ᱟᱢᱮᱨᱤᱠᱟ ᱫᱤᱥᱚᱢ ᱨᱮ ᱟᱭᱳ ᱠᱚᱣᱟᱜ ᱩᱭᱦᱟᱹᱨ ᱥᱟᱹᱨᱤ ᱜᱮ ᱟᱹᱰᱤ ᱥᱚᱨᱮᱥᱟ ᱾ ᱠᱟᱹᱢᱤ ᱠᱟᱹᱥᱱᱤ ᱠᱚᱨᱮ, ᱜᱮᱭᱟᱱ-ᱥᱮᱭᱟᱱ ᱠᱚᱨᱮ ᱢᱚᱱᱮ ᱡᱩᱛ ᱠᱟᱛᱮ ᱟᱹᱠᱤᱞ ᱟᱨ ᱱᱟᱯᱟᱭ ᱧᱟᱢᱚᱜ-ᱟ ᱾ ᱜᱷᱟᱨᱚᱸᱡᱽ ᱟᱨ ᱜᱤᱫᱽᱨᱟᱹ ᱠᱚᱣᱟᱜ ᱵᱷᱚᱵᱤᱥᱚᱛ ᱧᱮᱞ ᱨᱮᱱᱟᱜ ᱦᱚᱨᱟ ᱵᱚᱫᱚᱞ ᱮᱱᱟ ᱾ ᱫᱤᱱᱟᱹᱢ ᱤᱧ ᱱᱟᱶᱟ ᱠᱟᱛᱷᱟ ᱠᱚᱧ ᱪᱮᱫ ᱮᱫᱟ ᱾ ᱡᱟᱹᱥᱛᱤ ᱫᱷᱟᱣ ᱟᱵᱚ ᱠᱟᱹᱢᱤ ᱟᱨ ᱜᱷᱟᱨᱚᱸᱡᱽ ᱨᱮᱱᱟᱜ ᱫᱟᱹᱭᱤᱛᱚ ᱛᱮ ᱟᱹᱰᱤ ᱵᱮᱥᱛᱚ ᱵᱚᱱ ᱛᱟᱦᱮᱱᱟ, ᱟᱨ ᱠᱟᱹᱴᱤᱡ ᱠᱟᱹᱴᱤᱡ ᱨᱟᱹᱥᱠᱟᱹ ᱚᱠᱛᱚ ᱠᱚ ᱵᱚᱱ ᱦᱤᱲᱤᱧ ᱮᱫᱟ ᱾ ᱦᱟᱯᱛᱟ ᱨᱮᱱᱟᱜ ᱪᱷᱩᱴᱤ ᱫᱚ ᱜᱷᱟᱨᱚᱸᱡᱽ ᱨᱮᱱᱟᱜ ᱠᱟᱹᱴᱤᱡ ᱠᱟᱹᱴᱤᱡ ᱠᱟᱹᱢᱤ ᱞᱟᱹᱜᱤᱫ ᱜᱮ ᱾ ᱦᱩᱰᱤᱧ ᱮᱱ ᱟᱨᱵᱟᱝ ᱢᱟᱨᱟᱝ ᱮᱱ, ᱠᱟᱹᱢᱤ ᱫᱚ ᱠᱟᱹᱢᱤ ᱜᱮᱭᱟ ᱾ ᱵᱟᱹᱲᱛᱤᱠᱟᱭ ᱛᱮ ᱤᱧ ᱡᱟᱶᱟᱭ ᱜᱮ ᱟᱞᱮ ᱵᱮᱴᱟ ᱯᱷᱩᱴᱵᱚᱞ ᱯᱨᱟᱠᱴᱤᱥ ᱟᱨ ᱢᱮᱪ ᱨᱮᱭ ᱤᱫᱤ ᱮᱭᱟ, ᱪᱮᱫᱟᱜ ᱥᱮ ᱤᱧ ᱪᱟᱞᱟᱣ ᱞᱟᱹᱜᱤᱫ ᱚᱠᱛᱚ ᱵᱟᱹᱧ ᱧᱟᱢᱮᱫ-ᱟ ᱾ ᱢᱮᱱᱠᱷᱟᱱ ᱤᱱᱟᱹ ᱦᱤᱞᱚᱜ ᱤᱧ ᱩᱱᱤ ᱠᱷᱮᱞ ᱠᱟᱱ ᱧᱮᱞ ᱞᱟᱹᱜᱤᱫ ᱤᱧ ᱴᱷᱟᱹᱣᱠᱟᱹ ᱠᱮᱫ-ᱟ ᱾ ᱚᱱᱟ ᱫᱤᱱ ᱤᱧ ᱯᱷᱩᱴᱵᱚᱞ ᱢᱟᱴ ᱛᱮᱧ ᱪᱟᱞᱟᱣ ᱮᱱᱟ ᱾ ᱨᱟᱹᱥᱠᱟᱹ ᱛᱮ ᱤᱧᱤᱡ ᱵᱮᱴᱟᱭ ᱠᱷᱮᱞ ᱠᱟᱱ ᱨᱮᱭᱟᱜ ᱤᱧ ᱧᱮᱞ ᱠᱮᱫᱮᱭᱟ, ᱩᱱ ᱚᱠᱛᱚ ᱤᱧᱟᱜ ᱢᱚᱱᱮ ᱨᱮ ᱟᱹᱰᱤ ᱜᱚᱨᱚᱵᱽ ᱟᱨ ᱥᱟᱨᱦᱟᱣ ᱦᱮᱡ ᱮᱱᱟ ᱾ ᱤᱧᱤᱧ ᱵᱩᱡᱷᱟᱹᱣ ᱠᱮᱫ-ᱟ ᱡᱮ ᱟᱭᱳ-ᱵᱟᱵᱟ ᱠᱚ ᱜᱤᱫᱽᱨᱟᱹ ᱥᱟᱶ ᱚᱠᱛᱚ ᱠᱷᱮᱢᱟᱣ ᱫᱚ ᱟᱹᱰᱤ ᱜᱮ ᱞᱟᱹᱠᱛᱤᱭᱟ ᱾
ᱢᱤᱫᱴᱟᱹᱝ ᱡᱤᱱᱤᱥ ᱡᱟᱦᱟᱸ ᱤᱧ ᱟᱹᱰᱤ ᱜᱮᱭ ᱢᱩᱦᱤᱛ ᱠᱤᱫᱤᱧᱟ, ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ, ᱟᱢᱮᱨᱤᱠᱟ (USA) ᱨᱮᱱᱟᱜ ᱡᱚᱛᱚ ᱵᱟᱡᱟᱨ ᱨᱮᱜᱮ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱟᱹᱰᱤ ᱜᱟᱱ ᱯᱷᱩᱴᱵᱚᱞ ᱴᱟᱺᱰᱤ ᱟᱨ ᱮᱱᱮᱡ ᱡᱟᱭᱜᱟ ᱠᱚ ᱢᱮᱱᱟᱜᱼᱟ ᱾ ᱚᱱᱟ ᱴᱟᱺᱰᱤ ᱠᱚᱫᱚ ᱟᱹᱰᱤ ᱥᱟᱯᱷᱟ ᱟᱨ ᱱᱟᱯᱟᱭ ᱛᱮ ᱫᱚᱦᱚ ᱮᱥᱮᱫ ᱟᱠᱟᱱᱟ ᱾ ᱛᱟᱥᱟᱫ ᱠᱚᱫᱚ ᱦᱟᱹᱨᱤᱭᱟᱹᱲ ᱟᱨ ᱞᱟᱹᱵᱤᱫ ᱜᱮᱭᱟ ᱾ ᱴᱟᱺᱰᱤ ᱟᱰᱮᱯᱟᱥᱮ ᱨᱮ ᱪᱚᱨᱚᱠ ᱪᱚᱨᱚᱠ ᱫᱟᱨᱮ, ᱵᱟᱦᱟ ᱟᱨ ᱛᱟᱲᱟᱢ ᱦᱚᱨ ᱠᱚ ᱢᱮᱱᱟᱜᱼᱟ ᱾ ᱰᱟᱦᱟᱨ ᱠᱚᱫᱚ ᱥᱟᱯᱷᱟ ᱜᱮᱭᱟ, ᱜᱟᱹᱰᱤ ᱫᱚᱦᱚ ᱡᱟᱭᱜᱟ ᱠᱚ ᱥᱟᱡᱟᱣ ᱟᱠᱟᱱᱟ, ᱟᱨ ᱡᱚᱛᱚᱣᱟᱜ ᱜᱮ ᱥᱟᱯᱷᱟ ᱟᱨ ᱥᱟᱹᱱᱛᱤ ᱜᱮ ᱧᱮᱞᱚᱜᱼᱟ ᱾
ᱡᱚᱛᱚ ᱩᱢᱮᱨ ᱨᱤᱱ ᱜᱤᱫᱽᱨᱟᱹ ᱠᱚ ᱚᱸᱰᱮ ᱠᱚ ᱮᱱᱮᱡᱼᱟ ᱾ ᱠᱟᱹᱴᱤᱡ ᱜᱤᱫᱽᱨᱟᱹ, ᱡᱩᱣᱟᱹᱱ, ᱠᱩᱲᱤ ᱟᱨ ᱠᱚᱲᱟ ᱜᱤᱫᱽᱨᱟᱹ ᱡᱚᱛᱚ ᱢᱤᱫ ᱛᱮᱠᱚ ᱮᱱᱮᱡᱼᱟ ᱾ ᱠᱳᱪ (Coaches) ᱠᱚ ᱩᱱᱠᱩ ᱯᱷᱩᱴᱵᱚᱞ, ᱢᱤᱫ ᱛᱮ ᱠᱟᱹᱢᱤ, ᱱᱤᱭᱚᱢ ᱟᱨ ᱢᱟᱹᱱ ᱮᱢᱚᱜ ᱠᱚ ᱪᱮᱫ ᱟᱠᱚᱣᱟ ᱾ ᱡᱚᱛᱚ ᱦᱟᱯᱛᱟ ᱢᱩᱪᱟᱹᱫ (weekend) ᱨᱮ ᱟᱭᱳ-ᱵᱟᱵᱟ ᱟᱨ ᱧᱮᱞᱟᱦᱟ ᱠᱚ ᱜᱤᱫᱽᱨᱟᱹ ᱠᱚ ᱜᱚᱲᱚ ᱟᱠᱚ ᱞᱟᱹᱜᱤᱫ ᱠᱚ ᱦᱤᱡᱩᱜᱼᱟ ᱾ ᱠᱟᱹᱭᱼᱢᱤᱫ ᱠᱚᱫᱚ ᱢᱟᱹᱪᱤ, ᱡᱚᱢᱟᱜ ᱟᱨ ᱫᱟᱜ ᱵᱚᱛᱚᱞ ᱠᱚ ᱟᱹᱜᱩᱭᱟ ᱾ ᱜᱷᱟᱨᱚᱸᱡᱽ ᱨᱤᱱ ᱦᱚᱲ ᱢᱤᱫ ᱴᱷᱮᱱ ᱫᱩᱲᱩᱵ ᱠᱟᱛᱮ ᱡᱚᱛᱚ ᱜᱤᱫᱽᱨᱟᱹ ᱞᱟᱹᱜᱤᱫ ᱠᱚ ᱨᱟᱹᱥᱠᱟᱹᱭᱟ ᱾ ᱜᱚᱲᱚᱢ ᱦᱟᱲᱟᱢ, ᱜᱚᱲᱚᱢ ᱵᱩᱰᱷᱤ, ᱟᱭᱳ, ᱵᱟᱵᱟ ᱟᱨ ᱦᱟᱨᱟ ᱵᱩᱨᱩ ᱟᱠᱟᱫ ᱠᱚ ᱟᱭᱳ-ᱵᱟᱵᱟ ᱡᱚᱛᱚ ᱜᱮ ᱮᱱᱮᱡ ᱧᱮᱞ ᱠᱚ ᱦᱤᱡᱩᱜᱼᱟ ᱾
ᱤᱧᱟᱜ ᱢᱚᱱᱮ ᱡᱟᱦᱟᱸ ᱡᱤᱱᱤᱥ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱪᱷᱟᱸᱫᱟ ᱠᱤᱫᱤᱧᱟᱭ, ᱚᱱᱟ ᱫᱚ ᱦᱩᱭᱩᱜ ᱠᱟᱱᱟ ᱚᱸᱰᱮ ᱫᱚ ᱫᱷᱚᱨᱚᱢ, ᱡᱟᱹᱛᱤ ᱟᱨ ᱴᱟᱠᱟ-ᱯᱩᱭᱥᱟᱹ ᱨᱮᱱᱟᱜ ᱠᱟᱛᱷᱟ ᱚᱠᱚᱭ ᱦᱚᱸ ᱵᱟᱠᱚ ᱵᱷᱟᱹᱵᱤᱭᱟ ᱾ ᱯᱩᱸᱰ ᱜᱤᱫᱽᱨᱟᱹ, ᱦᱮᱸᱫᱮ ᱜᱤᱫᱽᱨᱟᱹ, ᱮᱥᱤᱭᱟᱱ (Asian) ᱜᱤᱫᱽᱨᱟᱹ ᱟᱨ ᱟᱹᱰᱤ ᱜᱟᱱ ᱡᱟᱭᱜᱟ ᱨᱤᱱ ᱜᱤᱫᱽᱨᱟᱹ ᱠᱚ ᱢᱤᱫ ᱛᱮ ᱨᱟᱹᱥᱠᱟᱹ ᱛᱮᱠᱚ ᱮᱱᱮᱡᱼᱟ ᱾ ᱠᱤᱥᱟᱹᱬ ᱵᱷᱮᱜᱮᱫ ᱟᱨᱵᱟᱝ ᱫᱷᱚᱨᱚᱢ ᱧᱮᱞ ᱠᱟᱛᱮ ᱚᱠᱚᱭ ᱦᱚᱸ ᱵᱟᱠᱚ ᱠᱷᱟᱴᱚ ᱠᱚᱣᱟ ᱾ ᱜᱤᱫᱽᱨᱟᱹ ᱠᱚᱣᱟᱜ ᱠᱮᱴᱮᱡ ᱠᱩᱨᱩᱢᱩᱴᱩ, ᱱᱤᱭᱚᱢ, ᱢᱤᱫ ᱛᱮ ᱠᱟᱹᱢᱤ ᱟᱨ ᱛᱟᱹᱠᱤᱫ ᱞᱟᱹᱜᱤᱫ ᱜᱮ ᱢᱟᱹᱱ ᱠᱚ ᱧᱟᱢᱟ ᱾
ᱦᱚᱲ ᱠᱚ ᱦᱚᱸ ᱟᱠᱚᱣᱟᱜ ᱟᱰᱮᱯᱟᱥᱮ ᱥᱟᱯᱷᱟ ᱠᱚ ᱫᱚᱦᱚᱭᱟ ᱾ ᱩᱱᱠᱩ ᱚᱡᱽᱨᱟ ᱰᱩᱞᱤ (garbage bins) ᱠᱚ ᱵᱮᱵᱷᱟᱨᱟ, ᱜᱟᱹᱰᱤ ᱪᱟᱞᱟᱣ ᱨᱮᱱᱟᱜ ᱱᱤᱭᱚᱢ ᱠᱚ ᱢᱟᱱᱟᱣᱟ, ᱟᱨ ᱦᱚᱲ ᱥᱟᱱᱟᱢ ᱡᱟᱭᱜᱟ ᱠᱚ ᱡᱚᱛᱚᱱᱟ ᱾ ᱜᱤᱫᱽᱨᱟᱹ ᱠᱚ ᱠᱟᱹᱴᱤᱡ ᱩᱢᱮᱨ ᱠᱷᱚᱱ ᱜᱮ ᱱᱚᱣᱟ ᱠᱚ ᱱᱟᱯᱟᱭ ᱦᱮᱣᱟ ᱠᱚ ᱪᱮᱫᱚᱜᱼᱟ ᱾ ᱱᱚᱣᱟ ᱫᱚ ᱩᱱᱠᱩ ᱥᱟᱶᱛᱟ ᱞᱟᱹᱜᱤᱫ ᱵᱷᱟᱹᱨᱤᱭᱟᱹ ᱟᱨ ᱢᱟᱹᱱ ᱮᱢᱚᱜ ᱮ ᱪᱮᱫ ᱟᱠᱚᱣᱟ ᱾
ᱮᱱᱮᱡ ᱧᱮᱞ ᱛᱩᱞᱩᱡ, ᱤᱧ ᱡᱚᱭᱯᱟᱞ ᱥᱤᱝ ᱢᱩᱱᱰᱟ (Jaipal Singh Munda) ᱟᱜ ᱠᱟᱛᱷᱟᱧ ᱩᱭᱦᱟᱹᱨ ᱠᱮᱫᱼᱟ, ᱡᱟᱦᱟᱸᱭ ᱫᱚ ᱚᱞᱤᱢᱯᱤᱠ ᱨᱮ ᱵᱷᱟᱨᱚᱛ ᱫᱤᱥᱚᱢ ᱮ ᱜᱚᱨᱚᱡᱽ ᱟᱫ ᱛᱟᱦᱮᱸᱫ ᱾ ᱤᱧᱤᱧ ᱵᱷᱟᱹᱵᱤ ᱠᱮᱫᱼᱟ ᱡᱮ ᱟᱵᱚ ᱨᱤᱱ ᱜᱤᱫᱽᱨᱟᱹ ᱠᱚ ᱴᱷᱮᱱ ᱦᱚᱸ ᱫᱤᱥᱚᱢ ᱨᱮᱱᱟᱜ ᱧᱩᱛᱩᱢ ᱨᱟᱠᱟᱵ ᱞᱟᱹᱜᱤᱫ ᱜᱩᱱ ᱟᱨ ᱫᱟᱲᱮ ᱢᱮᱱᱟᱜᱼᱟ ᱾ ᱮᱴᱠᱮᱴᱚᱬᱮ ᱫᱚ ᱜᱩᱱ ᱨᱮᱱᱟᱜ ᱫᱚ ᱵᱟᱝ ᱠᱟᱱᱟ ᱾ ᱟᱥᱚᱞ ᱯᱷᱟᱨᱟᱠ ᱫᱚ ᱦᱩᱭᱩᱜ ᱠᱟᱱᱟ ᱫᱤᱱᱟᱹᱢ ᱡᱤᱣᱤᱱ ᱨᱮ ᱱᱤᱭᱚᱢ ᱢᱟᱱᱟᱣ, ᱥᱟᱡᱟᱣ ᱛᱟᱦᱮᱸᱱ ᱟᱨ ᱟᱹᱨᱤᱪᱟᱹᱞᱤ ᱯᱟᱸᱡᱟ ᱾
ᱚᱱᱠᱟ ᱚᱠᱛᱚ ᱨᱮᱜᱮ, ᱤᱧᱤᱡ ᱵᱮᱴᱟ ᱢᱤᱫᱴᱟᱹᱝ ᱮ ᱜᱳᱞ (goal) ᱠᱮᱫᱼᱟ ᱾ ᱡᱚᱛᱚ ᱦᱚᱲ ᱟᱹᱰᱤ ᱡᱩᱨ ᱛᱮᱠᱚ ᱦᱩᱞᱞᱟᱹ ᱠᱮᱫᱼᱟ ᱾ ᱟᱭᱳ-ᱵᱟᱵᱟ ᱟᱨ ᱜᱤᱫᱽᱨᱟᱹ ᱠᱚ ᱨᱟᱹᱥᱠᱟᱹ ᱛᱮ ᱠᱚ ᱛᱷᱟᱭᱚ ᱠᱮᱫᱼᱟ, ᱟᱨ ᱤᱧᱟᱜ ᱢᱚᱱᱮ ᱜᱚᱨᱚᱵᱽ ᱛᱮ ᱯᱮᱨᱮᱡ ᱮᱱᱟ ᱾ ᱚᱱᱟ ᱚᱠᱛᱚ ᱨᱮ ᱩᱱᱤ ᱫᱚ “ᱢᱮᱱ ᱚᱯᱷ ᱫᱟ ᱢᱮᱪ” (man of the match) ᱮ ᱵᱮᱱᱟᱣ ᱮᱱᱟ ᱾
ᱚᱱᱟ ᱯᱷᱩᱴᱵᱚᱞ ᱮᱱᱮᱡ ᱫᱚ ᱤᱧ ᱢᱤᱫᱴᱟᱹᱝ ᱟᱹᱰᱤ ᱢᱟᱨᱟᱝ ᱥᱮᱪᱮᱫ ᱮ ᱮᱢᱟᱫ ᱫᱤᱧᱟ ᱾ ᱡᱤᱛᱠᱟᱹᱨᱚᱜ ᱫᱚ ᱥᱩᱢᱩᱝ ᱥᱮᱪᱮᱫ ᱟᱨᱵᱟᱝ ᱴᱟᱠᱟ ᱨᱮᱱᱟᱜ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ ᱾ ᱱᱚᱣᱟ ᱫᱚ ᱱᱤᱭᱚᱢ, ᱢᱤᱫ ᱛᱮ ᱠᱟᱹᱢᱤ, ᱥᱟᱯᱷᱟ-ᱥᱩᱛᱨᱟᱹ, ᱢᱟᱹᱱ ᱟᱨ ᱥᱚᱢᱟᱡᱽ ᱨᱮᱱᱟᱜ ᱜᱚᱲᱚ ᱨᱮᱱᱟᱜ ᱠᱟᱛᱷᱟ ᱠᱟᱱᱟ ᱾
ᱟᱢᱮᱨᱤᱠᱟ ᱨᱮ ᱛᱟᱦᱮᱸᱱ ᱠᱟᱱ ᱢᱤᱫ ᱟᱭᱳ ᱞᱮᱠᱟᱛᱮ, ᱤᱧ ᱱᱤᱛᱚᱜ ᱤᱧ ᱵᱩᱡᱷᱟᱹᱣ ᱠᱮᱫᱼᱟ ᱡᱮ ᱱᱚᱣᱟ ᱯᱷᱩᱴᱵᱚᱞ ᱮᱱᱮᱡ ᱠᱚᱫᱚ ᱥᱩᱢᱩᱝ ᱮᱱᱮᱡ ᱫᱚ ᱵᱟᱝ ᱠᱟᱱᱟ ᱾ ᱱᱚᱣᱟ ᱠᱚᱫᱚ ᱜᱤᱫᱽᱨᱟᱹ ᱠᱚ ᱴᱷᱮᱱ ᱯᱟᱹᱛᱭᱟᱹᱣ, ᱵᱷᱟᱹᱨᱤᱭᱟᱹ, ᱟᱯᱱᱟᱨ ᱛᱮ ᱛᱟᱦᱮᱸᱱ, ᱢᱤᱫ ᱛᱮ ᱠᱟᱹᱢᱤ ᱟᱨ ᱱᱟᱯᱟᱭ ᱜᱷᱟᱨᱚᱸᱡᱽ ᱨᱮᱱᱟᱜ ᱜᱩᱱ ᱮ ᱪᱮᱫ ᱟᱠᱚᱣᱟ ᱾ ᱱᱚᱣᱟ ᱠᱚᱫᱚ ᱫᱟᱨᱟᱭ ᱯᱤᱲᱦᱤ ᱞᱟᱹᱜᱤᱫ ᱢᱤᱫᱴᱟᱹᱝ ᱠᱮᱴᱮᱡ ᱟᱨ ᱱᱟᱯᱟᱭ ᱥᱚᱢᱟᱡᱽ ᱵᱮᱱᱟᱣ ᱨᱮ ᱜᱚᱲᱚᱭ ᱮᱢᱟ ᱾
***
