ᱦᱟᱞᱚ ᱵᱟᱛᱚ ᱵᱟᱞᱚᱠ ᱢᱟᱥᱮ ᱜᱮᱢᱮᱨ ᱡᱚᱝ ᱠᱷᱟᱱᱮᱢ, ᱛᱤᱛᱮᱢ ᱥᱮᱯᱮᱧ ᱥᱚᱱᱟ ᱢᱚᱦᱚᱨ ᱪᱟᱸᱫᱚ ᱮᱢ ᱮᱱᱮᱢ ᱾
ᱫᱷᱚᱱ ᱫᱩᱨᱤᱵᱽ ᱫᱷᱚᱢᱚᱠ ᱫᱟᱲᱮ ᱠᱷᱚᱱᱮᱢ ᱠᱤᱥᱟᱹᱬᱚᱜ, ᱱᱚᱶᱟ ᱫᱷᱚᱱ ᱦᱟᱹᱴᱤᱧ ᱨᱮᱫᱚ ᱟᱹᱰᱤᱢ ᱪᱤᱴᱟᱹᱬᱚᱜ ᱾
ᱪᱮᱠᱟᱢ ᱠᱤᱨᱤᱧ ᱱᱚᱶᱟ ᱨᱮᱱᱟᱜ ᱵᱟᱹᱱᱩᱜ ᱫᱚᱨ ᱫᱟᱢ, ᱱᱚᱶᱟ ᱫᱷᱚᱱ ᱦᱚᱨᱦᱚ ᱛᱮᱜᱮ ᱜᱚᱴᱟ ᱡᱤᱣᱤᱢ ᱠᱷᱟᱢ ᱾
ᱱᱚᱶᱟ ᱫᱷᱚᱱ ᱵᱟᱹᱱᱩᱜ ᱠᱷᱟᱱᱮᱢ ᱵᱩᱡᱷᱟᱹᱣ ᱟᱹᱰᱤ ᱦᱟᱹᱱ, ᱪᱮᱠᱟᱢ ᱵᱟᱹᱜᱤᱭᱟᱜᱼᱟ ᱟᱢᱟᱜ ᱢᱚᱦᱚᱨ ᱢᱤᱫ ᱢᱩᱴᱷᱟᱹᱱ ᱾
ᱡᱟᱦᱟᱸ ᱨᱮᱜᱮᱢ ᱛᱩᱞ ᱟᱹᱪᱩᱨ ᱛᱟᱢᱟ ᱠᱩᱨᱩ ᱠᱩᱨᱩ, ᱟᱹᱲᱤᱥ ᱵᱟᱢ ᱟᱹᱲᱤᱥᱚᱜ ᱦᱚᱨᱦᱚ ᱦᱟᱨᱟ ᱵᱩᱨᱩ ᱾
ᱡᱚᱠᱷᱚᱱᱮᱢ ᱪᱟᱞᱟᱜ ᱱᱟᱦᱟ ᱯᱩᱨᱤ ᱪᱟᱸᱫᱚ ᱵᱚᱸᱜᱟ ᱴᱷᱮᱱ, ᱫᱷᱚᱱ ᱛᱟᱢᱮᱢ ᱵᱟᱹᱜᱤᱭᱟᱜ ᱤᱠᱷᱟᱹᱱ ᱤᱫᱤ ᱵᱟᱝᱜᱮᱢ ᱨᱮᱵᱮᱱ ᱾
ᱢᱮᱱᱟᱜ ᱛᱟᱢᱟ ᱦᱟᱹᱴᱤᱧ ᱡᱤᱣᱤ ᱥᱟᱱᱟᱢ ᱫᱷᱚᱱ ᱢᱩᱫᱽᱨᱮ, ᱞᱟᱹᱴᱤᱡ ᱞᱟᱰᱟᱨ ᱟᱹᱪᱩᱨ ᱛᱟᱢᱟᱢ ᱵᱟᱢ ᱫᱚᱦᱚᱭ ᱩᱠᱩᱨᱮ ᱾
ᱯᱮᱨᱮᱡ ᱟᱠᱟᱱ ᱱᱚᱶᱟ ᱠᱷᱟᱹᱛᱤᱨ ᱟᱢᱟᱜ ᱠᱩᱠᱷᱤ ᱠᱚᱞᱮ, ᱪᱟᱸᱫᱚ ᱵᱚᱸᱜᱟ ᱦᱚᱸ ᱢᱟᱨᱥᱟᱞ ᱟᱢᱟᱜ ᱢᱮᱫ ᱛᱮᱜᱮᱢ ᱧᱮᱞᱮ ᱾
ᱱᱚᱶᱟ ᱫᱚᱛᱟᱢ ᱦᱟᱲᱟᱢ ᱚᱠᱛᱮ ᱦᱟᱯᱟ ᱥᱟᱵ ᱫᱟᱲᱮ, ᱫᱟᱱᱟᱝ ᱞᱟᱦᱟ ᱩᱫᱩᱜ ᱚᱴᱚ ᱟᱭᱟᱢ ᱟᱨᱡᱟᱣ ᱥᱤᱢᱟᱹᱥᱟᱲᱮ ᱾
ᱫᱷᱟᱹᱨᱛᱤ ᱠᱷᱚᱱᱮᱢ ᱫᱟᱱᱟᱝ ᱞᱮᱱ ᱨᱮ ᱮᱢᱟᱢ ᱥᱟᱦᱟᱱ ᱥᱮᱸᱜᱮᱞ, ᱡᱤᱣᱤ ᱵᱟᱹᱱᱩᱜ ᱦᱚᱲᱢᱚ ᱟᱢᱟᱜ ᱵᱟᱭ ᱥᱮᱭᱟᱜ ᱵᱮᱨᱮᱞ ᱾
ᱫᱩᱠᱷ ᱵᱤᱯᱚᱫᱽ ᱵᱚᱞᱚᱣᱟᱢ ᱨᱮ ᱱᱩᱭ ᱜᱮ ᱰᱷᱟᱞᱚᱜ, ᱟᱢ ᱫᱩᱫᱩᱜ ᱠᱷᱟᱹᱛᱤᱨ ᱛᱮᱜᱮ ᱦᱟᱨᱛᱟ ᱛᱟᱭ ᱠᱷᱟᱞᱚᱜ ᱾
ᱟᱹᱠᱩᱞ ᱵᱟᱹᱠᱩᱞ ᱨᱩᱣᱟᱹ ᱨᱟᱵᱟᱝ ᱱᱟᱹᱴᱠᱟᱹ ᱛᱟᱢ ᱮ ᱛᱩᱱᱩᱢ, ᱵᱟᱭ ᱟᱫ ᱚᱪᱚᱣᱟᱢ ᱫᱚᱦᱚᱭ ᱛᱟᱢᱟᱭ ᱧᱩᱛᱩᱢ ᱾
ᱢᱚᱦᱚᱨ ᱧᱮᱞ ᱛᱮᱜᱮ ᱵᱟᱢ ᱨᱟᱹᱥᱠᱟᱹ ᱥᱟᱨ ᱥᱟᱨᱟᱣᱜ ᱥᱟᱨᱟ ᱠᱷᱚᱱ, ᱟᱹᱥᱤᱥ ᱮᱢ ᱮᱢᱟᱭ ᱜᱩᱱ ᱵᱤᱨᱫᱟᱹᱭ ᱟᱨᱡᱟᱣ ᱡᱚᱠᱷᱚᱱ ᱾
