ᱠᱟᱹᱭ

ᱟᱹᱨᱥᱤ ᱥᱩᱨ ᱨᱮ ᱟᱹᱰᱤ ᱜᱷᱟᱹᱲᱤᱠ ᱛᱤᱸᱜᱩ ᱛᱷᱤᱨ ᱠᱟᱛᱮᱭ ᱧᱮᱞᱚᱜ ᱠᱟᱱᱟ ᱞᱤᱞᱟ ᱾ ᱡᱚᱦᱟ ᱨᱮᱱᱟᱜ ᱦᱩᱰᱤᱧ ᱦᱩᱰᱤᱧ ᱦᱮᱸᱫᱮ ᱪᱟᱸᱫᱳ ᱠᱷᱚᱫᱟ ᱢᱤᱫ ᱢᱚᱱᱮᱛᱮᱭ ᱠᱚᱭᱚᱜ ᱟᱠᱟᱫᱼᱟ ᱾ ᱥᱩᱢᱚᱱᱮ ᱞᱟᱹᱭᱟ, ᱵᱟᱝᱢᱟ ᱟᱭᱟᱜ ᱥᱟᱱᱟᱢ ᱥᱳᱜᱷᱳᱲ ᱢᱤᱫᱴᱟᱝ ᱥᱩᱢᱩᱝ ᱚᱱᱟ ᱠᱷᱚᱫᱟ ᱨᱮ ᱾ ᱦᱮᱸᱪᱚᱝ! ᱞᱤᱞᱟ ᱫᱚᱭ ᱢᱚᱱᱮᱭᱟ ᱪᱟᱸᱫᱳ ᱟᱡ ᱟᱹᱰᱤ ᱟᱹᱲᱤᱥ ᱟᱛᱮᱭ ᱵᱮᱱᱟᱣ ᱞᱮᱫᱮᱭᱟ ᱾ ᱥᱳᱜᱷᱳᱲ ᱨᱮᱱᱟᱜ ᱢᱤᱫ ᱛᱤᱞᱢᱤᱧ ᱦᱚᱸ ᱟᱡ ᱨᱮ ᱵᱟᱭ ᱡᱚᱴᱮᱫ ᱠᱟᱣᱫᱟ ᱾ ᱢᱩᱪᱟᱹᱫ ᱨᱮ ᱪᱟᱸᱫᱳ ᱟᱭᱟᱜ ᱠᱷᱮᱭᱟᱞᱤ ᱱᱚᱱᱚᱞ ᱞᱤᱞᱟ ᱟᱜ ᱡᱚᱦᱟ ᱨᱮ ᱢᱤᱫ ᱴᱷᱚᱯ ᱠᱩᱭᱟᱹᱭ ᱴᱩᱰᱟᱹᱜ ᱟᱫᱼᱟ ᱾ ᱚᱱᱟᱨᱮᱦᱚᱸ ᱡᱟᱱᱤ ᱛᱤᱱᱟᱹᱜ ᱚᱱᱦᱮᱲᱟ ; ᱛᱤᱱᱟᱹᱜ ᱦᱤᱨᱠᱟᱹ ᱾ ᱢᱤᱫᱴᱟᱝ ᱡᱮᱞᱮᱧ ᱧᱚᱜ ᱥᱟᱸᱦᱮᱫ ᱠᱟᱛᱮ, ᱟᱭᱟᱜ ᱨᱚᱫᱽ ᱨᱚᱫᱚ ᱦᱮᱸᱫᱮ ᱢᱚᱞᱚᱝ ᱨᱮᱭᱟᱜ ᱟᱨᱟᱜ ᱴᱤᱠᱞᱤ ᱟᱨᱦᱚᱸ ᱢᱤᱫ ᱫᱷᱟᱣ ᱞᱤᱱ ᱵᱟᱹᱭᱥᱟᱹᱣ ᱠᱟᱛᱮ, ᱛᱟᱭᱚᱢ ᱨᱮᱭᱟᱜ ᱥᱩᱫ ᱡᱚᱴᱮᱫ ᱠᱟᱛᱮ, ᱠᱮᱣᱟ ᱪᱮᱛᱟᱱ ᱨᱮᱱᱟᱜ ᱳᱰᱳᱝ ᱠᱚᱜ ᱵᱟᱵᱟᱨ ᱫᱷᱟᱨᱮ ᱨᱮᱱᱟᱝ ᱩᱥᱩᱞ ᱡᱟᱝ ᱪᱮᱛᱟᱱ ᱪᱮᱛᱟᱱᱛᱮ ᱵᱟᱹᱭ ᱵᱟᱹᱭ ᱛᱮᱭ ᱡᱚᱴᱮᱫ ᱟᱲᱜᱳ ᱟᱫ ᱛᱟᱭᱟ ᱾ ᱢᱩᱞᱩᱡ ᱢᱮᱱᱛᱮᱭ ᱞᱟᱸᱫᱟ ᱠᱮᱫᱼᱟ ᱞᱤᱞᱟ ᱾ ᱱᱚᱣᱟ ᱢᱩᱴᱷᱟᱹᱱ ᱜᱮᱭ ᱠᱚᱭᱚᱜ ᱠᱟᱜᱼᱟ ᱥᱩᱢᱚᱱ ᱵᱤᱼᱨᱤᱯᱤᱫ ᱾ ᱞᱤᱞᱟ ᱵᱟᱲᱟᱭᱟᱭ, ᱥᱩᱢᱚᱱᱟᱜ ᱮᱥᱮᱞ ᱩᱥᱩᱞ ᱮᱛᱟᱝ ᱞᱩᱴᱤ, ᱟᱨ ᱠᱚᱲᱟ ᱟᱱᱟᱜ ᱨᱩᱯ ᱥᱳᱨ ᱨᱮ ᱞᱤᱞᱟ ᱫᱚ ᱟᱰᱤ ᱵᱮᱼᱢᱟᱱᱟᱱ ᱾ ᱵᱤᱼᱡᱚᱲ ᱾ ᱮᱱᱦᱚᱸ ᱪᱮᱫᱟᱜ ᱡᱮ ᱩᱱᱟᱹᱜ ᱜᱚᱨᱚᱡᱽ ᱛᱟᱭ ᱥᱩᱢᱚᱱᱟᱜ ᱟᱡ ᱪᱮᱛᱟᱱ ᱾ ᱞᱤᱞᱟᱭ ᱠᱩᱞᱤᱭᱮ ᱜᱮᱭᱟ, “ᱪᱮᱫᱟᱜ ᱥᱩᱢᱚᱱ ? ᱪᱮᱫᱟᱜ ᱩᱱᱟᱹ ᱮᱢ ᱠᱩᱥᱤ ᱟᱹᱧᱟ ? ᱟᱢᱫᱚ ᱠᱤᱥᱟᱹᱲ ᱦᱚᱯᱚᱱ, ᱮᱥᱮᱞ ᱩᱥᱩᱞ, ᱪᱚᱨᱚᱠ ᱪᱤᱠᱟᱹᱬ, ᱟᱢ ᱢᱟ ᱟᱹᱰᱤ ᱥᱳᱡᱷᱮ ᱛᱮ ᱟᱹᱰᱤ ᱱᱟᱯᱟᱭ ᱱᱟᱯᱟᱭ ᱠᱩᱲᱤᱢ ᱧᱟᱢ ᱫᱟᱲᱮᱭᱟᱠᱚᱣᱟ ᱾ ᱤᱧ ᱞᱮᱠᱟᱱ……ᱹᱹ᱾” ᱥᱩᱢᱚᱱ ᱢᱮᱫᱦᱟ ᱢᱩᱠᱷᱟᱹᱱ ᱨᱮ ᱚᱠᱳ ᱫᱟᱱᱟᱝ ᱞᱟᱸᱫᱟ ᱟᱨ ᱫᱩᱞᱟᱹᱲ ᱯᱟᱥᱱᱟᱣ ᱠᱟᱛᱮᱭ ᱞᱟᱹᱭ ᱟ , “ᱞᱤᱞᱟ, ᱟᱢᱫᱚ ᱚᱠᱟᱨᱮ ᱵᱟᱹᱧ ᱠᱩᱲᱟᱹᱣ ᱫᱟᱲᱮᱭᱟᱢ ᱠᱟᱱᱟ ? ᱞᱟᱹᱭ ᱢᱮᱥᱮ ᱢᱟ᱾ ᱩᱱᱟᱹᱜ ᱦᱤᱸᱫᱤᱡ ᱪᱮᱫᱟᱜ ᱟᱢᱟᱜ ᱢᱚᱱᱮᱨᱮ? ᱤᱧ ᱵᱟᱢ ᱯᱟᱹᱛᱭᱟᱹᱣ ᱫᱟᱲᱮ ᱤᱧ ᱠᱟᱱᱟ?ᱪᱮᱫᱟᱜ ᱜᱷᱟᱱᱮᱜᱮ ᱟᱢ ᱵᱤᱱᱤᱰ ᱥᱳᱨᱮᱢ ᱛᱤᱸᱜᱩᱧᱟ? ᱞᱤᱞᱟ ᱞᱟᱡᱟᱣ ᱛᱮᱭ ᱠᱳᱨᱳ ᱠᱳᱨᱳᱜ ᱟ᱾ᱪᱷᱤ! ᱪᱮᱫ ᱮ ᱩᱭᱦᱟᱹᱨ ᱮᱫᱟ ᱞᱤᱞᱟ? ᱥᱩᱢᱚᱱ, ᱟᱡᱨᱮᱱ ᱥᱩᱢᱚᱱ ᱩᱱᱟᱹ ᱵᱟᱲᱤᱡ ᱮ ᱵᱷᱟᱵᱤ ᱮ ᱠᱟᱱᱟ! ᱥᱟᱨᱤᱜᱮ ᱥᱩᱢᱚᱱ ᱫᱚ ᱡᱟᱱᱤ ᱚᱱᱠᱟᱱ ᱠᱚᱲᱟ,ᱡᱟᱸᱦᱟᱭ ᱫᱚ ᱨᱩᱯ ᱫᱚ ᱵᱟᱝ,ᱜᱩᱱ ᱮ ᱯᱟᱸᱡᱟᱭᱟ᱾ ᱡᱚᱫᱤᱭᱳ ᱞᱤᱞᱟ ᱟᱜ ᱜᱨᱟᱡᱩᱭᱮᱴ ᱰᱤᱜᱽᱨᱤ ᱪᱷᱟᱲᱟ ᱚᱱᱠᱟᱱᱟᱜ ᱪᱮᱫ ᱜᱩᱱ ᱜᱮ ᱵᱟᱱᱩᱜ ᱛᱟᱭᱟ᱾ ᱛᱚᱵᱮ ᱢᱤᱫ ᱥᱮᱨᱢᱟ ᱨᱮᱱᱟᱜ ᱥᱟᱹᱜᱟᱹᱭ ᱨᱮ ᱞᱤᱞᱟᱫᱚᱭ ᱵᱩᱡ ᱛᱤᱭᱳᱜ ᱟᱠᱟᱫᱟ,ᱟᱰᱤ ᱟᱰᱤ ᱛᱮᱫᱜᱮᱭ ᱠᱩᱥᱤ ᱟᱭᱟ ᱥᱩᱢᱚᱱ᱾ ᱟᱠᱤᱱᱟᱜ ᱥᱟᱢᱟᱝ ᱥᱟᱢᱟᱝ ᱧᱮᱯᱮᱞ ᱫᱚ ᱡᱟᱥᱛᱤ ᱵᱟᱝ ᱦᱳᱭᱳᱜ ᱠᱟᱱ ᱨᱮ ᱦᱚᱸ,ᱡᱟᱸᱦᱟ ᱛᱤᱱ ᱫᱷᱟᱣ ᱠᱤᱱ ᱧᱮᱯᱮᱞ ᱟᱠᱟᱱᱟ, ᱩᱱᱫᱷᱟᱣ ᱜᱮ ᱱᱟᱹᱭ ᱠᱟᱛᱟ, ᱱᱟᱹᱭ ᱫᱟᱜ ᱞᱮᱠᱟ ᱚᱸᱰᱚᱞ ᱰᱚᱸᱵᱚᱞ ᱪᱟᱯᱳ ᱪᱷᱚᱭᱞᱟᱝ᱾ ᱟᱨ ᱯᱷᱳᱱ ᱛᱮᱢᱟ ᱥᱟᱨᱟ ᱜᱷᱟᱲᱤ ᱠᱷᱟᱱ ᱥᱟᱨᱟ ᱜᱷᱟᱲᱤ ᱜᱮᱠᱤᱱ ᱨᱚᱯᱚᱲᱟ ᱾

ᱥᱩᱢᱚᱱᱟᱜ ᱠᱟᱛᱷᱟᱠᱚ ᱯᱷᱳᱱ ᱦᱟᱱᱟ ᱫᱷᱟᱨᱮ ᱠᱷᱚᱱ ᱞᱤᱞᱟ ᱴᱷᱮᱱ ᱫᱚ ᱡᱷᱟᱨ ᱦᱟᱸᱰᱤ ᱟᱧᱩ ᱞᱮᱠᱟ᱾ ᱞᱤᱞᱟ ᱛᱤᱨᱯᱤᱫ ᱜᱮ ᱵᱟᱭ ᱛᱤᱨᱯᱤᱫᱚᱜ ᱟ᱾ᱛᱚᱵᱮ ᱥᱮᱫᱟᱭ ᱨᱮᱱᱟᱜ ᱥᱟᱲ ᱵᱟᱦᱟ ᱨᱮ ᱩᱨᱩ ᱵᱷᱟᱸᱣᱭᱟᱨᱟᱜ ᱫᱩᱞᱟᱹᱲ ᱫᱚ ᱛᱷᱟᱱᱤᱛ ᱮ ᱯᱟᱸᱡᱟᱭᱟ ᱡᱟᱱᱤ ᱱᱟᱦᱟᱜ! ᱩᱢᱮᱨ ᱦᱚᱸ ᱞᱟᱦᱟ ᱤᱫᱤᱜ ᱠᱟᱱ ᱛᱮ ᱞᱤᱞᱟ ᱦᱚᱸ ᱢᱤᱫᱴᱟᱝ ᱜᱷᱟᱨᱚᱸᱡᱽ ᱮ ᱠᱷᱚᱡᱚᱜ ᱠᱟᱱᱟ᱾ ᱥᱩᱢᱚᱱ ᱦᱚᱸ ᱤᱫᱤᱭ ᱨᱮᱵᱮᱱ ᱟᱠᱟᱱᱟ᱾ ᱚᱱᱟ ᱠᱩᱠᱢᱩ ᱨᱮᱱᱟᱜ ᱢᱟᱦᱟ ᱜᱮ ᱛᱮᱦᱮᱧ ᱦᱮᱡ ᱟᱠᱟᱱ ᱞᱤᱞᱟ ᱴᱷᱮᱱ᱾ ᱛᱮᱦᱮᱧ ᱵᱟᱸᱫᱷᱽᱜᱳᱲᱟ ᱯᱟᱛᱟ ᱠᱷᱚᱱ ᱜᱮ ᱱᱟᱦᱟᱜ ᱮ ᱤᱫᱤ ᱩᱛᱟᱹᱨᱮᱭᱟ᱾ᱤᱱᱟᱹ ᱛᱮᱜᱮᱛᱚ ᱥᱮᱛᱟᱜ ᱠᱷᱚᱱᱜᱮ ᱞᱤᱞᱟ ᱟᱜ ᱛᱤᱱᱟᱹᱜ ᱥᱟᱡ ᱥᱟᱯᱲᱟᱣ᱾ ᱥᱟᱱᱟᱢ ᱠᱳᱭᱟᱜ ᱫᱟᱱᱟᱝ ᱨᱮ ᱞᱤᱞᱟ ᱟᱜ ᱦᱚᱲᱢᱚ ᱢᱚᱱᱮ ᱨᱮ ᱨᱟᱹᱥᱠᱟᱹ ᱨᱟᱦᱟ ᱛᱚᱞᱚᱜ ᱠᱟᱱᱟ ᱠᱮᱨᱢᱮ ᱠᱮᱨᱢᱮ᱾ ᱞᱤᱞᱟ ᱟᱜ ᱦᱚᱸ ᱜᱷᱟᱨᱚᱸᱡᱽ ᱦᱳᱭᱳᱜ ᱛᱟᱭᱟ ᱢᱤᱫ ᱴᱟᱝ᱾ ᱟᱭᱟᱜ᱾ ᱟᱠᱳᱟᱜ᱾ ᱥᱩᱢᱚᱱ ᱨᱮᱱ ᱚᱲᱟᱜ ᱦᱚᱲ ᱟᱡ ᱨᱮᱱ ᱠᱚ ᱚᱲᱟᱜ ᱦᱚᱲᱚᱜ ᱟ᱾ ᱚᱱᱟ ᱜᱷᱟᱨᱚᱸᱡᱽ ᱨᱮᱱ ᱵᱟᱦᱩ ᱠᱩᱲᱤᱫᱚ ᱞᱤᱞᱟ᱾ ᱱᱟᱱᱟ ᱦᱩᱱᱟᱹᱨ ᱱᱟᱣᱭᱟ ᱱᱟᱣᱭᱟ ᱥᱟᱹᱜᱟᱹᱭ ᱛᱮᱭ ᱥᱟᱡᱚᱜ ᱟ᱾ ᱚᱱᱟ ᱚᱲᱟᱜ ᱨᱮᱱᱟᱜ ᱴᱩᱠᱩᱡ,ᱪᱮᱞᱟᱝ, ᱚᱲᱟᱜ, ᱫᱩᱭᱟᱹᱨ ,ᱯᱤᱰᱟᱹ ᱨᱟᱪᱟᱨᱮ ᱫᱩᱞᱟᱹᱲ ᱨᱮᱱᱟᱜ ᱡᱚᱴᱮᱫ ᱮ ᱚᱡᱚᱜᱟᱜ ᱟ, ᱞᱤᱞᱟ ᱥᱟᱨᱟ ᱡᱤᱭᱚᱱ ᱵᱷᱳᱨ᱾ ᱵᱟᱸᱫᱷᱽᱜᱳᱲᱟ ᱯᱟᱛᱟ ᱫᱚ ᱟᱠᱳ ᱟᱛᱳ ᱠᱷᱚᱱ ᱫᱚ ᱥᱟᱜᱤᱧ ᱜᱮᱭᱟ᱾ᱧᱤᱫᱟᱹ ᱯᱟᱛᱟ᱾ ᱚᱱᱟᱛᱮ ᱞᱤᱞᱟ ᱦᱚᱸ ᱟᱛᱳᱨᱮᱱ ᱜᱟᱛᱮ ᱠᱩᱲᱤ ᱥᱟᱞᱟᱜ ᱰᱳᱰᱮ ᱰᱳᱯᱳᱰᱮ ᱢᱩᱪᱟᱹᱫ ᱵᱟᱥᱛᱮᱠᱚ ᱪᱟᱞᱟᱣ ᱮᱱᱟ᱾ ᱯᱟᱛᱟ ᱴᱟᱺᱰᱤ ᱡᱚᱠᱷᱮᱡ ᱠᱳ ᱛᱤᱭᱩᱜ ᱫᱚ,ᱩᱱᱫᱚ ᱯᱟᱛᱟ ᱴᱟᱸᱰᱤᱨᱮ ᱵᱩᱡᱩᱜ ᱵᱩᱡᱩᱜ ᱦᱚᱲ᱾ ᱧᱮᱧᱮᱞᱤᱭᱟᱹ ᱦᱚᱲ ᱦᱤᱡᱩᱜ ᱠᱚ ᱥᱟᱨᱫᱤ ᱟᱠᱟᱱᱟ᱾ ᱮᱱᱟᱝ ᱠᱷᱚᱱ ᱥᱟᱨᱟ ᱥᱤᱧ ᱞᱤᱞᱟ ᱟᱜ ᱦᱚᱲᱢᱚ ᱢᱚᱱ ᱫᱚ ᱥᱩᱢᱚᱱ ᱛᱮ ᱟᱸᱜᱮᱱ ᱩᱱᱩᱢ ᱟᱠᱟᱱᱟ᱾ ᱯᱟᱛᱟ ᱴᱟᱺᱰᱤᱨᱮᱱᱟᱜ ᱠᱟᱞ ᱠᱟᱞᱟᱣ ,ᱩᱱᱟᱹᱜ ᱦᱚᱲᱟᱜ ᱜᱟᱫᱮᱞ ᱟᱨ ᱟᱰᱤ ᱪᱮᱛᱟᱱ ᱨᱟᱦᱟᱛᱮ ᱢᱟᱭᱤᱠ ᱨᱮᱱᱟᱜ ᱥᱮᱨᱮᱧ ᱛᱟᱞᱟ ᱨᱮᱦᱚᱸ, ᱥᱩᱢᱚᱱ ᱧᱩᱛᱩᱢ ᱩᱭᱦᱟᱹᱨ, ᱥᱚᱨᱮᱥ ᱥᱮᱨᱮᱧ ᱨᱟᱦᱟ ᱨᱮᱱᱟᱜ ᱢᱩᱪᱟᱹᱫ ᱜᱟᱵᱮ ᱛᱮᱫ ᱞᱮᱠᱟ ᱥᱩᱧ ᱥᱩᱧ ᱥᱮᱛᱮᱧᱚᱜ ᱠᱟᱱ ᱜᱮᱭᱟ ᱱᱤᱛᱦᱚᱸ ᱞᱤᱞᱟ ᱟᱜ ᱚᱱᱛᱚᱨ ᱢᱚᱱᱮᱨᱮ᱾ ᱢᱤᱫ ᱚᱠᱚᱛᱮ ᱜᱟᱛᱮ ᱠᱩᱲᱤ ᱠᱚ ᱛᱟᱱᱟ ᱵᱷᱤᱱᱟᱹᱭᱮᱱ ᱠᱷᱟᱱ ,ᱮᱠᱞᱟ ᱞᱤᱞᱟᱫᱚ ᱦᱟᱱᱛᱮ ᱱᱟᱛᱮᱭ ᱠᱚᱭᱚᱜ ᱵᱟᱲᱟᱭᱮᱫᱟ᱾ ᱱᱚᱰᱮ ᱜᱮᱛᱚ ᱦᱤᱡᱩᱜ ᱨᱮᱱᱟᱜ ᱠᱟᱛᱷᱟ᱾ ᱛᱚᱵᱮ ᱠᱤ ᱱᱤᱛᱦᱚᱸ ᱟᱣᱨᱤᱭ ᱦᱤᱡᱩᱜ ᱟ ᱥᱩᱢᱚᱱ? ᱢᱤᱫ ᱜᱷᱟᱲᱤ ᱛᱟᱭᱚᱢ ᱠᱷᱟᱱ ᱜᱮ ᱟᱡ ᱥᱳᱨ ᱯᱨᱚᱵᱤᱨ ᱮ ᱦᱮᱡ ᱮᱱᱟ᱾ᱞᱟᱹᱭ ᱠᱮᱰᱟᱭ’ “ᱪᱚᱞᱚ`ᱦᱟᱱᱛᱮ ᱨᱮ ᱥᱩᱢᱚᱱ ᱫᱟ ᱢᱮᱱᱟᱭᱟ᱾ ᱦᱚᱦᱚ ᱟᱢ ᱠᱟᱱᱟᱭ᱾” ᱠᱟᱹᱪ ᱮ ᱞᱟᱸᱫᱟ ᱠᱮᱫ ᱛᱮ ᱵᱤᱱᱟᱹ ᱠᱟᱛᱷᱟᱛᱮ ᱞᱤᱞᱟ ᱯᱨᱚᱵᱤᱨᱮ ᱯᱟᱸᱡᱟ ᱠᱮᱫᱮᱭᱟ᱾ ᱥᱟᱸᱜᱤᱧ ᱧᱚᱜ ᱫᱟᱨᱮ ᱵᱩᱴᱟᱹᱨᱮ ᱥᱩᱢᱚᱱ ᱛᱟᱠᱳ ᱠᱚ ᱛᱤᱸᱜᱩ ᱟᱠᱟᱱᱟ᱾ ᱧᱮᱯᱮᱞ ᱛᱚᱨᱟ ᱠᱤᱱ ᱞᱟᱸᱫᱟ ᱟᱱᱟ ᱵᱟᱱᱟ ᱦᱚᱲ ᱾

ᱵᱩᱜᱤ ᱵᱟᱲᱤᱡ ᱠᱩᱞᱤ ᱠᱩᱯᱩᱞᱤ ᱵᱟᱲᱟ ᱠᱟᱛᱮ ᱥᱩᱢᱚᱱᱮ ᱞᱟᱹᱭ ᱠᱮᱫᱟ ᱪᱚᱞᱚ ᱞᱟᱝ ᱫᱟᱸᱲᱟ ᱞᱮᱜᱮ᱾ᱪᱮᱫ ᱦᱚᱸ ᱵᱟᱝ ᱞᱟᱹᱭ ᱠᱟᱛᱮ ᱞᱤᱞᱟ ᱥᱩᱢᱚᱱᱟᱜ ᱛᱤᱭ ᱥᱟᱵ ᱠᱮᱫᱟ᱾ ᱟᱰᱤ ᱞᱳᱜᱳᱫ ᱨᱤᱦᱤᱴ ᱥᱟᱯᱟᱵ᱾ ᱞᱤᱞᱟ ᱥᱩᱢᱚᱱ ᱥᱮᱫ ᱠᱚᱭᱚᱜ ᱠᱟᱛᱮᱭ ᱢᱮᱱ ᱠᱮᱫᱟ, “ᱱᱚᱭᱟ ᱛᱤ ᱵᱟᱢ ᱟᱲᱟᱜᱟ ᱛᱚ?” ᱥᱩᱢᱚᱱ ᱞᱤᱞᱟ ᱟᱜ ᱛᱤ,ᱟᱭᱟᱜ ᱛᱤᱛᱮ ᱞᱤᱱ ᱠᱟᱛᱮᱭ ᱞᱟᱸᱫᱟ ᱠᱮᱫᱟ ᱠᱷᱟᱞᱤ᱾ ᱞᱤᱞᱟ ᱥᱮᱫ ᱠᱚᱭᱚᱜ ᱠᱟᱛᱮ᱾ᱟᱰᱤ ᱥᱟᱸᱴᱟᱣ ,ᱟᱰᱤ ᱛᱤᱨᱯᱤᱫ ᱮ ᱵᱩᱡ ᱠᱮᱫᱟ ᱞᱤᱞᱟ᱾ ᱟᱰᱤ ᱜᱚᱨᱚᱵ ᱥᱟᱺᱦᱤᱡ ᱥᱩᱢᱱᱟᱜ ᱛᱤ ᱥᱟᱵ ᱠᱟᱛᱮ ᱥᱩᱢᱚᱱ ᱯᱟᱱᱛᱮ ᱛᱮᱭ ᱛᱟᱲᱟᱢ ᱠᱮᱫᱟᱼᱡᱟᱭ ᱡᱩᱜᱽ ᱥᱩᱢᱚᱱ ᱯᱟᱱᱛᱮ ᱛᱮ ᱛᱟᱲᱟᱢ ᱞᱟᱜᱤᱫ᱾ ᱛᱤᱱ ᱠᱚᱨᱮᱪᱚ ᱚᱠᱛᱚ ᱯᱟᱨᱚᱢ ᱮᱱᱟ ᱟᱰᱤ᱾ ᱵᱮᱲᱟᱭ ᱞᱟᱰᱮ ᱟᱠᱟᱱᱟ ᱮᱱᱟᱝ ᱨᱮ᱾ ᱞᱟᱭᱤᱴ ᱟᱨᱥᱟᱞᱛᱮ ᱢᱟᱨᱥᱟᱞᱮᱱᱟ ᱯᱟᱛᱟ ᱴᱟᱺᱰᱤ ᱪᱟᱨᱤᱫᱷᱟᱨ᱾ ᱛᱟᱲᱟᱢ ᱞᱟᱸᱜᱟ ᱠᱟᱛᱮ ᱢᱤᱫ ᱫᱷᱟᱨᱮᱨᱮ ᱠᱤᱱ ᱫᱩᱲᱩᱵ ᱮᱱᱟ ᱯᱟᱱᱛᱮ ᱛᱮ᱾ ᱛᱮᱦᱮᱧ ᱫᱚ ᱥᱩᱢᱚᱱᱟᱜ ᱟᱰᱤ ᱥᱳᱨ ᱨᱮ ᱫᱩᱲᱩᱵ ᱥᱟᱱᱟᱭᱮᱠᱟᱱᱟ ᱞᱤᱞᱟ᱾ᱟᱰᱤ ᱥᱳᱨ᱾ ᱦᱤᱱᱟᱹ ᱱᱤᱭᱟᱹ ᱛᱷᱩᱛᱤ ᱛᱷᱩᱛᱤᱛᱮ ᱧᱤᱫᱟᱹ ᱛᱟᱞᱟ ᱧᱤᱫᱟᱹᱥᱮᱫ ᱰᱚᱭᱞᱟᱝ ᱪᱟᱞᱟᱜ ᱠᱟᱱᱟ ᱠᱮᱨᱢᱮ᱾ ᱥᱳᱨ ᱥᱳᱯᱳᱨ ᱜᱟᱭᱟᱱ ᱵᱟᱝ ᱧᱮᱞ ᱦᱚᱲ ᱫᱚᱠᱚ ᱨᱩᱭᱟᱹᱲ ᱟᱠᱟᱱᱟ ᱮᱱᱟᱝ ᱨᱮ᱾ ᱢᱤᱫ ᱧᱤᱫᱟᱹ ᱜᱟᱭᱟᱱ ᱮᱛᱚᱦᱚᱵ ᱨᱮᱱᱟᱜ ᱠᱟᱛᱷᱟ ᱠᱚ ᱩᱪᱷᱟᱹᱱ ᱮᱫᱟ ᱢᱟᱭᱤᱠ ᱛᱮ ᱜᱷᱟᱱᱮ ᱜᱷᱟᱱᱮ᱾ ᱜᱟᱭᱟᱱ ᱴᱟᱺᱰᱤᱨᱮ ᱢᱤᱫ ᱢᱤᱫ ᱛᱮᱠᱚ ᱵᱚᱞᱚᱱ ᱠᱟᱱᱟ ᱧᱮ ᱧᱮᱞᱤᱭᱟᱹ ᱠᱚ᱾ ᱞᱤᱞᱟ ᱟᱨ ᱦᱚᱸᱭ ᱥᱚᱦᱚᱨ ᱥᱳᱨᱳᱜ ᱠᱟᱱᱟ ᱥᱩᱢᱚᱱ ᱥᱮᱫ᱾ ᱤᱱᱟᱹ ᱠᱚᱛᱮ ᱢᱩᱪᱟᱹᱫ ᱧᱮᱧᱮᱞᱤᱭᱟᱹ ᱜᱟᱫᱮᱞ ᱦᱚᱸᱠᱚ ᱵᱚᱞᱚᱭᱮᱱᱟ ᱢᱤᱫ ᱚᱠᱚᱛᱮ᱾ ᱵᱟᱦᱨᱮ ᱨᱮ ᱢᱤᱫ ᱵᱟᱨ ᱵᱷᱚᱞᱮᱱᱴᱤᱭᱟᱨ ᱠᱚᱠᱚ ᱫᱟᱸᱲᱟ ᱵᱟᱲᱟᱭᱮᱫᱟ᱾ ᱞᱤᱞᱟ ᱥᱩᱢᱚᱱᱟᱜ ᱜᱳᱱᱴᱷᱮ ᱴᱷᱮᱞᱟᱣ ᱠᱟᱛᱮᱭ ᱢᱮᱛᱟᱫᱮᱭᱟ, “ᱮᱭ, ᱪᱚᱞᱚ ᱞᱟᱝ ᱵᱚᱞᱚᱱᱟ᱾” ᱥᱩᱢᱚᱱ ᱫᱷᱮᱭᱟᱱ ᱨᱟᱯᱩᱫᱮᱱ ᱛᱟᱭ ᱞᱮᱟᱠᱭ ᱪᱮᱸᱜᱷᱟᱣ ᱮᱱ ᱛᱮᱭ ᱢᱮᱱ ᱠᱮᱫᱟ,”ᱪᱚᱞᱚ, ᱪᱚᱞᱚ᱾“ ᱵᱮᱨᱮᱫ ᱮᱱ ᱛᱮᱭ ᱞᱟᱹᱭ ᱠᱮᱫᱟ, “ᱪᱚᱞᱚ ᱚᱱᱛᱮ ᱠᱟᱹᱪ ᱞᱟᱝ ᱪᱟᱞᱟᱣ ᱞᱮᱱᱜᱮ, ᱟᱫᱚ ᱞᱟᱝ ᱵᱚᱞᱚᱱᱟ᱾” ᱠᱟᱴᱤᱡ ᱥᱟᱸᱜᱤᱧ ᱧᱚᱜ ᱫᱟᱱᱟᱝ ᱥᱮᱫ ᱪᱟᱞᱟᱣ ᱠᱟᱛᱮ ᱥᱩᱢᱚᱱ ᱟᱪᱠᱟ ᱟᱡ ᱥᱳᱨ ᱞᱤᱞᱟ ᱫᱚᱭ ᱜᱚᱦᱚᱲ ᱥᱳᱨ ᱠᱮᱫᱮᱭᱟ᱾ ᱞᱤᱞᱟ ᱪᱮᱫ ᱦᱚᱸ ᱟᱣᱨᱤ ᱵᱩᱡ ᱵᱩᱡ ᱛᱮᱜᱮ ᱠᱚᱲᱟᱢ ᱨᱮᱭ ᱦᱟᱲᱩᱵ ᱢᱮᱥᱟ ᱠᱮᱫᱮᱭᱟ᱾ ᱞᱤᱞᱟ ᱟᱪᱠᱟᱭᱮᱱ ᱨᱮᱦᱚᱸᱭ ᱥᱩᱢᱚᱱᱟᱜ ᱠᱷᱮᱯᱟᱢᱤ ᱧᱮᱞ ᱠᱟᱛᱮ ᱟᱰᱤ ᱥᱩᱠ ᱮ ᱵᱩᱡᱷᱟᱹᱣ ᱠᱮᱫᱟ᱾ ᱞᱟᱸᱫᱟ ᱠᱟᱛᱮ ᱟᱭᱟᱜ ᱫᱩᱞᱟᱹᱲ ᱛᱤᱛᱮ ᱥᱩᱢᱚᱱᱮ ᱦᱟᱲᱩᱵ ᱠᱮᱫᱮᱛᱮ ᱡᱤᱞᱟᱹᱫ ᱪᱟᱵᱟᱭᱮᱱᱟᱭ ᱥᱩᱢᱚᱱ ᱴᱷᱮᱱ᱾ᱪᱩᱸᱭᱦᱩᱨ ᱥᱩᱠ ᱛᱮᱭ ᱯᱮᱨᱮᱡ ᱪᱟᱵᱟᱜ ᱠᱟᱱᱟ ᱞᱤᱞᱟ ᱟᱡ ᱨᱮᱱ ᱡᱤᱛᱟᱹ ᱥᱟᱞᱟᱜ᱾ ᱵᱟᱨᱭᱟ ᱠᱚᱲᱟ ᱟᱨ ᱠᱩᱲᱤ ᱠᱤᱱ ᱢᱤᱞᱟᱹᱣ ᱥᱟᱹᱛ ᱮᱱᱟ ᱟᱫᱤᱢ ᱥᱟᱹᱜᱟᱹᱭ ᱛᱮ,ᱟᱫᱤᱢ ᱢᱤᱫ ᱴᱟᱝ ᱧᱤᱫᱟᱹᱨᱮ᱾ ᱞᱤᱞᱟᱭ ᱩᱢᱟᱹᱱ ᱠᱮᱫᱟ ᱟᱭᱟᱜ ᱯᱮ ᱜᱮᱞ ᱥᱮᱨᱢᱟ ᱨᱮᱱᱟᱜ ᱯᱩᱲᱭᱟ ᱹ , ᱨᱩᱠᱷᱟ ᱹ , ᱠᱩᱲᱤ ᱦᱚᱲᱢᱚᱨᱮ ᱯᱳᱭᱞᱳ ᱫᱷᱟᱣ, ᱚᱱᱟᱵᱟᱫᱤ ᱦᱟᱥᱟᱨᱮ ᱫᱟᱜ ᱮ ᱡᱟᱲᱤᱭᱟᱫᱟ᱾

ᱯᱩᱨᱢᱩ ᱦᱟᱥᱟ ᱥᱚᱛᱮ ᱫᱚᱸᱜᱚᱭ ᱫᱚᱸᱜᱚᱭ ᱥᱳᱫᱚ ᱟᱸᱫᱳᱲᱮᱱᱟ ᱞᱤᱞᱟ ᱟᱜ ᱦᱚᱲᱢᱚᱨᱮ ,ᱢᱚᱱᱮᱨᱮ᱾ ᱟᱪᱠᱟ ᱞᱤᱞᱟ ᱥᱳᱨ ᱨᱮ ᱚᱠᱚᱭᱟᱜ ᱠᱚᱲᱟ ᱟᱲᱟᱝ ᱮ ᱟᱸᱡᱚᱢ ᱠᱮᱫᱟ ”ᱪᱮᱞᱮᱭᱟ ᱥᱩᱢᱚᱱ, ᱞᱟᱰᱩ ᱫᱚ ᱮᱠᱚᱞᱟ ᱜᱮᱢ ᱡᱚᱢᱟ ᱥᱮ ᱪᱮᱫ?” ᱵᱚᱛᱚᱨ ᱛᱮ ᱥᱟᱢᱴᱟᱣ ᱵᱮᱨᱮᱫ ᱮᱱᱛᱮ ᱞᱤᱞᱟ ᱥᱩᱢᱚᱱ ᱴᱷᱮᱱ ᱮ ᱫᱟᱱᱟᱝ ᱮᱱᱟ᱾ᱧᱮᱞ ᱫᱚᱭ ᱢᱚᱬᱮ ᱛᱩᱨᱩᱭ ᱦᱚᱲ ᱟᱠᱤᱱ ᱥᱟᱢᱟᱝ ᱨᱮᱠᱚ ᱛᱤᱸᱜᱩ ᱟᱠᱟᱱᱟ᱾ ᱞᱤᱞᱟ ᱵᱚᱛᱚᱨ ᱛᱮ ᱥᱩᱢᱚᱱᱮ ᱠᱷᱟᱭ ᱠᱷᱚᱭ ᱟᱫᱮᱭᱟ, “ᱪᱚᱞᱚ, ᱱᱚᱰᱮ ᱠᱷᱚᱱ ᱞᱟᱝ ᱫᱟᱹᱲᱟ᱾ ᱞᱚᱜᱚᱱ᱾” ᱞᱤᱞᱟ ᱟᱰᱤᱭ ᱦᱟᱦᱟᱲᱟ ᱮᱱᱟ᱾ ᱟᱸᱡᱚᱢ ᱠᱮᱫᱟᱭ ᱥᱩᱢᱚᱱᱮ ᱞᱟᱹᱭ ᱮᱫᱟ, ”ᱦᱳᱭ ᱰᱟᱰᱟ, ᱟᱯᱮ ᱞᱟᱜᱤᱫ ᱦᱚᱸᱧ ᱥᱟᱨᱮᱡ ᱟᱠᱟᱫᱟ᱾” ᱞᱤᱞᱟ ᱟᱰᱤ ᱡᱳᱨ ᱮ ᱵᱚᱛᱚᱨ ᱮᱱᱟ᱾ ᱢᱤᱫᱴᱟᱝ ᱢᱟᱨᱟᱝ ᱚᱜᱷᱚᱴᱚᱱ ᱵᱷᱟᱵᱤ ᱠᱟᱛᱮ᱾ ᱢᱮᱱᱡᱷᱟᱱ ᱟᱸᱡᱚᱢ ᱠᱟᱛᱮ ᱯᱟᱹᱛᱭᱟᱹᱣ ᱫᱚ ᱵᱟᱝ ᱦᱳᱭ ᱞᱮᱱ ᱛᱟᱭᱟ ᱮᱠᱟᱞ, ᱥᱩᱢᱚᱱᱟᱜ ᱢᱤᱫ ᱜᱷᱟᱲᱤ ᱢᱟᱲᱟᱝ ᱨᱮᱱᱟᱜ ᱞᱟᱹᱭ ᱠᱟᱛᱷᱟᱠᱚ ᱾ ᱛᱷᱟᱨᱛᱷᱟᱨᱟᱣ ᱟᱲᱟᱝ ᱛᱮᱭ ᱦᱚᱦᱚ ᱠᱮᱫᱟ…ᱹᱹ”ᱥᱩᱢᱚᱱᱼᱼᱼ“ ᱥᱩᱢᱚᱱ ᱥᱟᱢᱴᱟᱣ ᱠᱟᱛᱮ ᱵᱟᱝ ᱵᱮᱥᱴᱷᱤᱠ ᱥᱟᱰᱮᱛᱮᱭ ᱞᱟᱸᱫᱟ ᱠᱮᱫᱛᱮ, ᱵᱤᱱᱩᱨᱩᱢ ᱨᱟᱦᱟᱛᱮ ᱞᱤᱞᱟᱭ ᱢᱮᱛᱟ ᱫᱮᱭᱟ ,”ᱰᱳ ᱟᱰᱚ ᱩᱱᱠᱩ ᱯᱟᱨᱤ᱾” ᱢᱟᱫ ᱥᱟᱠᱟᱢ ᱞᱮᱠᱟ ᱛᱷᱟᱨ ᱛᱷᱟᱨᱟᱣ ᱠᱟᱛᱮ ᱠᱤᱠᱭᱟᱹᱣ ᱮᱱᱟᱭ ᱞᱤᱞᱟ, ᱦᱚᱲᱢᱚ ᱡᱳᱨᱛᱮ, ᱦᱚᱲᱢᱚ ᱡᱤᱭᱤ ᱵᱟᱸᱧᱪᱟᱣ ᱞᱟᱜᱤᱫ᱾ᱠᱷᱟᱱ ᱥᱳᱨ ᱨᱮ ᱢᱤᱫ ᱴᱟᱝ ᱡᱷᱟᱠ ᱡᱷᱟᱠ ᱪᱷᱚᱨᱟ ᱠᱚ ᱡᱷᱟᱞᱠᱟᱣ ᱟᱫᱮᱭᱟ᱾ “ᱠᱤᱠᱭᱟᱹᱣ ᱞᱮᱠᱷᱟᱱ ᱜᱮᱢ ᱜᱩᱡᱩᱜ ᱟ᱾” ᱠᱟᱞᱟᱝ ᱰᱚᱞᱟᱝ ᱵᱟᱨ ᱛᱤ ᱡᱚᱲ ᱠᱟᱛᱮ ᱨᱟᱜ ᱨᱟᱜᱛᱮ ᱞᱤᱞᱟᱭ ᱢᱮᱱ ᱠᱮᱫᱟ, “ᱤᱧᱫᱚ ᱟᱲᱟᱜ ᱠᱟᱹᱧ ᱯᱮ,ᱟᱲᱟᱜ ᱠᱟᱹᱧ ᱯᱮ᱾” ᱥᱩᱢᱚᱱᱟᱜ ᱡᱟᱸᱜᱟᱨᱮ ᱦᱟᱲᱩᱵ ᱠᱟᱛᱮᱭ ᱢᱮᱱ ᱠᱮᱫᱟ, ’’ᱥᱚᱢᱚᱱ,ᱥᱩᱢᱚᱱ ᱟᱢᱜᱮ ᱤᱧᱟᱜ ᱢᱚᱱᱮ ᱡᱤᱭᱤᱤᱧ ᱮᱢ ᱟᱠᱟᱫ ᱢᱮᱭᱟ᱾ᱤᱧᱫᱚ ᱟᱢᱨᱮᱱᱜᱮ,ᱟᱫᱚ ᱚᱠᱚᱭ ᱨᱮᱱ ᱦᱚᱸ ᱵᱟᱝ᱾……ᱟᱪᱪᱷᱟ ᱟᱪᱪᱷᱟ,ᱤᱧᱫᱚ ᱵᱟᱢ ᱤᱫᱤᱧᱟ ᱟᱞᱚᱢ ᱤᱫᱤᱧᱟ᱾ᱛᱚᱵᱮ ᱱᱩᱠᱩᱭᱟᱜ ᱢᱚᱪᱟ ᱨᱮᱫᱚ ᱟᱞᱚᱢ ᱪᱟᱯᱟᱰ ᱦᱚᱯᱚ ᱠᱟᱹᱧᱟ…ᱹᱰᱟᱭᱟ ᱟᱹᱧ ᱢᱮ,ᱰᱟᱭᱟ ᱟᱹᱧ ᱢᱮ ᱥᱩᱢᱚᱱ᱾” ᱥᱩᱢᱚᱱ ᱡᱟᱸᱜᱟ ᱠᱚᱞᱥᱟ ᱠᱟᱛᱮᱭ ᱢᱮᱱ ᱠᱮᱫᱟᱹ ’’ᱟᱢᱰᱚ ᱪᱤᱠᱟᱹᱛᱮᱢ ᱵᱷᱟᱵᱤ ᱠᱮᱫᱟ ᱤᱧ ᱠᱤᱥᱟᱹᱲ ᱦᱚᱯᱚᱱ ᱦᱳᱭ ᱠᱟᱛᱮ ᱟᱢᱤᱧ ᱤᱫᱤ ᱢᱮᱭᱟ ᱵᱟᱦᱩ ᱨᱩᱯᱛᱮ ,ᱪᱮᱫ ᱢᱮᱱᱟᱜ ᱛᱟᱢᱟ ᱟᱢᱟᱜ?ᱨᱩᱯ ᱥᱮ ᱜᱩᱱ? ᱟᱢ ᱞᱮᱠᱟᱱ ᱠᱩᱲᱤ ᱫᱚ ᱵᱷᱳᱜ ᱜᱮᱠᱚ ᱜᱟᱱᱚᱜ ᱟ᱾ᱚᱲᱟᱜ ᱮᱨᱟ ᱫᱚ ᱵᱟᱝ᱾” ᱟᱫᱚ ᱨᱚᱲ ᱨᱮᱱᱟᱜ ᱫᱟᱣ ᱵᱟᱭ ᱧᱟᱢ ᱞᱮᱫᱟ ᱞᱤᱞᱟ᱾ ᱢᱤᱫ ᱦᱚᱲ ᱫᱚ ᱚᱛᱨᱮᱭ ᱚᱛᱟ ᱜᱤᱛᱤᱡ ᱠᱮᱫᱮᱭᱟ᱾ᱥᱩᱢᱚᱱ ᱞᱟᱜᱤᱫ ᱞᱤᱞᱟ ᱟᱜ ᱩᱱᱟᱹᱜ ᱢᱟᱦᱟ ᱨᱮᱱᱟᱜ ᱵᱮᱱᱟᱣ ᱛᱤᱱᱟᱹᱜ ᱫᱷᱤᱨᱡᱟᱹᱣ ; ᱛᱤᱱᱟᱹᱜ ᱡᱚᱛᱚᱱ, ᱛᱤᱱᱟᱹᱜ ᱠᱩᱥᱤᱛᱮ ᱵᱮᱱᱟᱣ ᱢᱩᱱᱤ ᱢᱩᱠᱛᱟᱹ ᱵᱟᱨᱟᱠ, ᱟᱭᱟᱜ ᱢᱚᱱ ᱢᱩᱫᱤᱨ ᱫᱷᱟᱥᱟᱣ ᱧᱩᱨ ᱮᱱᱟ ᱟᱡ ᱥᱟᱢᱟᱝ ᱨᱮᱜᱮ᱾ᱞᱤᱞᱟ ᱟᱜ ᱛᱤᱱᱟᱹᱜ ᱨᱟᱜ, ᱦᱚᱢᱚᱨ, ᱦᱮᱠᱳᱜ ᱚᱠᱚᱭᱟᱜ ᱞᱩᱛᱩᱨ ᱨᱮᱦᱚᱸ ᱵᱟᱝ ᱥᱮᱴᱮᱨ ᱞᱮᱱᱟ᱾

ᱠᱚᱠᱚᱭᱤᱡ ᱞᱮᱟᱠᱭ ᱠᱚᱭ ᱵᱟᱲᱟ ᱠᱮᱫ ᱠᱚᱭᱟ ᱵᱟᱸᱧᱪᱟᱜ ᱞᱟᱜᱤᱫ ,ᱦᱚᱲᱢᱚ ᱡᱤᱭᱤ ᱞᱟᱜᱤᱫ, ᱵᱷᱚᱨᱚᱢ ᱞᱟᱜᱤᱫ, ᱤᱡᱡᱚᱛ ᱞᱟᱜᱤᱫ᱾ ᱟᱭᱟᱜ ᱵᱤᱱ ᱥᱚᱯᱚᱦᱚᱫ ᱟᱲᱟᱝ ᱛᱮᱱ ᱪᱟᱵᱟᱭᱮᱱᱟ ᱢᱤᱫ ᱜᱟᱫᱮᱞ ᱥᱮᱭᱟ ᱢᱚᱱᱮᱭᱟᱱ ᱠᱚᱲᱟ ᱟᱜ ᱠᱷᱮᱢᱟᱣ ᱴᱷᱮᱱ᱾ ᱢᱚᱪᱟ, ᱛᱤ, ᱡᱟᱸᱜᱟ ᱨᱟᱴ ᱯᱟᱴ ᱛᱚᱞ ᱟᱠᱟᱫ ᱞᱤᱞᱟ ᱟᱜ ᱜᱚᱸ ᱜᱚᱸ ᱢᱚᱪᱟ ᱨᱮᱱᱟᱜ ᱥᱟᱰᱮ ᱢᱮᱥᱟ ᱟᱫᱚᱜ ᱟ ᱩᱱᱠᱩ ᱠᱳᱭᱟᱜ ᱠᱷᱟᱜ ᱠᱷᱟᱜ ᱞᱟᱸᱫᱟ, ᱡᱟᱱᱣᱭᱟ ᱨᱟᱹᱥᱠᱟᱹ, ᱠᱚᱲᱟ ᱡᱟᱱᱟᱝ ᱨᱮᱱᱟᱜ ᱞᱟᱞᱚᱪ ᱟᱨ ᱜᱚᱞ ᱥᱩᱭᱩᱲ ᱨᱮ᱾ ᱞᱤᱞᱟ ᱦᱟᱥᱳ ᱛᱮ, ᱨᱚᱫᱷᱚᱱ ᱛᱮᱭ ᱜᱚᱡ ᱪᱟᱵᱟᱜ ᱠᱟᱱᱟ ᱥᱟᱱᱟᱢ ᱚᱠᱛᱚ ᱨᱮ ᱠᱮᱨᱢᱮ᱾ ᱜᱚᱡ ᱪᱟᱵᱟᱜ ᱠᱟᱱ ᱛᱟᱭᱟ ᱟᱭᱟᱜ ᱡᱤᱭᱤ,ᱟᱭᱟᱜ ᱟᱛᱢᱟ ,ᱦᱚᱲᱢᱚ ᱨᱮᱱᱟᱜ ᱢᱤᱫᱴᱟᱝ ᱢᱤᱫᱴᱟᱝ ᱠᱚᱸᱰ᱾ ᱩᱯᱟᱹᱥᱤ ᱛᱟᱨᱩᱵ ᱞᱮᱠᱟ ᱞᱤᱞᱟ ᱟᱜ ᱦᱚᱲᱢᱚ ᱠᱚ ᱨᱟᱵᱳᱲ ᱠᱷᱟᱞ ᱮᱫ ᱛᱟᱭᱟ ᱞᱟᱥᱮᱨ ᱰᱟᱴᱟ ᱟᱨ ᱥᱚᱭᱠᱟᱜ ᱥᱚᱭᱠᱟᱜ ᱨᱟᱢᱟᱛᱮ᱾ᱟᱹᱰᱭᱟᱹ ᱫᱟᱲᱮᱠᱚ ᱦᱩᱠᱟᱹᱨ ᱮᱫᱟ ,ᱵᱮᱥᱚᱦᱚᱫ ᱮᱠᱞᱟ ᱛᱤᱨᱞᱟᱹ ᱦᱚᱲᱢᱚᱨᱮ᱾ ᱠᱩᱲᱤ ᱦᱚᱯᱚᱱᱟᱜ ᱦᱚᱲᱢᱚ ᱡᱮᱞ ᱫᱚ ᱩᱱᱟᱹᱜ ᱥᱮᱵᱮᱞᱟ,ᱩᱱᱤᱭᱟᱜ ᱩᱥᱩᱞ ᱪᱷᱮᱯᱚ ᱠᱩᱲᱤ ᱦᱚᱲᱢᱚ ᱡᱮᱞ ᱫᱚ ᱩᱱᱟᱹᱜ ᱞᱟᱞᱚᱪᱮ ᱛᱮᱭᱟᱨᱟ ᱠᱚᱲᱟ ᱦᱚᱲ ᱴᱷᱮᱱ! ᱟᱫᱷᱮᱠ ᱜᱚᱡ ᱞᱤᱞᱟ ᱟᱜ ᱨᱤᱫᱟᱹᱭ ᱵᱷᱤᱛᱟᱹᱨ ᱠᱷᱚᱱᱟᱜ ᱥᱟᱨᱮᱡ ᱨᱟᱜ ᱳᱰᱳᱝ ᱦᱤᱡᱩᱜ ᱛᱟᱭᱟ,ᱵᱟᱵᱟᱨ ᱢᱮᱫ ᱛᱟᱞᱟᱛᱮ᱾ ᱟᱡ ᱫᱚᱭ ᱠᱟᱹᱭ ᱠᱟᱣᱱᱟ᱾ ᱟᱰᱤ ᱢᱟᱨᱟᱝ ᱠᱟᱹᱭ᱾ ᱵᱟᱯᱞᱟ ᱨᱮᱱᱟᱜ ᱠᱩᱠᱢᱩ ᱧᱮᱞ ᱠᱟᱛᱮ᱾ ᱜᱷᱟᱸᱨᱚᱡᱽ ᱛᱚᱞ ᱨᱮᱱᱟᱜ ᱠᱩᱠᱢᱩ ᱧᱮᱞ ᱠᱟᱛᱮ᱾ ᱢᱤᱫᱴᱟᱝ ᱨᱩᱯ ᱜᱩᱱ ᱵᱤᱱᱟᱹ ᱠᱩᱲᱤ ᱦᱚᱯᱚᱱᱟᱜ ᱱᱚᱝᱠᱟᱱ ᱥᱚᱠᱷ ᱥᱟᱫᱷ ᱦᱳᱭ ᱫᱚ ᱟᱰᱤ ᱢᱟᱨᱟᱝ ᱠᱟᱹᱭ ᱠᱟᱱᱟ ᱾ ᱱᱚᱣᱭᱟ ᱥᱟᱶᱛᱟ ᱨᱮ ᱾

***