ᱢᱮᱱᱟᱜᱼᱟ ᱠᱩᱠᱞᱤ ᱱᱤᱛ ᱦᱚᱸ ᱢᱚᱱᱮ ᱨᱮ
ᱯᱷᱩᱨᱜᱟᱹᱞ ᱫᱤᱥᱚᱢ ᱨᱮ
ᱛᱤᱨᱞᱟᱹ ᱠᱚᱣᱟᱜ ᱴᱷᱟᱸᱣ ᱫᱚ ᱚᱠᱟᱨᱮ?
ᱢᱮᱱᱟᱜᱼᱟ ᱠᱩᱠᱞᱤ ᱱᱤᱛ ᱦᱚᱸ ᱢᱚᱱᱮ ᱨᱮ
ᱛᱤᱥ ᱞᱮ ᱧᱟᱢᱟ ᱟᱞᱮᱫᱚ ᱨᱤᱦᱟᱹᱭ?
ᱢᱮᱱᱟᱜᱼᱟ ᱠᱩᱠᱞᱤ ᱱᱤᱛ ᱦᱚᱸ ᱢᱚᱱᱮ ᱨᱮ
ᱟᱨᱦᱚᱸ ᱛᱤᱢᱤᱱ ᱫᱤᱱ ᱞᱮ ᱛᱟᱦᱮᱸᱱᱟ ᱛᱟᱺᱜᱤ ᱛᱟᱸᱲᱟᱜ ᱨᱮ?
ᱚᱠᱛᱚ ᱯᱟᱨᱚᱢᱚᱜ ᱠᱟᱱᱟ
ᱡᱩᱜᱽ ᱵᱚᱫᱚᱞᱚᱜ ᱠᱟᱱᱟ
ᱥᱟᱶ ᱥᱟᱶ ᱛᱮ ᱥᱚᱨᱠᱟᱨ ᱦᱚᱸᱠᱚ
ᱚᱫᱚᱞ ᱵᱚᱫᱚᱞ ᱪᱟᱞᱟᱜ ᱠᱟᱱᱟ᱾
ᱚᱠᱟ ᱚᱠᱛᱚ ᱫᱚ “ᱱᱟᱨᱤ ᱥᱚᱥᱚᱠᱛᱤᱠᱚᱨᱚᱬ”
ᱟᱨᱦᱚᱸ ᱚᱠᱟ ᱚᱠᱛᱚ ᱫᱚ
“ᱵᱮᱴᱤ ᱵᱟᱪᱟᱣ ᱵᱮᱴᱤ ᱯᱟᱲᱦᱟᱣ”
ᱨᱮᱱᱟᱜ ᱱᱟᱨᱟ ᱠᱚ ᱦᱚᱦᱚᱭᱟ
ᱢᱮᱱᱠᱷᱟᱱ ᱛᱤᱨᱞᱟᱹ ᱠᱚᱣᱟᱜ ᱴᱷᱟᱸᱣ ᱫᱚ
ᱵᱟᱝ ᱜᱮ ᱯᱷᱮᱨᱟᱜ ᱠᱟᱱᱟ᱾
ᱟᱹᱰᱤ ᱠᱚᱢ ᱛᱤᱨᱞᱟᱹ ᱜᱮ
ᱠᱚᱯᱟᱲᱟᱱ ᱫᱚᱠᱚ ᱦᱩᱭᱩᱜ ᱠᱟᱱᱟ
ᱡᱟᱦᱟᱸᱭ ᱠᱚ ᱟᱯᱟᱱᱼᱟᱹᱯᱤᱱ ᱥᱟᱶᱛᱟ ᱨᱮᱱᱟᱜ
ᱵᱟᱹᱲᱤᱡ ᱡᱷᱟᱹᱞᱤ ᱠᱷᱚᱱ ᱵᱟᱧᱪᱟᱣ ᱠᱟᱛᱮ ᱠᱚ
ᱩᱰᱟᱹᱣ ᱚᱰᱚᱠ ᱫᱟᱲᱮᱭᱟᱜ ᱠᱟᱱᱟ᱾
ᱧᱮᱞᱚᱜᱚᱜ ᱠᱟᱱᱟ ᱟᱯᱟᱱᱼᱟᱹᱯᱤᱱ ᱥᱟᱶᱛᱟ ᱨᱮᱱᱟᱜ
ᱵᱟᱹᱲᱤᱡ ᱡᱷᱟᱹᱞᱤ ᱠᱷᱚᱱ
ᱱᱤᱛ ᱦᱚᱸ ᱛᱤᱨᱞᱟᱹ ᱫᱚ
ᱵᱟᱝ ᱠᱚ ᱯᱷᱩᱨᱜᱟᱹᱞ ᱫᱟᱲᱮ ᱟᱠᱟᱣᱟᱫᱟ᱾
ᱚᱠᱟ ᱠᱚᱨᱮ ᱫᱚ ᱟᱸᱫᱷᱟ ᱯᱟᱹᱛᱭᱟᱹᱣ
ᱚᱠᱟ ᱠᱚᱨᱮ ᱫᱚ ᱥᱟᱶᱛᱟ ᱨᱮᱱᱟᱜ ᱵᱟᱹᱲᱤᱡ ᱨᱟᱭᱨᱤᱛ
ᱟᱨᱦᱚᱸ ᱚᱠᱟ ᱠᱚᱨᱮ ᱫᱚ
ᱜᱚᱱᱼᱯᱚᱱ ᱨᱮᱱᱟᱜ ᱞᱚᱵᱽᱼᱞᱟᱞᱚᱪ ᱛᱮ
ᱛᱤᱨᱞᱟᱹ ᱠᱚᱠᱚ ᱨᱟᱯᱟᱜ ᱨᱚᱸᱜᱚ ᱦᱚᱪᱚᱜ ᱠᱟᱱᱟ᱾
ᱧᱮᱞ ᱟᱠᱟᱱᱟ ᱚᱠᱟ ᱠᱚᱨᱮ ᱫᱚ
ᱯᱚᱸᱪ ᱠᱚᱣᱟᱜ ᱵᱤᱪᱟᱹᱨ ᱜᱚᱴᱟ ᱴᱷᱤᱠ ᱠᱟᱛᱮ
ᱟᱨᱦᱚᱸ ᱚᱠᱟ ᱠᱚᱨᱮ ᱫᱚ
ᱢᱟᱹᱡᱷᱤᱼᱢᱚᱲᱮ ᱠᱚᱣᱟᱜ
ᱟᱪᱟᱨᱼᱵᱤᱪᱟᱹᱨ ᱨᱮ ᱴᱷᱟᱲᱚ ᱜᱚᱴᱟ ᱠᱟᱛᱮ
ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱵᱟᱸᱫᱮ ᱞᱩᱜᱽᱲᱤ ᱦᱚᱸᱠᱚ
ᱚᱨ ᱵᱷᱩᱲᱩᱡ ᱟᱠᱟᱫ ᱠᱚᱣᱟ
ᱡᱟᱦᱟᱸ ᱞᱮᱠᱟ ᱢᱟᱦᱟᱵᱷᱟᱨᱚᱛ ᱨᱮᱱᱟᱜ ᱠᱟᱹᱦᱱᱤ ᱨᱮᱵᱚᱱ ᱟᱸᱡᱚᱢ ᱟᱠᱟᱫᱟ᱾
ᱱᱚᱣᱟ ᱠᱚᱪᱞᱚᱱ ᱠᱚᱢᱟ
ᱛᱤᱨᱞᱟᱹ ᱠᱚᱠᱚ ᱥᱟᱦᱟᱣ ᱟᱹᱜᱩᱭᱮᱫ ᱠᱟᱱ ᱜᱮ ᱛᱟᱦᱮᱸᱱ
ᱢᱮᱱᱠᱷᱟᱱ ᱫᱤᱱ ᱠᱮ ᱫᱤᱱ ᱵᱟᱹᱲᱛᱤ ᱤᱫᱤᱜ ᱠᱟᱱ
ᱛᱤᱨᱞᱟᱹ ᱦᱚᱲᱢᱚ ᱪᱮᱛᱟᱱ
ᱡᱚᱨᱼᱡᱩᱞᱩᱢ ᱠᱟᱛᱮ ᱵᱮᱵᱟᱹᱲᱤᱡ ᱠᱟᱹᱢᱤ
ᱱᱚᱣᱟ ᱠᱚᱪᱞᱚᱱ ᱪᱤᱠᱟᱹ ᱛᱮᱞᱮ ᱥᱟᱦᱟᱣᱟ
ᱞᱟᱹᱭ ᱟᱞᱮ ᱯᱮ ᱢᱮᱱᱟᱜ ᱯᱮᱠᱷᱟᱱ ᱡᱟᱦᱟᱸᱭ᱾
ᱱᱚᱣᱟ ᱠᱷᱚᱱ ᱦᱚᱸ ᱵᱟᱹᱲᱛᱤ ᱦᱟᱹᱥᱩᱣᱟ
ᱡᱚᱠᱷᱚᱱ ᱟᱹᱱᱼᱟᱹᱨᱤ ᱪᱟᱪᱟᱞᱟᱣ ᱠᱚ
ᱫᱤᱥᱚᱢ ᱫᱚᱨᱵᱟᱨ ᱛᱟᱞᱟ
ᱯᱮᱨᱮᱡ ᱟᱠᱟᱱ ᱦᱚᱲᱠᱚ ᱥᱟᱢᱟᱝ
ᱛᱤᱨᱞᱟᱹ ᱪᱮᱛᱟᱱ ᱱᱚᱣᱟ ᱠᱩᱠᱞᱤᱭ ᱨᱟᱠᱟᱵᱟ
ᱢᱟ ᱟᱹᱭᱠᱟᱹᱣ ᱢᱮ ᱩᱱ ᱚᱠᱛᱚ ᱨᱮᱱᱟᱜ ᱦᱟᱹᱥᱩ
ᱟᱨ ᱚᱱᱟ ᱦᱟᱹᱥᱩ ᱛᱮᱢ ᱪᱷᱚᱴᱯᱚᱴᱟᱜ ᱠᱟᱱ
ᱚᱠᱛᱚᱭ ᱧᱮᱞ ᱟᱠᱟᱫ ᱥᱟᱹᱠᱷᱤ ᱭᱟᱜ ᱪᱤᱛᱟᱹᱨ᱾
ᱚᱥᱚᱦᱟᱭ ᱛᱤᱸᱜᱩ ᱟᱠᱟᱱ ᱛᱤᱨᱞᱟᱹ ᱩᱱ ᱫᱚ
ᱠᱚᱲᱟᱢ ᱯᱚᱥᱟᱜᱚᱜ ᱞᱮᱠᱟᱱ ᱦᱟᱹᱥᱩ ᱥᱟᱦᱟᱣ ᱠᱟᱛᱮ
ᱢᱮᱫ ᱯᱮᱨᱮᱡ ᱢᱮᱫ ᱫᱟᱜ ᱪᱷᱤᱞᱠᱟᱹᱣ ᱚᱰᱚᱠᱚᱜ ᱛᱟᱭᱟ
ᱠᱚᱲᱟᱢ ᱪᱮᱛᱟᱱ ᱛᱮ
ᱟᱨ ᱱᱚᱣᱟ ᱧᱮᱞ ᱠᱟᱛᱮ
ᱟᱹᱱᱼᱟᱹᱨᱤ ᱪᱟᱪᱟᱞᱟᱣᱤᱡᱟᱜ ᱢᱮᱫᱼᱟᱦᱟ ᱨᱮ
ᱡᱷᱟᱞᱠᱟᱣ ᱨᱟᱠᱟᱵᱼᱟ ᱢᱩᱞᱩᱡ ᱢᱟᱪᱷᱟ ᱞᱟᱸᱫᱟ᱾
ᱚᱱᱟᱛᱮ, ᱢᱚᱱᱮ ᱨᱮ ᱦᱤᱡᱩᱜ ᱠᱟᱱᱟ ᱠᱩᱠᱞᱤ
ᱯᱷᱩᱨᱜᱟᱹᱞ ᱫᱤᱥᱚᱢ ᱨᱮ
ᱛᱤᱨᱞᱟᱹ ᱠᱚᱣᱟᱜ ᱴᱷᱟᱸᱣ ᱫᱚ ᱚᱠᱟᱨᱮ?
ᱩᱭᱦᱟᱹᱨ ᱞᱮᱠᱷᱟᱱ
ᱢᱮᱫ ᱫᱟᱜ ᱯᱮᱨᱮᱡᱚᱜᱼᱟ ᱢᱮᱫ ᱨᱮ
ᱩᱞᱤᱫᱟᱜ ᱨᱚᱦᱚᱲᱚᱜᱼᱟ ᱱᱟᱹᱨᱲᱤ ᱨᱮ
ᱥᱤᱢᱡᱤᱞ ᱨᱟᱠᱟᱵᱚᱜᱼᱟ ᱦᱚᱲᱢᱚ ᱨᱮ
ᱡᱷᱟᱞᱠᱟᱣ ᱨᱟᱠᱟᱵᱼᱟ ᱢᱮᱫ ᱥᱟᱢᱟᱝ ᱨᱮ
ᱫᱤᱞᱞᱤ ᱨᱮᱱᱤᱡ ᱱᱤᱨᱵᱷᱚᱭᱟ ᱥᱟᱶᱛᱮ
ᱛᱤᱱᱟᱹᱜ ᱛᱤᱱᱟᱹᱜ ᱛᱤᱨᱞᱟᱹ ᱠᱚᱣᱟᱜ ᱢᱮᱫ ᱢᱩᱴᱷᱟᱹᱱ᱾
ᱫᱤᱥᱚᱢ ᱨᱮᱱᱟᱜ ᱨᱟᱡᱽᱜᱟᱲ ᱠᱷᱚᱱ ᱮᱦᱚᱵ ᱠᱟᱛᱮ
ᱯᱚᱱᱚᱛ, ᱡᱤᱞᱟᱹ, ᱯᱨᱚᱠᱷᱚᱱᱰ ᱥᱟᱶᱛᱮ
ᱟᱛᱚᱼᱴᱚᱞᱟ ᱦᱟᱹᱵᱤᱡ
ᱛᱟᱨᱠᱚᱜ ᱠᱟᱱᱟ ᱛᱤᱨᱞᱟᱹ ᱠᱚᱣᱟᱜ ᱚᱥᱚᱦᱟᱭ ᱟᱲᱟᱝ
ᱦᱤᱡᱩᱜ ᱯᱮᱥᱮ ᱫᱮᱞᱟ ᱟᱞᱮ ᱵᱟᱧᱪᱟᱣ
ᱢᱮᱱᱟᱜ ᱯᱮᱠᱷᱟᱱ
ᱥᱩᱢᱼᱥᱟᱸᱦᱚᱥ ᱟᱨ ᱫᱤᱞᱼᱫᱟᱲᱮᱭᱟᱱ ᱦᱚᱲ ᱡᱟᱦᱟᱸᱭ᱾
ᱟᱹᱰᱤ ᱦᱚᱲ ᱠᱚ ᱢᱮᱱᱟ
ᱟᱹᱱ ᱥᱮ ᱠᱟᱹᱱᱩᱱ ᱫᱚᱭ ᱠᱟᱬᱟ ᱜᱮᱭᱟ
ᱵᱟᱝ ᱜᱮ
ᱟᱹᱱᱼᱟᱹᱨᱤ ᱪᱟᱪᱟᱞᱟᱣ ᱠᱚ
ᱠᱤᱪᱷᱩᱠ ᱦᱚᱲ ᱠᱚ ᱠᱟᱬᱟ ᱦᱟ
ᱟᱹᱱᱼᱟᱹᱨᱤ ᱨᱮᱱᱟᱜ ᱯᱷᱟᱸᱫᱽ ᱨᱮ
ᱛᱤᱨᱞᱟᱹ ᱠᱚ ᱡᱷᱟᱹᱞᱤ ᱤᱫᱤ ᱠᱚᱣᱟ
ᱟᱨ ᱵᱮᱵᱟᱹᱲᱤᱡ ᱠᱟᱹᱢᱤ ᱭᱟᱠᱟᱫ ᱦᱚᱲ ᱠᱚ
ᱫᱩᱜ ᱫᱟᱨᱟᱢ ᱞᱟᱹᱜᱤᱫ ᱟᱭᱢᱟ ᱦᱚᱲ ᱠᱚ ᱚᱰᱚᱠ ᱤᱫᱤᱜᱼᱟ
ᱟᱨ ᱟᱹᱱᱼᱟᱹᱨᱤ ᱪᱟᱪᱟᱞᱟᱣᱤᱡ ᱫᱚ
ᱢᱟᱹᱦᱤᱛ ᱠᱮ ᱢᱟᱹᱦᱤᱛ, ᱢᱟᱦᱤᱛ ᱠᱮ ᱢᱟᱹᱦᱤᱛ
ᱫᱤᱱ ᱫᱚᱭ ᱵᱟᱰᱷᱟᱣ ᱤᱫᱤᱭᱟ᱾
ᱱᱚᱛᱮ ᱠᱟᱹᱭ ᱟᱠᱟᱫ ᱦᱚᱲ ᱥᱟᱹᱥᱛᱤ ᱠᱚ ᱧᱟᱢ ᱢᱟ
ᱱᱚᱣᱟ ᱨᱮᱱᱟᱜ ᱢᱟᱦᱟᱼᱢᱟᱹᱦᱤᱛ ᱛᱟᱺᱜᱤ ᱛᱟᱺᱜᱤ ᱛᱮ
ᱛᱤᱨᱞᱟᱹ ᱟᱨ ᱟᱭᱳ ᱠᱚᱣᱟᱜ ᱢᱮᱫ ᱫᱟᱜ ᱨᱚᱦᱚᱲ ᱪᱟᱵᱟᱜᱼᱟ
ᱨᱤᱫᱟᱹᱭ ᱨᱮᱱᱟᱜ ᱵᱩᱠᱩᱫ ᱵᱩᱠᱩᱫ ᱛᱷᱤᱨ ᱤᱫᱤᱜᱼᱟ
ᱮᱱᱛᱮ ᱨᱮᱦᱚᱸ ᱵᱮᱵᱟᱹᱲᱤᱡ ᱠᱟᱹᱢᱤ ᱟᱠᱟᱫ ᱦᱚᱲ ᱠᱚᱫᱚ
ᱵᱟᱝ ᱠᱚ ᱧᱟᱢᱮᱫᱟ ᱥᱟᱹᱥᱛᱤ
ᱚᱱᱟᱛᱮ ᱵᱟᱨ ᱵᱟᱨ, ᱵᱟᱨ ᱵᱟᱨ
ᱠᱩᱠᱞᱤ ᱦᱤᱡᱩᱜ ᱠᱟᱱᱟ ᱢᱚᱱᱮ ᱨᱮ
ᱛᱤᱨᱞᱟᱹ ᱠᱚᱫᱚ ᱛᱤᱥ ᱞᱮ ᱧᱟᱢᱟ ᱨᱤᱦᱟᱹᱭ
ᱟᱨ ᱛᱤᱢᱤᱱ ᱫᱤᱱ ᱞᱮ ᱛᱟᱦᱮᱸᱱᱟ ᱛᱟᱺᱜᱤ ᱛᱟᱸᱲᱟᱜ ᱨᱮ
ᱛᱤᱢᱤᱱ ᱫᱤᱱ ᱞᱮ ᱛᱟᱦᱮᱸᱱᱟ ᱛᱟᱺᱜᱤ ᱛᱟᱸᱲᱟᱜ ᱨᱮ᱾
ᱢᱟᱹᱱᱤ ᱭᱚᱥᱳᱫᱟ ᱢᱩᱨᱢᱩ
ᱱᱟᱣᱟ ᱫᱤᱞᱞᱤ
(ᱡᱮᱜᱮᱛ ᱡᱟᱠᱟᱛ ᱛᱤᱨᱞᱟᱹ ᱢᱟᱦᱟ ᱨᱮ ᱥᱟᱦᱤᱛᱭᱚ ᱟᱠᱟᱫᱮᱢᱤ ᱱᱟᱣᱟ ᱫᱤᱞᱞᱤ ᱦᱚᱛᱮᱛᱮ ᱥᱟᱯᱲᱟᱣ ᱞᱮᱱ ᱛᱤᱨᱞᱟᱹ ᱚᱱᱚᱞᱤᱭᱟᱹ ᱠᱚ ᱵᱟᱠᱷᱨᱟ ᱢᱤᱫ ᱟᱠᱷᱲᱟ, ᱟᱜᱚᱨᱛᱚᱞᱟ ᱡᱮᱜᱮᱛ ᱵᱤᱨᱫᱟᱹᱜᱟᱲ ᱨᱮ ᱢᱟᱹᱦᱤᱛ ᱐᱘ᱹ᱐᱓ᱹ᱒᱐᱒᱐ ᱦᱤᱞᱚᱜ ᱛᱟᱦᱮᱸ ᱠᱟᱱᱟ, ᱚᱸᱰᱮ ᱜᱮ ᱱᱚᱣᱟ ᱫᱚ ᱥᱚᱫᱚᱨ ᱦᱩᱭ ᱞᱮᱱᱟ ᱟᱨ ᱱᱚᱣᱟ ᱚᱱᱚᱬᱦᱮᱸ ᱫᱚ ᱡᱚᱛᱚ ᱥᱟᱶᱛᱟ ᱨᱮᱱ ᱛᱤᱨᱞᱟᱹ ᱠᱚ ᱫᱤᱥᱟᱹ ᱠᱟᱛᱮ ᱚᱞ ᱢᱮᱱᱟᱜᱼᱟ ᱚᱱᱟ ᱞᱟᱹᱜᱤᱫ ᱟᱫᱚᱢ ᱠᱟᱛᱷᱟ ᱠᱚᱫᱚ ᱟᱵᱚ ᱥᱟᱶᱛᱮ ᱢᱤᱞ ᱵᱟᱹᱱᱩᱜᱼᱟ, ᱞᱟᱦᱟ ᱨᱮᱜᱮ ᱤᱠᱟᱹ ᱠᱚᱭ ᱦᱩᱭᱩᱜ ᱠᱟᱱᱟ ᱾)
***
