ᱛᱟᱨᱟᱥᱤᱧ ᱵᱮᱲᱟ ᱨᱮ ᱥᱤᱧ ᱪᱟᱸᱫᱚ ᱫᱚᱭ ᱦᱟᱺᱥᱩᱨ ᱤᱫᱤᱜ ᱠᱟᱱᱟ ᱾ ᱦᱩᱰᱤᱧ ᱟᱨ ᱥᱮᱬᱟ ᱡᱚᱛᱚ ᱵᱚᱭᱚᱥ ᱨᱤᱱ ᱠᱚᱲᱟ ᱜᱤᱫᱽᱨᱟᱹ ᱟᱨ ᱠᱩᱲᱤ ᱜᱤᱫᱽᱨᱟᱹ ᱠᱚᱣᱟᱜ ᱠᱟᱹᱣᱵᱟᱹᱣ ᱟᱸᱡᱚᱢᱚᱜ ᱠᱟᱱᱟ ᱾ ᱚᱱᱟ ᱥᱟᱶᱛᱮ ᱩᱱᱠᱩ ᱨᱤᱱ ᱟᱭᱳ ᱵᱟᱵᱟ ᱠᱚ ᱫᱚ ᱜᱚᱴᱟ ᱯᱟᱲᱟ ᱠᱚ ᱛᱤᱸᱜᱩ ᱵᱟᱲᱟ ᱟᱠᱟᱱᱟ ᱟᱨ ᱜᱚᱲᱚᱢ ᱦᱟᱲᱟᱢ – ᱜᱚᱲᱚᱢ ᱟᱭᱳ ᱞᱮᱠᱟᱱ ᱠᱚ ᱫᱚ ᱯᱷᱚᱞᱰᱤᱝ ᱢᱟᱹᱪᱤ ᱠᱚᱨᱮ ᱠᱚ ᱫᱩᱲᱩᱵ ᱵᱟᱲᱟ ᱟᱠᱟᱱᱟ ᱾ ᱟᱯᱮ ᱫᱚᱯᱮ ᱢᱮᱱᱮᱫ-ᱟ ᱯᱟᱞᱮᱫ ᱱᱚᱰᱮ ᱫᱚ ᱪᱮᱫ ᱦᱩᱭᱩᱜ ᱠᱟᱱᱟ ᱟᱨ ᱚᱠᱟ ᱨᱮᱭᱟᱜ ᱵᱚᱱ ᱠᱟᱛᱷᱟᱭᱮᱫ-ᱟ ᱾ ᱱᱚᱶᱟ ᱫᱚ ᱟᱞᱮ ᱴᱟᱣᱩᱱ ᱨᱮᱱᱟᱜ ᱢᱟᱨᱟᱝ ᱢᱟᱨᱟᱝ ᱯᱷᱩᱴᱵᱚᱞ ᱴᱟᱺᱰᱤ ᱠᱟᱱᱟ, ᱡᱟᱦᱟᱸᱨᱮ ᱜᱮᱞ ᱜᱚᱴᱟᱝ ᱜᱟᱱ ᱢᱮᱪ ᱢᱤᱫ ᱫᱷᱟᱣ ᱛᱮ ᱠᱷᱮᱞ ᱜᱟᱱᱚᱜ-ᱟ ᱾ ᱟᱹᱰᱤ ᱥᱮᱬᱟ ᱡᱟᱭᱜᱟ ᱠᱟᱱᱟ ᱾ ᱛᱟᱞᱟ ᱛᱟᱞᱟ ᱨᱮ ᱥᱮᱬᱟ ᱥᱮᱬᱟ ᱟᱨ ᱩᱥᱩᱞ ᱩᱥᱩᱞ ᱫᱟᱨᱮ ᱠᱚ ᱢᱮᱱᱟᱜ-ᱟ, ᱟᱨ ᱚᱱᱟ ᱥᱩᱨ ᱠᱚᱨᱮ ᱜᱮ ᱟᱹᱰᱤ ᱥᱮᱬᱟ ᱥᱮᱬᱟ ᱵᱟᱹᱫᱽ ᱠᱚ ᱦᱚᱸ ᱢᱮᱱᱟᱜ-ᱟ ᱾ ᱱᱚᱰᱮ ᱦᱮᱡ ᱞᱮᱱᱠᱷᱟᱱ ᱫᱚ ᱡᱟᱦᱟᱸᱭᱟᱜ ᱜᱚᱥᱚ ᱢᱚᱥᱚ ᱢᱚᱱᱮ ᱨᱟᱹᱥᱠᱟᱹ ᱛᱮ ᱡᱤᱭᱟᱹᱲ ᱜᱚᱫᱚᱜ-ᱟ ᱾ ᱟᱢᱮᱨᱤᱠᱟ ᱨᱮ ᱫᱚ ᱡᱚᱛᱚ ᱴᱟᱣᱩᱱ ᱨᱮᱜᱮ ᱱᱚᱝᱠᱟ ᱠᱷᱮᱞ ᱡᱟᱭᱜᱟ ᱠᱚ ᱵᱮᱱᱟᱣ ᱟᱠᱟᱫ-ᱟ ᱾ ᱱᱚᱝᱠᱟ ᱜᱮ ᱮᱴᱟᱜ ᱠᱷᱮᱞ ᱵᱟᱠᱷᱨᱟ ᱦᱚᱸ ᱠᱷᱮᱞ ᱴᱟᱺᱰᱤ ᱠᱚ ᱢᱮᱱᱟᱜ-ᱟ ᱾ ᱱᱚᱶᱟ ᱠᱚᱫᱚ ᱡᱚᱛᱚ ᱯᱚᱵᱽᱞᱤᱠ ᱯᱷᱥᱤᱞᱤᱴᱤ ᱠᱟᱱᱟ | ᱚᱱᱟ ᱥᱟᱶᱛᱮ ᱯᱨᱟᱭᱤᱣᱮᱴ ᱯᱷᱥᱤᱞᱤᱴᱤ ᱠᱚ ᱢᱟ ᱢᱮᱱᱟᱜ ᱜᱮᱭᱟ ᱾
ᱤᱧ ᱫᱚ ᱵᱟᱹᱵᱩ ᱯᱷᱩᱴᱵᱚᱞ ᱠᱷᱮᱞ ᱤᱧ ᱟᱹᱜᱩ ᱟᱠᱟ ᱫᱮᱭᱟ ᱟᱨ ᱤᱧ ᱨᱤᱱ ᱜᱟᱛᱮ ᱠᱚᱦᱚᱸ ᱟᱠᱚ ᱨᱤᱱ ᱞᱮᱴᱠᱟ ᱥᱟᱞᱟᱜ ᱠᱚ ᱦᱮᱡ ᱟᱠᱟᱱᱟ ᱾ ᱢᱚᱴᱟ-ᱢᱩᱴᱤ ᱟᱞᱮ ᱴᱟᱹᱣᱩᱱ ᱨᱤᱱ ᱡᱮᱛᱮ ᱞᱮᱴᱠᱟ ᱠᱚ ᱦᱮᱡ ᱟᱠᱟᱱᱟ ᱾ ᱱᱚᱝᱠᱟᱱ ᱥᱚᱢᱚᱭ ᱨᱮᱦᱚᱸ ᱤᱧᱤᱡ ᱜᱟᱛᱮ ᱥᱟᱹᱱᱛᱤ ᱫᱚ ᱛᱤᱨᱩᱵ ᱛᱷᱤᱨ ᱟᱠᱟᱱᱟᱭ ᱾ ᱟᱫᱩᱧ ᱠᱩᱞᱤ ᱠᱮᱫᱮᱭᱟ, ᱪᱮᱫ ᱵᱟᱠᱷᱨᱟ ᱱᱚᱝᱠᱟ ᱫᱚᱭ ᱛᱷᱤᱨᱛᱷᱟᱨ ᱟᱠᱟᱱᱟ ᱾ ᱥᱟᱹᱱᱛᱤ ᱞᱟᱹᱭ ᱠᱮᱫᱟᱭ – ᱟᱹᱰᱤ ᱞᱟᱡᱟᱣ ᱯᱟᱲᱟ ᱠᱟᱛᱷᱟ ᱠᱟᱱᱟ ᱾ ᱟᱨ ᱢᱤᱫᱴᱟᱹᱝ ᱜᱟᱛᱮ ᱢᱤᱱᱩᱭ ᱢᱮᱱ ᱠᱮᱫ-ᱟ, ᱫᱮᱞᱟ ᱛᱚᱵᱮ ᱚᱱᱛᱮ ᱥᱟᱦᱟ ᱥᱮᱫ ᱨᱮ ᱞᱟᱹᱭ ᱟᱞᱤᱧ ᱢᱮ ᱾ ᱟᱫᱚ ᱦᱚᱲ ᱜᱟᱫᱮᱞ ᱠᱷᱚᱱ ᱞᱤᱧ ᱯᱷᱟᱨᱟᱠ ᱮᱱᱟ, ᱚᱸᱰᱮ ᱠᱷᱚᱱ ᱦᱚᱸ ᱞᱮᱴᱠᱟ ᱠᱚᱫᱚ ᱞᱮ ᱧᱮᱞ ᱫᱟᱲᱮ ᱟᱠᱚ ᱠᱟᱱ ᱜᱮᱭᱟ ᱾ ᱥᱟᱱᱛᱤ ᱢᱮᱱ ᱠᱮᱫ ᱟᱭ ᱡᱮ ᱛᱮᱦᱮᱧ ᱤᱧᱤᱡ ᱞᱮᱴᱠᱟ ᱫᱚ ᱫᱟᱠᱟ ᱟᱨ ᱵᱷᱩᱸᱰᱤ ᱵᱷᱟᱡᱟᱭ ᱤᱫᱤ ᱞᱮᱫ ᱛᱟᱦᱮᱱᱟᱭ, ᱤᱥᱠᱩᱞ ᱞᱚᱸᱪ ᱵᱟᱠᱷᱨᱟ ᱾ ᱤᱧᱤᱧ ᱢᱮᱱ ᱠᱮᱫ-ᱟ, ᱚᱱᱟ ᱢᱟ ᱟᱹᱰᱤ ᱱᱟᱯᱟᱭ ᱡᱚᱢᱟᱜ ᱠᱟᱱᱟ ᱾ ᱟᱫᱚ ᱪᱮᱫ ᱢᱩᱥᱠᱤᱞ ᱦᱩᱭᱮᱱᱟ ?
ᱠᱞᱟᱥ ᱨᱤᱱ ᱜᱟᱛᱮ ᱠᱚ ᱪᱮᱛᱟ ᱠᱚ ᱢᱮᱛᱟᱫ ᱫᱮᱭᱟ ᱪᱮᱫ ᱛᱤᱡᱩ ᱞᱮᱠᱟᱱ ᱡᱚᱢ ᱠᱚᱢ ᱟᱹᱜᱩ ᱟᱠᱟᱫ-ᱟ, ᱚᱱᱠᱟ ᱢᱮᱱ ᱠᱟᱛᱮ ᱠᱚ ᱞᱟᱸᱫᱟ ᱟᱫᱮᱭᱟ ᱾ ᱵᱟᱹᱵᱩ ᱟᱹᱰᱤ ᱞᱟᱡᱟᱣ ᱯᱟᱲᱟᱭ ᱵᱩᱡᱷᱟᱹᱣ ᱠᱮᱫ-ᱟ ᱟᱨ ᱵᱟᱭ ᱡᱚᱢ ᱞᱮᱫ-ᱟ ᱾ ᱟᱫᱚ ᱤᱥᱠᱩᱞ ᱵᱚᱥ ᱛᱮ ᱚᱲᱟᱜ ᱨᱩᱣᱟᱹᱲ ᱡᱚᱦᱚᱜ ᱢᱟ ᱨᱮᱸᱜᱮᱡ ᱠᱮᱫᱮᱭᱟ ᱾ ᱟᱨ ᱴᱤᱯᱷᱤᱱ ᱵᱟᱝ ᱡᱚᱢ ᱪᱟᱵᱟᱭ ᱠᱷᱟᱱ ᱟᱭᱳᱭ ᱨᱟᱹᱜᱤᱜ-ᱟ ᱾ ᱟᱫᱚ ᱤᱥᱠᱩᱞ ᱵᱚᱥ ᱨᱮ ᱡᱚᱢᱮ ᱮᱦᱚᱵ ᱠᱮᱫ-ᱟ ᱾ ᱮᱱᱠᱷᱟᱱ ᱵᱚᱥ ᱰᱨᱟᱭᱵᱚᱨ ᱮ ᱢᱮᱱ ᱠᱮᱫ-ᱟ ᱡᱮ ᱚᱠᱚᱭᱮ ᱡᱚᱢᱮᱫ-ᱟ ᱟᱨ ᱮ ᱥᱚ ᱚᱪᱚ ᱠᱮᱫ-ᱟ ᱾ ᱟᱫᱚ ᱵᱟᱹᱵᱩ ᱛᱟᱞᱮ ᱫᱚ ᱚᱸᱰᱮ ᱦᱚᱸ ᱵᱟᱭ ᱡᱚᱢ ᱞᱮᱫ-ᱟ, ᱨᱮᱸᱜᱮᱡ ᱛᱮᱜᱮᱭ ᱛᱟᱸᱦᱮ ᱮᱱᱟ ᱾ ᱢᱤᱱᱩᱭ ᱢᱮᱱ ᱠᱮᱫ-ᱟ, – ᱚᱱᱟ ᱛᱮᱜᱮ ᱤᱧ ᱢᱟ ᱟᱞᱮ ᱵᱟᱹᱵᱩ ᱫᱚ ᱠᱮᱱᱴᱤᱱ (canteen) ᱨᱮ ᱡᱚᱢ ᱵᱟᱠᱷᱨᱟ ᱯᱩᱭᱥᱟ.ᱧ ᱮᱢᱟᱭᱟ ᱾ ᱩᱱᱤ ᱫᱚ ᱚᱲᱟᱜ ᱠᱷᱚᱱ ᱡᱚᱢᱟᱜ ᱵᱟᱭ ᱤᱫᱤᱭᱟ ᱾
ᱟᱫᱚ ᱥᱟᱹᱱᱛᱤᱭ ᱢᱮᱱ ᱠᱮᱫ_ᱟ ᱡᱮ ᱛᱤᱱᱟᱹᱜ ᱫᱤᱱ ᱵᱟᱦᱨᱮ ᱨᱮᱱᱟᱜ ᱮ ᱡᱚᱢᱟ ᱾ ᱢᱤᱱᱩᱭ ᱢᱮᱱ ᱠᱮᱫ-ᱟ ᱡᱮ ᱪᱚᱞᱚ ᱵᱚᱱ ᱠᱚᱢᱯᱞᱮᱟ (complain) ᱾ ᱟᱫᱚ ᱤᱧᱤᱧ ᱞᱟᱹᱭ ᱠᱮᱫ-ᱟ ᱡᱮ ᱠᱚᱢᱯᱞᱮᱱ ᱞᱮᱠᱷᱟᱱ ᱯᱟᱪᱷᱮᱫ ᱞᱮᱴᱠᱟ ᱠᱚᱣᱟᱜ ᱜᱽᱨᱮᱰ ᱟᱯᱷᱮᱠᱴᱚᱜ-ᱟ ᱾ ᱵᱟᱵᱚᱱ ᱠᱚᱢᱯᱞᱮᱱ ᱠᱷᱟᱱ ᱪᱮᱫ ᱩᱯᱟᱹᱭ ᱛᱟᱵᱚᱱ ᱾ ᱟᱵᱚ ᱱᱤᱡᱮ ᱛᱮ ᱩᱯᱟᱹᱭ ᱚᱰᱚᱠ ᱦᱩᱭ ᱟᱵᱚᱱᱟ ᱾ ᱤᱱᱟᱹᱜ ᱛᱮᱜᱮ ᱠᱚᱪ ( coach) ᱮ ᱦᱚᱦᱚᱣᱟᱫ ᱞᱮᱭᱟ ᱾ ᱢᱮᱱ ᱠᱮᱫ-ᱟᱭ ᱪᱮ ᱦᱤᱡᱩᱜ ᱠᱟᱱ ᱧᱩᱦᱩᱢ ᱢᱟᱦᱟᱸ ᱫᱚ ᱱᱚᱶᱟ ᱥᱤᱡᱮᱱ ᱨᱮᱱᱟᱜ ᱢᱩᱪᱟᱹᱫ ᱫᱤᱱ ᱠᱟᱱᱟ ᱾ ᱡᱚᱛᱚ ᱵᱷᱚᱞᱮᱱᱴᱤᱭᱚᱨ (volunteer) ᱯᱮ ᱵᱟᱰᱟᱭ ᱜᱮᱭᱟ ᱪᱮᱫ ᱵᱚᱱ ᱪᱮᱠᱟᱭᱟ ᱾
ᱚᱱᱟ ᱦᱤᱞᱚᱜ ᱫᱚ ᱞᱮᱴᱠᱟ ᱠᱚ ᱯᱟᱨᱴᱤ (party ) ᱭᱟᱠᱚ ᱾ ᱞᱮᱴᱠᱟ ᱨᱤᱱ ᱟᱭᱳ ᱵᱟᱵᱟ ᱱᱤᱡᱮ ᱠᱩᱥᱤ ᱟᱨ ᱫᱟᱲᱮ ᱦᱤᱥᱟᱹᱵᱽ ᱛᱮ ᱡᱚᱢᱟᱜ ᱧᱩᱣᱟᱜ ᱡᱤᱱᱤᱥ ᱠᱚ ᱟ.ᱜᱩᱭᱟ ᱾ ᱚᱱᱟ ᱥᱟᱶᱛᱮ ᱯᱮᱯᱟᱨ ᱯᱞᱮᱴ, ᱜᱤᱞᱟᱹᱥ, ᱯᱮᱯᱟᱨ ᱱᱟᱹᱯᱠᱤᱱ ᱞᱮᱠᱟᱱ ᱡᱤᱱᱤᱥ ᱦᱚᱸ ᱠᱚ ᱟᱹᱜᱩᱭᱟ ᱾ ᱤᱱᱟᱹᱜ ᱛᱮᱜᱮ ᱢᱤᱥ ᱨᱤᱴᱟ [ ᱮᱥᱮᱞ ᱟᱢᱮᱨᱤᱠᱟᱱ ᱠᱩᱲᱤ] ᱞᱟᱹᱭ ᱠᱮᱫ-ᱟᱭ ᱡᱮ ᱩᱱᱤ ᱴᱷᱮᱱ ᱞᱤᱥᱴ ᱢᱮᱱᱟᱜ-ᱟ, ᱟᱨ ᱡᱚᱛᱚ ᱞᱮᱴᱠᱟ ᱟᱭᱳ -ᱵᱟᱵᱟ ᱠᱚᱭ ᱵᱷᱮᱡᱟ ᱟᱠᱚᱣᱟ ᱾ ᱧᱩᱦᱩᱢ ᱢᱟᱦᱟᱸ ᱫᱚ ᱤᱧᱤᱧ ᱵᱟᱹᱵᱩ ᱫᱚ ᱥᱚᱠᱮᱨ (Soccer) ᱰᱨᱮᱥ ᱟᱨ ᱡᱚᱛᱟ ᱠᱚᱭ ᱦᱚᱨᱚᱜ ᱥᱟᱯᱲᱟᱣ ᱟᱠᱟᱱᱟ ᱾ ᱤᱱᱟᱹᱜ ᱛᱮᱜᱮ ᱥᱩᱨ ᱨᱤᱱᱤᱡ ᱜᱩᱡᱽᱨᱟᱛᱤ ᱜᱟᱛᱮᱭ ᱦᱮᱡ ᱧᱟᱢ ᱠᱮᱫ ᱞᱤᱧᱟ ᱾ ᱟᱹᱞᱤᱧᱤᱡ ᱵᱟᱹᱵᱩ ᱧᱮᱞ ᱛᱮ ᱢᱮᱱ ᱠᱮᱫ-ᱟᱭ ᱡᱮ ᱟᱹᱵᱤᱱ ᱫᱚ ᱥᱚᱠᱚᱨ (soccer) ᱠᱷᱚᱱ ᱵᱤᱱ ᱨᱩᱣᱟᱹᱲᱮᱱᱟ ? ᱵᱟᱝ ᱜᱮ ᱤᱧᱤᱧ ᱢᱮᱱ ᱠᱤᱫ-ᱟ, ᱟᱨ ᱵᱟᱨ ᱯᱮ ᱜᱷᱱᱴᱟ ᱚᱠᱛᱚ ᱢᱮᱱᱟᱜ ᱜᱮᱭᱟ ᱾ ᱜᱟᱛᱮ ᱞᱟᱹᱭ ᱠᱮᱫ-ᱟᱭ – ᱟᱫᱚ ᱱᱤᱛ ᱠᱷᱚᱱ ᱜᱮ ᱥᱟᱯᱲᱟᱣ ᱟᱠᱟᱱᱟᱭ ᱾ ᱤᱧᱤᱧ ᱢᱮᱱ ᱠᱮᱫ-ᱟ ᱡᱮ ᱛᱮᱦᱮᱧ ᱫᱚ ᱢᱩᱪᱟᱹᱫ ᱫᱤᱱ ᱠᱟᱱ ᱫᱚ
ᱥᱮᱛᱟᱜ ᱵᱮᱨᱮᱫ ᱛᱟᱨᱟ ᱠᱷᱚᱱ ᱮ ᱥᱟᱯᱲᱟᱣ ᱴᱷᱤᱠ ᱟᱠᱟᱱᱟ ᱾ ᱥᱚᱠᱮᱨ (soccer ) ᱫᱚ ᱟᱹᱰᱤᱡ ᱮ ᱠᱩᱥᱤᱭᱟᱜ-ᱟ, ᱥᱩᱱᱤᱵᱟᱨ ᱦᱤᱞᱚᱜ ᱫᱚ ᱥᱮᱛᱟᱜ ᱠᱷᱚᱱ ᱜᱮ ᱥᱟᱯᱲᱣᱟ ᱠᱚᱜ-ᱟᱭ, ᱜᱮᱢ ᱫᱚ ᱥᱮᱛᱟᱜ ᱛᱟᱦᱮᱸᱱ ᱥᱮ ᱛᱤᱠᱤᱱ ᱛᱟᱭᱚᱢ ᱛᱟᱦᱮᱸᱱ ᱾ ᱤᱧᱤᱡ ᱜᱟᱛᱮ ᱫᱚ ᱯᱩᱫᱤᱱᱟ ᱟᱲᱟᱜ [mint] ᱤᱫᱤᱭ ᱦᱮᱡ ᱞᱮᱱᱟ ᱾ ᱟᱞᱮᱭᱟᱜ ᱵᱟᱲᱜᱮ ᱠᱷᱚᱱ ᱯᱩᱫᱤᱱᱟ ᱥᱟᱠᱟᱢ ᱮ ᱥᱤᱫ ᱡᱚᱝ ᱟᱱᱟ ᱾ ᱩᱱᱠᱩ ᱫᱚ ᱵᱟᱹᱠᱤ ᱜᱩᱡᱽᱨᱟᱛᱤ ᱜᱷᱟᱨᱚᱸᱡᱽ ᱞᱮᱠᱟ ᱟᱹᱰᱤ ᱠᱤᱥᱟᱹᱬ ᱜᱮᱭᱟ ᱠᱚ ᱮᱱ ᱨᱮᱦᱚᱸ ᱵᱟᱡᱟᱨ ᱠᱷᱚᱱ ᱯᱩᱫᱤᱱᱟ ᱵᱟᱝ ᱠᱚ ᱠᱤᱨᱤᱧ ᱡᱚᱝᱟ, ᱤᱧᱟᱜ ᱵᱟᱲᱜᱮ ᱠᱷᱚᱱ ᱜᱮᱭ ᱥᱤᱫ ᱤᱫᱤᱭᱟ ᱾ ᱱᱚᱝᱠᱟ ᱜᱮ ᱵᱟᱹᱠᱤ ᱢᱚᱥᱞᱟ ᱠᱚᱦᱚᱸ ᱚᱲᱟᱜ ᱨᱮᱜᱮ ᱠᱚ ᱵᱮᱱᱟᱣᱟ, ᱫᱚᱠᱟᱱ ᱠᱷᱚᱱ ᱫᱚ ᱵᱟᱠᱚ ᱠᱤᱨᱤᱧᱟ ᱾ ᱠᱤᱥᱟᱹᱬ ᱠᱟᱛᱮ ᱦᱚᱸ ᱟᱹᱰᱤ ᱠᱤᱪᱷᱩ ᱚᱲᱟᱜ ᱨᱮᱜᱮ ᱠᱚ ᱵᱮᱱᱟᱣᱟ ᱾ ᱟᱹᱰᱤ ᱫᱷᱟᱣ ᱤᱧ ᱦᱚᱸ ᱟᱠᱚ ᱚᱲᱟᱜ ᱨᱮ ᱵᱮᱱᱟᱣᱟᱜ ᱢᱚᱥᱚᱞᱟ ᱠᱚᱭ ᱟᱹᱜᱩᱭᱟᱹᱧ ᱾ ᱢᱤᱫ ᱜᱷᱟᱹᱲᱤᱠ ᱜᱟᱞᱢᱟᱨᱟᱣ ᱵᱟᱲᱟ ᱠᱟᱛᱮ ᱨᱩᱣᱟᱹᱲ ᱮᱱᱟᱭ ᱾ ᱱᱟᱥᱮ ᱜᱷᱟᱹᱲᱤᱡ ᱛᱟᱭᱚᱢ ᱢᱤᱱᱩᱣᱟᱜ ᱯᱷᱚᱱ ᱦᱮᱡ ᱮᱱᱟ ᱡᱮ ᱚᱠᱟᱨᱮ ᱢᱮᱱᱟᱜ ᱵᱤᱱᱟ ᱾ ᱟᱞᱮ ᱢᱟ ᱥᱚᱠᱮᱨ (Soccer ) ᱴᱟᱺᱰᱤ ᱞᱮ ᱥᱮᱴᱮᱨ ᱴᱷᱤᱠ ᱟᱠᱟᱱᱟ ᱾ ᱢᱮᱛᱟᱫ ᱫᱮᱭᱟᱹᱧ ᱡᱮ ᱟᱹᱞᱤᱧ ᱦᱚᱸ ᱑᱐ ᱴᱤᱲᱤᱡ ᱛᱮ ᱞᱤᱧ ᱥᱮᱴᱮᱨᱚᱜ ᱠᱟᱱᱟ ᱾ ᱥᱚᱠᱚᱨ ᱴᱟᱺᱰᱤ ᱫᱚ ᱟᱞᱮ ᱚᱲᱟᱜ ᱠᱷᱚᱱ ᱕ km ᱥᱟᱺᱜᱤᱧᱟ ᱾ ᱵᱟᱹᱵᱩ ᱢᱟᱭ ᱥᱟᱯᱲᱟᱣ ᱴᱷᱤᱠ ᱟᱠᱟᱱᱟ, ᱞᱚᱜᱚᱱ ᱞᱚᱜᱚᱱ ᱜᱟᱨᱟᱡᱽ ᱠᱷᱚᱱ ᱢᱤᱱᱤ ᱵᱷᱮᱱ ᱰᱨᱟᱭᱤᱵᱽ ᱠᱟᱛᱮ ᱟᱨ ᱕ ᱴᱤᱲᱤᱡ ᱛᱮᱜᱮ ᱟᱹᱞᱤᱧ ᱦᱚᱸ ᱞᱤᱧ ᱥᱮᱴᱮᱨᱮᱱᱟ ᱾
ᱵᱟᱹᱵᱩ ᱫᱚ ᱟᱠᱚᱣᱟᱜ ᱜᱨᱩᱯ ᱨᱮ ᱫᱟᱹᱲ ᱢᱮᱥᱟ ᱮᱱᱟᱭ ᱾ ᱢᱤᱱᱩᱭ ᱠᱩᱞᱤ ᱠᱤᱫᱤᱧᱟ, ᱟᱢ ᱫᱚ ᱪᱮᱫ ᱮᱢ ᱟᱹᱜᱩ ᱟᱠᱟᱫ-ᱟ ? “ᱤᱧ ᱫᱚ ᱪᱷᱚᱞᱮ ᱪᱟᱴ ᱤᱧ ᱟᱹᱜᱩ ᱟᱠᱟᱫ-ᱟ” ᱢᱮᱱᱛᱮᱧ ᱢᱮᱛᱟ ᱫᱮᱭᱟ ᱾ “ᱪᱷᱚᱞᱮ ᱪᱟᱴ, ᱫᱮᱥᱤ ᱡᱚᱢᱟᱜ ? ᱤᱧ ᱫᱚ ᱠᱩᱠᱤ ᱟᱨ ᱵᱤᱥᱠᱩᱴ ᱠᱚᱧ ᱟᱹᱜᱩ ᱟᱠᱟᱫ-ᱟ ᱾ ᱟᱨ ᱦᱚᱸ ᱪᱮᱫ ᱠᱚ ᱵᱟᱠᱚ ᱠᱩᱥᱟᱜ-ᱟ, ᱞᱟᱡᱟᱣᱯᱟᱲᱟ ᱾” ᱢᱤᱱᱩᱭ ᱢᱮᱱ ᱠᱮᱫ-ᱟ . ᱥᱟᱱᱛᱤ ᱫᱚ ᱯᱮᱯᱟᱨ ᱯᱮᱞᱮᱴ ᱟᱨ ᱜᱤᱞᱟᱹᱥ ᱠᱚᱭ ᱟᱹᱜᱩ ᱟᱠᱟᱫ-ᱟ ᱾ ᱱᱟᱥᱮ ᱜᱷᱟᱹᱲᱤᱠ ᱛᱟᱭᱚᱢ ᱜᱮᱢ ᱪᱟᱵᱟᱭᱮᱱᱟ ᱾ ᱜᱮᱢ ᱫᱚ ᱛᱟᱠᱚ ᱰᱨᱚ ᱮᱱᱟ ᱾ ᱴᱟᱺᱰᱤ ᱢᱤᱫ ᱯᱟᱦᱴᱟ ᱨᱮ ᱫᱚ ᱴᱮᱵᱚᱞ ᱨᱮ ᱟᱹᱰᱤ ᱰᱷᱮᱨ ᱡᱚᱢᱟᱜ ᱧᱩᱣᱟᱜ ᱠᱚ ᱟᱨᱮᱸᱡᱽ ᱠᱟᱛᱮ ᱫᱚᱦᱚ ᱞᱮᱱᱟ ᱾ ᱡᱚᱢᱟᱜ ᱨᱮ ᱫᱚ ᱛᱟᱨᱵᱩᱡᱽ, ᱛᱟᱦᱮᱨ, ᱪᱤᱯᱥ, ᱴᱚᱨᱴᱤᱞᱟ, ᱠᱩᱠᱤ, ᱠᱚᱯ ᱠᱮᱠ, ᱯᱤᱡᱟ, ᱟᱨ ᱞᱮᱢᱟᱱᱮᱰ, ᱠᱚᱠ, ᱥᱯᱨᱟᱭᱤᱴ, ᱚᱨᱮᱸᱡᱽ ᱡᱩᱥ, ᱟᱺᱜᱩᱨ ᱡᱩᱥ, ᱯᱟᱭᱤᱱᱟᱯᱮᱞ ᱡᱩᱥ ᱠᱚ ᱛᱟᱦᱮᱸ ᱠᱟᱱᱟ ᱾ ᱞᱮᱴᱠᱟ ᱠᱚ ᱫᱚ ᱡᱚᱢ ᱞᱟᱹᱜᱤᱫ ᱠᱚ ᱦᱚᱨᱚ ᱵᱚᱨᱚᱜ ᱠᱟᱱᱟ ᱾ ᱠᱚᱪ ᱟᱨ ᱢᱤᱫ ᱵᱟᱨ ᱵᱷᱚᱞᱮᱱᱴᱤᱭᱚᱨ (volunteer ) ᱠᱚᱫᱚ ᱞᱮᱴᱠᱟ ᱠᱚ ᱜᱚᱲᱚᱣᱟᱠᱚ ᱠᱟᱱᱟ ᱾ ᱦᱟᱞᱟᱭ ᱦᱟᱞᱟᱭ ᱥᱤᱛᱩᱝ ᱠᱟᱱ ᱛᱟᱦᱮᱸᱱᱟ ᱾
ᱟᱞᱮ ᱫᱚ ᱫᱟᱨᱮ ᱵᱩᱴᱟᱹ ᱠᱚᱨᱮ ᱞᱮ ᱛᱤᱸᱜᱩ ᱵᱟᱲᱟ ᱟᱠᱟᱱᱟ ᱾ ᱞᱮᱴᱠᱟ ᱠᱚᱫᱚ ᱡᱚᱢᱟᱜ ᱡᱚᱢ ᱠᱚ ᱪᱷᱩᱴᱟᱹᱣᱮᱱᱟ ᱾ ᱱᱟᱥᱮ ᱜᱷᱟᱹᱲᱤᱠ ᱛᱮᱜᱮ ᱠᱚ ᱡᱚᱢ ᱪᱟᱵᱟ ᱠᱮᱫ-ᱟ ᱾ ᱟᱫᱚ ᱢᱤᱱᱩᱭ ᱢᱮᱛᱟᱹᱧ ᱠᱟᱱᱟ ᱪᱮ ᱞᱚᱸᱪ ᱨᱮᱱᱟᱜ ᱩᱯᱟᱹᱭ ᱵᱟᱢ ᱞᱟᱹᱭ ᱞᱮᱫ ᱫᱚ ? ᱤᱱᱟᱹᱜ ᱛᱮᱜᱮ ᱢᱤᱫᱴᱟᱹᱝ ᱟᱢᱮᱨᱤᱠᱟᱱ ᱞᱮᱴᱠᱟ ᱟᱭᱳᱭ ᱠᱩᱞᱤ ᱠᱤᱫᱤᱧᱟ – “ᱚᱱᱟ ᱪᱷᱚᱞᱟ ᱞᱮᱠᱟᱱᱟᱜ ᱫᱚ ᱪᱮᱫ ᱠᱟᱱᱟ, ᱞᱮᱴᱠᱟ ᱟᱹᱰᱤ ᱠᱚ ᱠᱩᱥᱤᱭᱟᱫ-ᱟ ? ” ᱟᱫᱚᱧ ᱢᱮᱛᱟᱜ ᱫᱮᱭᱟ ᱚᱱᱟ ᱫᱚ ᱪᱷᱚᱞᱮ ᱪᱟᱴ ᱠᱟᱱᱟ ᱾ ᱚᱱᱟ ᱛᱟᱭᱚᱢ ᱨᱮᱥᱤᱯᱤ ᱦᱚᱸᱭ ᱠᱩᱞᱤ ᱠᱤᱫᱤᱧᱟ ᱾ ᱟᱨ ᱮ ᱢᱮᱱ ᱠᱮᱫ0ᱟ ᱡᱮ ᱟᱡ ᱦᱚᱸ ᱜᱟᱯᱟᱭ ᱵᱮᱱᱟᱣᱟ ᱾ ᱟᱫᱚ ᱢᱤᱱᱩ ᱫᱚᱭ ᱦᱟᱦᱟᱲᱟ ᱧᱚᱜ ᱮᱱᱟ ᱾ ᱤᱧᱮ ᱠᱩᱞᱤ ᱠᱤᱫᱤᱧᱟ ᱡᱮ ᱱᱚᱶᱟ ᱫᱚ ᱪᱮᱫ ᱵᱷᱮᱜᱟᱨ ᱨᱮᱥᱤᱯᱤ ᱥᱤᱵᱤᱞ ᱫᱚ ᱠᱚᱢᱚᱜ ᱨᱮᱦᱚᱸ ᱥᱚ ᱫᱚ ᱵᱟᱭ ᱥᱚᱣᱟ ᱾ ᱱᱚᱶᱟ ᱜᱮ ᱥᱤᱠᱨᱮᱴ ᱫᱚ ᱾ ᱱᱚᱶᱟ ᱞᱮᱠᱟᱜᱮ ᱯᱮᱭᱟᱡᱽ ᱨᱟᱹᱥᱩᱬ ᱞᱮᱠᱟᱱ ᱥᱚ ᱡᱤᱱᱤᱥ ᱵᱟᱝ ᱵᱚᱱ ᱞᱟᱜᱟᱣ ᱞᱮᱠᱷᱟᱱ ᱟᱨ ᱵᱷᱟᱡᱟ ᱠᱚ ᱦᱚᱸ ᱠᱚᱢ ᱫᱷᱟᱨᱟ ᱵᱷᱟᱡᱟ ᱞᱮᱠᱷᱟᱱ ᱡᱚᱛᱚ ᱦᱚᱲ ᱜᱮ ᱠᱚ ᱠᱩᱥᱤᱭᱟᱜ-ᱟ ᱾ ᱱᱚᱝᱠᱟ ᱜᱮ ᱮᱴᱟᱜ ᱡᱚᱢᱟᱜ ᱦᱚᱸ ᱵᱮᱥ ᱫᱷᱟᱨᱟ ᱵᱮᱱᱟᱣ ᱞᱮᱠᱷᱟᱱ ᱡᱚᱛᱚ ᱜᱮ ᱠᱚ ᱠᱚᱥᱤᱭᱟᱜ-ᱟ ᱾
ᱤᱧ ᱱᱚᱣᱟ ᱢᱮᱱ ᱥᱟᱱᱟᱹᱧ ᱠᱟᱱᱟ ᱡᱮ ᱟᱵᱚ ᱡᱚᱛᱚ ᱜᱮ ᱟᱵᱚᱣᱟᱜ ᱡᱚᱢᱟᱜ ᱫᱚ ᱠᱚᱢ ᱟᱞᱚ ᱵᱚᱱ ᱵᱩᱡᱷᱟᱹᱣ ᱢᱟ ᱟᱨ ᱟᱞᱚ ᱵᱚᱱ ᱞᱟᱡᱟᱣᱜ ᱢᱟ ᱾ ᱟᱵᱚᱣᱟᱜ ᱡᱚᱢᱟᱜ ᱡᱩᱫᱤ ᱟᱵᱚ ᱵᱚᱱ ᱨᱮᱥᱯᱮᱠᱴ ᱟᱜ-ᱟ ᱮᱱᱠᱷᱟᱱ ᱜᱮ ᱮᱴᱟᱜ ᱦᱚᱲ ᱦᱚᱸ ᱠᱚ ᱨᱮᱥᱯᱮᱠᱴ ᱟᱜ-ᱟ ᱾ ᱱᱚᱶᱟ ᱫᱚ ᱟᱢᱮᱨᱤᱠᱟ ᱨᱮ ᱤᱱᱤᱡ ᱡᱚᱴᱟᱣ ᱟᱜ ᱜᱷᱚᱴᱚᱱ ᱠᱟᱱᱟ, ᱟᱵᱚ ᱥᱟᱱᱛᱟᱲ ᱡᱚᱢᱟᱜ ᱞᱟᱹᱜᱤᱫ ᱟᱵᱚᱣᱟᱜ ᱢᱚᱱᱮ ᱨᱮᱦᱚᱸ ᱞᱟᱡᱟᱣ ᱟᱞᱚ ᱛᱟᱦᱮᱱ ᱢᱟ, ᱟᱨ ᱱᱚᱝᱠᱟ ᱜᱮ ᱨᱮᱥᱯᱮᱠᱴ ᱛᱟᱦᱸᱮᱱ ᱛᱟᱵᱚᱱ ᱢᱟ ᱾
***
