ᱱᱟᱹᱭ ᱱᱟᱞᱟ ᱜᱟᱰᱟ ᱡᱷᱟᱨᱱᱟ
ᱜᱚᱴᱟ ᱜᱮᱛᱚ ᱟᱢᱟᱜ,
ᱞᱮᱻᱟᱠᱟᱱ ᱵᱟᱹᱭᱦᱟᱹᱲ ᱟᱲᱮ
ᱟᱲᱮ ᱜᱮᱛᱚ ᱵᱟᱢ ᱥᱟᱜᱼᱢᱟᱜ ᱿
ᱠᱟᱹᱢᱤ ᱠᱟᱛᱮ ᱟᱹᱥᱩᱞᱚᱜ ᱫᱚ
ᱟᱹᱰᱤ ᱜᱮᱛᱚᱢ ᱞᱟᱡᱟᱣᱜ,
ᱱᱟᱥᱮ ᱮᱲᱮ ᱠᱟᱹᱢᱤ ᱛᱮᱜᱮ
ᱡᱟᱸᱜᱟ ᱜᱮᱛᱚᱢ ᱵᱟᱡᱟᱣᱜ ᱿
ᱟᱹᱲᱤᱥ ᱠᱟᱛᱚᱨ ᱛᱮ ᱠᱟᱹᱢᱤ ᱛᱟᱞᱟ ᱠᱷᱚᱱ
ᱧᱤᱨ ᱠᱟᱛᱮᱢ ᱦᱤᱡᱩᱜ,
ᱦᱟᱸᱰᱮᱼᱱᱟᱰᱮ ᱮᱰᱷᱮᱨᱼᱡᱤᱠᱤ
ᱨᱮᱸᱜᱮᱡ ᱛᱮᱜᱮᱢ ᱜᱩᱡᱩᱜ ᱿
ᱠᱷᱟᱴᱟᱣ ᱠᱟᱛᱮᱢ ᱪᱟᱴᱟᱣ ᱞᱮᱨᱮ
ᱫᱷᱚᱱ ᱫᱚ ᱟᱹᱰᱤ ᱜᱮ ᱟᱨᱡᱟᱣᱜ,
ᱵᱟᱢ ᱟᱨᱡᱟᱣ ᱨᱮ ᱡᱚᱢᱟᱜ ᱧᱩᱣᱟᱜ
ᱛᱤᱥ ᱦᱚᱸ ᱵᱟᱝ ᱜᱮᱢ ᱥᱟᱴᱟᱣᱜ ᱿
ᱦᱚᱲ ᱧᱮᱞ ᱛᱮ ᱵᱩᱜᱤ ᱛᱚᱨᱟ
ᱩᱛᱤ ᱥᱩᱛᱤᱢ ᱥᱟᱡᱟᱣᱜ,
ᱟᱢ ᱧᱮᱞ ᱛᱮ ᱟᱹᱛᱩ ᱴᱚᱞᱟ
ᱜᱷᱟᱲᱮ ᱜᱮ ᱠᱚ ᱟᱸᱫᱷᱟᱜ ᱿
ᱦᱟᱴ ᱯᱟᱛᱟ ᱞᱟᱸᱜᱽᱲᱮ ᱮᱱᱮᱡ
ᱛᱤᱥ ᱦᱚᱸ ᱵᱟᱝ ᱜᱮᱢ ᱵᱷᱟᱜᱟᱣᱜ,
ᱦᱮᱲᱮᱢ ᱥᱤᱵᱤᱞ ᱠᱟᱛᱷᱟ ᱛᱮᱜᱮ
ᱫᱤᱥᱚᱢ ᱯᱮᱲᱟ ᱠᱚ ᱪᱷᱟᱸᱫᱟᱜ ᱿
***
