ᱚᱛᱮ ᱟᱸᱡᱚᱢᱚᱜ ᱠᱟᱱᱟ ᱦᱩᱞᱥᱟᱹᱭ ᱟᱲᱟᱝ
ᱛᱟᱠᱮᱨᱮᱱᱟ ᱫᱤᱥᱚᱢ ᱛᱟᱞᱟ ᱨᱮ ᱴᱟᱲᱟᱝ ᱴᱟᱲᱟᱝ
ᱦᱩᱞᱥᱟᱹᱭ ᱦᱩᱞᱥᱟᱹᱭ ᱜᱚᱴᱟ ᱫᱤᱥᱚᱢ ᱨᱮ ᱟᱸᱡᱚᱢᱮᱱ
ᱫᱮᱞᱟ ᱵᱚᱱ ᱥᱟᱱᱛᱟᱲ ᱦᱚᱯᱚᱱ ᱡᱩᱢᱤᱫᱽ ᱨᱮᱵᱚᱱ ᱛᱟᱦᱮᱱ ᱿
ᱡᱩᱢᱤᱫᱽ ᱜᱮ ᱛᱟᱵᱚᱱ ᱟᱵᱚᱣᱟᱜ ᱵᱟᱧᱪᱟᱣᱜ ᱰᱟᱦᱟᱨ
ᱵᱟᱝᱵᱚᱱ ᱛᱟᱦᱮᱱᱟ ᱵᱟᱹᱭᱨᱤ ᱠᱚᱣᱟᱜ ᱡᱟᱸᱜᱟ ᱞᱟᱛᱟᱨ
ᱵᱟᱹᱭᱨᱤ ᱵᱤᱨᱩᱫᱽ ᱨᱮ ᱛᱤᱸᱜᱩᱱᱟᱵᱚᱱ ᱫᱮᱞᱟ
ᱛᱤᱱᱟᱹᱜ ᱡᱩᱨ ᱡᱩᱞᱩᱢ ᱛᱟᱠᱚ ᱚᱱᱟ ᱜᱮᱵᱚᱱ ᱧᱮᱞᱟ ᱿
ᱥᱟᱵᱽ ᱛᱟᱵᱚᱱ ᱯᱮ ᱟᱜ ᱥᱟᱨ ᱠᱟᱹᱯᱤ ᱵᱩᱰᱤᱭᱟᱹ ᱴᱟᱸᱜᱟ
ᱵᱟᱝ ᱵᱚᱱ ᱯᱟᱹᱪᱩᱜᱼᱟ ᱞᱟᱦᱟᱭᱟᱵᱚᱱ ᱡᱟᱸᱜᱟ
ᱡᱩᱢᱤᱫᱽ ᱨᱮᱜᱮ ᱵᱷᱟᱹᱞᱟᱹᱭ ᱫᱚ ᱢᱮᱱᱟᱜᱼᱟ
ᱱᱤᱨᱟᱹᱭ ᱛᱟᱦᱮᱱ ᱞᱟᱹᱜᱤᱫ ᱡᱩᱢᱤᱫᱽ ᱵᱮᱜᱚᱨ ᱪᱮᱫ ᱦᱚᱸ ᱵᱟᱹᱱᱩᱜᱼᱟ ᱿
ᱟᱵᱚ ᱥᱟᱶ ᱨᱮ ᱥᱤᱫᱩ ᱠᱟᱹᱱᱩ ᱢᱮᱱᱟᱜ ᱠᱤᱱ
ᱦᱩᱞᱜᱟᱹᱨᱤᱭᱟᱹ ᱵᱤᱨ ᱵᱟᱱᱴᱟ ᱪᱟᱸᱫᱽ ᱵᱷᱟᱭᱨᱚ ᱢᱮᱱᱟᱜ ᱠᱤᱱ
ᱦᱩᱞᱥᱟᱹᱭ ᱟᱲᱟᱝ ᱛᱮ ᱫᱤᱥᱚᱢ ᱦᱚᱲ ᱠᱚ ᱪᱮᱸᱜᱷᱟᱣ ᱞᱮᱱ
ᱠᱷᱮᱨᱣᱟᱲ ᱠᱚᱫᱚ ᱡᱩᱢᱤᱫᱽ ᱠᱟᱛᱮ ᱠᱚ ᱞᱟᱦᱟ ᱮᱱ ᱿
ᱵᱟᱹᱭᱨᱤ ᱠᱚᱣᱟᱜ ᱵᱮᱵᱟᱹᱲᱤᱡ ᱵᱷᱮᱨᱚᱴᱤᱭᱟᱹ ᱠᱟᱹᱢᱤ ᱧᱮᱞ ᱛᱮ
ᱯᱷᱩᱞᱳ ᱡᱷᱟᱱᱚ ᱦᱚᱸ ᱠᱤᱱ ᱞᱟᱦᱟ ᱦᱮᱡ ᱮᱱ ᱵᱚᱭᱦᱟ ᱠᱚ ᱥᱟᱶᱛᱮ
ᱚᱠᱚᱭ ᱫᱚᱭ ᱥᱟᱦᱟᱣᱟ ᱨᱚᱰᱚᱡ ᱠᱚᱪᱞᱚᱱ ᱱᱚᱝᱠᱟᱱ ᱱᱟᱦᱟᱪᱟᱨ
ᱥᱚᱛ ᱥᱟᱹᱨᱤ ᱥᱟᱱᱛᱟᱲ ᱦᱚᱯᱚᱱ ᱫᱚ ᱵᱟᱝ ᱠᱚ ᱛᱟᱦᱮᱱ ᱛᱷᱤᱨ ᱛᱷᱟᱨ ᱿
ᱥᱟᱱᱛᱟᱲ ᱦᱚᱯᱚᱱ ᱫᱚ ᱵᱟᱝ ᱠᱟᱱᱟ ᱠᱚ ᱩᱱᱟᱹᱜ ᱞᱮᱞᱦᱟ ᱩᱫᱟᱹᱨ
ᱵᱟᱹᱫᱽ ᱠᱷᱮᱛ ᱨᱮ ᱠᱷᱟᱴᱟᱣ ᱢᱟᱹᱱᱢᱤ ᱡᱚᱨᱚᱜ ᱛᱟᱠᱚᱣᱟ ᱩᱫᱽᱜᱟᱹᱨ
ᱟᱨ ᱩᱱᱠᱩ ᱦᱮᱡ ᱟᱠᱟᱱ ᱞᱚᱵᱽ ᱞᱟᱞᱚᱪ ᱫᱮᱠᱷᱟᱣᱟᱱ
ᱞᱚᱵᱷᱟᱴᱤᱭᱟᱹ ᱞᱩᱵᱷᱤ ᱵᱟᱹᱭᱨᱤ ᱥᱤᱵᱚᱲᱟᱱ ᱥᱮᱭᱟᱱ ᱿
ᱦᱚᱲᱟᱜ ᱟᱨᱡᱟᱣ ᱫᱷᱚᱱ ᱧᱮᱞ ᱛᱮ ᱢᱮᱫ ᱨᱚᱰᱚᱡᱚᱜ ᱛᱟᱠᱚ
ᱰᱩᱸᱰᱷᱟᱹ ᱰᱩᱸᱰᱷᱤ ᱧᱟᱢ ᱛᱩᱫ ᱞᱟᱹᱜᱤᱫ ᱵᱚᱲᱦᱮᱜ ᱟᱠᱚ
ᱪᱮᱫ ᱠᱚᱪᱚ ᱠᱚ ᱨᱚᱲᱟ ᱯᱷᱤᱝ ᱯᱷᱟᱝ ᱯᱷᱟᱥ ᱯᱷᱚᱥ
ᱠᱚᱭᱚᱜ ᱨᱮᱜᱮᱢ ᱛᱟᱦᱮᱱᱟ ᱵᱟᱝ ᱦᱩᱭᱩᱜᱼᱟ ᱨᱚᱲ ᱨᱮᱱᱟᱜ ᱥᱟᱦᱚᱥ ᱿
ᱟᱹᱰᱤ ᱮᱴᱠᱮᱴᱚᱬᱮ ᱛᱟᱞᱟ ᱛᱮ ᱫᱤᱱ ᱫᱚ ᱯᱟᱨᱚᱢ ᱞᱮᱱ
ᱵᱟᱹᱭᱨᱤ ᱞᱟᱜᱟ ᱜᱤᱰᱤ ᱞᱟᱹᱜᱤᱫ ᱥᱟᱱᱟᱢ ᱜᱮᱠᱚ ᱢᱮᱱ
ᱱᱤᱪᱲᱟᱹ ᱱᱮᱠᱟ ᱵᱟᱹᱭᱨᱤ ᱡᱩᱨ ᱡᱩᱞᱩᱢ ᱠᱚ ᱪᱟᱞᱟᱣ
ᱱᱚᱣᱟ ᱫᱚ ᱮᱠᱟᱞ ᱥᱤᱫᱩ ᱠᱟᱹᱱᱩ ᱵᱟᱝ ᱜᱮᱪᱚ ᱠᱤᱱ ᱥᱟᱦᱟᱣ ᱿
ᱛᱮᱭᱟᱨ ᱠᱮᱫ ᱠᱚᱣᱟ ᱠᱤᱱ ᱫᱤᱥᱚᱢ ᱨᱩᱠᱷᱤᱭᱟᱹ ᱞᱟᱹᱜᱤᱫ ᱯᱷᱟᱹᱫᱽ ᱠᱚ
ᱦᱩᱞᱥᱟᱹᱭ ᱟᱲᱟᱝ ᱟᱛᱮ ᱠᱚ ᱫᱚᱢᱮᱞ ᱞᱮᱱᱟ ᱫᱤᱥᱩᱣᱟᱹ ᱠᱚ
ᱵᱷᱚᱜᱽᱱᱟᱰᱤ ᱟᱹᱛᱩ ᱴᱟᱺᱰᱤ ᱨᱮᱜᱮ ᱦᱩᱞ ᱠᱟᱛᱷᱟ ᱠᱚ ᱜᱚᱴᱟ ᱠᱮᱫ
ᱯᱩᱸᱰ ᱦᱟᱨᱛᱟ ᱤᱝᱨᱮᱡᱽ ᱵᱤᱨᱩᱫᱽᱨᱮ ᱦᱩᱞ ᱮᱦᱚᱵ ᱞᱮᱫ ᱿
ᱥᱟᱜᱟᱞ ᱥᱟᱜᱟᱞ ᱫᱤᱥᱩᱣᱟᱹ ᱟᱛᱮ ᱥᱤᱫᱩ ᱠᱟᱹᱱᱩ ᱪᱟᱸᱫᱽ ᱵᱷᱟᱭᱨᱚ ᱞᱟᱦᱟᱭᱮᱱᱟᱠᱚ
ᱯᱷᱩᱞᱳ ᱡᱷᱟᱱᱚ ᱥᱟᱶᱛᱮ ᱟᱭᱢᱟ ᱛᱤᱨᱞᱟᱹ ᱦᱚᱯᱚᱱ ᱦᱚᱸ ᱦᱩᱞ ᱞᱮᱫᱟ ᱠᱚ
ᱛᱟᱯᱟᱢ ᱛᱩᱯᱩᱫ ᱠᱚ ᱞᱟᱜᱟᱣ ᱮᱱᱟ ᱦᱚᱲᱢᱚ ᱢᱟᱭᱟᱢ ᱞᱤᱜᱤᱭᱮᱱ
ᱚᱛ ᱦᱟᱥᱟ ᱫᱷᱩᱲᱤ ᱫᱚ ᱜᱚᱨᱚᱭ ᱰᱟᱵᱚᱭ ᱢᱟᱭᱟᱢ ᱛᱮ ᱞᱚᱦᱚᱫ ᱮᱱ ᱿
ᱢᱟᱭᱟᱢ ᱞᱤᱸᱜᱤᱱ ᱡᱤᱣᱤ ᱪᱟᱞᱟᱜ ᱨᱮᱦᱚᱸ ᱡᱤᱛᱠᱟᱹᱨ ᱪᱤᱨ ᱵᱚᱱ ᱚᱴᱟᱝ
ᱟᱵᱚᱣᱟᱜ ᱵᱷᱟᱨᱚᱛ ᱟᱵᱚᱣᱟᱜ ᱫᱤᱥᱚᱢ ᱨᱮ ᱟᱸᱫᱚᱲᱮᱱᱟ ᱦᱩᱞᱥᱟᱹᱭ ᱟᱲᱟᱝ ᱾
***
