ᱟᱹᱫᱤᱵᱟᱹᱥᱤ ᱟᱢ ᱜᱮ ᱟᱹᱫᱤᱢ
ᱵᱤᱨ ᱵᱩᱨᱩ ᱨᱮ ᱡᱤᱭᱚᱱ ᱛᱟᱢ ᱫᱤᱱᱟᱹᱢ
ᱡᱚᱛᱚᱣᱟᱜ ᱜᱮ ᱟᱢ ᱦᱚᱸ ᱜᱟᱱᱟᱢ
ᱤᱠᱷᱟᱹᱱ ᱪᱮᱫᱟᱜ ᱦᱟᱹᱯᱤᱨᱮ ᱱᱤᱛ ᱦᱚᱸ ᱢᱮᱱᱟᱢ ?
ᱵᱟᱹᱱᱩᱜ ᱢᱮᱭᱟ ᱱᱤᱛ ᱦᱚᱸ ᱪᱤᱨᱜᱟᱹᱞ
ᱵᱟᱹᱱᱩᱜ ᱢᱮᱭᱟ ᱱᱤᱛ ᱦᱚᱸ ᱯᱷᱩᱨᱜᱟᱹᱞ
ᱦᱟᱹᱱᱤ ᱱᱷᱟᱹᱭᱟᱜ ᱠᱟᱛᱷᱟ ᱨᱮᱜᱮ
ᱟᱢ ᱫᱚ ᱢᱮᱱᱟᱢ ᱵᱤᱥᱤᱞ
ᱚᱱᱟᱛᱮ ᱩᱛᱱᱟᱹᱣ ᱨᱮᱱᱟᱜ
ᱵᱟᱹᱱᱩᱜ ᱟᱢ ᱴᱷᱮᱱ ᱥᱤᱵᱤᱞ ᱾
ᱮᱱᱮᱡ ᱟᱠᱟ ᱜᱮᱢ ᱛᱟᱦᱮᱸᱱ
ᱚᱞᱚᱜ ᱟᱥᱲᱟ ᱠᱷᱚᱱ ᱥᱟᱦᱟ ᱠᱟᱛᱮ
ᱮᱨᱟ ᱢᱤᱥᱨᱟ ᱮᱱᱮᱡ ᱵᱮᱯᱟᱨᱮᱢ ᱟᱹᱭᱩᱨ ᱠᱚ
ᱧᱩᱛ ᱧᱤᱫᱟᱹ ᱵᱟᱹᱠᱷᱩᱞ ᱠᱷᱚᱱ ᱥᱟᱦᱟ ᱠᱟᱛᱮ
ᱡᱟᱛᱨᱟ ᱯᱟᱛᱟ ᱴᱟᱺᱰᱤ ᱨᱮ
ᱟᱭᱳ ᱮᱨᱟᱦᱟᱜ ᱢᱟᱹᱱ ᱦᱟᱴ ᱠᱟᱛᱮ
ᱚᱠᱟ ᱞᱮᱠᱟᱱ ᱞᱟᱠᱪᱟᱨ ᱫᱚ ᱵᱟᱧᱪᱟᱣ ᱥᱟᱱᱟᱢ ᱠᱟᱱ
ᱮᱨᱟ ᱢᱤᱥᱨᱟ ᱤᱡᱡᱚᱛ ᱵᱩᱰᱟᱹᱣ ᱠᱟᱛᱮ ᱾
ᱪᱤᱨᱜᱟᱹᱞᱚᱜ ᱛᱮ ᱦᱩᱭᱟᱢ
ᱟᱢ ᱛᱮᱜᱮ ᱯᱷᱩᱜᱟᱹᱞᱚᱜ ᱢᱮ
ᱯᱷᱩᱨᱜᱟᱹᱞᱚᱜ ᱛᱮ ᱦᱩᱭᱟᱹᱢ
ᱟᱢ ᱛᱮᱜᱮ ᱢᱟᱬᱟᱝ ᱛᱮ ᱞᱟᱦᱟᱜ ᱢᱮ
ᱟᱹᱯᱱᱟᱹᱛ ᱫᱤᱥᱚᱢ ᱨᱮᱢ ᱛᱟᱦᱮᱸᱱ
ᱟᱢ ᱫᱚ ᱛᱤᱱᱟᱹᱝ ᱫᱤᱱ ᱵᱟᱹᱭᱨᱤ ᱟᱹᱛᱨᱮ ?
ᱵᱟᱹᱲᱛᱤ ᱵᱟᱝᱜᱮᱢ ᱩᱭᱦᱟᱹᱨ ᱠᱷᱟᱹᱛᱤᱨ
ᱱᱟᱥᱮ ᱠᱟᱛᱷᱟ ᱨᱮᱢ ᱠᱩᱥᱤ ᱠᱚᱜ ᱠᱷᱟᱹᱛᱤᱨ
ᱥᱮᱭᱟᱱ ᱦᱚᱲ ᱟᱢ ᱠᱚ ᱮᱨᱮᱲ ᱢᱮ ᱠᱟᱱ
ᱦᱚᱠ ᱟᱹᱭᱫᱟᱹᱨ ᱥᱟᱱᱟᱢ ᱠᱚ ᱮᱲᱮᱢ ᱠᱟᱱ
ᱱᱟᱜᱟᱢ ᱨᱮ ᱞᱤᱪᱟᱹᱲ ᱠᱟᱛᱷᱟ ᱚᱞ ᱠᱟᱛᱮ ᱟᱢᱟᱜ
ᱜᱷᱩᱸᱫᱽ ᱨᱮᱠᱚ ᱫᱚᱦᱚᱭᱮᱫ ᱠᱟᱱ
ᱜᱮᱭᱟᱱ ᱟᱢᱟᱜ ᱥᱟᱱᱟᱢᱟᱜ ᱾
ᱯᱚᱛᱚᱵ ᱯᱩᱛᱷᱤ ᱨᱮ ᱚᱞ ᱟᱠᱟᱱᱟ
ᱢᱤᱫᱩᱱ ᱢᱤᱪᱷᱤᱞ ᱨᱮ ᱨᱚᱲᱚᱜ ᱠᱟᱱᱟ
ᱜᱷᱟᱱᱮ ᱜᱷᱟᱱᱮ ᱟᱢ ᱠᱚ ᱩᱭᱦᱟ.ᱨ ᱟᱢ ᱠᱟᱱᱟ,
ᱫᱟ.ᱨᱛᱤ ᱨᱮᱭᱟᱜ ᱫᱟᱜ ᱫᱚ ᱟᱢᱟᱜ
ᱡᱮᱜᱮᱛ ᱡᱟᱠᱟᱛ ᱨᱮᱭᱟᱜ ᱵᱤᱨ ᱵᱩᱨᱩ ᱫᱚ ᱟᱢᱟᱜ
ᱢᱮᱞᱟᱱ ᱛᱮ ᱟᱴᱮᱫ ᱟᱠᱟᱱ
ᱚᱛ ᱦᱟᱥᱟ ᱦᱚᱸ ᱟᱢᱟᱜ ᱜᱮ ᱾
ᱤᱠᱷᱟ.ᱱ ᱚᱠᱟ ᱯᱚᱛᱚᱵ ᱯᱩᱛᱷᱤ ᱨᱮᱦᱚᱸ
ᱱᱚᱶᱟ ᱫᱚ ᱵᱟᱝ ᱠᱚ ᱚᱞᱟᱢ ᱠᱟᱱᱟ ᱯᱟᱞᱮ
ᱚᱠᱚᱭ ᱦᱚᱸ ᱱᱚᱶᱟ ᱫᱚ ᱵᱟᱝ ᱠᱚ
ᱞᱟ.ᱭ ᱥᱟᱰᱮ ᱟᱢ ᱠᱟᱱᱟ ᱯᱟᱞᱮ ᱾
ᱚᱛ ᱟᱢᱟᱜ ᱠᱷᱟᱱ ᱥᱮᱨᱢᱟ ᱦᱚᱸ ᱟᱢᱟᱜ ᱜᱮ
ᱵᱤᱨ ᱟᱢᱟᱜ ᱠᱷᱟᱱ ᱵᱟᱡᱟᱨ ᱦᱚᱸ ᱟᱢᱟᱜ ᱜᱮ
ᱚᱛ ᱦᱟᱥᱟ ᱟᱢᱟᱜ ᱠᱷᱟᱱ
ᱱᱚᱣᱟ ᱚᱣᱟᱝ ᱨᱮ ᱦᱚᱠ ᱫᱚ ᱯᱩᱨᱟ.ᱯᱩᱨᱤ ᱢᱮᱱᱟᱜ ᱟᱢᱟᱜ ᱜᱮ ᱾
ᱵᱤᱨ ᱨᱤᱱᱤᱡ ᱢᱟ.ᱞᱤᱠ ᱠᱟᱱ ᱠᱷᱟᱱᱮᱢ
ᱫᱤᱥᱚᱢ ᱥᱟᱥᱚᱱ ᱢᱟ.ᱞᱤᱠ ᱦᱚᱸ ᱟᱢ ᱜᱮ
ᱟᱜ ᱥᱟᱨ ᱠᱷᱟᱸᱰᱟ ᱠᱟ.ᱯᱤᱢ ᱥᱟᱵᱮᱫ ᱠᱷᱟᱱ
ᱱᱚᱱᱚᱞ ᱞᱟᱪᱷᱟ ᱦᱚᱸ ᱥᱟᱵᱽ ᱢᱮ
ᱮᱱᱮᱡ ᱟᱠᱷᱲᱟ ᱟᱢᱟᱜ ᱠᱟᱱ ᱠᱷᱟᱱ
ᱟᱥᱲᱟ ᱵᱤᱨᱫᱟ.ᱜᱟᱲ ᱦᱚᱸ ᱟᱢᱟᱜ ᱜᱮ
ᱱᱚᱣᱟ ᱫᱚ ᱯᱟᱞᱮ ᱚᱠᱚᱭ ᱦᱚᱸ
ᱵᱟᱝ ᱠᱚ ᱩᱭᱦᱟ.ᱨ ᱜᱮᱞᱟ ᱟᱢ ᱠᱟᱱᱟ ᱾
ᱢᱤᱫ ᱯᱟᱦᱴᱟ ᱜᱮᱠᱚ ᱩᱫᱩᱜ ᱟᱠᱟᱣᱟᱫ ᱢᱮᱭᱟ
ᱱᱚᱣᱟ ᱫᱷᱟ.ᱨᱛᱤ ᱨᱮ ᱵᱟᱧᱪᱟᱣ ᱛᱟᱦᱮᱸᱱ ᱨᱮᱭᱟᱜ ᱦᱚᱨ ᱫᱚ
ᱢᱤᱫ ᱯᱟᱦᱴᱟ ᱜᱮᱠᱚ
ᱚᱞ ᱥᱚᱫᱚᱨ ᱟᱠᱟᱣᱟᱫ ᱢᱮᱭᱟ
ᱟᱢᱟᱜ ᱱᱟᱜᱟᱢ ᱨᱮᱱᱟᱜ ᱨᱩᱯ ᱢᱚᱦᱚᱨ ᱫᱚ ᱾
ᱡᱩᱜᱽ ᱥᱟᱶᱛᱮ ᱚᱣᱟᱝ ᱨᱮᱭᱟᱜ
ᱨᱩᱯ ᱜᱚᱲᱦᱚᱱ ᱟ.ᱨᱩᱯᱷᱮᱨᱟᱣᱜ ᱠᱟᱱᱟ
ᱛᱚᱵᱮ ᱢᱤᱫ ᱠᱟᱛᱷᱟ ᱨᱮ ᱨᱮᱦᱬᱟ ᱪᱮᱫᱟᱜ ᱟᱢ ᱫᱚ ᱢᱮᱱᱟᱢ
ᱱᱟᱥᱮ ᱦᱚᱸ ᱟᱹᱨᱩᱯᱷᱮᱨᱟᱣ ᱵᱟᱝ ᱜᱮ ᱥᱟᱱᱟᱢ
ᱥᱤᱨᱡᱚᱱ ᱨᱮᱱᱟᱜ ᱨᱤᱛ ᱞᱮᱠᱟ ᱜᱮ
ᱟᱢ ᱦᱚᱸ ᱟᱢᱟᱜ ᱩᱭᱦᱟ.ᱨ ᱫᱚ ᱱᱟᱥᱮ ᱟ.ᱨᱩᱭ ᱢᱮ
ᱡᱤᱣᱤᱫᱚᱜ ᱨᱮᱭᱟᱜ ᱥᱚᱨᱮᱥ ᱦᱚᱨ ᱫᱚ
ᱟᱢ ᱛᱮᱜᱮ ᱴᱷᱟ.ᱣᱠᱟ. ᱜᱚᱴᱟᱭ ᱢᱮ
ᱟᱢ ᱛᱮᱜᱮ ᱴᱷᱟᱹᱣᱠᱟᱹ ᱜᱚᱴᱟᱭ ᱢᱮ ᱾
***
