ᱵᱟᱹᱭᱨᱤᱭ ᱞᱮᱵᱮᱫ ᱢᱮᱭᱟ, ᱥᱮᱵᱮᱫ ᱢᱮᱭᱟ ᱟᱨ ᱮ ᱡᱮᱸᱵᱮᱫ ᱢᱮᱭᱟ ᱾ ᱛᱷᱤᱨ ᱛᱷᱟᱨᱮᱢ ᱛᱟᱦᱮᱸᱱᱟ, ᱢᱚᱱ ᱠᱩᱥᱤᱢ ᱠᱟᱹᱢᱤ ᱡᱚᱝ-ᱟ ᱟᱨ ᱡᱟᱦᱟᱸ ᱢᱮᱱᱟᱜ-ᱟ ᱚᱱᱟ ᱡᱚᱢ ᱠᱟᱛᱮᱢ ᱟᱹᱥᱩᱞᱚᱜ-ᱟ ᱾ ᱮᱱᱮᱡ ᱡᱚᱝ-ᱟᱢ, ᱥᱮᱨᱮᱧ ᱡᱚᱝ-ᱟᱢ ᱟᱨ ᱨᱟᱹᱥᱠᱟᱹ ᱨᱮ ᱡᱤᱭᱚᱱ ᱮᱢ ᱠᱷᱟᱸᱰᱟᱣᱟ ᱾ ᱢᱩᱡ ᱞᱮᱠᱟ, ᱩᱯᱤ ᱞᱮᱠᱟ, ᱡᱤᱵᱽ ᱡᱤᱭᱟᱹᱞᱤ ᱞᱮᱠᱟᱢ ᱛᱟᱦᱮᱸ ᱦᱟᱹᱯᱤ ᱠᱚᱜ-ᱟ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱾
ᱤᱠᱷᱟᱹᱱ ᱥᱤᱨᱡᱚᱱ ᱨᱮᱭᱟᱜ ᱥᱟᱹᱨᱤᱭᱟᱹᱛ ᱫᱚ ᱱᱚᱣᱟ ᱠᱟᱱᱟ, ᱛᱷᱤᱨ ᱟᱠᱟᱱ ᱦᱚᱲ ᱫᱚ ᱛᱷᱤᱭᱟᱹᱭᱮᱢ ᱾ ᱞᱤᱪᱟᱹᱲ ᱦᱚᱲ ᱫᱚ ᱞᱟᱜᱟᱭᱮᱢ ᱾ ᱟᱨ ᱱᱮᱢᱚᱥ ᱦᱚᱲ ᱫᱚ ᱱᱟᱥᱟᱣ ᱢᱩᱪᱟᱹᱫ ᱮᱢ ᱾ ᱚᱠᱚᱭ ᱦᱚᱸ ᱟᱢ ᱛᱷᱤᱨ ᱠᱟᱛᱮ ᱥᱚᱨᱮᱥ ᱡᱤᱭᱚᱱ ᱵᱟᱭ ᱡᱤᱣᱤᱫ ᱚᱪᱚᱣᱟᱢᱟ ᱾ ᱪᱮᱫᱟᱜ ᱥᱮ ᱫᱟᱲᱮ ᱩᱫᱩᱜ ᱨᱮᱭᱟᱜ ᱦᱚᱸ ᱢᱤᱫ ᱦᱩᱱᱟᱹᱨ ᱠᱟᱱᱟ ᱾ ᱚᱠᱚᱭ ᱮ ᱫᱟᱲᱮᱭᱟ ᱩᱱᱤᱭ ᱡᱤᱛᱠᱟᱹᱨᱚᱜ-ᱟ ᱾ ᱱᱚᱣᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱡᱤᱭᱚᱱ ᱡᱤᱣᱤᱜᱚᱜ ᱜᱮ ᱢᱤᱫ ᱦᱮᱯᱨᱟᱣ ᱠᱟᱱᱟ ᱾ ᱚᱠᱚᱭ ᱦᱮᱯᱨᱟᱣ ᱞᱟᱹᱜᱤᱫ ᱵᱟᱭ ᱛᱤᱸᱜᱩᱱ ᱠᱷᱟᱱ ᱩᱱᱤ ᱫᱚᱭ ᱰᱷᱟᱠᱟ ᱫᱷᱟᱨᱮᱜ-ᱟ ᱾ ᱩᱱᱤᱭᱟᱜ ᱫᱚ ᱚᱠᱟ ᱜᱮ ᱴᱷᱟᱶ, ᱪᱮᱫ ᱜᱮ ᱯᱟᱴ ᱵᱟᱹᱱᱩᱜ ᱟᱱ ᱛᱟᱭᱟ ᱥᱤᱨᱡᱚᱱᱤᱭᱟᱹᱭ ᱜᱚᱲᱦᱚᱱ ᱟᱠᱟᱫ ᱱᱚᱣᱟ ᱦᱟᱯᱲᱟᱜ ᱢᱚᱧᱪᱚᱯᱩᱨᱤ ᱠᱷᱮᱞᱚᱸᱰ ᱢᱮᱞᱟᱝᱠᱤ ᱨᱮ ᱾ ᱵᱚᱦᱚᱜ ᱨᱮ ᱦᱟᱛᱟᱝ ᱢᱮᱱᱟᱜ-ᱟ, ᱦᱚᱲᱢᱚ ᱨᱮ ᱫᱟᱲᱮ ᱢᱮᱱᱟᱜ-ᱟ, ᱮᱱᱠᱷᱟᱱ ᱚᱱᱟ ᱦᱮᱞᱟᱣ ᱛᱮ ᱦᱩᱭ ᱟᱢᱟ ᱦᱚᱠ ᱟᱹᱭᱫᱟᱹᱨ ᱥᱟᱶᱛᱮ ᱥᱚᱨᱮᱥ ᱡᱤᱭᱚᱱ ᱡᱤᱣᱤᱫᱚᱜ ᱞᱟᱹᱜᱤᱫ ᱾ ᱵᱟᱢ ᱦᱮᱞᱟᱣ ᱠᱷᱟᱱ ᱦᱮᱞᱮᱡ ᱚᱪᱚᱜ ᱟᱢ ᱵᱟᱹᱭᱨᱤ ᱴᱷᱮᱱ ᱱᱚᱣᱟ ᱫᱚ ᱴᱷᱟᱹᱣᱠᱟᱹ ᱜᱮᱭᱟ ᱾
ᱚᱠᱛᱚ ᱛᱟᱦᱮᱸ ᱠᱟᱱᱟ, ᱵᱟᱹᱭᱨᱤ ᱵᱤᱨᱳᱫᱷ ᱞᱟᱹᱜᱤᱫ ᱦᱟᱹᱛᱭᱟᱹᱨ ᱦᱟᱵᱟᱜ ᱦᱩᱭ ᱞᱮᱱ ᱜᱮᱭᱟ ᱾
ᱤᱠᱷᱟᱹᱱ ᱱᱤᱛᱚᱜ ᱞᱮᱠᱟᱱ ᱡᱩᱜᱽᱨᱮ ᱦᱚᱠ, ᱟᱹᱭᱫᱟᱹᱨ, ᱥᱟᱶᱛᱮ ᱡᱤᱣᱤᱫᱚᱜ ᱞᱟᱹᱜᱤᱫ ᱫᱚ ᱥᱮᱪᱮᱫ ᱦᱩᱭᱩᱜ ᱠᱟᱱᱟ ᱢᱩᱲ ᱦᱟᱹᱛᱭᱟᱹᱨ ᱾ ᱨᱟᱭ, ᱟᱹᱨᱤ, ᱱᱤᱭᱚᱢ, ᱠᱟᱹᱱᱩᱱ ᱵᱷᱟᱹᱜᱤ ᱵᱟᱰᱟᱭ ᱞᱟᱹᱠᱛᱤᱜ ᱠᱟᱱᱟ ᱾ ᱦᱚᱲᱟᱜ ᱯᱷᱟᱹᱥᱭᱟᱹᱨ ᱠᱟᱛᱷᱟ ᱛᱮ ᱢᱟᱭᱟᱢ ᱵᱟᱝ ᱞᱚᱞᱚ ᱠᱟᱛᱮ, ᱱᱮᱢᱚᱥ ᱵᱮᱵᱷᱟᱨ ᱟᱯᱱᱟᱨ ᱨᱮᱭᱟᱜ ᱚᱠᱛᱚ ᱠᱟᱱᱟ ᱾ ᱦᱟᱛᱟᱝ ᱨᱮᱭᱟᱜ ᱞᱟᱥᱮᱨ ᱛᱟᱨᱣᱟᱲᱮ ᱛᱮ ᱢᱟᱬᱟᱝ ᱞᱟᱦᱟᱜ ᱦᱚᱨ ᱦᱮᱸᱥᱮ ᱯᱷᱟᱨᱪᱟ ᱞᱟᱹᱠᱛᱤ ᱠᱟᱱᱟ ᱾ ᱦᱚᱨ ᱫᱚ ᱢᱮᱱᱟᱜ ᱴᱷᱤᱠ ᱜᱮᱭᱟ, ᱟᱹᱠᱤᱞ ᱟᱦᱞᱟ ᱛᱮ ᱛᱮᱨᱟᱝ ᱢᱟᱨᱥᱟᱞ ᱟᱠᱟᱱ ᱢᱮᱫ ᱛᱮ ᱚᱱᱟ ᱩᱨᱩᱢ ᱩᱨᱤᱡ ᱞᱟᱹᱠᱛᱤᱜ ᱠᱟᱱᱟ ᱾ ᱟᱢᱮᱢ ᱞᱟᱦᱟᱜ ᱞᱟᱹᱜᱤᱫ ᱴᱷᱟᱹᱣᱠᱟᱹ ᱜᱚᱴᱟ ᱟᱠᱟᱫ ᱦᱚᱨ ᱨᱮ ᱢᱟᱬᱟᱝ ᱞᱟᱦᱟᱜ ᱞᱟᱹᱜᱤᱫ ᱦᱚᱨ ᱜᱮ ᱥᱚᱡᱷᱮ ᱦᱩᱭᱩᱜ-ᱟ ᱾ ᱟᱫᱷᱟ ᱜᱮᱭᱟᱱ ᱠᱷᱟᱹᱛᱤᱨ ᱵᱟᱹᱭᱨᱤ ᱟᱞᱚᱭ ᱵᱷᱤᱲᱠᱟᱹᱣ ᱢᱮᱢᱟ ᱾
ᱛᱷᱤᱨ ᱛᱷᱤᱨ ᱛᱮ ᱞᱟᱪᱷᱟ ᱛᱩᱯᱩᱫ ᱴᱟᱺᱰᱤ ᱨᱮ ᱱᱚᱱᱚᱞ ᱦᱟᱹᱛᱭᱟᱹᱨ ᱛᱮᱜᱮ ᱦᱩᱞ ᱫᱚ ᱡᱤᱛᱠᱟᱹᱨᱚᱜ ᱦᱩᱭᱩᱜ-ᱟ ᱟᱨ ᱱᱚᱝᱠᱟᱱ ᱦᱩᱞ ᱜᱮ ᱦᱩᱭᱩᱜ ᱞᱟᱹᱠᱛᱤ ᱟᱹᱭᱫᱟᱹᱨ ᱞᱟᱹᱜᱤᱫ ᱦᱩᱞᱥᱟᱹᱭ ᱛᱩᱯᱩᱫ ᱴᱟᱺᱰᱤ ᱨᱮ ᱾
***
