ᱱᱟᱦᱟᱜ ᱦᱩᱞ ᱢᱟᱦᱟᱸ ᱢᱟᱱᱟᱣ

ᱦᱟᱱᱮ ᱠᱚᱭᱚᱜᱽ ᱢᱮᱥᱮ ᱦᱚᱯᱚᱱ ᱢᱟ.ᱭ
ᱦᱤᱯᱤᱲ ᱦᱤᱯᱤᱲ ᱚᱴᱟᱝᱚᱜ ᱠᱟᱱᱟ
ᱥᱟᱱᱛᱟᱲ ᱦᱩᱞ ᱨᱮᱭᱟᱜ ᱯᱷᱩᱨᱜᱟᱹᱞ ᱪᱤᱨ,
ᱢᱮᱱᱠᱷᱟᱱ ᱱᱤᱛ ᱦᱚᱸ ᱯᱷᱩᱨᱜᱟᱹᱞ ᱫᱚ
ᱵᱟ.ᱧ ᱟ.ᱭᱠᱟᱹᱣ ᱞᱮᱫᱟ ᱢᱚᱱᱮ-ᱡᱤᱣᱤᱨᱮ
ᱮᱱ ᱦᱚᱸ ᱢᱤᱱᱟ.ᱧ ᱜᱮᱭᱟ ᱪᱮᱫᱟᱜ ᱛᱷᱤᱨ ?

ᱱᱟᱦᱟᱜ ᱦᱩᱞ ᱢᱟᱦᱟᱸ ᱢᱟᱱᱟᱣ ᱫᱚ
ᱢᱤᱫᱴᱟᱹᱝ ᱯᱚᱨᱚᱵᱽ ᱨᱮᱭᱟᱜ ᱚᱡᱮ ᱠᱟᱱᱟ,
ᱵᱟᱰᱟᱭ ᱵᱟ.ᱱᱩᱜ-ᱟ ᱦᱩᱞ ᱫᱚ ᱪᱮᱫ ᱠᱟᱱᱟ,
ᱚᱱᱟᱛᱮ ᱜᱮ ᱛᱚ ᱟᱫᱚᱢ ᱴᱚᱴᱷᱟ ᱠᱚ ᱨᱮ
ᱵᱟᱦᱟ–ᱥᱚᱦᱨᱟᱭ ᱯᱚᱨᱚᱵᱽ ᱞᱮᱠᱟ
ᱟ.ᱭᱠᱟ.ᱣ ᱟᱛᱮᱜ DJ ᱠᱚ ᱮᱱᱮᱡ ᱠᱟᱱᱟ ᱾

ᱟᱫᱚᱢ ᱥᱤᱠᱱᱟ.ᱛ ᱦᱚᱲ ᱦᱚᱸ ᱦᱩᱞ ᱫᱚ
ᱟ.ᱰᱤ ᱦᱩᱰᱤᱧ ᱜᱷᱚᱴᱚᱱᱟ ᱢᱮᱱ ᱠᱟᱛᱮᱫ
ᱮᱴᱟᱜ ᱡᱟ.ᱛᱤ ᱥᱟᱶ ᱦᱳᱞᱤ ᱰᱮ ᱠᱚ ᱢᱟᱱᱟᱣᱟ,
ᱵᱟᱝ ᱫᱚ ᱟᱠᱚᱣᱟᱜ ᱵᱟᱰᱟᱭ ᱨᱮᱱᱟᱜ
ᱥᱟᱱᱟ ᱢᱮᱱᱟᱜ ᱛᱟᱠᱚᱣᱟ ᱢᱚᱱᱮᱛᱮ
ᱟᱨ ᱵᱟᱝ ᱫᱚ ᱯᱚᱝᱲᱟ ᱠᱚ ᱥᱮᱲᱟ ᱟᱠᱚᱣᱟ ᱾

ᱟᱫᱚᱢ ᱨᱟᱡᱽᱟ.ᱨᱤ ᱱᱮᱛᱟ ᱠᱚ ᱦᱚᱸ
ᱥᱟᱱᱛᱟᱲ ᱦᱩᱞ ᱨᱮᱭᱟᱜ ᱱᱟᱜᱟᱢ ᱫᱚ
ᱵᱟᱝ ᱵᱟᱰᱟᱭ ᱛᱮᱜᱮ ᱟ.ᱛᱷᱟ.ᱣᱲᱤ ᱨᱚᱲᱟ,
ᱚᱠᱚᱭ ᱫᱚ ᱦᱩᱞ ᱥᱮᱨᱢᱟᱭ ᱦᱤᱲᱤᱧ ᱠᱷᱟᱱ,
ᱟᱨ ᱦᱚᱸ ᱚᱠᱚᱭ ᱫᱚ ᱦᱩᱞᱜᱟ.ᱨᱤᱭᱟ. ᱧᱩᱛᱩᱢ,
ᱢᱩᱲᱩᱛ ᱠᱟᱛᱷᱟ ᱫᱮᱭᱟ ᱠᱟᱛᱮᱫ
ᱨᱟᱡᱽᱟ.ᱨᱤ ᱠᱟᱛᱷᱟ ᱠᱚ ᱨᱚᱲᱟ ᱾᱾

ᱚᱠᱚᱭ ᱪᱮᱠᱟᱛᱮᱢ ᱵᱩᱡᱷᱟ.ᱣᱟᱭᱟ
ᱥᱟᱱᱛᱟᱲ ᱦᱩᱞ ᱫᱚ ᱟᱵᱚᱣᱟᱜ ᱦᱚᱠ,
ᱚᱛ- ᱦᱟᱥᱟ, ᱵᱤᱨ-ᱵᱩᱨᱩ ᱵᱟᱧᱪᱟᱣ,
ᱵᱤᱨᱵᱟᱱᱴᱟ- ᱦᱩᱞᱜᱟ.ᱨᱤᱭᱟ. ᱠᱚ ᱪᱮᱛᱟᱱ
ᱦᱩᱭ ᱞᱮᱱ ᱱᱟᱦᱟᱪᱟᱨ, ᱚᱱᱟ ᱠᱷᱚᱱ ᱵᱟᱧᱪᱟᱣ
ᱞᱟᱹᱜᱤᱫ ᱞᱟ.ᱲᱦᱟᱹᱭ ᱞᱮᱫᱟ ᱠᱚ ᱤᱝᱨᱮᱡᱽ ᱥᱟᱶ ᱾᱾

ᱱᱤᱛᱚᱜ ᱵᱟᱵᱚᱱ ᱵᱩᱡᱷᱟᱹᱣ ᱞᱮᱠᱷᱟᱱ
ᱟᱵᱳ-ᱟᱵᱳ ᱜᱮᱵᱚᱱ ᱛᱟᱯᱟᱢ
ᱫᱤᱠᱩ ᱥᱟᱶ ᱥᱚᱞᱚᱢ-ᱞᱚᱴᱚᱢ ᱛᱟᱸᱦᱮ ᱠᱟᱛᱮᱫ
ᱡᱩᱢᱤᱫ ᱫᱟᱲᱮ ᱛᱟᱵᱚᱱ ᱫᱷᱟᱥᱟᱣᱚᱜ–ᱟ,
ᱚᱛ-ᱦᱟᱥᱟ ᱵᱚᱱ ᱨᱮᱡ ᱚᱪᱚᱜ ᱠᱟᱱᱟ,
ᱟᱨ ᱦᱚᱸ ᱵᱚᱱ ᱥᱤᱵᱳᱲ ᱚᱪᱚᱜ ᱠᱟᱱᱟ
ᱨᱟᱡᱽᱟ.ᱨᱤ ᱨᱮᱭᱟᱜ ᱵᱟ.ᱲᱤᱡ ᱚᱨᱥᱚᱝ ᱛᱮ
ᱫᱤᱠᱩ ᱥᱟᱶ ᱢᱮᱥᱟ ᱠᱟᱛᱮ ᱢᱟᱭᱟᱢ ᱦᱟ.ᱴᱤᱧ
ᱵᱚᱭᱦᱟ ᱥᱟᱶ ᱵᱚᱱ ᱢᱟᱯᱟᱜ–ᱜᱚᱯᱚᱡ ᱠᱟᱱᱟ ᱾

ᱟᱫᱚᱢ ᱥᱟᱱᱛᱟᱲ ᱦᱚᱯᱚᱱ ᱠᱚ ᱦᱚᱦᱚᱭᱟ
ᱫᱚᱥᱟᱨ ᱦᱩᱞ ᱞᱟᱹᱜᱤᱫ ᱥᱟᱯᱲᱟᱣᱚᱜ
ᱟᱫᱚᱢ ᱫᱚ ᱠᱚ ᱢᱮᱢᱮᱱ ᱠᱟᱱᱟ ᱪᱮᱫ ᱦᱩᱭᱩᱜ-ᱟ
ᱠᱷᱟ.ᱯᱟ.ᱨᱤ-ᱛᱟᱯᱟᱢ ᱠᱟᱛᱮ, ᱫᱤᱠᱩ ᱥᱟᱶ ?
ᱟᱵᱳ ᱥᱟᱱᱛᱟᱲᱟᱜ ᱡᱩᱢᱤᱫ ᱜᱮ ᱛᱚ ᱵᱟᱹᱱᱩᱜ-ᱟ
ᱪᱤᱠᱟᱹᱛᱮ ᱫᱚᱢ ᱫᱟᱲᱮᱜ-ᱟ ᱫᱤᱠᱩ ᱥᱟᱶ?

ᱰᱷᱤᱝᱠᱤ ᱵᱩᱴᱟᱹᱢ ᱥᱮᱱᱚᱜ ᱨᱮᱥᱮ
ᱞᱳᱵᱳᱜ-ᱠᱷᱳᱫᱮ ᱫᱚᱢ ᱧᱟᱢᱟ
ᱡᱩᱢᱤᱫ ᱟᱠᱷᱲᱟᱨᱮᱢ ᱥᱮᱴᱮᱨᱚᱜ ᱨᱮᱥᱮ
ᱞᱟ.ᱲᱦᱟ.ᱭ ᱨᱮᱭᱟᱜ ᱫᱟᱲᱮ ᱫᱚᱢ ᱧᱟᱢᱟ ᱾᱾

***
— ᱠᱚᱵᱤᱛᱟ ᱦᱮᱢᱵᱽᱨᱚᱢ