱚᱢᱵᱤᱫᱷᱟᱱ ᱥᱟᱶᱛᱮ ᱟᱪᱟᱨ ᱵᱮᱵᱷᱟᱨ ᱥᱩᱞᱩᱠ ᱥᱟᱹᱜᱟᱹᱭ ᱠᱷᱟᱴᱚ ᱜᱮᱭᱟᱱ ᱨᱮᱭᱟᱜ ᱟᱱᱟᱴ ᱚᱨᱥᱚᱝ ᱛᱮ ᱢᱟᱹᱱᱢᱤ ᱢᱟᱹᱱᱢᱤ ᱠᱚ ᱛᱟᱞᱟ ᱨᱮ ᱦᱤᱨᱠᱷᱟᱹ ᱦᱤᱥᱟᱹ ᱥᱩᱭᱟᱹ ᱛᱮᱜᱮ ᱫᱤᱱ ᱫᱚ ᱠᱷᱮᱢᱟᱣᱜ ᱠᱟᱱᱟ᱾ᱪᱟᱸᱫᱚ ᱵᱚᱸᱜᱟ ᱦᱟᱜ ᱛᱷᱩᱢ ᱛᱮ ᱥᱤᱨᱤᱡᱽ ᱯᱨᱟᱠᱩᱛᱤᱠ ᱟᱜ ᱚᱨᱥᱚᱝ ᱛᱮ ᱡᱤᱵᱽ ᱡᱤᱭᱟᱹᱞᱤ ᱢᱟᱹᱱᱢᱤ ᱠᱚ ᱱᱚᱶᱟ ᱫᱷᱟᱹᱨᱛᱤ ᱨᱮ ᱵᱚ ᱡᱟᱱᱟᱢ ᱟᱠᱟᱱᱟ ᱾ ᱟᱵᱚ ᱦᱚᱸᱵᱚ ᱦᱚᱲ ᱠᱟᱱᱟ, ᱟᱵᱚᱣᱟᱜ ᱛᱮᱵᱚ ᱨᱚᱲ ᱠᱟᱱᱟ, ᱱᱚᱶᱟ ᱫᱷᱟᱹᱨᱛᱤ ᱨᱮ ᱡᱚᱛᱚ ᱦᱚᱲ ᱥᱟᱞᱟᱜ ᱢᱟᱹᱱ ᱥᱚᱢᱢᱟᱱ ᱛᱮ ᱵᱟᱧᱪᱟᱣᱜ ᱨᱮᱭᱟᱜ ᱦᱚᱠ ᱟᱹᱭᱫᱟᱹᱨᱤ ᱢᱮᱱᱟᱜ ᱟᱠᱟᱱᱟ᱾ ᱥᱤᱧᱚᱛ ᱫᱤᱥᱚᱢ ᱨᱮᱭᱟᱜ ᱟᱹᱱᱟᱹᱨᱤ ᱨᱮ ᱥᱟᱱᱟᱢ ᱠᱩᱲᱤ ᱠᱚᱲᱟ ᱠᱚᱣᱟᱜ ᱢᱮᱱᱟᱜ ᱥᱚᱢᱟᱱ ᱦᱚᱠ ᱟᱹᱭᱫᱟᱹᱨᱤ᱾ᱥᱤᱧᱚᱛ ᱫᱤᱥᱚᱢ ᱟᱹᱱᱟᱹᱨᱤ ᱨᱮᱭᱟᱜ ᱟᱨᱴᱤᱠᱤᱞ ᱑᱕ (Articleᱼ᱑᱕) ᱞᱮᱠᱟᱛᱮ ᱡᱟᱹᱛᱤ ᱫᱷᱚᱨᱚᱢ ,ᱡᱟᱱᱟᱝ, ᱯᱟᱹᱨᱥᱤ ᱟᱲᱟᱝ, ᱡᱚᱱᱚᱢ ᱡᱟᱭᱜᱟ ᱪᱮᱛᱟᱱ ᱨᱮ ᱚᱠᱚᱭ ᱠᱮ ᱦᱚᱸ ᱦᱤᱨᱠᱟᱹ ᱵᱟᱝ ᱨᱮᱭᱟᱜ ᱚᱞ ᱛᱚᱞ ᱫᱚᱦᱚ ᱟᱠᱟᱱᱟ ᱾ ᱵᱟᱡᱟᱨ ᱨᱮ ᱦᱩᱭ ᱮᱱ ᱪᱮ ᱱᱟᱜᱟᱨ ᱨᱮ ᱦᱩᱭ ᱮᱱ, ᱟᱹᱛᱩ ᱨᱮ ᱦᱩᱭ ᱮᱱ ᱪᱮ ᱫᱤᱥᱚᱢ ᱨᱮ ᱦᱩᱭ ᱮᱱ, ᱰᱟᱠᱛᱚᱨ ᱠᱷᱟᱱᱟ ᱨᱮ ᱦᱩᱭ ᱮᱱ ᱪᱮ ᱛᱷᱟᱱᱟ ᱨᱮ ᱦᱩᱭ ᱮᱱ, ᱯᱟᱨᱞᱤᱭᱟᱢᱮᱱᱴ ᱨᱮ ᱦᱩᱭ ᱮᱱ ᱪᱮ ᱟᱯᱱᱟᱨᱟᱜ ᱟᱯᱟᱨᱴᱢᱮᱱᱴ ᱚᱲᱟᱜ ᱨᱮ ᱦᱩᱭ ᱮᱱ, ᱨᱮᱞ ᱜᱟᱹᱰᱤ ᱪᱮᱛᱟᱱ ᱨᱮ ᱦᱩᱭ ᱪᱮ ᱩᱰᱟᱹᱱ ᱜᱟᱹᱰᱤ ᱪᱮᱛᱟᱱ ᱨᱮ ᱦᱩᱭ ᱮᱱ, ᱥᱤᱱᱮᱢᱟ ᱦᱚᱞ ᱨᱮ ᱦᱩᱭ ᱮᱱ ᱪᱮ ᱠᱚᱢᱩᱱᱤᱴᱤ ᱦᱚᱞ ᱨᱮ ᱦᱩᱭ ᱮᱱ, ᱠᱚᱨᱴ ᱨᱮ ᱦᱩᱭ ᱮᱱ ᱪᱮ ᱮᱭᱟᱨᱯᱚᱴ ᱨᱮ ᱦᱩᱭ ᱮᱱ ᱜᱚᱴᱟᱯᱟᱲᱟ ᱨᱮ ᱟᱯᱱᱟᱨᱟᱜ ᱯᱟᱹᱨᱥᱤ ᱟᱲᱟᱝ ᱛᱮ ᱨᱚᱲ ᱞᱟᱸᱫᱟ ᱥᱟᱶᱛᱮ ᱢᱟᱱ ᱥᱚᱢᱢᱟᱱ ᱛᱮ ᱡᱤᱵᱚᱱ ᱠᱷᱟᱸᱰᱟᱣ ᱨᱮᱭᱟᱜ ᱦᱚᱠ ᱟᱹᱭᱫᱟᱹᱨᱤ ᱢᱮᱱᱟᱜᱼᱟ ᱾
ᱢᱟᱹᱱᱢᱤ ᱠᱚ ᱛᱟᱞᱟ ᱨᱮ ᱢᱚᱨᱚᱱᱚᱜ ᱠᱟᱱᱟ ᱞᱮᱛᱟᱲ ᱜᱮ ᱱᱚᱶᱟ ᱞᱤᱪᱟᱹᱲ ᱢᱚᱱᱮ, ᱡᱚᱞᱚᱱᱚᱜ ᱠᱟᱱᱟ ᱞᱮᱛᱟᱲ ᱜᱮ ᱱᱚᱶᱟ ᱡᱤᱭᱟᱹᱲ ᱡᱤᱭᱤ ᱾ ᱠᱟᱛᱷᱟ ᱜᱮ ᱵᱟᱝ ᱯᱚᱴᱟᱣᱜ ᱠᱟᱱᱛᱮ ᱛᱚᱯᱟᱜᱚᱜ ᱠᱟᱱᱟ ᱦᱮᱥᱮᱡ ᱥᱮᱠᱮᱡ ᱫᱩᱞᱟᱹᱲ ᱫᱩᱯᱩᱞᱟᱹᱲ ᱥᱩᱞᱩᱠ ᱥᱟᱹᱜᱟᱹᱭ ᱾ ᱚᱠᱚᱭᱮᱢ ᱢᱮᱛᱟᱭ, ᱚᱠᱚᱭ ᱮᱢ ᱫᱚᱥᱮᱭᱟ, ᱚᱠᱚᱭᱮᱢ ᱞᱟᱹᱭ ᱟᱭᱟ, ᱚᱠᱚᱭ ᱠᱮᱢ ᱵᱩᱡᱷᱟᱹᱣ ᱟᱭᱟ ᱢᱟᱹᱱᱢᱤ ᱢᱟᱹᱱᱢᱤ ᱛᱟᱞᱟ ᱨᱮ ᱪᱮᱫᱟᱜ ᱱᱩᱱᱟᱹᱜ ᱫᱟᱹᱱᱢᱤ ᱾ ᱥᱟᱹᱜᱩᱱ ᱮᱢ ᱛᱟᱺᱜᱤᱭᱟ ᱚᱠᱟ ᱚᱠᱛᱚ ᱨᱮ, ᱥᱩᱞᱩᱠ ᱮᱢ ᱯᱟᱱᱛᱮᱭᱟ ᱚᱠᱟ ᱢᱩᱞᱩᱠ ᱨᱮ, ᱵᱚᱦᱚᱜ ᱢᱟ ᱞᱚᱦᱚᱫᱚᱜ ᱥᱤᱥᱤᱨ ᱫᱟᱜ ᱡᱟᱹᱲᱤ ᱛᱮ ᱟᱥᱟ ᱢᱟ ᱟᱛᱟᱨᱚᱜ ᱵᱟᱹᱭᱨᱤ ᱥᱮᱸᱜᱮᱞ ᱛᱮ, ᱱᱚᱶᱟ ᱡᱤᱵᱚᱱ ᱡᱤᱭᱤ ᱦᱚᱸ ᱡᱟᱯᱟᱜ ᱡᱮᱨᱮᱫ ᱚᱱᱟ ᱛᱮ ᱜᱚᱴᱟ ᱠᱩᱰᱟᱹᱢ ᱥᱟᱛᱮ ᱨᱮ ᱟᱨ ᱵᱟᱝ ᱜᱚᱴᱟ ᱵᱟᱡᱟᱨ ᱱᱟᱜᱟᱨ ᱨᱮ ᱾
ᱱᱚᱶᱟ ᱫᱷᱟᱹᱨᱛᱤ ᱡᱤᱭᱟᱹᱲ ᱛᱟᱦᱮᱱ ᱞᱟᱹᱜᱤᱫ ᱡᱤᱵᱽ ᱡᱤᱭᱟᱹᱞᱤ ᱥᱩᱠᱷ ᱥᱟᱶᱟᱨ ᱛᱮ ᱵᱟᱧᱟᱣ ᱛᱟᱦᱮᱱ ᱞᱟᱹᱜᱤᱫ ᱡᱚᱛᱚ ᱫᱤᱱ ᱥᱤᱨᱤᱡ ᱯᱨᱟᱠᱩᱛᱤᱠ ᱤᱧ ᱥᱮᱵᱟ ᱫᱮᱵᱟᱭᱟ, ᱡᱚᱛᱚ ᱦᱚᱲ ᱥᱟᱶ ᱱᱟᱶᱟ ᱥᱟᱠᱟᱢ ᱥᱟᱜᱮᱱ ᱰᱩᱜᱤ ᱞᱮᱠᱟ ᱥᱟᱹᱜᱟᱹᱭ ᱥᱟᱹᱜᱩᱱ ᱠᱚᱜ ᱢᱟ, ᱡᱤᱭᱟᱹᱲ ᱡᱷᱟᱨᱱᱟ ᱫᱟᱜ ᱞᱮᱠᱟ ᱥᱩᱞᱩᱠ ᱥᱟᱨᱥᱟᱣ ᱠᱚᱜ ᱢᱟ, ᱥᱟᱱ ᱵᱟᱸᱫᱚ ᱱᱟᱹᱬᱤ ᱞᱮᱠᱟ ᱡᱚᱛᱚ ᱦᱚᱲ ᱥᱟᱶ ᱢᱚᱱᱮ ᱛᱚᱯᱚᱞ ᱠᱚᱜ ᱢᱟ ᱾
ᱢᱤᱢᱤᱫ ᱫᱷᱟᱣ ᱚᱱᱠᱟ ᱜᱮ ᱦᱤᱥᱤᱫ ᱦᱚᱭ ᱛᱮ ᱦᱚᱨᱟᱥᱤ ᱵᱟᱹᱲᱤᱡᱟᱭ, ᱵᱟᱹᱭᱥᱟᱹᱠᱷ ᱵᱟᱹᱨᱰᱩ ᱛᱮ ᱚᱲᱟᱜ ᱮ ᱨᱟᱹᱯᱩᱫᱟ, ᱛᱚᱵᱮ ᱩᱭᱦᱟᱹᱨ ᱛᱟᱞᱟ ᱨᱮ ᱥᱟᱡᱟᱣ ᱜᱟᱱ ᱞᱮᱠᱷᱟᱱ, ᱩᱭᱦᱟᱹᱨ ᱥᱟᱶᱛᱮ ᱠᱟᱹᱢᱤ ᱠᱚ ᱜᱟᱱ ᱞᱮᱠᱷᱟᱱ, ᱱᱤᱡᱚᱨ ᱢᱚᱱᱮ ᱠᱟᱛᱷᱟ ᱱᱤᱡᱮ ᱛᱮ ᱟᱹᱭᱠᱟᱹᱣ ᱞᱮᱠᱷᱟᱱ, ᱮᱴᱟᱜ ᱦᱚᱲᱟᱜ ᱢᱚᱱᱮ ᱠᱟᱛᱷᱟ ᱵᱩᱡᱷᱟᱹᱣ ᱞᱮᱠᱷᱟᱱ, ᱦᱤᱥᱟᱹ ᱥᱩᱭᱟᱹ ᱠᱷᱟᱹᱯᱟᱨᱤᱭᱟᱹ ᱠᱚ ᱢᱚᱱᱮ ᱠᱷᱚᱱ ᱥᱟᱦᱟ ᱜᱤᱰᱤ ᱞᱮᱠᱷᱟᱱ , ᱰᱟᱹᱱ ᱱᱟᱡᱚᱢ ᱵᱷᱩᱛ ᱪᱩᱲᱤᱱ ᱡᱩᱜᱽᱱᱤ ᱞᱮᱠᱟᱱ ᱟᱸᱫᱷᱟ ᱯᱟᱹᱛᱤᱭᱟᱹᱣ ᱠᱚ ᱢᱚᱱᱮ ᱠᱷᱚᱱ ᱥᱟᱦᱟ ᱞᱮᱠᱷᱟᱱ, ᱥᱟᱬᱮᱥ ᱜᱮᱭᱟᱱ ᱵᱤᱜᱽᱭᱟᱱ, ᱥᱚᱢᱵᱤᱫᱷᱟᱱ, ᱠᱷᱚᱸᱫᱽᱨᱚᱸᱫᱽ, ᱯᱟᱱᱛᱮ ᱛᱚᱞᱟᱥ ᱠᱟᱛᱮᱱ ᱵᱩᱫᱽ ᱜᱮᱭᱟᱱ ᱠᱚ ᱟᱨᱡᱟᱣ ᱞᱮᱠᱷᱟᱱ, ᱵᱩᱜᱤᱭᱟᱜ ᱠᱚ ᱟᱯᱱᱟᱨ ᱠᱟᱛᱮᱱ , ᱵᱟᱹᱲᱤᱡᱟᱜ ᱠᱚ ᱥᱟᱦᱟ ᱜᱤᱰᱤ ᱞᱮᱠᱷᱟᱱ ᱥᱩᱞᱩᱠ ᱥᱟᱹᱜᱟᱹᱭ ᱥᱩᱞᱩᱠ ᱥᱚᱝᱥᱟᱨ ᱥᱟᱶᱛᱟ ᱥᱚᱢᱟᱡᱽ ᱛᱟᱞᱟ ᱨᱮ ᱥᱟᱢᱴᱟᱣ ᱨᱩᱣᱟᱹᱲᱚᱜᱼᱟ ᱟᱨ ᱦᱮᱥᱮᱡ ᱥᱮᱠᱮᱡ ᱨᱟᱹᱥᱠᱟᱹ ᱨᱚᱢᱚᱡᱽ ᱨᱤᱞᱟᱹᱢᱟᱞᱟ ᱡᱤᱭᱟᱹᱲ ᱜᱮ ᱛᱟᱦᱮᱸᱱᱟ ᱡᱟᱭᱡᱩᱜᱽ ᱾
