ᱟᱵᱚᱣᱟᱜ ᱥᱟᱶᱛᱟ ᱨᱮ ᱛᱤᱨᱞᱟᱹ ᱠᱚᱣᱟᱜ ᱫᱚ ᱞᱟᱠᱪᱟᱨ ᱵᱟᱧᱪᱟᱣ ᱫᱚᱦᱚᱭ ᱨᱮᱫᱚ ᱟᱹᱰᱤᱛᱮᱫ ᱜᱮ ᱮᱱᱮᱢ ᱢᱮᱱᱟᱜ ᱟᱠᱟᱫᱼᱟ ᱾ ᱥᱮᱫᱟᱭ ᱠᱷᱚᱱ ᱜᱮ ᱟᱵᱚᱣᱟᱜ ᱥᱟᱶᱛᱟ ᱛᱤᱨᱞᱟᱹ ᱦᱚᱯᱚᱱ ᱠᱚᱫᱚ ᱠᱚᱲᱟ ᱦᱚᱯᱚᱱᱟᱜ ᱡᱚᱛᱚ ᱞᱮᱠᱟᱱᱟᱜ ᱠᱟᱹᱢᱤᱨᱮ ᱜᱚᱲᱚ ᱥᱚᱯᱚᱦᱚᱫ ᱫᱚ ᱛᱟᱦᱮᱸᱱ ᱛᱟᱠᱚ ᱜᱮᱭᱟ ᱾ ᱵᱚᱸᱜᱟ ᱵᱳᱨᱳ, ᱮᱱᱮᱡᱼᱥᱮᱨᱮᱧ, ᱵᱟᱯᱞᱟᱼᱵᱮᱦᱟ, ᱪᱷᱩᱛᱼᱪᱷᱟᱹᱴᱭᱟᱹᱨ, ᱚᱲᱟᱜ ᱫᱩᱣᱟᱹᱨ, ᱟᱨᱪ ᱟᱥ ᱠᱟᱹᱢᱤ ᱠᱚᱨᱮ ᱦᱚᱸ ᱵᱟᱨᱟᱵᱟᱹᱨᱤ ᱜᱮ ᱪᱷᱩᱴᱟᱹᱣ ᱟᱠᱟ ᱜᱮ ᱢᱮᱱᱟᱜ ᱠᱚᱣᱟ ᱾ ᱥᱟᱹᱨᱤ ᱜᱮ ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮ ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱱᱚᱝᱠᱟᱱ ᱴᱷᱟᱶ ᱢᱮᱱᱟᱜ ᱛᱮ ᱟᱹᱰᱤ ᱨᱟᱹᱥᱠᱟᱹ ᱵᱚᱱ ᱵᱩᱡᱷᱟᱹᱣᱮᱫ ᱠᱟᱱᱟ ᱾ ᱜᱷᱟᱨᱚᱸᱜᱽ ᱡᱤᱭᱚᱱ ᱨᱮᱦᱚᱸ ᱠᱚᱲᱟ ᱦᱚᱯᱚᱱ ᱥᱟᱶ ᱛᱤᱨᱞᱟᱹ ᱦᱚᱯᱚᱱ ᱵᱟᱱᱟ ᱦᱚᱲᱟᱜ ᱜᱮ ᱦᱚᱠ ᱟᱹᱭᱫᱟᱹᱨᱤ ᱥᱚᱢᱟᱱ ᱢᱮᱱᱟᱜ ᱛᱮ ᱞᱟᱲᱪᱟᱲ ᱟᱱᱮᱡ ᱜᱮ ᱢᱚᱡᱽ ᱪᱮ ᱵᱷᱟᱹᱜᱤ ᱫᱚ ᱪᱟᱞᱟᱜᱼᱟ ᱾ ᱜᱷᱟᱨᱚᱸᱡᱽ ᱡᱤᱭᱚᱱ ᱪᱟᱞᱟᱣ ᱨᱮᱫᱚ ᱱᱩᱠᱤᱱᱜ ᱫᱚ ᱢᱤᱫ ᱜᱟᱹᱰᱤ ᱪᱟᱠᱟ ᱞᱮᱠᱟ ᱠᱟᱱᱟ ᱠᱤᱱ ᱾ ᱪᱮᱫ ᱞᱮᱠᱟ ᱜᱟᱹᱰᱤ ᱵᱷᱟᱹᱜᱤ ᱛᱮ ᱪᱟᱞᱟᱜ ᱞᱟᱹᱜᱤᱫ ᱵᱟᱱᱟᱨ ᱪᱟᱠᱟ ᱥᱚᱢᱟᱱ ᱛᱟᱦᱮᱸᱱ ᱞᱮᱠ ᱠᱟᱱᱟ, ᱚᱱᱠᱟ ᱜᱮ ᱠᱚᱲᱟ ᱦᱚᱯᱚᱱ ᱟᱨ ᱛᱤᱨᱤ ᱦᱚᱯᱚᱱ ᱠᱚᱣᱟᱜ ᱥᱚᱢᱟᱱ ᱦᱚᱠ ᱟᱹᱭᱫᱟᱹᱨᱤ ᱫᱚ ᱦᱩᱭᱩᱜ ᱟᱹᱰᱤ ᱜᱮ ᱞᱟᱹᱠᱛᱤ ᱠᱟᱱᱟ, ᱱᱚᱝᱠᱟ ᱮᱱᱟᱝ ᱜᱮ ᱜᱷᱟᱨᱚᱸᱡᱽ ᱧᱩᱛᱩᱢ ᱜᱟᱹᱰᱤ ᱫᱚ ᱱᱟᱯᱟᱭ ᱛᱮ ᱪᱟᱞᱟᱜᱼᱟ ᱟᱨ ᱥᱩᱞᱩᱠ ᱪᱷᱟᱨᱚᱸᱡᱽ ᱢᱮᱱᱛᱮ ᱵᱚᱱ ᱢᱮᱛᱟᱜ ᱠᱟᱱᱟ ᱾
ᱞᱟᱠᱪᱟᱨ ᱵᱟᱧᱪᱟᱣ ᱫᱚᱦᱚᱭ ᱨᱮᱫᱚ ᱠᱩᱲᱤ ᱦᱚᱯᱚᱱ ᱪᱮ ᱛᱤᱨᱞᱟᱹ ᱠᱚᱣᱟᱜ ᱫᱚ ᱟᱹᱰᱤ ᱛᱮᱫ ᱜᱮ ᱜᱚᱲᱚ ᱥᱚᱯᱚᱦᱚᱫ ᱢᱮᱱᱟᱜᱼᱟ ᱾ᱪᱮᱫᱟᱜ ᱵᱟᱝ ᱢᱟ ᱱᱩᱠᱩ ᱴᱷᱮᱱ ᱫᱚ ᱯᱷᱩᱨᱪᱟᱹ ᱟᱨ ᱱᱤᱨᱚᱲ ᱢᱚᱱᱮ ᱢᱮᱱᱟᱜᱼᱟ ᱚᱱᱟᱛᱮ ᱵᱚᱸᱜᱟ ᱵᱳᱨᱳ ᱫᱮᱵᱟᱼᱥᱮᱵᱟ, ᱥᱟᱡᱟᱣᱼᱥᱟᱯᱲᱟᱣ ᱟᱨ ᱵᱚᱸᱜᱟ ᱥᱟᱢᱟᱱᱚᱢ ᱠᱚ ᱠᱩᱲᱟᱹᱣ ᱞᱟᱹᱜᱤᱫ ᱢᱟ ᱛᱤᱨᱞᱟᱹ ᱠᱚᱜᱮ ᱧᱟᱢ ᱟᱠᱟᱣᱟᱱᱟ ᱵᱚᱱ ᱟᱹᱭᱫᱟᱹᱨᱤ ᱫᱚ ᱾ ᱟᱵᱚ ᱛᱤᱱᱟᱹᱜ ᱱᱤᱨᱚᱲ ᱟᱨ ᱛᱤᱱᱟᱹᱜ ᱯᱷᱩᱨᱪᱟ ᱢᱚᱱᱮ ᱛᱮᱵᱚ ᱠᱩᱲᱟᱹᱣᱟ ᱩᱱᱟᱹᱜ ᱞᱚᱜᱚᱱ ᱜᱮ ᱵᱚᱸᱜᱟ ᱵᱳᱨᱳ ᱦᱚᱸᱠᱚ ᱟᱛᱟᱝ ᱫᱟᱨᱟᱢᱟ ᱟᱨ ᱟᱵᱚᱣᱟᱜ ᱟᱸᱥ ᱠᱚ ᱯᱩᱨᱟᱹᱣ ᱛᱟᱵᱚᱱᱟ ᱾
ᱚᱱᱠᱟ ᱜᱮ ᱛᱤᱨᱞᱟᱹ ᱦᱚᱯᱚᱱ ᱠᱚ ᱴᱷᱮᱱ ᱜᱮ ᱧᱮᱞ ᱧᱟᱢᱚᱜᱼᱟ ᱟᱵᱚ ᱥᱟᱶᱛᱟ ᱨᱮᱱᱟᱜ ᱨᱟᱭᱨᱤᱛ, ᱟᱪᱟᱨᱼᱵᱮᱵᱷᱟᱨ ᱮᱢᱟᱱᱟᱜ ᱠᱚᱦᱚᱸ ᱾ ᱪᱮᱫᱟᱜ ᱵᱟᱝ ᱢᱟ ᱟᱵᱚ ᱜᱮ ᱯᱮᱲᱟ ᱯᱷᱩᱨᱵᱷᱩ ᱟᱛᱟᱝ ᱫᱟᱨᱟᱢ, ᱥᱮᱵᱟᱼᱫᱮᱵᱟ ᱡᱚᱛᱚᱣᱟᱜ ᱟᱵᱚ ᱜᱮᱵᱚ ᱛᱚᱨᱟᱣᱮᱫ, ᱟᱵᱚᱣᱟᱜ ᱟᱪᱟᱨ ᱵᱮᱵᱷᱟᱨ ᱨᱮᱜᱮ ᱡᱷᱟᱞᱠᱟᱣᱜᱼᱟ ᱫᱤᱥᱚᱢ ᱜᱚᱴᱟ ᱮᱴᱟᱜ ᱥᱟᱶᱛᱟ ᱠᱚᱨᱮ ᱦᱚᱸᱠᱚ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ ᱡᱮ ᱛᱤᱱᱟᱹᱜ ᱱᱟᱯᱟᱭᱟ ᱟᱨ ᱛᱤᱱᱟᱹᱜ ᱥᱚᱨᱮᱥᱟ ᱟᱵᱚᱣᱟᱜ ᱥᱟᱶᱛᱟ ᱾
ᱱᱚᱶᱟ ᱥᱟᱶᱛᱮ ᱛᱤᱨᱞᱟᱹ ᱦᱚᱯᱚᱱ ᱠᱚ ᱴᱷᱮᱱ ᱜᱮ ᱢᱮᱱᱟᱜᱼᱟ ᱚᱱᱟ ᱫᱟᱲᱮ ᱡᱟᱦᱟᱸ ᱫᱚᱵᱚᱱ ᱢᱮᱱᱟ ᱥᱟᱡᱽᱼᱥᱤᱸᱜᱟᱹᱨ, ᱚᱲᱟᱜ ᱫᱩᱣᱟᱹᱨ, ᱡᱮᱨᱮᱲᱼᱯᱚᱛᱟᱣ, ᱜᱮᱡᱼᱜᱩᱨᱤᱡ ᱟᱨ ᱦᱚᱸ ᱵᱷᱤᱛ ᱠᱚᱨᱮ ᱵᱟᱨᱚ ᱵᱚᱨᱚᱱ ᱨᱚᱝ ᱛᱮᱟ ᱨᱟᱜ ᱥᱟᱥᱟᱝ ᱞᱤᱞ ᱦᱟᱹᱨᱭᱟᱹᱲ ᱵᱟᱦᱟ ᱰᱟᱹᱨ ᱠᱚ ᱵᱮᱱᱟᱣ ᱟᱨ ᱱᱟᱱᱟ ᱦᱩᱱᱟᱹᱨ ᱪᱤᱛᱟᱹᱨ ᱵᱮᱱᱟᱣ ᱨᱮᱦᱚᱸ ᱱᱩᱠᱩ ᱫᱩᱠᱩ ᱯᱟᱹᱨᱩᱠᱷᱤᱭᱟᱹ ᱠᱟᱱᱟ ᱾ ᱪᱟᱸᱫᱚ ᱵᱚᱸᱜᱟᱦᱟᱜ ᱥᱤᱱᱟᱹᱢ ᱢᱩᱴᱷᱟᱹᱱ ᱨᱚᱦᱚᱲ ᱵᱷᱤᱛ ᱨᱮᱵᱚᱱ ᱡᱷᱟᱞᱠᱟᱣ ᱨᱟᱠᱟᱵᱟ ᱚᱱᱟ ᱥᱟᱶᱛᱮ ᱩᱰᱟᱹᱣᱜ ᱪᱮᱬᱮ ᱠᱚᱣᱟᱜ ᱪᱮᱦᱚᱨᱼᱵᱮᱦᱚᱨ, ᱵᱤᱨᱼᱠᱩᱞ, ᱵᱟᱱᱟ, ᱦᱟᱹᱛᱤ, ᱥᱟᱫᱚᱢ, ᱟᱨ ᱦᱚᱸ ᱡᱮᱸᱜᱮᱫᱼᱡᱮᱸᱜᱮᱫ ᱢᱩᱞᱩᱡ ᱞᱟᱸᱫᱟ ᱦᱟᱛᱮ ᱯᱷᱩᱴᱟᱹᱣ ᱵᱟᱦᱟ, ᱧᱮᱞᱮ ᱫᱩᱢᱩᱨ ᱠᱚ ᱨᱟᱥᱟ ᱪᱮᱯᱮᱡ ᱞᱟᱹᱜᱤᱫ ᱠᱚ ᱟᱹᱪᱩᱨ ᱜᱚᱫᱚᱜ ᱞᱮᱠᱟ, ᱦᱚᱨᱛᱮᱱᱤᱡ ᱦᱚᱸᱭ ᱧᱮᱞ ᱞᱮᱠᱷᱟᱱ ᱛᱚᱦᱚᱫ ᱜᱚᱫᱚᱜ ᱟᱭ ᱟᱨ ᱛᱟᱲᱟᱢ ᱞᱟᱸᱜᱟ ᱦᱚᱲᱢᱚ ᱦᱚᱸ ᱨᱟᱣᱟᱞ ᱜᱮ ᱟᱹᱭᱠᱟᱹᱣᱜᱼᱟ ᱾ᱱᱚ ᱜᱚᱭ ᱱᱚᱝᱠᱟ ᱜᱮ ᱮᱱᱮᱡ ᱥᱮᱨᱮᱧ ᱨᱮᱦᱚᱸ ᱵᱚᱱ ᱯᱟᱹᱨᱩᱠᱷᱤᱭᱟᱹ ᱜᱮᱭᱟ ᱾ ᱟᱵᱚ ᱛᱤᱨᱞᱟᱹ ᱦᱚᱯᱚᱱ ᱫᱤ ᱛᱮᱜᱮ ᱱᱤᱛ ᱦᱚᱸ ᱟᱵᱚᱣᱟᱜ ᱮᱱᱮᱡ ᱥᱮᱨᱮᱧ ᱫᱚ ᱵᱟᱧᱪᱟᱣ ᱢᱮᱱᱟᱜᱼᱟ ᱾ ᱪᱮᱫᱟᱜ ᱪᱮ ᱚᱱᱮ ᱵᱟᱞᱮ ᱜᱤᱫᱽᱨᱟᱹ ᱷᱚᱵᱚᱨ ᱠᱷᱚᱱ ᱜᱮ ᱮᱱᱮᱡ ᱥᱮᱨᱮᱧ ᱢᱟᱵᱚ ᱯᱟᱹᱨᱩᱠᱷ ᱮᱫ ᱠᱚ ᱜᱮᱭᱟ, ᱫᱤᱱᱤᱧᱼᱰᱩᱵᱟᱹᱝ ᱵᱷᱩᱞᱟᱹᱣ ᱮᱫ ᱠᱚᱣᱟ ᱵᱚᱱ ᱜᱤᱫᱽᱨᱟᱹ ᱛᱟᱵᱚᱱ ᱮᱱᱮᱡ ᱥᱮᱨᱮᱧ ᱟᱛᱮ ᱟᱨ ᱦᱚᱸ ᱪᱟᱸᱰᱚ ᱠᱚ ᱴᱷᱮᱱ ᱠᱷᱚᱱ ᱠᱚᱭ ᱜᱚᱫ ᱟᱠᱚᱣᱟ ᱵᱚᱱ ᱯᱟᱛᱲᱟ ᱫᱟᱠᱟ, ᱡᱤᱞ ᱩᱛᱩ ᱟᱨ ᱦᱚᱸᱵᱚᱱ ᱡᱟᱹᱯᱤᱫ ᱜᱚᱫ ᱠᱚᱣᱟ ᱱᱤᱫᱟᱹ ᱱᱤᱫᱟᱹ ᱡᱟᱹᱯᱤᱫ ᱜᱚᱫᱟᱭ ᱟᱭᱳ ᱫᱚ ᱡᱟᱹᱱᱩᱢ ᱨᱩᱠᱩ, ᱵᱟᱵᱟ ᱫᱚ ᱠᱟᱰᱟ ᱜᱩᱯᱤ ᱮᱢᱟᱱ ᱛᱮᱭᱟᱜ ᱥᱮᱨᱮᱧ ᱟᱛᱮ ᱾ ᱱᱚᱜᱼᱚᱭ ᱪᱚ ᱱᱚᱰᱮ ᱠᱷᱚᱱ ᱜᱮᱮ ᱦᱚᱵ ᱟᱠᱟᱱ ᱞᱟᱠᱪᱟᱨ ᱵᱟᱧᱪᱟᱣᱜ ᱨᱮᱭᱟᱜ ᱠᱟᱹᱢᱤᱦᱚᱨᱟ ᱢᱟ ᱾ ᱛᱤᱱᱟᱹᱜ ᱱᱟᱯᱟᱭ ᱥᱤᱨᱡᱚᱱ ᱥᱤᱥᱤᱨᱡᱟᱹᱣᱤᱡᱟᱜ ᱾
ᱞᱟᱜᱽᱬᱮ ᱟᱠᱷᱲᱟ ᱨᱮᱦᱚᱸ ᱮᱛᱚᱦᱚᱵ ᱨᱮᱫᱚ ᱛᱤᱨᱞᱟᱹ ᱜᱤᱫᱽᱨᱟᱹ ᱪᱮ ᱰᱟᱺᱜᱽᱣᱟᱹ ᱠᱩᱲᱤ ᱜᱤᱫᱽᱨᱟᱹ ᱜᱮ ᱥᱟᱹᱜᱩᱱ ᱥᱩᱯᱟᱹᱲᱤ ᱛᱮ ᱫᱟᱜ ᱟᱹᱜᱩ ᱠᱟᱛᱮ ᱠᱚ ᱜᱮᱡ ᱜᱩᱨᱤᱡ ᱚᱪᱚ ᱠᱚᱣᱟ, ᱪᱮᱫᱟᱜ ᱵᱟᱝ ᱢᱟ ᱚᱱᱟ ᱟᱠᱷᱲᱟ ᱨᱮ ᱫᱚ ᱵᱚᱸᱜᱟ ᱵᱳᱨᱳ ᱦᱚᱸᱠᱚ ᱥᱟᱹᱠᱷᱤ ᱥᱚᱵᱷᱟᱭᱟ ᱢᱮᱱᱛᱮ ᱟᱵᱚᱣᱟᱜ ᱥᱮᱫᱟᱭ ᱠᱷᱚᱱ ᱱᱤᱛ ᱫᱷᱟᱹᱵᱤᱡ ᱯᱟᱹᱛᱭᱟᱹᱣ ᱢᱮᱱᱟᱜ ᱛᱟᱵᱚᱱᱟ ᱾ ᱯᱟᱨᱟᱵᱽ ᱯᱩᱱᱟᱹᱭ ᱨᱮᱦᱚᱸ ᱛᱤᱨᱞᱟᱹ ᱠᱚᱫᱚ ᱮᱱᱮᱡ ᱥᱮᱨᱮᱧ ᱨᱮᱦᱚᱸ ᱵᱟᱵᱚᱱ ᱯᱟᱹᱪᱷᱟᱹᱠᱚᱜᱼᱟ ᱾ ᱜᱮᱡᱹ ᱜᱩᱨᱤᱡ, ᱵᱚᱸᱜᱟ ᱵᱳᱨᱳ, ᱤᱥᱤᱱᱼᱵᱟᱥᱟᱝ, ᱯᱩᱨᱟᱹᱣ ᱥᱟᱶᱛᱮ ᱥᱚᱦᱚᱨ ᱥᱮᱴᱮᱨ ᱜᱚᱫᱚᱜ ᱟᱵᱚᱱ ᱮᱱᱮᱡ ᱟᱠᱷᱲᱟ ᱛᱮ ᱾ ᱚᱱᱟ ᱥᱟᱶᱛᱮ ᱵᱟᱦᱟᱹ ᱥᱚᱦᱨᱟᱭ, ᱠᱟᱨᱟᱢ, ᱫᱚᱝ, ᱞᱟᱜᱽᱬᱮ ᱡᱚᱛᱚ ᱮᱱᱮᱡ ᱥᱮᱨᱮᱧ ᱨᱮᱜᱮ ᱵᱚᱱ ᱢᱟᱬᱟᱝ ᱠᱚᱜ ᱜᱮᱭᱟ ᱾ ᱪᱟᱥᱠ ᱟᱹᱢᱤ ᱠᱚᱨᱮ ᱦᱚᱸ ᱦᱮᱲᱦᱮᱫ ᱨᱚᱦᱚᱭ ᱛᱩᱞᱩᱡ ᱦᱚᱸ ᱟᱵᱚᱣᱟᱜ ᱞᱟᱸᱜᱟ ᱦᱚᱲᱢᱚ ᱯᱷᱟᱸᱰᱜᱟᱨ ᱞᱟᱹᱜᱤᱫ ᱥᱮᱨᱮᱧ ᱨᱟᱹᱲ ᱫᱚ ᱛᱟᱨᱠᱚᱜᱼᱟ ᱦᱳᱲᱳ ᱜᱟᱹᱪᱷᱤᱨᱮ ᱾
ᱛᱟᱨᱠᱚ ᱥᱩᱢᱩᱝ ᱫᱚ ᱵᱟᱝ ᱟᱵᱚ ᱥᱟᱶᱛᱟ ᱨᱮ ᱞᱟᱠᱪᱟᱨ ᱵᱟᱧᱪᱟᱣ ᱫᱚᱦᱚᱭ ᱞᱟᱹᱜᱤᱫ ᱜᱮ ᱛᱟᱨᱠᱚ ᱠᱟᱛᱮ ᱚᱱᱟ ᱫᱷᱟᱨᱟ ᱯᱟᱥᱮ ᱜᱚᱴᱟ ᱨᱟᱶᱟᱣᱚᱜ ᱠᱟᱱᱟ ᱾
ᱥᱤᱥᱤᱨᱡᱟᱹᱣᱤᱡᱟᱜ ᱥᱤᱨᱡᱚᱱ ᱛᱤᱱᱟᱹᱜ ᱥᱚᱨᱮᱥ ᱟᱨ ᱛᱤᱱᱟᱹᱜ ᱦᱟᱦᱟᱲᱟ ᱜᱮᱭᱟ ᱾ ᱚᱦᱚ ᱵᱚᱱ ᱵᱟᱰᱟᱭ ᱛᱤᱭᱩᱜ ᱫᱟᱲᱮᱭᱟᱜᱼᱟ ᱩᱱᱤᱭᱟᱜ ᱠᱟᱹᱨᱤᱠᱚᱞ ᱨᱮᱱᱟᱜ ᱟᱡᱚᱞ ᱵᱷᱮᱫᱽ ᱛᱮᱫ ᱾ ᱯᱤᱞᱪᱩ ᱦᱟᱲᱟᱢ ᱯᱤᱞᱪᱩ ᱵᱩᱰᱷᱤ ᱢᱮᱱᱛᱮ ᱱᱚᱶᱟ ᱞᱮᱻᱞᱮᱝᱜᱮᱫ ᱫᱷᱟᱹᱨᱛᱤ ᱯᱩᱨᱤ ᱨᱮ ᱚᱯᱮᱞ ᱠᱮᱫ ᱠᱤᱱᱟᱭ ᱦᱟᱸᱥ ᱦᱟᱺᱥᱞᱤ ᱠᱤᱱᱟᱜ ᱵᱤᱞᱤ ᱠᱷᱚᱱ ᱾ ᱟᱡᱟᱜ ᱩᱭᱦᱟᱹᱨ ᱫᱤᱥᱟᱹ ᱛᱟᱭ ᱛᱤᱱᱟᱹᱜ ᱢᱟᱦᱲᱟ ᱜᱮᱭᱟ ᱾ ᱩᱱᱠᱤᱱ ᱢᱤᱫ ᱠᱚᱲᱟ ᱢᱤᱫ ᱠᱩᱲᱤ ᱫᱷᱟᱹᱨᱛᱤ ᱨᱟᱪᱟ ᱨᱮ ᱟᱹᱠᱤᱱᱟᱜ ᱚᱠᱟ ᱚᱠᱟ ᱵᱷᱮᱜᱮᱫ ᱵᱮᱯᱮᱜᱮᱫ ᱵᱟᱰᱟᱭ ᱚᱪᱚ ᱠᱮᱫ ᱠᱤᱱᱟᱭ ᱾ ᱟᱡᱟᱜ ᱠᱷᱮᱞᱚᱸᱰ ᱨᱮᱱᱟᱜ ᱢᱩᱪᱟᱹᱫ ᱵᱟᱹᱱᱩᱜ, ᱧᱮᱞ ᱢᱮ ᱩᱱᱠᱤᱱ ᱢᱟᱱᱣᱟ ᱜᱮ ᱟᱹᱠᱷᱤᱨ ᱫᱤᱱ ᱞᱟᱹᱜᱤᱫ ᱥᱩᱠ ᱛᱮ ᱜᱷᱟᱨᱚᱸᱡᱽ ᱠᱤᱱ ᱪᱟᱞᱟᱣ ᱢᱟ ᱢᱮᱱᱛᱮ ᱚᱱᱟᱛᱮ ᱡᱩᱨᱤ ᱯᱟᱹᱨᱤ ᱠᱟᱫ ᱠᱤᱱᱟᱭ ᱾ ᱦᱚᱱ ᱦᱚᱯᱚᱱ ᱞᱟᱹᱜᱤᱫ ᱦᱚᱸ ᱥᱟᱜᱟᱜ ᱪᱟᱣᱞᱣ ᱨᱟᱹᱱᱩ ᱨᱟᱱ ᱨᱮᱱᱟᱜ ᱦᱟᱺᱰᱤ ᱤᱥᱤᱱ ᱠᱟᱛᱮ ᱦᱚᱨ ᱮ ᱩᱫᱩᱜᱟᱫ ᱠᱤᱱᱟ ᱾ ᱯᱤᱞᱪᱩ ᱜᱟᱬᱟ ᱠᱚᱦᱚᱸ ᱟᱹᱥᱩᱞ ᱟᱹᱯᱟᱹᱥᱩᱞ ᱞᱟᱹᱜᱤᱫ ᱚᱲᱟᱜ ᱫᱩᱣᱟᱹᱨ, ᱟᱹᱛᱩ ᱫᱤᱥᱚᱢ, ᱜᱟᱲ ᱵᱮᱱᱟᱣ ᱠᱟᱛᱮ ᱫᱚᱦᱚ ᱢᱤᱫᱩᱜ ᱴᱷᱟᱶ ᱮ ᱮᱢᱟᱫ ᱠᱚᱣᱟ ᱟᱨ ᱠᱚᱲᱟ ᱠᱚᱫᱚ ᱥᱮᱸᱫᱽᱨᱟ ᱞᱟᱹᱜᱤᱫ, ᱠᱩᱲᱤ ᱠᱚᱫᱚ ᱠᱟᱨᱠᱟ ᱞᱟᱹᱜᱤᱫ ᱦᱚᱨ ᱮ ᱩᱫᱩᱜᱟᱫ ᱠᱚᱣᱟ ᱾ ᱱᱚ ᱜᱚᱭ ᱩᱱ ᱠᱷᱚᱱ ᱜᱮ ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱠᱟᱹᱢᱤ ᱦᱚᱨᱟ ᱢᱟ ᱾ ᱚᱲᱟᱜ ᱫᱩᱣᱟᱹᱨ, ᱜᱤᱫᱽᱨᱟᱹ ᱯᱤᱫᱽᱨᱟᱹ ᱦᱟᱨᱟ ᱵᱩᱨᱩ, ᱪᱟᱥ ᱵᱟᱥ, ᱜᱷᱟᱨᱚᱸᱡᱽ ᱠᱟᱹᱢᱤ ᱥᱟᱶ ᱥᱟᱶ ᱛᱮᱜᱮ ᱵᱚᱸᱜᱟ ᱵᱳᱨᱳ, ᱫᱷᱚᱨᱚᱢ ᱠᱟᱹᱢᱤ ᱠᱚᱨᱮ ᱦᱚᱸ ᱛᱤᱨᱞᱟᱹ ᱦᱚᱯᱚᱱ ᱠᱚᱫᱚ ᱠᱚᱲᱟ ᱦᱚᱯᱚᱱ ᱥᱟᱶᱼᱥᱟᱶ ᱛᱮᱜᱮ ᱠᱟᱹᱢᱤ ᱫᱚᱠᱚ ᱛᱚᱨᱟᱣᱮᱫᱼᱟ ᱾ ᱚᱱᱟᱛᱮ ᱢᱮᱱ ᱜᱟᱱᱚᱜᱼᱟ, ᱞᱟᱠᱪᱟᱨ ᱵᱟᱧᱪᱟᱣ ᱨᱮ ᱛᱤᱨᱞᱟᱹ ᱦᱚᱯᱚᱱᱟᱜ ᱮᱱᱮᱢ ᱫᱚ ᱦᱟᱦᱟᱲᱟ ᱜᱮᱭᱟ ᱾
@@@
