ᱨᱚᱫᱚᱱ

ᱱᱚᱜᱼᱚᱭ ᱜᱩᱨ ᱦᱚᱲᱢᱚ ᱵᱤᱞ ᱟᱠᱟᱱ ᱢᱟᱬᱟ ᱯᱟᱨᱠᱚᱢ,
ᱟ.ᱣᱨᱤ ᱤᱬᱤᱡᱚᱜ ᱢᱚᱞᱚᱝ ᱥᱤᱸᱫᱩᱨ ᱢᱮᱱᱟᱜ ᱜᱮ ᱢᱮᱲᱦᱮᱫ ᱥᱟᱠᱚᱢ
ᱥᱟᱹᱜᱩᱱ ᱥᱟᱥᱟᱝ ᱥᱩᱱᱩᱢ ᱥᱤᱸᱫᱩᱨ ᱪᱮᱠᱟ ᱚᱥᱟᱹᱜᱩᱱ ᱮᱱᱟ,

ᱢᱟᱹᱡᱷᱤ ᱢᱚᱬᱮ ᱱᱟᱭᱠᱮ ᱚᱦᱟᱭ ᱚᱠᱚᱭᱮ ᱢᱮᱱᱟ
ᱵᱟᱝᱼᱟ ᱵᱟᱝᱼᱟ ᱟᱫᱚ ᱵᱟᱝᱼᱟ ᱪᱟᱸᱱᱫᱚ ᱵᱚᱸᱜᱟ,
ᱟᱫᱚ ᱟᱞᱚᱢ ᱛᱚᱦᱚᱫ ᱦᱚᱪᱚᱭᱤᱧᱟ ᱡᱟᱸᱜᱟ
ᱚᱦᱚᱢ ᱞᱚᱦᱚᱢ ᱠᱮᱭᱟ ᱚᱦᱟᱭ ᱡᱤᱣᱤ ᱜᱟᱛᱮ ᱡᱤᱣᱤ,

ᱨᱟᱜ ᱟᱹᱪᱩᱨᱤᱟᱹᱧ ᱠᱩᱰᱟᱹᱢ ᱥᱟᱛᱮ ᱦᱟᱣᱟ ᱦᱟᱹᱣᱤ
ᱤᱧᱟᱜ ᱦᱚᱢᱚᱨ ᱦᱟᱞᱟᱝ ᱛᱮ ᱥᱮᱨᱢᱟ ᱯᱩᱨᱤ ᱛᱟᱨᱠᱚᱜ,
ᱵᱤᱪᱟᱹᱨ ᱯᱮ ᱫᱮᱵᱽ ᱜᱩᱱ ᱪᱮᱠᱟᱹᱧ ᱛᱚᱨᱟᱣ ᱠᱚᱜ
ᱭᱚᱦᱟᱭ ᱤᱧ ᱫᱚ ᱥᱤᱸᱜᱮ ᱥᱤᱧ ᱥᱤᱸᱜᱮ ᱧᱤᱫᱟᱹ ᱦᱟᱞᱮ ᱰᱟᱞᱮ,

ᱪᱮᱫ ᱪᱩᱧ ᱠᱟᱹᱭ ᱟᱠᱟᱫ ᱦᱟᱱᱟ ᱡᱚᱱᱚᱢ ᱨᱮ ᱯᱟᱞᱮ
ᱢᱚᱱ ᱢᱚᱱᱮ ᱨᱮ ᱥᱟᱨᱟ ᱜᱷᱟᱹᱲᱤ ᱚᱜᱷᱚᱴᱚᱱ ᱠᱩᱦᱩᱲᱟᱹᱣᱜ,
ᱟᱡᱟᱜ ᱨᱚᱲ ᱨᱚᱯᱚᱲ ᱠᱟᱛᱷᱟ ᱢᱚᱦᱚᱨ ᱢᱚᱱᱮ ᱨᱮ ᱜᱩᱨᱞᱟᱹᱣᱜ
ᱡᱤᱣᱤᱫ ᱡᱤᱵᱚᱱ ᱵᱷᱩᱨ ᱜᱟᱛᱮ ᱜᱟᱯᱟᱛᱮ ᱛᱟᱦᱮᱸᱱᱟᱭ ᱢᱮᱱᱛᱮ,

ᱪᱟᱜ ᱪᱚᱭ ᱞᱚᱜᱚᱱ ᱜᱚᱫ ᱮᱱ ᱢᱟᱥᱮ ᱦᱟᱱᱟ ᱯᱩᱨᱤ ᱦᱟᱱᱛᱮ
ᱥᱟᱦᱟᱭᱮᱱᱟᱭ ᱥᱟᱹᱝᱜᱤᱧ ᱫᱤᱥᱚᱢ ᱛᱤᱱᱟᱹᱜ ᱥᱟᱹᱝᱜᱤᱧ ᱪᱚ,
ᱫᱩᱞᱟᱹᱲᱤᱭᱟᱹ ᱫᱩᱞᱟᱹᱲ ᱜᱟᱛᱮ ᱡᱤᱣᱤ ᱡᱩᱨᱤ ᱡᱤᱛᱟᱹ ᱫᱚ
ᱵᱮᱨᱮᱞ ᱜᱩᱨ ᱦᱚᱲᱢᱚ ᱢᱟᱸᱬᱟ ᱥᱟᱨᱟ ᱥᱮᱸᱜᱮᱞ ᱢᱚᱰᱚᱜ ᱢᱚᱰᱚᱜ,

ᱵᱮᱪᱟᱨᱟ ᱵᱮᱨᱛᱷᱟ ᱵᱮ ᱫᱤᱥᱟᱹ ᱡᱤᱣᱤ ᱦᱩᱰᱩᱜ ᱦᱩᱰᱩᱜ
ᱜᱚᱴᱟ ᱧᱤᱫᱟᱹᱧ ᱟᱸᱡᱚᱢ ᱟᱠᱟᱫ ᱟᱡᱟᱜ ᱜᱮ ᱩᱫᱩᱨ,
ᱛᱤᱨᱮᱧ ᱡᱟᱹᱯᱤᱫ ᱦᱤᱲᱤᱧ ᱠᱮᱫᱮ ᱵᱚᱦᱚᱜ ᱤᱧ ᱜᱟᱹᱫᱩᱨ
ᱢᱮᱱᱟᱜ ᱛᱟᱭ ᱠᱟᱹᱢᱤ ᱟᱭᱢᱟ ᱚᱠᱚᱭᱮ ᱞᱟᱹᱭ ᱟᱭᱢᱟ,

ᱵᱟᱝᱜᱮ ᱟᱛᱮᱱ ᱵᱟᱝᱜᱮ ᱟᱸᱡᱚᱢ ᱤᱧᱟᱜ ᱠᱟᱛᱷᱟ ᱠᱚᱢᱟ
ᱴᱮᱸᱰᱟᱨ ᱨᱮᱛᱟᱭ ᱱᱟᱦᱮᱞ ᱟᱠᱟ ᱨᱮᱜᱮ ᱴᱚᱨᱚᱰᱟᱝ,
ᱥᱟᱛᱮ ᱞᱟᱛᱟᱨ ᱨᱮ ᱛᱨᱤᱭᱟᱹᱣ ᱴᱩᱠᱩᱡ ᱨᱮ ᱛᱟᱝ ᱛᱟᱨᱠᱚᱜ
ᱜᱚᱴᱟ ᱚᱲᱟᱜ ᱨᱟᱜ ᱨᱚᱫᱚᱱ ᱜᱮᱨᱟᱝ ᱨᱟᱹᱣ ᱨᱟᱹᱣ,

ᱪᱟᱞᱟᱣ ᱮᱱ ᱧᱤᱫᱟᱹ ᱵᱟᱹᱲᱤᱡ ᱠᱩᱠᱢᱩ ᱞᱮᱠᱟ ᱜᱤᱧ ᱵᱩᱡᱷᱟᱹᱣ
ᱨᱟᱜ ᱨᱟᱜ ᱛᱮ ᱜᱤᱛᱟᱹᱜ ᱢᱚᱪᱟ ᱵᱟᱠᱷᱮᱬ ᱛᱷᱟᱨ ᱛᱷᱟᱨᱟᱣ ᱛᱤ,
ᱫᱟᱜ ᱧᱩ ᱵᱟᱝ ᱛᱮ ᱧᱩᱬᱟᱹᱜ ᱱᱟᱹᱨᱲᱤ ᱜᱩᱸᱜᱽᱨᱩᱫ ᱟᱲᱟᱝ ᱟᱹᱬᱛᱤ
ᱟᱡᱟᱜ ᱥᱟᱨᱮᱡ ᱥᱟᱥᱟᱝ ᱛᱮ ᱤᱧ ᱦᱩᱧ ᱥᱩᱱᱩᱢᱚᱜ,

ᱛᱮᱞ ᱠᱷᱩᱯᱤ ᱜᱟᱹᱭᱟᱹ ᱜᱷᱟᱴ ᱛᱟᱞᱟ ᱫᱟᱜ ᱨᱤᱧ ᱩᱱᱩᱢᱚᱜ
ᱛᱟᱦᱮᱸ ᱧᱚᱜ ᱠᱟᱱ ᱚᱲᱟᱜ ᱪᱮᱛᱟᱱ ᱫᱚᱥ ᱵᱤᱥ ᱪᱮᱞᱮᱱ,
ᱢᱟᱹᱡᱷᱤ ᱢᱚᱬᱮ ᱟᱱᱛᱮ ᱨᱩᱢ ᱰᱟᱠᱟᱣ ᱨᱮ ᱨᱩᱨᱩᱢᱤᱡ ᱮ ᱢᱮᱱ
ᱵᱟᱝᱜᱮ ᱵᱚᱞᱚ ᱟᱹᱫᱤᱧ ᱛᱟᱦᱮᱸᱱ ᱢᱚᱱᱮ ᱨᱮ ᱫᱷᱟᱫᱚᱥ,

ᱪᱮᱫ ᱤᱧ ᱪᱮᱠᱟᱭ ᱟᱫᱚ ᱧᱟᱢᱚᱜ ᱨᱮᱦᱚᱸ ᱫᱚᱥ
ᱪᱮᱫ ᱴᱮᱜᱷᱟᱱ ᱛᱤᱧ ᱴᱟᱜᱷᱮᱱ ᱞᱮᱠᱷᱟᱱ ᱡᱤᱣᱤ ᱛᱟᱭ ᱫᱚ ᱴᱟᱨᱦᱟᱣ ᱠᱚᱜ,
ᱡᱚᱢᱨᱟᱡᱽ ᱴᱷᱟᱶ ᱤᱧ ᱴᱷᱟᱹᱣᱠᱟᱹ ᱞᱮᱠᱷᱟᱱ ᱵᱟᱝ ᱜᱤᱧ ᱫᱟᱨᱲᱟᱣ ᱠᱚᱜ
ᱨᱟᱪᱟᱜ ᱚᱪᱚᱜ ᱜᱮ ᱥᱟᱹᱱᱟᱹᱧ ᱠᱟᱱ ᱱᱚᱣᱟ ᱦᱚᱲᱢᱚ ᱠᱷᱚᱱ ᱡᱤᱣᱤ,

ᱫᱩᱠᱷ ᱚᱨᱥᱚᱝ ᱪᱮᱛᱟᱱ ᱱᱚᱛᱮ ᱵᱟᱹᱱᱩᱜ ᱮ ᱛᱤᱧ ᱫᱚᱲᱦᱚ ᱫᱤᱨᱦᱤ
ᱜᱟᱛᱮ ᱜᱟᱯᱟᱛᱮ ᱥᱟᱶᱛᱮ ᱛᱟᱲᱟᱢ ᱛᱤ ᱪᱮᱠᱟᱹᱧ ᱯᱩᱪᱩᱡ ᱠᱮᱫᱮ,
ᱤᱬᱤᱡᱚᱜ ᱛᱤᱧ ᱢᱟ ᱡᱤᱣᱤ ᱵᱟᱹᱛᱤ ᱟᱫᱚ ᱟᱞᱚᱧ ᱵᱮᱨᱮᱫ ᱾

***