ᱫᱷᱟᱹᱨᱛᱤ ᱯᱩᱨᱤ ᱨᱮ ᱦᱚᱭ ᱦᱤᱥᱤᱫ ᱫᱚ ᱵᱚᱫᱚᱞ ᱟᱠᱟ ᱛᱟᱦᱮᱸᱱᱟ ᱾ ᱚᱠᱟ ᱡᱚᱦᱚᱜ ᱥᱤᱛᱩᱝᱟ, ᱚᱠᱟ ᱡᱚᱦᱚᱜ ᱨᱮᱭᱟᱲᱟ, ᱚᱠᱟ ᱡᱚᱦᱚᱜ ᱨᱟᱵᱟᱝᱟ, ᱚᱠᱟ ᱡᱚᱦᱚᱜ ᱫᱚ ᱦᱚᱭ ᱦᱤᱥᱤᱫ ᱦᱮᱢᱟᱞ ᱜᱮ ᱟᱹᱭᱠᱟᱹᱣᱜ-ᱟ ᱾ ᱡᱚᱛᱚ ᱨᱤᱛᱩ ᱨᱮᱜᱮ ᱢᱟᱹᱱᱢᱤ ᱱᱟᱭᱠᱟ ᱥᱟᱶᱛᱮ ᱠᱟᱭᱠᱟ ᱦᱚᱸᱵᱚᱱ ᱥᱟᱢᱟᱝ-ᱟ ᱾
ᱤᱠᱷᱟᱹᱱ ᱢᱟᱹᱱᱢᱤ ᱫᱚ ᱡᱚᱛᱚ ᱨᱤᱛᱩ ᱨᱮᱜᱮ ᱱᱟᱭᱠᱟ ᱨᱮᱭᱟᱜ ᱚᱨᱥᱚᱝ ᱠᱷᱚᱱ ᱫᱚ ᱠᱟᱭᱠᱟ ᱨᱮᱭᱟᱜ ᱚᱨᱥᱚᱝ ᱜᱮ ᱵᱟᱹᱲᱛᱤ ᱫᱚ ᱠᱚ ᱥᱟᱢᱟᱝ-ᱟ ᱾
ᱡᱟᱦᱟᱸ ᱞᱮᱠᱟ ᱱᱤᱭᱟᱹ ᱦᱟᱹᱞᱤ ᱫᱚ ᱨᱟᱵᱟᱝ ᱨᱤᱛᱩ ᱠᱟᱱᱟ ᱾ ᱫᱷᱟᱹᱨᱛᱤ ᱨᱮ ᱢᱟᱱᱣᱟ, ᱡᱟᱱᱣᱟ, ᱡᱤᱵᱽ, ᱡᱤᱭᱟᱹᱞᱤ ᱥᱟᱱᱟᱢ ᱠᱚᱜᱮ ᱨᱟᱵᱟᱝ ᱮᱫ ᱠᱚᱣᱟ ᱾ ᱥᱤᱧ ᱵᱚᱸᱜᱟ ᱟᱜ ᱮᱞᱟᱝ ᱦᱚᱸ ᱟᱹᱰᱤ ᱜᱮ ᱱᱚᱥᱚᱢ ᱠᱚᱜ-ᱟ ᱾ ᱦᱚᱭ ᱦᱤᱥᱤᱫ ᱨᱮᱭᱟᱲ ᱜᱮ ᱟᱹᱭᱠᱟᱹᱣᱜ-ᱟ ᱾ ᱡᱟᱦᱟᱸ ᱠᱷᱟᱹᱛᱤᱨ ᱥᱟᱱᱟᱢ ᱠᱚᱣᱟᱜ ᱡᱤᱣᱤ ᱦᱚᱲᱢᱚ ᱨᱮ ᱨᱮᱭᱟᱲ ᱨᱟᱵᱟᱝ ᱜᱮ ᱥᱚᱲᱚ ᱵᱚᱞᱚ ᱠᱚᱜ-ᱟ ᱾
ᱢᱟᱹᱱᱢᱤ ᱠᱚ ᱨᱟᱵᱟᱝ ᱠᱷᱚᱱ ᱵᱟᱧᱪᱟᱣᱜ ᱞᱟᱹᱜᱤᱫ ᱟᱹᱰᱤ ᱞᱮᱠᱟ ᱠᱚ ᱯᱚᱨᱛᱚᱱ ᱡᱚᱝ-ᱟ ᱾ ᱥᱟᱹᱨᱫᱤ ᱨᱟᱵᱟᱝ ᱚᱠᱛᱚ ᱨᱮ ᱥᱟᱹᱨᱫᱤ ᱦᱳᱲᱳ ᱤᱨᱩᱜ ᱠᱟᱹᱢᱤ ᱛᱟᱦᱮᱸᱱ ᱨᱮᱦᱚᱸ ᱨᱟᱵᱟᱝ ᱨᱮ ᱚᱱᱟ ᱠᱚ ᱠᱟᱹᱢᱤ ᱛᱚᱨᱟᱣᱮᱫ ᱥᱟᱶᱛᱮ ᱜᱮ ᱨᱟᱵᱟᱝ ᱫᱤᱱ ᱠᱚ ᱠᱷᱟᱸᱰᱟᱣᱟ ᱾ ᱨᱟᱵᱟᱝ ᱠᱷᱚᱱ ᱫᱩᱜᱚᱜ ᱞᱟᱹᱜᱤᱫ ᱟᱹᱭᱩᱵ ᱵᱮᱲᱟ ᱫᱚ ᱥᱮᱸᱜᱮᱞ ᱡᱩᱞ ᱠᱟᱛᱮ ᱡᱩᱨᱩᱜ ᱥᱟᱶᱛᱮ ᱠᱟᱱᱛᱷᱟ, ᱠᱚᱸᱵᱚᱲ ᱛᱮ ᱩᱭᱩᱸ ᱠᱟᱛᱮ ᱞᱟᱸᱜᱟ ᱨᱟᱲᱮᱡ ᱠᱚ ᱡᱟᱹᱯᱤᱫ ᱡᱤᱨᱟᱹᱣ ᱡᱚᱝ-ᱟ ᱾
ᱯᱩᱥ ᱵᱚᱸᱜᱟ ᱨᱮᱫᱚ ᱠᱩᱦᱲᱟᱹ ᱧᱩᱛᱟᱹᱛ ᱨᱟᱛᱟᱝ ᱨᱟᱵᱟᱝ ᱛᱟᱦᱮᱸᱱᱟ ᱾ ᱧᱤᱫᱟᱹ ᱵᱟᱝ ᱟᱸᱜᱟ ᱦᱚᱫᱚᱜ-ᱟ ᱤᱠᱷᱟᱹᱱ ᱧᱩᱛ ᱫᱚ ᱞᱚᱜᱚᱱ ᱧᱩᱛᱚᱜ-ᱟ ᱾
ᱤᱱᱟᱹ ᱛᱮᱜᱮ ᱥᱟᱠᱨᱟᱛ ᱯᱟᱨᱟᱵᱽ ᱦᱚᱸ ᱫᱩᱨ ᱫᱩᱨ ᱫᱟᱨᱟᱭᱟ ᱾ ᱚᱱᱟ ᱞᱟᱹᱜᱤᱫ ᱦᱚᱸ ᱦᱚᱲ ᱫᱩᱨᱢᱟᱨ ᱠᱚ ᱥᱟᱯᱲᱟᱣᱜ-ᱟ ᱾ ᱵᱟᱹᱫᱽ ᱦᱳᱲᱳ ᱠᱚ ᱵᱟᱭ ᱪᱟᱵᱟ ᱠᱮᱫ ᱛᱟᱭᱚᱢ ᱚᱲᱟᱜ ᱫᱩᱣᱟᱹᱨ ᱜᱮᱡ ᱜᱩᱨᱤᱡ, ᱡᱮᱨᱮᱲ ᱯᱚᱛᱟᱣ ᱠᱚ ᱫᱷᱩᱨᱟᱹᱣᱜ-ᱟ ᱾ ᱥᱟᱠᱨᱟᱛ ᱨᱮ ᱚᱲᱟᱜ ᱨᱮᱱᱟᱜ ᱡᱚᱛᱚ ᱥᱟᱢᱟᱱ ᱱᱟᱣᱟ ᱟᱹᱨᱩᱭ ᱞᱟᱹᱜᱤᱫ ᱛᱮ ᱦᱟᱴ ᱵᱟᱴ ᱠᱤᱨᱤᱧ ᱦᱚᱸᱠᱚ ᱫᱟᱬᱟᱱᱟ ᱾ ᱥᱟᱠᱨᱟᱛ ᱨᱮᱫᱚ ᱚᱲᱟᱜ ᱨᱮ ᱡᱟᱦᱟᱸ ᱜᱮ ᱢᱮᱱᱟᱜ ᱠᱚᱣᱟ ᱥᱟᱱᱟᱢ ᱜᱷᱟᱨᱚᱸᱡᱤᱭᱟᱹ ᱠᱚᱠᱚ ᱱᱟᱶᱟ ᱞᱩᱜᱽᱲᱤᱜ-ᱟ ᱾
ᱨᱟᱵᱟᱝ ᱫᱤᱱ ᱫᱚ ᱨᱟᱵᱟᱝ ᱨᱮᱦᱚᱸ ᱦᱚᱲ ᱠᱚᱫᱚ ᱟᱹᱰᱤ ᱞᱮᱠᱟᱱ ᱠᱟᱹᱢᱤ ᱨᱮ ᱵᱷᱤᱲ ᱛᱟᱦᱮᱸ ᱠᱟᱛᱮ ᱨᱟᱵᱟᱝ ᱚᱠᱛᱚ ᱠᱚ ᱠᱷᱮᱢᱟᱣ ᱯᱟᱨᱚᱢᱟ ᱾
ᱨᱟᱵᱟᱝ ᱨᱤᱛᱩ ᱫᱚ ᱦᱟᱨᱠᱮᱛ ᱨᱮᱭᱟᱜ ᱦᱚᱸ ᱠᱟᱱᱟ, ᱨᱟᱹᱥᱠᱟᱹ ᱨᱮᱭᱟᱜ ᱦᱚᱸ ᱠᱟᱱᱟ, ᱨᱮᱸᱜᱮᱡ ᱨᱮᱭᱟᱜ ᱦᱚᱸ ᱠᱟᱱᱟ, ᱠᱤᱥᱟᱹᱬ ᱨᱮᱭᱟᱜ ᱦᱚᱸ ᱠᱟᱱᱟ ᱾
ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱟᱦᱟᱸ ᱜᱮ ᱨᱤᱛᱩ ᱢᱮᱱᱟᱜ-ᱟ ᱾ ᱡᱚᱛᱚ ᱜᱮ ᱢᱟᱹᱱᱢᱤ, ᱡᱟᱱᱣᱟ ᱠᱚ ᱞᱟᱹᱜᱤᱫ ᱵᱩᱜᱤ ᱞᱟᱹᱜᱤᱫ ᱜᱮ ᱠᱟᱱᱟ ᱾ ᱚᱱᱟᱛᱮ ᱢᱟᱹᱱᱢᱤ ᱫᱚ ᱨᱟᱵᱟᱝ ᱨᱤᱛᱩ ᱞᱮᱠᱟ ᱜᱮ ᱥᱟᱱᱟᱢ ᱨᱤᱛᱩ ᱟᱹᱰᱤ ᱱᱟᱯᱟᱭ ᱛᱮᱜᱮ ᱠᱚ ᱠᱷᱮᱢᱟᱣ ᱯᱩᱨᱟᱹᱣ ᱤᱫᱤᱭᱮᱫ-ᱟ ᱾
***
