ᱟᱭᱳ ᱵᱟᱵᱟ ᱫᱩᱞᱟᱹᱲ ᱟᱹᱰᱤ ᱢᱟᱨᱟᱝ ᱫᱩᱞᱟᱹᱲ
ᱱᱚᱶᱟ ᱫᱩᱞᱟᱹᱲ ᱠᱷᱚᱱ ᱫᱚ ᱚᱠᱟ ᱢᱟᱨᱟᱝ,
ᱠᱚᱞᱮ ᱵᱟᱞᱮ ᱠᱷᱚᱱᱟᱜ ᱠᱤᱱ ᱥᱮᱯᱮᱧ ᱦᱟᱨᱟ ᱢᱮᱭᱟ
ᱫᱩᱞᱟᱹᱲ ᱩᱢᱩᱞ ᱨᱮ ᱠᱤᱱ ᱫᱚᱦᱚ ᱠᱟᱢᱟ ᱾
ᱮᱜᱮᱨ ᱢᱮ ᱨᱚᱦᱮᱫ ᱢᱮ ᱟᱨ ᱦᱚᱸᱭ ᱫᱩᱞᱟᱹᱲ ᱢᱮᱭᱟ
ᱠᱚᱞᱮ ᱪᱮᱛᱟᱱ ᱨᱮ ᱠᱤᱱ ᱜᱩᱸᱜᱩᱫ ᱠᱟᱱᱟ
ᱡᱟᱱᱟᱢ ᱟᱭᱳ ᱫᱩᱞᱟᱹᱲ ᱠᱩᱸᱭᱰᱤ ᱢᱤᱨᱩ ᱞᱮᱠᱟ
ᱥᱤᱢᱨᱟᱜ ᱢᱟᱬᱟᱝ ᱨᱮᱜᱮ ᱫᱩᱞᱟᱹᱲ ᱠᱟᱛᱮᱭ ᱮᱵᱷᱮᱱ ᱢᱮᱭᱟ ᱾
ᱵᱤᱪᱷᱚᱠ ᱟᱠᱟᱱ ᱢᱚᱱᱮ ᱠᱚᱭᱮᱞ ᱟᱲᱟᱝ ᱛᱮᱜᱮ ᱛᱤᱨᱯᱤ ᱤᱬᱤᱡ ᱠᱟᱛᱮ
ᱠᱟᱹᱦᱤᱸᱥ ᱡᱤᱣᱤ ᱨᱮ ᱥᱩᱠ ᱮ ᱥᱟᱨᱥᱟᱣ ᱟᱢᱟ
ᱟᱭᱳ ᱟᱹᱭᱩᱨ ᱰᱟᱦᱟᱨ ᱡᱩᱞᱩᱜ ᱵᱟᱹᱛᱤ ᱞᱮᱠᱟ
ᱧᱤᱫᱟᱹ ᱧᱩᱛᱟᱹᱛ ᱠᱚᱨᱮ ᱛᱟᱦᱟᱢ ᱛᱩᱠᱩᱡ ᱵᱮᱲᱟᱨᱮ ᱦᱚᱨ ᱮ ᱢᱟᱨᱥᱟᱞ ᱾
ᱱᱤᱛ ᱤᱧ ᱠᱤᱱ ᱦᱟᱨᱟ ᱵᱩᱨᱩ ᱠᱮᱫᱤᱧ
ᱵᱟᱜᱟᱱ ᱢᱟᱹᱞᱤ ᱵᱟᱦᱟ ᱞᱮᱠᱟ ᱠᱤᱱ ᱡᱚᱛᱚᱱ ᱠᱮᱫᱤᱧ
ᱟᱭᱳ ᱵᱟᱵᱟ ᱡᱚᱴ ᱡᱟᱹᱱᱤ ᱜᱟᱛᱮ ᱠᱤᱱ ᱧᱟᱢ ᱟᱹᱫᱤᱧ
ᱪᱟᱸᱫᱚ ᱨᱮᱱᱟᱜ ᱞᱮᱠᱷᱟᱡᱚᱠᱷᱟ ᱟᱭᱳ ᱵᱟᱵᱟ ᱛᱚᱯᱚᱞ ᱥᱟᱹᱜᱟᱹᱭ
ᱡᱚᱲᱟᱣ ᱥᱤᱠᱲᱤ ᱚᱠᱚᱭ ᱨᱟᱪᱟᱜ ᱛᱚᱯᱟᱜᱽ ᱾
ᱪᱟᱸᱫᱚ ᱨᱮᱱᱟᱜ ᱞᱤᱠᱷᱚᱱ ᱠᱩᱲᱤ ᱦᱚᱯᱚᱱ ᱡᱟᱱᱟᱢ
ᱟᱭᱳ ᱵᱟᱵᱟ ᱚᱲᱟᱜ ᱨᱮᱫᱚ ᱚᱦᱚᱢ ᱚᱲᱟᱜ ᱫᱩᱣᱟᱹᱨ ᱠᱮᱭᱟ
ᱟᱭᱳ ᱵᱟᱵᱟ ᱢᱟᱭᱟ ᱪᱩᱰᱟᱹᱨ ᱠᱟᱛᱮ ᱡᱟᱶᱟᱭ ᱚᱲᱟᱜ
ᱥᱟᱸᱜᱮ ᱵᱟᱹᱨᱤᱭᱟᱹᱛ ᱟᱛᱮ ᱤᱧ ᱠᱚ ᱤᱫᱤ ᱤᱧᱟ
ᱟᱯᱟ ᱵᱟᱨᱮ ᱠᱷᱚᱱᱟᱜ ᱤᱧ ᱠᱚ ᱥᱟᱺᱜᱤᱧ ᱤᱧᱟ
ᱢᱮᱫ ᱫᱟᱜ ᱡᱚᱨᱚᱜ ᱫᱚ ᱮᱱ ᱦᱚᱸ ᱢᱟᱥᱮ ᱤᱧ ᱠᱚ ᱵᱤᱫᱟᱹᱭ ᱤᱧᱟ ᱾
ᱡᱟᱱᱟᱢ ᱚᱲᱟᱜ ᱨᱮᱫᱚ ᱫᱤᱱ ᱥᱩᱠ ᱡᱤᱵᱚᱱ ᱜᱮ
ᱞᱟᱸᱫᱟ ᱞᱟᱸᱫᱟᱢ ᱵᱚᱞᱚᱱ ᱵᱟᱦᱟ ᱵᱟᱲᱜᱮ
ᱱᱤᱛ ᱤᱧ ᱵᱚᱞᱚᱱ ᱠᱟᱱᱟ ᱦᱟᱱᱦᱟᱨ ᱦᱚᱧᱦᱟᱨ ᱛᱟᱞᱟ ᱛᱮ
ᱞᱟᱦᱟᱣ ᱢᱮᱥᱟ ᱢᱩᱞᱩᱡ ᱞᱟᱸᱫᱟ ᱟᱛᱮ ᱾
ᱡᱟᱶᱟᱭ ᱤᱧ ᱥᱮᱵᱟ ᱮᱭᱟ ᱪᱟᱸᱫᱚ ᱵᱟᱨᱟᱵᱟᱹᱨᱤ
ᱟᱭᱳ ᱵᱟᱵᱟ ᱵᱟᱹᱧ ᱰᱷᱤᱞᱟᱹᱣ ᱠᱤᱱᱟ
ᱵᱮᱵᱷᱟᱨ ᱥᱩᱭ ᱥᱩᱛᱟᱹᱢ ᱛᱮ ᱢᱚᱱᱮ ᱵᱟᱹᱧ ᱜᱟᱵᱟᱱᱟ
ᱪᱟᱸᱫᱚ ᱴᱷᱮᱱ ᱤᱧ ᱱᱮᱦᱚᱸᱨᱚᱜᱼᱟ ᱫᱤᱱ ᱜᱮ ᱥᱮᱛᱟᱜ ᱟᱹᱭᱩᱵ
ᱤᱧᱟᱜ ᱥᱩᱞᱩᱠ ᱜᱷᱟᱨᱚᱸᱡᱽ ᱫᱤᱱ ᱜᱮ ᱥᱩᱞᱩᱠ ᱛᱟᱦᱮᱸᱱ ᱢᱟ ᱾
***
