ᱚᱠᱟ ᱦᱤᱞᱚᱜ ᱠᱷᱚᱱ ᱟᱨ ᱚᱠᱚᱭ ᱠᱷᱟᱹᱛᱤᱨ

ᱫᱷᱟᱹᱨᱛᱤ ᱯᱩᱨᱤ, ᱢᱩᱧᱪᱩ ᱯᱩᱨᱤ, ᱢᱤᱨᱛᱤᱠᱟ, ᱫᱩᱱᱤᱭᱟᱹ, ᱵᱚᱥᱢᱚᱛᱟ, ᱟᱨ ᱦᱚᱸ ᱮᱢᱟᱱ ᱮᱢᱟᱱ ᱧᱩᱛᱩᱢ ᱾ ᱧᱩᱛᱩᱢ ᱵᱷᱮᱜᱟᱨ ᱨᱮᱦᱚᱸ ᱡᱟᱭ ᱡᱤᱱᱤᱥ ᱫᱚ ᱢᱤᱫᱴᱟᱹᱝ ᱜᱮ ᱠᱟᱱᱟ ᱾ ᱡᱟᱦᱟᱸ ᱨᱮᱫᱚ ᱟᱵᱚ ᱵᱚᱱ ᱛᱟᱦᱮᱸᱱ ᱠᱟᱱᱟ ᱢᱟᱱᱣᱟ, ᱡᱟᱱᱣᱟ, ᱫᱷᱤᱨᱤ, ᱫᱟᱨᱮ, ᱫᱟᱜ, ᱦᱚᱭ, ᱞᱟᱛᱟᱨ ᱨᱮ ᱞᱮᱻᱞᱮᱝᱜᱮᱫ ᱚᱛ ᱦᱟᱥᱟ, ᱪᱮᱛᱟᱱ ᱨᱮ ᱞᱤᱞᱤᱵᱤᱪᱷᱤ ᱞᱤᱞ ᱥᱮᱨᱢᱟ, ᱚᱱᱟ ᱛᱟᱞᱟᱨᱮ ᱰᱚᱭᱞᱟᱝ ᱵᱟᱲᱟᱭ ᱠᱟᱱ ᱨᱟᱦᱞᱟ ᱨᱤᱢᱤᱞ ᱾ ᱱᱤᱛᱚᱜ ᱱᱚᱶᱟ ᱥᱟᱬᱮᱥ ᱡᱩᱜᱽ ᱨᱮ ᱱᱚᱶᱟ ᱠᱚ ᱟᱨ ᱦᱟᱦᱟᱲᱟ ᱡᱤᱱᱤᱥ ᱫᱚ ᱵᱟᱝ ᱠᱟᱱᱟ ᱾
ᱤᱠᱷᱟᱹᱱ ᱱᱚᱶᱟ ᱫᱚ ᱢᱤᱫ ᱟᱹᱰᱤ ᱜᱮ ᱦᱟᱦᱟᱲᱟ ᱡᱤᱱᱤᱥ ᱠᱟᱱᱟ, ᱫᱷᱟᱹᱨᱛᱤ ᱯᱩᱨᱤ ᱨᱮ ᱥᱤᱨᱡᱚᱱ ᱥᱟᱡᱟᱣ ᱥᱚᱵᱷᱟᱭ ᱞᱟᱹᱜᱤᱫ ᱵᱟᱨ ᱢᱟᱹᱱᱢᱤ ᱡᱟᱱᱟᱢᱚᱜ ᱟᱨ ᱩᱱᱠᱤᱱ ᱛᱟᱞᱟᱨᱮ ᱚᱛ ᱥᱮᱨᱢᱟ ᱨᱮᱭᱟᱜ ᱯᱷᱚᱨᱚᱠ ᱾ ᱟᱹᱠᱤᱱ ᱛᱟᱞᱟ ᱱᱩᱱᱟᱹᱝ ᱢᱟᱨᱟᱝ ᱯᱷᱚᱨᱚᱠ ᱥᱤᱢᱟᱹ ᱨᱮᱱᱟᱜ ᱠᱟᱸᱛ ᱪᱮᱫᱟᱜ ᱟᱨ ᱪᱮᱫ ᱠᱷᱟᱹᱛᱤᱨ “ᱚᱠᱟ ᱦᱤᱞᱚᱜ ᱠᱷᱚᱱ ᱟᱨ ᱚᱠᱚᱭ ᱠᱷᱟᱹᱛᱤᱨ” ᱛᱤᱸᱜᱩ ᱟᱠᱟᱱᱟ !!!
ᱫᱷᱟᱹᱨᱛᱤ ᱯᱩᱨᱤ ᱨᱮ ᱢᱟᱹᱱᱢᱤ ᱠᱚ ᱛᱟᱞᱟᱨᱮ ᱛᱟᱲᱟᱢ ᱰᱟᱦᱟᱨ ᱨᱮᱭᱟᱜ ᱥᱤᱢᱟᱹ ᱫᱷᱤᱨᱤ ᱵᱤᱫ ᱠᱟᱛᱮ ᱞᱮᱠᱟᱱ ᱞᱮᱠᱟᱱ ᱯᱟᱹᱨᱥᱤ ᱟᱨ ᱫᱷᱚᱨᱚᱢ ᱠᱚ ᱵᱟᱹᱭ ᱟᱠᱟᱱᱟ ᱾ ᱥᱤᱧᱚᱛ ᱫᱤᱥᱚᱢ ᱦᱩᱭᱩᱜ ᱥᱮ ᱥᱤᱧᱚᱛ ᱠᱷᱚᱱ ᱵᱟᱦᱨᱮ ᱫᱤᱥᱚᱢ ᱦᱩᱭᱩᱜ ᱟᱹᱰᱤᱜᱟᱱ ᱯᱟᱹᱨᱥᱤ ᱨᱤᱱ ᱢᱟᱱᱣᱟ ᱜᱮ ᱛᱟᱲᱟᱢ ᱨᱮᱱᱟᱜ ᱥᱤᱢᱟᱹ ᱫᱷᱤᱨᱤ ᱴᱷᱟᱹᱣᱠᱟᱹᱭ ᱞᱮᱠᱟᱛᱮ ᱫᱷᱚᱨᱚᱢ ᱛᱟᱠᱚ ᱢᱮᱱᱟᱜᱼᱟ ᱾ ᱱᱚᱶᱟ ᱵᱟᱝᱠᱷᱟᱱ ᱛᱟᱲᱟᱢ ᱨᱮᱭᱟᱜ ᱥᱤᱢᱟᱹ ᱵᱟᱝ ᱛᱟᱦᱮᱸᱱ ᱠᱟᱱᱟ ᱾

ᱱᱚᱝᱠᱟ ᱜᱮ ᱟᱹᱰᱤᱜᱟᱱ ᱜᱟᱸᱛᱟᱠ ᱨᱤᱱ ᱢᱟᱹᱱᱢᱤ ᱠᱚ ᱛᱟᱞᱟ ᱨᱮᱜᱮ ᱠᱩᱲᱤ ᱟᱨ ᱠᱚᱲᱟ ᱠᱚ ᱛᱟᱞᱟ ᱨᱮᱦᱚᱸ ᱞᱟᱹᱭ ᱞᱟᱠᱪᱟᱨ, ᱟᱹᱨᱤᱪᱟᱹᱞᱤ ᱧᱩᱛᱩᱢ ᱛᱮ ᱛᱟᱲᱟᱢ ᱨᱮᱱᱟᱜ, ᱵᱮᱵᱷᱟᱨ ᱨᱮᱱᱟᱜ ᱥᱤᱢᱟᱹ ᱫᱷᱤᱨᱤ ᱵᱤᱫ ᱟᱠᱟᱱᱟ ᱾
ᱛᱚᱵᱮ ᱟᱯᱱᱟᱨᱟᱜ ᱨᱟᱪᱟᱨᱮ ᱡᱚᱵᱽᱨᱟ ᱢᱮᱱᱟᱜ ᱛᱩᱞᱩᱡ ᱦᱚᱲᱟᱜ ᱨᱟᱪᱟ ᱨᱮᱱᱟᱜ ᱡᱚᱵᱽᱨᱟ ᱧᱮᱞ ᱧᱟᱢ ᱠᱟᱛᱮ ᱱᱚᱶᱟ ᱩᱭᱦᱟᱹᱨ ᱫᱚ ᱵᱮᱨᱛᱷᱟ ᱜᱮᱭᱟ ᱡᱮ ᱩᱱᱤᱭᱟᱜ ᱨᱟᱪᱟ ᱨᱮ ᱚᱠᱟ ᱠᱷᱚᱱ ᱟᱨ ᱚᱠᱚᱭ ᱦᱚᱛᱮᱛᱮ, ᱛᱤᱱᱨᱮ ᱟᱨ ᱪᱮᱫᱟᱜ ᱡᱚᱵᱽᱨᱟ ᱫᱚ !!!
ᱟᱯᱱᱟᱨᱟᱜ ᱨᱟᱪᱟ ᱨᱮᱱᱟᱜ ᱡᱚᱵᱽᱨᱟ ᱜᱮ ᱧᱮᱞ ᱢᱟ ᱛᱤᱥᱚᱜ ᱟᱨ ᱪᱮᱫ ᱠᱷᱟᱹᱛᱤᱨ ᱚᱠᱟ ᱠᱷᱚᱱ ᱟᱨ ᱚᱠᱚᱭ ᱦᱚᱛᱮᱛᱮ ᱤᱧᱟᱜ ᱨᱟᱪᱟ ᱨᱮ ᱱᱩᱱᱟᱹᱝ ᱡᱚᱵᱽᱨᱟ !! ᱟᱭᱳ ᱟᱨ ᱵᱟᱵᱟᱨᱮ ᱱᱩᱱᱟᱹᱝ ᱯᱷᱚᱨᱚᱠ ᱾ ᱱᱚᱶᱟ ᱠᱚ ᱡᱚᱵᱽᱨᱟ ᱟᱯᱱᱟᱨᱟᱜ ᱨᱟᱪᱟ ᱨᱮᱭᱟᱜ ᱞᱟᱹᱠᱛᱤᱭᱟᱱ ᱡᱤᱱᱤᱥ ᱠᱟᱱᱟ ᱢᱮᱱᱛᱮ ᱟᱯᱱᱟᱨ ᱟᱸᱜᱚᱪ ᱡᱚᱝ ᱫᱚ ᱟᱹᱰᱤ ᱜᱮ ᱦᱟᱦᱟᱲᱟ ᱠᱟᱛᱷᱟ ᱠᱟᱱᱟ ᱾ ᱱᱚᱶᱟ ᱠᱚ ᱨᱮᱱᱟᱜ ᱫᱟᱹᱭᱠᱟᱹ ᱮᱢ ᱞᱮᱠᱷᱟᱱ ᱵᱟᱝ ᱜᱮ ᱪᱟᱵᱟᱜᱼᱟ ᱾ ᱮᱱ ᱦᱚᱸ ᱛᱮᱦᱮᱧ ᱢᱤᱫ ᱫᱟᱹᱭᱠᱟᱹ ᱧᱮᱞ ᱜᱮᱞᱟᱭ ᱨᱮ ᱚᱠᱚᱭᱟᱜ ᱦᱚᱸ ᱪᱮᱫ ᱦᱚᱸ ᱵᱟᱝ ᱠᱷᱤᱛᱤᱜ ᱠᱟᱱᱟ ᱾

ᱢᱟᱹᱱᱢᱤ ᱠᱚᱣᱟᱜ ᱢᱚᱱᱮᱨᱮ ᱱᱚᱶᱟ ᱢᱤᱫᱴᱟᱹᱝ ᱜᱟᱹᱦᱤᱸᱨ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱡᱮ, ᱢᱟᱹᱱᱢᱤ ᱡᱚᱢ, ᱢᱟᱹᱱᱢᱤ ᱡᱮᱸᱵᱮᱫ ᱵᱚᱸᱜᱟ/ᱵᱷᱩᱛ ᱦᱚᱸ ᱢᱮᱱᱟᱜ ᱠᱚᱣᱟ ᱾ ᱡᱟᱦᱟᱸᱭ ᱫᱚ ᱥᱩᱢᱩᱝ ᱠᱩᱲᱤ ᱦᱚᱯᱚᱱ ᱴᱷᱮᱱ ᱠᱚ ᱪᱟᱯᱟᱲᱚᱜᱼᱟ ᱾ ᱠᱩᱲᱤ ᱦᱚᱯᱚᱱᱟᱜ ᱦᱚᱲᱢᱚ ᱨᱮ ᱪᱟᱯᱟᱲ ᱠᱟᱛᱮ ᱢᱟᱹᱱᱢᱤ ᱠᱚ ᱡᱚᱢ ᱠᱚᱣᱟ ᱾ ᱱᱚᱶᱟ ᱫᱚ ᱟᱹᱰᱤ ᱦᱚᱲᱟᱜ ᱢᱚᱱᱮ ᱨᱮᱜᱮ ᱜᱟᱹᱦᱤᱸᱨ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱾ ᱱᱩᱠᱩ ᱰᱟᱹᱱ ᱵᱚᱸᱜᱟ ᱪᱮᱫᱟᱜ ᱠᱚ ᱱᱚᱝᱠᱟᱱᱟ, ᱫᱷᱟᱹᱨᱛᱤ ᱯᱩᱨᱤ ᱨᱮ ᱵᱟᱨ ᱨᱩᱯ ᱢᱟᱹᱱᱢᱤ ᱠᱩᱲᱤ ᱟᱨ ᱠᱚᱲᱟ ᱛᱟᱞᱟᱨᱮ ᱪᱟᱯᱟᱲᱚᱜ ᱞᱟᱹᱜᱤᱫ ᱵᱟᱪᱷᱟᱣ ᱟᱱᱟ ᱠᱚ ᱥᱩᱢᱩᱝ ᱠᱩᱲᱤ ᱦᱚᱯᱚᱱ ᱜᱮ ᱪᱮᱫᱟᱜ ? ᱠᱩᱲᱤ ᱦᱚᱯᱚᱱ ᱴᱷᱮᱱ ᱫᱚ ᱚᱱᱠᱟ ᱪᱮᱫ ᱫᱟᱲᱮ ᱥᱮ ᱞᱤᱪᱟᱹᱲ ᱢᱮᱱᱟᱜᱼᱟ, ᱡᱟᱦᱟᱸ ᱠᱷᱟᱹᱛᱤᱨ ᱟᱠᱚ ᱴᱷᱮᱱ ᱜᱮ ᱰᱟᱹᱱ ᱵᱚᱸᱜᱟ ᱫᱚᱠᱚ ᱪᱟᱯᱟᱲᱚᱜᱼᱟ ᱾ ᱪᱮᱫ ᱩᱱᱠᱩ ᱰᱟᱹᱱ ᱵᱚᱸᱜᱟ ᱟᱜ ᱠᱟᱹᱢᱤ ᱫᱚ ᱠᱚᱲᱟ ᱦᱚᱛᱮᱛᱮ ᱫᱚ ᱵᱟᱝ ᱦᱩᱭᱩᱜᱼᱟ ?
ᱠᱩᱲᱤ ᱡᱩᱫᱤ ᱵᱚᱸᱜᱟ ᱵᱳᱨᱳᱭ ᱥᱮᱵᱟ ᱠᱚᱣᱟ , ᱩᱱᱤ ᱫᱚᱭ ᱰᱟᱹᱱ ᱠᱟᱱᱟ ᱾ ᱟᱨ ᱠᱚᱲᱟ ᱡᱩᱫᱤ ᱵᱚᱸᱜᱟ ᱵᱳᱨᱳᱭ ᱥᱮᱵᱟ ᱠᱚᱣᱟ, ᱩᱱᱤ ᱫᱚ ᱰᱟᱹᱱ ᱞᱟᱜᱟ, ᱩᱱᱤ ᱫᱚ ᱚᱡᱷᱟ, ᱥᱚᱠᱷᱟ, ᱡᱟᱱ ᱠᱟᱱᱟᱭ ᱾

ᱫᱷᱟᱹᱨᱛᱤ ᱯᱩᱨᱤ ᱨᱮ ᱢᱟᱹᱱᱢᱤ ᱵᱚᱱ ᱡᱟᱱᱟᱢᱚᱜᱼᱟ ᱟᱨ ᱵᱟᱧᱪᱟᱣ ᱛᱟᱦᱮᱸᱱ ᱞᱟᱹᱜᱤᱫ ᱞᱮᱠᱟᱱ ᱞᱮᱠᱟᱱ ᱯᱩᱨᱠᱩᱛᱤᱭᱟᱹ ᱫᱟᱲᱮ ᱦᱚᱸ ᱥᱟᱢᱟᱝ ᱦᱩᱭ ᱟᱵᱚᱱᱟ ᱾ ᱦᱚᱭ, ᱫᱟᱜ, ᱥᱮᱸᱜᱮᱞ, ᱞᱚᱞᱚ, ᱮᱞᱟᱝ, ᱨᱟᱛᱟᱝ, ᱟᱦᱞᱟ ᱚᱨᱥᱚᱝ ᱾ ᱢᱟᱹᱱᱢᱤ ᱦᱚᱲᱢᱚ ᱫᱚ ᱢᱤᱥᱤᱱ ᱞᱮᱠᱟᱱ ᱡᱤᱱᱤᱥ ᱠᱟᱱ ᱠᱷᱟᱹᱛᱤᱨ ᱚᱠᱛᱚ ᱚᱠᱛᱚᱨᱮ ᱞᱮᱠᱟᱱ ᱞᱮᱠᱟᱱ ᱚᱡᱮ ᱠᱷᱟᱹᱛᱤᱨ ᱞᱤᱪᱟᱹᱲ ᱜᱚᱫᱚᱜ ᱜᱮᱭᱟ ᱾ ᱵᱮᱢᱟᱨ ᱟᱡᱟᱨ ᱠᱟᱛᱮ ᱵᱟᱹᱲᱤᱡ ᱜᱚᱫᱚᱜ ᱜᱮᱭᱟ ᱾
ᱪᱚᱞᱚ, ᱢᱤᱫ ᱰᱚᱸᱰᱮᱠ ᱞᱟᱹᱜᱤᱫ ᱫᱚ ᱱᱚᱶᱟ ᱦᱚᱸ ᱯᱟᱹᱛᱭᱟᱹᱣ ᱵᱚᱱ ᱫᱚᱦᱚ ᱜᱚᱫᱽ ᱜᱮᱭᱟ ᱡᱮ ᱱᱟᱯᱟᱭ ᱫᱟᱲᱮ ᱵᱚᱸᱜᱟ ᱵᱳᱨᱳ ᱢᱮᱱᱟᱜ ᱠᱚ ᱞᱮᱠᱟ ᱜᱮ, ᱵᱟᱹᱲᱤᱡ ᱫᱟᱲᱮ ᱵᱚᱸᱜᱟ ᱰᱟᱹᱱ ᱵᱷᱩᱛ ᱦᱚᱸ ᱢᱮᱱᱟᱜ ᱠᱚ ᱜᱮᱭᱟ ᱾ ᱤᱠᱷᱟᱹᱱ ᱡᱟᱦᱟᱸ ᱨᱮᱜᱮ ᱨᱩᱣᱟᱹ ᱦᱟᱹᱥᱩ, ᱚᱸᱰᱮ ᱜᱮ ᱰᱟᱹᱱ ᱟᱨ ᱰᱟᱹᱱ ᱫᱚ ᱠᱩᱲᱤ ᱦᱚᱯᱚᱱ ᱴᱷᱮᱱ ᱜᱮ ᱪᱮᱫᱟᱜ ? ᱥᱟᱱᱟᱢ ᱦᱚᱲᱟᱜ ᱢᱚᱱᱮᱨᱮ ᱱᱚᱝᱠᱟᱱ ᱩᱭᱦᱟᱹᱨ ᱜᱟᱹᱰᱭᱟᱹᱣ ᱯᱮᱨᱮᱡ ᱟᱠᱟᱱᱟ ᱾ ᱫᱷᱟᱹᱨᱛᱤ ᱯᱩᱨᱤ ᱨᱮ ᱠᱩᱲᱤ ᱦᱚᱯᱚᱱᱮ ᱡᱟᱱᱟᱢᱚᱜᱼᱟ, ᱤᱠᱷᱟᱹᱱ ᱱᱚᱶᱟ ᱫᱷᱟᱹᱨᱛᱤ ᱠᱷᱚᱱ ᱵᱤᱫᱟᱹᱭᱚᱜ ᱞᱟᱦᱟᱨᱮ ᱵᱤᱱ ᱰᱟᱹᱱ ᱪᱷᱟᱹᱴᱭᱟᱹᱨ ᱠᱟᱛᱮ ᱫᱚ ᱚᱦᱚ ᱜᱮᱭ ᱵᱤᱫᱟᱹᱭ ᱠᱚᱜᱼᱟ ᱾ ᱦᱚᱯᱚᱱ ᱮ ᱜᱩᱨᱚᱜ ᱨᱮ ᱮᱸᱜᱟᱛ ᱰᱟᱹᱱ, ᱡᱤᱛᱟᱹᱭ ᱜᱩᱨᱚᱜ ᱨᱮ ᱮᱨᱟ ᱰᱟᱹᱱ ᱟᱨ ᱥᱩᱨ ᱥᱩᱯᱩᱨ ᱨᱤᱱ ᱦᱚᱲ ᱠᱚ ᱨᱩᱣᱟᱹ ᱨᱟᱵᱟᱝᱚᱜ ᱨᱮ ᱪᱮ ᱠᱚ ᱜᱚᱡ ᱜᱩᱨᱚᱜ ᱨᱮ ᱚᱱᱟ ᱥᱩᱨ ᱥᱩᱯᱩᱨ ᱨᱮ ᱢᱮᱱᱟᱜ ᱠᱚ ᱨᱟᱺᱰᱤ ᱴᱩᱣᱟᱹᱨ ᱠᱩᱲᱤ ᱦᱯᱚᱱ ᱪᱮ ᱵᱩᱰᱤ ᱮᱨᱟ ᱠᱚ ᱰᱟᱹᱱ ᱾ ᱢᱤᱫ ᱠᱩᱲᱤ ᱦᱚᱯᱚᱱ ᱜᱩᱨ ᱠᱟᱛᱮ ᱵᱤᱫᱟᱹᱭᱚᱜ ᱞᱟᱦᱟᱨᱮ ᱰᱟᱹᱱ ᱪᱷᱟᱹᱴᱭᱟᱹᱨ ᱩᱯᱨᱩᱢ ᱫᱚᱭ ᱤᱫᱤ ᱛᱟᱨᱟᱭ ᱜᱮᱭᱟ ᱾

ᱢᱤᱫ ᱠᱩᱲᱤ ᱦᱚᱯᱚᱱ ᱰᱟᱹᱱ ᱮ ᱫᱚᱥ ᱚᱪᱚᱜ ᱠᱟᱱᱟ ᱟᱹᱛᱩ ᱴᱚᱞᱟ ᱦᱚᱲ ᱴᱷᱮᱱ ᱠᱷᱚᱱ, ᱥᱩᱨ ᱥᱩᱯᱩᱨ ᱦᱚᱲ ᱴᱷᱮᱱ ᱠᱷᱚᱱ, ᱚᱝᱥᱚ ᱵᱚᱝᱥᱚ ᱦᱚᱲ ᱴᱷᱮᱱ ᱠᱷᱚᱱ, ᱜᱩᱥᱴᱤ ᱜᱟᱨᱚᱥᱴᱤ ᱴᱷᱮᱱ ᱠᱷᱚᱱ, ᱱᱩᱱᱟᱹᱝ ᱫᱷᱟᱹᱵᱤᱡ ᱦᱚᱸ ᱯᱟᱹᱛᱭᱟᱹᱣ ᱢᱮᱱᱟᱜᱼᱟ ᱡᱮ ᱢᱟᱭᱟᱢ ᱦᱟᱹᱴᱤᱧ ᱵᱟᱵᱟ ᱵᱟᱨᱮ, ᱡᱩᱨᱤ, ᱦᱚᱯᱚᱱ ᱦᱚᱸ ᱢᱤᱼᱢᱤᱫ ᱵᱮᱲᱟᱭ ᱠᱚᱭᱚᱜ ᱟᱭᱟ ᱰᱟᱹᱱ ᱨᱩᱯᱨᱮ ᱱᱚᱡᱚᱨ ᱠᱟᱛᱮ ᱾
ᱤᱠᱷᱟᱹᱱ ᱡᱟᱦᱟᱸ ᱞᱮᱠᱟ ᱠᱩᱲᱤ ᱦᱚᱯᱚᱱ ᱠᱚ ᱟᱞᱜᱟ ᱛᱮ ᱰᱟᱹᱱ ᱵᱚᱱ ᱪᱷᱟᱹᱴᱭᱟᱹᱨ ᱠᱚᱣᱟ, ᱰᱟᱹᱱ ᱪᱷᱟᱹᱭᱟᱹᱨ ᱠᱟᱛᱮ ᱥᱟᱶᱛᱟ ᱛᱟᱞᱟᱨᱮ ᱢᱟᱹᱱ ᱢᱚᱦᱚᱛ ᱵᱩᱰᱟᱹᱣᱜ ᱨᱮᱭᱟᱜ ᱠᱩᱭᱞᱟᱹ ᱵᱚᱱ ᱞᱟᱥᱨᱟᱣ ᱟᱠᱚ ᱠᱟᱱᱟ, ᱢᱤᱫ ᱫᱤᱱ ᱜᱟᱱ ᱛᱮ ᱠᱷᱚᱸᱫᱽᱨᱚᱸᱫᱽ ᱞᱟᱹᱜᱤᱫ ᱚᱠᱚᱭ ᱮ ᱨᱤᱠᱟᱹᱭ ᱢᱟ ᱰᱟᱹᱱ ᱵᱚᱸᱜᱟ ᱫᱚ ᱪᱤᱞᱤ ᱠᱟᱱᱟ ᱠᱚ, ᱪᱮᱫᱟᱜ ᱟᱨ ᱪᱮᱫ ᱠᱷᱟᱹᱛᱤᱨ ᱠᱩᱲᱤ ᱦᱚᱯᱚᱱ ᱴᱷᱮᱱ ᱜᱮᱠᱚ ᱪᱟᱯᱟᱲᱚᱜ ᱠᱟᱱᱟ ? ᱪᱮᱫᱟᱜ ᱱᱚᱶᱟ ᱵᱟᱹᱲᱤᱡ ᱫᱟᱲᱮ, ᱵᱟᱹᱲᱤᱡ ᱚᱨᱥᱚᱝ ᱛᱮ ᱠᱩᱲᱤ ᱦᱚᱯᱚᱱ ᱫᱚᱠᱚ ᱜᱟᱥᱮᱨ ᱮᱥᱮᱫ ᱚᱪᱚᱜ ᱠᱟᱱᱟ ᱾ ᱪᱮᱫ ᱠᱟᱱᱟ ᱱᱚᱶᱟ ᱫᱟᱲᱮ, ᱪᱮᱫ ᱞᱮᱠᱟᱨᱮ ᱟᱵᱚ ᱨᱤᱱ ᱟᱭᱳ, ᱢᱤᱥᱨᱟ, ᱮᱨᱟ, ᱦᱚᱯᱚᱱ ᱮᱨᱟ, ᱱᱚᱶᱟ ᱵᱟᱹᱲᱤᱡ ᱫᱟᱲᱮ, ᱵᱟᱹᱲᱤᱡ ᱵᱚᱸᱜᱟ ᱪᱟᱯᱟᱲ ᱚᱨᱥᱚᱝ ᱠᱷᱚᱱ ᱵᱚᱱ ᱫᱩᱜ ᱵᱟᱧᱪᱟᱣ ᱠᱚᱣᱟ ᱾ ᱱᱚᱶᱟ ᱞᱟᱹᱜᱤᱫ ᱛᱮᱫᱚ ᱚᱠᱚᱭ ᱴᱷᱮᱱ ᱦᱚᱸ ᱠᱷᱚᱸᱫᱽᱨᱚᱸᱫᱽ ᱞᱟᱹᱜᱤᱫ ᱫᱟᱲᱮ ᱵᱟᱹᱱᱩᱜ ᱟᱱᱟ, ᱥᱟᱦᱟᱥ ᱵᱟᱹᱱᱩᱜ ᱟᱱᱟ ᱾ ᱠᱷᱟᱹᱞᱤ ᱫᱚᱥ ᱜᱤᱰᱤ ᱠᱟᱭ ᱢᱮ ᱚᱵᱚᱞᱟ ᱠᱩᱲᱤ ᱦᱚᱯᱚᱱ, “ᱟᱢ ᱫᱚ ᱰᱟᱹᱱ !!!” ᱤᱠᱷᱟᱹᱱ ᱡᱟᱦᱟᱸᱭ ᱫᱚ ᱠᱩᱲᱤ ᱦᱚᱯᱚᱱ ᱚᱵᱚᱞᱟᱭ ᱢᱮᱛᱟ ᱠᱚᱣᱟ, ᱩᱱᱤ ᱫᱚ ᱱᱚᱶᱟ ᱚᱫᱷᱤᱠᱟᱨ ᱚᱠᱚᱭ ᱮ ᱮᱢᱟᱫᱮᱭᱟ ?

ᱡᱟᱦᱟᱸᱭ ᱠᱚ ᱠᱩᱲᱤ ᱦᱚᱯᱚᱱ ᱞᱟᱹᱜᱤᱫ ᱱᱚᱝᱠᱟᱱ ᱩᱭᱦᱟᱹᱨ ᱠᱚ ᱫᱚᱦᱚᱭᱟ, ᱩᱱᱠᱩ ᱴᱷᱮᱱ ᱫᱚ ᱱᱚᱶᱟ ᱩᱭᱦᱟᱹᱨ ᱦᱚᱸ ᱛᱟᱦᱮᱸ ᱞᱟᱹᱠᱛᱤᱜ ᱠᱟᱱᱟ, ᱠᱩᱲᱤ ᱦᱚᱯᱚᱱ ᱴᱷᱮᱱ ᱡᱩᱫᱤ ᱵᱟᱹᱲᱤᱡ ᱚᱨᱥᱚᱝ ᱛᱟᱹᱠᱤᱡ ᱠᱟᱛᱮ ᱠᱚ ᱵᱟᱹᱲᱤᱡᱚᱜ ᱠᱟᱱᱟ, ᱪᱮᱫ ᱞᱮᱠᱟᱨᱮ ᱵᱟᱹᱲᱤᱡ ᱚᱨᱥᱚᱝ ᱠᱩᱲᱤ ᱦᱚᱯᱚᱱ ᱴᱷᱮᱱ ᱥᱮᱴᱮᱨᱚᱜ ᱞᱟᱦᱟᱨᱮ ᱪᱮᱫ ᱞᱮᱠᱟᱛᱮ ᱴᱮᱠᱟᱣ ᱫᱚᱦᱚᱭ, ᱟᱠᱚᱴ ᱫᱚᱦᱚᱭ ᱢᱟ ᱾ ᱪᱮᱫ ᱞᱮᱠᱟᱛᱮ ᱱᱚᱶᱟ ᱵᱟᱹᱲᱤᱡ ᱫᱟᱲᱮ ᱠᱷᱚᱱ ᱠᱩᱲᱤ ᱦᱚᱯᱚᱱ ᱠᱚ ᱥᱟᱦᱟ ᱨᱮᱵᱚ ᱫᱚᱦᱚ ᱠᱚᱣᱟ, ᱯᱟᱨᱟᱝᱜᱚᱛ ᱨᱮᱵᱚ ᱫᱚᱦᱚ ᱠᱚᱣᱟ ᱱᱚᱣᱟ ᱨᱮᱱᱟᱜ ᱦᱚᱨ ᱰᱟᱦᱟᱨ ᱦᱚᱸ ᱛᱚᱞᱟᱥ ᱞᱟᱹᱜᱤᱫ ᱵᱚᱱ ᱨᱤᱠᱟᱹᱭ ᱢᱟ ᱟᱨ ᱵᱟᱝᱠᱷᱟᱱ ᱚᱠᱚᱭ ᱴᱷᱮᱱ ᱦᱚᱸ ᱱᱚᱶᱟ ᱦᱚᱠ ᱪᱮ ᱚᱫᱷᱤᱠᱟᱨ ᱫᱚ ᱵᱟᱹᱱᱩᱜ ᱟᱱᱟ, ᱡᱟᱦᱟᱸ ᱡᱤᱱᱤᱥ ᱨᱮᱱᱟᱜ ᱯᱚᱨᱢᱟᱬ ᱵᱟᱹᱱᱩᱜ ᱟᱱᱟ, ᱚᱱᱟ ᱞᱟᱹᱜᱤᱫ ᱢᱤᱫ ᱴᱷᱟᱹᱣᱠᱟᱹ ᱠᱩᱲᱤ ᱦᱚᱯᱚᱱ ᱰᱟᱹᱱ ᱪᱷᱟᱹᱴᱭᱟᱹᱨ ᱠᱟᱛᱮ ᱩᱱᱠᱩᱣᱟᱜ ᱢᱟᱹᱱ ᱢᱚᱦᱚᱛ ᱵᱩᱰᱟᱹᱣ ᱢᱮᱴᱟᱣ ᱨᱮᱱᱟᱜ ᱨᱤᱠᱟᱹ ᱫᱚ ᱾

***