ᱟᱢ ᱫᱚᱢ ᱚᱠᱚᱭ ᱠᱟᱱᱟ
ᱤᱧ ᱫᱚ ᱵᱟᱝ ᱜᱮᱹᱧ ᱩᱨᱩᱢ ᱢᱮ
ᱮᱱ ᱦᱚᱸᱢ ᱥᱟᱡᱟᱣ ᱟᱠᱟᱱ
ᱟᱢ ᱫᱚ ᱤᱧᱤᱡ ᱥᱟᱶᱛᱮᱱᱤᱡ ᱾
ᱢᱟᱭᱟᱢ ᱦᱟᱹᱴᱤᱧ ᱥᱟᱹᱜᱟᱹᱭ ᱵᱟᱹᱱᱩᱜ
ᱜᱟᱛᱮ ᱡᱚᱴᱟᱣ ᱥᱟᱹᱜᱟᱹᱭ ᱵᱟᱹᱱᱩᱜ
ᱜᱷᱟᱨᱚᱸᱡᱽ ᱥᱟᱹᱜᱟᱹᱭ ᱵᱟᱹᱱᱩᱜ ᱮᱱ ᱦᱚᱸ
ᱟᱢ ᱫᱚ ᱤᱧᱤᱡ ᱥᱟᱶᱛᱮᱱᱤᱡ ᱾
ᱟᱭᱳ ᱵᱟᱵᱟᱢ ᱵᱟᱝ ᱠᱟᱱ ᱨᱮᱦᱚᱸ
ᱟᱢ ᱥᱟᱶ ᱢᱟᱱᱚᱛ ᱥᱟᱹᱜᱟᱹᱭ ᱛᱤᱧ
ᱵᱚᱸᱜᱟ ᱵᱳᱨᱳᱢ ᱵᱟᱝ ᱠᱟᱱ ᱨᱮᱦᱚᱸ
ᱮᱱ ᱦᱚᱸ ᱢᱟᱱᱟᱣ ᱥᱟᱹᱜᱟᱹᱭ ᱛᱤᱧ ᱾
ᱵᱚᱭᱦᱟ ᱵᱩᱦᱤᱱ ᱮᱢ ᱵᱟᱝ ᱠᱟᱱ ᱨᱮᱦᱚᱸ
ᱮᱱ ᱦᱚᱸ ᱜᱚᱨᱚᱡᱽ ᱥᱟᱹᱜᱟᱹᱭ ᱛᱤᱧ
ᱡᱩᱨᱤ ᱜᱟᱛᱮᱹᱢ ᱵᱟᱝ ᱠᱟᱱ ᱨᱮᱦᱚᱸ
ᱮᱱ ᱦᱚᱸ ᱫᱩᱞᱟᱹᱲ ᱥᱟᱹᱜᱟᱹᱭ ᱛᱤᱧ ᱾
ᱡᱤᱭᱚᱱ ᱰᱟᱦᱟᱨ ᱨᱮ ᱛᱟᱲᱟᱢ ᱨᱮᱦᱚᱸ
ᱤᱧ ᱥᱟᱶ ᱨᱮ ᱵᱟᱹᱱᱩᱜ ᱢᱮ ᱨᱮᱦᱚᱸ
ᱥᱟᱶᱨᱮᱢ ᱛᱟᱦᱮᱸ ᱟᱠᱟᱱ ᱮᱱ ᱦᱚᱸ
ᱟᱢ ᱫᱚ ᱤᱧᱤᱡ ᱥᱟᱶᱛᱮᱱᱤᱡ ᱾
ᱵᱟᱝ ᱥᱟᱶ ᱨᱮ ᱥᱟᱶᱨᱮᱹᱧ ᱦᱩᱫᱤᱥ ᱢᱮ
ᱥᱩᱨ ᱨᱮ ᱟᱢ ᱜᱮᱹᱧ ᱟᱹᱭᱠᱟᱹᱣ ᱢᱮ
ᱱᱚᱝᱠᱟ ᱥᱟᱶᱨᱮ ᱛᱟᱦᱮᱸᱱᱤᱡ ᱫᱚ
ᱟᱢ ᱜᱮ ᱤᱧᱤᱡ ᱥᱟᱶᱛᱮᱱᱤᱡ ᱾
ᱵᱟᱹᱱᱩᱜ ᱧᱟᱯᱟᱢ ᱨᱮᱱᱟᱜ ᱟᱸᱥ ᱦᱚᱸ
ᱟᱢ ᱥᱟᱶ ᱧᱮᱯᱮᱞ ᱨᱚᱯᱚᱲ ᱟᱸᱥ ᱦᱚᱸ
ᱡᱤᱭᱚᱱᱤᱧ ᱠᱷᱟᱸᱰᱟᱣ ᱟᱢ ᱥᱟᱶ ᱮᱱ ᱦᱚᱸ
ᱟᱢ ᱜᱮ ᱤᱧᱤᱡ ᱥᱟᱶᱛᱮᱱᱤᱡ ᱾
ᱚᱠᱟ ᱡᱚᱱᱚᱢ ᱪᱮᱫ ᱥᱟᱹᱜᱟᱹᱭ ᱦᱮᱸ ᱪᱚ
ᱱᱚᱣᱟ ᱡᱚᱱᱚᱢ ᱥᱟᱹᱜᱟᱹᱭ ᱱᱚᱝᱠᱟ
ᱛᱤᱱ ᱫᱤᱱ ᱪᱚᱢ ᱛᱟᱦᱮᱸᱱ ᱱᱚᱝᱠᱟ
ᱟᱢ ᱫᱚ ᱤᱧᱤᱡ ᱥᱟᱶᱛᱮᱣᱤᱡ ᱾
ᱵᱟᱢ ᱥᱩᱨᱩᱜ ᱨᱮᱦᱚᱸ ᱤᱧ ᱴᱷᱮᱱ
ᱵᱟᱹᱜᱤ ᱥᱟᱹᱨᱤᱭᱟᱹᱧ ᱨᱮ ᱦᱚᱸᱢ
ᱮᱱ ᱦᱚᱸᱧ ᱛᱷᱟᱯᱚᱱ ᱠᱟᱢᱟ ᱟᱢ ᱜᱮ
ᱟᱢ ᱜᱮ ᱤᱧᱤᱡ ᱥᱟᱶᱛᱮᱱᱤᱡ ᱾
ᱮᱠᱞᱟᱹᱧ ᱛᱟᱲᱟᱢ ᱨᱮ ᱦᱚᱸ ᱟᱢ ᱫᱚ
ᱥᱟᱶ ᱨᱮ ᱢᱮᱱᱟᱢ ᱞᱮᱠᱟ
ᱥᱟᱦᱮᱫ ᱤᱧ ᱦᱤᱲᱤᱧ ᱤᱠᱷᱟᱹᱱ ᱟᱢ ᱫᱚ
ᱦᱚᱲᱢᱚ ᱨᱮ ᱡᱤᱣᱤ ᱞᱮᱠᱟ ᱾
ᱥᱟᱶᱨᱮᱢ ᱛᱟᱦᱮᱸᱱ ᱨᱮ ᱥᱮ ᱵᱚᱛᱚᱨ
ᱟᱢᱮᱢ ᱵᱟᱹᱜᱤᱭᱟᱹᱧ ᱨᱮᱭᱟᱜ
ᱵᱟᱹᱱᱩᱜ ᱢᱮ ᱥᱟᱶᱨᱮ ᱢᱮᱱᱟᱢ ᱥᱟᱦᱮᱫ ᱨᱮ
ᱟᱢ ᱜᱮ ᱤᱧᱤᱡ ᱥᱟᱶᱛᱮᱱᱤᱡ ᱾
ᱛᱟᱦᱮᱸ ᱠᱚᱜ ᱢᱮ ᱱᱚᱝᱠᱟ ᱜᱮ ᱥᱟᱶᱨᱮ
ᱵᱟᱝ ᱛᱟᱦᱮᱸ ᱠᱟᱛᱮ ᱥᱟᱶ ᱨᱮ
ᱫᱤᱥᱟᱹ ᱟᱹᱧ ᱢᱮ ᱱᱚᱝᱠᱟ ᱜᱮ ᱜᱷᱟᱱᱮ
ᱛᱟᱦᱮᱸ ᱠᱟᱛᱮ ᱥᱟᱦᱮᱫ ᱥᱟᱶ ᱨᱮ ᱾
ᱥᱟᱦᱮᱫ ᱤᱧ ᱵᱟᱹᱜᱤᱭᱟᱜ ᱨᱮᱦᱚᱸ
ᱟᱢ ᱫᱚ ᱟᱞᱚᱢ ᱵᱟᱹᱜᱤᱭᱟᱹᱧ ᱮᱱ ᱦᱚᱸ
ᱛᱟᱦᱮᱸ ᱠᱚᱜ ᱢᱮ ᱤᱧᱟᱜ ᱟᱦᱞᱟᱝ ᱥᱟᱶ
ᱟᱢ ᱜᱮ ᱤᱧᱤᱡ ᱥᱟᱶᱛᱮᱱᱤᱡ ᱾
ᱟᱨ ᱦᱚᱸᱧ ᱨᱩᱣᱟᱹᱲ ᱨᱮ ᱢᱚᱧᱪᱚ ᱯᱩᱨᱤ
ᱥᱟᱸᱜᱷᱟᱨ ᱠᱷᱟᱱᱤᱧ ᱫᱷᱟᱹᱨᱛᱤ
ᱩᱱ ᱫᱚ ᱛᱟᱦᱮᱸᱱ ᱢᱮ ᱤᱧ ᱥᱟᱶᱨᱮ
ᱟᱢ ᱜᱮ ᱤᱧᱤᱡ ᱥᱟᱶᱛᱮᱱᱤᱡ ᱾
***
