ᱦᱩᱞᱼᱥᱮᱸᱜᱮᱞ

ᱦᱩᱞ ᱥᱮᱸᱜᱮᱞ ᱥᱟᱞᱜᱟᱣ ᱮᱱᱟ,
ᱵᱷᱚᱜᱽᱱᱟᱰᱤ ᱰᱟᱹᱦᱤ ᱨᱮ ᱡᱩᱞ ᱮᱱᱟ,
ᱦᱩᱞᱥᱟᱹᱭ ᱦᱩᱞᱜᱟᱹᱨᱤᱭᱟᱹ ᱠᱚ ᱥᱟᱡᱟᱣ ᱮᱱᱟ,
ᱦᱚᱲᱼᱦᱚᱯᱚᱱ ᱡᱚᱛᱚ ᱠᱚ ᱥᱟᱯᱲᱟᱣ ᱮᱱᱟ ᱾

ᱞᱟᱞᱪᱤᱼᱡᱚᱢᱤᱫᱟᱨ,ᱢᱟᱦᱟᱡᱚᱱ ᱞᱮᱞᱦᱟ,
ᱱᱚᱛᱮ ᱮᱸᱜᱽᱨᱮᱡᱽᱼᱥᱚᱨᱠᱟᱨ ᱡᱷᱟᱢᱞᱟ,
ᱜᱚᱴᱟᱯᱟᱲᱟ ᱛᱮ ᱠᱷᱮᱨᱣᱟᱲ ᱢᱮᱱᱟᱜ ᱠᱚ ᱡᱟᱞᱟ,
ᱨᱚᱰᱚᱡᱼᱠᱚᱪᱞᱚᱱ ᱫᱤᱱ ᱜᱮ ᱫᱤᱱ ᱵᱟᱹᱲᱛᱤ ᱮᱱᱟ ᱟᱭᱢᱟ ᱾

ᱪᱤᱠᱟᱹᱛᱮ ᱛᱷᱤᱨ ᱛᱟᱦᱮᱸᱱ ᱠᱷᱮᱨᱣᱟᱲ ᱵᱚᱭᱦᱟ?
ᱵᱟᱹᱭᱼᱵᱟᱹᱭ ᱛᱮ ᱡᱩᱢᱤᱫ ᱡᱚᱴᱟᱣ ᱮᱱᱠᱚ ᱠᱷᱮᱨᱣᱟᱲ ᱵᱚᱭᱦᱟ,
ᱟᱹᱜᱭᱩᱨᱤᱭᱟᱹ ᱠᱚ ᱛᱤᱸᱜᱩ ᱮᱱ ᱢᱩᱨᱢᱩ ᱯᱟᱹᱨᱤᱥ ᱯᱩᱱ ᱵᱚᱭᱦᱟ,
ᱥᱤᱫᱚ, ᱠᱟᱹᱱᱦᱩ, ᱪᱟᱸᱫᱽ,ᱵᱷᱟᱭᱨᱚ ᱡᱚᱛᱚ ᱵᱚᱭᱦᱟ ᱾

ᱯᱷᱩᱨᱜᱟᱹᱞ ᱩᱭᱦᱟᱹᱨ ᱠᱚ ᱠᱩᱠᱢᱩ ᱞᱮᱫ ᱵᱤᱨᱵᱟᱱᱴᱟ,
ᱱᱟᱦᱟᱪᱟᱨ ᱠᱟᱹᱢᱤ ᱵᱤᱨᱩᱫᱽ ᱨᱮ ᱦᱩᱞᱜᱟᱹᱨᱤᱭᱟᱹ,
ᱛᱤᱸᱜᱩ ᱜᱟᱸᱰᱮ ᱮᱱᱠᱚ ᱥᱟᱯᱟᱵ ᱠᱟᱛᱮᱫ ᱯᱷᱩᱨᱜᱟᱹᱞᱤᱭᱟᱹ,
ᱛᱤᱸᱜᱩ ᱜᱟᱸᱰᱮ ᱮᱱᱠᱚ ᱥᱟᱯᱟᱵ ᱠᱟᱛᱮᱫ ᱯᱷᱩᱨᱜᱟᱹᱞᱤᱭᱟᱹ ᱾

ᱥᱟᱨᱡᱚᱢ ᱥᱟᱠᱟᱢ ᱜᱤᱨᱟᱹ, ᱵᱷᱮᱡᱟ ᱮᱱ ᱜᱚᱴᱟ,
ᱦᱤᱨᱤᱡᱼᱯᱟᱹᱥᱤᱨ ᱦᱚᱲᱼᱦᱚᱯᱚᱱ ᱡᱩᱢᱤᱫ ᱮᱱᱠᱚ ᱜᱚᱴᱟ,
ᱠᱚᱪᱚᱞᱚᱱᱤᱭᱟᱹ ᱵᱤᱨᱩᱫᱽ ᱨᱮ ᱥᱟᱯᱲᱟᱣ ᱮᱱᱠᱚ ᱠᱷᱮᱨᱣᱟᱲ ᱜᱚᱴᱟ,
ᱦᱩᱞᱼᱥᱮᱸᱜᱮᱞ ᱠᱚ ᱥᱟᱞᱜᱟᱣ ᱠᱮᱫ ᱜᱚᱴᱟ ᱴᱚᱴᱷᱟ ᱾

ᱵᱩᱨᱥᱤᱼᱵᱟᱨᱟᱠ ᱥᱮᱸᱜᱮᱞ ᱡᱩᱞ ᱮᱱ ᱦᱩᱨᱩᱢᱼᱰᱤᱜᱤᱨ,
ᱥᱤᱸᱜᱟᱹᱲ ᱥᱟᱠᱣᱟ ᱛᱟᱨᱠᱚ ᱮᱱ ᱞᱩᱛᱩᱨᱼᱵᱷᱤᱛᱤᱨ,
ᱟᱜᱼᱥᱟᱨ, ᱠᱟᱹᱯᱤ, ᱴᱮᱸᱜᱚᱡ, ᱴᱷᱮᱸᱜᱟ ᱥᱟᱵ ᱠᱟᱛᱮᱫ ᱟᱹᱛᱠᱤᱨ,
ᱟᱹᱯᱱᱟᱹᱛ ᱟᱹᱭᱫᱟᱹᱨᱤ ᱞᱟᱹᱜᱤᱫ ᱦᱚᱲᱼᱦᱚᱯᱚᱱ ᱯᱷᱤᱨᱼᱯᱷᱤᱨ ᱾

ᱦᱟᱦᱟᱲᱟ ᱮᱱᱠᱚ ᱮᱸᱜᱽᱨᱮᱡᱽ, ᱡᱚᱢᱤᱫᱟᱨ, ᱢᱚᱦᱟᱡᱚᱱ ᱥᱟᱱᱟᱢ,
ᱵᱟᱠᱚ ᱴᱟᱨᱦᱟᱣ ᱫᱟᱲᱮᱭᱟᱫ ᱥᱟᱱᱛᱟᱲ ᱦᱚᱯᱚᱱ ᱛᱟᱯᱟᱢ,
ᱜᱩᱞᱤ ᱛᱮ ᱡᱷᱟᱸᱡᱽᱨᱟ ᱵᱷᱩᱜᱟᱹᱜ ᱮᱱ ᱠᱚᱲᱟᱢ,
ᱮᱱᱦᱚᱸ ᱦᱚᱲᱼᱦᱚᱯᱚᱱ ᱛᱤᱸᱜᱩ ᱠᱮᱴᱮᱡ ᱠᱚ ᱛᱟᱦᱮᱸ ᱮᱱ ᱫᱟᱨᱟᱢ ᱾

ᱦᱟᱡᱟᱨᱼᱦᱟᱡᱟᱨ ᱦᱚᱲᱼᱦᱚᱯᱚᱱ ᱜᱚᱡ ᱞᱚᱴᱚᱢ ᱮᱱ,
ᱵᱷᱚᱜᱽᱱᱟᱰᱤ ᱰᱟᱹᱦᱤ ᱧᱤᱫᱟᱹ ᱥᱟᱨᱟ ᱡᱩᱞ ᱮᱱ,
ᱡᱩᱞ, ᱟᱸᱜᱽᱨᱟ ᱛᱚᱨᱚᱡ ᱫᱷᱩᱸᱫᱽ ᱜᱮ ᱧᱮᱞ ᱮᱱ,
ᱦᱚᱲᱼᱦᱚᱯᱚᱱ ᱡᱤᱣᱤ ᱨᱮ “ᱦᱩᱞᱼᱥᱮᱸᱜᱮᱞ” ᱵᱟᱝ ᱤᱬᱤᱡ ᱞᱮᱱ ᱾

***