ᱟᱢ ᱜᱮ ᱚᱱᱚᱞᱤᱭᱟᱹ ᱫᱚ
ᱟᱢᱟᱜ ᱛᱤ ᱨᱮᱜᱮ ᱢᱮᱱᱟᱜ
ᱫᱤᱥᱚᱢ ᱟᱹᱭᱫᱟᱹᱨᱤ ᱨᱮᱭᱟᱜ ᱫᱟᱲᱮ ᱾
ᱟᱢ ᱜᱮ ᱱᱟᱜᱟᱢ ᱞᱟᱹᱜᱞᱟᱹᱭᱤᱡ
ᱟᱢ ᱜᱮ ᱟᱜᱟᱢ ᱞᱟᱹᱜᱞᱟᱹᱭᱤᱡ
ᱟᱢ ᱜᱮᱢ ᱨᱚᱯᱷᱟ ᱫᱚᱦᱚᱭᱟ ᱠᱷᱮᱨᱣᱟᱞ ᱥᱟᱶᱦᱮᱫ ᱾
ᱥᱟᱶᱛᱟᱢ ᱱᱤᱨᱚᱲ ᱯᱟᱹᱨᱥᱤᱢ ᱡᱤᱭᱟᱹᱲᱟ
ᱟᱢᱟᱜ ᱠᱟᱹᱢᱤ ᱦᱚᱸ ᱠᱟᱱᱟ
ᱢᱟᱱᱣᱟ ᱠᱚ ᱱᱟᱯᱟᱭ ᱦᱚᱨ ᱰᱟᱦᱟᱨ ᱛᱮ
ᱤᱫᱤ ᱠᱚ ᱨᱮᱭᱟᱜ ᱫᱟᱹᱭᱠᱟᱹ ᱾
ᱥᱟᱶᱦᱮᱫ ᱥᱟᱡᱟᱣ ᱟᱹᱲᱟᱹ ᱜᱟᱵᱟᱱ
ᱟᱢ ᱴᱷᱮᱱ ᱜᱮ ᱢᱮᱱᱟᱜ ᱱᱟᱶᱟ ᱟᱹᱲᱟᱹ ᱨᱮᱭᱟᱜ ᱨᱮᱦᱮᱫ
ᱢᱟᱨᱮ ᱟᱹᱲᱟᱹ ᱵᱟᱧᱪᱟᱣ ᱫᱚᱦᱚ ᱱᱟᱶᱟ ᱟᱹᱲᱟᱹ ᱜᱚᱲᱦᱚᱱ
ᱨᱮᱱᱟᱜ ᱫᱟᱲᱮ ᱟᱢᱟᱜ ᱛᱤᱨᱮ ᱢᱮᱱᱟᱜᱼᱟ ᱾
ᱟᱢ ᱜᱮ ᱧᱩᱛᱟᱹᱛ ᱥᱟᱶᱛᱟ ᱨᱤᱱᱤᱡ ᱦᱤᱨᱟᱹ ᱵᱟᱹᱛᱤ
ᱟᱢ ᱜᱮ ᱱᱟᱜᱟᱢᱮᱢ ᱢᱟᱨᱥᱟᱞ ᱟᱜᱟᱢᱮᱢ ᱟᱨᱥᱟᱞ
ᱟᱢ ᱜᱮ ᱥᱟᱶᱛᱟᱢ ᱥᱚᱨᱮᱥ ᱜᱟᱶᱛᱟᱢ ᱡᱩᱢᱤᱫᱟ ᱾
ᱜᱚᱥᱚᱜ ᱠᱟᱱ ᱥᱟᱱᱛᱟᱲ ᱥᱟᱶᱛᱟ ᱨᱮ ᱱᱟᱶᱟ ᱡᱤᱣᱤᱢ ᱟᱹᱜᱩᱭ
ᱟᱢ ᱜᱮ ᱢᱟᱹᱱᱢᱤᱭᱟᱜ ᱵᱤᱪᱷᱚᱠ ᱢᱚᱱᱮᱢ ᱡᱤᱭᱟᱹᱲ ᱨᱩᱣᱟᱹᱲ
ᱟᱢᱟᱜ ᱱᱚᱱᱚᱞ ᱨᱮᱭᱟᱜ ᱫᱟᱲᱮ ᱛᱮ
ᱢᱟᱹᱱᱢᱤ ᱢᱚᱱᱮᱨᱮ ᱫᱩᱞᱟᱹᱲᱮᱢ ᱥᱟᱨᱥᱟᱣ ᱾
ᱱᱤᱨᱚᱲ ᱥᱟᱶᱛᱟ ᱯᱚᱦᱟ ᱫᱟᱨᱮ ᱨᱚᱦᱚᱭ ᱢᱮ
ᱡᱮᱢᱚᱱ ᱡᱟᱭᱡᱩᱜᱽ ᱛᱟᱦᱮᱸᱱ ᱢᱮ ᱡᱤᱭᱟᱹᱲ
ᱵᱟᱹᱲᱤᱡ ᱦᱚᱭ ᱵᱟᱹᱨᱰᱩ ᱛᱮᱦᱚᱸ ᱡᱮᱢᱚᱱ
ᱟᱞᱚᱢ ᱨᱟᱹᱯᱩᱫᱚᱜ ᱢᱟ ᱥᱟᱶᱦᱮᱫ ᱰᱩᱜᱤ ᱾
ᱥᱟᱶᱛᱟ ᱨᱮᱭᱟᱜ ᱵᱟᱹᱲᱤᱡ ᱧᱮᱞ ᱛᱮ
ᱦᱚᱲᱢᱚ ᱨᱮ ᱞᱤᱸᱜᱤᱱ ᱢᱟᱭᱟᱢ ᱦᱚᱸ ᱞᱚᱞᱚ ᱚᱪᱚᱭ
ᱟᱨ ᱞᱚᱞᱚ ᱢᱟᱭᱟᱢ ᱦᱚᱸᱢ ᱨᱟᱲᱮᱡ ᱚᱪᱚᱭ ᱾
ᱟᱢ ᱜᱮ ᱞᱟᱸᱫᱟ ᱦᱚᱲ ᱦᱚᱸᱢ ᱨᱟᱜ ᱚᱪᱚ ᱠᱚ
ᱟᱨ ᱨᱟᱜ ᱦᱚᱲ ᱦᱚᱸᱢ ᱞᱟᱸᱫᱟ ᱚᱪᱚ ᱠᱚ
ᱩᱱᱟᱹᱜ ᱢᱟᱨᱟᱝ ᱫᱟᱲᱮ ᱛᱟᱢ ᱥᱮᱨᱢᱟ ᱪᱟᱸᱫᱚ ᱤᱯᱤᱞ ᱞᱮᱠᱟ
ᱟᱹᱫᱤᱢ ᱠᱚᱣᱟᱜ ᱢᱮᱫ ᱮᱢ ᱢᱟᱨᱥᱟᱞ ᱾
ᱚᱠᱟ ᱠᱷᱚᱱᱮᱢ ᱦᱟᱞᱟᱝ ᱟᱹᱜᱩ ᱟᱠᱟᱱ
ᱚᱱᱟ ᱫᱤᱥ ᱦᱩᱫᱤᱥ ᱚᱠᱟ ᱠᱷᱚᱱᱮᱢ ᱦᱟᱹᱨ ᱟᱹᱜᱩ ᱟᱱᱟ ᱚᱱᱟ ᱱᱟᱯᱟᱭ ᱩᱭᱦᱟᱹᱨ
ᱚᱠᱟ ᱠᱷᱚᱱᱮᱢ ᱦᱮᱴᱮᱡ ᱟᱹᱜᱩᱭ ᱡᱤᱭᱟᱹᱲ ᱢᱚᱱᱮ
ᱚᱠᱟ ᱠᱷᱚᱱᱮᱢ ᱯᱮᱴᱮᱡ ᱟᱹᱜᱩᱣᱟᱠᱟᱱ ᱥᱚᱨᱚᱥ ᱫᱩᱞᱟᱹᱲ ᱾
ᱞᱤᱸᱜᱤᱱ ᱫᱟᱜ ᱨᱮ ᱜᱤᱛᱤᱞ ᱨᱮᱭᱟᱜ ᱚᱲᱟᱜ ᱮᱢ ᱵᱮᱱᱟᱣ
ᱟᱨ ᱦᱚᱭ ᱵᱟᱹᱨᱰᱩ ᱨᱮ ᱨᱚᱦᱚᱲ ᱥᱟᱠᱟᱢ ᱛᱮ ᱠᱩᱸᱵᱟᱹᱢ ᱵᱮᱱᱟᱣ
ᱫᱷᱟᱹᱨᱛᱤ ᱟᱨ ᱥᱮᱨᱢᱟᱢ ᱢᱤᱞᱟᱹᱣ ᱚᱪᱚ ᱠᱤᱱᱟ
ᱟᱢᱟᱜ ᱱᱚᱱᱚᱞ ᱨᱮᱭᱟᱜ ᱜᱟᱜ ᱥᱩᱛᱟᱹᱢ ᱛᱮ
ᱟᱹᱫᱤᱢ ᱠᱚᱣᱟᱜ ᱡᱤᱭᱚᱱ ᱨᱮᱭᱟᱜ ᱱᱟᱜᱟᱢᱮᱢ ᱜᱟᱜ ᱫᱚᱦᱚᱭ ᱾
***
