ᱱᱚᱶᱟ ᱫᱷᱟᱹᱨᱛᱤ ᱨᱮ ᱢᱟᱹᱱᱢᱤ ᱨᱮᱵᱚ ᱡᱟᱱᱟᱢ ᱟᱠᱟᱱᱟ, ᱟᱹᱠᱤᱞ ᱜᱮᱭᱟᱱ ᱵᱩᱫᱽ ᱵᱤᱪᱟᱹᱨ ᱟᱨᱡᱟᱣ ᱥᱟᱞᱟᱜ ᱛᱮ ᱢᱟᱹᱱᱢᱤ ᱞᱮᱠᱟ ᱵᱚ ᱛᱟᱦᱮᱱ ᱠᱟᱱᱟ᱾ᱟᱹᱛᱩ ᱨᱮ ᱴᱚᱞᱟ ᱨᱮ ᱵᱟᱡᱟᱨ ᱨᱮ ᱱᱟᱜᱟᱨ ᱨᱮ ᱥᱟᱶ ᱥᱟᱶ ᱡᱚᱲᱟᱣ ᱡᱚᱯᱚᱲᱟᱣ ᱵᱚ ᱛᱟᱦᱮᱸᱱ ᱠᱟᱱᱟ᱾ᱫᱷᱟᱹᱨᱛᱤ ᱡᱟᱠᱟᱛ ᱨᱮ ᱢᱟᱹᱱᱢᱤ ᱠᱚ ᱛᱟᱞᱟ ᱨᱮ ᱟᱭᱢᱟ ᱡᱟᱹᱛᱤ, ᱫᱷᱚᱨᱚᱢ, ᱯᱟᱹᱨᱥᱤ, ᱨᱟᱡᱽᱟᱹᱨᱤ ᱵᱤᱪᱟᱹᱨ ᱛᱮ ᱦᱟᱹᱴᱤᱧ ᱟᱠᱟᱱᱟ ᱵᱚ᱾ ᱟᱭᱢᱟ ᱡᱟᱹᱛᱤ, ᱫᱷᱚᱨᱚᱢ ᱟᱹᱯᱟᱱ ᱟᱹᱯᱤᱱ ᱥᱟᱶᱛᱟ ᱛᱟᱞᱟᱨᱮ ᱟᱹᱰᱤ ᱜᱚᱴᱟᱝ ᱥᱚᱥᱱᱚᱜ ᱠᱚ ᱢᱩᱫᱽ ᱨᱮ ᱦᱟᱨᱠᱮᱛ ᱥᱟᱥᱮᱛ ᱮᱴᱠᱮᱴᱚᱬᱮ ᱥᱟᱦᱟᱣ ᱯᱟᱨᱚᱢ ᱠᱟᱛᱮᱱ ᱟᱵᱚ ᱠᱷᱮᱨᱣᱟᱲ ᱵᱚᱝᱥᱚ ᱠᱚ ᱡᱟᱦᱮᱨ ᱨᱮ ᱢᱟᱦᱟᱬᱟ ᱨᱮ ᱜᱚᱨᱟᱢ ᱨᱮ ᱚᱲᱟᱜ ᱨᱮ ᱵᱚᱸᱜᱟᱜ ᱵᱩᱨᱩᱨᱮ ᱡᱩᱢᱤᱫᱽ ᱠᱟᱛᱮᱱ ᱮᱴᱟᱜ ᱫᱷᱚᱨᱚᱢ ᱨᱤᱱ ᱵᱚᱸᱜᱟ ᱠᱚ ᱵᱟᱝ ᱥᱮᱵᱟ ᱠᱟᱛᱮᱱ ᱟᱵᱚᱨᱤᱱ ᱠᱚ ᱵᱚᱸᱜᱟ ᱨᱮᱜᱮ ᱥᱤᱨᱤᱡᱽ ᱯᱨᱟᱠᱩᱛᱤᱠ ᱪᱮᱛᱟᱱ ᱨᱮ ᱜᱮ ᱢᱚᱱ ᱫᱚᱦᱚ ᱠᱟᱛᱮᱱ ᱢᱤᱫ ᱵᱤᱪᱟᱹᱨ ᱛᱮᱵᱚ ᱛᱚᱞ ᱫᱚᱦᱚ ᱛᱟᱦᱮᱸ ᱟᱠᱟᱱᱟ ᱾
ᱨᱚᱲ ᱵᱟᱧᱪᱟᱣ ᱞᱟᱹᱜᱤᱫ ᱛᱮᱠᱷᱟᱱ ᱚᱞ ᱞᱟᱹᱠᱛᱤᱭᱟᱱᱟ, ᱯᱟᱹᱨᱥᱤ ᱩᱛᱷᱱᱟᱹᱣ ᱞᱟᱹᱜᱤᱫ ᱛᱮᱠᱷᱟᱱ ᱥᱟᱶᱦᱮᱫ ᱞᱟᱹᱠᱛᱤᱭᱟᱱᱟ᱾ ᱫᱷᱚᱨᱚᱢ ᱵᱟᱧᱪᱟᱣ ᱞᱟᱹᱜᱤᱫ ᱛᱮᱠᱷᱟᱱ ᱫᱷᱚᱨᱚᱢ ᱜᱟᱲ ᱞᱟᱹᱠᱛᱤᱭᱟᱱᱟ᱾ᱦᱚᱠ ᱟᱹᱭᱫᱟᱹᱨᱤ ᱧᱟᱢᱚᱜ ᱞᱟᱹᱜᱤᱫ ᱛᱮᱠᱷᱟᱱ ᱨᱟᱡᱽᱟᱹᱨᱤ ᱦᱚᱸ ᱞᱟᱹᱠᱛᱤᱭᱟᱱ ᱜᱮᱭᱟ᱾ᱨᱚᱲ ᱟᱫ ᱞᱮᱠᱷᱟᱱ ᱩᱭᱦᱟᱹᱨ ᱵᱚᱫᱚᱞᱚᱜᱼᱟ, ᱩᱭᱦᱟᱹᱨ ᱵᱚᱫᱚᱞ ᱞᱮᱱᱠᱷᱟᱱ ᱫᱷᱚᱨᱚᱢ ᱵᱚᱫᱚᱞᱚᱜᱼᱟ᱾ ᱫᱷᱚᱨᱚᱢ ᱵᱚᱫᱚᱞ ᱞᱮᱱᱠᱷᱟᱱ ᱵᱤᱪᱟᱹᱨ ᱦᱚᱸ ᱵᱚᱫᱚᱞᱚᱜᱼᱟ᱾ ᱨᱚᱲ ᱨᱮᱭᱟᱜ ᱥᱤᱵᱤᱞ ᱥᱟᱹᱜᱟᱹᱭ ᱦᱚᱸ ᱵᱚᱫᱚᱞᱚᱜᱼᱟ ᱾
ᱥᱟᱹᱜᱟᱹᱭ ᱢᱮᱱ ᱞᱮᱠᱷᱟᱱ ᱟᱭᱳ ᱵᱟᱵᱟ, ᱢᱟᱨᱟᱝᱵᱟ ᱢᱟᱨᱟᱜ ᱟᱭᱳ, ᱦᱚᱯᱚᱱᱵᱟ ᱦᱚᱯᱚᱱ ᱟᱭᱳ, ᱦᱟᱛᱚᱢ ᱠᱩᱢᱟᱝ, ᱢᱟᱢᱚ ᱢᱟᱹᱢᱤ, ᱫᱟᱹᱭ ᱛᱮᱧᱟᱝ, ᱫᱟᱫᱟ ᱦᱤᱞᱤ, ᱦᱚᱸᱡᱷᱟᱨ ᱦᱟᱱᱟᱨ ᱟᱡᱷᱱᱟᱨ ᱫᱟᱹᱭ, ᱵᱟᱞᱟ ᱠᱚᱲᱟ ᱵᱟᱞᱟ ᱠᱩᱲᱤ ᱵᱟᱞᱟ ᱨᱟᱹᱱᱤ ᱟᱭᱢᱟ ᱞᱮᱠᱟᱱ ᱥᱟᱹᱜᱟᱹᱭ ᱥᱟᱞᱟᱜ ᱟᱪᱟᱨ ᱵᱮᱵᱷᱟᱨ ᱡᱚᱦᱟᱨ ᱡᱚᱯᱚᱦᱟᱨ ᱡᱚᱯᱚᱲᱟᱣ ᱢᱮᱱᱟᱜᱼᱟ᱾ᱟᱯᱱᱟᱨᱟᱜ ᱨᱚᱲ ᱟᱫ ᱞᱮᱠᱷᱟᱱ ᱥᱟᱹᱜᱟᱹᱭ ᱦᱚᱸ ᱟᱫᱚᱜᱼᱟ, ᱨᱚᱲ ᱵᱚᱫᱚᱞ ᱞᱮᱱᱠᱷᱟᱱ ᱩᱭᱦᱟᱹᱨ ᱦᱚᱸ ᱵᱚᱫᱚᱞᱚᱜᱼᱟ᱾ᱵᱩᱜᱤ, ᱵᱟᱹᱲᱤᱡ, ᱥᱟᱹᱨᱤ, ᱮᱲᱮ ᱞᱮᱠᱟᱱ ᱟᱭᱢᱟ ᱩᱭᱦᱟᱹᱨ ᱢᱮᱱᱟᱜᱼᱟ, ᱛᱚᱵᱮ ᱱᱤᱨᱚᱲ ᱢᱚᱱᱮ ᱛᱮ ᱵᱩᱜᱤ ᱩᱭᱦᱟᱹᱨ ᱛᱮᱜᱮ ᱥᱩᱞᱩᱠ ᱥᱟᱹᱜᱟᱹᱭ ᱫᱚ ᱥᱟᱹᱨᱤᱜᱼᱟ᱾ᱚᱱᱠᱟ ᱜᱮ ᱫᱷᱚᱨᱚᱢ ᱵᱚᱫᱚᱞ ᱞᱮᱱᱠᱷᱟᱱ ᱵᱤᱪᱟᱹᱨ ᱵᱚᱫᱚᱞᱚᱜᱼᱟ, ᱵᱩᱜᱤ ᱵᱤᱪᱟᱹᱨ ᱢᱮᱱᱟᱜᱼᱟ, ᱵᱟᱹᱲᱤᱡ ᱵᱤᱪᱟᱹᱨ ᱦᱚᱸ ᱢᱮᱱᱟᱜᱼᱟ, ᱦᱚᱲ ᱮᱲᱮ ᱞᱮᱠᱟᱱ ᱟᱭᱢᱟ ᱵᱤᱪᱟᱹᱨ ᱦᱚᱸ ᱢᱮᱱᱟᱜᱼᱟ, ᱚᱱᱠᱟ ᱜᱮ ᱵᱟᱹᱲᱤᱡ ᱵᱤᱪᱟᱹᱨ ᱠᱚ ᱥᱟᱦᱟ ᱠᱟᱛᱮᱱ ᱥᱟᱱᱟᱢ ᱦᱚᱲ ᱠᱚ ᱞᱟᱹᱜᱤᱫ ᱵᱩᱜᱤ ᱵᱤᱪᱟᱹᱨ ᱜᱮ ᱢᱤᱫ ᱞᱮᱠᱟᱱ ᱠᱟᱛᱷᱟ ᱠᱟᱱᱟ ᱾
ᱫᱷᱟᱹᱨᱛᱤ ᱡᱟᱠᱟᱛ ᱢᱟᱹᱱᱢᱤ ᱠᱚ ᱛᱟᱞᱟ ᱨᱮ ᱟᱭᱢᱟ ᱥᱟᱶᱛᱟ ᱥᱚᱢᱟᱡᱽ ᱛᱟᱞᱟ ᱨᱮ ᱵᱩᱜᱤ ᱩᱭᱦᱟᱹᱨ ᱦᱚᱲ ᱦᱚᱸ ᱢᱮᱱᱟᱜ ᱵᱚᱱ ᱜᱮᱭᱟ , ᱵᱟᱹᱲᱤᱡ ᱩᱭᱦᱟᱹᱨ ᱦᱚᱲ ᱦᱚᱸ ᱢᱮᱱᱟᱜ ᱵᱚᱱ ᱜᱮᱭᱟ, ᱦᱚᱲ ᱮᱲᱮ ᱞᱮᱠᱟᱱ ᱩᱭᱦᱟᱹᱨ ᱦᱚᱲ ᱦᱚᱸ ᱢᱮᱱᱟᱜ ᱵᱚᱱ ᱜᱮᱭᱟ, ᱟᱹᱰᱤ ᱨᱚᱠᱚᱢ ᱩᱭᱦᱟᱹᱨ ᱦᱚᱲ ᱢᱮᱱᱟᱜ ᱟᱠᱟᱫ ᱵᱚᱱ ᱜᱮᱭᱟ᱾ ᱥᱟᱱᱟᱢ ᱦᱚᱲᱟᱜ (ᱯᱷᱤᱱᱜᱚᱨ ᱯᱨᱤᱱᱴ) ᱛᱤ ᱠᱟᱹᱴᱩᱵ ᱨᱮᱭᱟᱜ ᱴᱤᱯ ᱚᱛᱟ ᱪᱤᱱᱦᱟᱹ ᱵᱮᱜᱷᱟᱨ ᱵᱷᱤᱜᱤᱨ ᱜᱮᱭᱟ, ᱚᱱᱠᱟ ᱜᱮ ᱥᱟᱱᱟᱢ ᱦᱚᱲᱟᱜ ᱵᱚᱦᱚᱜ ᱦᱟᱛᱟᱝ ᱨᱮᱭᱟᱜ ᱩᱭᱦᱟᱹᱨ ᱦᱚᱸ ᱵᱨᱜᱷᱟᱨ ᱵᱷᱤᱜᱤᱨ ᱜᱮᱭᱟ᱾ᱛᱚᱵᱮ ᱵᱟᱹᱲᱤᱡ ᱩᱭᱦᱟᱹᱨ ᱠᱚ ᱥᱟᱦᱟ ᱞᱮᱠᱷᱟᱱ, ᱵᱩᱜᱤ ᱩᱭᱦᱟᱹᱨ ᱠᱚ ᱟᱯᱱᱟᱨ ᱞᱮᱠᱷᱟᱱ, ᱩᱭᱦᱟᱹᱨ ᱛᱟᱞᱟ ᱨᱮ ᱥᱟᱡᱟᱣ ᱜᱟᱱ ᱞᱮᱠᱷᱟᱱ, ᱩᱭᱦᱟᱹᱨ ᱥᱟᱶᱛᱮ ᱠᱟᱹᱢᱤ ᱠᱚ ᱜᱟᱱ ᱞᱮᱠᱷᱟᱱ, ᱱᱤᱡᱚᱨ ᱢᱚᱱᱮ ᱠᱟᱛᱷᱟ ᱚᱱᱛᱚᱨ ᱡᱤᱭᱤ ᱥᱟᱞᱟᱜ ᱛᱮ ᱟᱹᱭᱠᱟᱹᱣ ᱞᱮᱠᱷᱟᱱ, ᱮᱴᱟᱜ ᱦᱚᱲᱟᱜ ᱫᱚᱥ ᱵᱟᱝ ᱯᱟᱸᱡᱟ ᱠᱟᱛᱮᱱ ᱟᱯᱱᱟᱨᱟᱜ ᱦᱚᱥ ᱥᱟᱞᱟᱜ ᱛᱮ ᱠᱟᱹᱢᱤ ᱞᱮᱠᱷᱟᱱ, ᱱᱤᱡᱚᱨᱟᱜ ᱱᱤᱨᱚᱲ ᱢᱚᱱᱮ ᱦᱮᱥᱮᱡ ᱥᱮᱠᱮᱡ ᱨᱟᱹᱥᱠᱟᱹ ᱨᱚᱢᱚᱡᱽ ᱡᱤᱭᱟᱹᱲ ᱡᱤᱭᱤ ᱛᱮ ᱦᱤᱥᱟᱹ ᱥᱩᱭᱟᱹ ᱢᱚᱱᱮ ᱠᱚ ᱥᱟᱦᱟ ᱞᱮᱠᱷᱟᱱ, ᱵᱟᱹᱲᱤᱡ ᱩᱭᱦᱟᱹᱨ ᱢᱚᱱᱮ ᱪᱮᱛᱟᱱ ᱨᱮ ᱱᱤᱡᱮ ᱛᱮᱜᱮ ᱪᱟᱯᱚᱲ ᱞᱮᱱ ᱠᱷᱟᱱ, ᱱᱤᱡᱚᱨᱟᱜ ᱵᱟᱹᱲᱤᱡ ᱵᱤᱪᱟᱹᱨ ᱠᱚ ᱪᱮᱛᱟᱱ ᱨᱮ ᱟᱹᱨᱩᱯᱷᱮᱨᱟᱣ ᱞᱮᱠᱷᱟᱱ ᱟᱯᱱᱟᱨ ᱪᱮᱛᱟᱱ ᱨᱮ ᱵᱩᱜᱤ ᱵᱤᱪᱟᱹᱨ ᱟᱹᱜᱩ ᱞᱮᱠᱷᱟᱱ ᱥᱟᱶᱛᱟ ᱦᱚᱸ ᱥᱟᱶ ᱥᱟᱶ ᱵᱩᱜᱤ ᱵᱤᱪᱟᱹᱨ ᱛᱮ ᱛᱟᱲᱟᱢ ᱮ ᱨᱤᱠᱟᱹᱭᱟ ᱾ ᱢᱚᱱᱮ ᱨᱮᱭᱟᱜ ᱵᱟᱹᱲᱤᱡ ᱵᱤᱪᱟᱹᱨ ᱥᱟᱦᱟ ᱠᱟᱛᱮᱱ ᱵᱩᱜᱤ ᱵᱤᱪᱟᱹᱨ ᱫᱷᱟᱨᱟ ᱛᱮ ᱱᱤᱡᱮ ᱜᱮ ᱵᱚᱫᱚᱞ ᱞᱮᱱ ᱠᱷᱟᱱ ᱥᱟᱱᱟᱢ ᱢᱟᱹᱱᱢᱤ ᱠᱚ ᱞᱟᱹᱜᱤᱫ ᱵᱩᱜᱤ ᱵᱤᱪᱟᱹᱨ ᱜᱮ ᱠᱟᱛᱷᱟ ᱠᱟᱱᱟ ᱾
***
