ᱟᱛᱮᱱ ᱢᱮ ᱟᱢᱟᱜ ᱚᱱᱛᱚᱨ ᱨᱮ ᱟᱛᱮᱱ ᱢᱮ ᱟᱢᱟᱜ ᱢᱚᱱᱮ ᱪᱮᱫ ᱮ ᱞᱟᱹᱞᱟᱹᱭ ᱠᱟᱱᱟ, ᱟᱛᱮᱱ ᱢᱮ ᱟᱢᱟᱜ ᱡᱤᱣᱤ ᱪᱮᱫ ᱮ ᱠᱷᱚᱡᱚᱜ ᱠᱟᱱᱟ ᱾
ᱞᱟᱦᱟᱭ ᱢᱮ ᱯᱟᱹᱣᱲᱤ ᱞᱟᱦᱟ ᱥᱮᱫ ᱟᱞᱚᱢ ᱯᱟᱹᱪᱷᱞᱟᱹ ᱨᱩᱣᱟᱹᱲᱟ, ᱟᱢ ᱫᱚ ᱛᱤᱨᱞᱟᱹ ᱵᱟᱢ ᱱᱟᱪᱟᱨᱟ, ᱟᱛᱮᱱ ᱢᱮ ᱟᱢᱟᱜ ᱚᱱᱛᱚᱨ ᱡᱤᱣᱤ ᱪᱮᱫ ᱮ ᱞᱟᱹᱞᱟᱹᱭ ᱠᱟᱱᱟ?
ᱢᱮᱢᱮᱱ ᱠᱟᱱᱟᱭ ᱟᱢ ᱦᱚᱸᱢ ᱢᱟᱹᱱᱢᱤ ᱠᱟᱱ ᱪᱮᱫ ᱛᱮᱦᱚᱸ ᱵᱟᱢ ᱠᱷᱟᱴᱚ ᱜᱮᱭᱟ ᱟᱞᱚᱢ ᱵᱚᱛᱚᱨᱚᱜᱼᱟ, ᱟᱞᱚᱢ ᱢᱚᱠᱚᱧᱚᱜᱼᱟ ᱢᱚᱱᱮ ᱩᱨᱤᱡ ᱠᱟᱛᱮ ᱠᱟᱹᱢᱤ ᱢᱮ ᱢᱤᱫ ᱫᱤᱱ ᱟᱢᱮᱢ ᱡᱤᱛᱠᱟᱹᱨᱚᱜ ᱜᱮᱭᱟ ᱾
ᱟᱢ ᱞᱚᱥᱟᱜ ᱞᱟᱹᱜᱤᱫ ᱞᱟᱞᱚᱪᱤᱭᱟᱹ ᱫᱟᱹᱱᱢᱤ ᱯᱟᱹᱥᱤ ᱠᱚ ᱚᱰᱟᱣ ᱟᱠᱟᱫᱟ ᱥᱚᱱᱛᱚᱨᱚᱜ ᱢᱮ ᱢᱮᱫ ᱞᱩᱛᱩᱨ ᱛᱮ ᱦᱩᱥᱤᱭᱟᱹᱨ ᱛᱟᱦᱮᱸᱱ ᱢᱮ, ᱢᱚᱱᱮ ᱡᱤᱣᱤ ᱠᱮᱴᱮᱡᱽ ᱛᱟᱢ ᱾
ᱥᱤᱛᱟᱹ ᱞᱮᱠᱟ ᱟᱢ ᱦᱚᱸ ᱠᱚᱞᱚᱝᱠᱚ ᱠᱚ ᱮᱢᱟᱢᱟ, ᱫᱽᱨᱚᱯᱚᱫᱤ ᱞᱮᱠᱟ ᱟᱢ ᱦᱚᱸ ᱞᱩᱜᱽᱲᱤ ᱠᱚ ᱜᱚᱦᱚᱲ ᱵᱷᱟᱺᱫᱩᱲ ᱛᱟᱢᱟ, ᱞᱮᱞᱦᱟ ᱧᱟᱢ ᱠᱟᱛᱮ ᱞᱤᱪᱟᱹᱲ ᱢᱚᱱᱮ ᱠᱟᱛᱮ ᱧᱤᱫᱟᱹ ᱥᱟᱲᱟ ᱥᱟᱹᱛᱤᱱ ᱠᱮᱨᱚᱥᱤᱱ ᱫᱩᱞ ᱠᱟᱛᱮ ᱥᱮᱸᱜᱮᱞ ᱠᱚ ᱡᱩᱸᱰᱤ ᱟᱢᱟ ᱾ ᱟᱢᱟᱜ ᱢᱚᱪᱟ ᱵᱚᱱᱫᱚᱭ ᱞᱟᱹᱜᱤᱫ ᱟᱢ ᱠᱚ ᱟᱛᱟᱨ ᱛᱚᱨᱚᱡ ᱢᱮᱭᱟ, ᱟᱛᱮᱱ ᱢᱮ ᱢᱟ ᱟᱢᱟᱜ ᱚᱱᱛᱚᱨ ᱟᱛᱢᱟ ᱞᱮᱞᱮᱭ ᱠᱟᱱᱟ ᱮᱱ ᱦᱚᱸ ᱟᱞᱚᱢ ᱵᱚᱛᱚᱨᱚᱜᱼᱟ ᱾
ᱵᱮᱱᱟᱣᱜ ᱢᱮ ᱟᱢ ᱦᱚᱸ ᱨᱟᱝᱠᱤᱱᱤ ᱠᱟᱹᱞᱤ ᱢᱟᱹᱭ ᱥᱟᱵ ᱡᱚᱝ ᱢᱮ ᱦᱟᱹᱛᱤᱭᱟᱹᱨ ᱫᱮᱭᱟᱭ ᱢᱮ ᱵᱚᱨ ᱵᱚᱛᱚᱨ ᱞᱟᱡᱟᱣ ᱥᱚᱨᱚᱢ ᱾
ᱢᱤᱫ ᱜᱷᱤᱨᱤᱭᱟᱹ ᱛᱮ ᱛᱚᱯᱟᱜᱽ ᱢᱮ ᱞᱟᱞᱚᱪᱤᱭᱟᱹ ᱢᱟᱹᱱᱢᱤᱭᱟᱜ ᱦᱚᱴᱚᱜ ᱞᱚᱞᱚ ᱢᱟᱭᱟᱢ ᱛᱮ ᱛᱳᱯᱳ ᱟᱬᱜᱚᱱ ᱢᱮ ᱪᱷᱤᱢ ᱪᱷᱟᱹᱛᱩᱨ ᱠᱟᱛᱮ ᱪᱷᱤᱛᱤᱭᱟᱹᱣ ᱠᱟᱜ ᱢᱮ ᱞᱟᱞᱚᱪᱤᱭᱟᱹ ᱢᱟᱹᱱᱢᱤᱭᱟᱜ ᱦᱚᱲᱢᱚ ᱡᱤᱣᱤ ᱾
ᱮᱱᱠᱷᱟᱱ ᱡᱩᱫᱤ ᱦᱟᱹᱯᱤᱫ ᱠᱚᱜᱼᱟ ᱛᱤᱨᱞᱟᱹ ᱪᱮᱛᱟᱱ ᱱᱟᱦᱟᱪᱟᱨ ᱫᱷᱚᱨᱥᱚᱱ, ᱜᱚᱡ, ᱟᱛᱟᱨ ᱛᱚᱨᱚᱡ, ᱟᱛᱮᱱ ᱢᱮ ᱢᱟ ᱚᱱᱛᱚᱨ ᱡᱤᱣᱤ ᱞᱟᱹᱞᱟᱹᱭ ᱠᱟᱱᱟ ᱮᱵᱷᱮᱱᱚᱜ ᱢᱮ, ᱪᱮᱸᱜᱷᱟᱜ ᱢᱮ ᱦᱩᱥᱤᱭᱟᱹᱨᱚᱜ ᱢᱮ ᱥᱟᱢᱟᱝ ᱥᱮᱫ ᱯᱟᱹᱣᱲᱤ ᱞᱟᱦᱟᱭ ᱢᱮ ᱾
***
