ᱠᱟᱛᱷᱟ ᱨᱮᱠᱚ ᱢᱮᱱ ᱟᱠᱟᱫᱟ ᱞᱤᱪᱟᱹᱲ ᱢᱚᱱᱮ ᱯᱚᱫᱽᱜᱟ ᱡᱤᱣᱤ ᱨᱮ ᱰᱟᱹᱱ ᱵᱷᱩᱛ ᱠᱚ ᱢᱟᱺᱴᱩᱡ ᱥᱟᱹᱨᱤ ᱾ ᱱᱚᱶᱟ ᱫᱚ ᱮᱠᱟᱞ ᱛᱮ ᱟᱹᱰᱤ ᱥᱟᱹᱨᱤ ᱠᱟᱛᱷᱟ ᱠᱟᱱ ᱜᱮᱭᱟ ᱾
ᱦᱚᱲ ᱪᱮ ᱵᱟᱝ ᱢᱟᱹᱱᱢᱤ ᱫᱚ ᱮᱴᱟᱜ ᱡᱤᱵᱽ ᱡᱤᱭᱟᱹᱞᱤ ᱠᱚᱨᱮ ᱠᱷᱚᱱ ᱫᱚᱭ ᱥᱚᱨᱮᱥ ᱜᱮᱭᱟ ᱟᱨ ᱚᱱᱟᱛᱮᱜᱮ ᱱᱚᱶᱟ ᱫᱷᱟᱹᱨᱛᱤ ᱨᱮ ᱢᱟᱹᱱᱢᱤᱭᱟᱜ ᱴᱷᱟᱶ ᱫᱚ ᱡᱚᱛᱚ ᱠᱷᱚᱱ ᱪᱚᱴᱟᱛ ᱨᱮ ᱢᱮᱱᱟᱜᱼᱟ ᱾ ᱮᱴᱟᱜ ᱡᱤᱵᱽ ᱡᱤᱭᱟᱹᱞᱤ ᱠᱚᱨᱮ ᱠᱷᱚᱱ ᱜᱚᱴᱷᱚᱱ ᱦᱟᱢᱟᱞ ᱩᱥᱩᱞ ᱟᱨᱵᱟᱝ ᱫᱟᱲᱮ ᱠᱚᱨᱮ ᱠᱚᱢ ᱨᱮᱦᱚᱸ ᱜᱮᱭᱟᱱ ᱟᱡᱟᱜ ᱵᱩᱫᱷᱤ ᱪᱮ ᱵᱟᱝ ᱢᱚᱱᱮ ᱫᱟᱲᱮ ᱛᱮᱜᱮ ᱱᱩᱱ ᱢᱟᱨᱟᱝ ᱴᱷᱟᱶ ᱮ ᱟᱢᱮᱴ ᱫᱟᱲᱮ ᱟᱠᱟᱫᱟ ᱾ ᱚᱱᱟᱛᱮᱜᱮ ᱛᱮᱦᱮᱧ ᱥᱮᱨᱢᱟ ᱪᱚᱴ ᱨᱮ ᱩᱰᱟᱹᱣ ᱠᱟᱛᱮ ᱤᱯᱤᱞ ᱮᱸᱜᱮᱞ ᱴᱷᱮᱱ ᱮ ᱥᱮᱴᱮᱨ ᱫᱟᱲᱮ ᱟᱠᱟᱫᱟ ᱾
ᱢᱟᱹᱱᱢᱤ ᱜᱩᱱ ᱢᱮᱱᱟᱜ ᱫᱚ ᱟᱡᱟᱜ ᱨᱚᱲ ᱞᱟᱸᱫᱟ ᱟᱹᱰᱤ ᱢᱟᱨᱟᱝ ᱫᱟᱲᱮ ᱠᱟᱱᱟ ᱾ ᱟᱡᱟᱜ ᱢᱚᱱᱮ ᱨᱮᱱᱟᱝ ᱠᱟᱛᱷᱟ ᱩᱭᱦᱟᱹᱨ ᱠᱟᱛᱮ ᱢᱚᱪᱟ ᱠᱷᱚᱱ ᱟᱲᱟᱝ ᱞᱮᱠᱟᱛᱮ ᱟᱡᱟᱜ ᱩᱭᱦᱟᱹᱨ ᱨᱚᱲ ᱠᱟᱛᱮ ᱠᱟᱛᱷᱟᱭ ᱯᱷᱚᱴᱮᱞ ᱫᱟᱲᱮᱭᱟᱜ ᱠᱟᱱᱟ ᱟᱨ ᱚᱱᱟ ᱨᱚᱲ ᱪᱮ ᱵᱟᱝ ᱠᱟᱛᱷᱟ ᱛᱮ ᱮᱴᱟᱜ ᱢᱟᱹᱱᱢᱤ ᱠᱚ ᱟᱡ ᱠᱚ ᱵᱩᱡᱷᱟᱹᱣ ᱫᱟᱲᱮᱭᱟᱭ ᱠᱟᱱᱟ ᱟᱨ ᱚᱱᱟᱛᱮ ᱢᱤᱫ ᱥᱟᱶᱛᱟᱭ ᱵᱮᱱᱟᱣ ᱫᱟᱲᱮ ᱟᱠᱟᱣᱟᱫᱼᱟ ᱾ ᱡᱟᱦᱟᱸ ᱫᱚ ᱢᱟᱱᱶᱟ ᱥᱟᱶᱛᱟ ᱢᱮᱱᱛᱮ ᱵᱚᱱ ᱢᱮᱛᱟᱜ ᱠᱟᱱᱟ ᱾
ᱨᱚᱲ ᱞᱟᱸᱫᱟ ᱫᱚ ᱢᱟᱹᱱᱢᱤᱭᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱜᱩᱱ ᱟᱨ ᱫᱟᱲᱮ ᱠᱟᱱᱟ ᱾ ᱮᱴᱟᱜ ᱡᱤᱵᱽᱼᱡᱤᱭᱟᱹᱞᱤ ᱟᱲᱟᱝ ᱢᱮᱱᱟᱜ ᱛᱟᱠᱚ ᱨᱮᱦᱚᱸ ᱵᱟᱠᱚ ᱨᱚᱲ ᱫᱟᱲᱮᱭᱟᱜᱼᱟ ᱪᱮ ᱞᱟᱸᱫᱟ ᱫᱟᱲᱮᱭᱟᱜ ᱛᱮ ᱢᱟᱹᱱᱢᱤ ᱠᱷᱚᱱ ᱫᱚ ᱟᱠᱚᱣᱟᱜ ᱴᱷᱟᱶ ᱫᱚ ᱞᱟᱛᱟᱨ ᱜᱮᱭᱟ ᱾ ᱢᱟᱹᱱᱢᱤ ᱠᱷᱚᱱ ᱪᱮᱫ ᱠᱟᱛᱮ ᱢᱤᱨᱩ, ᱥᱟᱨᱚ ᱨᱚᱲ ᱫᱟᱲᱮᱭᱟᱜ ᱨᱮᱦᱚᱸ ᱜᱮᱠᱚ ᱵᱟᱠᱚ ᱞᱟᱸᱫᱟ ᱫᱟᱲᱮᱭᱟᱜᱼᱟ ᱾ ᱱᱟᱦᱟᱜ ᱡᱩᱜᱽ ᱨᱮ ᱠᱚᱢᱯᱭᱩᱴᱚᱨ ᱮ ᱨᱚᱲ, ᱞᱟᱸᱫᱟ ᱟᱨ ᱥᱮᱨᱮᱧ ᱫᱟᱲᱮᱭᱟᱜ ᱨᱮᱦᱚᱸ ᱜᱮ ᱡᱤᱣᱤ ᱵᱟᱹᱱᱩᱜ ᱛᱟᱭ ᱛᱮ ᱡᱤᱵᱽᱼᱡᱤᱭᱟᱹᱞᱤ ᱥᱟᱶ ᱠᱷᱚᱱ ᱫᱚᱭ ᱡᱩᱫᱟᱹ ᱜᱮᱭᱟ ᱾ ᱢᱟᱹᱱᱢᱤᱭᱟᱜ ᱫᱚ ᱟᱨᱦᱚᱸ ᱢᱤᱫᱴᱟᱹᱝ ᱢᱟᱨᱟᱝ ᱜᱩᱱ ᱢᱮᱱᱟᱜᱼᱟ ᱾ ᱚᱱᱟ ᱫᱚ ᱟᱡᱟᱜ ᱵᱩᱫᱷᱤ ᱾ ᱵᱩᱫᱷᱤ ᱫᱚ ᱡᱚᱛᱚ ᱡᱤᱣᱤᱭᱟᱱ ᱠᱚᱣᱟᱜ ᱜᱮ ᱠᱚᱢ ᱵᱟᱹᱲᱛᱤ ᱫᱚ ᱢᱮᱱᱟᱜ ᱜᱮᱭᱟ ᱾ ᱮᱴᱟᱜ ᱡᱤᱣᱤᱭᱟᱱ ᱠᱚᱨᱮ ᱡᱮᱢᱚᱱ ᱥᱤᱢᱯᱟᱧᱡᱤ ᱠᱚᱦᱚᱸ ᱰᱷᱮᱨ ᱜᱮᱠᱚ ᱵᱩᱫᱷᱤ ᱟᱱᱟ ᱟᱨ ᱚᱱᱠᱟ ᱜᱮ ᱫᱟᱜ ᱵᱷᱤᱛᱨᱤ ᱨᱮ ᱛᱟᱦᱮᱸᱱ ᱰᱚᱞᱯᱷᱤᱱ (Dolphin) ᱦᱟᱹᱠᱩ ᱦᱚᱸ ᱰᱷᱮᱨ ᱜᱮᱠᱚ ᱵᱩᱫᱷᱤᱭᱟᱱᱟ ᱾ ᱮᱱ ᱨᱮᱦᱚᱸ ᱱᱩᱠᱩ ᱡᱤᱭᱟᱹᱞᱤ ᱫᱚ ᱢᱟᱹᱱᱢᱤᱭᱟᱜ ᱵᱩᱫᱷᱤ ᱠᱷᱚᱱ ᱫᱚ ᱟᱹᱰᱤ ᱞᱟᱛᱟᱨ ᱨᱮᱜᱮ ᱢᱮᱱᱟᱜ ᱠᱚᱣᱟ ᱾ ᱟᱠᱚᱣᱟᱜ ᱦᱚᱲᱢᱚ ᱜᱚᱲᱦᱚᱱ ᱵᱩᱫᱷᱤ ᱟᱨ ᱢᱚᱱᱮ ᱥᱟᱶ ᱯᱚᱨᱛᱟᱲ ᱛᱮ ᱥᱚᱨᱮᱥ ᱪᱮ ᱥᱮᱬᱟ ᱵᱟᱝ ᱠᱚ ᱦᱩᱭ ᱫᱟᱲᱮ ᱟᱠᱟᱣᱟᱫᱼᱟ ᱪᱮ ᱵᱟᱠᱚ ᱞᱮᱠᱷᱟ ᱫᱟᱲᱮᱭᱟᱜᱼᱟ ᱾
ᱢᱟᱹᱱᱢᱤᱭᱟᱜ ᱟᱨᱦᱚᱸ ᱢᱟᱨᱟᱝ ᱫᱟᱲᱮ ᱫᱚ ᱢᱚᱱᱮ ᱠᱟᱱᱟ ᱾ ᱡᱟᱦᱟᱱᱟᱜ ᱢᱤᱫᱴᱟ.ᱝ ᱠᱟᱹᱢᱤ ᱢᱟᱬᱟᱝ ᱫᱚ ᱢᱚᱱᱮᱨᱮ ᱢᱤᱫᱴᱟ.ᱝ ᱠᱟᱹᱢᱤ ᱢᱟᱬᱟᱝ ᱫᱚ ᱢᱚᱱᱮᱨᱮ ᱩᱭᱦᱟᱹᱨ ᱞᱟᱹᱠᱛᱤᱜᱼᱟ ᱾ ᱢᱚᱱᱮ ᱥᱟᱯᱲᱟᱣ ᱫᱚ ᱠᱟᱹᱢᱤ ᱥᱟᱹᱛᱩᱜ ᱨᱮᱱᱟᱝ ᱢᱟᱨᱟᱝ ᱦᱟᱹᱛᱭᱟᱹᱨ ᱠᱟᱱᱟ ᱾ ᱚᱱᱟᱛᱮ ᱡᱟᱦᱟᱸᱱ ᱠᱟᱹᱢᱤ ᱞᱟᱹᱜᱤᱫ ᱠᱷᱟᱱ ᱫᱚ ᱢᱚᱱᱮ ᱜᱮ ᱢᱟᱬᱟᱝ ᱢᱟᱬᱟᱝ ᱛᱮᱭ ᱫᱟᱹᱲᱟ ᱾ ᱢᱚᱱᱮ ᱫᱚ ᱵᱟᱨ ᱞᱮᱠᱟ ᱦᱚᱸ ᱦᱩᱭ ᱫᱟᱲᱮᱭᱟᱜᱼᱟ ᱾ ᱢᱤᱫ ᱫᱚ ᱢᱩᱠᱨᱩᱲ ᱢᱚᱱᱮ (Determination) ᱟᱨ ᱫᱚᱥᱟᱨᱟᱜ ᱫᱚ ᱞᱤᱪᱟᱹᱲ ᱢᱚᱱᱮ ᱾ ᱠᱮᱴᱮᱡ ᱢᱚᱱᱮᱭᱟᱱ ᱦᱚᱲ ᱫᱚ ᱡᱚᱛᱚᱣᱟᱜ ᱠᱟᱹᱢᱤ ᱜᱮ ᱜᱟᱱ ᱫᱟᱲᱮᱭᱟᱜ ᱟᱭ ᱟᱨ ᱞᱤᱪᱟᱹᱲ ᱢᱚᱱᱮ ᱦᱚᱲ ᱫᱚ ᱛᱟᱭᱚᱢ ᱨᱮᱜᱮ ᱛᱟᱦᱮᱸᱱᱟᱭ ᱾ ᱥᱚᱡᱷᱮ ᱪᱮ ᱠᱮᱴᱮᱡ ᱢᱚᱱᱮ ᱫᱚ ᱠᱮᱴᱮᱡ ᱫᱷᱤᱨᱤ ᱟᱨ ᱞᱤᱪᱟ.ᱲ ᱢᱚᱱᱮ ᱫᱚ ᱯᱚᱫᱽᱜᱟ ᱫᱷᱤᱨᱤ ᱞᱮᱠᱟ ᱾
ᱡᱟᱦᱟᱸᱭ ᱦᱚᱲᱟᱜ ᱢᱚᱱᱮ ᱞᱤᱪᱟᱹᱲ ᱜᱮᱭᱟ ᱩᱱᱤ ᱫᱚ ᱠᱟᱹᱢᱤ ᱦᱚᱸᱛᱟᱭ ᱵᱟᱝ ᱜᱟᱱᱚᱜᱼᱟ ᱟᱨ ᱜᱟᱱᱚᱜ ᱨᱮᱦᱚᱸ ᱜᱮ ᱟᱹᱰᱤ ᱮᱴᱠᱮᱴᱚᱬᱮ ᱛᱮᱭ ᱥᱟᱹᱛᱼᱟ ᱾ ᱚᱱᱟᱛᱮ ᱡᱚᱛᱚ ᱠᱟᱹᱢᱤ ᱨᱮᱜᱮ ᱢᱚᱱᱮ ᱫᱚ ᱢᱟᱬᱟᱝ ᱢᱟᱬᱟᱝ ᱛᱮ ᱠᱮᱴᱮᱡ ᱥᱟᱺᱦᱤᱡ ᱫᱟᱹᱲ ᱚᱪᱚ ᱞᱮ ᱮᱱᱟᱝ ᱠᱟᱹᱢᱤ ᱫᱚ ᱥᱟᱹᱛᱩᱜᱼᱟ ᱾ ᱠᱷᱟᱹᱞᱤ ᱢᱚᱱᱮ ᱥᱩᱢᱩᱝ ᱵᱷᱮᱡᱟ ᱜᱚᱫ ᱠᱟᱭ ᱛᱮᱦᱚᱸ ᱵᱟᱝ ᱜᱟᱱᱚᱜᱼᱟ ᱾ ᱢᱩᱠᱨᱩᱲ ᱢᱚᱱᱮ ᱥᱟᱶ ᱜᱚᱲᱚ ᱟᱭ ᱡᱟᱹᱨᱩᱲ ᱠᱟᱱᱟ ᱾ ᱡᱚᱛᱚ ᱠᱟᱹᱢᱤ ᱨᱮᱜᱮ ᱢᱚᱱᱮ ᱵᱩᱫᱷᱤ ᱟᱨ ᱪᱷᱩᱴᱟᱹᱣ ᱢᱤᱫ ᱥᱚᱡᱷᱮ ᱜᱟᱨ ᱨᱮ ᱛᱟᱦᱮᱸ ᱞᱮᱱ ᱠᱷᱟᱱ ᱠᱟᱹᱢᱤ ᱫᱚ ᱥᱟᱹᱛ ᱜᱚᱫᱚᱜᱼᱟ ᱟᱨ ᱯᱚᱫᱽᱜᱟ ᱫᱷᱤᱨᱤ ᱫᱚ ᱫᱷᱤᱨᱤ ᱧᱩᱛᱩᱢ ᱨᱮᱦᱚᱸ ᱜᱮ ᱦᱟᱥᱟ ᱛᱟᱱᱟᱜ ᱞᱮᱠᱟᱜᱮ ᱱᱟᱥᱮᱱᱟᱜ ᱛᱩᱠᱩᱡ ᱛᱮᱜᱮ ᱜᱮᱡᱮᱨᱚᱜᱼᱟ ᱪᱮ ᱵᱤᱫᱽᱨᱟᱹᱣ ᱜᱚᱫᱚᱜᱼᱟ ᱾
ᱚᱱᱠᱟ ᱜᱮ ᱞᱤᱪᱟᱹᱲ ᱢᱚᱱᱮ ᱦᱚᱸ ᱟᱛᱨᱟ ᱨᱮ ᱦᱤᱨᱤᱡ ᱯᱟᱹᱥᱤᱨᱚᱜ ᱛᱮ ᱟᱡᱟᱜ ᱵᱩᱴᱟᱹ ᱴᱷᱮᱱ ᱦᱚᱸ ᱚᱦᱚᱭ ᱥᱮᱴᱮᱨ ᱠᱮᱭᱟ ᱪᱮ ᱠᱟᱹᱢᱤ ᱦᱚᱸ ᱵᱟᱭ ᱥᱟᱹᱛ ᱠᱮᱭᱟ ᱾ ᱚᱱᱠᱟᱱ ᱴᱷᱟᱶ ᱨᱮᱫᱚ ᱰᱟᱹᱱ ᱪᱮ ᱵᱷᱩᱛ ᱢᱤᱫ ᱦᱚᱲᱟᱜ ᱢᱚᱱᱮᱨᱮ ᱫᱷᱟᱫᱚᱥ ᱟᱹᱜᱩ ᱠᱟᱛᱮ ᱢᱚᱱᱮ ᱠᱚ ᱢᱚᱥᱨᱟᱭ ᱛᱮ ᱟᱡ ᱦᱚᱸᱠᱚ ᱢᱟᱹᱴᱩᱡ ᱥᱟᱹᱨᱤ ᱮᱭᱟ ᱟᱨ ᱢᱩᱠᱨᱩᱲ ᱢᱚᱱᱮ ᱨᱮᱫᱚ ᱰᱟᱹᱱ ᱵᱷᱩᱛ ᱠᱚ ᱛᱟᱦᱮᱸᱱ ᱨᱮᱦᱚᱸ ᱠᱚ ᱟᱡᱟᱜ ᱠᱮᱴᱮᱡ ᱢᱚᱱᱮ ᱧᱮᱞ ᱛᱮ ᱵᱟᱠᱚ ᱥᱮᱱ ᱥᱩᱨ ᱫᱟᱲᱮᱭᱟᱜᱼᱟ ᱟᱨ ᱵᱟᱠᱚ ᱥᱩᱨ ᱫᱟᱲᱮᱭᱟᱜ ᱠᱷᱟᱱ ᱡᱚᱢᱮᱭᱟᱠᱚ ᱪᱤᱠᱟᱹᱛᱮ? ᱰᱟᱹᱱ ᱟᱨ ᱵᱷᱩᱛ ᱯᱟᱹᱛᱭᱟᱹᱣ ᱫᱚ ᱦᱚᱲᱟᱜ ᱪᱮ ᱢᱟᱹᱱᱢᱤᱭᱟᱜ ᱩᱭᱦᱟᱹᱨ ᱠᱟᱱᱟ ᱾
ᱩᱭᱦᱟᱹᱨ ᱫᱚ ᱢᱚᱱᱮ ᱠᱟᱱᱟ ᱾ ᱢᱚᱱᱮ ᱫᱚ ᱩᱭᱦᱟᱹᱨ ᱨᱤᱱᱤᱡ ᱢᱟᱨᱟᱝ ᱵᱚᱭᱦᱟ ᱠᱟᱱᱟᱭ ᱾ ᱚᱱᱟᱛᱮ ᱢᱚᱱᱮ ᱫᱚ ᱛᱤᱥ ᱦᱚᱸ ᱟᱞᱚᱢ ᱫᱷᱟᱫᱚᱥᱼᱟ ᱾ᱢᱚᱱᱮᱨᱮ ᱫᱷᱟᱫᱚᱥ ᱢᱤᱫ ᱫᱷᱟᱣ ᱵᱚᱞᱚ ᱞᱮᱱᱠᱷᱟᱱ ᱚᱱᱟ ᱚᱪᱚᱜ ᱜᱤᱰᱤ ᱫᱚ ᱟᱹᱰᱤ ᱜᱮ ᱟᱸᱴᱼᱟ ᱾
***
