ᱟᱢ ᱫᱚ ᱟᱹᱫᱽ ᱨᱮ ᱟᱹᱫᱤᱵᱟᱹᱥᱤᱢ ᱵᱟᱥᱟ ᱟᱠᱟᱱ ᱟᱢ ᱫᱚ ᱟᱹᱫᱽ ᱟᱹᱫᱤᱵᱟᱹᱥᱤ ᱨᱮᱢ ᱟᱹᱥᱩᱞ ᱟᱠᱟᱱ ᱟᱹᱫᱤᱵᱟᱹᱥᱤ ᱢᱮᱱᱛᱮᱢ ᱦᱟᱞᱟᱝ ᱧᱩᱢ ᱟᱠᱟᱱ ᱟᱢ ᱫᱚ ᱧᱩᱛᱩᱢ ᱧᱟᱢ ᱛᱮᱢ ᱱᱟᱢᱰᱟᱠ ᱟᱠᱟᱱ ᱾
ᱟᱢ ᱫᱚ ᱟᱹᱫᱤᱵᱟᱹᱥᱤᱢ ᱦᱮᱡ ᱟᱹᱛᱤᱧ ᱟᱠᱟᱱ ᱵᱟᱜᱟᱱ ᱵᱟᱦᱟ ᱯᱤᱯᱲᱤ ᱞᱮᱠᱟᱢ ᱯᱷᱩᱨ ᱯᱟᱥᱱᱟᱣ ᱟᱠᱟᱱ ᱟᱢ ᱫᱚ ᱠᱤᱥᱴᱩ ᱪᱩᱰᱟ ᱥᱟᱠᱟᱢ ᱞᱮᱠᱟ ᱞᱮᱣᱮᱨ ᱠᱚᱫᱚᱨ ᱤᱪᱟᱹᱜ ᱵᱟᱦᱟ ᱫᱷᱟᱹᱨᱛᱤ ᱵᱟᱜᱟᱱ ᱨᱮᱱ ᱥᱤᱨᱡᱚᱱ ᱦᱚᱵᱚᱨ ᱾
ᱟᱢᱟᱜ ᱚᱲᱟᱜ ᱫᱩᱣᱟᱹᱨ ᱛᱟᱢ ᱟᱹᱫᱤᱵᱟᱹᱥᱤ ᱡᱤᱭᱚᱱ
ᱟᱹᱫᱽ ᱠᱷᱚᱱᱟᱜ ᱟᱯᱟᱥᱩᱞᱩᱜ ᱨᱮᱛᱟᱢ ᱡᱩᱰᱟᱹᱥᱤ ᱦᱟᱨᱚᱱ, ᱮᱱ ᱦᱚᱸ ᱟᱹᱫᱤᱵᱟᱹᱥᱤ ᱡᱤᱭᱚᱱ ᱵᱤᱛᱟᱹᱣ ᱫᱚᱢ ᱛᱟᱲᱟᱢ ᱯᱟᱨᱚᱢ ᱟᱹᱛᱤᱧ ᱟᱹᱛᱤᱧ ᱛᱮᱢ ᱪᱟᱞᱟᱜ ᱠᱟᱵ ᱦᱚᱲ ᱛᱟᱭᱚᱢ ᱾
ᱟᱹᱫᱤᱵᱟᱹᱥᱤ ᱡᱤᱭᱚᱱ ᱟᱢᱟᱜ ᱚᱲᱟᱜ ᱫᱩᱣᱟᱹᱨ ᱛᱟᱢ ᱨᱟᱪᱟ
ᱟᱹᱧᱪᱤᱨ ᱯᱟᱹᱧᱪᱤᱨ ᱯᱟᱹᱪᱨᱤ ᱮᱥᱮᱫ ᱮᱴᱮᱰᱟᱢ ᱠᱚᱪᱟ
ᱫᱟᱜ ᱠᱟᱸᱰᱷᱟ ᱜᱟᱰᱥᱟᱹᱫᱤ ᱯᱤᱸᱰᱟᱹ ᱪᱮᱛᱟᱱ ᱪᱚᱲᱚᱢ ᱪᱚᱲᱚᱢ
ᱦᱟᱥᱟ ᱚᱲᱟᱜ ᱵᱮᱲᱦᱟᱭ ᱰᱷᱟᱵᱟᱛᱟᱢ ᱞᱤᱠᱷᱚᱱ ᱜᱚᱲᱦᱚᱱ ᱾
ᱧᱮᱞ ᱛᱮ ᱥᱟᱡᱟᱣ ᱜᱮ ᱢᱮᱱᱟᱜ ᱟᱢᱟᱜ ᱚᱲᱟᱜ
ᱧᱮᱞ ᱢᱚᱜᱚᱱᱚᱜ ᱢᱮᱫ ᱞᱟᱜᱟᱣᱜ ᱛᱟᱠᱚ ᱡᱟᱦᱟᱸᱭ ᱦᱚᱲᱟᱜ
ᱥᱟᱞᱟᱥ ᱧᱮᱞ ᱯᱟᱹᱦᱤᱞ ᱨᱮᱠᱚ ᱧᱮᱞ ᱦᱟᱦᱟᱲᱟᱜ
ᱚᱲᱟᱜ ᱠᱷᱚᱱ ᱚᱰᱚᱠ ᱨᱩᱣᱟᱹᱲ ᱠᱟᱛᱮ ᱠᱚ ᱠᱚᱭᱚᱜ ᱨᱩᱣᱟᱹᱲᱟᱜ ᱾
ᱟᱢ ᱫᱚ ᱟᱹᱫᱤᱵᱟᱹᱥᱤ ᱛᱟᱢ ᱦᱟᱯᱲᱟᱢ ᱵᱤᱫᱟᱹᱞ ᱚᱲᱟᱜ ᱰᱤᱸᱰᱟᱹ
ᱞᱤᱠᱦᱚᱱ ᱜᱚᱲᱦᱚᱱ ᱵᱮᱱᱟᱣ ᱛᱟᱢ ᱵᱮᱲᱦᱟᱭ ᱰᱷᱟᱵᱟ ᱯᱤᱸᱰᱟᱹ
ᱱᱚᱴᱮ ᱠᱩᱞᱦᱤ ᱚᱰᱚᱠᱚᱜ ᱦᱚᱸᱛᱟᱢ ᱩᱥᱩᱞ ᱵᱟᱸᱜᱽᱞᱟ ᱯᱤᱸᱰᱟᱹ
ᱦᱤᱥᱤᱫ ᱦᱚᱭ ᱨᱮ ᱥᱩᱠ ᱡᱟᱹᱯᱤᱫ ᱡᱚᱝᱟᱱᱛᱟᱢ ᱧᱩᱛ ᱛᱟᱞᱟ ᱧᱤᱫᱟᱹ᱾
ᱥᱟᱛᱮ ᱵᱮᱲᱦᱟᱭ ᱛᱮᱢᱟ ᱯᱟᱱᱛᱮ ᱯᱟᱨᱣᱟ ᱪᱮᱞᱟᱝ ᱟᱠᱟ ᱚᱲᱟᱜ ᱯᱤᱸᱰᱟᱹ ᱨᱮᱢᱟ ᱢᱮᱱᱟᱜ ᱯᱚᱛᱟᱣ ᱯᱟᱱᱛᱮ ᱯᱟᱠᱷᱟ
ᱱᱚᱴᱮ ᱵᱟᱲᱜᱮ ᱚᱰᱚᱠᱚᱜ ᱨᱮ ᱛᱟᱢ ᱟᱹᱵᱩᱠ ᱫᱟᱜ ᱠᱟᱸᱰᱷᱟ
ᱯᱟᱹᱶᱪᱤ ᱯᱤᱸᱰᱟᱹ ᱨᱮᱛᱟᱢ ᱪᱤᱛᱟᱹᱨ ᱪᱷᱟᱵᱟ ᱠᱩᱲᱤ ᱠᱚ ᱦᱟᱣ ᱰᱟᱸᱰᱟ ᱾
ᱟᱨ ᱦᱚᱸ ᱟᱢᱟᱜ ᱦᱚᱨᱚᱦ ᱵᱟᱸᱫᱮᱱ ᱛᱟᱢ ᱩᱴᱤᱼᱩᱴᱤ
ᱞᱟᱸᱛ ᱢᱩ ᱨᱮ ᱦᱤᱞᱟᱹᱣᱜ ᱟᱠᱟ ᱢᱟᱹᱠᱲᱤᱛᱟᱢ ᱮᱛᱟᱝ ᱞᱩᱴᱤ
ᱞᱩᱛᱩᱨ ᱨᱮᱛᱟᱢ ᱡᱷᱩᱨᱡᱷᱩᱨᱤ ᱪᱩᱨᱩᱡᱯᱟᱜᱽᱨᱟ ᱯᱩᱴᱠᱤ ᱦᱚᱨᱚᱜ
ᱯᱟᱧᱪᱤ ᱫᱟᱹᱥᱤᱭᱟᱱ ᱥᱟᱭᱟ ᱥᱟᱹᱲᱤ ᱛᱟᱢ ᱚᱛᱮ ᱚᱨᱚᱜ ᱾
ᱴᱟᱭᱟᱞ ᱰᱮᱸᱜᱟ ᱯᱟᱹᱧᱪᱤ ᱫᱟᱹᱥᱤ ᱚᱨᱚᱜ ᱫᱷᱩᱛᱤ
ᱵᱚᱦᱚᱜ ᱫᱟᱹᱦᱲᱤ ᱥᱟᱢᱟᱝ ᱨᱮ ᱛᱟᱞᱟᱝ ᱟᱸᱜᱽᱨᱚᱯ ᱠᱷᱩᱛᱤ
ᱛᱷᱚᱯᱟ ᱥᱩᱫ ᱱᱚᱴᱮ ᱠᱩᱲᱤ ᱵᱤᱫᱽᱞᱟᱹᱭ ᱵᱟᱸᱫᱮ
ᱟᱨᱟᱜ ᱡᱟᱹᱠᱤᱴ ᱯᱟᱹᱧᱪᱤ ᱵᱩᱰᱷᱤ ᱜᱟᱢᱪᱷᱟ ᱞᱟᱫᱮ ᱾
ᱟᱢᱟᱜ ᱛᱤᱨᱮ ᱦᱚᱨᱚᱜ ᱴᱚᱰᱚᱨ ᱢᱮᱱᱟᱜ ᱥᱤᱠᱟᱹ ᱥᱟᱝᱠᱷᱟ
ᱟᱢ ᱜᱮ ᱟᱹᱫᱤᱵᱟᱹᱥᱤ ᱡᱤᱭᱚᱱ ᱛᱟᱢ ᱢᱮᱱᱟᱜ ᱱᱚᱝᱠᱟ
ᱟᱹᱫᱽ ᱨᱤᱱ ᱟᱹᱫᱤᱵᱟᱹᱥᱤ ᱛᱮᱦᱮᱧ ᱨᱤᱱ ᱢᱩᱞᱵᱟᱹᱥᱤ ᱟᱢ ᱜᱮ
ᱟᱹᱫᱤᱵᱟᱹᱥᱤ ᱩᱯᱨᱩᱢ ᱞᱟᱝ ᱡᱚᱜᱟᱣ ᱛᱟᱞᱟᱝ ᱜᱮ ᱾
ᱟᱹᱫᱤᱵᱟᱹᱥᱤ ᱟᱢ ᱧᱮᱞ ᱛᱮ ᱚᱠᱚᱭ ᱵᱟᱭ ᱦᱟᱦᱟᱲᱟᱜ
ᱵᱮᱱᱟᱣᱟᱢ ᱟᱢ ᱫᱚ ᱡᱚᱛᱚ ᱠᱚ ᱞᱟᱹᱜᱤᱫ ᱡᱟᱹᱨᱩᱲᱟᱜ
ᱟᱬᱜᱚᱢ ᱟᱨᱟᱬ ᱱᱟᱦᱮᱞ ᱯᱷᱟᱹᱛᱭᱟᱹᱜ ᱠᱷᱟᱹᱪᱞᱟᱹᱜ ᱦᱟᱴᱟᱜ
ᱵᱚᱧᱵᱚᱧ ᱰᱷᱤᱝᱠᱤᱢ ᱵᱮᱱᱟᱣ ᱦᱳᱲᱳᱢ ᱦᱩᱲᱩᱝ ᱨᱮᱢ ᱠᱷᱟᱴᱟᱣᱜ ᱾
ᱥᱤᱭᱟᱢ ᱠᱷᱤᱞ ᱠᱷᱮᱛ ᱵᱮᱲᱟ ᱵᱟᱲᱜᱮ
ᱦᱳᱲᱳ ᱡᱚᱸᱰᱨᱟ ᱡᱚᱛᱚᱢ ᱟᱨᱡᱟᱣ ᱡᱟᱣ ᱜᱮ
ᱥᱤᱭᱩᱜ ᱨᱟᱲᱟᱭ ᱨᱮ ᱢᱟᱨᱟᱝ ᱴᱟᱺᱰᱤ ᱜᱟᱹᱭᱮᱢ ᱜᱩᱯᱤ
ᱦᱚᱭ ᱦᱤᱥᱤᱫ ᱡᱷᱚᱢᱚᱨᱮ ᱫᱟᱜ ᱨᱮᱛᱟᱢ ᱪᱟᱛᱚᱢ ᱪᱩᱯᱤ ᱾
ᱥᱟᱹᱨᱤ ᱜᱮ ᱜᱮᱞᱵᱟᱨ ᱪᱟᱸᱫᱚ ᱜᱮᱞ ᱯᱮ ᱯᱟᱨᱟᱵᱽ ᱢᱮᱱᱟᱜ ᱛᱟᱢ
ᱯᱚᱨᱚᱵᱽ ᱯᱚᱨᱵᱟᱥ ᱨᱮ ᱵᱚᱭᱦᱟ ᱢᱤᱥᱨᱟ ᱱᱮᱶᱛᱟ ᱠᱚ ᱛᱟᱢ
ᱥᱮᱨᱮᱧ ᱨᱟᱹᱥᱠᱟᱹ ᱮᱱᱮᱡ ᱡᱚᱝ ᱨᱮ ᱡᱩᱫᱟᱹ ᱡᱩᱫᱟᱹ ᱛᱟᱢ
ᱯᱚᱨᱚᱵᱽ ᱢᱟ ᱟᱹᱫᱤᱵᱟᱹᱥᱤ ᱡᱤᱭᱚᱱ ᱥᱚᱨᱚᱥ ᱩᱛᱟᱹᱨ ᱛᱟᱢ ᱾
ᱦᱟᱭ ᱨᱮ ᱟᱹᱫᱤᱵᱟᱹᱥᱤ ᱡᱤᱭᱚᱱ ᱛᱟᱞᱟᱝ ᱾
ᱟᱹᱫᱽ ᱠᱷᱚᱱᱟᱜ ᱛᱮᱦᱮᱧ ᱦᱚᱸ ᱢᱮᱱᱟᱜ ᱛᱟᱞᱟᱝ ᱾᱾
***
