ᱤᱧᱟᱜ ᱦᱚᱵᱚᱨ ᱤᱧᱟᱜ ᱠᱚᱞᱮ ᱨᱮ
ᱟᱭᱳ ᱟᱲᱟᱝ ᱛᱮ ᱪᱮᱨᱮᱡ ᱦᱮᱣᱟ
ᱡᱤᱣᱤ ᱨᱚᱫᱚᱱᱟ ᱥᱟᱨᱟ ᱜᱷᱟᱹᱲᱤᱡ
ᱨᱮᱸᱜᱮᱡ ᱡᱟᱞᱟ ᱞᱟᱹᱠᱛᱤ ᱠᱚᱲᱟᱢ ᱱᱚᱶᱟ ᱾
ᱡᱟᱱᱟᱢ ᱟᱭᱳᱣᱟᱜ ᱠᱚᱲᱟᱢ ᱱᱚᱶᱟ
ᱢᱟᱱᱣᱟ ᱡᱚᱱᱚᱢᱟᱜ ᱨᱮᱦᱮᱫ ᱠᱟᱱᱟ
ᱟᱭᱳ ᱟᱲᱟᱝ ᱛᱮ ᱵᱚᱱ ᱨᱚᱲ ᱞᱟᱸᱫᱟᱭᱟ
ᱱᱚᱶᱟ ᱜᱮ ᱟᱵᱚᱣᱟᱜ ᱵᱩᱴᱟᱹ ᱨᱮᱦᱮᱫ ᱠᱟᱱᱟ ᱾
ᱵᱩᱫᱷᱤ ᱵᱟᱺᱫᱤ ᱟᱨ ᱢᱚᱱ ᱢᱚᱱᱫᱤᱨ ᱨᱮ
ᱦᱩᱱᱟᱹᱨ ᱡᱟᱣ ᱜᱮ ᱥᱮᱬᱟᱭ ᱢᱮ
ᱟᱭᱳ ᱟᱲᱟᱝ ᱟᱢᱮ ᱥᱮᱯᱮᱧ ᱢᱮᱭᱟ
ᱡᱤᱣᱤᱫ ᱡᱚᱱᱚᱢ ᱟᱢ ᱫᱩᱞᱟᱹᱲ ᱢᱮ ᱾
ᱢᱚᱱᱮ ᱡᱤᱣᱤ ᱨᱮ ᱜᱚᱨᱚᱵᱽ ᱵᱟᱹᱛᱤ
ᱡᱩᱞ ᱟᱠᱟᱫ ᱜᱮ ᱫᱚᱦᱚᱭ ᱢᱮ
ᱟᱢ ᱜᱮ ᱡᱩᱣᱟᱹᱱ ᱠᱷᱮᱨᱣᱟᱲ ᱦᱚᱯᱚᱱ
ᱟᱭᱳ ᱟᱲᱟᱝ ᱛᱮᱜᱮ ᱨᱚᱲ ᱢᱮ ᱾
ᱯᱚᱨᱡᱟᱛ ᱟᱜ ᱱᱤᱥᱲᱟᱹᱣ ᱱᱤᱦᱟᱹᱛ
ᱟᱞᱚᱢ ᱵᱮᱸᱜᱮᱫ ᱞᱩᱛᱩᱨ ᱟᱠᱚᱣᱟ
ᱥᱩᱛᱩᱜ ᱥᱟᱶᱦᱟᱭ ᱢᱮ ᱟᱭᱳ ᱟᱲᱟᱝ
ᱵᱟᱜᱟᱱ ᱵᱟᱦᱟ ᱞᱮᱠᱟᱢ ᱵᱟᱦᱟᱜᱼᱟ ᱾
ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱟᱦᱟᱸ ᱠᱚᱬ ᱨᱮᱜᱮ
ᱟᱢᱮᱢ ᱡᱚ ᱵᱟᱦᱟᱜ ᱠᱟᱱ
ᱵᱩᱫᱽ ᱜᱮᱭᱟᱱ ᱦᱟᱢᱮᱨ ᱠᱟᱛᱮ
ᱟᱭᱳ ᱟᱲᱟᱝ ᱦᱚᱸᱢ ᱦᱤᱲᱤᱧ ᱮᱫ ᱠᱟᱱ ᱾
ᱱᱮᱦᱚᱨ ᱢᱮᱱᱟᱜᱼᱟ ᱡᱩᱣᱟᱹᱱ ᱟᱢ ᱴᱷᱮᱱ
ᱟᱭᱳ ᱟᱲᱟᱝ ᱛᱮ ᱨᱚᱲ ᱨᱮᱭᱟᱜ
ᱨᱟᱲᱟᱝ ᱨᱟᱲᱟᱝ ᱟᱭᱳ ᱟᱲᱟᱝ ᱛᱮ
ᱵᱟᱝ ᱵᱚᱱ ᱛᱟᱦᱮᱸᱱ ᱛᱟᱨᱟ ᱠᱮᱪᱟᱜ ᱾
***
