ᱡᱟᱱᱟᱢ ᱟᱭᱳ

ᱱᱚᱣᱟ ᱨᱤᱞᱟᱹᱼᱢᱟᱞᱟ ᱫᱷᱟᱹᱨᱛᱤ ᱛᱟᱞᱟ ᱨᱮ,
ᱟᱢ ᱜᱮᱢ ᱥᱮᱯᱮᱧ ᱨᱟᱠᱟᱵ ᱞᱤᱫᱤᱧᱟ,
ᱱᱚᱣᱟ ᱞᱮᱼᱞᱮᱸᱜᱮᱫ ᱚᱜᱚᱢ ᱫᱚᱨᱭᱟ ᱛᱟᱞᱟ ᱠᱷᱚᱱ,
ᱟᱢ ᱜᱮᱢ ᱚᱣᱟᱨ ᱚᱰᱚᱠ ᱞᱤᱫᱤᱧᱟ,
ᱥᱟᱹᱨᱤ ᱜᱮ ᱡᱟᱱᱟᱢ ᱟᱭᱳ, ᱟᱢ ᱜᱮ ᱥᱤᱨᱡᱚᱱᱤᱭᱟᱹ ᱫᱚ ᱿

ᱟᱢᱟᱜ ᱠᱚᱞᱮ ᱨᱮᱢ ᱦᱮᱵᱮ ᱦᱟᱨᱟ ᱞᱤᱫᱤᱧ,
ᱟᱢᱟᱜ ᱦᱚᱵᱚᱨ ᱨᱮᱢ ᱱᱤᱸᱫᱟᱹ ᱡᱟᱹᱯᱤᱫ ᱞᱤᱫᱤᱧ,
ᱛᱟᱨᱟ ᱟᱸᱪᱟᱨ ᱛᱮᱢ ᱯᱚᱴᱚᱢ ᱫᱚᱦᱚ ᱞᱤᱫᱤᱧ,
ᱫᱟᱭᱟᱼᱫᱩᱞᱟᱹᱲ ᱛᱮ ᱟᱢ ᱜᱮᱢ ᱩᱨᱩᱱᱼᱯᱩᱨᱩᱱ ᱞᱤᱫᱤᱧ,
ᱥᱟᱹᱨᱤ ᱜᱮ ᱡᱟᱱᱟᱢ ᱟᱭᱳ, ᱟᱢ ᱜᱮ ᱫᱩᱞᱟᱹᱲ ᱫᱚᱨᱭᱟ ᱫᱚ ᱿

ᱨᱮᱸᱜᱮᱡᱼᱛᱮᱛᱟᱝ ᱠᱷᱚᱱ ᱦᱚᱸᱢ ᱥᱟᱺᱜᱤᱧ ᱥᱟᱦᱟ ᱞᱤᱫᱤᱧ,
ᱦᱟᱭ ᱦᱟᱹᱥᱩ ᱠᱷᱚᱱ ᱦᱚᱸᱢ ᱩᱠᱩ ᱫᱚᱦᱚ ᱟᱠᱟᱫ ᱤᱧ,
ᱨᱟᱜᱼᱨᱚᱫᱚᱱ ᱠᱷᱚᱱ ᱦᱚᱸᱢ ᱯᱷᱟᱨᱟᱠ ᱟᱠᱟᱫ ᱤᱧ,
ᱫᱩᱠ ᱫᱟᱺᱫᱤ ᱠᱷᱚᱱ ᱦᱚᱸᱢ ᱥᱟᱦᱟ ᱟᱠᱟᱫ ᱤᱧ,
ᱥᱟᱹᱨᱤ ᱜᱮ ᱡᱟᱱᱟᱢ ᱟᱭᱳ, ᱟᱢ ᱜᱮ ᱛᱚᱣᱟ ᱫᱟᱨᱮ ᱫᱚ ᱿

ᱥᱤᱛᱩᱝᱼᱞᱚᱞᱚ ᱠᱷᱚᱱ ᱦᱚᱸᱢ ᱵᱟᱧᱪᱟᱣ ᱫᱚᱦᱚ ᱟᱠᱟᱫ ᱤᱧ,
ᱫᱟᱜᱼᱡᱟᱹᱰᱤ ᱠᱷᱚᱱ ᱦᱚᱸᱢ ᱩᱢᱩᱞ ᱟᱠᱟᱫ ᱤᱧ,
ᱦᱚᱭᱼᱵᱟᱹᱨᱰᱩ ᱠᱷᱚᱱ ᱦᱚᱸᱢ ᱫᱟᱱᱟᱝ ᱟᱠᱟᱫ ᱤᱧ,
ᱦᱤᱸᱥᱟᱹᱼᱥᱮᱸᱜᱮᱞ ᱠᱷᱚᱱ ᱦᱚᱸᱢ ᱥᱟᱦᱟ ᱟᱠᱟᱫ ᱤᱧ,
ᱥᱟᱹᱨᱤ ᱜᱮ ᱡᱟᱱᱟᱢ ᱟᱭᱳ, ᱟᱢ ᱜᱮ ᱫᱟᱲᱮ ᱨᱟᱹᱱᱤ ᱫᱚ ᱿

ᱵᱩᱫᱷᱤᱼᱫᱤᱥᱟᱹ ᱛᱮᱢᱟᱢ ᱯᱮᱨᱮᱡ ᱟᱠᱟᱫ ᱤᱧ,
ᱟᱹᱠᱤᱞᱼᱜᱮᱭᱟᱱ ᱛᱮᱢ ᱯᱩᱨᱩᱱ ᱟᱠᱟᱫ ᱤᱧ,
ᱟᱦᱞᱟᱼᱵᱟᱹᱛᱤ ᱞᱮᱠᱟᱢ ᱢᱟᱨᱥᱟᱞ ᱟᱠᱟᱫ ᱤᱧ,
ᱧᱩᱛᱼᱧᱚᱞᱦᱟᱫ ᱠᱷᱚᱱᱮᱢ ᱚᱣᱟᱨ ᱟᱠᱟᱫ ᱤᱧ,
ᱥᱟᱹᱨᱤ ᱜᱮ ᱡᱟᱱᱟᱢ ᱟᱭᱳ, ᱟᱢ ᱜᱮ ᱜᱩᱨᱩ ᱟᱭᱳ ᱫᱚ ᱿

***