ᱤᱧ ᱫᱚ ᱥᱩᱢᱩᱝ ᱟᱨᱮ ᱵᱚᱪᱷᱚᱨ ᱤᱧ ᱛᱟᱦᱮᱸ ᱠᱟᱱᱟ, ᱛᱤᱱ ᱡᱚᱦᱚᱜ ᱤᱧᱟᱜ ᱫᱩᱱᱤᱭᱟᱹ ᱫᱚ ᱡᱟᱭᱡᱩᱜᱽ ᱞᱟᱹᱜᱤᱫ ᱟᱹᱨᱩᱯᱷᱮᱨᱟᱣ ᱮᱱᱟ ᱾
ᱤᱧ ᱵᱟᱵᱟ, ᱡᱟᱦᱟᱸᱭ ᱫᱚ ᱟᱡᱟᱜ ᱯᱩᱨᱟᱹ ᱡᱤᱭᱚᱱ ᱨᱮ ᱩᱱᱟᱹᱜ ᱮ ᱠᱷᱟᱴᱟᱣ ᱞᱮᱱ ᱛᱟᱦᱮᱸᱱ, ᱟᱞᱮ ᱴᱟᱴᱠᱟ ᱜᱮᱭ ᱵᱟᱹᱜᱤᱭᱟᱫ ᱞᱮᱭᱟ – ᱟᱹᱰᱤ ᱩᱥᱟᱹᱨᱟ, ᱟᱹᱰᱤ ᱜᱮ ᱦᱟᱨᱠᱮᱛ ᱥᱟᱛᱞᱟᱜ ᱾ ᱢᱤᱫ ᱚᱠᱛᱚ ᱛᱤᱱ ᱡᱚᱦᱚᱜ ᱩᱱᱤ ᱫᱚ ᱟᱞᱮ ᱠᱚ ᱥᱟᱶ ᱡᱤᱭᱚᱱ ᱨᱟᱹᱥᱠᱟᱹ ᱨᱚᱢᱚᱡᱽ ᱛᱮᱭ ᱠᱷᱮᱢᱟᱣ ᱠᱮᱭᱟ, ᱟᱞᱮ ᱦᱟᱨᱟᱜ ᱮ ᱧᱮᱞ ᱠᱮ ᱞᱮᱭᱟ, ᱟᱞᱮ ᱟᱨ ᱦᱚᱸ ᱵᱟᱹᱲᱛᱤ ᱠᱩᱥᱤᱭ ᱮᱢ ᱟᱞᱮᱭᱟ – ᱩᱱᱤ ᱫᱚᱭ ᱥᱟᱦᱟ ᱥᱟᱹᱨᱤ ᱮᱱᱟ ᱾ ᱩᱱᱤ ᱫᱚ ᱥᱩᱢᱩᱝ ᱩᱭᱦᱟᱹᱨ ᱜᱮ ᱯᱟᱹᱪᱷᱞᱟᱹ ᱨᱮ ᱫᱚ ᱵᱟᱭ ᱵᱟᱹᱜᱤ ᱚᱴᱚ ᱟᱠᱟᱣᱟᱫ-ᱟ, ᱤᱠᱷᱟᱹᱱ ᱤᱧ ᱟᱭᱳ … ᱢᱚᱴᱷᱮ ᱒᱖ ᱵᱚᱪᱷᱚᱨ ᱵᱚᱭᱚᱥ ᱨᱮ, ᱢᱚᱬᱮ ᱜᱚᱴᱟᱝ ᱜᱤᱫᱽᱨᱟᱹ ᱟᱡᱟᱜ ᱨᱤᱫᱟᱹᱭ ᱨᱮ ᱦᱟᱹᱲᱩᱵ ᱠᱟᱛᱮᱭ ᱛᱟᱦᱮᱸ ᱠᱟᱱᱟ, ᱛᱤᱱ ᱡᱚᱦᱚᱜ ᱟᱡ ᱥᱟᱶᱨᱮ ᱚᱠᱚᱭ ᱦᱚᱸ ᱵᱟᱝ ᱠᱚ ᱛᱟᱦᱮᱸ ᱠᱟᱱᱟ ᱾
ᱵᱟᱵᱟᱭ ᱵᱚᱸᱜᱟ ᱛᱟᱞᱟ ᱮᱱ ᱚᱠᱛᱚ ᱤᱧ ᱟᱭᱳ ᱫᱚ ᱥᱟᱹᱨᱤ ᱵᱚᱭᱚᱥ, ᱮᱥᱮᱞ ᱦᱚᱲᱢᱚ ᱟᱨ ᱟᱹᱰᱤ ᱫᱩᱞᱟᱹᱲᱤᱭᱟᱹ ᱡᱮᱢᱚᱱ ᱢᱤᱫ ᱵᱚᱸᱜᱟ ᱠᱩᱲᱤ ᱜᱮ ᱟᱞᱮ ᱠᱚ ᱛᱟᱞᱟ ᱨᱮᱭ ᱫᱟᱬᱟ ᱵᱟᱲᱟᱭᱟ ᱾ ᱢᱮᱱᱠᱷᱟᱱ ᱪᱤᱠᱟᱹᱬ ᱦᱚᱲᱢᱚ ᱠᱷᱚᱱ ᱟᱡᱟᱜ ᱢᱚᱱᱮ ᱨᱮᱱᱟᱜ ᱫᱟᱲᱮ ᱜᱮ ᱢᱟᱨᱟᱝ ᱛᱟᱦᱮᱸ ᱠᱟᱱ ᱛᱟᱭᱟ, ᱟᱞᱮ ᱥᱟᱢᱟᱝ ᱨᱮ ᱵᱟᱭ ᱨᱟᱜ ᱞᱮᱫᱼ ᱟ, ᱵᱟᱭ ᱨᱟᱹᱯᱩᱫ ᱞᱮᱱᱟ, ᱫᱩᱠᱷ ᱡᱚᱛᱚᱭ ᱜᱚᱜ ᱠᱮᱫᱼᱟ, ᱟᱞᱮ ᱛᱟᱞᱟ ᱨᱮ ᱞᱟᱸᱫᱟ ᱢᱮᱫᱦᱟᱭ ᱥᱚᱫᱚᱨ ᱠᱮᱫᱼᱟ, ᱡᱮᱢᱚᱱ ᱟᱞᱮ ᱟᱞᱚ ᱞᱮ ᱨᱟᱜᱽ ᱢᱟ, ᱠᱟ.ᱢᱤ ᱠᱮᱫᱼᱟᱭ ᱠᱩᱨᱩᱢᱩᱴ ᱡᱮᱢᱚᱱ ᱨᱮᱸᱜᱮᱡ ᱟᱞᱚ ᱞᱮ ᱛᱟᱦᱮᱱ ᱢᱟ, ᱥᱟᱶᱛᱟ ᱜᱟᱸᱰᱟᱨ ᱠᱷᱚᱱ ᱫᱩᱜ ᱠᱟᱛᱮ ᱫᱩᱞᱟᱹᱲ ᱠᱚᱞᱮ ᱨᱮ ᱥᱟᱢᱴᱟᱣ ᱞᱮᱫ ᱞᱮᱭᱟᱭ, ᱫᱷᱟᱹᱨᱛᱤ ᱟᱹᱪᱩᱨᱮᱱ ᱨᱮ ᱥᱚᱡᱷᱮ ᱛᱮᱭ ᱛᱤᱸᱜᱩᱭᱮᱱᱟ, ᱯᱮᱲᱟ ᱠᱚ ᱮᱨᱮᱲ ᱠᱮᱫᱮᱭᱟ, ᱜᱟᱛᱮ ᱠᱚ ᱪᱷᱟᱱ ᱮᱱᱟ, ᱚᱠᱚᱭ ᱠᱚᱫᱚ ᱟᱡ ᱨᱟᱹᱱᱤ ᱞᱮᱠᱟ ᱠᱚ ᱵᱮᱣᱦᱟᱨ ᱞᱮᱫᱮᱭᱟ ᱵᱟᱵᱟᱭ ᱛᱟᱦᱮᱸ ᱠᱟᱱ ᱡᱚᱦᱚᱜ, ᱵᱟᱵᱟᱭ ᱵᱚᱸᱜᱟᱭᱮᱱ ᱛᱟᱭᱚᱱ ᱵᱷᱟᱹᱨᱤᱭᱟᱹ ᱞᱮᱠᱟ ᱠᱚ ᱵᱮᱣᱦᱟᱨ ᱞᱮᱫ ᱞᱮᱭᱟ ᱾ ᱛᱟᱭᱚᱢ ᱢᱟᱹᱱ ᱟᱱ ᱯᱮᱲᱟ ᱞᱮᱠᱟᱛᱮ ᱵᱟᱞᱮ ᱧᱮᱞ ᱧᱟᱢ ᱞᱮᱱᱟ, ᱟᱞᱮ ᱚᱲᱟᱜ ᱫᱚ ᱛᱟᱭᱚᱢ ᱚᱲᱟᱜ ᱞᱮᱠᱟ ᱫᱚ ᱵᱟᱝ ᱛᱟᱦᱮᱸ ᱞᱮᱱᱟ – ᱥᱩᱞᱩᱠ ᱠᱚ ᱨᱮᱡ ᱠᱮᱫ ᱞᱮᱭᱟ, ᱴᱟᱠᱟ ᱠᱟᱹᱣᱰᱤ ᱢᱟᱹᱱ ᱢᱟᱱᱚᱛ ᱡᱚᱛᱚ ᱟᱫ ᱮᱱᱟ ᱾
ᱦᱚᱲ ᱵᱷᱤᱛᱨᱤ ᱚᱲᱟᱜ ᱨᱮ ᱟᱞᱮᱭᱟᱜ ᱠᱚ ᱜᱟᱞᱚᱪ ᱠᱮᱫ-ᱟ ᱺ ᱱᱩᱠᱩ ᱜᱤᱫᱽᱨᱟᱹ ᱫᱚ ᱵᱮᱥ ᱵᱟᱝ ᱠᱚ ᱦᱟᱨᱟᱜᱼᱟ, ᱟᱵᱚ ᱞᱮᱠᱟ ᱫᱚ ᱵᱟᱝ ᱠᱚ ᱧᱮᱞᱚᱜᱼᱟ, ᱢᱮᱱᱠᱷᱟᱱ ᱩᱱᱠᱩᱣᱟᱜ ᱩᱭᱦᱟᱹᱨ ᱛᱟᱠᱚ ᱵᱷᱩᱞ ᱮᱱᱟ ᱾ ᱪᱮᱫᱟᱜ ᱥᱮ ᱟᱞᱮ ᱥᱟᱶ ᱫᱚ ᱟᱭᱳᱭ ᱛᱟᱦᱮᱸ ᱠᱟᱱᱟ ᱾
ᱡᱤᱨᱟᱹᱣ ᱦᱤᱲᱤᱧ ᱠᱟᱛᱮ ᱢᱚᱬᱮ ᱠᱷᱚᱱ ᱟᱨᱮ ᱜᱚᱴᱟᱝ ᱠᱟᱹᱢᱤ ᱵᱷᱮᱜᱟᱨ ᱵᱷᱮᱜᱟᱨ ᱢᱟᱹᱞᱤᱠ ᱴᱷᱮᱱ ᱮ ᱠᱟᱹᱢᱤ ᱠᱮᱫ-ᱟ, ᱚᱲᱟᱜ ᱥᱮᱴᱮᱨ ᱠᱟᱛᱮ ᱫᱟᱠᱟ ᱩᱛᱩ ᱪᱚᱸᱫᱟ ᱥᱟᱶᱛᱮ ᱚᱲᱟᱜ ᱫᱩᱣᱟᱹᱨ ᱥᱟᱯᱷᱟᱭ ᱛᱟᱭᱚᱢ ᱞᱩᱜᱽᱲᱤ ᱥᱤᱞᱟ.ᱭ ᱠᱟᱛᱮ ᱟᱞᱮ ᱟᱹᱥᱩᱞ ᱞᱮᱫ ᱞᱮᱭᱟᱭ ᱞᱟᱸᱫᱟ ᱢᱮᱫᱦᱟ ᱛᱮ ᱟᱡᱟᱜ ᱞᱟᱸᱜᱟ ᱦᱤᱲᱤᱧ ᱠᱟᱛᱮ ᱟᱨ ᱴᱩᱣᱟᱹᱨ ᱜᱷᱟᱨᱚᱸᱡᱽ ᱨᱮ ᱥᱚᱨᱚᱜᱽ ᱮ ᱵᱮᱱᱟᱣ ᱞᱮᱫ-ᱟ ᱾
ᱟᱞᱮ ᱴᱷᱮᱱ ᱪᱮᱫ ᱦᱚᱸ ᱵᱟᱝ ᱛᱟᱦᱮᱸ ᱠᱟᱱᱟ, ᱢᱮᱱᱠᱷᱟᱱ ᱡᱚᱛᱚᱣᱟᱜ ᱜᱮ ᱛᱟᱦᱮᱸ ᱠᱟᱱᱟ, ᱪᱮᱫᱟᱜ ᱥᱮ ᱟᱭᱳ ᱟᱞᱮ ᱥᱟᱶ ᱮ ᱛᱟᱦᱮ ᱠᱟᱱᱟ ᱾
ᱚᱠᱛᱚ ᱯᱚᱞᱚᱢ ᱮᱱᱟ ᱾ ᱟᱞᱮ ᱞᱮ ᱦᱟᱨᱟᱭᱮᱱᱟ ᱾ ᱟᱨ ᱱᱤᱛᱚᱜ ᱟᱡ ᱚᱠᱟᱭ ᱧᱟᱢ ᱨᱮᱱᱟᱜ ᱠᱟᱛᱷᱟ-ᱴᱟᱠᱟ ᱠᱟᱹᱣᱰᱤ ᱡᱤᱨᱟᱹᱣ ᱨᱟᱹᱥᱠᱟᱹ ᱞᱮ ᱮᱢᱟᱭ ᱚᱠᱛᱚ ᱥᱮᱴᱮᱨ ᱮᱱ ᱨᱮ, ᱥᱚᱨᱚᱜᱽ ᱯᱩᱨᱤ ᱮᱱᱟᱭ ᱾
ᱟᱭᱳ ᱟᱢ ᱫᱚ ᱡᱤᱨᱟᱹᱣᱜ ᱢᱮ …
ᱟᱞᱮ ᱞᱮ ᱥᱟᱸᱵᱽᱲᱟᱣᱟ ᱱᱚᱝᱠᱟ ᱛᱤ ᱥᱟᱵ ᱠᱟᱛᱮ ᱢᱮᱱ ᱢᱟᱬᱟᱝ ᱨᱮ ᱵᱚᱸᱜᱟ ᱫᱤᱥᱚᱢ ᱮᱱᱟᱭ ᱾
ᱟᱞᱮ ᱴᱷᱮᱱ ᱥᱟᱨᱮᱡ ᱮᱱᱟ ᱵᱟᱝ ᱥᱟᱦᱟᱣ ᱫᱟᱲᱮᱭᱟᱜ ᱞᱮᱠᱟᱱ ᱦᱟᱨᱠᱮᱛ ᱢᱮᱱᱠᱷᱟᱱ ᱪᱮᱫ ᱮᱢ ᱪᱮᱠᱟᱭᱟ ᱚᱞᱚᱝ ᱞᱤᱠᱷᱚᱱ ᱜᱮ ᱯᱟᱞᱮ ᱱᱚᱝᱠᱟᱱᱟ ᱾
ᱱᱤᱛᱚᱜ ᱚᱠᱚᱭ ᱫᱚ ᱟᱡᱟᱜ ᱦᱟᱨᱠᱮᱛ ᱠᱚ ᱮᱨᱮᱲ ᱠᱮᱫᱼᱟ, ᱡᱟᱦᱟᱸᱭ ᱞᱟᱹᱜᱤᱫ ᱫᱚ ᱟᱡ ᱮ ᱛᱤᱸᱜᱩ ᱞᱮᱱᱟ, ᱟᱠᱚᱭ ᱜᱚᱲᱚᱣᱟᱫ ᱠᱚ ᱛᱟᱦᱮᱸᱫ,
ᱩᱱᱠᱩ ᱟᱡ ᱢᱟᱱᱚᱛ ᱡᱚᱦᱟᱨ ᱞᱟ.ᱜᱤᱫ ᱠᱚ ᱛᱤᱸᱜᱩᱱ ᱠᱟᱱᱟ ᱾ ᱱᱤᱛᱚᱜ ᱟᱠᱚ ᱜᱚᱨᱚᱡᱽ ᱠᱚ ᱥᱚᱫᱚᱨ ᱮᱫᱼᱟ ᱾ ᱩᱱᱤᱭᱟᱜ ᱵᱮᱥ ᱠᱟᱹᱢᱤ ᱤᱫᱤ ᱠᱟᱛᱮ ᱠᱚ ᱨᱚᱯᱚᱲ ᱠᱟᱱᱟ ᱾ ᱱᱟᱯᱟᱭ ᱱᱟᱯᱟᱭ ᱠᱟᱛᱷᱟ ᱥᱟᱶᱛᱮ ᱵᱟᱦᱟ ᱛᱷᱩᱯᱱᱟᱹᱜ ᱥᱟᱶ ᱛᱮᱠᱚ ᱦᱤᱡᱩᱜ ᱠᱟᱱᱟ ᱾
ᱤᱠᱷᱟᱹᱱ ᱟᱞᱮ ᱞᱮ ᱵᱟᱰᱟᱭᱟ … ᱛᱤᱱ ᱡᱚᱦᱚᱜ ᱩᱱᱤ ᱫᱚ ᱩᱱᱠᱩᱭ ᱞᱟᱹᱠᱛᱤ ᱟᱫ ᱠᱚ ᱛᱟᱦᱮᱸᱫ ᱩᱱ ᱡᱚᱦᱚᱜ ᱩᱱᱠᱩ ᱫᱚ ᱩᱱᱤ ᱛᱤᱥ ᱦᱚᱸ ᱵᱟᱝ ᱠᱚ ᱠᱚᱭᱚᱜ ᱟᱫᱮᱭᱟ ᱾ ᱩᱱᱠᱩ ᱛᱤᱥ ᱦᱚᱸ ᱵᱟᱝ ᱠᱚ ᱠᱩᱞᱤ ᱞᱮᱫᱮᱭᱟ ᱡᱮ ᱟᱡ ᱪᱮᱫ ᱞᱮᱠᱟ ᱢᱮᱱᱟᱭᱟ, ᱟᱡ ᱪᱮᱫ ᱮ ᱠᱷᱚᱡᱚᱜ ᱠᱟᱱᱟ ᱾
ᱟᱨ ᱚᱱᱟ ᱠᱷᱟᱹᱛᱤᱨ, ᱟᱞᱮ ᱞᱮ ᱠᱩᱠᱞᱤ ᱠᱟᱱᱟ ᱺ ᱪᱮᱫ ᱱᱚᱣᱟ ᱫᱩᱞᱟᱹᱲ ᱫᱚ ᱥᱟᱹᱨᱤ ᱜᱮᱭᱟ, ᱥᱮ ᱱᱚᱣᱟ ᱫᱚ ᱫᱟᱭᱟ ᱥᱚᱫᱚᱨ ᱞᱟᱹᱜᱤᱫ ᱜᱮ ᱧᱮᱞ ᱚᱪᱚᱜ ᱠᱟᱱᱟ ?
ᱟᱞᱮ ᱛᱤᱥ ᱦᱚᱸ ᱵᱟᱝ ᱞᱮ ᱵᱟᱰᱟᱭ ᱫᱟᱲᱮᱭᱟᱜ-ᱟ ᱾
ᱤᱠᱷᱟᱹᱱ ᱢᱤᱫ ᱠᱟᱛᱷᱟ ᱤᱧᱤᱧ ᱵᱟᱰᱟᱭᱟ – ᱩᱱᱤ ᱫᱚ ᱩᱱᱠᱩᱭ ᱤᱠᱟᱹ ᱠᱟᱫ ᱠᱚᱣᱟ ᱾
ᱩᱱᱤ ᱫᱚ ᱞᱮᱛᱟᱲ ᱜᱮᱭ ᱢᱮᱱ ᱛᱟᱦᱮᱸᱫ ᱺ ᱩᱱᱠᱩ ᱫᱚ ᱤᱠᱟᱹ ᱠᱟᱠᱚ ᱢᱟ ᱾ ᱩᱱᱠᱩ ᱪᱮᱫ ᱠᱚᱠᱚ ᱪᱤᱠᱟᱹ ᱟᱠᱟᱫ-ᱟ ᱚᱱᱟ ᱠᱚᱫᱚ ᱦᱤᱲᱤᱧ ᱢᱟ ᱾ ᱫᱩᱱᱤᱭᱟᱹ ᱫᱚ ᱩᱱ ᱡᱚᱦᱚᱜ ᱪᱚᱨᱚᱠ ᱧᱮᱞᱚᱜ-ᱟ ᱛᱤᱱ ᱡᱚᱦᱚᱜ ᱟᱵᱚ ᱤᱠᱟᱹ ᱵᱚ ᱮᱢᱚᱜ-ᱟ ᱾” ᱤᱧ ᱫᱚ ᱵᱟᱹᱧ ᱵᱟᱰᱟᱭᱟ ᱡᱮ ᱤᱧ ᱱᱤᱛᱚᱜ ᱱᱚᱝᱠᱟᱹᱧ ᱠᱟᱹᱢᱤ ᱫᱟᱲᱮᱭᱟᱜ ᱟᱥᱮ ᱵᱟᱝ-ᱟ ᱾ ᱤᱧ ᱫᱚ ᱱᱤᱛ ᱦᱚᱸ ᱨᱟᱹᱜᱤ ᱜᱮᱹᱧ ᱵᱩᱡᱷᱟᱹᱣᱟ ᱾ ᱤᱧ ᱫᱚ ᱱᱤᱛ ᱦᱚᱸ ᱫᱩᱠ ᱜᱮᱹᱧ ᱟᱹᱭᱠᱟᱹᱣᱟ ᱾ ᱤᱠᱷᱟᱹᱱ ᱤᱧᱤᱧ ᱨᱤᱠᱟᱹᱭᱟ ᱾ ᱪᱮᱫᱟᱜ ᱥᱮ ᱤᱧ ᱟᱭᱳᱣᱟᱜ ᱟᱹᱲᱟᱹ ᱫᱚ ᱥᱚᱱᱚᱛ ᱜᱮ ᱛᱟᱦᱮᱸ ᱠᱟᱱᱟ ᱺ ᱡᱟᱦᱟᱸ ᱡᱤᱱᱤᱥ ᱟᱢᱮᱢ ᱮᱢ ᱫᱟᱲᱮᱭᱟᱜ-ᱟ ᱟᱨ ᱮᱱ ᱦᱚᱸᱢ ᱫᱚᱦᱚ ᱫᱟᱲᱮᱭᱟᱜ-ᱟ, ᱚᱱᱟ ᱫᱚ ᱟᱢᱟᱜ ᱨᱚᱲ, ᱢᱤᱫ ᱞᱟᱸᱫᱟ ᱟᱨ ᱢᱤᱫ ᱢᱟᱦᱟᱱ ᱨᱤᱫᱟᱹᱭ ᱾”
ᱟᱨ ᱩᱱᱤ ᱞᱟᱹᱜᱤᱫ – ᱡᱟᱦᱟᱸᱭ ᱫᱚ ᱟᱞᱮ ᱡᱚᱛᱚᱣᱟᱜ ᱮ ᱮᱢᱟᱫ ᱞᱮᱭᱟ, ᱡᱟᱦᱟᱸᱭ ᱫᱚ ᱫᱩᱱᱤᱭᱟᱹ ᱨᱮ ᱦᱚᱠᱫᱟᱨ ᱮ ᱛᱟᱦᱮᱸ ᱠᱟᱱᱟ ᱟᱨ ᱮᱱ ᱦᱚᱸ ᱱᱚᱣᱟ ᱠᱚ ᱮᱠᱞᱟᱭ ᱥᱟᱸᱵᱽᱲᱟᱣ ᱞᱮᱫ-ᱟ – ᱤᱧᱤᱧ ᱨᱤᱠᱟᱹᱭᱟ ᱾
ᱤᱧ ᱤᱧᱟᱜ ᱠᱟᱛᱷᱟᱧ ᱫᱚᱦᱚᱭᱟ ᱾ ᱤᱧ ᱢᱮᱫ ᱫᱟᱜ ᱥᱟᱶᱛᱮ ᱦᱚᱸᱧ ᱞᱟᱸᱫᱟᱭᱟ ᱾
ᱟᱨ ᱩᱱᱤᱭᱟᱜ ᱮᱱᱮᱢ ᱟᱨ ᱟᱡᱟᱜ ᱛᱷᱩᱢ ᱫᱚ ᱤᱧ ᱤᱧᱟᱜ ᱡᱤᱣᱤ ᱨᱮᱹᱧ ᱛᱷᱟᱯᱚᱱ ᱫᱚᱦᱚᱭᱟ ᱾
***
