ᱥᱩᱭ ᱥᱩᱛᱟᱹᱢ ᱫᱚ ᱱᱤᱫᱷᱟᱹᱱ ᱟᱞᱚᱢ ᱢᱚᱱᱮᱭᱟ ᱾ ᱚᱲᱮᱡ ᱟᱠᱟᱱ ᱞᱩᱜᱽᱲᱤ ᱥᱩᱢᱩᱝ ᱫᱚ ᱵᱟᱭ ᱡᱚᱲᱟᱣᱟ, ᱥᱟᱹᱜᱟᱹᱭ ᱨᱮᱱᱟᱜ ᱚᱲᱮᱡ ᱦᱚᱸᱭ ᱡᱚᱲᱟᱣ ᱜᱮᱭᱟ ᱾ ᱱᱚᱣᱟ ᱠᱟᱛᱷᱟ ᱤᱧ ᱟᱭᱳᱣᱟᱜ, ᱱᱤᱛ ᱦᱚᱸ ᱞᱩᱛᱩᱨ ᱦᱩᱯᱟᱹᱜ ᱨᱮ ᱛᱟᱠᱮᱨᱚᱜ ᱠᱟᱱᱟ ᱾ ᱥᱮᱫᱟᱭ ᱤᱧ ᱢᱟᱢᱚ ᱦᱟᱲᱟᱢ ᱪᱮᱛᱟ ᱵᱟᱨ ᱛᱷᱟᱹᱠᱤ ᱪᱚᱸᱫᱟ ᱯᱚᱨᱮ ᱜᱩᱞ ᱰᱟᱵᱟ ᱨᱮ ᱵᱟᱨ ᱜᱮᱞ ᱯᱩᱱ ᱜᱚᱴᱟᱝ ᱵᱷᱮᱜᱟᱨᱼᱵᱷᱮᱜᱟᱨ ᱨᱚᱝ ᱨᱮᱱᱟᱜ ᱥᱩᱛᱟᱹᱢ ᱥᱟᱶᱛᱮ ᱚᱲᱟᱜ ᱨᱮᱱᱟᱜ ᱥᱩᱭ ᱦᱚᱸ ᱥᱟᱡᱟᱣ ᱠᱟᱛᱮ ᱛᱟᱦᱮᱸ ᱠᱟᱱᱟ ᱾ ᱛᱮᱦᱮᱧ ᱫᱩᱲᱩᱵ ᱠᱟᱛᱮ ᱚᱱᱟ ᱠᱟᱛᱷᱟ ᱠᱚᱜᱮ ᱩᱭᱦᱟᱹᱨ ᱵᱷᱟᱹᱵᱤᱛ ᱵᱟᱲᱟᱜ ᱠᱟᱱ ᱛᱟᱦᱮᱸᱫ ᱮ ᱯᱟᱨᱚ ᱾
ᱥᱩᱭ ᱨᱮ ᱥᱩᱛᱟᱹᱢ ᱛᱟᱵ ᱞᱟᱹᱜᱤᱫ ᱟᱡ ᱟᱭᱳ ᱯᱟᱨᱚ ᱜᱮᱭ ᱦᱚᱦᱚ ᱟᱭ ᱛᱟᱦᱮᱸᱫ ᱾ ᱯᱟᱨᱚ ᱦᱚᱸ ᱢᱤᱼᱢᱤᱫ ᱫᱷᱟᱣ ᱟᱹᱰᱤ ᱮᱫᱽᱨᱮ ᱟᱛᱮ ᱢᱮᱱ ᱜᱚᱫᱟᱭ ᱚᱲᱟᱜ ᱨᱮ ᱩᱱᱟᱹᱜ ᱦᱚᱲ ᱛᱟᱦᱮᱸᱱ ᱛᱩᱞᱩᱡ ᱟᱢ ᱤᱧ ᱜᱮ ᱪᱮᱫᱟᱜ ᱮᱢ ᱦᱚᱦᱚᱣᱟᱹᱧ ᱛᱟᱦᱮᱸᱫ ᱾ ᱟᱡ ᱟᱭᱳᱭ ᱢᱮᱱᱟ ᱱᱚᱣᱟ ᱜᱷᱟᱨᱚᱸᱡᱽ ᱨᱤᱱᱤᱡ ᱢᱟᱨᱟᱝ ᱵᱤᱴᱤ ᱩᱱᱠᱩ ᱫᱚ ᱦᱩᱰᱤᱧ ᱵᱚᱭᱦᱟ ᱠᱟᱱᱟ ᱠᱚ, ᱟᱢ ᱜᱮ ᱥᱩᱭ ᱥᱩᱛᱟᱹᱢ ᱞᱮᱠᱟ ᱦᱟᱯᱮᱱ ᱫᱤᱱ ᱨᱮᱢ ᱡᱚᱲᱟᱣ ᱠᱟᱠᱚᱣᱟ ᱾ ᱮᱫᱽᱨᱮ ᱮᱫᱽᱨᱮ ᱛᱮ ᱨᱮᱦᱚᱸ ᱟᱡ ᱟᱭᱳᱭ ᱜᱚᱲᱚ ᱟᱭᱟ ᱥᱩᱭ ᱨᱮ ᱥᱩᱛᱟᱹᱢ ᱛᱟᱵ ᱞᱟᱹᱜᱤᱫ ᱾
ᱯᱟᱨᱚ ᱛᱮᱠᱚᱣᱟᱜ ᱜᱷᱟᱨᱚᱸᱡᱽ ᱨᱮᱫᱚ ᱡᱚᱛᱚ ᱦᱚᱲ ᱢᱤᱫ ᱨᱮᱜᱮ ᱠᱚ ᱛᱟᱦᱮᱸ ᱠᱟᱱᱟ ᱾ ᱜᱚᱲᱚᱢ ᱵᱩᱰᱷᱤ ᱜᱮ ᱚᱲᱟᱜ ᱨᱤᱱᱤᱡ ᱢᱩᱲ ᱢᱟᱹᱞᱤᱠ ᱫᱚᱭ ᱛᱟᱦᱮᱸ ᱠᱟᱱᱟ ᱾ ᱜᱷᱟᱨᱚᱸᱡᱽ ᱨᱮ ᱢᱟᱨᱟᱝ ᱦᱩᱰᱤᱧ ᱨᱮᱱᱟᱜ ᱟᱹᱰᱤ ᱢᱟᱹᱱ ᱛᱟᱦᱮᱸ ᱠᱟᱱᱟ ᱾ ᱦᱩᱰᱤᱧ ᱵᱟᱵᱟ ᱛᱤᱠᱤᱱ ᱵᱟᱨ ᱦᱚᱲ ᱾ ᱦᱟᱛᱚᱢ ᱠᱚᱫᱚ ᱢᱟᱲᱟᱝ ᱨᱮᱜᱮ ᱠᱚ ᱴᱷᱟᱶ ᱟᱠᱟᱱ ᱛᱟᱦᱮᱸᱱ ᱾ ᱛᱟᱞᱟ ᱵᱟ ᱨᱤᱱ ᱯᱮᱭᱟ ᱜᱤᱫᱽᱨᱟᱹ ᱢᱤᱫᱴᱟᱹᱝ ᱠᱚᱲᱟ ᱟᱨ ᱵᱟᱨᱭᱟ ᱠᱩᱲᱤ ᱜᱤᱫᱽᱨᱟᱹ ᱢᱮᱱᱟᱜ ᱠᱚᱣᱟ ᱾ ᱦᱩᱰᱤᱧ ᱵᱟ ᱨᱤᱱ ᱫᱚ ᱵᱟᱨᱭᱟ ᱠᱩᱲᱤ ᱜᱤᱫᱽᱨᱟᱹ ᱟᱨ ᱯᱟᱨᱚ ᱫᱚ ᱟᱡ ᱥᱩᱢᱩᱝ ᱜᱮ ᱾ ᱯᱟᱨᱚᱭ ᱦᱩᱭ ᱮᱱ ᱛᱟᱭᱚᱢ ᱟᱡ ᱟᱭᱳᱣᱟᱜ ᱦᱚᱲᱢᱚ ᱯᱤᱲᱟᱹ ᱯᱟᱲᱟᱣ ᱞᱮᱱᱟ ᱟᱨ ᱛᱟᱭᱚᱢ ᱫᱚ ᱱᱟᱶᱟ ᱯᱮᱲᱟ ᱠᱚ ᱵᱟᱠᱚ ᱟᱹᱜᱩ ᱞᱮᱫ ᱠᱚᱣᱟ ᱾ ᱚᱲᱟᱜ ᱨᱤᱱᱤᱡ ᱢᱟᱨᱟᱝ ᱵᱟᱹᱦᱩ ᱞᱮᱠᱟᱛᱮ ᱡᱚᱛᱚ ᱦᱚᱲ ᱨᱤᱢ ᱜᱤᱫᱽᱨᱟᱹ ᱜᱮᱭ ᱫᱩᱞᱟᱹᱲ ᱠᱚ ᱛᱟᱦᱮᱸᱱ ᱾ ᱯᱟᱨᱚ ᱟᱭᱳᱣᱟᱜ ᱰᱟᱸᱰᱟ ᱫᱚ ᱯᱮᱨᱮᱡ ᱟᱠᱟ ᱜᱮ ᱛᱟᱦᱮᱸ ᱠᱚᱜ ᱛᱟᱦᱮᱸᱫ ᱾ ᱢᱤᱫ ᱦᱚᱲ ᱮ ᱟᱬᱜᱚ ᱮᱱᱠᱷᱟᱱ ᱜᱮ ᱟᱨ ᱢᱤᱫ ᱦᱚᱲ ᱮ ᱦᱮᱵᱮ ᱮᱱ ᱨᱮ ᱯᱟᱨᱚ ᱟᱹᱲᱤᱥ ᱮ ᱟᱴᱠᱟᱨᱟ ᱡᱚᱠᱷᱚᱱ ᱤᱛᱩᱱ ᱟᱥᱲᱟ ᱠᱷᱚᱱ ᱮ ᱨᱩᱣᱟᱹᱲ ᱠᱚᱜᱼᱟ ᱾ ᱡᱚᱢ ᱠᱷᱚᱡᱽ ᱡᱷᱚᱜ ᱮ ᱢᱮᱱᱟ – ᱦᱚᱯᱚᱱ ᱟᱭᱳ ᱛᱤᱠᱤᱱ ᱠᱚᱭ ᱠᱤᱱ ᱢᱮᱥᱮ ᱾ ᱵᱟᱢ ᱧᱮᱞᱤᱧ ᱠᱟᱱᱟ ᱦᱩᱰᱤᱧ ᱵᱤᱴᱤᱧ ᱡᱚᱢ ᱚᱪᱚᱭᱮ ᱠᱟᱱᱟ ᱾ ᱦᱚᱯᱚᱱ ᱟᱭᱳ ᱛᱤᱠᱤᱱ ᱮ ᱢᱮᱛᱟ ᱠᱤᱱ ᱨᱮ ᱥᱚᱸᱜᱮ ᱛᱮ ᱫᱟᱠᱟ ᱠᱤᱱ ᱞᱩ ᱟᱭᱟ ᱾ ᱟᱹᱲᱤᱥ ᱧᱮᱞ ᱛᱮ ᱟᱡ ᱟᱭᱳ ᱢᱮᱱ ᱜᱚᱫᱟᱭ ᱟᱢ ᱫᱚᱢ ᱢᱟᱨᱟᱝ ᱜᱮᱭᱟ, ᱦᱩᱰᱤᱧ ᱵᱤᱴᱤ ᱛᱮᱠᱚ ᱟᱢ ᱜᱮ ᱵᱟᱢ ᱧᱮᱞ ᱠᱚ ᱠᱷᱟᱱ ᱪᱤᱠᱟᱹᱛᱮ ᱦᱩᱭᱩᱜᱼᱟ ᱾ ᱯᱟᱨᱚ ᱟᱭᱳ ᱫᱚ ᱡᱚᱛᱚ ᱜᱤᱫᱽᱨᱟᱹ ᱜᱮ ᱟᱭᱳ ᱜᱮᱠᱚ ᱦᱚᱦᱚ ᱟᱭᱟ ᱟᱨ ᱦᱩᱰᱤᱧ ᱟᱭᱳ ᱛᱤᱠᱤᱱ ᱫᱚ ᱦᱚᱯᱚᱱ ᱟᱭᱳ ᱜᱮ ᱾ ᱯᱟᱨᱚ ᱨᱤᱱ ᱦᱚᱯᱚᱱ ᱟᱭᱳ ᱛᱤᱠᱤᱱ ᱦᱚᱸ ᱟᱹᱰᱤ ᱠᱩᱥᱤ ᱾ ᱜᱤᱫᱽᱨᱟᱹ ᱵᱷᱩᱞᱟᱹᱣ ᱠᱷᱚᱱ ᱠᱤᱱ ᱥᱟᱦᱟ ᱠᱚᱜᱼᱟ ᱾ ᱯᱟᱨᱚ ᱟᱡ ᱵᱟᱵᱟ ᱟᱡ ᱟᱭᱳ ᱧᱮᱞ ᱠᱟᱛᱮ ᱯᱟᱨᱚᱭ ᱢᱮᱛᱟᱭᱟ, ᱟᱢ ᱟᱭᱳ ᱧᱮᱞᱮ ᱢᱮ ᱦᱚᱲᱢᱚ ᱨᱮᱱᱟᱜ ᱦᱟᱢᱟᱞ ᱛᱩᱞᱟᱹ ᱞᱮᱠᱟᱭ ᱥᱚᱢᱟᱱ ᱞᱟᱹᱜᱤᱫ ᱾ ᱜᱤᱫᱽᱨᱟᱹ ᱫᱚ ᱞᱮᱛᱟᱲ ᱮ ᱦᱮᱵᱮ ᱠᱟᱭ ᱠᱟᱱᱟ ᱾ ᱩᱱ ᱡᱷᱚᱜ ᱯᱟᱨᱚ ᱟᱭᱳᱭ ᱢᱮᱱᱟ – ᱦᱚᱲᱢᱚ ᱨᱮᱱᱟᱜ ᱦᱟᱢᱟᱞ ᱫᱚ ᱵᱟᱝᱼᱟ ᱥᱚᱝᱥᱟᱨ ᱨᱮᱱᱟᱜ ᱦᱟᱢᱟᱞ ᱤᱧ ᱥᱚᱢᱟᱱᱮᱜᱼᱟ ᱾
ᱯᱟᱨᱚᱭ ᱩᱭᱦᱟᱹᱨ ᱟᱠᱟᱫ ᱜᱮᱭᱟ ᱤᱛᱩᱱ ᱟᱥᱲᱟ ᱠᱷᱚᱱ ᱨᱩᱣᱟᱹᱲ ᱚᱠᱛᱮ ᱡᱚᱠᱷᱚᱱ ᱟᱡ ᱟᱭᱳ ᱚᱱᱟ ᱥᱩᱭ ᱥᱩᱛᱟᱹᱢ ᱚᱰᱚᱠ ᱠᱟᱛᱮ ᱚᱲᱮᱡ ᱞᱩᱜᱽᱲᱤ ᱠᱚᱭ ᱥᱤᱞᱟᱹᱭᱟ, ᱩᱱ ᱡᱷᱚᱜ ᱯᱟᱨᱚᱭ ᱠᱩᱞᱤ ᱜᱚᱫ ᱞᱮᱫᱮᱭᱟ, ᱤᱧᱟᱜ ᱯᱩᱛᱷᱤ ᱨᱮᱢᱟ ᱞᱤᱴᱟᱹ ᱟᱜ ᱨᱮ ᱮᱭᱟᱭ ᱜᱚᱴᱟᱝ ᱨᱚᱝ ᱜᱮ ᱢᱮᱱᱟᱜᱼᱟ ᱾ ᱟᱞᱮ ᱦᱚᱸᱞᱮ ᱯᱟᱲᱦᱟᱣ ᱟᱠᱟᱫᱟ ᱮᱭᱟᱭ ᱜᱚᱴᱟᱝ ᱨᱚᱝ ᱟᱨ ᱤᱧᱟᱜ ᱨᱚᱝ ᱵᱟᱠᱥᱟ ᱨᱮ ᱜᱮᱞᱵᱟᱨ ᱜᱚᱴᱟᱝ ᱨᱚᱝ ᱢᱮᱱᱟᱜᱼᱟ ᱾ ᱟᱢᱟᱜ ᱥᱩᱭ ᱥᱩᱛᱟᱹᱢ ᱵᱟᱠᱥᱟ ᱨᱮᱫᱚ ᱪᱤᱠᱟᱹᱛᱮ ᱵᱟᱨᱜᱮᱞ ᱯᱩᱱ ᱞᱮᱠᱟᱱᱟᱜ ᱨᱚᱝ ᱥᱩᱛᱟᱹᱢ ᱢᱮᱱᱟᱜᱼᱟ ᱾ ᱩᱱ ᱡᱷᱚᱜ ᱯᱟᱨᱚ ᱟᱭᱳᱭ ᱢᱮᱱᱟ, ᱵᱟᱜᱮ ᱯᱩᱱ ᱜᱚᱴᱟᱝ ᱨᱚᱝ ᱫᱚ ᱥᱚᱝᱥᱟᱨ ᱨᱮᱱᱟᱜ ᱨᱩᱯ ᱠᱟᱱᱟ ᱾ ᱚᱱᱟ ᱜᱮ ᱢᱤᱫ ᱥᱩᱛᱟᱹᱢ ᱨᱮ ᱛᱚᱞ ᱫᱚᱦᱚ ᱨᱮᱱᱟᱜ ᱤᱧ ᱨᱤᱠᱟᱹ ᱟᱠᱟᱫᱼᱟ ᱾ ᱥᱩᱭ ᱥᱩᱛᱟᱹᱢ ᱵᱟᱠᱥᱟ ᱯᱟᱨᱚ ᱟᱭᱳᱭ ᱚᱰᱚᱠ ᱞᱮᱠᱷᱟᱱ ᱯᱟᱨᱚ ᱟᱡ ᱵᱟᱵᱟᱭ ᱢᱮᱱ ᱜᱚᱫᱟ ᱟᱢ ᱟᱭᱳᱣᱟᱜ ᱯᱤᱴᱟᱹᱨᱤ ᱵᱟᱠᱥᱚ ᱧᱮᱞ ᱛᱟᱭ ᱢᱮ ᱟᱡ ᱵᱟᱵᱟ ᱱᱚᱣᱟ ᱫᱚ ᱵᱟᱯᱞᱟ ᱵᱮᱵᱷᱟᱨ ᱨᱮ ᱮᱢ ᱟᱠᱟᱣᱟᱫᱮᱭᱟ ᱾ ᱟᱡ ᱟᱭᱳ ᱫᱚ ᱥᱮᱫᱟᱭ ᱥᱩᱭ ᱨᱮ ᱥᱩᱛᱟᱹᱢ ᱛᱟᱵ ᱨᱮ ᱟᱹᱰᱤ ᱜᱟᱱ ᱥᱤᱨᱯᱷᱟᱹᱭ ᱡᱤᱛᱠᱟᱹᱨ ᱟᱠᱟᱱᱟ ᱾ ᱥᱤᱫ ᱥᱟᱠᱟᱢ ᱟᱨ ᱥᱤᱞᱼᱠᱚᱯ ᱠᱚᱦᱚᱸ ᱛᱟᱭ ᱢᱮᱱᱟᱜᱼᱟ ᱾
ᱮᱫᱽᱨᱮ ᱛᱮ ᱟᱡ ᱟᱭᱳᱭ ᱢᱮᱱ ᱜᱚᱫᱟ, ᱟᱞᱮ ᱟᱹᱛᱩ ᱨᱮᱱᱟᱜ ᱤᱥᱯᱚᱴ ᱨᱮ ᱥᱮᱨᱢᱟ ᱯᱤᱪᱷᱤ ᱥᱩᱭ ᱨᱮ ᱥᱩᱛᱟᱹᱢ ᱛᱟᱵ ᱨᱮᱹᱧ ᱫᱟᱲᱮᱜ ᱠᱟᱱ ᱛᱟᱦᱮᱸᱫ ᱾ ᱢᱮᱰᱟᱞ ᱠᱚᱦᱚᱸᱧ ᱧᱟᱢ ᱟᱠᱟᱫᱟ ᱾ ᱵᱟᱢ ᱯᱟᱹᱛᱭᱟᱹᱣᱜ ᱠᱟᱱ ᱠᱷᱟᱱ ᱟᱞᱮ ᱟᱹᱛᱩᱨᱮ ᱠᱩᱞᱤ ᱠᱚᱢᱮ ? ᱦᱟᱯᱮᱱᱷᱟᱜ ᱤᱧ ᱫᱟᱫᱟᱧ ᱢᱮᱛᱟᱭᱟ – ᱥᱚᱦᱨᱟᱭ ᱯᱟᱨᱟᱵᱽ ᱨᱮ ᱡᱚᱛᱚ ᱢᱮᱰᱟᱞ ᱟᱨ ᱥᱤᱫ ᱥᱟᱠᱟᱢᱮ ᱟᱹᱜᱩ ᱛᱟᱨᱟᱭᱟ ᱾ ᱯᱟᱨᱚ ᱟᱡ ᱵᱟᱵᱟᱭ ᱢᱮᱱ ᱨᱩᱣᱟᱹᱲ ᱜᱚᱫᱟ, ᱟᱞᱚᱢ ᱟᱹᱜᱩ ᱚᱪᱚ ᱮᱭᱟ, ᱢᱟ ᱵᱟᱝᱠᱷᱟᱱ ᱵᱟᱡᱟᱨ ᱠᱷᱚᱱ ᱠᱤᱨᱤᱧ ᱠᱟᱛᱮ ᱛᱷᱟᱹᱭᱞᱟᱹᱜ ᱯᱮᱨᱮᱡ ᱮ ᱟᱹᱜᱩ ᱠᱟᱜᱼᱟ ᱾ ᱯᱟᱨᱚ ᱟᱭᱳᱭ ᱨᱟᱹᱜᱤᱜᱼᱟ ᱟᱨᱮ ᱢᱮᱱᱟ – ᱟᱢ ᱵᱟᱵᱟ ᱛᱤᱱᱟᱹᱜ ᱤᱧ ᱯᱟᱨᱚᱢ ᱟᱠᱟᱫᱮᱭᱟ – ᱥᱮᱫᱟᱭ ᱟᱢ ᱦᱩᱰᱤᱧ ᱵᱟ ᱛᱤᱠᱤᱱ ᱦᱩᱰᱤᱧ ᱠᱤᱱ ᱛᱟᱦᱮᱸ ᱠᱟᱱ ᱵᱤᱫᱟᱹᱞ ᱨᱮ ᱫᱚᱛᱚ ᱨᱮᱭᱟᱜ ᱵᱩᱛᱟᱹᱢ ᱥᱟᱭᱠᱮᱞ ᱛᱮ ᱤᱛᱩᱱ ᱟᱥᱲᱟ ᱥᱮᱱᱚᱜ ᱨᱮ ᱯᱮᱸᱴ ᱚᱲᱮᱡ ᱞᱮᱱ ᱨᱮ ᱱᱚᱣᱟ ᱥᱩᱭ ᱥᱩᱛᱟᱹᱢ ᱛᱮᱜᱮᱧ ᱯᱟᱨᱚᱢ ᱟᱠᱟᱫᱮᱭᱟ ᱾ ᱵᱟᱝᱠᱷᱟᱱ ᱱᱟᱶᱟ ᱞᱩᱜᱽᱲᱤ ᱠᱤᱨᱤᱧ ᱛᱮᱭ ᱨᱮᱸᱜᱮᱡ ᱪᱟᱵᱟ ᱠᱚᱜᱼᱟ ᱾ ᱯᱟᱨᱚ ᱟᱭᱳ ᱫᱚ ᱫᱚᱛᱚ ᱦᱩᱭᱮᱱ, ᱥᱟᱹᱲᱤ ᱦᱩᱭᱮᱱ, ᱡᱟᱹᱠᱤᱴ ᱦᱩᱭᱮᱱ ᱚᱲᱮᱡ ᱞᱮᱱ ᱠᱷᱟᱱ ᱥᱚᱸᱜᱮ ᱥᱤᱞᱟᱹᱭ ᱡᱩᱲᱟᱹᱣᱟᱭ ᱚᱲᱮᱡ ᱴᱷᱮᱱ ᱟᱨ ᱦᱚᱸᱭ ᱨᱚᱯᱷᱩ ᱛᱟᱨᱟᱭᱟᱭ ᱛᱤᱱᱟᱹᱜ ᱪᱚᱨᱚᱠ ᱧᱮᱞᱚᱜᱼᱟ᱾ ᱚᱠᱚᱭ ᱦᱚᱸ ᱵᱟᱠᱚ ᱵᱟᱰᱟᱭ ᱫᱟᱲᱮᱭᱟᱜᱼᱟ ᱚᱲᱮᱡ ᱞᱮᱱᱟ ᱥᱮ ᱵᱟᱦᱟ ᱜᱮ ᱵᱮᱱᱟᱣ ᱟᱠᱟᱱᱟ ᱾ ᱡᱚᱛᱚ ᱚᱲᱮᱡ ᱥᱤᱞᱟᱹᱭ ᱛᱟᱭᱚᱢ ᱨᱚᱯᱷᱩ ᱛᱟᱨᱟᱭᱟᱭ ᱟᱨ ᱨᱚᱯᱷᱩᱨᱮ ᱪᱚᱨᱚᱠ ᱥᱟᱺᱦᱤᱡ ᱵᱟᱦᱟᱭ ᱵᱮᱱᱟᱣ ᱛᱟᱨᱟ ᱠᱟᱜᱼᱟ ᱾ ᱯᱟᱨᱚ ᱟᱡ ᱵᱟᱵᱟᱦᱟᱜ ᱡᱚᱛᱚ ᱞᱩᱜᱽᱲᱤ ᱨᱮ ᱥᱤᱞᱟᱹᱭ ᱨᱮᱱᱟᱜ ᱪᱤᱱᱦᱟᱹ ᱫᱚᱢ ᱧᱟᱢ ᱜᱮᱭᱟ ᱾ ᱨᱩᱢᱟᱹᱞ ᱠᱚᱨᱮ ᱱᱟᱯᱟᱭ ᱱᱟᱯᱟᱭ ᱨᱩᱯᱷᱩᱭ ᱵᱮᱱᱟᱣ ᱠᱟᱜᱼᱟ ᱾
ᱯᱟᱨᱚᱭ ᱩᱭᱦᱟᱹᱨ ᱜᱚᱫᱟ ᱡᱚᱠᱷᱚᱱ ᱜᱚᱲᱚᱢ ᱵᱩᱰᱷᱤᱭ ᱱᱟᱥ ᱮᱱᱟ ᱵᱷᱟᱸᱰᱟᱱ ᱠᱟᱹᱢᱤ ᱠᱚ ᱪᱟᱵᱟ ᱮᱱᱟ ᱾ ᱯᱮ ᱵᱚᱭᱦᱟ ᱠᱚ ᱢᱮᱱ ᱠᱮᱫᱼᱟ, ᱱᱤᱛᱚᱜ ᱢᱟ ᱜᱤᱫᱽᱨᱟᱹ ᱠᱚ ᱦᱟᱨᱟ ᱮᱱᱟ, ᱟᱯᱟᱱ ᱟᱹᱯᱤᱱ ᱵᱚ ᱛᱟᱦᱮᱸᱱᱟ ᱡᱟᱦᱟᱸ ᱛᱤᱱᱟᱹᱜ ᱚᱛ ᱦᱟᱥᱟ ᱢᱮᱱᱟᱜᱼᱟ ᱚᱱᱟ ᱜᱮᱵᱚ ᱦᱟᱹᱴᱤᱧᱟ ᱾ ᱨᱟᱪᱟ ᱨᱮ ᱟᱹᱲᱡᱷᱟᱹᱣ ᱨᱟᱠᱟᱵ ᱮᱱᱟ ᱚᱛ ᱦᱟᱥᱟ ᱫᱷᱚᱱ ᱥᱚᱢᱯᱚᱛᱤ, ᱦᱳᱲᱳ ᱪᱟᱣᱞᱮ ᱫᱚ ᱯᱮ ᱴᱷᱮᱱ ᱦᱟᱹᱴᱤᱧᱚᱜᱼᱟ ᱾ ᱚᱲᱟᱜ ᱫᱩᱣᱟᱹᱨ ᱦᱚᱸ ᱯᱮ ᱴᱷᱮᱱ ᱠᱮᱪᱟᱜ ᱦᱟᱹᱴᱤᱧᱚᱜᱼᱟ ᱾ ᱢᱟᱹᱡᱷᱤ ᱢᱟᱯᱟᱧᱡᱤ ᱠᱚ ᱦᱮᱡ ᱟᱠᱟᱱ ᱛᱟᱦᱮᱸᱱ ᱱᱚᱣᱟ ᱦᱟᱹᱴᱤᱧ ᱨᱮ ᱥᱟᱹᱠᱷᱤ ᱥᱚᱵᱷᱟᱭ ᱞᱟᱹᱜᱤᱫ ᱾ ᱩᱱ ᱡᱚᱦᱚᱜ ᱯᱟᱨᱚ ᱟᱭᱳ ᱜᱟᱨᱡᱟᱣ ᱠᱟᱛᱮ ᱟᱪᱠᱟ ᱜᱮ ᱠᱟᱛᱷᱟᱭ ᱨᱟᱠᱟᱵ ᱠᱮᱫᱼᱟ ᱯᱮ ᱴᱷᱮᱱ ᱫᱚ ᱵᱟᱝᱼᱟ ᱛᱩᱨᱩᱭ ᱴᱷᱮᱱ ᱦᱟᱹᱴᱤᱧᱚᱜ ᱢᱟ ᱾ ᱢᱚᱬᱮ ᱜᱚᱴᱟᱝ ᱠᱩᱲᱤ ᱜᱤᱫᱽᱨᱟᱹ ᱟᱨ ᱢᱤᱫᱴᱟᱹᱝ ᱢᱮᱥᱟ ᱠᱟᱛᱮ ᱛᱩᱨᱩᱭ ᱴᱷᱮᱱ ᱦᱟᱹᱴᱤᱧᱚᱜᱼᱟ ᱾ ᱡᱚᱛᱚ ᱠᱩᱲᱤ ᱜᱤᱫᱽᱨᱟᱹ ᱤᱧ ᱴᱷᱮᱱ ᱦᱤᱡᱩᱜ ᱯᱮ ᱭᱳ ᱾ ᱠᱚᱲᱟᱢ ᱵᱷᱤᱛᱨᱤ ᱠᱷᱚᱱ ᱟᱨᱲᱟᱣ ᱠᱮᱫᱟᱭ ᱟᱭᱳ ᱾ ᱠᱩᱲᱤ ᱜᱤᱫᱽᱨᱟᱹ ᱠᱚ ᱯᱟᱨᱚ ᱟᱭᱳ ᱫᱚ ᱟᱯᱱᱟᱨ ᱡᱟᱱᱟᱢ ᱟᱭᱳ ᱜᱮ ᱠᱚ ᱟᱹᱭᱠᱟᱹᱣᱮ ᱛᱟᱦᱮᱸᱫ ᱾ ᱩᱱᱤ ᱫᱚ ᱡᱚᱛᱚ ᱦᱚᱲᱤᱡ ᱟᱭᱳ ᱠᱟᱱᱟᱭ ᱾ ᱟᱭᱳᱣᱟᱜ ᱱᱚᱣᱟ ᱫᱩᱠᱷᱟᱹᱞᱤ ᱦᱚᱦᱚ ᱟᱸᱡᱚᱢ ᱠᱟᱛᱮ ᱡᱚᱛᱚ ᱠᱩᱲᱤ ᱜᱤᱫᱽᱨᱟᱹ ᱟᱭᱳ ᱴᱷᱮᱱ ᱠᱚ ᱫᱟᱹᱲ ᱦᱮᱡ ᱮᱱᱟ ᱾ ᱟᱨ ᱟᱭᱳ ᱫᱚ ᱡᱚᱛᱚᱭ ᱜᱩᱸᱜᱩᱫ ᱠᱮᱫ ᱠᱚᱣᱟ ᱾ ᱢᱮᱱ ᱠᱮᱫᱟᱭ, ᱟᱞᱮ ᱢᱚᱬᱮ ᱵᱷᱟᱜᱽ ᱞᱮ ᱦᱟᱛᱟᱣᱟ ᱟᱨ ᱟᱯᱮ ᱫᱚ ᱢᱤᱫ ᱵᱷᱟᱜᱽ ᱾ ᱟᱯᱮ ᱡᱚᱛᱚ ᱢᱤᱫ ᱴᱷᱮᱱ ᱛᱟᱦᱮᱸᱱ ᱯᱮ ᱾ ᱟᱨ ᱟᱞᱮ ᱦᱚᱸ ᱢᱤᱫ ᱴᱷᱮᱱ ᱞᱮ ᱛᱟᱦᱮᱸᱱᱟ ᱾ ᱤᱱᱟᱹᱜ ᱠᱷᱟᱱ ᱜᱮ ᱯᱟᱭᱚ ᱦᱚᱯᱚᱱ ᱟᱭᱳ ᱛᱤᱠᱤᱱ ᱦᱚᱸ ᱠᱤᱱ ᱨᱟᱜ ᱩᱛᱟᱹᱨ ᱠᱮᱫᱼᱟ ᱟᱨ ᱯᱟᱨᱚ ᱟᱭᱳ ᱴᱷᱮᱱ ᱠᱤᱱ ᱫᱟᱹᱲ ᱥᱩᱨ ᱮᱱᱟ ᱾ ᱩᱱᱠᱩ ᱜᱤᱫᱽᱨᱟᱹ ᱞᱮᱠᱟ ᱜᱮ ᱯᱟᱨᱚ ᱟᱡ ᱵᱟᱵᱟ ᱛᱮᱠᱚᱣᱟᱜ ᱦᱚᱸ ᱢᱚᱱᱮ ᱵᱚᱫᱚᱞ ᱮᱱᱟ ᱟᱨ ᱚᱛ ᱦᱟᱥᱟ ᱚᱲᱟᱜ ᱫᱩᱣᱟᱹᱨ ᱫᱷᱚᱱ ᱥᱚᱢᱯᱚᱛᱤ ᱦᱟᱹᱴᱤᱧ ᱨᱤᱱᱤᱡ ᱚᱡᱽᱨᱟ ᱵᱷᱩᱛ ᱢᱚᱱᱮ ᱠᱷᱚᱱ ᱮ ᱥᱟᱦᱟ ᱮᱱᱟ ᱾
ᱫᱤᱫᱤ ᱥᱩᱭ ᱨᱮ ᱥᱩᱛᱟᱹᱢ ᱛᱟᱵᱽ ᱢᱮ ᱯᱩᱸᱰ ᱛᱳᱣᱟ ᱵᱟᱦᱟ ᱫᱚ ᱢᱟᱞᱟ ᱵᱮᱱᱟᱣ ᱢᱮ ᱾ ᱛᱩᱠᱩᱡ ᱜᱚᱫ ᱠᱮᱫᱮᱭᱟᱜ ᱥᱩᱜᱤ ᱩᱭᱦᱟᱹᱨ ᱫᱩᱱᱤᱭᱟᱹ ᱠᱷᱚᱱ ᱮ ᱨᱩᱣᱟᱹᱲ ᱦᱮᱡ ᱮᱱᱟ ᱾ ᱯᱟᱨᱚ ᱛᱮᱦᱮᱧ ᱫᱚ ᱟᱡ ᱟᱭᱳᱣᱟᱜ ᱵᱚᱸᱜᱟ ᱫᱤᱥᱚᱢ ᱛᱮ ᱪᱟᱞᱟᱜ ᱨᱮᱱᱟᱜ ᱢᱤᱫ ᱥᱮᱨᱢᱟ ᱯᱩᱨᱟᱹᱣ ᱟᱠᱟᱱᱟ ᱠᱩᱲᱤ ᱜᱤᱫᱽᱨᱟᱹ ᱠᱚ ᱟᱭᱳ ᱠᱚ ᱥᱟᱡᱟᱣ ᱟᱠᱟᱫᱮᱭᱟ ᱯᱷᱚᱴᱚ ᱪᱤᱛᱟᱹᱨ ᱨᱮ ᱥᱤᱱᱟᱹᱢ ᱡᱤᱣᱤ ᱞᱮᱠᱟᱭ ᱧᱮᱞᱚᱜ ᱠᱟᱱᱟ ᱾ ᱜᱤᱫᱽᱨᱟᱹ ᱠᱚ ᱫᱤᱱ ᱟᱭᱳᱣᱟᱜ ᱠᱟᱛᱷᱟ ᱠᱚ ᱩᱭᱦᱟᱹᱨ ᱮᱫᱟ ᱾ ᱱᱤᱛᱚᱜ ᱦᱚᱸ ᱨᱚᱲᱮᱫ ᱞᱮᱠᱟᱭ ᱟᱴᱠᱟᱨᱚᱜ ᱠᱟᱱᱟ ᱾ ᱥᱩᱭ ᱥᱩᱛᱟᱹᱢ ᱫᱚ ᱦᱩᱰᱤᱧ ᱟᱞᱚ ᱯᱮ ᱢᱚᱱᱮᱭᱟ ᱱᱚᱣᱟ ᱫᱚ ᱚᱲᱮᱡᱚᱜ ᱠᱟᱱ ᱥᱚᱝᱥᱟᱨ ᱨᱮᱱᱟᱜ ᱥᱟᱹᱜᱟᱹᱭ ᱮ ᱡᱚᱲᱟᱣ ᱨᱩᱣᱟᱹᱲᱟ ᱾
***
