ᱢᱤᱫᱴᱟᱹᱝ ᱛᱤᱨᱞᱟᱹ ᱦᱟᱜ ᱢᱟᱱᱮ ᱠᱷᱚᱡᱟᱭ……
ᱩᱱᱤ ᱱᱟᱯᱟᱭ ᱡᱤᱭᱚᱱ ᱠᱷᱟᱸᱰᱟᱣ ᱞᱟᱹᱜᱤᱫ
ᱡᱟᱦᱟᱸ ᱨᱮ ᱛᱷᱤᱨ ᱟᱠᱟᱱ ᱞᱮᱜᱮᱢ ᱫᱟᱜ ᱨᱮ
ᱚᱠᱚᱭ ᱦᱚᱸ ᱟᱞᱚ ᱠᱚ ᱪᱟᱯᱟᱫᱽ ᱢᱟ ᱫᱷᱤᱨᱤ
ᱜᱷᱟᱨᱚᱸᱡᱽ ᱨᱮ ᱡᱚᱛᱚ ᱠᱚ ᱛᱟᱦᱮᱱ ᱨᱟᱹᱥᱠᱟᱹ ᱨᱮ ᱾
ᱢᱤᱫᱴᱟᱹᱝ ᱛᱤᱨᱞᱟᱹ ᱦᱟᱜ ᱢᱟᱱᱮ ᱠᱷᱚᱡᱟᱭ ……
ᱡᱚᱠᱷᱚᱱ ᱨᱩᱣᱟᱹᱲᱟᱹᱧ ᱠᱟᱹᱢᱤ ᱠᱷᱚᱱ ᱥᱤᱸᱜᱟᱹᱲ ᱚᱠᱛᱚ
ᱢᱤᱫ ᱜᱤᱞᱟᱹᱥ ᱧᱩ ᱫᱟᱜ ᱤᱧ ᱦᱚᱸ ᱠᱚ ᱥᱩᱨᱟᱹᱧ
ᱱᱟᱥᱮ ᱠᱚ ᱢᱤᱛᱟᱹᱧ ᱡᱤᱨᱟᱹᱣᱚᱜ ᱢᱮ ᱢᱤᱫ ᱜᱷᱟᱹᱲᱤᱠ
ᱱᱚᱣᱟ ᱨᱮ ᱚᱠᱚᱭ ᱦᱚᱸ ᱟᱞᱚ ᱠᱚ ᱟᱹᱲᱤᱥᱟᱹᱧ ᱾
ᱢᱤᱫᱴᱟᱹᱝ ᱛᱤᱨᱞᱟᱹ ᱦᱟᱜ ᱢᱟᱱᱮ ᱠᱷᱚᱡᱟᱭ ……
ᱱᱟᱥᱮ ᱠᱟᱹᱢᱤ ᱠᱷᱚᱱᱤᱧ ᱜᱷᱟᱹᱲᱤᱠ ᱞᱮᱱ ᱨᱮ
ᱦᱟᱱᱟᱼᱱᱷᱟᱣᱟ ᱵᱟᱝ ᱫᱚᱥ ᱠᱟᱛᱮ ᱠᱚ ᱵᱷᱟᱵᱽᱱᱟᱜ
ᱵᱩᱜᱤᱼᱵᱟᱹᱲᱤᱡ ᱠᱚ ᱠᱩᱞᱤᱭᱤᱧ ᱫᱤᱱᱟᱹᱢ ᱡᱤᱭᱚᱱ ᱨᱮ
ᱱᱚᱣᱟ ᱜᱮ ᱱᱟᱯᱟᱭ ᱨᱤᱞᱟᱹᱼᱢᱟᱞᱟ ᱥᱟᱹᱜᱟᱹᱭ ᱟᱵᱚᱣᱟᱜ ᱾
ᱢᱤᱫᱴᱟᱹᱝ ᱛᱤᱨᱞᱟᱹ ᱦᱟᱜ ᱢᱟᱱᱮ ᱠᱷᱚᱡᱟᱭ……
ᱚᱲᱟᱜ ᱨᱮᱱᱟᱜ ᱠᱟᱹᱢᱤᱼᱠᱟᱹᱥᱱᱤ ᱟᱨ ᱫᱟ.ᱭᱠᱟᱹ ᱠᱚ
ᱟᱫᱷᱟᱼᱟᱫᱷᱟ ᱵᱟᱱᱟᱨ ᱛᱟᱞᱟ ᱨᱮ ᱦᱟᱹᱯᱟᱹᱴᱤᱧᱚᱜ ᱢᱟ
ᱤᱧ ᱴᱷᱮᱱ ᱚᱠᱛᱚ ᱛᱟᱦᱮᱱ, ᱵᱟᱝ ᱛᱟᱦᱮᱱ ᱡᱷᱚᱜ
ᱚᱲᱟᱜᱼᱫᱩᱣᱟ.ᱨ ᱚᱲᱟᱜ ᱞᱮᱠᱟ ᱜᱮ ᱟᱹᱭᱠᱟᱹᱣᱚᱜ ᱢᱟ ᱾
ᱢᱤᱫᱴᱟᱹᱝ ᱛᱤᱨᱞᱟᱹ ᱦᱟᱜ ᱢᱟᱱᱮ ᱠᱷᱚᱡᱟᱭ……
ᱚᱲᱟᱜ ᱨᱮ ᱵᱟᱨᱟᱵᱟᱹᱨᱤ ᱨᱮᱱᱟᱜ ᱦᱚᱠ ᱤᱧ ᱧᱟᱢ ᱢᱟ
ᱤᱧᱟᱜ ᱰᱤᱜᱽᱨᱤ, ᱞᱟᱥᱮᱨ ᱦᱟᱛᱟᱝ ᱟᱨ ᱜᱮᱭᱟᱱ
ᱪᱚᱨᱚᱠ ᱨᱩᱯ ᱥᱟᱶ ᱟᱞᱚ ᱠᱚ ᱛᱩᱞᱟᱹ ᱡᱚᱠᱷᱟᱭ ᱢᱟ
ᱤᱧᱟᱜ ᱜᱩᱱᱼᱵᱮᱵᱷᱟᱨ ᱧᱮᱞ ᱛᱮ ᱠᱚ ᱮᱢᱟᱹᱧ ᱢᱟ ᱢᱟᱹᱱ ᱾
ᱢᱤᱫᱴᱟᱹᱝ ᱛᱤᱨᱞᱟᱹ ᱦᱟᱜ ᱢᱟᱱᱮ ᱠᱷᱚᱡᱟᱭ……
ᱥᱟᱨᱟ ᱡᱤᱵᱚᱱ ᱥᱩᱠ ᱛᱮ ᱡᱤᱭᱚᱱ ᱵᱚ ᱠᱷᱟᱸᱰᱟᱣ
ᱥᱩᱠᱼᱫᱩᱠ ᱨᱮ ᱥᱟᱶᱛᱮ ᱵᱚᱱ ᱛᱟᱦᱮᱱ ᱡᱚᱛᱚ
ᱵᱩᱜᱤᱼᱵᱟᱹᱲᱤᱡ ᱥᱟᱶᱛᱮ ᱵᱚᱱ ᱧᱮᱞ ᱥᱟᱢᱴᱟᱣ
ᱡᱩᱢᱤᱫᱽ ᱠᱟᱛᱮ ᱥᱟᱶᱼᱥᱟᱶ ᱵᱚᱱ ᱛᱟᱦᱮᱱ ᱡᱚᱛᱚ ᱾
***
