ᱡᱚᱛᱚ ᱥᱮᱨᱢᱟ ᱞᱮᱠᱟᱛᱮ ᱓᱐ ᱡᱩᱱ ᱫᱚ ᱦᱩᱞ ᱢᱟᱦᱟ ᱵᱚ ᱢᱟᱱᱟᱣᱟ ᱥᱮ ᱵᱚ ᱩᱭᱦᱟᱹᱨ ᱨᱩᱣᱟᱹᱲ ᱮᱫ-ᱟ ᱾ ᱦᱩᱞ ᱫᱚ ᱦᱩᱭᱩᱜ ᱠᱟᱱᱟ ᱢᱤᱫᱴᱟᱹᱝ ᱵᱤᱫᱽᱨᱚᱦᱚ ᱾ ᱡᱟᱦᱟᱸ ᱫᱚ ᱞᱟᱹᱰᱷᱟᱹᱭ ᱠᱟᱛᱮ ᱢᱤᱫᱴᱟᱹᱝ ᱚᱫᱷᱤᱠᱟᱨ ᱧᱟᱢ ᱾ ᱵᱷᱟᱨᱚᱛ ᱫᱤᱥᱚᱢ ᱨᱮᱱᱟᱜ ᱤᱝᱨᱮᱡᱽ ᱵᱤᱨᱩᱫᱷ ᱯᱩᱭᱞᱩ ᱞᱟᱹᱰᱷᱟᱹᱭ ᱫᱚ ᱦᱩᱭᱩᱜ ᱠᱟᱱᱟ ᱥᱟᱱᱛᱟᱲ ᱦᱩᱞ ᱾ ᱚᱱᱟ ᱦᱩᱞ ᱨᱮ ᱦᱩᱞᱥᱟᱹᱭ ᱥᱮᱸᱜᱮᱞ ᱫᱚ ᱠᱤᱱ ᱡᱮᱨᱮᱫ ᱞᱮᱫ-ᱟ ᱥᱤᱫᱩ ᱟᱨ ᱠᱟᱹᱱᱦᱩ ᱾
ᱩᱱᱠᱤᱱ ᱫᱚ ᱠᱤᱱ ᱡᱟᱱᱟᱢ ᱞᱮᱱᱟ ᱵᱤᱦᱟᱨ ᱯᱚᱱᱚᱛ ᱥᱟᱱᱛᱟᱲ ᱯᱟᱨᱜᱟᱱᱟ ᱦᱚᱱᱚᱛ ᱨᱮᱱᱟᱜ ᱵᱷᱚᱜᱽᱱᱟᱰᱤ ᱟᱹᱛᱩ ᱨᱮ ᱾ ᱥᱤᱫᱩ ᱢᱩᱨᱢᱩ ᱛᱮᱠᱚ ᱫᱚ ᱛᱩᱨᱩᱭ ᱵᱚᱭᱦᱟ ᱠᱚ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩ ᱛᱩᱨᱩᱭ ᱵᱚᱭᱦᱟ ᱫᱚ ᱠᱚ ᱦᱩᱭᱩᱜ ᱠᱟᱱᱟ – ᱥᱤᱫᱩ, ᱠᱟᱹᱱᱦᱩ, ᱪᱟᱸᱫᱽ, ᱵᱷᱟᱭᱨᱚ, ᱯᱷᱩᱞᱚ ᱟᱨ ᱡᱷᱟᱱᱚ ᱾ ᱱᱩᱠᱩ ᱡᱚᱛᱚ ᱦᱚᱲ ᱜᱮ ᱦᱩᱞ ᱨᱮᱭᱟᱜ ᱢᱩᱲᱩᱛ ᱴᱷᱟᱶ ᱨᱮ ᱠᱚ ᱛᱟᱦᱮᱸ ᱠᱟᱱᱟ ᱾ ᱟᱨ ᱟᱠᱚᱣᱟᱜ ᱟᱹᱭᱩᱨ ᱛᱮ ᱟᱭᱢᱟ ᱥᱟᱱᱛᱟᱲ ᱦᱚᱲ ᱠᱚ ᱦᱚᱸ ᱦᱩᱞ ᱨᱮ ᱠᱩᱨᱩᱢᱩᱴᱩ ᱠᱚ ᱛᱟᱦᱮᱸ ᱠᱟᱱᱟ ᱾
ᱥᱤᱫᱩ ᱢᱩᱨᱢᱩ ᱫᱚᱭ ᱡᱟᱱᱟᱢ ᱞᱮᱱᱟ ᱑᱘᱑᱕ ᱥᱟᱞ ᱨᱮ ᱟᱨ ᱠᱟᱹᱱᱦᱩ ᱢᱩᱨᱢᱩ ᱫᱚᱭ ᱡᱟᱱᱟᱢ ᱞᱮᱱᱟ ᱑᱘᱒᱐ ᱥᱟᱞ ᱨᱮ ᱾ ᱟᱹᱠᱤᱱᱤᱡ ᱡᱟᱱᱟᱢ ᱵᱟᱵᱟ ᱫᱚᱭ ᱛᱟᱦᱮᱸ ᱠᱟᱱᱟ ᱪᱩᱱᱩ ᱢᱩᱨᱢᱩ ᱟᱨ ᱮᱸᱜᱟᱛ ᱫᱚ ᱥᱩᱜᱤ ᱢᱩᱨᱢᱩ ᱾
᱑᱖00 ᱥᱟᱞ ᱨᱮ ᱓᱑ ᱰᱤᱥᱮᱢᱵᱚᱨ ᱤᱝᱞᱚᱸᱰ ᱨᱮ ᱤᱝᱨᱮᱡᱽ ᱠᱚ ᱤᱥᱴ ᱤᱱᱰᱤᱭᱟ ᱠᱚᱢᱯᱟᱱᱤ ᱠᱚ ᱛᱷᱟᱯᱚᱱ ᱞᱮᱫ-ᱟ ᱾ ᱑᱖᱐᱘ ᱥᱟᱹᱦᱤᱛ ᱨᱮ ᱵᱷᱟᱨᱚᱛ ᱫᱤᱥᱚᱢ ᱛᱮ ᱠᱚ ᱵᱚᱞᱚ ᱦᱮᱡ ᱮᱱᱟ ᱾ ᱯᱩᱭᱞᱩ ᱫᱚ ᱵᱮᱯᱟᱨ ᱧᱩᱛᱩᱢ ᱛᱮ ᱥᱟᱸᱜᱷᱟᱨ ᱛᱟᱦᱮᱸ ᱠᱟᱱ ᱛᱟᱠᱚᱣᱟ ᱾ ᱡᱚᱠᱷᱚᱱ ᱠᱚ ᱵᱟᱰᱟᱭ ᱠᱮᱫ-ᱟ ᱵᱷᱟᱨᱚᱛ ᱨᱮᱭᱟᱜ ᱫᱷᱚᱱ ᱫᱚᱣᱞᱚᱛ ᱨᱮᱭᱟᱜ ᱠᱮᱴᱮᱡ ᱨᱟᱠᱷᱟ ᱡᱚᱛᱚᱱ ᱨᱮᱭᱟᱜ ᱥᱩᱵᱤᱫᱷᱟ ᱵᱟᱹᱱᱩᱜ-ᱟ ᱾ ᱠᱷᱟᱱ ᱫᱚ ᱯᱚᱱᱚᱛ ᱨᱮᱭᱟᱜ ᱫᱷᱚᱱ ᱥᱚᱢᱯᱚᱛᱤ ᱪᱮᱛᱟᱱ ᱨᱮ ᱟᱠᱚᱣᱟᱜ ᱞᱩᱵᱷᱤ ᱥᱟᱨᱥᱟᱣ ᱮᱱᱟ ᱾ ᱟᱠᱚᱣᱟᱜ ᱨᱟᱡᱽ ᱵᱟᱹᱭ ᱵᱟᱹᱭ ᱛᱮ ᱵᱷᱟᱨᱚᱛ ᱫᱤᱥᱚᱢ ᱨᱮ ᱠᱚ ᱯᱟᱥᱱᱟᱣ ᱠᱮᱫ-ᱟ᱾
ᱡᱤᱣᱤ ᱠᱷᱚᱱ ᱦᱚᱸ ᱵᱟᱹᱲᱛᱤ ᱞᱟᱹᱠᱛᱤ ᱟᱱ ᱵᱤᱨ ᱵᱩᱨᱩ ᱢᱚᱱᱮ ᱵᱟᱝ ᱛᱟᱦᱮᱸ ᱠᱟᱛᱮ ᱨᱮᱦᱚᱸ ᱵᱟᱹᱭ ᱵᱟᱹᱭ ᱛᱮᱠᱚ ᱢᱩᱪᱟᱹᱫ ᱤᱫᱤ ᱮᱫ ᱛᱟᱫᱮᱸᱫ ᱾ ᱟᱹᱰᱤ ᱡᱚᱛᱚᱱ ᱛᱮ ᱫᱟᱨᱮ ᱱᱟᱹᱬᱤ ᱥᱟᱯᱷᱟ ᱠᱟᱛᱮ ᱠᱚ ᱵᱮᱱᱟᱣ ᱞᱮᱫ-ᱟ ᱾ ᱵᱟᱹᱫᱽ ᱦᱟᱥᱟ ᱚᱱᱟ ᱠᱚ ᱦᱚᱸ ᱠᱚ ᱨᱮᱡ ᱤᱜᱤ ᱮᱫ ᱠᱚ ᱛᱟᱦᱮᱸᱫ ᱾ ᱵᱟᱹᱫᱽ ᱦᱟᱥᱟ ᱠᱚ ᱱᱤᱞᱟᱹᱢ ᱨᱮ ᱠᱚ ᱨᱟᱠᱟᱵ ᱮᱫ ᱛᱟᱠᱚ ᱛᱟᱦᱮᱸᱫ ᱾ ᱟᱨ ᱩᱱ ᱚᱠᱛᱚ ᱫᱚ ᱥᱟᱦᱮᱵᱽ ᱠᱚ ᱟᱵᱚ ᱦᱚᱲ ᱦᱚᱯᱚᱱ ᱠᱚ ᱟᱹᱰᱤ ᱛᱮᱫ ᱠᱚ ᱦᱟᱨᱠᱮᱛ ᱮᱫ ᱠᱚ ᱛᱟᱦᱮᱸᱫ ᱾
ᱢᱮᱱᱠᱷᱟᱱ ᱦᱚᱲ ᱦᱚᱯᱚᱱ ᱮᱱ ᱨᱮᱦᱚᱸ ᱥᱟᱦᱮᱵᱽ ᱥᱚᱨᱠᱟᱨ ᱜᱚᱵᱚᱞ ᱨᱮ ᱛᱟᱦᱮᱸᱱ ᱵᱟᱝ ᱠᱚ ᱨᱮᱵᱮᱱ ᱞᱮᱱᱟ ᱾ ᱩᱱ ᱚᱠᱛᱚ ᱟᱵᱚ ᱨᱤᱱ ᱵᱤᱨ ᱵᱟᱱᱴᱟ ᱠᱚᱫᱚ ᱦᱩᱞ ᱨᱮᱱᱟᱜ ᱠᱟᱛᱷᱟ ᱠᱚ ᱩᱭᱦᱟᱹᱨ ᱞᱮᱫ-ᱟ ᱾ ᱟᱨ ᱢᱤᱫ ᱴᱷᱮᱱ ᱡᱟᱣᱨᱟ ᱠᱟᱛᱮ ᱫᱩᱯᱲᱩᱵ ᱠᱚ ᱜᱚᱴᱟ ᱴᱷᱟᱹᱣᱠᱟᱹ ᱞᱮᱫ-ᱟ ᱾
ᱚᱱᱟ ᱫᱩᱯᱩᱲᱩᱵ ᱨᱮ ᱨᱟᱡᱟ ᱦᱤᱥᱟᱹᱵᱽ ᱛᱮ ᱫᱚ ᱥᱤᱫᱩ ᱢᱩᱨᱢᱩ ᱠᱚ ᱵᱟᱪᱷᱟᱣ ᱠᱮᱫᱮᱭᱟ ᱟᱨ ᱢᱚᱱᱛᱨᱤ ᱞᱮᱠᱟ ᱛᱮᱫᱚ ᱠᱟᱹᱱᱦᱩ ᱢᱩᱨᱢᱩ ᱟᱨ ᱪᱟᱸᱫᱽ ᱢᱩᱨᱢᱩ ᱫᱚ ᱯᱨᱚᱥᱟᱥᱚᱱ ᱟᱨ ᱵᱷᱟᱭᱨᱚ ᱢᱩᱨᱢᱩ ᱫᱚ ᱥᱮᱱᱟᱯᱚᱛᱤ ᱞᱮᱠᱟᱛᱮ ᱠᱚ ᱛᱟᱦᱮᱸ ᱠᱟᱱᱟ ᱾
ᱚᱱᱟ ᱛᱟᱭᱚᱢ ᱥᱤᱫᱩ ᱢᱩᱨᱢᱩ ᱟᱨ ᱠᱟᱹᱱᱦᱩ ᱢᱩᱨᱢᱩ ᱛᱤᱠᱤᱱ ᱥᱟᱶᱛᱮ ᱦᱚᱲ ᱦᱚᱯᱚᱱ ᱠᱚ ᱡᱩᱢᱤᱫᱽ ᱠᱟᱛᱮ ᱥᱟᱦᱮᱵᱽ ᱥᱤᱯᱟᱦᱤ ᱥᱟᱶ ᱛᱩᱯᱩᱫ ᱠᱚ ᱮᱛᱚᱦᱚᱵ ᱞᱮᱫ-ᱟ ᱾ ᱟᱨ ᱫᱤᱥᱚᱢ ᱞᱟᱹᱜᱤᱫ ᱛᱮ ᱡᱤᱣᱤ ᱠᱚ ᱟᱞᱟᱭ ᱞᱮᱫ-ᱟ ᱾
ᱱᱚᱣᱟ ᱦᱩᱞ ᱜᱮ ᱤᱝᱨᱮᱡᱽ ᱵᱤᱨᱩᱫᱷ ᱨᱮ ᱞᱟᱹᱰᱷᱟᱹᱭ ᱨᱮᱱᱟᱜ ᱦᱚᱨ ᱫᱤᱥᱟᱹ ᱫᱚᱭ ᱮᱢ ᱚᱴᱚ ᱞᱮᱫ-ᱟ ᱾ ᱚᱱᱟ ᱛᱟᱭᱚᱢ ᱛᱮ ᱚᱱᱠᱟ ᱜᱮ ᱟᱭᱢᱟ ᱦᱩᱞ ᱦᱩᱭ ᱮᱱᱟ ᱾
ᱢᱩᱪᱟᱹᱫ ᱨᱮ ᱑᱙᱔᱗ ᱥᱟᱞ ᱨᱮ ᱚᱜᱚᱥᱴ ᱑᱕ ᱦᱤᱞᱚᱜ ᱟᱵᱚ ᱫᱚᱵᱚ ᱧᱟᱢ ᱠᱮᱫ-ᱟ ᱵᱷᱟᱨᱚᱛ ᱫᱤᱥᱚᱢ ᱨᱮᱱᱟᱜ ᱯᱷᱩᱨᱜᱟᱹᱞ ᱾ ᱥᱟᱱᱛᱟᱲ ᱜᱮ ᱯᱩᱭᱞᱩ ᱞᱟᱹᱰᱷᱟᱹᱭ ᱠᱟᱛᱮ ᱦᱚᱠ ᱚᱫᱷᱤᱠᱟᱨ ᱧᱟᱢ ᱨᱮᱱᱟᱜ ᱫᱤᱥᱟᱹ ᱠᱚ ᱩᱫᱩᱜ ᱚᱴᱚ ᱞᱮᱫ-ᱟ ᱾
***
