ᱫᱟᱭᱟ ᱜᱮ ᱯᱟᱹᱨᱥᱤ ᱟᱢ ᱢᱟ ᱢᱮᱱᱟᱢ
ᱚᱠᱚᱭ ᱟᱢᱮ ᱡᱚᱜᱟᱣ ᱡᱚᱛᱚᱱ ᱢᱮ
ᱥᱟᱶᱛᱟ ᱨᱤᱱ ᱦᱚᱲ ᱜᱮᱪᱚ ᱛᱮᱦᱮᱧ
ᱟᱢ ᱢᱟ ᱟᱹᱲᱤᱥ ᱠᱚ ᱧᱮᱞᱮᱫ ᱢᱮ ᱾
ᱥᱟᱶᱛᱟ ᱛᱟᱞᱟ ᱨᱮ ᱯᱟᱹᱨᱥᱤ
ᱢᱟᱱᱚᱛ ᱜᱮᱪᱚ ᱪᱟᱵᱟᱜ ᱠᱟᱱ ᱛᱟᱢ
ᱯᱟᱹᱨᱥᱤ ᱨᱮᱱᱟᱜ ᱥᱚᱱᱚᱛ ᱩᱭᱦᱟᱹᱨ
ᱚᱠᱚᱭ ᱟᱫᱚᱭ ᱨᱟᱠᱷᱟ ᱡᱚᱜᱟᱣ ᱛᱟᱢ ᱾
ᱯᱟᱹᱨᱥᱤ ᱨᱤᱞᱟᱹᱢᱟᱞᱟ ᱯᱩᱥᱴᱟᱹᱣ
ᱡᱟᱱᱟᱢ ᱟᱲᱟᱝ ᱛᱟᱢ ᱜᱤᱛᱤᱞ ᱚᱲᱟᱜ ᱞᱮ ᱵᱚᱦᱮᱞᱚᱜ ᱠᱟᱱ
ᱚᱠᱚᱭ ᱛᱟᱢᱮ ᱡᱚᱜᱟᱣ ᱡᱚᱛᱚᱱ ᱢᱮ
ᱟᱢ ᱨᱮᱱ ᱜᱮ ᱦᱚᱲ ᱟᱢ ᱢᱟ ᱠᱚ ᱟᱹᱲᱤᱥ ᱟᱢ ᱠᱟᱱ ᱾
ᱚᱞᱚᱜ ᱯᱟᱲᱦᱟᱣ ᱚᱵᱚᱥᱛᱷᱟ ᱛᱮᱦᱮᱧ
ᱢᱮᱱᱟᱜ ᱛᱟᱢ ᱟᱹᱰᱤ ᱦᱟᱞᱮᱰᱟᱞᱮ
ᱚᱱᱟ ᱟᱢᱮᱴ ᱞᱟᱹᱜᱤᱫ ᱜᱮᱪᱚ ᱛᱮᱦᱮᱧ
ᱯᱟᱹᱨᱥᱤ ᱯᱚᱨ ᱡᱟᱹᱛ ᱠᱚ ᱠᱚᱭᱚᱜ ᱟᱠᱟᱫ ᱢᱮᱞᱮ ᱢᱮᱞᱮ ᱾
ᱥᱮᱪᱮᱫ ᱵᱟᱝ ᱛᱟᱦᱮᱸ ᱞᱮᱱ ᱠᱷᱟᱱ
ᱱᱩᱠᱩ ᱵᱟᱹᱯᱩᱲᱤᱡ ᱢᱟᱱᱣᱟ
ᱪᱮᱠᱟᱹ ᱠᱟᱛᱮᱫ ᱠᱚ ᱛᱟᱦᱮᱸᱱᱟ
ᱟᱠᱚᱣᱟᱜ ᱯᱟᱹᱨᱥᱤ ᱪᱮᱠᱟ ᱠᱟᱛᱮᱫ ᱠᱚ ᱵᱟᱧᱪᱟᱣ ᱾
ᱥᱮᱪᱮᱫ ᱵᱟᱝ ᱛᱮ ᱡᱟᱱᱟᱢ ᱨᱚᱲ ᱠᱚ ᱦᱤᱲᱤᱧᱮᱫ
ᱚᱱᱟᱛᱮ ᱟᱠᱚᱣᱟᱜ ᱩᱭᱦᱟᱹᱨ ᱫᱟᱲᱮ ᱦᱚᱸ ᱡᱟᱦᱟᱸ ᱞᱮᱠᱟ
ᱚᱱᱟ ᱠᱷᱟᱹᱛᱤᱨ ᱜᱮᱪᱚ ᱱᱩᱠᱩ ᱵᱟᱹᱯᱲᱩᱡ ᱢᱟᱱᱣᱟ
ᱛᱟᱦᱮᱸᱱ ᱠᱟᱱ ᱠᱚ ᱥᱟᱶᱛᱟ ᱛᱟᱞᱟ ᱨᱮᱦᱚᱸ ᱠᱚᱝᱠᱟ ᱞᱮᱠᱟ ᱾
ᱢᱟᱱᱣᱟᱢ ᱛᱟᱦᱮᱸᱱ ᱠᱷᱟᱱ ᱯᱟᱹᱨᱥᱤ
ᱛᱤᱱᱟᱹᱜ ᱪᱚᱢ ᱨᱟᱜ ᱦᱚᱢᱚᱨ ᱠᱮ
ᱨᱮᱸᱜᱮᱡ ᱛᱮᱛᱟᱝ ᱢᱟᱱᱣᱟ ᱞᱮᱠᱟ ᱜᱮ ᱟᱢ ᱦᱚᱸ
ᱠᱚᱲᱟᱢ ᱪᱮᱛᱟᱱ ᱢᱮᱫ ᱫᱟᱜ ᱮᱢ ᱡᱚᱨᱚ ᱠᱮ ᱾
ᱢᱟᱱᱣᱟ ᱞᱟᱹᱜᱤᱫ ᱟᱢ ᱫᱚ ᱯᱟᱹᱨᱥᱤ
ᱛᱮᱦᱮᱧ ᱪᱮᱫ ᱩᱭᱦᱟᱹᱨ ᱫᱚᱦᱚᱭ ᱛᱟᱢ
ᱥᱟᱶᱛᱟ ᱛᱟᱞᱟ ᱢᱟᱱᱚᱛ ᱯᱟᱹᱨᱥᱤ
ᱚᱠᱚᱭ ᱦᱤᱨᱞᱟᱹ ᱨᱮᱢ ᱡᱚᱜᱟᱣ ᱛᱟᱢ ᱾
ᱫᱟᱭᱟ ᱜᱮ ᱯᱟᱹᱨᱥᱤ ᱟᱢ ᱢᱟ ᱢᱮᱱᱟᱢ
ᱚᱠᱚᱭ ᱟᱢᱮ ᱡᱚᱜᱟᱣ ᱡᱚᱛᱚᱱ ᱢᱮ
ᱥᱟᱶᱛᱟ ᱨᱤᱱ ᱦᱚᱲ ᱜᱮᱪᱚ ᱛᱮᱦᱮᱧ
ᱟᱢ ᱢᱟ ᱟᱹᱲᱤᱥ ᱠᱚ ᱧᱮᱞᱮᱫ ᱢᱮ ᱾
***
