ᱦᱚᱯᱚᱱ ᱢᱟᱹᱭ
ᱨᱟᱹᱱᱤ ᱢᱩᱨᱢᱩ
ᱟᱢ ᱢᱟ ᱦᱚᱯᱚᱱ ᱢᱟᱹᱭ
ᱛᱤᱨᱞᱟᱹ ᱦᱚᱯᱚᱱ
ᱟᱹᱰᱤᱢ ᱥᱚᱨᱮᱥᱟ
ᱟᱹᱰᱤᱢ ᱱᱤᱨᱚᱲᱟ
ᱱᱤᱛ ᱱᱚᱰᱮ ᱫᱷᱤᱱᱟᱹᱝ ᱦᱟᱸᱰᱮ
ᱦᱚᱯᱚᱱ ᱮᱨᱟ
ᱵᱟᱹᱦᱩ ᱠᱩᱲᱤ,
ᱜᱚᱜᱚ ᱨᱩᱯ ᱛᱮ
ᱟᱢ ᱜᱮ ᱡᱤᱣᱤᱢ ᱥᱤᱨᱡᱟᱹᱣᱟ
ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ !
ᱱᱚᱣᱟ ᱢᱤᱨᱛᱤᱠᱟ ᱨᱮᱹᱱ
ᱢᱤᱫ ᱱᱚᱝᱠᱟᱱ ᱡᱤᱵᱽ ᱠᱟᱱᱟᱢ
ᱟᱢ ᱵᱮᱜᱚᱨ ᱵᱟᱹᱱᱩᱜ-ᱟ
ᱱᱚᱣᱟ ᱥᱟᱶᱛᱟ ᱨᱮᱭᱟᱜ
ᱩᱭᱦᱟᱹᱨ ᱠᱩᱠᱢᱩ,
ᱟᱢ ᱢᱮᱱᱟᱢ ᱠᱷᱟᱱ
ᱡᱚᱛᱚᱣᱟᱜ ᱢᱮᱱᱟᱜ-ᱟ
ᱟᱢ ᱵᱟᱝᱠᱷᱟᱱ
ᱪᱮᱫ ᱦᱚᱸ ᱵᱟᱹᱱᱩᱜ-ᱟ!
ᱥᱚᱱᱮᱨ ᱠᱷᱟᱧᱪᱟᱨ ᱢᱤᱨᱩ
ᱜᱷᱟᱨᱚᱸᱡᱽ ᱫᱩᱞᱟᱹᱲ ᱵᱤᱴᱤ
ᱵᱟᱦᱟᱢᱩᱱᱤ – ᱥᱩᱨᱩᱡᱽᱢᱩᱱᱤ
ᱨᱤᱲᱤᱢ-ᱨᱤᱲᱤᱢ ᱫᱟᱜ ᱛᱟᱞᱟ
ᱯᱚᱨᱟᱭᱱᱤ ᱵᱟᱦᱟ ᱞᱮᱠᱟ
ᱞᱤᱭᱚᱨ-ᱠᱚᱫᱚᱨ
ᱦᱤᱥᱤᱫ ᱦᱚᱭ ᱥᱟᱶᱛᱮ
ᱞᱩᱦᱩᱠ ᱟᱹᱪᱩᱨᱟ !
ᱟᱢᱟᱜ ᱨᱩᱯ ᱜᱩᱱ ᱛᱮᱜᱮ
ᱜᱷᱟᱨᱚᱸᱡᱽ ᱨᱤᱱ ᱥᱟᱶᱛᱮ
ᱟᱹᱛᱩ ᱴᱚᱞᱟ ᱨᱮ
ᱥᱤᱵᱤᱞ ᱥᱟᱹᱜᱟᱹᱭ ᱮᱢ
ᱛᱚᱞ ᱫᱚᱦᱚ ᱟᱠᱟᱫ !
ᱞᱤᱞᱤ ᱵᱤᱪᱷᱤ ᱫᱷᱟᱹᱨᱛᱤ ᱯᱩᱨᱤ ᱨᱮ
ᱧᱟᱞᱟᱫ ᱥᱮᱨᱢᱟ ᱞᱟᱛᱟᱨ ᱨᱮ
ᱵᱤᱞ ᱟᱠᱟᱱ ᱟᱴᱮᱫ ᱟᱠᱟᱱ
ᱦᱟᱹᱨᱭᱟᱹᱲ ᱚᱛ ᱦᱟᱥᱟ
ᱟᱨ ᱦᱚᱸ ᱢᱮᱱᱟᱜ
ᱞᱮᱜᱮᱢ ᱞᱮᱜᱮᱢ
ᱞᱤᱸᱜᱤᱱ ᱜᱟᱰᱟ ᱫᱟᱜ!
ᱥᱤᱫᱩᱵ ᱢᱮᱱᱟᱜ
ᱵᱤᱨ ᱵᱩᱨᱩ ᱫᱟᱨᱮ ᱱᱟᱹᱬᱤ
ᱥᱟᱣᱛᱮ ᱨᱮᱭᱟᱲ ᱦᱤᱥᱤᱫ ᱦᱚᱭ !
ᱵᱟᱧᱪᱟᱣ ᱢᱮᱥᱮ
ᱫᱟᱥᱟᱣᱜ ᱠᱟᱱ
ᱩᱡᱟᱹᱲᱚᱜ ᱠᱟᱱ
ᱡᱤᱭᱟᱹᱲ ᱦᱟᱹᱨᱭᱟᱹᱲ
ᱱᱚᱣᱟ ᱫᱷᱟᱹᱨᱛᱤ
ᱦᱚᱯᱚᱱ ᱢᱟᱹᱭ ᱟᱢᱟᱜ
ᱫᱤᱞ ᱫᱟᱲᱮ ᱛᱮ !
ᱛᱤᱨᱞᱟᱹ ᱠᱟᱱᱟᱢ ᱢᱚᱱᱮ ᱠᱟᱛᱮ
ᱟᱞᱚᱢ ᱢᱚᱱᱮᱜ
ᱦᱚᱯᱚᱱ ᱢᱟᱹᱭ ᱟᱢ ᱞᱤᱪᱟᱹᱲ,
ᱨᱮᱦᱮᱫ ᱞᱮᱠᱟ
ᱜᱟᱺᱦᱤᱨ ᱩᱭᱦᱟᱹᱨ ᱢᱮ
ᱥᱟᱨᱡᱚᱢ ᱫᱟᱨᱮ ᱞᱮᱠᱟ
ᱛᱤᱸᱜᱩ ᱠᱮᱴᱮᱡᱚᱜ ᱢᱮ
ᱦᱚᱭ ᱵᱟᱹᱨᱰᱩ ᱛᱮ ᱦᱚᱸ
ᱟᱞᱚᱢ ᱞᱤᱰᱩᱨᱚᱜ-ᱟ !
ᱫᱩᱞᱟᱹᱲ ᱢᱟᱭᱟ ᱜᱚᱨᱚᱡᱽ ᱛᱮ
ᱡᱚᱜᱟᱣ ᱡᱚᱛᱚᱱ ᱢᱮ
ᱫᱟᱜ ᱫᱩᱞ ᱦᱟᱨᱟ ᱠᱟᱛᱮ
ᱥᱮᱪᱮᱫ ᱵᱟᱹᱛᱤ ᱛᱮ
ᱥᱟᱶᱛᱟ ᱢᱟᱨᱥᱟᱞ ᱢᱮ,
ᱠᱚᱭᱚᱜᱽ ᱢᱮᱥᱮ ᱢᱟᱲᱟᱝ
ᱞᱟᱦᱟ ᱥᱮᱫ ᱛᱟᱲᱟᱢ ᱢᱮ
ᱟᱹᱨᱥᱤ ᱞᱮᱠᱟ ᱡᱷᱟᱞᱠᱟᱣᱜ
ᱪᱟᱸᱫᱚ ᱟᱦᱞᱟ ᱜᱮ
ᱦᱚᱯᱚᱱ ᱢᱟᱹᱭ ᱟᱢᱮ
ᱞᱟᱸᱫᱟ ᱫᱟᱨᱟᱢ ᱮᱫ ᱢᱮ !
ᱥᱟᱜᱮᱱ ᱥᱟᱶᱟᱨ ᱜᱮᱭᱟᱭ ᱦᱚᱯᱚᱱ ᱢᱟᱹᱭ
ᱢᱤᱫ ᱫᱤᱱ ᱦᱤᱞᱚᱜ
ᱱᱚᱣᱟ ᱫᱷᱟᱹᱨᱛᱤ ᱨᱟᱪᱟ ᱨᱮ
ᱡᱷᱩᱲ ᱜᱚᱢᱦᱮᱲ ᱩᱢᱩᱞ ᱞᱮᱠᱟ
ᱡᱤᱭᱟᱹᱲ ᱦᱟᱹᱨᱭᱟᱹᱲ ᱜᱮ
ᱥᱟᱶᱛᱟ ᱩᱥᱩᱞ ᱴᱷᱟᱶ ᱨᱮ
ᱡᱚᱥ ᱚᱞ ᱪᱤᱠᱤ ᱨᱮᱭᱟᱜ
ᱠᱟᱹᱢᱤ ᱠᱟᱹᱥᱱᱤ ᱟᱞᱚᱢ ᱵᱟᱹᱜᱤᱱᱟ
ᱯᱟᱹᱨᱥᱤ ᱟᱨ ᱪᱤᱠᱤ ᱨᱮᱭᱟᱜ
ᱨᱟᱥᱟ ᱜᱟᱵᱮ ᱥᱤᱵᱤᱞ ᱥᱚᱲᱚᱢ
ᱢᱤᱫ ᱫᱤᱱ ᱠᱚ ᱴᱷᱤᱠᱟᱹᱭ
ᱜᱮᱭᱟ
ᱟᱹᱛᱩ ᱚᱲᱟᱜ ᱨᱮ !
ᱵᱮᱯᱮᱫ ᱯᱮᱥᱮ
ᱫᱮᱞᱟ ᱪᱮᱴᱷᱟᱜ ᱯᱮᱥᱮ
ᱫᱟᱹᱭ ᱠᱚ ᱢᱟᱹᱭ ᱠᱚ
ᱞᱟᱦᱟ ᱦᱤᱡᱩᱜ ᱯᱮ
ᱟᱵᱚᱣᱟᱜ ᱥᱚᱱᱮᱨ ᱜᱷᱟᱨᱚᱸᱡᱽ
ᱞᱮᱠᱟ ᱡᱚᱛᱚᱱ ᱟᱵᱚ
ᱟᱵᱚᱣᱟᱜ ᱡᱟᱹᱛᱤ ᱫᱷᱚᱨᱚᱢ ᱥᱟᱶᱛᱟ ᱥᱟᱶᱦᱮᱫ
ᱞᱟᱦᱟ ᱥᱩᱛᱩᱜ ᱤᱫᱤ ᱟᱵᱚᱱ
ᱩᱥᱩᱞ ᱴᱷᱟᱶ ᱨᱮ !
***
