ᱢᱤᱫᱴᱟᱹᱝ ᱵᱤᱨ ᱨᱮ ᱢᱤᱫ ᱡᱟᱴᱟᱠᱩᱞ ᱨᱟᱡᱟᱭ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱥᱣᱚᱵᱷᱟᱵᱽ ᱫᱚ ᱟᱹᱰᱤ ᱜᱮ ᱵᱟᱹᱲᱤᱡ ᱛᱟᱦᱮᱸ ᱠᱟᱱᱟ ᱾ ᱩᱱᱤᱭᱟᱜ ᱫᱚ ᱮᱴᱟᱜ ᱵᱤᱡᱽ ᱡᱤᱭᱟᱹᱞᱤ ᱪᱮᱛᱟᱱ ᱨᱮ ᱫᱟᱭᱟ ᱢᱟᱭᱟ ᱜᱮ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱫᱤᱱᱟᱹᱢ ᱜᱮ ᱩᱱᱤ ᱫᱚ ᱵᱤᱨ ᱨᱤᱱ ᱟᱹᱰᱤᱜᱟᱱ ᱡᱤᱵᱽ ᱡᱤᱭᱟᱹᱞᱤ ᱠᱚᱭ ᱜᱚᱡᱮᱫ ᱠᱚ ᱛᱟᱦᱮᱸᱫ ᱾ ᱚᱱᱟ ᱠᱷᱟᱹᱛᱤᱨ ᱡᱚᱛᱚ ᱡᱤᱵᱽ ᱡᱤᱭᱟᱹᱞᱤ ᱜᱮ ᱵᱟᱹᱭ ᱵᱟᱹᱭ ᱛᱮᱠᱚ ᱠᱚᱢ ᱤᱫᱤᱜ ᱠᱟᱱ ᱛᱟᱦᱮᱸᱫ ᱾
ᱱᱚᱝᱠᱟ ᱧᱮᱞ ᱠᱟᱛᱮ ᱵᱤᱨ ᱨᱤᱱ ᱡᱚᱛᱚ ᱡᱤᱵᱽ ᱡᱤᱭᱟᱹᱞᱤ ᱜᱮ ᱢᱤᱫᱩᱱ ᱠᱚ ᱦᱚᱦᱚ ᱠᱮᱫᱼᱟ ᱾ ᱢᱤᱫᱩᱱ ᱨᱮ ᱜᱚᱴᱟ ᱮᱱᱟ ᱡᱮ ᱡᱤᱭᱟᱹᱞᱤ ᱜᱮ ᱡᱟᱴᱟ ᱠᱩᱞ ᱴᱷᱮᱱ ᱠᱚ ᱪᱟᱞᱟᱜᱼᱟ ᱟᱨ ᱡᱟᱴᱟᱠᱩᱞ ᱩᱱᱤ ᱜᱚᱡ ᱠᱟᱛᱮᱭ ᱡᱚᱢᱮᱭᱟ ᱾ ᱱᱚᱶᱟ ᱜᱟᱞᱢᱟᱨᱟᱣ ᱜᱚᱴᱟ ᱛᱟᱭᱚᱢ ᱡᱤᱭᱟᱹᱞᱤ ᱠᱚ ᱡᱟᱴᱟᱠᱩᱞ ᱴᱷᱮᱱ ᱠᱚ ᱪᱟᱞᱟᱣ ᱮᱱᱟ ᱟᱨ ᱠᱚ ᱢᱮᱛᱟ ᱫᱮᱭᱟ ᱡᱮ ᱟᱞᱮ ᱢᱟ ᱟᱢ ᱨᱤᱱ ᱯᱨᱚᱡᱟ ᱠᱟᱱᱟ ᱞᱮ ᱟᱢ ᱡᱩᱫᱤ ᱫᱤᱱᱟᱹᱢ ᱜᱮ ᱟᱹᱰᱤᱜᱟᱱ ᱡᱤᱭᱟᱹᱞᱤᱢ ᱜᱚᱡ ᱞᱮᱭᱟ ᱮᱱᱠᱷᱟᱱ ᱢᱤᱫ ᱫᱤᱱ ᱦᱤᱞᱚᱜ ᱟᱞᱮ ᱢᱟ ᱡᱚᱛᱚ ᱞᱮ ᱪᱟᱵᱟᱜᱼᱟ ᱾ ᱚᱱᱟ ᱛᱟᱭᱱᱚᱢ ᱫᱚ ᱟᱢ ᱮᱴᱟᱜ ᱵᱤᱨ ᱛᱮ ᱪᱟᱞᱟᱜ ᱦᱩᱭᱩᱜ ᱛᱟᱢᱟ ᱡᱚᱢᱟᱜ ᱞᱟᱹᱜᱤᱫ ᱛᱮ ᱾ ᱱᱚᱝᱠᱟ ᱵᱟᱝ ᱠᱟᱛᱮ ᱟᱞᱮ ᱫᱤᱱᱟᱹᱢ ᱢᱤᱫ ᱦᱚᱲ ᱠᱟᱛᱮ ᱟᱢ ᱴᱷᱮᱱ ᱞᱮ ᱦᱤᱡᱩᱜᱼᱟ ᱟᱨ ᱟᱢ ᱩᱱᱤᱢ ᱡᱚᱢᱮᱭᱟ ᱾ ᱱᱚᱶᱟ ᱞᱟᱹᱜᱤᱫ ᱠᱷᱟᱴᱟᱣᱜ ᱦᱚᱸ ᱵᱟᱝ ᱦᱩᱭᱩᱜ ᱛᱟᱢᱟ ᱾ ᱡᱟᱴᱟᱠᱩᱞ ᱩᱱᱠᱩᱣᱟᱜ ᱠᱟᱛᱷᱟ ᱠᱚ ᱟᱸᱡᱚᱢ ᱠᱟᱛᱮᱭ ᱨᱮᱵᱮᱱ ᱮᱱᱟ ᱢᱮᱱ ᱜᱚᱫ ᱠᱮᱫ ᱟᱭ ᱦᱚᱭ ᱛᱚᱵᱮ ᱠᱷᱟᱱ ᱴᱷᱤᱠ ᱜᱮᱭᱟ ᱾
ᱫᱚᱥᱟᱨ ᱦᱤᱞᱚᱜ ᱠᱷᱚᱱ ᱢᱤᱫᱴᱟᱹᱝ ᱠᱟᱛᱮ ᱡᱤᱭᱟᱹᱞᱤ ᱫᱤᱱᱟᱹᱢ ᱜᱮ ᱦᱤᱡᱩᱜ ᱠᱚ ᱞᱮᱛᱟᱲ ᱮᱱᱟ ᱾ ᱜᱮᱞᱵᱟᱨ ᱫᱤᱱ ᱨᱮ ᱢᱤᱫ ᱠᱩᱞᱟᱹᱭᱟᱜ ᱯᱟᱹᱲᱤ ᱯᱟᱲᱟᱣᱮᱱᱟ ᱾ ᱩᱱᱤᱭ ᱟᱹᱱᱤᱵᱷᱟᱹᱵᱤ ᱠᱮᱫᱼᱟ ᱤᱧ ᱢᱟᱹᱧ ᱜᱩᱡᱩᱜ ᱜᱮᱭᱟ, ᱧᱮᱞ ᱜᱮ ᱩᱱᱤ ᱡᱟᱴᱟᱠᱩᱞ ᱜᱚᱡᱮ ᱨᱮᱱᱟᱜ ᱦᱚᱨ ᱢᱮᱱᱟᱜ ᱟᱥᱮ ᱵᱟᱝ ?
ᱩᱱᱤ ᱠᱩᱞᱟᱹᱭ ᱢᱤᱫ ᱵᱩᱫᱷᱤᱭ ᱪᱷᱟᱸᱫᱟ ᱠᱮᱫᱼᱟ ᱾ ᱤᱱᱟᱹ ᱦᱤᱞᱚᱜ ᱫᱚ ᱟᱡ ᱟᱹᱰᱤ ᱵᱤᱞᱚᱢ ᱠᱟᱛᱮ ᱡᱟᱴᱟᱠᱩᱞ ᱴᱷᱮᱱ ᱮ ᱥᱮᱱ ᱮᱱᱟ ᱾ ᱠᱩᱞᱟᱹᱭ ᱧᱮᱞ ᱠᱟᱛᱮ ᱡᱟᱴᱟᱠᱩᱞ ᱨᱟᱹᱜᱤ ᱛᱮᱭ ᱡᱩᱞ ᱪᱟᱵᱟ ᱮᱱᱟ ᱾ ᱜᱟᱨᱡᱟᱣ ᱠᱟᱛᱮ ᱢᱮᱛᱟ ᱫᱮᱭᱟᱭ, ᱱᱩᱱᱟᱹᱜ ᱵᱤᱞᱚᱢ ᱪᱮᱫᱟᱜ ? ᱨᱮᱸᱜᱮᱡ ᱛᱮ ᱤᱧᱟᱜ ᱞᱟᱡ ᱨᱮ ᱥᱮᱸᱜᱮᱞ ᱡᱩᱞᱩᱜ ᱠᱟᱱᱟ ᱾ ᱠᱩᱞᱟᱹᱭ ᱫᱷᱤᱨ ᱢᱚᱫᱷᱩᱨ ᱛᱮᱭ ᱞᱟᱹᱭ ᱠᱮᱫᱼᱟ, ᱯᱟᱹᱛᱭᱟᱹᱣᱜ ᱢᱮ ᱢᱟᱦᱟᱨᱟᱡᱽ, ᱟᱢᱟᱜ ᱨᱟᱡᱽ ᱨᱮ ᱟᱨ ᱢᱤᱫ ᱡᱟᱴᱟᱠᱩᱞ ᱮ ᱥᱮᱴᱮᱨ ᱟᱠᱟᱱᱟ ᱾ ᱟᱢ ᱴᱷᱮᱱ ᱦᱤᱡᱩᱜ ᱞᱟᱦᱟᱨᱮ ᱤᱧᱟᱜ ᱦᱚᱨ ᱮ ᱮᱥᱮᱫ ᱟᱠᱟᱫᱤᱧᱟ ᱾ ᱩᱱᱤ ᱴᱷᱮᱱ ᱟᱹᱰᱤ ᱱᱮᱦᱚᱸᱨ ᱠᱟᱛᱮ ᱟᱢ ᱴᱷᱮᱱ ᱤᱧ ᱥᱮᱴᱮᱨ ᱟᱠᱟᱱᱟ ᱾ ᱱᱚᱶᱟ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱡᱟᱴᱟᱠᱩᱞ ᱫᱚ ᱨᱟᱹᱜᱤ ᱛᱮᱭ ᱡᱩᱞ ᱪᱟᱵᱟ ᱮᱱᱟ ᱾ ᱪᱚᱞᱚ ᱥᱮ ᱞᱚᱜᱚᱱ ᱩᱱᱤ ᱴᱷᱮᱱ ᱤᱫᱤ ᱤᱧ ᱢᱮ ᱾ ᱩᱱ ᱡᱚᱠᱷᱚᱱ ᱠᱩᱞᱟᱹᱭ ᱩᱱᱤ ᱫᱚ ᱢᱤᱫ ᱯᱟᱠᱟᱠᱳᱞ ᱠᱩᱸᱭ ᱛᱮᱭ ᱥᱮᱴᱮᱨ ᱠᱮᱫᱮᱭᱟ ᱾
ᱩᱠᱩᱨ ᱚᱠᱟᱨᱮ ᱩᱱᱤ ᱡᱟᱴᱟᱠᱩᱞ ᱢᱮᱱᱟᱭᱟ ? ᱠᱩᱞᱟᱹᱭ ᱮ ᱞᱟᱹᱭ ᱠᱮᱫᱼᱟ, ᱱᱚᱶᱟ ᱯᱟᱠᱟᱠᱳᱞ ᱠᱩᱸᱭ ᱨᱮ ᱢᱮᱱᱟᱭᱟ ᱾ ᱡᱟᱴᱟᱠᱩᱞ ᱚᱱᱟ ᱠᱩᱸᱭ ᱮ ᱩᱭᱩᱝ ᱠᱮᱫᱼᱟ ᱾ ᱟᱨ ᱟᱡᱟᱜ ᱩᱢᱩᱞ ᱜᱮ ᱠᱩᱸᱭ ᱫᱟᱜ ᱨᱮᱭ ᱧᱮᱞ ᱧᱟᱢ ᱠᱮᱫ ᱠᱷᱟᱱ ᱵᱷᱟᱹᱵᱤ ᱠᱮᱫ ᱟᱭ ᱡᱮ ᱥᱟᱹᱨᱤ ᱜᱮ ᱛᱚ ᱟᱨ ᱢᱤᱫᱴᱟᱹᱝ ᱡᱟᱴᱟᱠᱩᱞ ᱢᱮᱱᱟᱭᱟ ᱾ ᱩᱱ ᱥᱚᱢᱚᱭ ᱟᱹᱰᱤ ᱡᱩᱨ ᱛᱮᱭ ᱜᱟᱨᱡᱟᱣ ᱮᱱᱟ ᱾ ᱮᱱᱠᱷᱟᱱ ᱠᱩᱸᱭ ᱠᱷᱚᱱ ᱚᱱᱠᱟ ᱜᱮ ᱨᱟᱹᱜᱤᱜ ᱮ ᱧᱮᱞ ᱠᱮᱫᱮᱭᱟ ᱾ ᱩᱱ ᱥᱚᱢᱚᱭ ᱟᱨ ᱦᱚᱸ ᱨᱟᱹᱜᱤ ᱛᱮ ᱫᱚᱢᱮ ᱡᱩᱨ ᱜᱟᱨᱡᱟᱣ ᱠᱟᱛᱮ ᱩᱱᱤ ᱜᱚᱡᱮ ᱞᱟᱹᱜᱤᱫ ᱚᱱᱟ ᱠᱩᱸᱭ ᱨᱮᱭ ᱫᱚᱱ ᱠᱮᱫᱼᱟ ᱾ ᱟᱨ ᱚᱸᱰᱮ ᱠᱷᱚᱱ ᱵᱟᱭ ᱨᱟᱠᱟᱵ ᱫᱟᱲᱮᱭᱟᱫ ᱛᱮ ᱚᱸᱰᱮ ᱜᱮᱭ ᱩᱱᱩᱢ ᱜᱚᱡ ᱮᱱᱟ ᱾
ᱤᱱᱟᱹ ᱛᱟᱭᱚᱢ ᱠᱩᱞᱟᱹᱭ ᱫᱚ ᱠᱩᱥᱤ ᱨᱟᱹᱥᱠᱟᱹ ᱟᱛᱮ ᱡᱤᱵᱽ ᱡᱤᱭᱟᱹᱞᱤ ᱴᱷᱮᱱ ᱥᱮᱴᱮᱨ ᱠᱟᱛᱮ ᱡᱟᱴᱟᱠᱩᱞ ᱟᱜ ᱡᱚᱛᱚ ᱠᱟᱛᱷᱟᱭ ᱞᱟᱹᱭ ᱟᱫ ᱠᱚᱣᱟ ᱟᱨ ᱥᱟᱹᱱᱛᱤ ᱨᱮᱠᱚ ᱛᱟᱦᱮᱸ ᱮᱱᱟ ᱾
***
