ᱡᱟᱦᱟᱸ ᱨᱮᱜᱮᱢ ᱡᱟᱱᱟᱢᱚᱜᱼᱟ
ᱚᱸᱰᱮ ᱜᱮ ᱟᱢᱟᱜ ᱡᱟᱱᱟᱢ ᱚᱲᱟᱜ
ᱫᱟᱨᱮ ᱵᱩᱴᱟᱹ ᱟᱥᱨᱟ ᱩᱢᱩᱞ
ᱚᱱᱟ ᱦᱚᱸ ᱟᱢᱟᱜ ᱡᱟᱱᱟᱢ ᱚᱲᱟᱜ ᱾
ᱟᱵᱚ ᱢᱟᱹᱱᱢᱤ ᱠᱚ ᱢᱟᱹᱫᱽ ᱨᱮᱫᱚ
ᱨᱮᱸᱜᱮᱡ ᱠᱤᱥᱟᱹᱬ ᱢᱮᱱᱟᱜ ᱜᱮᱭᱟ
ᱡᱤᱣᱤ ᱵᱟᱵᱚ ᱵᱤᱪᱷᱚᱠ
ᱪᱮᱫᱟᱜ ᱟᱵᱚ ᱚᱱᱟ ᱧᱮᱞᱛᱮ ᱾
ᱦᱚᱲᱟᱜ ᱚᱲᱟᱜ ᱫᱩᱣᱟᱹᱨ ᱧᱮᱞ ᱛᱮ
ᱵᱟᱢ ᱢᱮᱱ ᱠᱮ ᱤᱧᱟᱜ ᱚᱲᱟᱜ
ᱦᱚᱲᱟᱜ ᱚᱛ ᱦᱟᱥᱟ ᱧᱮᱞ ᱛᱮ
ᱵᱟᱭ ᱟᱯᱱᱟᱨᱚᱜ ᱛᱤᱥ ᱦᱚᱸ ᱢᱚᱱᱮ ᱨᱮ ᱾
ᱠᱤᱥᱟᱹᱬ ᱚᱲᱟᱜ ᱨᱮ ᱡᱟᱱᱟᱢᱚᱜ ᱫᱚ
ᱟᱹᱰᱤ ᱠᱚᱨᱚᱢ ᱠᱚᱯᱟᱲ ᱡᱟᱹᱱᱤᱡ
ᱨᱮᱸᱜᱮᱡ ᱦᱚᱲ ᱦᱚᱸ ᱟᱹᱥᱩᱞ ᱛᱚᱨᱟ ᱠᱚᱢ
ᱟᱢᱟᱜ ᱰᱤᱞᱤ ᱦᱳᱲᱳ ᱛᱮ ᱾
ᱨᱮᱸᱜᱮᱡ ᱚᱲᱟᱜ ᱨᱮ ᱡᱟᱱᱟᱢᱚᱜ ᱫᱚ
ᱠᱟᱹᱭ ᱫᱚ ᱵᱟᱝ ᱠᱟᱱᱟ
ᱟᱭᱳ ᱵᱟᱵᱟ ᱮᱜᱮᱨ ᱨᱩᱦᱤᱫ
ᱩᱪᱤᱛ ᱫᱚ ᱵᱟᱝ ᱠᱟᱱᱟ ᱾
ᱠᱷᱟᱴᱟᱣᱜ ᱟᱵᱚ ᱠᱩᱨᱩᱢᱩᱴᱩ
ᱟᱨᱡᱟᱣ ᱟᱵᱚᱱ ᱫᱷᱚᱱ
ᱛᱚᱵᱮ ᱮᱱᱟᱝ ᱵᱚᱱ ᱡᱚᱢᱟ
ᱥᱟᱹᱨᱤ ᱜᱮ ᱛᱷᱟᱹᱨᱤ ᱫᱟᱠᱟ ᱾
ᱞᱟᱡ ᱯᱮᱨᱮᱡ ᱡᱚᱢ ᱠᱟᱛᱮ
ᱵᱟᱝ ᱵᱚᱱ ᱛᱟᱦᱮᱸᱱ ᱛᱷᱤᱨ
ᱟᱵᱚ ᱞᱟᱲᱟᱣᱟᱠᱟ ᱜᱮ ᱛᱟᱦᱮᱸᱱ
ᱦᱚᱲᱢᱚ ᱡᱤᱵᱚᱱ ᱛᱟᱦᱮᱸᱱ ᱵᱷᱩᱨ ᱾
ᱥᱤᱧ ᱵᱮᱲᱟ ᱫᱚ ᱵᱟᱢ ᱩᱭᱦᱟᱹᱨ
ᱚᱲᱟᱜ ᱫᱩᱣᱟᱹᱨ ᱠᱚᱫᱚ
ᱟᱹᱭᱩᱵ ᱞᱮᱱᱠᱷᱟᱱ ᱩᱭᱦᱟᱹᱨ ᱜᱚᱫᱟᱢ
ᱚᱠᱟᱨᱮ ᱤᱧᱟᱜ ᱡᱟᱱᱟᱢ ᱚᱲᱟᱜ ᱾
***
