ᱢᱟᱲᱟᱝ ᱮᱢ ᱢᱮᱱ ᱠᱮᱫᱼᱟ ᱯᱟᱲᱦᱟᱣ ᱯᱩᱨᱟᱹᱣ ᱞᱮᱱ ᱜᱤᱧ ᱛᱚᱵᱮ ᱮᱱᱟᱝ ᱵᱟᱯᱞᱟ ᱠᱟᱛᱷᱟ ᱚᱲᱟᱜ ᱨᱮ ᱫᱚ ᱨᱟᱠᱟᱵᱽ ᱯᱮ ᱾ ᱟᱞᱮ ᱦᱚᱸᱞᱮ ᱢᱮᱱ ᱠᱮᱫᱼᱟ ᱦᱚᱭ ᱛᱚᱵᱮ ᱾ ᱯᱟᱲᱦᱟᱣ ᱮᱱᱟᱢ ᱤᱹ ᱟᱹ, ᱵᱤᱹ ᱟᱹ, ᱮᱢᱹ ᱟᱹ ᱾ ᱚᱱᱟ ᱛᱟᱭᱚᱢ ᱢᱮᱱ ᱠᱮᱫᱼᱟᱢ ᱪᱟᱹᱠᱨᱤ ᱞᱮᱜᱮᱧ ᱛᱚᱵᱮᱧ ᱵᱟᱯᱞᱟᱜᱼᱟ ᱾ ᱟᱞᱮ ᱦᱚᱸᱞᱮ ᱢᱮᱱ ᱠᱮᱫᱼᱟ ᱦᱚᱭ ᱛᱚᱵᱮ ᱾ ᱯᱟᱱᱛᱮ ᱯᱟᱱᱛᱮ ᱛᱮ ᱨᱟᱡᱽᱫᱷᱟᱹᱱᱤ ᱨᱮ ᱥᱚᱨᱠᱟᱨᱤ ᱪᱟᱹᱠᱨᱤ ᱦᱚᱸᱢ ᱧᱟᱢ ᱟᱱᱟ ᱾ ᱱᱤᱛᱚᱜ ᱡᱚᱠᱷᱚᱱ ᱠᱚᱲᱟ ᱚᱲᱟᱜ ᱦᱚᱲ ᱠᱚ ᱠᱩᱥᱤᱵᱟᱹᱥᱤ ᱮᱱᱟ ᱟᱢ ᱫᱚ ᱟᱨᱦᱚᱸᱢ ᱢᱟᱱᱟ ᱮᱫᱼᱟ ᱾ ᱱᱩᱭ ᱢᱟᱛᱚ ᱵᱟᱭ ᱴᱷᱩᱨᱟᱹᱦᱟ, ᱵᱟᱭ ᱰᱚᱵᱽᱨᱚᱣᱟ ᱾ ᱚᱠᱟᱨᱮᱢ ᱢᱮᱱᱟ ᱵᱟᱭ ᱥᱢᱟᱴᱼᱟ ᱾ ᱚᱠᱟᱨᱮ ᱪᱟᱹᱠᱨᱤ ᱦᱩᱰᱤᱧ ᱢᱮᱭᱟ ᱾ ᱚᱠᱟᱨᱮ ᱚᱞ ᱯᱟᱲᱦᱟᱣ ᱠᱷᱟᱴᱚ ᱢᱮᱭᱟ ᱾ ᱱᱩᱭ ᱢᱟᱛᱚ ᱡᱚᱛᱚᱣᱟᱜ ᱛᱮ ᱵᱟᱨᱟᱵᱟᱹᱨᱤ ᱜᱮᱭᱟᱭ ᱾ ᱠᱚᱲᱟ ᱴᱟᱝ ᱤᱱᱡᱤᱱᱤᱭᱟᱨ ᱢᱮᱱᱟᱭᱟ ᱾ ᱚᱲᱟᱜ ᱫᱩᱣᱟᱹᱨ ᱦᱚᱸ ᱛᱟᱠᱚ ᱠᱮᱴᱮᱡ ᱜᱮᱭᱟ ᱾ ᱱᱚᱶᱟ ᱵᱟᱝ ᱵᱟᱝ ᱨᱮᱱᱟᱜ ᱠᱟᱨᱚᱱ ᱞᱟᱹᱭ ᱢᱮ ᱥᱚᱱᱟ, ᱛᱚᱵᱮ ᱩᱛᱟᱹᱨ ᱨᱩᱣᱟᱹᱲ ᱢᱮ ᱾
ᱥᱚᱱᱟ ᱞᱩᱜᱽᱲᱤ ᱞᱟᱯᱚ ᱥᱟᱯᱟᱵ ᱡᱤᱱᱤᱥ ᱥᱟᱢᱴᱟᱣ ᱥᱟᱸᱵᱟᱣ ᱛᱩᱞᱩᱡ ᱥᱩᱴᱠᱮᱥ ᱨᱮ, ᱢᱮᱱᱟᱭ ᱼ ”ᱟᱢ ᱫᱚᱭᱳ ᱠᱷᱟᱹᱞᱤᱱᱟᱜ ᱛᱮᱜᱮ ᱩᱱᱟᱹᱜ ᱮᱢ ᱵᱷᱟᱵᱽᱱᱟᱜᱼᱟ ᱾ ᱱᱤᱛᱚᱜ ᱨᱩᱣᱟᱹᱲ ᱠᱟᱱ ᱵᱮᱲᱟᱨᱮ ᱵᱟᱨᱯᱚᱫᱽ ᱦᱮᱲᱮᱢ ᱦᱮᱲᱮᱢ ᱠᱟᱛᱷᱟ ᱠᱟᱛᱮᱢ ᱵᱤᱫᱟᱹᱭ ᱤᱧ ᱠᱷᱟᱱ ᱵᱟᱝ ᱜᱟᱱᱚᱜᱼᱟ” ᱾ ᱠᱟᱹᱴᱤᱡ ᱡᱩᱨ ᱟᱲᱟᱝ ᱛᱮ ᱪᱟᱪᱟᱨᱦᱟᱫ ᱫᱷᱟᱨᱟ ᱥᱚᱱᱟ ᱟᱭᱳᱭ ᱢᱮᱱᱟ, ”ᱪᱮᱛᱟᱛ ᱦᱮᱲᱮᱢ ᱦᱮᱲᱮᱢ ᱥᱚᱱᱟ ᱾ ᱟᱢ ᱜᱮᱛᱚ ᱥᱮᱛᱟ ᱯᱩᱥᱤ ᱞᱮᱠᱟ ᱜᱷᱟᱸᱣ ᱜᱷᱟᱸᱣ ᱠᱟᱞᱠᱟᱞᱟᱣ ᱚᱪᱚ ᱤᱧ ᱠᱟᱱᱟᱢ ᱾ ᱠᱟᱹᱢᱤ ᱠᱟᱱ ᱨᱮᱦᱚᱸᱧ, ᱫᱩᱲᱩᱵ ᱠᱚᱜ ᱠᱟᱱ ᱨᱮᱦᱚᱸᱧ ᱟᱢᱟᱜ ᱪᱤᱱᱛᱟᱹ ᱾ ᱵᱟᱨᱦᱮ ᱨᱮ ᱠᱩᱲᱤ ᱦᱚᱯᱚᱱ ᱮᱠᱞᱟᱢ ᱛᱟᱦᱮᱸᱱ ᱠᱟᱱᱟ …”
ᱼ ᱚᱠᱟᱨᱮ ᱭᱳ ᱮᱠᱞᱟ ᱾ ᱠᱩᱲᱤ ᱦᱚᱥᱴᱮᱞ ᱨᱮᱜᱮ ᱛᱩᱧ ᱛᱟᱦᱮᱸᱱ ᱠᱟᱱᱟ ᱾
ᱼ ᱤᱧ ᱥᱟᱶ ᱨᱮ ᱪᱮ ᱚᱲᱟᱜ ᱦᱚᱲ ᱥᱟᱶ ᱢᱟᱛᱚ ᱵᱟᱝᱼᱟ ᱾ ᱴᱤᱹ ᱵᱤᱹ ᱨᱮ ᱵᱮᱣᱨᱟ ᱥᱟᱠᱟᱢ ᱨᱮ ᱚᱰᱚᱠᱚᱜ ᱠᱟᱱ ᱛᱤᱨᱞᱟᱹ ᱦᱚᱯᱚᱱ ᱪᱮᱛᱟᱱ ᱱᱟᱦᱟᱪᱟᱨ ᱠᱷᱚᱵᱚᱨ ᱟᱸᱡᱚᱢ ᱞᱮᱠᱷᱟᱱ ᱠᱚᱯᱮᱫ ᱫᱟᱠᱟ ᱵᱟᱝ ᱩᱫᱩᱜ ᱠᱟᱱᱟ ᱪᱮ ᱧᱤᱫᱟᱹ ᱢᱤᱫ ᱫᱷᱟᱣ ᱮᱵᱷᱮᱱ ᱞᱮᱱᱠᱷᱟᱱ ᱢᱮᱫ ᱨᱮ ᱡᱟᱹᱯᱤᱫ ᱦᱚᱸ ᱵᱟᱝ ᱦᱤᱡᱩᱜ ᱠᱟᱱ ᱛᱤᱧᱟ ᱾ ᱠᱩᱲᱤ ᱦᱚᱯᱚᱱ ᱫᱚ ᱦᱟᱥᱟ ᱴᱩᱠᱩᱡ, ᱢᱤᱫ ᱫᱷᱟᱣ ᱧᱚᱞᱦᱟᱫ ᱜᱟᱵᱟᱣ ᱟᱠᱟᱱ ᱠᱷᱟᱱ ᱨᱟᱹᱯᱩᱫ ᱠᱷᱟᱪᱟᱵᱟᱪᱟᱜ ᱵᱤᱪᱠᱚᱢ ᱠᱟᱵᱽᱨᱟ ᱛᱟᱸᱦᱮ ᱥᱟᱹᱨᱤᱜ ᱞᱮᱠᱟ ᱪᱩᱨᱤᱛ ᱨᱮ ᱞᱟᱜᱟᱣ ᱫᱟᱜᱽ ᱛᱤᱥ ᱦᱚᱸ ᱵᱟᱝ ᱪᱷᱟᱰᱟᱣᱜᱼᱟ ᱵᱟᱝ ᱤᱬᱤᱡᱚᱜᱼᱟ ᱾ ᱠᱚᱲᱟ ᱦᱚᱯᱚᱱ ᱢᱟ ᱠᱟᱸᱥᱟ ᱯᱤᱛᱚᱞ ᱾ ᱜᱟᱥᱟᱣ ᱢᱟᱡᱟᱣ ᱫᱩᱞ ᱟᱹᱨᱩᱵ ᱞᱮᱠᱷᱟᱱ ᱟᱨᱦᱚᱸᱭ ᱱᱟᱶᱟ ᱪᱚᱠ ᱪᱚᱠ ᱨᱩᱣᱟᱹᱲᱚᱜᱼᱟ ᱾ ᱼ ᱩᱱᱟᱹᱜ ᱫᱚᱭᱳ ᱟᱞᱚ ᱥᱮᱢ ᱵᱚᱛᱚᱨ ᱵᱷᱟᱵᱽᱱᱟᱜᱼᱟ ᱾ ᱼ ᱟᱞᱚᱢ ᱵᱷᱟᱵᱽᱱᱟᱜᱼᱟ, ᱟᱞᱚᱢ ᱪᱤᱱᱛᱟᱹᱭᱟ ᱢᱮᱱᱛᱮᱭ ᱢᱮᱱ ᱮᱫᱼᱟ ᱥᱚᱱᱟ ᱾ ᱟᱢ ᱡᱚᱠᱷᱚᱱ ᱠᱩᱲᱤ ᱜᱤᱫᱽᱨᱟᱹ ᱨᱤᱱ ᱮᱸᱜᱟᱛᱚᱜᱼᱟᱢ ᱛᱚᱵᱮᱢ ᱵᱩᱡᱷᱟᱹᱣ ᱫᱟᱲᱮᱭᱟᱜᱼᱟ ᱟᱭᱳᱣᱟᱜ ᱢᱚᱱᱮ ᱪᱮᱫ ᱞᱮᱠᱟᱜᱼᱟ ? ᱦᱟᱨᱟ ᱦᱚᱯᱚᱱ ᱮᱨᱟ ᱟᱢ ᱠᱷᱚᱱ ᱥᱟᱺᱜᱤᱧ ᱨᱮᱭ ᱛᱟᱸᱦᱮᱱ ᱠᱷᱟᱱ ᱾ ᱥᱚᱱᱟ ᱥᱟᱯᱲᱟᱣ ᱠᱟᱛᱮ ᱚᱰᱚᱠᱚᱜᱼᱟᱭ ᱾ ᱵᱚᱠᱚᱛ ᱠᱚᱲᱟ ᱨᱟᱹᱡᱩ ᱢᱮᱛᱟᱭᱟᱭ ᱵᱟᱥ ᱥᱴᱟᱸᱰ ᱫᱷᱟᱹᱨᱤᱡ ᱤᱫᱤ ᱜᱚᱫ ᱠᱟᱭ ᱞᱟᱹᱜᱤᱫ ᱾ ᱟᱡ ᱟᱭᱳᱭ ᱡᱚᱦᱟᱨ ᱟᱭᱟᱭ ᱾ ᱟᱡ ᱟᱭᱳ ᱡᱚᱦᱟᱨ ᱟᱛᱟᱝ ᱞᱟᱹᱜᱤᱫ ᱵᱮᱜᱽ ᱵᱟᱲᱟᱜ ᱛᱮᱜᱮ ᱥᱚᱱᱟ ᱡᱚᱦᱟᱨ ᱥᱟᱹᱛ ᱠᱟᱛᱮ ᱵᱚᱠᱚᱛ ᱛᱮᱫ ᱥᱟᱶ ᱥᱠᱩᱴᱤ ᱨᱮ ᱫᱩᱲᱩᱵ ᱮᱱᱟᱭ ᱾
ᱥᱚᱱᱟ ᱟᱡ ᱟᱭᱳ ᱥᱮᱛᱟᱜ ᱯᱟᱭᱟᱨ ᱫᱩᱣᱟᱹᱨ ᱯᱤᱸᱰᱟᱹᱭ ᱞᱩᱸᱜᱼᱰᱟᱹ ᱠᱟᱱᱟ ᱾ ᱥᱚᱱᱟ ᱟᱡ ᱵᱟᱵᱟ ᱥᱩᱨᱛᱮ ᱦᱮᱡ ᱠᱟᱛᱮ ᱢᱮᱛᱟᱭᱟᱭ, “ᱥᱚᱱᱟ ᱟᱭᱳ ᱨᱟᱭᱵᱟᱨᱤᱡ ᱯᱷᱚᱱ ᱞᱟᱜᱼᱟᱭ ᱢᱮᱱ ᱮᱫᱼᱟᱭ ᱠᱚᱲᱟ ᱚᱲᱟᱜ ᱠᱚ ᱠᱷᱚᱵᱚᱨ ᱟᱠᱟᱫᱼᱟ ᱠᱩᱥᱤ ᱵᱟᱝ ᱠᱩᱥᱤ ᱞᱟᱹᱭ ᱨᱩᱣᱟᱹᱲ ᱞᱟᱹᱜᱤᱫ ᱾ ᱟᱨ ᱠᱩᱥᱤᱜ ᱠᱟᱱᱠᱷᱟᱱ ᱵᱚ ᱚᱲᱟᱜ ᱫᱩᱣᱟᱹᱨ ᱧᱮᱧᱮᱞ ᱥᱮᱱᱚᱜ ᱞᱟᱹᱜᱤᱫ ᱱᱮᱸᱰᱟ ᱜᱚᱸᱰᱟ ᱠᱚ ᱧᱟᱢ ᱠᱟᱱᱟ ᱾ ᱢᱟᱥᱮ ᱢᱟ ᱢᱟᱨᱟᱝ ᱢᱟᱹᱭ ᱜᱟᱯᱟᱞᱢᱟᱨᱟᱣ ᱧᱚᱜᱮ ᱢᱮ ᱠᱩᱥᱤ ᱜᱮᱵᱚ ᱞᱟᱹᱭ ᱨᱩᱣᱟᱹᱲ ᱟᱠᱚ ᱠᱟᱱᱟ ᱢᱮᱱᱛᱮ” ᱾ ᱥᱚᱱᱟ ᱟᱡ ᱟᱭᱳ ᱢᱮᱱ ᱨᱩᱣᱟᱹᱲᱟᱭ ”ᱱᱩᱭ ᱢᱟ ᱫᱤᱱ ᱜᱮ ᱛᱟᱭ ᱦᱟᱯᱮ ᱦᱟᱯᱮ” ᱾ ᱟᱫᱚᱭ ᱦᱚᱦᱚᱭᱟ “ᱮ ᱦᱚᱯᱚᱱ ᱢᱟᱹᱭ ᱢᱤᱨᱩ, ᱢᱟᱥᱮ ᱫᱟᱹᱭ ᱴᱷᱮᱱ ᱯᱷᱚᱱ ᱞᱟᱜᱟᱣ ᱧᱚᱜᱽ ᱢᱮᱸ” ᱾ ᱢᱤᱨᱩ ᱥᱚᱱᱟ ᱴᱷᱮᱱ ᱯᱷᱚᱱ ᱞᱟᱜᱟᱣ ᱠᱟᱛᱮ ᱥᱯᱤᱠᱚᱨ ᱚᱱ ᱠᱟᱫᱟᱼᱟᱭ ᱾ ᱥᱚᱱᱟ ᱦᱟᱱᱛᱮ ᱠᱷᱚᱱ ᱯᱷᱚᱱ ᱩᱴᱷᱟᱹᱣ ᱠᱟᱛᱮ ᱢᱮᱱᱟᱭ ᱦᱟᱞᱳ! ᱱᱚᱛᱮ ᱠᱷᱚᱱ ᱟᱡ ᱟᱭᱳ ᱢᱮᱱᱟᱭ ᱦᱟᱞᱳ ᱵᱤᱴᱤ ᱥᱚᱱᱟ, ᱤᱧ ᱜᱮ ᱟᱢ ᱟᱭᱳᱧ ᱢᱮᱱ ᱮᱫᱼᱟ ᱾ᱼ ᱟᱭᱳ ᱡᱚᱦᱟᱨ ᱾ ᱩᱱᱟᱹᱜ ᱥᱮᱛᱟᱜ ᱨᱮᱢ ᱯᱷᱚᱱ ᱠᱮᱫ ᱫᱚ ᱾ ᱪᱮᱫ ᱞᱟᱹᱠᱛᱤ ᱢᱮᱱᱟᱜᱼᱟ ᱥᱮ ᱪᱮᱫ ?
ᱼ ᱦᱚᱭ ᱢᱟᱹᱭ ᱠᱷᱚᱵᱚᱨ ᱜᱮ ᱚᱱᱠᱟᱱᱟ ᱛᱚ ᱦᱚᱨᱚᱵᱚᱨᱚᱜ ᱠᱟᱱᱟᱹᱧ ᱠᱩᱜᱼᱞᱤ ᱾ ᱤᱭᱟᱹ, ᱩᱱᱠᱩ ᱠᱚᱲᱟ ᱚᱲᱟᱜ ᱯᱟᱦᱴᱟ ᱠᱷᱚᱱ ᱠᱚ ᱠᱷᱚᱵᱚᱨ ᱟᱠᱟᱫᱼᱟ ᱠᱩᱥᱤ ᱵᱟᱝ ᱠᱩᱥᱤ ᱞᱟᱹᱭ ᱨᱩᱣᱟᱹᱲ ᱾ ᱠᱩᱞᱤ ᱮᱫ ᱢᱮ ᱨᱮᱦᱚᱸ ᱴᱷᱟᱹᱣᱠᱟᱹ ᱥᱟᱹᱦᱤᱸᱧ ᱪᱮᱫ ᱦᱚᱸ ᱵᱟᱢ ᱢᱮᱱ ᱮᱫᱼᱟ ᱾ ᱟᱫᱚ ᱛᱚᱵᱮ ᱠᱩᱥᱤ ᱜᱮᱞᱮ ᱞᱟᱹᱭ ᱨᱩᱣᱟᱹᱲ ᱟᱠᱚ ᱠᱟᱱᱟ ᱾ ᱥᱟᱶᱛᱮ ᱚᱲᱟᱜ ᱫᱩᱣᱟᱹᱨ ᱥᱟᱨ ᱥᱟᱹᱜᱩᱱ ᱧᱮᱞ ᱞᱟᱹᱜᱤᱫ ᱱᱮᱰᱟ ᱦᱚᱸᱠᱚ ᱧᱟᱢ ᱠᱟᱱᱟ ᱾ ᱩᱱ ᱡᱚᱦᱚᱜ ᱫᱚ ᱦᱤᱡᱩᱜ ᱢᱮᱜᱮ ᱦᱟᱸᱜ ᱾ ᱛᱤᱥ ᱠᱚᱛᱮᱢ ᱚᱯᱥᱚᱨᱚᱜᱼᱟ ᱞᱟᱹᱭ ᱟᱞᱮ ᱢᱮ᱾ ᱥᱚᱱᱟ ᱪᱮᱫ ᱦᱚᱸ ᱵᱟᱭ ᱦᱮᱸ ᱦᱩᱸᱭᱟ ᱾ ᱮᱱᱠᱷᱟᱱ ᱟᱡ ᱟᱭᱳ ᱢᱮᱱᱟᱭ ᱟᱸᱡᱚᱢ ᱮᱫ ᱟᱢ ᱥᱮ ᱵᱟᱝ ᱪᱮᱫ ᱦᱚᱸ ᱵᱟᱢ ᱨᱚᱲ ᱠᱟᱱ ᱫᱚ ᱾
ᱼ ᱟᱸᱡᱚᱢ ᱮᱫᱼᱟᱹᱧ ᱭᱳ, ᱦᱟᱯᱮ ᱢᱤᱫ ᱰᱚᱸᱰᱮᱠ ᱠᱟᱞᱮᱱᱰᱟᱨ ᱤᱧ ᱧᱮᱞ ᱧᱚᱜ ᱞᱮᱜᱮ, ᱢᱮᱱᱠᱟᱛᱮ ᱥᱚᱱᱟ ᱯᱷᱚᱱ ᱮ ᱠᱟᱴᱟᱣ ᱠᱟᱫᱼᱟ ᱾
ᱠᱤᱪᱷᱩ ᱜᱷᱟᱹᱲᱤᱠ ᱛᱟᱭᱚᱢ ᱴᱤᱝ ᱢᱮᱱᱛᱮ ᱢᱚᱵᱟᱭᱤᱞ ᱥᱟᱰᱮ ᱮᱱᱟ ᱾ ᱢᱤᱨᱩ ᱧᱮᱞ ᱠᱟᱛᱮ ᱢᱮᱱ ᱟᱭ ᱫᱟᱹᱭᱟᱜ ᱢᱮᱥᱮᱡᱽ ᱦᱮᱡ ᱮᱱᱟ ᱾ ᱦᱟᱯᱮᱧ ᱯᱟᱲᱦᱟᱣ ᱞᱮᱜᱮ ᱾ ᱟᱛᱨᱟᱭ ᱯᱟᱲᱦᱟᱣ ᱠᱟᱜᱼᱟ ᱢᱮᱫ ᱨᱮ ᱢᱮᱫ ᱫᱟᱜ ᱜᱮᱛᱟᱭ ᱯᱮᱲᱮᱼᱯᱮᱲᱮ ᱥᱮᱛᱮᱧᱚᱜᱼᱟ ᱾ ᱚᱞ ᱟᱹᱲᱟᱹ ᱠᱚ ᱫᱟᱜ ᱨᱮ ᱪᱟᱯᱮ ᱰᱚᱭᱞᱟᱝᱼᱚᱜ ᱠᱟᱱ ᱞᱮᱠᱟᱭ ᱧᱮᱞᱟ ᱾ ᱵᱟᱭ ᱯᱟᱲᱦᱟᱣ ᱯᱩᱨᱟᱹᱣ ᱫᱟᱲᱮᱭᱟᱜᱼᱟ ᱾ ᱪᱮᱫ ᱦᱚᱯᱚᱱ ᱢᱟᱹᱭ, ᱫᱟᱹᱭ ᱫᱚᱭ ᱠᱷᱚᱵᱚᱨ ᱟᱠᱟᱫᱼᱟ ᱾ ᱟᱡ ᱟᱭᱳᱣᱟᱜ ᱱᱚᱶᱟ ᱨᱚᱲ ᱟᱲᱟᱝ ᱛᱮ ᱢᱤᱨᱩ ᱵᱷᱮᱭᱟᱬᱚᱜ ᱛᱮ ᱵᱚᱠᱚᱛ ᱛᱮᱫ ᱢᱚᱵᱟᱭᱤᱞ ᱮ ᱮᱢᱟᱭᱟ ᱾ ᱨᱟᱹᱡᱩ ᱯᱟᱲᱦᱟᱣ ᱠᱟᱛᱮ ᱞᱟᱹᱭ ᱟᱠᱚᱣᱟᱭ ᱫᱟᱹᱭ ᱫᱚ ᱪᱷᱟᱹᱛᱤᱠ ᱥᱟᱶ ᱠᱳᱴ ᱨᱮ ᱵᱟᱯᱞᱟ ᱥᱟᱹᱛ ᱟᱠᱟᱱᱟᱭ ᱾ ᱟᱡ ᱟᱭᱳ ᱢᱮᱱᱟᱭ ᱦᱟᱸ!! ᱪᱮᱫ ᱮᱢ ᱢᱮᱱ ᱠᱮᱫᱼᱟ ᱵᱮᱴᱟ ? ᱵᱟᱯᱞᱟ ᱮᱱᱟᱭ ᱪᱷᱟᱹᱛᱤᱠ ᱥᱟᱶ ᱾ ᱚᱱᱟᱛᱮ ᱫᱤᱱ ᱜᱮ ᱢᱮᱱᱟᱭ……ᱹᱹ᱾ ᱠᱟᱛᱷᱟ ᱨᱮᱡ ᱠᱟᱛᱮ ᱟᱡ ᱵᱟᱵᱟᱭ ᱢᱮᱱᱟ “ᱪᱮᱫ ᱞᱮᱠᱟᱱ ᱟᱭᱳ ᱠᱟᱱᱟᱢ ᱟᱢ ᱫᱚ ? ᱦᱚᱯᱚᱱ ᱮᱨᱟ ᱛᱟᱢ ᱩᱱᱟᱹᱜ ᱠᱟᱸᱰᱚ ᱠᱟᱹᱨᱫᱷᱟᱱᱤ ᱠᱮᱫ ᱜᱮᱭᱟᱭ ᱟᱨ ᱟᱢ ᱫᱚ ᱠᱷᱚᱵᱚᱨ ᱚᱱᱛᱚᱨ ᱜᱮ ᱵᱟᱝ” ᱾
ᱼ ᱱᱤᱛ ᱫᱚᱢ ᱢᱮᱱ ᱵᱟᱝ ᱠᱷᱟᱱ ᱥᱚᱱᱟ ᱵᱟᱵᱟ ᱾ ᱩᱱ ᱫᱤᱱᱨᱮ ᱡᱟᱶᱟᱭ ᱠᱟᱭᱟ ᱵᱚ ᱢᱮᱱ ᱠᱷᱟᱱᱤᱧ ᱢᱮᱱ ᱟᱢ ᱵᱷᱟᱹᱜᱤ ᱚᱞᱚᱜ ᱠᱟᱱᱟᱭ ᱚᱞ ᱚᱪᱚᱣᱟᱱ ᱮ ᱾ ᱪᱟᱹᱠᱨᱤ ᱧᱟᱢ ᱠᱮᱫ ᱠᱷᱟᱱ ᱜᱚᱴᱟᱯᱟᱲᱟᱢ ᱞᱟᱹᱭ ᱟᱹᱪᱩᱨ ᱠᱮᱫᱼᱟ ᱤᱧᱤᱡ ᱦᱚᱯᱚᱱ ᱮᱨᱟ ᱟᱹᱛᱩ ᱴᱚᱞᱟ ᱨᱮᱱᱟᱜ ᱧᱩᱛᱩᱢ ᱮ ᱫᱚᱦᱚ ᱠᱮᱫᱼᱟ ᱢᱮᱱᱛᱮ ᱾ ᱱᱤᱛᱚᱜ ᱵᱟᱹᱲᱤᱡ ᱮᱱᱠᱷᱟᱱᱮ ᱢᱮᱛᱟᱹᱧ ᱠᱟᱱᱟᱢ ᱟᱢᱤᱡ ᱜᱤᱫᱽᱨᱟᱹ ᱾ ᱪᱮᱫ ᱞᱮᱠᱟᱱ ᱦᱚᱯᱚᱱ ᱮᱨᱟᱢ ᱡᱟᱱᱟᱢ ᱟᱠᱟᱫᱮᱭᱟ ?
ᱼ ᱦᱚᱸ ᱢᱮᱱ ᱮᱫᱼᱟᱹᱧ ᱥᱚᱱᱟ ᱫᱚ ᱤᱧ ᱞᱟᱹᱜᱤᱫ ᱛᱮᱫᱚᱭ ᱜᱚᱡ ᱮᱱᱟ ᱾ ᱱᱚᱶᱟ ᱚᱲᱟᱜ ᱫᱚᱭ ᱧᱮᱞ ᱧᱟᱢᱟ ᱤᱠᱷᱟᱹᱱ ᱵᱚᱞᱚᱜ ᱫᱩᱣᱟᱹᱨ ᱫᱚ ᱛᱤᱥ ᱦᱚᱸ ᱵᱟᱭ ᱧᱟᱢᱟ ᱾ ᱥᱩᱫᱟᱹᱭ ᱫᱤᱱ ᱟᱡ ᱞᱟᱹᱜᱤᱫ ᱥᱤᱞᱯᱤᱧ ᱥᱤᱧ ᱯᱟᱴᱮᱫ ᱥᱟᱹᱨᱤ ᱮᱱᱟ ᱾ ᱟᱯᱮ ᱚᱠᱚᱭ ᱦᱚᱸ ᱟᱡ ᱥᱟᱶ ᱟᱞᱚ ᱯᱮ ᱜᱟᱯᱟᱞᱢᱟᱨᱟᱣᱜᱼᱟ ᱪᱮ ᱥᱟᱹᱜᱟᱹᱭ ᱦᱚᱸ ᱟᱞᱚ ᱯᱮ ᱡᱚᱲᱟᱣᱟ ᱾ ᱵᱟᱝᱠᱷᱟᱱ ᱤᱧᱟᱜ ᱚᱥᱚᱞ ᱨᱟᱹᱜᱤ ᱯᱮ ᱧᱮᱞᱟ ᱾
ᱥᱮᱛᱟᱜ ᱥᱮᱛᱟᱜ ᱪᱮᱫ ᱠᱚ ᱨᱮᱵᱮᱠᱮᱪᱮᱜ ᱠᱟᱱᱟ ᱢᱮᱱ ᱠᱟᱛᱮ ᱪᱩᱞᱦᱟᱹ ᱨᱮ ᱡᱩᱨᱩᱜ ᱞᱮᱱ ᱠᱤᱱ ᱥᱚᱱᱟ ᱜᱚᱲᱚᱢ ᱵᱟᱵᱟ ᱟᱨ ᱜᱚᱲᱚᱢ ᱟᱭᱳ ᱚᱲᱟᱜ ᱠᱷᱚᱱ ᱠᱤᱱ ᱚᱰᱚᱠᱚᱜᱼᱟ ᱾ ᱥᱚᱱᱟ ᱟᱡ ᱵᱟᱵᱟ ᱥᱚᱱᱟᱦᱟᱜ ᱜᱩᱱ ᱠᱟᱹᱨᱥᱟᱹᱫᱤ ᱞᱟᱹᱭ ᱯᱩᱨᱟᱹᱣ ᱟᱠᱟᱫ ᱟᱭ ᱪᱮ ᱟᱹᱣᱨᱤ, ᱤᱱᱟᱹᱜ ᱠᱷᱟᱱ ᱮᱦᱮᱢ ᱮᱦᱮᱢ ᱠᱷᱩᱜ ᱠᱟᱛᱮ ᱨᱟᱭᱵᱟᱨᱤᱡ ᱪᱷᱟᱴᱠᱟ ᱠᱷᱚᱱ ᱦᱚᱦᱚ ᱦᱚᱦᱚᱛᱮ ᱦᱤᱡᱩᱜᱼᱟᱭ, “ᱪᱮᱞᱮ ᱵᱚᱭᱦᱟ, ᱚᱲᱟᱜ ᱨᱮ ᱢᱮᱱᱟᱢᱟ ᱪᱮ ᱵᱟᱝ ᱾ ᱥᱮᱛᱟᱜ ᱨᱮ ᱯᱮᱲᱟᱧ ᱥᱮᱴᱮᱨ ᱟᱫ ᱯᱮᱭᱟ” ᱾ ᱨᱚᱲ ᱨᱚᱲ ᱛᱮ ᱟᱠᱚ ᱥᱩᱨ ᱮ ᱥᱮᱴᱮᱨ ᱮᱱᱠᱷᱟᱱ ᱥᱚᱱᱟ ᱟᱭᱳ ᱪᱩᱨᱟᱹᱢᱟᱨᱟ ᱯᱟᱨᱠᱚᱢ ᱵᱤᱞ ᱜᱚᱫᱟᱭ ᱟᱨ ᱢᱮᱱᱟᱭ “ᱢᱟ ᱵᱟ ᱫᱩᱲᱩᱵ ᱵᱤᱱ” ᱾
ᱨᱟᱭᱵᱟᱨᱤᱡ ᱧᱮᱞᱛᱮ ᱜᱚᱲᱚᱢ ᱵᱟᱵᱟ ᱟᱨ ᱜᱚᱲᱚᱢ ᱟᱭᱳ ᱧᱩᱨ ᱮᱱ ᱞᱮᱠᱟ ᱯᱤᱸᱰᱟᱹ ᱨᱮᱠᱤᱱ ᱫᱩᱲᱩᱵ ᱮᱱᱟ ᱾ ᱢᱟᱹᱱᱢᱤ ᱡᱚᱠᱷᱚᱱ ᱴᱟᱴᱠᱟ ᱫᱩᱠ ᱵᱟᱝᱠᱷᱟᱱ ᱠᱩᱠᱢᱩ ᱛᱮ ᱨᱮᱦᱚᱸ ᱵᱟᱝ ᱵᱷᱟᱹᱵᱤ ᱠᱟᱜ ᱠᱟᱛᱷᱟ ᱠᱷᱚᱵᱚᱨ ᱠᱚᱭ ᱟᱸᱡᱚᱢᱟ ᱮᱠᱷᱟᱱ ᱱᱚᱝᱠᱟ ᱜᱮ ᱟᱹᱠᱤᱞ ᱜᱮᱭᱟᱱ ᱛᱟᱭ ᱛᱩᱠᱩᱱ ᱥᱩᱱ ᱩᱛᱟᱨᱚᱜᱼᱟ ᱾ ᱵᱩᱫᱷᱤ ᱵᱷᱚᱨᱥᱟ ᱟᱫᱚᱜᱼᱟ ᱾ ᱥᱟᱶᱛᱮ ᱨᱚᱲ ᱵᱮᱵᱷᱟᱨ ᱠᱚᱦᱚᱸᱭ ᱦᱤᱲᱤᱧᱟ ᱾
ᱡᱚᱛᱚ ᱦᱚᱲ ᱠᱚ ᱛᱷᱤᱨᱛᱷᱟᱨ ᱵᱟᱲᱟ ᱟᱠᱟᱱ ᱧᱮᱞᱛᱮ ᱨᱟᱭᱵᱟᱨᱤᱡ ᱵᱷᱟᱴᱚ ᱯᱟᱨᱠᱚᱢ ᱨᱮ ᱫᱩᱲᱩᱵ ᱛᱩᱞᱩᱡ ᱢᱮᱱᱟᱭ “ᱞᱟᱛᱟᱨ ᱴᱚᱞᱟᱧ ᱪᱟᱞᱟᱣ ᱞᱮᱱᱟ ᱫᱚᱠᱟᱱ ᱠᱷᱚᱱ ᱥᱟᱵᱚᱱ ᱠᱤᱨᱤᱧ ᱾ ᱟᱫᱚ ᱨᱩᱣᱟᱹᱲ ᱡᱚᱦᱚᱜ ᱤᱧ ᱵᱚᱞᱚ ᱛᱟᱨᱟᱜ ᱠᱟᱱᱟ ᱾ ᱥᱟᱶᱛᱮ ᱠᱷᱚᱵᱚᱨ ᱠᱚᱦᱚᱸᱧ ᱤᱫᱤ ᱛᱟᱨᱟᱭᱟ ᱢᱮᱱᱛᱮ” ᱾ ᱥᱚᱱᱟ ᱟᱭᱳ ᱥᱚᱱᱟ ᱵᱟᱵᱟᱭ ᱠᱚᱭᱚᱜ ᱮᱭᱟ ᱾ ᱥᱚᱱᱟ ᱵᱟᱵᱟ ᱫᱚ ᱜᱚᱲᱚᱢ ᱵᱟᱵᱟ ᱜᱚᱲᱚᱢ ᱟᱭᱳ ᱥᱮᱫ ᱠᱚᱭᱚᱜᱟᱭ ᱾ ᱮᱱᱠᱷᱟᱱ ᱥᱚᱱᱟ ᱟᱡ ᱜᱚᱲᱚᱢ ᱵᱟᱵᱟ ᱜᱮ ᱨᱚᱲ ᱮ ᱮᱦᱚᱵᱟ, “ᱟᱞᱮ ᱢᱟ ᱡᱚᱛᱚ ᱦᱚᱲ ᱠᱩᱥᱤ ᱜᱮ ᱵᱟᱝ ᱠᱩᱥᱤ ᱠᱚᱫᱚ ᱵᱟᱝᱼᱟ ᱾ ᱤᱠᱷᱟᱹᱱ ᱜᱚᱲᱚᱢ ᱠᱩᱲᱤ ᱥᱚᱱᱟ ᱜᱮ ᱵᱟᱯᱞᱟᱜ ᱵᱟᱭ ᱨᱮᱵᱮᱱ ᱠᱟᱱᱟ ᱾ ᱰᱟᱺᱜᱽᱣᱟᱹ ᱛᱮ ᱛᱟᱦᱮᱸᱱ ᱮ ᱨᱤᱠᱟᱹ ᱮᱫᱼᱟ” ᱾ ᱜᱚᱲᱚᱢ ᱟᱭᱳ ᱛᱚᱸᱜᱮᱛᱮ ᱢᱮᱱ ᱛᱟᱨᱟᱭᱟᱭ “ᱦᱩᱰᱤᱧ ᱠᱩᱲᱤ ᱠᱩᱥᱤᱜ ᱠᱷᱟᱱ ᱠᱚ ᱞᱮ ᱮᱢᱚᱜᱼᱟ” ᱾ ᱵᱷᱟᱴᱚᱭ ᱢᱮᱱᱟ “ᱛᱚᱵᱮ ᱱᱚᱝᱠᱟ ᱠᱟᱛᱷᱟ ? ᱮᱱᱠᱷᱟᱱ ᱠᱩᱞᱤ ᱞᱮᱠᱚ ᱜᱤᱧ ᱪᱮᱫ ᱠᱚ ᱢᱮᱱ ᱮᱫᱼᱟ” ᱾ ᱟᱹᱛᱩ ᱴᱚᱞᱟ, ᱫᱤᱥᱚᱢ ᱫᱩᱱᱤᱭᱟᱹ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱜᱟᱯᱟᱞᱢᱟᱨᱟᱣ ᱠᱟᱛᱮ ᱵᱷᱟᱴᱚ ᱫᱚᱭ ᱨᱩᱣᱟᱹᱲᱟ ᱾
ᱵᱷᱟᱴᱚᱣᱟᱜ ᱯᱷᱚᱱ ᱠᱷᱚᱱ ᱠᱷᱚᱵᱚᱨ ᱟᱸᱡᱚᱢ ᱠᱟᱛᱮ ᱨᱟᱡᱽᱢᱟᱞ ᱛᱮᱠᱚ ᱚᱲᱟᱜ ᱨᱮ ᱵᱩᱜᱤ ᱛᱟᱨᱟ ᱠᱚ ᱠᱩᱥᱤᱜᱼᱟ ᱾ ᱪᱮᱫᱟᱜ ᱵᱟᱝ ᱢᱟ ᱡᱚᱠᱷᱚᱱ ᱨᱟᱡᱽᱢᱟᱞ ᱯᱩᱭᱞᱩ ᱫᱷᱟᱣ ᱵᱟᱹᱦᱩ ᱧᱮᱧᱮᱞ ᱠᱷᱚᱱ ᱨᱩᱣᱟᱹᱲ ᱮᱱᱟᱭ ᱟᱡ ᱟᱭᱳ ᱞᱟᱹᱭ ᱟᱭᱟᱭ “ᱥᱚᱱᱟ ᱪᱮᱨᱦᱟ ᱟᱭ ᱵᱮᱱᱟᱣ ᱵᱚᱸᱜᱟ ᱞᱮᱠᱟ ᱾ ᱟᱨ ᱢᱩᱨᱛᱤ ᱞᱮᱠᱟ ᱜᱮ ᱟᱹᱰᱤ ᱫᱷᱤᱨᱢᱚᱱ ᱛᱷᱤᱨᱛᱷᱟᱨ ᱾ ᱤᱠᱷᱟᱹᱱ ᱵᱚᱠᱚᱛ ᱠᱩᱲᱤ ᱢᱤᱨᱩ ᱫᱚ ᱞᱮᱜᱮᱡ ᱵᱟᱦᱟ ᱞᱮᱠᱟ ᱞᱟᱸᱫᱟ ᱞᱟᱸᱫᱟ ᱢᱮᱫ ᱟᱦᱟ ᱛᱟᱭ ᱾ ᱤᱧ ᱫᱚ ᱦᱩᱰᱤᱧ ᱠᱩᱲᱤ ᱜᱤᱧ ᱠᱩᱥᱤ ᱟᱫᱮᱭᱟ ᱾
ᱚᱱᱠᱟᱜᱮ ᱨᱟᱡᱽᱢᱟᱞ ᱟᱭᱳ ᱦᱚᱸ ᱧᱮᱧᱮᱞ ᱠᱷᱚᱱ ᱨᱩᱣᱟᱹᱲ ᱦᱮᱡ ᱠᱟᱛᱮ ᱟᱡ ᱵᱟᱵᱟᱭ ᱞᱟᱹᱭ ᱟᱭᱟ “ᱥᱚᱱᱟ ᱫᱚ ᱡᱟᱦᱟᱸ ᱛᱤᱱᱟᱹᱜ ᱮᱢ ᱠᱩᱞᱤ ᱮᱭᱟ ᱤᱱᱟᱹᱜ ᱜᱮ ᱨᱚᱲ ᱟᱭ ᱾ ᱤᱠᱷᱟᱹᱱ ᱢᱤᱨᱩ ᱫᱚ ᱠᱩᱞᱤ ᱫᱟᱨᱟᱢ ᱢᱮᱭᱟᱭ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱾ ᱟᱡᱟᱜ ᱨᱚᱲ ᱵᱮᱵᱷᱟᱨ ᱛᱮᱜᱮ ᱛᱚ ᱟᱫᱷᱟ ᱞᱟᱸᱜᱟ ᱯᱷᱟᱨᱱᱟᱣᱼᱟ ᱟᱫᱷᱟ ᱨᱮᱸᱜᱮᱡ ᱞᱟᱡ ᱦᱚᱸ ᱵᱷᱟᱛᱟᱣᱜᱼᱟ ᱾ ᱤᱧ ᱦᱚᱸ ᱦᱩᱰᱤᱧ ᱠᱩᱲᱤ ᱜᱤᱧ ᱠᱩᱥᱤ ᱟᱫᱮᱭᱟ” ᱾ ᱚᱱᱟᱛᱮ ᱨᱟᱭᱵᱟᱨᱤᱡ ᱠᱚ ᱠᱷᱚᱵᱚᱨ ᱨᱩᱣᱟᱹᱲᱟᱭᱟ ᱟᱞᱮ ᱫᱚ ᱠᱩᱥᱤ ᱜᱮ ᱾
ᱥᱚᱱᱟ ᱡᱟᱹᱛᱤ ᱥᱟᱶᱛᱟ ᱟᱨ ᱵᱚᱝᱥᱚ ᱵᱷᱟᱹᱭᱟᱹᱫᱽ ᱨᱮ ᱧᱩᱛᱩᱢ ᱮ ᱵᱩᱰᱟᱹᱣ ᱠᱮᱫ ᱠᱷᱟᱹᱛᱤᱨ ᱟᱭᱳ ᱟᱨ ᱵᱟᱵᱟ ᱧᱮᱯᱮᱞ ᱯᱤᱪᱷᱤ ᱠᱟᱰᱟ ᱵᱷᱮᱰᱟ ᱞᱮᱠᱟ ᱠᱤᱱ ᱵᱮᱯᱮᱝᱜᱮᱫᱼᱟ ᱾ ᱟᱹᱠᱤᱱᱟᱜ ᱩᱯᱩᱥᱠᱩᱨ ᱠᱟᱛᱷᱟ ᱛᱮ ᱜᱷᱟᱨᱚᱸᱡᱽ ᱡᱟᱠ ᱦᱚᱲ ᱫᱷᱩᱣᱟᱸᱨᱟᱛᱟ ᱛᱮᱠᱚ ᱚᱜ ᱠᱟᱹᱭᱞᱟᱹᱦᱟᱞ ᱪᱟᱵᱟᱜᱼᱟ ᱾ ᱴᱷᱤᱠ ᱩᱱ ᱡᱚᱦᱚᱜ ᱨᱟᱡᱽᱢᱟᱞ ᱛᱮᱠᱚ ᱚᱲᱟᱜ ᱠᱷᱚᱱ ᱢᱤᱨᱩ ᱵᱟᱹᱱᱤᱡ ᱤᱫᱤ ᱞᱟᱹᱜᱤᱫ ᱠᱷᱚᱵᱚᱨ ᱦᱤᱡᱩᱜᱼᱟ ᱾ ᱚᱱᱟ ᱠᱷᱚᱵᱚᱨ ᱦᱤᱥᱤᱫ ᱦᱚᱭ ᱛᱮ ᱡᱮᱢᱚᱱ ᱜᱷᱟᱨᱚᱸᱡᱽ ᱨᱮ ᱜᱩᱨᱞᱟᱹᱣᱜ ᱠᱟᱱ ᱫᱷᱩᱣᱟᱸ ᱵᱚᱦᱮᱞ ᱥᱟᱦᱟᱜᱼᱟ ᱾ ᱟᱭᱳ, ᱵᱟᱵᱟ, ᱜᱚᱲᱚᱢ ᱟᱭᱳ, ᱜᱚᱲᱚᱢ ᱵᱟᱵᱟ ᱫᱩᱲᱩᱵ ᱢᱤᱫ ᱠᱟᱛᱮ ᱢᱤᱨᱩ ᱠᱚ ᱵᱩᱡᱷᱟᱹᱣ ᱮᱭᱟ ᱵᱟᱯᱞᱟᱜ ᱨᱮᱵᱮᱱ ᱞᱟᱹᱜᱤᱫ ᱾ ᱢᱤᱨᱩᱭ ᱢᱮᱱᱟ, “ᱤᱧ ᱢᱟᱲᱟᱝ ᱥᱮᱫ ᱯᱟᱲᱦᱟᱣᱜ ᱥᱟᱹᱱᱟᱹᱧ ᱠᱟᱱᱟ ᱰᱤᱜᱽᱨᱤ ᱛᱟᱭᱚᱢ” ᱾ ᱮᱱᱠᱷᱟᱱ ᱟᱡ ᱵᱩᱰᱤ ᱟᱭᱳ ᱢᱮᱱᱟᱭ “ᱟᱢ ᱦᱚᱸᱢ ᱧᱟᱢ ᱟᱠᱟᱣᱱᱟ ᱥᱮ ᱪᱮᱫ ? ᱡᱟᱶᱟᱭ ᱞᱮ ᱢᱮᱱ ᱮᱫ ᱠᱷᱟᱱ ᱢᱟᱱᱟ ᱮᱫᱼᱟᱢ” ᱾ ᱟᱡ ᱟᱭᱳ ᱥᱚᱢᱡᱷᱟᱣ ᱠᱟᱛᱮ ᱢᱮᱛᱟᱭᱟᱭ “ᱵᱟᱯᱞᱟ ᱛᱟᱭᱚᱢ ᱯᱟᱲᱦᱟᱣᱜ ᱢᱮ ᱪᱟᱹᱠᱨᱤ ᱱᱩᱠᱨᱤ ᱢᱮ ᱵᱟᱞᱮ ᱢᱟᱱᱟ ᱮᱫ ᱢᱮᱭᱟ ᱾ ᱥᱟᱹᱭ ᱵᱷᱟᱹᱭ ᱟᱹᱛᱩ ᱴᱚᱞᱟ ᱦᱚᱲᱟᱜ ᱴᱚᱴᱚᱥᱟᱜ ᱪᱚᱠᱟᱜ ᱵᱟᱠᱞᱟᱜ ᱨᱚᱲ ᱠᱷᱚᱱ ᱫᱩᱜ ᱠᱟᱞᱮ ᱢᱮ ᱢᱤᱨᱩ ᱵᱟᱯᱞᱟᱜ ᱢᱚᱜᱟᱣ ᱢᱮ” ᱾
ᱟᱭᱳ ᱵᱟᱵᱟ ᱟᱜ ᱠᱩᱠᱞᱤ ᱢᱮᱫ ᱟᱨ ᱜᱚᱲᱚᱢ ᱟᱭᱳ ᱜᱚᱲᱚᱢ ᱵᱟᱵᱟ ᱛᱤᱠᱤᱱᱟᱜ ᱢᱩᱭᱜᱩᱫ ᱢᱮᱫ ᱟᱦᱟ ᱧᱮᱞ ᱛᱮ ᱢᱤᱨᱩ ᱩᱭᱦᱟᱹᱨᱟᱭ, ᱟᱡ ᱡᱩᱫᱤ ᱵᱟᱯᱞᱟᱜ ᱵᱟᱝ ᱩᱛᱟᱹᱨ ᱵᱟᱭ ᱨᱮᱵᱮᱱᱟ ᱮᱱᱠᱷᱟᱱ ᱥᱚᱱᱟ ᱟᱜ ᱚᱯᱚᱢᱟᱱ ᱛᱮ ᱟᱫᱷᱢᱚᱨᱟ ᱟᱠᱟᱱ ᱚᱲᱟᱜ ᱦᱚᱲᱟᱜ ᱢᱟᱹᱱ ᱢᱚᱦᱚᱛ ᱡᱚᱛᱚ ᱟᱛᱟᱨ ᱨᱚᱸᱜᱚ ᱪᱟᱵᱟᱜᱼᱟ ᱵᱟᱝᱠᱷᱟᱱ ᱦᱟᱥᱟᱨᱮ ᱢᱮᱥᱟ ᱥᱟᱭᱚᱜᱼᱟ ᱾ ᱚᱱᱟᱛᱮ ᱡᱚᱛᱚ ᱦᱚᱲ ᱥᱟᱢᱟᱝ ᱨᱮ ᱵᱚᱦᱚᱜ ᱛᱤᱨᱩᱵ ᱛᱷᱤᱨᱩᱜ ᱟᱭ ᱾ ᱤᱱᱟᱹᱜ ᱠᱷᱟᱱ ᱚᱲᱟᱜ ᱦᱚᱲ ᱠᱚ ᱵᱷᱟᱹᱵᱤᱭᱟ ᱢᱤᱨᱩ ᱵᱟᱯᱞᱟᱜ ᱮ ᱨᱮᱵᱮᱱ ᱮᱱᱟ ᱾ ᱩᱱᱨᱮ ᱵᱩᱰᱤ ᱟᱭᱳ ᱡᱚᱛᱚ ᱦᱚᱲᱮ ᱢᱮᱛᱟ ᱠᱚᱣᱟ ᱵᱟᱯᱞᱟ ᱨᱮ ᱥᱚᱱᱟ ᱦᱟᱜ ᱠᱟᱛᱷᱟ ᱡᱟᱦᱟᱸᱭ ᱠᱚ ᱠᱩᱞᱤ ᱵᱚᱱ ᱠᱷᱟᱱ ᱵᱚ ᱢᱮᱛᱟ ᱠᱚᱣᱟ ᱴᱨᱮᱱᱤᱝ ᱨᱮ ᱢᱮᱱᱟᱭᱟ ᱚᱱᱟᱛᱮ ᱵᱟᱭ ᱦᱮᱡ ᱟᱠᱟᱱᱟ ᱾
ᱚᱲᱟᱜ ᱦᱚᱲᱟᱜ ᱢᱟᱹᱱ ᱢᱚᱦᱚᱛ ᱮ ᱫᱚᱦᱚ ᱠᱮᱫᱼᱟ ᱟᱨ ᱠᱟᱛᱷᱟᱭ ᱟᱸᱡᱚᱢ ᱠᱮᱫ ᱠᱷᱟᱹᱛᱤᱨ ᱢᱤᱨᱩ ᱵᱟᱯᱞᱟ ᱛᱟᱭᱚᱢ ᱢᱟᱲᱟᱝ ᱠᱷᱚᱱ ᱰᱮᱦᱮᱨ ᱠᱚ ᱜᱚᱨᱚᱡᱽ ᱫᱩᱞᱟᱹᱲ ᱟᱫᱮᱭᱟ ᱟᱭᱳ ᱵᱟᱵᱟ ᱚᱲᱟᱜ ᱨᱮ ᱾ ᱦᱟᱱᱦᱟᱨ ᱦᱚᱧᱦᱟᱨ ᱚᱲᱟᱜ ᱨᱮᱦᱚᱸ ᱢᱚᱱ ᱤᱫᱤ ᱠᱟᱛᱮ ᱪᱚᱲᱟᱣ ᱫᱟᱲᱮᱭᱟᱜ ᱜᱩᱱ ᱠᱷᱟᱹᱛᱤᱨ ᱡᱚᱛᱚᱭ ᱥᱟᱢᱴᱟᱣ ᱟᱯᱱᱟᱨ ᱫᱟᱲᱮ ᱟᱫ ᱠᱚᱣᱟ ᱟᱨ ᱚᱱᱟᱛᱮ ᱡᱚᱛᱚ ᱦᱚᱲ ᱠᱚ ᱠᱩᱥᱤ ᱟᱫᱮᱭᱟ ᱾ ᱟᱨ ᱰᱤᱥᱴᱟᱱᱥ ᱠᱳᱨᱥ ᱛᱮ ᱢᱟᱥᱴᱟᱨ ᱰᱤᱜᱽᱨᱤ ᱦᱚᱸᱭ ᱯᱟᱲᱦᱟᱣ ᱯᱩᱨᱟᱹᱣ ᱮᱱᱟ ᱾
ᱚᱠᱛᱚ ᱢᱟ ᱫᱟᱜ ᱞᱮᱠᱟ ᱞᱤᱸᱜᱤ ᱪᱟᱞᱟᱜᱼᱟ ᱚᱠᱟᱨᱮ ᱵᱟᱝ ᱴᱷᱟᱠᱮᱫ ᱛᱤᱸᱜᱩ ᱠᱟᱛᱮ ᱫᱟᱨᱥᱟᱬ ᱫᱤᱲᱦᱟᱹ ᱥᱚᱞᱚᱝ ᱠᱷᱟᱸᱡᱚ ᱟᱫᱷᱲᱟᱣ ᱯᱷᱩᱲ ᱯᱟᱜᱷᱟᱨ ᱟᱛᱮ ᱾ ᱚᱱᱠᱟᱜᱮ ᱢᱤᱨᱩᱣᱟᱜ ᱡᱤᱭᱚᱱ ᱚᱠᱛᱚ ᱰᱟᱦᱟᱨ ᱨᱮ ᱛᱤᱱᱟᱹᱜ ᱥᱩᱠ ᱫᱩᱠ ᱦᱮᱡ ᱥᱮᱱ ᱯᱟᱨᱚᱢ ᱟᱠᱟᱱ ᱥᱟᱶᱛᱮ ᱢᱤᱫᱴᱟᱹᱝ ᱤᱨᱟᱹᱞ ᱵᱚᱪᱷᱚᱨ ᱠᱚᱲᱟ ᱜᱤᱫᱽᱨᱟᱹ ᱟᱨ ᱢᱤᱫᱴᱟᱹᱝ ᱢᱚᱬᱮ ᱵᱚᱪᱷᱚᱨ ᱠᱩᱲᱤ ᱜᱤᱫᱽᱨᱟᱹ ᱨᱤᱱ ᱟᱭᱳ ᱦᱚᱸᱭ ᱵᱮᱱᱟᱣ ᱟᱠᱟᱱᱟ ᱾
ᱚᱲᱟᱜ ᱫᱩᱣᱟᱹᱨ ᱯᱷᱩᱨᱪᱟᱹ ᱯᱷᱩᱨᱪᱤ, ᱪᱚᱸᱫᱟ ᱤᱥᱤᱱ ᱵᱟᱥᱟᱝ, ᱜᱤᱫᱽᱨᱟᱹ ᱦᱟᱜ ᱚᱞ ᱯᱟᱲᱦᱟᱣ ᱧᱮᱞ ᱥᱟᱶᱛᱮ ᱦᱟᱱᱦᱟᱨ ᱦᱚᱸᱧᱦᱟᱨᱟᱜ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱵᱩᱡᱷᱟᱹᱣ ᱛᱟᱭᱚᱢ ᱢᱤᱨᱩ ᱢᱚᱱ ᱯᱷᱩᱨᱛᱤ ᱞᱮᱠᱟ ᱭᱩ ᱴᱩᱵᱽ, ᱣᱦᱟᱴᱥ ᱟᱯ, ᱯᱷᱮᱥ ᱵᱩᱠ ᱧᱮᱞ ᱧᱚᱜᱟᱭ ᱾ ᱚᱱᱟ ᱧᱮᱞ ᱧᱮᱞ ᱵᱷᱤᱛᱨᱟᱹ ᱨᱮ ᱟᱭᱢᱟ ᱡᱚᱴᱟᱣ ᱠᱚᱭ ᱡᱩᱴᱟᱹᱣ ᱟᱠᱟᱣᱟᱱᱟ ᱾ ᱛᱤᱱᱟᱹᱜ ᱜᱟᱱ ᱫᱚ ᱫᱤᱱᱟᱹᱢ ᱥᱮᱛᱟᱜ ᱥᱤᱸᱜᱟᱹᱲ ᱦᱟᱭ ᱵᱟᱭ ᱡᱚᱴᱟᱣ ᱾ ᱩᱱᱠᱩ ᱢᱟᱹᱫᱽᱨᱮ ᱢᱤᱫ ᱦᱚᱲ ᱫᱚ ᱟᱨᱦᱚᱸ ᱟᱹᱰᱤ ᱱᱤᱡᱚᱨ ᱟᱠᱟᱱᱟᱭ ᱾ ᱩᱱᱤ ᱥᱟᱶ ᱛᱮᱦᱮᱧ ᱵᱷᱤᱰᱤᱭᱳ ᱠᱚᱞᱤᱝ ᱟᱭ ᱢᱮᱱᱛᱮ ᱥᱮᱛᱟᱜ ᱠᱷᱚᱱ ᱵᱷᱟᱹᱵᱤ ᱟᱠᱟᱫ ᱟᱭ ᱾ ᱪᱮᱫᱟᱜ ᱥᱮ ᱛᱮᱦᱮᱧ ᱛᱤᱠᱤᱱ ᱡᱚᱢ ᱨᱟᱡᱽᱢᱟᱞ ᱵᱟᱭ ᱦᱤᱡᱩᱜᱼᱟ ᱾ ᱚᱯᱷᱤᱥ ᱨᱮ ᱢᱤᱫᱴᱟᱹᱝ ᱢᱤᱴᱤᱝ ᱛᱟᱭ ᱢᱮᱱᱟᱜᱼᱟ ᱾ ᱚᱱᱛᱮᱨᱮ ᱡᱚᱢ ᱵᱮᱵᱚᱥᱛᱟ ᱟᱠᱟᱱᱟ ᱾
ᱦᱟᱱᱦᱟᱨ ᱦᱚᱧᱦᱟᱨ ᱦᱚᱸ ᱥᱚᱦᱨᱟᱭ ᱯᱟᱨᱟᱵᱽ ᱦᱟᱴ ᱠᱤᱱ ᱪᱟᱞᱟᱣ ᱟᱠᱟᱱᱟ ᱦᱟᱴᱟᱜ ᱴᱩᱝᱠᱤ, ᱴᱩᱠᱩᱡ ᱪᱮᱞᱟᱝ ᱠᱤᱨᱤᱧ ᱾ ᱵᱮᱴᱟ ᱛᱟᱭ ᱰᱨᱚᱭᱤᱝ ᱮ ᱵᱮᱜᱱᱟᱣ ᱠᱟᱱᱟ ᱵᱤᱴᱤ ᱫᱚ ᱠᱷᱮᱞᱱᱟ ᱛᱮ ᱫᱟᱠᱟ ᱩᱛᱩ ᱤᱥᱤᱱ ᱵᱟᱥᱟᱝ ᱮ ᱮᱱᱮᱡ ᱡᱚᱝ ᱠᱟᱱᱟ ᱾ ᱢᱤᱨᱩ ᱵᱷᱤᱰᱤᱭᱳ ᱠᱚᱞᱤᱝ ᱟᱭ ᱵᱩᱜᱤ ᱵᱟᱹᱲᱤᱡ ᱠᱟᱛᱷᱟ ᱛᱟᱭᱚᱢ ᱜᱤᱫᱽᱨᱟᱹ ᱥᱟᱶ ᱩᱯᱨᱩᱢ ᱠᱟᱭᱟᱭ ᱾ ᱜᱤᱫᱽᱨᱟᱹ ᱠᱤᱱ ᱢᱮᱱᱟ “ᱟᱹᱞᱤᱧ ᱛᱤᱥ ᱦᱚᱸ ᱵᱟᱹᱞᱤᱧ ᱧᱮᱞ ᱟᱠᱟᱫᱮᱭᱟ ᱚᱠᱚᱭ ᱠᱟᱱᱟᱭ ᱭᱳ” ? ᱢᱤᱨᱩ ᱞᱟᱹᱭ ᱟᱹᱠᱤᱱᱟᱭ “ᱱᱩᱭ ᱫᱚ ᱤᱧ ᱫᱟᱹᱭ ᱞᱮᱠᱟ ᱢᱟᱨᱟᱝ ᱟᱭᱳ ᱵᱤᱱ ᱦᱚᱦᱚ ᱫᱟᱲᱮ ᱟᱭᱟ” ᱾ ᱩᱯᱨᱩᱢ ᱛᱟᱭᱚᱢ ᱛᱷᱩᱛᱤ ᱛᱟᱢᱥᱟᱭᱟᱠᱚ ᱵᱷᱚᱲᱚᱠ ᱨᱚᱲ ᱛᱮ ᱾ ᱠᱟᱛᱷᱟ ᱵᱟᱲᱟ ᱛᱟᱭᱚᱢ ᱜᱤᱫᱽᱨᱟᱹ ᱟᱨ ᱦᱚᱸ ᱮᱱᱮᱡ ᱡᱚᱝ ᱨᱮᱠᱤᱱ ᱞᱟᱵᱟᱫᱷᱤᱭᱟᱹᱣᱜᱼᱟ ᱾ ᱢᱤᱨᱩ ᱯᱷᱚᱱ ᱥᱟᱵ ᱠᱟᱛᱮ ᱡᱚᱛᱚ ᱚᱲᱟᱜ ᱩᱫᱩᱜ ᱟᱭᱟᱭ ᱾ ᱩᱱ ᱡᱚᱦᱚᱜ ᱠᱚᱞᱤᱝ ᱵᱮᱞ ᱥᱟᱰᱮᱭᱟ ᱾ ᱢᱤᱨᱩ ᱥᱤᱞᱯᱤᱧ ᱡᱷᱤᱡᱟᱭ ᱾ ᱥᱟᱢᱟᱝ ᱨᱮ ᱨᱟᱡᱽᱢᱟᱞ ᱧᱮᱞ ᱛᱮ ᱥᱮᱛᱟᱜ ᱵᱮᱲᱟ ᱫᱟᱨᱮ ᱥᱟᱠᱟᱢ ᱞᱮᱠᱟ ᱡᱤᱭᱟᱹᱲ ᱟᱨ ᱯᱷᱩᱴᱟᱹᱣ ᱵᱟᱦᱟ ᱞᱮᱠᱟᱱ ᱢᱮᱫ ᱟᱦᱟ ᱛᱟᱭ ᱟᱪᱠᱟ ᱜᱚᱥᱚ ᱢᱩᱭᱜᱩᱫᱚᱜᱼᱟ ᱾ ᱨᱟᱡᱽᱢᱟᱞ ᱮ ᱢᱮᱱᱟ, “ᱟᱨᱮ ᱛᱮᱦᱮᱧ ᱢᱤᱴᱤᱝ ᱵᱟᱝ ᱦᱩᱭ ᱞᱮᱱᱟ ᱚᱱᱟᱛᱮ ᱦᱮᱡ ᱮᱱᱟᱹᱧ” ᱾ ᱱᱚᱛᱮ ᱠᱷᱚᱱᱟᱜ ᱢᱤᱨᱩ ᱟᱨ ᱨᱟᱡᱽᱢᱟᱞ ᱥᱚᱱᱟ ᱠᱤᱱ ᱧᱮᱞ ᱧᱟᱢᱮᱭᱟ ᱾ ᱥᱚᱱᱟ ᱦᱚᱸ ᱟᱹᱠᱤᱱ ᱮ ᱧᱮᱞ ᱧᱟᱢ ᱠᱤᱱᱟ ᱾ ᱠᱷᱟᱹᱞᱤ ᱠᱚ ᱠᱚᱯᱚᱭᱚᱜᱼᱟ ᱾ ᱠᱤᱪᱷᱩ ᱜᱷᱟᱹᱲᱤᱠ ᱛᱟᱭᱚᱢ ᱥᱚᱱᱟ ᱜᱮ ᱦᱟᱱᱛᱮ ᱠᱷᱚᱱ ᱯᱷᱚᱱ ᱠᱟᱴᱟᱣ ᱠᱟᱜᱼᱟᱭ ᱾ ᱨᱟᱡᱽᱢᱟᱞ ᱡᱚᱛᱟ ᱛᱩᱫ ᱛᱩᱞᱩᱡ ᱢᱮᱱᱟᱭ “ᱳ! ᱛᱚᱵᱮ ᱠᱷᱟᱱ ᱵᱷᱤᱰᱤᱭᱳ ᱠᱚᱞᱤᱝ ᱨᱮ ᱜᱟᱯᱟᱞᱢᱟᱨᱟᱣ ᱪᱟᱹᱞᱩ ᱟᱠᱟᱱᱟ ᱾ ᱛᱤᱥ ᱠᱷᱚᱱ ᱵᱷᱟᱹᱭ ? ᱤᱧ ᱫᱚ ᱵᱟᱰᱟᱭ ᱵᱩᱡᱷᱟᱹᱣ ᱜᱮ ᱵᱟᱝ” ᱾
ᱨᱟᱡᱽᱢᱟᱞ ᱡᱟᱸᱜᱟ ᱟᱹᱨᱩᱵᱚᱜ ᱪᱟᱞᱟᱜ ᱟᱭ ᱢᱤᱨᱩ ᱯᱟᱸᱡᱟ ᱠᱟᱛᱮ ᱢᱮᱱᱟᱭ “ᱛᱮᱦᱮᱧ ᱜᱮ ᱯᱩᱭᱞᱩ ᱫᱷᱟᱣ ᱞᱤᱧ ᱜᱟᱯᱟᱞᱢᱟᱨᱟᱣᱜ ᱠᱟᱱ ᱛᱟᱦᱮᱸᱫ” ᱾ ᱨᱟᱡᱽᱢᱟᱞ ᱯᱟᱞᱟᱴᱚᱜ ᱮ ᱪᱟᱞᱟᱜᱼᱟ ᱾ ᱚᱸᱰᱮ ᱯᱟᱸᱡᱟ ᱠᱟᱛᱮ ᱢᱤᱨᱩᱭ ᱢᱮᱱᱟ, “ᱫᱟᱹᱭ ᱥᱟᱶ ᱯᱷᱮᱥ ᱵᱩᱠ ᱨᱮᱞᱤᱧ ᱧᱟᱯᱟᱢ ᱞᱮᱱᱟ ᱾ ᱟᱡᱟᱜ ᱚᱥᱚᱞ ᱩᱯᱨᱩᱢ ᱵᱟᱰᱟᱭ ᱛᱟᱭᱚᱢ ᱟᱹᱰᱤ ᱫᱷᱟᱣ ᱮᱨᱮᱲ ᱟᱠᱟᱫ ᱫᱮᱭᱟᱹᱧ ᱾ ᱤᱠᱷᱟᱹᱱ ᱡᱟᱦᱟᱸ ᱦᱤᱞᱚᱜ ᱟᱡᱟᱜ ᱢᱮᱥᱮᱡᱽ ᱤᱧ ᱯᱟᱲᱦᱟᱣ ᱠᱮᱫᱼᱟ ᱤᱱ ᱦᱤᱞᱚᱜ ᱤᱧᱟᱜ ᱢᱚᱱᱮᱨᱮ ᱟᱡ ᱞᱟᱹᱜᱤᱫ ᱫᱟᱭᱟ ᱦᱮᱡ ᱮᱱᱟ ᱾ ᱱᱚᱝᱠᱟᱭ ᱚᱞ ᱞᱮᱫᱼᱟ, ᱡᱟᱦᱟᱸᱭ ᱞᱟᱹᱜᱤᱫ ᱟᱭᱳ ᱵᱟᱵᱟ ᱚᱲᱟᱜ ᱫᱩᱣᱟᱹᱨ ᱤᱧ ᱵᱟᱹᱜᱤ ᱚᱴᱚᱣᱟᱫᱼᱟ, ᱩᱱᱤ ᱤᱧᱟᱜ ᱢᱚᱱ ᱫᱚ ᱵᱟᱝ, ᱤᱧᱟᱜ ᱟᱨᱡᱟᱣ ᱫᱷᱚᱱ ᱜᱮ ᱰᱷᱮᱨ ᱮ ᱠᱩᱥᱤᱭᱟᱜᱼᱟ ᱾ ᱤᱧᱟᱜ ᱚᱱᱛᱚᱨ ᱠᱚᱞᱮᱨᱮ ᱵᱷᱩᱴᱩᱜᱚᱜ ᱰᱚᱜᱽ ᱢᱚᱦᱮ ᱨᱮᱜᱮ ᱪᱷᱤᱢᱲᱤ ᱯᱷᱤᱫᱽᱞᱤ ᱜᱤᱰᱤ ᱠᱟᱫᱼᱟᱭ ᱾ ᱛᱤᱥ ᱦᱚᱸ ᱡᱚ ᱜᱮ ᱵᱟᱭ ᱥᱟᱵ ᱚᱪᱚᱣᱟᱫᱼᱟ ᱾ ᱚᱱᱟ ᱠᱷᱟᱹᱛᱤᱨ ᱟᱹᱰᱤ ᱫᱷᱟᱣ ᱜᱩᱡᱩᱜ ᱤᱧ ᱩᱭᱦᱟᱹᱨ ᱞᱮᱫᱼᱟ, ᱤᱠᱷᱟᱹᱱ ᱤᱧᱟᱜ ᱵᱤᱵᱮᱠ ᱢᱟᱱᱟ ᱵᱟᱨᱚᱱ ᱟᱠᱟᱫᱤᱧᱟᱭ ᱾ ᱚᱱᱟᱛᱮ ᱡᱟᱦᱟᱸ ᱠᱳᱴ ᱨᱮ ᱵᱟᱯᱞᱟ ᱞᱮᱱᱟᱹᱧ ᱚᱸᱰᱮ ᱠᱷᱚᱱ ᱜᱮ ᱰᱤᱵᱷᱚᱨᱥ ᱠᱟᱛᱮᱧ ᱯᱷᱩᱨᱜᱟᱹᱞ ᱨᱩᱣᱟᱹᱲ ᱮᱱᱟ ᱾ ᱤᱧ ᱞᱮᱠᱟ ᱫᱷᱚᱠᱟ ᱧᱟᱢ ᱠᱟᱛᱮ ᱚᱲᱟᱜ ᱥᱟᱶᱛᱟ ᱠᱷᱚᱱ ᱵᱟᱨᱦᱮ ᱨᱮ ᱮᱠᱞᱟ ᱜᱮ ᱛᱟᱦᱟᱢ ᱛᱩᱠᱩᱡ ᱡᱟᱨᱢᱟᱫ ᱛᱚᱨᱢᱟᱫᱚᱜ ᱠᱟᱱ ᱠᱚ ᱞᱟᱹᱜᱤᱫ ᱢᱤᱫ ᱜᱟᱶᱛᱟᱹᱧ ᱵᱮᱨᱮᱫ ᱟᱠᱟᱫᱼᱟ ᱾ ᱚᱸᱰᱮ ᱟᱨᱦᱚᱸ ᱱᱟᱪᱟᱨ ᱱᱤᱫᱷᱟᱹᱱ ᱨᱮᱸᱜᱮᱡ ᱚᱨᱮᱡ ᱴᱩᱣᱟᱹᱨ ᱛᱤᱨᱞᱟᱹ ᱢᱮᱱᱟᱜ ᱠᱚᱣᱟ ᱾ ᱢᱤᱫᱴᱟᱹᱝ ᱱᱟᱶᱟ ᱩᱯᱨᱩᱢ ᱛᱮ ᱵᱟᱧᱪᱟᱣ ᱠᱚ ᱪᱮᱫᱚᱜ ᱠᱟᱱᱟ ᱾ ᱤᱧᱟᱜ ᱵᱷᱩᱞ ᱞᱟᱹᱜᱤᱫ ᱤᱠᱟᱹ ᱵᱟᱹᱱᱩᱜ ᱟᱱᱟᱝ ᱾ ᱚᱱᱟᱛᱮ ᱟᱢ ᱦᱚᱸ ᱢᱤᱨᱩ, ᱤᱧ ᱥᱟᱶ ᱥᱟᱹᱜᱟᱹᱭ ᱵᱟᱝ ᱡᱚᱲᱟᱣ ᱥᱟᱱᱟᱢ ᱠᱟᱱᱟ”᱾ ᱢᱤᱨᱩ ᱩᱞᱤᱫᱟᱜ ᱩᱫ ᱨᱩᱣᱟᱹᱲ ᱠᱟᱛᱮ ᱟᱨ ᱦᱚᱸᱭ ᱢᱮᱱᱟ “ᱱᱚᱶᱟ ᱡᱚᱛᱚ ᱠᱟᱛᱷᱟ ᱛᱟᱭ ᱵᱟᱰᱟᱭ ᱠᱮᱫ ᱛᱟᱭᱚᱢ ᱤᱧᱟᱜ ᱢᱚᱱᱮᱨᱮ ᱫᱟᱹᱭ ᱞᱟᱹᱜᱤᱫ ᱫᱩᱞᱟᱹᱲ ᱫᱚᱨᱚᱫᱽ ᱦᱮᱡ ᱮᱱᱟ ᱾
ᱵᱟᱨ ᱯᱮ ᱫᱷᱟᱣ ᱦᱩᱭᱩᱜ ᱠᱟᱱᱟ ᱢᱮᱥᱮᱡᱽ ᱠᱚᱛᱮ ᱜᱮ ᱞᱤᱧ ᱜᱟᱯᱟᱞᱢᱟᱨᱟᱣ ᱟᱠᱟᱱᱟ ᱾ ᱤᱧ ᱦᱚᱸ ᱫᱚᱦᱟᱵᱚᱦᱟᱜ ᱠᱟᱹᱱᱟᱹᱧ ᱱᱚᱶᱟ ᱠᱟᱛᱷᱟ ᱠᱚ ᱚᱲᱟᱜ ᱨᱮ ᱞᱟᱹᱞᱟᱹᱭ, ᱚᱱᱟᱛᱮ ᱛᱟᱠ ᱜᱤᱧ ᱛᱟᱺᱜᱤ ᱞᱮᱫᱼᱟ “᱾
ᱨᱟᱡᱽᱢᱟᱞ ᱮ ᱢᱮᱱᱟ, “ᱮᱠᱞᱟ ᱛᱮ ᱵᱟᱪᱷᱟᱣ ᱦᱚᱨ ᱰᱟᱦᱟᱨ ᱵᱮᱥᱚᱜ ᱠᱷᱟᱱ ᱢᱟ ᱱᱟᱯᱟᱭ ᱜᱮ, ᱵᱟᱝ ᱠᱷᱟᱱ ᱱᱚᱜ ᱱᱚᱝᱠᱟ ᱚᱵᱚᱥᱛᱟ ᱵᱷᱚᱜᱼᱜᱟᱹᱣ ᱯᱟᱲᱟᱣᱜᱼᱟ ᱢᱮᱱᱛᱮ ᱫᱟᱹᱭ ᱛᱤᱠᱤᱱ ᱢᱟᱲᱟᱝ ᱨᱮ ᱩᱭᱦᱟᱹᱨ ᱞᱟᱹᱠᱛᱤ ᱛᱟᱦᱮᱸ ᱠᱟᱱᱟ ᱾ ᱠᱟᱹᱡ ᱪᱩᱞᱩᱝ, ᱱᱤᱱᱟᱹᱜ ᱠᱟᱛᱷᱟ ᱩᱭᱦᱟᱹᱨ ᱧᱟᱢ ᱞᱮᱠᱷᱟᱱ ᱠᱤᱱ ᱡᱟᱹᱛᱤ ᱥᱟᱶᱛᱟ ᱵᱟᱹᱠᱤᱱ ᱵᱩᱰᱟᱹᱣ ᱠᱮᱭᱟ ᱪᱮ ᱱᱩᱱᱟᱹᱜ ᱦᱚᱸ ᱵᱟᱹᱠᱤᱱ ᱦᱟᱞᱮᱰᱟᱞᱮ ᱠᱚᱜᱼᱟ” ᱾ ᱢᱤᱨᱩ ᱢᱮᱱ ᱨᱩᱣᱟᱲᱼᱟᱭ “ᱱᱚᱶᱟ ᱢᱟ ᱯᱩᱨᱟᱹᱯᱩᱨᱤ ᱴᱷᱤᱠ ᱠᱟᱛᱷᱟ ᱠᱟᱱᱟ ᱾ ᱮᱱᱦᱚᱸ ᱢᱟᱹᱱᱢᱤ ᱡᱚᱱᱚᱢ ᱨᱮ ᱦᱚᱲ ᱦᱚᱛᱮᱛᱮ ᱵᱷᱩᱞᱪᱩᱠ ᱦᱩᱭᱩᱜ ᱜᱮᱭᱟ ᱾ ᱚᱱᱟ ᱨᱮᱱᱟᱜ ᱢᱟᱱᱮ ᱫᱚ ᱵᱟᱝ ᱠᱟᱱᱟ, ᱡᱮ ᱢᱤᱫ ᱦᱚᱲ ᱜᱩᱡᱩᱜ ᱥᱩᱢᱩᱝ ᱵᱚᱲᱦᱮᱜ ᱟᱭ ᱾ ᱵᱷᱩᱞ ᱵᱩᱡᱷᱟᱹᱣ ᱨᱩᱣᱟᱹᱲ ᱠᱟᱛᱮ ᱚᱱᱟ ᱵᱷᱩᱞ ᱫᱚᱦᱲᱟᱭ ᱞᱟᱹᱜᱤᱫ ᱚᱠᱚᱭ ᱦᱚᱸ ᱟᱞᱚ ᱠᱚ ᱠᱩᱨᱩᱢᱩᱴᱩᱭ ᱢᱟ ᱞᱟᱹᱜᱤᱫ ᱥᱟᱶᱛᱟ ᱨᱮ ᱥᱮᱪᱮᱫ ᱫᱟᱹᱭᱠᱟᱹᱭ ᱮᱢ ᱫᱟᱲᱮᱭᱟᱜ ᱠᱟᱱᱠᱷᱟᱱ ᱚᱠᱚᱭ, ᱛᱚᱵᱮ ᱚᱱᱟ ᱨᱮᱜᱮ ᱛᱚ ᱵᱟᱦᱟᱫᱩᱨᱤ ᱢᱟ ᱢᱮᱱᱟᱜ ᱾ ᱪᱟᱸᱫᱚ ᱤᱯᱤᱞ ᱢᱟ ᱵᱟᱭ ᱦᱩᱭ ᱫᱟᱲᱮᱭᱟᱜᱼᱟ ᱫᱟᱹᱭ ᱤᱠᱷᱟᱹᱱ ᱟᱢᱟᱵᱟᱹᱥᱤᱭᱟᱹ ᱧᱩᱛ ᱨᱮ ᱞᱮᱠᱟ ᱦᱟᱢᱰᱟ ᱦᱟᱹᱢᱰᱤ ᱡᱟᱸᱫᱮ ᱛᱟᱸᱫᱮᱜ ᱠᱟᱱ ᱱᱟᱪᱟᱨ ᱱᱤᱫᱷᱟᱹᱱ ᱴᱩᱣᱟᱹᱨ ᱦᱚᱲ ᱠᱚ ᱞᱟᱹᱜᱤᱫ ᱟᱥᱨᱟ ᱵᱮᱱᱟᱣ ᱠᱟᱛᱮ ᱵᱟᱠᱡᱩᱞᱩᱝ ᱤᱱ ᱥᱮᱬᱟ ᱨᱮᱦᱚᱸ ᱟᱸᱥ ᱨᱤᱱᱤᱡ ᱟᱦᱞᱟ ᱫᱚᱭ ᱦᱩᱭ ᱫᱟᱲᱮᱭᱟᱜᱼᱟ” ᱾ ᱴᱷᱤᱠ ᱩᱱ ᱡᱚᱦᱚᱜ ᱮᱱᱮᱡ ᱡᱚᱝ ᱵᱷᱟᱜᱟᱣ ᱠᱟᱛᱮ ᱵᱟᱱᱟᱨ ᱜᱤᱫᱽᱨᱟᱹ ᱠᱤᱱ ᱨᱮᱯᱮᱡ ᱛᱟᱯᱟᱢᱟ ᱟᱨ ᱥᱚᱠᱛᱚ ᱜᱟᱨᱟᱜ ᱜᱟᱨᱟᱜ ᱠᱤᱱ ᱦᱚᱦᱚᱭᱟ, ᱟᱭᱳ ᱟᱭᱳ !! ᱦᱟᱴ ᱠᱷᱚᱱ ᱨᱩᱣᱟᱹᱲ ᱠᱟᱛᱮ ᱵᱟᱦᱨᱮ ᱜᱮᱴ ᱠᱷᱚᱱ ᱦᱟᱱᱦᱟᱨ ᱦᱚᱧᱦᱟᱨ ᱛᱮᱫ ᱵᱩᱜᱤ ᱛᱮᱠᱤᱱ ᱦᱚᱦᱚᱭᱟ, ᱵᱟᱹᱦᱩ ᱵᱟᱹᱦᱩ !! ᱮᱱᱠᱷᱟᱱ ᱨᱟᱡᱽᱢᱟᱞ ᱢᱤᱨᱩᱭ ᱢᱮᱛᱟᱭᱟ “ᱱᱩᱠᱤᱱᱟᱜ ᱠᱟᱛᱷᱟ ᱤᱧᱤᱧ ᱵᱩᱡᱷᱟᱹᱣ ᱮᱫᱼᱟ, ᱫᱩ ᱟᱢ ᱫᱚ ᱪᱟᱞᱟᱣ ᱞᱮᱱ ᱢᱮ ᱾ ᱪᱮᱫ ᱠᱤᱱ ᱦᱚᱦᱚ ᱮᱫᱼᱟ ᱟᱭᱳ ᱟᱨ ᱵᱟᱵᱟ” ? ᱢᱤᱨᱩ ᱜᱚᱝ ᱠᱟᱛᱮ ᱢᱮᱱᱟᱭ, ᱦᱚᱭ ᱦᱚᱭ ᱪᱟᱞᱟᱜ ᱠᱟᱱᱟᱹᱧ ᱟᱨ ᱚᱲᱟᱜ ᱠᱷᱚᱱ ᱮ ᱚᱰᱚᱠᱚᱜᱼᱟ ᱾
***
