ᱡᱚᱛᱚ ᱠᱚᱜᱮ ᱢᱤᱫ ᱥᱮᱱ ᱥᱮᱱᱚᱜ ᱮᱥᱠᱟᱨ ᱡᱟᱹᱛᱨᱤ ᱱᱩᱱᱟᱹᱜ ᱢᱟᱨᱟᱝ ᱵᱚᱥᱢᱚᱛᱟ ᱨᱮ, ᱛᱟᱭᱚᱢ ᱥᱮᱱ ᱚᱠᱚᱭ ᱦᱚᱸ ᱵᱟᱝ ᱠᱚ ᱠᱚᱭᱚᱜ ᱨᱩᱣᱟᱹᱲ ᱥᱮᱴᱮᱨᱚᱜ ᱜᱮᱭᱟ ᱠᱚ ᱴᱷᱤᱠ ᱴᱷᱟᱶ ᱨᱮ ᱾
ᱡᱚᱛᱚ ᱠᱚᱜᱮ ᱵᱟᱝ ᱧᱮᱞᱚᱜ ᱞᱮᱠᱟᱱ ᱫᱟᱲᱮ ᱨᱤᱱ ᱧᱮᱞ ᱧᱟᱢᱚᱜ ᱞᱮᱠᱟᱱ ᱦᱚᱲ, ᱢᱮᱱᱟᱜ ᱱᱩᱠᱩ ᱴᱷᱮᱱ ᱜᱩᱱ ᱵᱤᱨᱫᱟᱹ ᱟᱹᱠᱤᱞ ᱡᱚᱛᱚᱣᱟᱜ ᱛᱮ ᱩᱨᱩᱱ ᱯᱩᱨᱩᱱ ᱟᱭᱳ ᱦᱚᱲ ᱵᱟᱵᱟ ᱦᱚᱲ ᱾
ᱥᱚᱫᱚᱨ ᱟᱠᱚ ᱧᱩᱛᱩᱢ ᱧᱩᱢ ᱞᱮᱠᱟᱱᱟᱜ ᱫᱟᱲᱮ ᱟᱠᱚᱣᱟᱜ ᱚᱱᱛᱚᱨ ᱵᱷᱤᱛᱤᱨ ᱛᱮ, ᱥᱟᱨᱦᱟᱣ ᱠᱚᱣᱟ ᱠᱚ ᱫᱤᱥᱚᱢ ᱦᱚᱲ ᱱᱩᱠᱩ ᱡᱟᱹᱡᱤᱞᱢᱟᱱ ᱫᱩᱞᱟᱹᱲ ᱛᱮ ᱢᱟᱹᱱ ᱟᱱᱛᱮ ᱾
ᱜᱟᱹᱦᱤᱨ ᱵᱤᱥᱟᱹᱥ ᱟᱨ ᱦᱮᱰᱮᱡ ᱨᱟᱹᱥᱠᱟᱹ ᱟᱴᱮᱫ ᱯᱟᱴᱮᱫ ᱯᱮᱨᱮᱡ ᱟᱠᱟᱱ, ᱟᱠᱚᱣᱟᱜ ᱚᱱᱛᱚᱨ ᱡᱤᱣᱤᱨᱮ, ᱵᱟᱵᱚᱱ ᱵᱟᱰᱟᱭ ᱠᱮᱠᱟᱱ ᱦᱮᱥᱮᱡ ᱥᱮᱠᱮᱡ ᱢᱮᱱᱟᱜ ᱛᱤᱱᱟᱹᱜ ᱛᱤᱱᱟᱹᱜ ᱜᱩᱱ ᱵᱤᱨᱫᱟᱹ ᱱᱩᱠᱩ ᱵᱷᱤᱛᱤᱨ ᱨᱮ ᱾
ᱟᱸᱴ ᱠᱷᱚᱱ ᱟᱸᱴᱟᱱ ᱠᱟᱹᱢᱤ ᱨᱮ ᱡᱚᱲᱟᱣ ᱡᱚᱯᱚᱲᱟᱣ ᱟᱛᱮ, ᱞᱟᱥᱮᱨ ᱦᱟᱛᱟᱝ ᱞᱟᱹᱵᱤᱫ ᱨᱤᱫᱟᱹᱭ ᱨᱟᱦᱟ ᱠᱚ ᱨᱚᱜᱚᱲ ᱫᱩᱞᱟᱹᱲ ᱛᱮ ᱢᱤᱫ ᱥᱟᱶᱛᱮ ᱾
ᱫᱩᱨᱩᱢ ᱫᱩᱨᱩᱢ ᱫᱷᱟᱹᱨᱛᱤ ᱢᱟᱹᱱᱢᱤ ᱠᱚ ᱛᱟᱞᱟᱨᱮ ᱛᱟᱦᱮᱸ ᱠᱟᱛᱮ ᱞᱟᱯᱷᱟᱝ ᱥᱮᱱ ᱠᱚ ᱥᱚᱦᱚᱨ ᱥᱮᱴᱮᱨᱚᱜ, ᱡᱚᱲᱟᱣ ᱚᱪᱚᱭᱟᱠᱚ ᱠᱟᱹᱢᱤ ᱠᱟᱹᱨᱫᱷᱟᱹᱱᱤ ᱡᱤᱛᱠᱟᱹᱨ ᱠᱟᱛᱮ ᱠᱚ ᱜᱟᱹᱰᱤᱭᱟᱹᱣ ᱩᱛᱟᱨᱚᱜ ᱾
ᱞᱟᱯᱷᱟᱝ ᱥᱮᱱ ᱞᱟᱦᱟᱜ ᱱᱟᱣᱟᱱᱟᱜ ᱠᱟᱹᱢᱤᱨᱮ ᱥᱮᱞᱮᱫ ᱟᱛᱮ ᱢᱟᱬᱟᱝ ᱥᱮᱱ ᱜᱮᱠᱚ ᱛᱟᱲᱟᱢ ᱤᱫᱤ, ᱚᱥᱟᱨ ᱩᱭᱦᱟᱹᱨ ᱥᱟᱶᱛᱮ ᱫᱟᱹᱨᱭᱟᱹ ᱫᱟᱲᱮ ᱥᱚᱨᱮᱥ ᱠᱷᱚᱱ ᱥᱚᱨᱮᱥ ᱴᱷᱟᱶ ᱜᱮᱛᱚ ᱠᱚ ᱥᱤᱫᱤ ᱾
ᱥᱟᱢᱟᱝ ᱦᱩᱭ ᱟᱠᱚ ᱜᱮᱭᱟ ᱡᱚᱛᱚ ᱞᱮᱠᱟᱱᱟᱜ ᱟᱸᱴ ᱟᱱᱟᱴ ᱥᱟᱶᱛᱮ ᱥᱤᱨᱜᱟᱹᱫ ᱵᱮᱲᱟ ᱦᱚᱸ, ᱵᱟᱝ ᱠᱚ ᱵᱷᱮᱜᱮᱫ ᱜᱮ ᱟᱠᱚᱣᱟᱜ ᱡᱚᱥ ᱚᱠᱛᱚ ᱠᱷᱚᱱᱟᱜ ᱞᱟᱦᱟᱨᱮ ᱥᱮᱴᱮᱨᱚᱜ ᱜᱮᱭᱟᱠᱚ ᱮᱱᱨᱮᱦᱚᱸ ᱾
ᱵᱟᱝ ᱜᱟᱱᱚᱜ ᱞᱮᱠᱟᱱ ᱠᱟᱹᱢᱤ ᱞᱟᱥᱟᱬᱦᱮᱫ ᱜᱮ ᱜᱟᱱ ᱠᱟᱛᱮ ᱟᱹᱠᱤᱞ ᱟᱠᱟᱱ ᱦᱚᱲ ᱟᱨᱡᱟᱣ ᱡᱚᱝᱼᱟᱠᱚ ᱥᱚᱨᱮᱥ ᱥᱟᱨᱦᱟᱣ, ᱟᱠᱚᱣᱟᱜ ᱨᱚᱲ ᱨᱚᱯᱚᱲ ᱟᱹᱨᱤᱪᱟᱹᱞᱤ, ᱥᱟᱶᱦᱮᱫ, ᱥᱟᱶᱛᱟ ᱫᱚᱲᱦᱚ ᱠᱟᱛᱮ ᱚᱸᱰᱮ ᱜᱮᱠᱚ ᱛᱤᱸᱜᱩ ᱴᱟᱨᱦᱟᱣᱚᱜ ᱾
***
