ᱢᱤᱫᱴᱟᱹᱝ ᱦᱟᱲᱟᱢ ᱦᱚᱲ, ᱥᱟᱶᱨᱮ ᱥᱟᱨᱟ ᱜᱷᱟᱹᱲᱤᱡ ᱛᱟᱦᱮᱸᱱ ᱛᱟᱭᱟ ᱦᱟᱯᱟ ᱾ ᱟᱫᱚ ᱩᱱᱤ ᱦᱟᱲᱟᱢ ᱦᱚᱲ ᱫᱚ ᱢᱤᱫ ᱫᱤᱱ ᱫᱚ ᱢᱮᱨᱚᱢ ᱡᱤᱞ ᱮ ᱟᱹᱜᱩ ᱠᱮᱫᱼᱟ ᱟᱨ ᱦᱚᱯᱚᱱ ᱮᱨᱟ ᱢᱤᱫᱴᱟᱹᱝ ᱢᱮᱱᱟᱭ ᱛᱟᱭᱟ ᱩᱱᱤ ᱫᱚᱭ ᱡᱟᱶᱟᱭ ᱟᱠᱟᱫᱮᱭᱟ ᱾ ᱟᱡ ᱡᱤᱞ ᱢᱟᱭ ᱟᱹᱜᱩ ᱠᱮᱫᱼᱟ ᱟᱫᱚ ᱵᱩᱰᱷᱤ ᱛᱟᱭ ᱮ ᱢᱮᱛᱟᱭ ᱠᱟᱱᱟ, ᱟᱢ ᱫᱚ ᱫᱟᱠᱟ ᱩᱛᱩ ᱠᱚ ᱪᱚᱸᱫᱟ ᱤᱥᱤᱱ ᱦᱟᱱᱛᱟᱲ ᱢᱮ ᱟᱨ ᱤᱧ ᱫᱚ ᱢᱟᱹᱭ ᱟᱨ ᱡᱟᱶᱟᱭ ᱤᱧ ᱟᱹᱜᱩ ᱠᱤᱱᱟ ᱾ ᱦᱚᱭ ᱛᱚᱵᱮ, ᱞᱚᱜᱚᱱ ᱫᱷᱟᱨᱟ ᱨᱩᱣᱟᱹᱲ ᱯᱮ, ᱟᱞᱚ ᱯᱮ ᱧᱤᱫᱟᱹᱜᱼᱟ ᱾ ᱟᱫᱚ ᱩᱱᱤ ᱦᱟᱲᱟᱢ ᱫᱚ ᱦᱚᱯᱚᱱ ᱮᱨᱟ ᱚᱲᱟᱜ ᱮ ᱥᱮᱱ ᱮᱱᱟ ᱾ ᱟᱫᱚ ᱦᱚᱯᱚᱱ ᱮᱨᱟ ᱟᱨ ᱡᱟᱶᱟᱭ ᱜᱚᱝᱠᱮᱭ ᱢᱮᱛᱟ ᱟᱹᱠᱤᱱ ᱠᱟᱱᱟ, ᱮ ᱢᱟᱹᱭ, ᱮ ᱡᱟᱶᱟᱭ, ᱪᱚᱞᱚ ᱛᱮᱦᱮᱧ ᱫᱚ ᱟᱹᱵᱤᱱ ᱤᱫᱤᱧ ᱦᱮᱡ ᱟᱠᱟᱱᱟ ᱾ ᱡᱤᱞ ᱠᱚᱹᱧ ᱟᱹᱜᱩ ᱚᱴᱚ ᱟᱠᱟᱫᱼᱟ ᱟᱨ ᱟᱢ ᱟᱭᱳ ᱤᱥᱤᱱ ᱦᱟᱱᱛᱟᱲ ᱤᱧ ᱢᱮᱱ ᱚᱴᱚ ᱟᱠᱟᱣ ᱫᱮᱭᱟ ᱾ ᱟᱨ ᱞᱚᱜᱚᱱ ᱧᱚᱜ ᱜᱮ ᱵᱚᱱ ᱥᱮᱱᱚᱜᱼᱟ ᱾ ᱟᱫᱚ ᱦᱚᱯᱚᱱ ᱮᱨᱟ ᱟᱨ ᱡᱟᱶᱟᱭ ᱜᱚᱝᱠᱮ ᱠᱤᱱ ᱜᱟᱯᱟᱞ ᱢᱟᱨᱟᱣ ᱵᱟᱲᱟᱭᱮᱱᱟ ᱡᱮ ᱵᱟᱹᱠᱤᱱ ᱥᱚᱢᱚᱭᱚᱜ ᱠᱟᱱᱟ ᱢᱮᱱᱛᱮ ᱾ ᱟᱫᱚ ᱟᱡ ᱵᱟᱵᱟ ᱠᱤᱱ ᱞᱟᱹᱭ ᱨᱩᱣᱟᱹᱲ ᱟᱫᱮᱭᱟ, ᱮ ᱵᱟ, ᱛᱮᱦᱮᱧ ᱫᱚ ᱵᱟᱹᱞᱤᱧ ᱥᱚᱢᱚᱭᱚᱜ ᱠᱟᱱᱟ, ᱜᱟᱯᱟ ᱵᱚᱱ ᱪᱟᱞᱟᱜᱼᱟ ᱛᱮᱦᱮᱧ ᱫᱚ ᱵᱟᱥᱟᱜ ᱢᱮ ᱾ ᱟᱫᱚ ᱩᱱᱤ ᱦᱟᱲᱟᱢ ᱢᱟ ᱡᱤᱞ ᱡᱚᱢ ᱞᱟᱹᱜᱤᱫ ᱛᱮᱭ ᱟᱸᱥ ᱪᱟᱵᱟ ᱟᱠᱟᱱᱟ, ᱚᱱᱟᱛᱮ ᱵᱟᱝ ᱵᱟᱥᱟᱜ ᱥᱟᱱᱟᱭᱮ ᱠᱟᱱᱟ ᱾ ᱟᱫᱚᱭ ᱢᱮᱛᱟ ᱟᱹᱠᱤᱱ ᱠᱟᱱᱟ, ᱵᱟᱝᱼᱟ ᱢᱟᱹᱭ, ᱟᱹᱵᱤᱱ ᱡᱩᱫᱤ ᱵᱟᱹᱵᱤᱱ ᱥᱮᱱᱚᱜᱼᱟ, ᱛᱚᱵᱮ ᱤᱧ ᱥᱩᱢᱩᱝ ᱨᱮᱦᱚᱸᱧ ᱨᱩᱣᱟᱹᱲᱟ ᱛᱮᱦᱮᱧ ᱫᱚ ᱵᱟᱹᱧ ᱵᱟᱥᱟᱜᱼᱟ ᱾ ᱟᱫᱚ ᱩᱱᱤ ᱦᱟᱲᱟᱢ ᱵᱟᱭ ᱵᱟᱥᱟ ᱞᱮᱱ ᱛᱮ ᱟᱹᱭᱩᱵ ᱟᱹᱭᱩᱵ ᱜᱮᱭ ᱨᱩᱣᱟᱹᱲ ᱥᱮᱱᱚᱜ ᱠᱟᱱᱟ ᱾ ᱟᱫᱚ ᱟᱡ ᱨᱩᱣᱟᱹᱲᱚᱜ ᱦᱚᱨ ᱫᱷᱟᱨᱮ ᱨᱮ ᱢᱤᱫᱴᱟᱹᱝ ᱜᱚᱡ ᱦᱚᱲ ᱠᱚ ᱨᱟᱯᱟᱜ ᱚᱴᱚ ᱟᱠᱟ ᱫᱮᱭᱟ ᱾ ᱥᱟᱹᱨᱫᱤ ᱥᱮᱸᱜᱮᱞ ᱡᱤᱞᱩᱜ ᱠᱟᱱ ᱚᱠᱛᱚ ᱨᱮᱜᱮ ᱠᱚ ᱵᱟᱹᱜᱤ ᱚᱴᱚ ᱟᱠᱟᱣᱟ ᱫᱮᱭᱟ ᱾
ᱟᱫᱚ ᱟᱹᱭᱩᱵ ᱤᱫᱤᱭᱮᱱ ᱠᱷᱟᱱ ᱩᱱᱤ ᱦᱟᱲᱟᱢ ᱢᱟ ᱨᱟᱵᱟᱝ ᱤᱫᱤᱭᱮ ᱠᱟᱱᱟ ᱾ ᱟᱫᱚ ᱚᱱᱟ ᱥᱮᱸᱜᱮᱞ ᱮ ᱧᱮᱞ ᱧᱟᱢ ᱠᱮᱫᱼᱟ ᱡᱮ ᱨᱟᱹᱥᱠᱟᱹ ᱜᱮ ᱡᱩᱞᱩᱜ ᱠᱟᱱᱟ ᱾ ᱟᱫᱚᱭ ᱢᱮᱱᱮᱫᱼᱟ, ᱦᱟᱯᱮ ᱢᱤᱫ ᱰᱚᱸᱰᱮᱠ ᱤᱧ ᱡᱩᱨᱩᱜ ᱛᱟᱨᱟᱜᱼᱟ ᱾ ᱟᱫᱚᱭ ᱡᱩᱨᱩᱜ ᱮᱱᱟ ᱾ ᱟᱫᱚ ᱩᱱᱤ ᱦᱟᱲᱟᱢ ᱢᱟ ᱩᱨᱜᱩᱢ ᱮ ᱵᱩᱡᱷᱟᱹᱣ ᱠᱮᱫ ᱠᱷᱟᱱ ᱫᱩᱲᱩᱵ ᱨᱮᱜᱮᱭ ᱫᱩᱫᱽᱲᱩᱢ ᱠᱮᱫᱼᱟ ᱾ ᱚᱸᱰᱮ ᱚᱱᱟ ᱦᱚᱲ ᱫᱚᱦᱚᱱ ᱴᱷᱮᱱ ᱢᱟ ᱰᱟᱹᱱ ᱠᱚ ᱟᱨ ᱡᱩᱜᱤᱱ ᱠᱚᱠᱚ ᱯᱮᱨᱮᱡ ᱟᱠᱟᱱᱟ ᱾ ᱟᱫᱚ ᱜᱚᱡ ᱦᱚᱲᱟᱜ ᱡᱤᱞ ᱠᱚ ᱡᱚᱢ ᱪᱟᱵᱟ ᱠᱮᱫ ᱠᱷᱟᱱ, ᱩᱱᱤ ᱦᱟᱲᱟᱢ ᱯᱟᱹᱨᱤ ᱡᱚᱢ ᱥᱟᱱᱟᱭᱮᱫ ᱠᱚᱣᱟ ᱾ ᱟᱨ ᱩᱱᱤ ᱦᱟᱲᱟᱢ ᱫᱚ ᱚᱱᱟ ᱟᱡᱟᱜ ᱦᱟᱯᱟ ᱛᱮᱜᱮ ᱥᱮᱸᱜᱮᱞ ᱮ ᱦᱚᱴᱚᱨ ᱮᱫᱼᱟ ᱟᱨ ᱮ ᱫᱩᱫᱽᱲᱩᱢ ᱠᱟᱱᱟ ᱫᱚᱢᱮ, ᱚᱲᱟᱜ ᱪᱟᱞᱟᱜ ᱦᱚᱸᱭ ᱦᱤᱲᱤᱧ ᱟᱠᱟᱫᱼᱟ ᱾ ᱟᱨ ᱰᱟᱹᱱ ᱡᱩᱜᱤᱱ ᱠᱚᱦᱚᱸ ᱵᱟᱭ ᱧᱮᱞ ᱡᱚᱝ ᱠᱟᱱᱟ ᱾ ᱟᱫᱚ ᱚᱱᱟ ᱟᱡᱟᱜ ᱦᱟᱯᱟ ᱜᱮ ᱰᱟᱹᱱ, ᱵᱷᱩᱛ ᱟᱨ ᱪᱩᱲᱤᱱ ᱠᱚᱫᱚᱭ ᱞᱟᱜᱟ ᱥᱟᱦᱟ ᱮᱫ ᱠᱚᱣᱟ ᱾ ᱟᱡᱟᱜ ᱵᱚᱦᱚᱜ ᱪᱮᱛᱟᱱ ᱨᱮ ᱚᱱᱟ ᱦᱟᱯᱟ ᱛᱟᱭ ᱫᱚ ᱩᱱᱠᱩ ᱞᱟᱜᱟ ᱠᱷᱟᱹᱛᱤᱨ ᱨᱟᱸᱭ ᱨᱟᱸᱭ ᱟᱹᱪᱩᱨᱚᱜ ᱠᱟᱱᱟ ᱟᱨ ᱦᱚᱸ ᱚᱠᱟᱨᱮᱭ ᱫᱚᱦᱚ ᱠᱟᱜᱼᱟ, ᱚᱸᱰᱮ ᱜᱮ ᱨᱩᱣᱟᱹᱲ ᱦᱤᱡᱩᱜ ᱠᱟᱱᱟ ᱾ ᱟᱨ ᱩᱱᱤ ᱦᱟᱲᱟᱢ ᱫᱚ ᱥᱮᱸᱜᱮᱞ ᱦᱟᱹᱨᱥᱩᱲᱚᱜ ᱞᱮᱠᱟᱭ ᱵᱩᱡᱷᱟᱹᱣ ᱠᱷᱟᱱ ᱜᱮ ᱟᱨ ᱦᱚᱸ ᱦᱟᱯᱟ ᱛᱮᱜᱮ ᱥᱮᱸᱜᱮᱞ ᱮ ᱦᱚᱴᱚᱨ ᱧᱚᱜᱟᱜ ᱠᱟᱱᱟ ᱾ ᱟᱨᱵᱟᱝ ᱠᱷᱟᱱ ᱢᱤᱫ ᱫᱷᱟᱣ ᱢᱤᱫ ᱫᱷᱟᱣ ᱫᱚ ᱥᱮᱸᱜᱮᱞ ᱨᱮᱜᱮᱭ ᱴᱷᱮᱠᱟᱣ ᱠᱟᱜ ᱠᱟᱱᱟ ᱾ ᱤᱱᱠᱟᱹ ᱤᱱᱠᱟᱹ ᱛᱮᱜᱮ ᱞᱚᱞᱚ ᱛᱮᱜᱮ ᱦᱟᱯᱟ ᱫᱚ ᱦᱚᱯᱚᱱ ᱦᱚᱯᱚᱱ ᱪᱟᱵᱟ ᱤᱫᱤᱭᱮᱱᱟ ᱾
ᱟᱫᱚ ᱛᱤᱱ ᱵᱷᱩᱨ ᱦᱟᱯᱟ ᱨᱮᱱᱟᱜ ᱡᱤᱣᱤ ᱛᱟᱦᱮᱸ ᱠᱟᱱᱟ, ᱩᱱ ᱵᱷᱩᱨ ᱫᱚ ᱩᱱᱠᱩ ᱰᱟᱹᱱ ᱡᱩᱜᱤᱱ ᱫᱚᱭ ᱞᱟᱜᱟ ᱥᱟᱦᱟ ᱞᱮᱫ ᱠᱚ ᱜᱮᱭᱟ ᱾ ᱩᱱ ᱵᱷᱩᱨ ᱫᱚ ᱩᱱᱤ ᱦᱟᱲᱟᱢ ᱦᱚᱸ ᱵᱟᱠᱚ ᱡᱚᱴᱮᱫ ᱰᱟᱲᱮ ᱟᱫᱮ ᱛᱟᱦᱮᱸᱫ ᱾ ᱟᱫᱚ ᱩᱱᱤ ᱦᱟᱲᱟᱢ ᱜᱮᱛᱚ ᱥᱮᱸᱜᱮᱞ ᱦᱚᱴᱚᱨ ᱦᱚᱴᱚᱨ ᱛᱮ ᱦᱟᱯᱟ ᱢᱟᱭ ᱞᱚ ᱪᱟᱵᱟ ᱚᱪᱚ ᱠᱮᱫᱼᱟ ᱾ ᱟᱫᱚ ᱤᱱᱟᱹ ᱛᱟᱭᱚᱢ ᱫᱚ ᱚᱠᱚᱭ ᱵᱟᱭ ᱞᱟᱜᱟ ᱟᱭ, ᱟᱡ ᱢᱟ ᱫᱩᱫᱽᱲᱩᱢ ᱨᱮᱜᱮᱭ ᱵᱟᱹᱭ ᱟᱠᱟᱱᱟ ᱾ ᱟᱫᱚ ᱦᱟᱯᱟᱭ ᱞᱚ ᱜᱚᱡ ᱮᱱᱠᱷᱟᱱ ᱟᱡ ᱦᱚᱸᱠᱚ ᱡᱚᱢ ᱜᱚᱫ ᱠᱟᱫᱮᱭᱟ ᱟᱨ ᱟᱸᱜᱟᱜ ᱛᱮᱜᱮᱭ ᱜᱚᱡ ᱱᱟᱯᱚᱲ ᱮᱱᱟ ᱩᱱᱤ ᱦᱟᱲᱟᱢ ᱦᱚᱸ ᱾ ᱟᱫᱚ ᱚᱠᱟᱨᱮ ᱵᱟᱝ ᱡᱤᱞ ᱫᱟᱠᱟ ᱦᱚᱸᱭ ᱡᱚᱢ ᱞᱮᱫ ᱚᱲᱟᱜ ᱨᱩᱣᱟᱹᱲ ᱠᱟᱛᱮ, ᱟᱡ ᱢᱟ ᱟᱡ ᱜᱮᱠᱚ ᱡᱚᱢ ᱠᱮᱫᱮ ᱾ ᱦᱟᱯᱟ ᱡᱩᱫᱤ ᱵᱟᱭ ᱞᱚ ᱠᱮᱭᱟ ᱛᱚᱵᱮ ᱠᱷᱟᱱ ᱟᱡ ᱫᱚ ᱵᱟᱭ ᱜᱚᱡ ᱠᱚᱜᱼᱟ ᱾ ᱚᱱᱟ ᱟᱡᱟᱜ ᱦᱟᱯᱟ ᱜᱮ ᱦᱩᱱᱟᱹᱝ ᱟᱡ ᱫᱚᱭ ᱞᱟᱜᱟ ᱫᱩᱜ ᱠᱮᱭᱟ ᱾
ᱟᱫᱚ ᱚᱱᱟᱛᱮ ᱠᱚ ᱢᱮᱱᱟ, ᱦᱟᱯᱟ ᱨᱮᱫᱚ ᱡᱤᱣᱤ ᱛᱟᱦᱮᱸᱱ ᱜᱮᱭᱟ ᱾ ᱡᱟᱦᱟᱸ ᱥᱮᱫ ᱠᱷᱚᱱ ᱟᱹᱜᱩ ᱠᱟᱛᱮ ᱟᱨᱵᱟᱝ ᱜᱟᱹᱭ ᱠᱟᱰᱟ ᱜᱩᱯᱤ ᱠᱷᱚᱱ ᱟᱹᱜᱩ ᱠᱟᱛᱮ ᱦᱟᱯᱟ ᱫᱚ ᱢᱤᱫᱴᱟᱹᱝ ᱠᱚᱪᱟ ᱨᱮᱠᱚ ᱫᱚᱦᱚ ᱠᱟᱜᱼᱟ ᱾ ᱟᱨ ᱡᱟᱦᱟᱸ ᱛᱤᱱᱟᱹᱜ ᱢᱟᱨᱮ ᱦᱟᱯᱟ ᱜᱮ ᱦᱩᱭ ᱠᱚᱜ, ᱥᱮᱸᱜᱮᱞ ᱠᱚᱨᱮ ᱫᱚ ᱵᱟᱠᱚ ᱴᱷᱮᱠᱟᱣᱟ ᱾
