ᱩᱞ ᱫᱟᱨᱮ

ᱟᱞᱮ ᱵᱟᱲᱜᱮ ᱨᱮ ᱢᱟ,
ᱛᱟᱞᱟ ᱵᱟᱲᱜᱮ ᱨᱮ
ᱯᱟᱥᱱᱟᱣ ᱟᱛᱮ ᱦᱟᱨᱟ
ᱨᱟᱠᱟᱵ ᱟᱠᱟᱱ ᱩᱞ ᱫᱟᱨᱮ ᱾
ᱵᱟᱞᱮ ᱵᱮᱠᱮᱨ ᱤᱧ ᱛᱟᱸᱦᱮ ᱞᱮᱱ ᱨᱮ,
ᱩᱞ ᱯᱚᱦᱟ ᱫᱟᱨᱮ ᱢᱟ ᱠᱚ ᱨᱚᱦᱚᱭ ᱞᱮᱫ
ᱥᱟᱶ – ᱥᱟᱶ ᱞᱤᱧ ᱦᱟᱨᱟ ᱨᱟᱠᱟᱵ ᱮᱱ,
ᱫᱟᱨᱮ ᱛᱤᱧ ᱦᱚᱸ ᱡᱚ ᱵᱟᱦᱟ ᱛᱮ ᱯᱮᱨᱮᱡ ᱮᱱ ᱾
ᱩᱱᱟᱹᱜ ᱚᱥᱟᱨ ᱩᱞ ᱫᱟᱨᱮ,
ᱦᱟᱹᱲᱩᱵ ᱛᱮ ᱢᱟ ᱵᱟ.ᱧ ᱠᱩᱲᱟᱹᱣ
ᱰᱟ.ᱨ ᱥᱟᱠᱟᱢ ᱛᱮ ᱮᱥᱮᱫ ᱟᱠᱟᱱ
ᱥᱮᱨᱢᱟ ᱜᱮ ᱢᱟ ᱵᱟᱝ ᱧᱮᱞᱚᱜ ᱾
ᱠᱩᱦᱲᱟ. ᱛᱮ ᱢᱟ ᱩᱢ ᱟᱵᱚᱜ,
ᱨᱚᱸᱜᱚ ᱧᱩᱨᱩᱜ ᱫᱟᱨᱮ ᱯᱮᱨᱮᱡ ᱵᱟᱦᱟ
ᱮᱱ ᱦᱚᱸ ᱢᱟᱥᱮ ᱡᱚ –
ᱡᱟᱹᱞᱤᱜ ᱦᱟᱭᱟ ᱩᱞ ᱛᱤᱧ ᱢᱟ ᱾
ᱫᱟᱨᱮ ᱯᱮᱨᱮᱡ ᱵᱮᱞᱮ ᱩᱞ
ᱨᱟᱥᱟ ᱛᱮ ᱢᱟ ᱥᱚᱨᱚᱵᱚᱨᱚ
ᱪᱮᱸᱬᱮ ᱪᱩᱯᱨᱩᱡ, ᱛᱳᱲ, ᱥᱟᱨᱜᱟ
ᱥᱟᱶᱛᱮ ᱢᱟᱹᱱᱢᱤ ᱦᱚᱸ ᱠᱚ ᱞᱚᱵᱷᱟᱣ ᱠᱚᱜ ᱾
ᱦᱚᱭ ᱵᱟᱹᱨᱰᱩ, ᱫᱟᱜ ᱡᱟ.ᱲᱤ ᱛᱮ
ᱡᱷᱟᱢᱯᱟ ᱡᱷᱟᱹᱠᱩᱨ ᱩᱞ ᱠᱚ ᱢᱟ ᱦᱤᱞᱟ.ᱣᱜ
ᱢᱚᱱᱮ ᱛᱮ ᱢᱟᱹᱧ ᱵᱤᱪᱷᱚᱠᱚᱜ,
ᱯᱟᱞᱮᱱ ᱩᱞ ᱰᱟ.ᱨ ᱪᱟᱜᱟᱲ ᱠᱟᱛᱮ ᱧᱩᱨᱩᱜ ᱾
ᱵᱟᱲᱜᱮ ᱨᱮᱱᱟᱜ ᱩᱞ ᱫᱟᱨᱮ
ᱵᱮᱨᱮᱞ ᱛᱮ ᱢᱟ ᱩᱞ ᱟᱢᱥᱤ ᱟᱨ
ᱵᱤᱞᱤ ᱨᱮ ᱢᱟᱢ ᱦᱟᱺᱵᱩᱲ ᱫᱚ __
ᱩᱞ ᱫᱟᱨᱮ ᱵᱩᱴᱟ. ᱨᱮ,
ᱦᱮᱢᱟᱞ ᱜᱮ ᱢᱟᱹᱱᱢᱤ ᱟᱨ
ᱡᱤᱵᱽ – ᱡᱤᱭᱟ.ᱞᱤ ᱠᱚ ᱩᱢᱩᱞᱚᱜ
ᱟᱨᱦᱚᱸ ᱢᱟᱥᱮ ᱞᱩᱛᱤ – ᱛᱮᱨᱚᱢ,
ᱦᱟᱱᱟ – ᱱᱚᱣᱟ ᱰᱟ.ᱨ ᱨᱮ ᱠᱚ ᱪᱷᱟᱛᱟᱭ ᱫᱚ ᱾
ᱥᱮᱛᱟᱜ ᱛᱚᱨᱟ ᱟ.ᱴᱩᱯᱟ.ᱴᱩ,
ᱴᱷᱮᱠᱟ ᱥᱟᱵ ᱠᱟᱛᱮᱧ ᱪᱟᱞᱟᱜ ᱩᱞ ᱦᱟᱞᱟᱝ
ᱩᱞ ᱦᱟᱞᱟᱝ ᱛᱮ ᱞᱟᱸᱜᱟ ᱞᱮᱱ ᱠᱷᱟᱱᱤᱧ,
ᱡᱤᱨᱟ.ᱣ ᱡᱤᱨᱟ.ᱣ ᱩᱞ ᱤᱧ ᱡᱚᱡᱚᱢ ᱾
ᱢᱚᱪᱟ ᱯᱮᱨᱮᱡ ᱛᱷᱚᱠᱚᱵᱚᱠᱚ,
ᱴᱷᱮᱠᱟ ᱯᱮᱨᱮᱡ ᱩᱞ
ᱨᱚ ᱢᱟ ᱠᱚ ᱰᱷᱮᱸᱲᱮ ᱰᱷᱮᱸᱲᱮ ᱤᱧ,
ᱢᱩ ᱰᱚᱜᱽ ᱨᱮ ᱢᱟ ᱠᱚ ᱟᱵ ᱤᱧ ᱾
ᱛᱤᱠᱤᱱ ᱛᱟᱨᱟᱥᱤᱧ ᱤᱧ ᱡᱷᱤᱞᱩᱝᱣᱟ.ᱜ
ᱫᱟᱨᱮ ᱰᱟ.ᱨ ᱨᱮ
ᱟᱹᱛᱩ ᱨᱮᱱ ᱜᱤᱫᱽᱨᱟ. ᱡᱷᱚᱛᱚ
ᱦᱤᱡᱩᱜ ᱟᱠᱚ ᱠᱷᱤᱞᱰᱩ ᱮᱱᱮᱡ ᱛᱮ ᱿

***