ᱟᱞᱟᱭ

ᱢᱤᱫ ᱴᱤᱰᱟᱹᱜ ᱥᱤᱸᱫᱩᱨ ᱞᱟᱹᱜᱤᱫ ᱛᱮ,
ᱤᱧ ᱫᱩᱧ ᱟᱞᱟᱭ ᱠᱮᱫᱼᱟ ᱥᱟᱱᱟᱢᱟᱜ᱾
ᱥᱟᱠᱚᱢ ᱨᱮᱱᱟᱝ ᱯᱟᱹᱛᱭᱟᱹᱣ ᱛᱮ,
ᱤᱧ ᱫᱩᱧ ᱞᱟᱞᱮ ᱪᱟᱯᱮ ᱭᱮᱱᱟ᱿

ᱵᱟᱹᱜᱤ ᱭᱟᱫᱼᱟᱹᱧ ᱟᱭᱚᱼᱵᱟᱵᱟ ᱦᱟᱜ ᱫᱩᱞᱟᱹᱲ,
ᱵᱟᱹᱜᱤ ᱭᱟᱹᱫᱼᱟᱧ ᱟᱯᱟ ᱵᱟᱨᱮ ᱭᱟᱜ ᱥᱤᱵᱤᱞ᱾
ᱪᱷᱩᱰᱟᱹᱨ ᱵᱟᱹᱜᱤ ᱭᱟᱫᱼᱟᱹᱧ ᱢᱟᱨᱮ ᱜᱟᱛᱮ ᱥᱟᱹᱜᱟᱹᱭ,
ᱪᱷᱩᱰᱟᱹᱨ ᱵᱟᱹᱜᱤ ᱭᱟᱫᱼᱟᱹᱧ ᱥᱟᱱᱟᱢ ᱞᱮᱠᱟᱱ ᱩᱭᱦᱟᱹᱨ᱿

ᱩᱠᱩ ᱨᱮᱜᱤᱧ ᱫᱚᱦᱚ ᱠᱮᱫᱟ,
ᱢᱮᱫ ᱨᱮᱱᱟᱝ ᱢᱮᱫ ᱫᱟᱜ᱾
ᱥᱟᱦᱟ ᱨᱮᱜᱤᱧ ᱫᱚᱦᱚ ᱠᱮᱫᱟ,
ᱥᱟᱱᱟᱢ ᱞᱮᱠᱟᱱ ᱩᱭᱦᱟᱹᱨ ᱵᱷᱟᱵᱽᱱᱟ᱿

ᱮᱱᱛᱮ ᱨᱮᱦᱚᱸ ᱵᱟᱹᱧ ᱠᱷᱚᱡᱽ ᱞᱮᱱ,
ᱪᱮᱫ ᱦᱚᱸ ᱛᱚ ᱟᱢ ᱴᱷᱮᱱ᱾
ᱮᱱᱛᱮ ᱨᱮᱦᱚᱸ ᱪᱮᱫ ᱥᱟᱱᱟᱝ ᱦᱚᱸ,
ᱵᱟᱹᱧ ᱫᱚᱦᱚ ᱞᱮᱫ ᱟᱢ ᱴᱷᱮᱱ᱿

ᱪᱮᱫ ᱦᱚᱸ ᱛᱚ ᱵᱟᱝᱜᱤᱧ ᱵᱚᱫᱚᱞ ᱞᱮᱫᱟ,
ᱚᱠᱟ ᱦᱚᱸ ᱛᱚ ᱵᱟᱝᱜᱤᱧ ᱟᱹᱨᱩ ᱨᱩᱣᱟᱹᱲ ᱞᱮᱫᱟ᱾
ᱤᱧ ᱤᱧ ᱛᱤᱧ ᱵᱚᱫᱚᱞ ᱮᱱᱟ,
ᱯᱟᱪᱷᱮ ᱥᱟᱹᱜᱟᱹᱭ ᱟᱞᱚ ᱨᱟᱹᱯᱩᱫᱚᱜ ᱢᱟ᱿

ᱥᱟᱱᱟᱝ ᱛᱤᱧᱤᱧ ᱵᱚᱫᱚᱞ ᱠᱮᱫᱟ,
ᱦᱚᱨᱚᱜ ᱵᱟᱸᱫᱤᱧ ᱵᱚᱫᱚᱞ ᱠᱮᱫᱟ᱾
ᱵᱚᱫᱚᱞ ᱮᱱᱟ ᱤᱧᱟᱜ ᱥᱟᱱᱟᱢ ᱥᱟᱹᱜᱟᱭ,
ᱵᱚᱫᱚᱞ ᱮᱱᱟ ᱤᱧᱟᱜ ᱧᱩᱛᱩᱢ ᱥᱟᱶ ᱛᱮᱭᱟᱜ ᱯᱟᱹᱨᱤᱥ᱿

ᱥᱟᱯᱲᱟᱣ ᱤᱱᱟᱹᱧ ᱫᱚᱨᱭᱟ ᱫᱟᱜ ᱨᱮ,
ᱞᱤᱝᱜᱤ ᱢᱮᱥᱟᱜ ᱞᱟᱹᱜᱤᱫ᱾
ᱥᱟᱯᱲᱟᱣ ᱤᱱᱟᱹᱧ ᱵᱟᱱ ᱜᱟᱰᱟ ᱥᱟᱶ,
ᱵᱚᱦᱮᱞ ᱪᱟᱞᱟᱣ ᱞᱟᱹᱜᱤᱫ᱿

ᱵᱟᱧᱪᱟᱣ ᱵᱟᱲᱮ ᱛᱟᱦᱮᱸ ᱠᱚᱜ ᱢᱟ,
ᱚᱜᱚᱢ ᱫᱚᱨᱭᱟ ᱨᱮ ᱤᱧᱟᱜ ᱢᱮᱥᱟ ᱠᱟᱛᱮ ᱦᱚᱸ ᱩᱯᱨᱩᱢ᱾
ᱩᱭᱦᱟᱹᱨ ᱵᱟᱲᱮ ᱛᱟᱦᱮᱸ ᱠᱚᱜ ᱢᱟ,
ᱤᱧᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱟᱞᱟᱭᱹᱹᱹᱹᱹᱹᱹ᱿

---