ᱵᱟᱦᱟ ᱫᱚᱢ ᱵᱟᱦᱟᱜᱼᱟ ᱱᱟᱹᱬᱤ ᱨᱮ ᱫᱟᱨᱮ ᱨᱮ
ᱦᱚᱨ ᱫᱷᱟᱨᱮ ᱨᱮ ᱠᱤᱭᱟᱹ ᱠᱤᱛᱟᱹ ᱵᱩᱫᱟᱹᱨᱮ
ᱜᱷᱩᱴᱩ ᱨᱮ ᱫᱟᱜ ᱨᱮ ᱟᱨ ᱦᱚᱸ ᱞᱚᱥᱚᱫ ᱨᱮ
ᱵᱟᱲᱜᱮ ᱨᱮ ᱵᱟᱜᱟᱱ ᱨᱮ ᱠᱟᱹᱴᱤᱡ ᱛᱟᱥᱟᱫ ᱨᱮ ᱾
ᱵᱟᱹᱫᱽ ᱟᱲᱮ ᱨᱮ ᱜᱚᱴᱟ ᱱᱟᱹᱭ ᱱᱟᱞᱟ ᱨᱮ
ᱫᱷᱤᱨᱤ ᱜᱚᱸᱜᱷᱚᱨ ᱨᱮ ᱦᱩᱴᱩᱵ ᱨᱮ
ᱵᱩᱨᱩ ᱦᱟᱨᱟ ᱨᱮ ᱦᱩᱨᱩᱫ ᱠᱷᱩᱱᱴᱩᱫ ᱨᱮ
ᱨᱮᱦᱮᱫ ᱪᱤᱨᱤᱫ ᱨᱮ ᱟᱲᱟᱜ ᱨᱮ ᱥᱟᱠᱟᱢ ᱨᱮ ᱢᱟᱫᱮ ᱜᱩᱨᱤᱡ ᱨᱮ
ᱨᱩᱴᱷᱤ ᱥᱤᱛᱩᱝ ᱟᱢ ᱫᱚ ᱵᱟᱝ ᱜᱮᱢ ᱵᱚᱛᱚᱨᱚᱜ
ᱫᱟᱨᱮ ᱨᱮᱢ ᱵᱟᱦᱟ ᱠᱚᱜ ᱡᱮᱸᱜᱮᱫ ᱟᱨᱟᱜ
ᱵᱟᱝᱜᱮ ᱫᱟᱲᱮᱭᱟᱢ ᱵᱚᱨᱟᱢ ᱦᱩᱞᱠᱟᱹ ᱡᱟᱹᱯᱩᱫ
ᱦᱚᱭ ᱫᱟᱜ ᱛᱮ ᱡᱚᱠᱷᱚᱱ ᱚᱲᱟᱜ ᱫᱩᱣᱟᱹᱨ ᱮ ᱨᱟᱹᱯᱩᱫᱽ ᱾
ᱟᱢᱟᱜ ᱦᱚᱲᱢᱚ ᱨᱮᱱᱟᱜ ᱥᱤᱥᱤᱨ ᱴᱚᱲᱚᱜ
ᱡᱷᱟᱞᱠᱟᱣᱜ ᱟᱭ ᱡᱚᱠᱷᱚᱱᱮᱢ ᱮᱢᱟᱭᱟ ᱜᱚᱲᱚ
ᱟᱢ ᱧᱮᱞ ᱛᱮ ᱯᱷᱟᱹᱜᱩᱱ ᱠᱩᱭᱞᱤ ᱟᱲᱟᱝ
ᱫᱷᱟᱹᱨᱛᱤ ᱜᱚᱴᱟᱭ ᱟᱹᱬᱛᱤ ᱨᱟᱲᱟᱝ ᱨᱟᱲᱟᱝ ᱾
ᱫᱷᱟᱶᱬᱟ ᱫᱷᱟᱹᱶᱬᱤ ᱜᱚᱴᱟ ᱵᱷᱟᱶᱟᱨ ᱵᱟᱹᱣᱲᱤ
ᱪᱮᱬᱮ ᱪᱤᱯᱨᱩᱜ ᱡᱤᱱᱛᱤ ᱯᱤᱯᱤᱲᱤ ᱟᱹᱣᱲᱤ
ᱞᱚᱵᱷᱟᱣᱜ ᱛᱟᱠᱚ ᱧᱮᱞ ᱛᱮ ᱥᱟᱱᱟᱢ ᱠᱚᱣᱟᱜ ᱢᱚᱱᱮ
ᱢᱟᱨᱛᱚᱠ ᱵᱟᱹᱱᱩᱜ ᱢᱚᱱᱮ ᱚᱨᱟᱢ ᱜᱷᱟᱱᱮ ᱾
ᱨᱩᱯ ᱢᱚᱦᱚᱨ ᱛᱟᱢ ᱟᱢᱟᱜ ᱵᱟᱨᱚ ᱵᱚᱨᱚᱱ
ᱤᱠᱷᱟᱹᱱ ᱨᱚᱝ ᱛᱟᱢ ᱥᱟᱹᱨᱤ ᱡᱚᱨᱚᱝ ᱡᱚᱨᱚᱝ
ᱥᱚᱸᱫᱷᱟᱬ ᱥᱚᱛᱮ ᱢᱚᱱᱮ ᱯᱚᱨᱮᱫ ᱟᱠᱟᱱ
ᱨᱟᱥᱟ ᱥᱚᱨᱚᱵᱚᱨᱚ ᱥᱟᱨᱥᱟᱣ ᱟᱠᱟᱱ ᱾
ᱵᱚᱸᱜᱟ ᱵᱳᱨᱳ ᱨᱮᱦᱚᱸ ᱢᱟᱬᱟᱝ ᱟᱢᱟᱜ ᱠᱷᱚᱡᱟᱨ
ᱰᱷᱟᱞᱚᱜ ᱟᱭ ᱱᱚᱶᱟ ᱥᱤᱨᱡᱚᱱ ᱵᱮᱢᱟᱨ ᱟᱡᱟᱨ
ᱟᱢᱟᱜ ᱨᱟᱥᱟ ᱛᱮ ᱡᱤᱱᱛᱤ ᱯᱤᱯᱤᱲᱤ ᱠᱚ ᱵᱷᱟᱹᱨᱛᱤᱜ
ᱟᱢ ᱵᱟᱝᱠᱷᱟᱱ ᱪᱮᱠᱟᱛᱮ ᱥᱚᱵᱷᱟᱜ ᱫᱷᱟᱹᱨᱛᱤ ᱾
ᱛᱤᱱᱟᱹᱜ ᱥᱤᱧ ᱧᱤᱫᱟᱹ ᱩᱢᱫᱷᱤ ᱛᱟᱦᱮᱸ ᱠᱟᱱ
ᱨᱮᱸᱜᱮᱡ ᱛᱮᱛᱟᱝ ᱯᱟᱞᱮ ᱦᱤᱲᱤᱧᱮ ᱛᱟᱦᱮᱸ ᱠᱟᱱ
ᱛᱤᱱᱟᱹᱜ ᱜᱚᱨᱚᱡᱽ ᱛᱮ ᱜᱚᱲᱦᱚᱱ ᱞᱮᱫ ᱢᱮ ᱥᱤᱨᱡᱚᱱᱤᱭᱟᱹ
ᱡᱚᱛᱚᱢ ᱢᱩᱦᱱᱤ ᱠᱚᱣᱟ ᱟᱢ ᱜᱮ ᱢᱚᱦᱚᱱᱤᱭᱟᱹ ᱾
***
