ᱢᱟᱹᱱᱢᱤ ᱡᱤᱭᱚᱱ ᱥᱚᱨᱮᱥ ᱡᱤᱭᱚᱱ
ᱡᱚᱛᱚ ᱠᱷᱚᱱᱟᱜ ᱥᱚᱨᱮᱥᱟ
ᱪᱟᱸᱫᱚ ᱵᱚᱸᱜᱟ ᱥᱟᱶ ᱡᱚᱲᱟᱣ ᱢᱮᱱᱟᱜ
ᱵᱚᱸᱜᱟ ᱵᱩᱨᱩ ᱥᱟᱶ ᱥᱟᱹᱜᱟᱹᱭ ᱾
ᱱᱚᱣᱟ ᱫᱤᱥᱚᱢ ᱟᱵᱚ ᱫᱤᱥᱚᱢ
ᱟᱹᱰᱤ ᱱᱟᱯᱟᱭ ᱫᱤᱥᱚᱢ
ᱚᱜᱚᱢ ᱫᱚᱨᱮᱭᱟ ᱛᱮ ᱮᱥᱮᱫ ᱟᱠᱟᱱ
ᱵᱤᱨ ᱵᱩᱨᱩ ᱛᱮ ᱜᱷᱮᱨᱟᱣ ᱟᱠᱟᱱ ᱾
ᱚᱱᱟ ᱛᱟᱞᱟᱨᱮ ᱫᱤᱥᱚᱢ ᱛᱟᱵᱚᱱ
ᱟᱵᱚ ᱢᱟᱹᱱᱢᱤ ᱠᱚᱣᱟᱜ
ᱱᱚᱣᱟ ᱡᱤᱭᱚᱱ ᱢᱟᱹᱱᱢᱤ ᱡᱤᱭᱚᱱ
ᱟᱹᱰᱤ ᱥᱚᱨᱮᱥ ᱡᱤᱭᱚᱱ ᱾
ᱵᱤᱨ ᱵᱩᱨᱩ ᱫᱚ ᱥᱟᱡᱟᱣ ᱟᱠᱟᱱ
ᱫᱷᱤᱨᱤ ᱫᱟᱨᱮ ᱱᱟᱹᱬᱤ ᱛᱮ
ᱵᱟᱡᱟᱨ ᱱᱟᱜᱟᱨ ᱫᱚ ᱥᱟᱡᱟᱣ ᱟᱠᱟᱱ
ᱯᱟᱠᱟ ᱫᱚᱞᱟᱱ ᱵᱤᱡᱽᱞᱤ ᱵᱟᱹᱛᱤ ᱨᱮᱞ ᱢᱚᱴᱚᱨ ᱜᱟᱹᱰᱤ ᱛᱮ ᱾
ᱚᱱᱟ ᱥᱟᱶᱛᱮ ᱢᱮᱱᱟᱜ ᱵᱚᱱᱟ
ᱡᱚᱛᱚ ᱠᱟᱹᱢᱤᱨᱮ ᱟᱵᱚ ᱢᱟᱹᱱᱢᱤ ᱦᱚᱯᱚᱱ ᱜᱮ
ᱢᱟᱹᱱᱢᱤ ᱛᱮᱜᱮ ᱵᱚᱱ ᱥᱟᱡᱟᱣ ᱟᱠᱟᱫ
ᱫᱷᱟᱹᱨᱛᱤ ᱥᱟᱨᱟ ᱫᱤᱥᱚᱢ ᱨᱮ ᱾
ᱵᱚᱦᱚᱜ ᱨᱮᱱᱟᱜ ᱵᱩᱫᱷᱤ ᱠᱷᱮᱲᱟᱣ ᱠᱟᱛᱮ
ᱦᱚᱲᱢᱚ ᱨᱮᱱᱟᱜ ᱫᱟᱲᱮ ᱦᱮᱞᱟᱣ ᱠᱟᱛᱮ
ᱠᱟᱹᱢᱤ ᱡᱚᱝ ᱠᱟᱱᱟ ᱵᱚᱱ ᱥᱟᱨᱟ ᱫᱤᱥᱚᱢ ᱨᱮ
ᱟᱯᱟᱱ ᱟᱹᱯᱤᱱ ᱫᱟᱲᱮ ᱛᱮ ᱾
ᱵᱩᱫᱷᱤ ᱮᱢᱚᱜᱤᱡ ᱫᱚᱭ ᱵᱩᱜᱫᱷᱤ ᱠᱟᱱ
ᱢᱤᱥᱛᱤᱨᱤ ᱵᱟᱰᱚᱦᱤ ᱫᱚᱭ ᱢᱤᱥᱛᱤᱨᱤᱜ ᱠᱟᱱ
ᱚᱞᱚᱜᱤᱡ ᱫᱚᱭ ᱚᱼᱚᱞ ᱠᱟᱱ
ᱪᱟᱹᱥᱤ ᱵᱚᱭᱦᱟ ᱫᱚᱭ ᱪᱟᱪᱟᱥ ᱠᱟᱱ ᱾
ᱡᱚᱛᱚ ᱠᱷᱚᱱᱟᱜ ᱢᱟᱹᱱᱢᱤ ᱡᱤᱭᱚᱱ
ᱟᱹᱰᱮ ᱥᱚᱨᱮᱥ ᱡᱤᱭᱚᱱ
ᱪᱟᱹᱥᱤ ᱵᱚᱭᱦᱟ ᱠᱚ ᱪᱟᱪᱟᱥ ᱠᱟᱱ
ᱱᱟᱱᱟ ᱦᱩᱱᱟᱹᱨ ᱟᱱᱟᱡᱽ ᱯᱷᱚᱥᱚᱞ ᱾
ᱚᱸᱰᱮ ᱠᱷᱚᱱᱟᱜ ᱜᱮ ᱦᱩᱭᱩᱜ ᱠᱟᱱ
ᱡᱚᱢᱟᱜ ᱥᱟᱱᱟᱢ ᱡᱮᱛᱮ ᱠᱚᱣᱟᱜ
ᱚᱱᱟᱛᱤᱧ ᱢᱮᱱᱟ ᱢᱟᱹᱱᱢᱤ ᱡᱤᱭᱚᱱ
ᱡᱚᱛᱚ ᱠᱷᱚᱱᱟᱜ ᱥᱚᱨᱮᱥ ᱡᱤᱭᱚᱱ ᱾
***
